Abapingushi
10 Ilyo Abimeleke afwile, Tola umwana wa kwa Pua, umwana wa kwa Dodo, umwina Isakari, e waishileba kapingula uwa kupususha abena Israele.+ Aleikala mu Shamiri mu citungu ca mpili ica kwa Efraimu. 2 Ali kapingula wa bena Israele pa myaka 23. Lyena alifwile kabili bamushiikile mu Shamiri.
3 Ilyo afwile, Yairi umwina Gileadi e waishileba kapingula wa bena Israele kabili ali kapingula pa myaka 22. 4 Akwete abana abaume 30 abale-endela pa mpunda 30, kabili bakwete imisumba 30. Iyi imisumba baita ukuti Habote-yairi+ ukufika na lelo, kabili yaba mu citungu ca Gileadi. 5 Lyena Yairi alifwile kabili bamushiikile mu Kamone.
6 Na kabili abena Israele balecita ifyabipa mu menso ya kwa Yehova,+ kabili batendeke ukubombela ba Baali,+ ifimpashanya fya kwa Astarte, balesa ba ku Aramu,* balesa ba ku Sidone, balesa ba ku Moabu,+ balesa ba bena Amone+ na balesa ba baPelishiti.+ Balipondokele Yehova kabili balilekele ukumubombela. 7 Lyena ubukali bwa kwa Yehova ububilima ngo mulilo bwaishile pa bena Israele, ica kuti abapeele* mu minwe ya baPelishiti na mu minwe ya bena Amone.+ 8 E ico bafwantawile abena Israele kabili balibacushishe nga nshi ukutendekela muli ulya mwaka, kabili pa myaka 18 balicushishe abena Israele bonse abaleikala kwi shilya lya Yordani mu calo icali kale ica bena Amore mu Gileadi. 9 Abena Amone baleabuka na Yordani pa kuti bayelwa na Yuda na Benjamini na ba mu ng’anda ya kwa Efraimu; kabili abena Israele baliculile nga nshi. 10 Lyena abena Israele balilile kuli Yehova.+ Batile: “Twalibembuka, pantu twalimupondokela mwe Lesa wesu, kabili tubombela ba Baali.”+
11 Lelo Yehova aebele abena Israele ati: “Bushe nshamupuswishe ku bena Egupti+ na ku bena Amore,+ ku bena Amone, ku baPelishiti,+ 12 ku bena Sidone, kuli Amaleke na kuli Midiani ilyo balemucusha? Ilyo mwalilile kuli ine nalimupuswishe mu minwe yabo. 13 Lelo mwalimpondokele no kutendeka ukubombela balesa bambi.+ E co nshakamupusushishe na kabili.+ 14 Kalilileni kuli balesa abo mwasala.+ Lekeni bamupusushe ilyo mulecula.”+ 15 Lelo abena Israele baebele Yehova abati: “Twalibembuka. Mutucite ifyo mulefwaya, cikulu fye mutupusushe buno bushiku, twapaapaata.” 16 Lyena baonawile balesa bambi bambi abo balebombela kabili batampile ukubombela Yehova,+ ica kuti talefwaya abena Israele batwalilile ukucula.+
17 Mu kupita kwa nshita abena Amone+ balonganike abashilika babo pamo kabili bapangile inkambi mu Gileadi. E ico abena Israele nabo balonganike abashilika babo pamo kabili bapangile inkambi mu Mispa. 18 Abantu na bacilolo ba mu Gileadi baipushenye abati: “Nani akatutungulula pa kulwisha abena Amone?+ Lekeni abe intungulushi ya bonse abekala mu Gileadi.”