Ibuuku lya Bubili Ilya kwa Samwele
1 Ilyo Shauli afwile, ninshi Davidi alibwela mu kucimfya* abena Amaleke, Davidi aikele mu Siklagi+ inshiku shibili. 2 Pa bushiku bwalenga shitatu, kwali umulumendo uwafumine mu nkambi umwali Shauli, ninshi ifya kufwala fyakwe nafilepauka kabili ali ne loba pa mutwe. Ilyo afikile apali Davidi, awile ubukupeme.
3 Davidi amwipwishe ati: “Wafuma kwi?” Amwaswike ati: “Nafulumuka ku nkambi ya bena Israele.” 4 Davidi amwipwishe ati: “Bushe ifintu fili shani? Shi njeba.” Na o amwaswike ati: “Abantu nabafulumuka inkondo kabili abengi nabafwa. Nangu fye ni Shauli na Yonatani umwana wakwe nabafwa.”+ 5 Davidi aipwishe umulumendo uwaletele ilyashi ati: “Wishibe shani ukuti Shauli no mwana wakwe Yonatani nabafwa?” 6 Umulumendo amwaswike ati: “Cali fye nkuma, nali pa Lupili lwa Gilboa,+ kabili namwene Shauli nashintilila kwi fumo lyakwe, kabili aba pa maceleta na ba pali bakabalwe balipaleme kuli ena.+ 7 Ilyo apilibukile ku numa, alimwene e lyo anjita, na ine nalyaswike nati, ‘Mukwai!’ 8 E lyo anjipwishe ati, ‘Niwe nani?’ na ine namwaswike nati, ‘Ndi mwina Amaleke.’+ 9 Lyena anjebele ati, ‘Isa unjipaye, pantu nshapusuke, lelo ncili no mweo.’* 10 E ico naile apo ali namwipaya no kumwipaya,+ pantu nalishibe ukuti ilyo awile ninshi nacenekwa tali no kupusuka. Lyena namufuulile icisote ca bufumu ne koosa pa kuti mfilete kuli imwe mwe shikulu.”
11 E lyo Davidi aikete ifya kufwala fyakwe afilepula, kabili ifi fine e fyo na baume abo ali nabo bacitile. 12 Kabili balilooseshe, balililile kabili balifungile+ mpaka icungulo pa mulandu wa kuti Shauli, umwana wakwe Yonatani, abantu ba kwa Yehova na ba mu ng’anda ya kwa Israele+ balibepeye ku lupanga.
13 Davidi aipwishe umulumendo uwaletele ilyashi ati: “Bushe uli wa kwi?” Na o amwaswike ati: “Ndi mwana wa mulebeshi, umwina Amaleke.” 14 Lyena Davidi amwebele ati: “Cinshi ushatiinine ukwipaya uo Yehova asubile?”+ 15 E lyo Davidi aitile umo pa balumendo kabili amwebele ati: “Palama umukome.” E ico alimukomene kabili alifwile.+ 16 Ilyo ashilafwa Davidi amwebele ati: “Umulopa obe ube pa mutwe obe, pantu we mwine niwe uilandiile auti, ‘Nine naipeye uo Yehova asubile.’”+
17 Lyena Davidi alooseshe Shauli no mwana wakwe Yonatani+ muli ulu lwimbo lwa bulanda* 18 kabili atile abena Yuda balingile ukusambilila ulu lwimbo lwa bulanda ulwitwa ukuti “Ubuta,” ulo balemba mwi buuku lya kwa Yashari:+
19 “We Israele, abantu bobe abayemba babepaila pa mpili shobe.+
Yangu ifyo abaume ba maka bafwa!
20 Mwishimika ici cintu mu Gati;+
Mwibilisha mu misebo ya Ashikelone,
Pantu abana banakashi ba baPelishiti bakasekelela,
Pantu abana banakashi ba bashasembululwa bakanga.
Pali imwe pekaba umume nelyo imfula,
Kabili pekamena ifilimwa fya kutuula umutuulo wa mushilo,+
Pantu pali imwe e po bakoweseeshe inkwela sha baume ba maka,
Inkwela ya kwa Shauli nomba taili iyasubwa na mafuta.
22 Ubuta bwa kwa Yonatani tabwalebwela,+
Ukwabula ukusuumya umulopa wa balwani, nangu ukwabula ukupula mu mafuta ya baume ba maka,
Kabili ulupanga lwa kwa Shauli talwalebwela ukwabula ukucitapo nangu cimo.+
23 Ilyo Shauli na Yonatani+ bali aba mweo, bali abasuma imitima kabili abantu balibatemenwe,+
Na lintu bafwile, bafwilile pamo.
24 Mwe bana banakashi ba kwa Israele, lileni Shauli,
Uwalemufwika ifya kufwala fyakashika ce pamo ne fibekobeko,
Uwalebika ifibekobeko fya golde pa fya kufwala fyenu.
25 Yangu ifyo abaume ba maka bafwa mu nkondo!
Yonatani bamwipaila pa mpili shobe!+
Walintemenwe ukucila ifyo abanakashi batemwa.+
27 Yangu ifyo abaume ba maka bafwa
Ifyanso fya nkondo na fyo nafiloba!”