Ibuuku lya Bubili Ilya Ishamfumu

1 Ilyo Ahabu afwile, Moabu+ alipondokeele Israele.

2 Bushiku bumo ilyo Ahasia ali mu muputule wakwe uwa pa muulu mu Samaria, alipulile mu cipunda ico batantikepo utumbao aponena na panshi, kabili ali-icenene. E ico atumine inkombe no kusheba ati: “Kabiyeni kepusheni Baali-sebubi lesa wa ku Ekrone+ nga ca kuti nkapola ifi naicena.”+ 3 Lelo malaika wa kwa Yehova aebele Eliya*+ umwina Tishbe ati: “Ima, kabiye kakumanye inkombe sha mfumu ya ku Samaria ushebe auti, ‘Bushe mu Israele tamwaba Lesa pa kuti muleya mu kwipusha Baali-sebubi lesa wa ku Ekrone?+ 4 E ico Yehova atila: “Tawakeme pa busanshi bobe apo uleele, pantu nangu cibe shani ukafwa.”’” Lyena Eliya alimine aya no kuya.

5 Ilyo abo atumine babwelele, ilyo line abepwishe ati: “Cinshi mwabwelela?” 6 Nabo bamwaswike abati: “Kwaciba umwaume uwacitukumanya kabili acitweba ati, ‘Bwelelenimo ku mfumu iimutumine, muyeyeba amuti: “Yehova atila, ‘Bushe mu Israele tamwaba Lesa pa kuti utume abakuyaipusha Baali-sebubi lesa wa ku Ekrone? E ico tawakeme pa busanshi bobe apo uleele, pantu nangu cibe shani ukafwa.’”’”+ 7 E lyo abepwishe ati: “Bushe umwaume uwacimukumanya kabili uwacimweba ifi acilamoneka shani?” 8 E ico ba-aswike abati: “Acifwala ica kufwala ca masako+ no mushipi wa mpapa mu musana.”+ Ilyo line imfumu yatile: “Ni Eliya umwina Tishbe.”

9 Lyena imfumu yatumine uwaleangalila abashilika 50 pamo na bashilika 50 abo aleangalila. Ilyo afikile kuli Eliya, amusangile naikala pa lupili. Amwebele ati: “We muntu wa kwa Lesa wa cine,+ imfumu yatila, ‘Tentemuka ulupili.’” 10 Lelo Eliya ayaswike uwaleangalila abashilika 50 ati: “Nga ndi muntu wa kwa Lesa, umulilo naufume ku muulu+ ukocele pamo na bashilika bobe 50.” Kabili umulilo wafumine ku muulu no kumocela pamo na bashilika 50 abo ali nabo.

11 E ico imfumu yatumine na umbi uwaleangalila abashilika 50 pamo na bashilika 50 abo aleangalila. Aile-eba Eliya ati: “We muntu wa kwa Lesa wa cine, imfumu yalanda aiti, ‘Tentemuka bwangu ulupili.’” 12 Lelo Eliya abaswike ati: “Nga ndi muntu wa kwa Lesa wa cine, umulilo naufume ku muulu ukocele pamo na bashilika bobe 50.” Kabili umulilo wafumine ku muulu wamocela pamo na bashilika 50 abo ali nabo.

13 Lyena imfumu yatumine na umbi uwaleangalila abashilika 50 pamo na bashilika 50 abo aleangalila. Lelo uyu ena aninine ulupili ayafukama pa ntanshi ya kwa Eliya, alamupaapaata ati: “We muntu wa kwa Lesa wa cine, leka umweo wandi ne myeo ya babomfi bobe aba abali 50 ibe iyacindama mu menso yobe. 14 Umulilo walifuma ku muulu kabili walyoca uwaleangalila abashilika 50 na bashilika 50 abo aleangalila, kabili walyoca na umbi uwaleangalila abashilika 50 na bashilika 50 abo aleangalila. Nomba leka umweo wandi ube uwacindama mu menso yobe.”

15 E lyo malaika wa kwa Yehova aebele Eliya ati: “Tentemuka uleya nankwe. Wimutiina.” E ico alimine, atentemuka ulupili aya nankwe ku mfumu. 16 Lyena Eliya aebele imfumu ati, “Yehova atila: ‘Watumine abakuyaipusha Baali-sebubi lesa wa ku Ekrone.+ Bushe mu Israele tamwaba Lesa?+ Cinshi ushamwipushishe? E ico tawakeme pa busanshi bobe apo uleele, pantu nangu cibe shani ukafwa.’” 17 E ico alifwile, ukulingana ne fyo Yehova alandile ukupitila muli Eliya; kabili apo takwetepo umwana umwaume, Yehoramu*+ e wamupyene pa bufumu mu mwaka walenga bubili ukutula apo Yehoramu+ umwana wa kwa Yehoshafati imfumu ya Yuda atendekeele ukuteka.

18 Amalyashi yambi aya kwa Ahasia+ ne fyo acitile, bushe tabafilemba mwi buuku lya malyashi ya mfumu sha mu Israele?