Habakuki
3 Ipepo ilyo Habakuki kasesema apepele ilyo aleloosha:*
2 Mwe Yehova, nalyumfwa ilyashi pali imwe.
Mwe Yehova, ifyo mwacita filampesha amano.
Na mu nshiku shesu* mukaficite!
Mu nshiku shesu* mukalenge fikeshibikwe.
Mukebukishe ukutubelela uluse mu nshiku sha macushi.+
Ubukata bwakwe bwakupile imyulu;+
Isonde lyonse lyalemulumbanya.
Mu minwe yakwe umwafisama amaka yakwe,
Mwalefuma imyengelele ibili.
5 Pa ntanshi yakwe pali icikuko,+
Kabili umo alepita mwaleshala ubulwele ubwalelenga imibili ya bantu yakaba kwati mulilo.
6 Ilyo aiminine shilili, atenseshe isonde.+
Ilyo aloleshe, inko shalicilawike,+
Impili sha kale na kale shalilepawike.
Kabili utupili twa kale twalikonteme.+
Enda mu nshila isha kale sana.
7 Namwene amatenti ya mu Kushani yali mu bucushi.
Insalu sha matenti ya mu calo ca Midiani shaletenkana.+
8 Bushe mimana mwafulilwa mwe Yehova?
Bushe mimana mwafulilwa nga nshi?
Nelyo bushe ni bemba+ mubelele ne cipyu?
9 Mwafumya ubuta bwenu, kabili namuiteyanya ukulashilako.
Namulapa pa kupeela ifyanso* fyenu imilimo.
(Selah)
Pa kwakanya isonde mwalengele kwaba imimana.
10 Ilyo impili shamumwene+ shalyumfwile ubukali.
Imfula iikalamba yalilokele mu calo.
Amenshi ayengi yalipoomene.+
Kabili yalimine mu muulu.
11 Akasuba no mweshi fyaiminine shilili mu muulu umo fyaikala.+
Ilyo imifwi yenu yaleya yaleaka kwati lubuuto.+
Ifumo lyenu nga lyabyasha, lyalebengeshima nga nshi.
12 Mwapitile mwi sonde bukali bukali.
Kabili mwanyantawile inko* ninshi namukalipa.
13 Mwaile mu kupususha abantu benu, mu kupususha uwasubwa wenu.
Mwashonawile intungulushi ya ba mu ng’anda ya bacita ifyabipa.
Mwaonawile ing’anda ukufuma pa mufula ukufika ku mutenge. (Selah)
14 Mwatulile imitwe ya bashilika bakwe ku fyanso fyakwe
Ilyo baishile pa kuti bampase.
Balesekelela nga nshi ilyo balesansa abo balebelamina abashakwete aba kubafwa.
15 Mwanyantawile muli bemba na bakabalwe benu,
Mwapitile mu mabimbi ayakalamba aya pali bemba.
16 Ilyo naumfwile nalitutwime;
Ilyo naumfwile iciunda imilomo yandi yalitentele.
Amafupa+ yandi yalinakile;
Kabili amolu yandi yalesokona.
Lelo nalitekanya ilyo ndolela ubushiku bwa bucushi,+
Pantu bukesa pa bantu abatusansa.
17 Nangu umukunyu taubalwile,
Ne myangashi taitwele ifisabo,
Nangu imiolife taitwele,
Kabili mu mabala tamuli ifya kulya;
Nangu impaanga mu macinka shaloba,
Kabili mu matanga tamuli ing’ombe;
18 Ine nakula-angila muli Yehova;
Nakulasekelela muli Lesa we pusukilo+ lyandi.
19 Shikulu Mulopwe Yehova e ulenga ndeba na maka;+
Akalenga amolu yandi yakalecilauka nga ya nsebula
Kabili akalenga nkale-enda pa ncende ishasansuka.+
Ku mukalamba wa bakemba; pa filimba fyandi ifya nsale.