Ibuuku lya Kubalilapo Ilya Imilandu
18 Mu kupita kwa nshita, Davidi alisanshile abaPelishiti kabili alibacimfishe. Lyena apokele abaPelishiti umusumba wa Gati+ ne misumba ya uko iinono.+ 2 Davidi alicimfishe na bena Moabu,+ kabili abena Moabu baishileba ababomfi bakwe kabili balemuletela umutuulo.+
3 Davidi acimfishe Hadadesere imfumu+ ya ku Soba+ mupepi na Hamati+ ilyo aleya mu kupokolola incende ya ku Mumana wa Yufrate.+ 4 Davidi amupokele amaceleta 1,000, abalenina pali bakabalwe 7,000 e lyo na bashilika bambi 20,000.+ Lyena alemanike bakabalwe bonse abaletinta amaceleta, ashileko fye bakabalwe 100 abaletinta amaceleta.+ 5 Ilyo abena Siria aba ku Damaseke baile mu kwafwa Hadadesere imfumu ya ku Soba, Davidi aipeyepo abena Siria 22,000.+ 6 Lyena Davidi apangile inkambi sha bashilika mu musumba wa Damaseke uwa mu Siria. Abena Siria baishileba ababomfi ba kwa Davidi kabili balemuletela umutuulo. Yehova alelenga Davidi alecimfya* konse uko aleya.+ 7 Davidi alipokele na babomfi ba kwa Hadadesere inkwela sha golde, ashitwala na ku Yerusalemu. 8 Davidi asendele umukuba uwingi nga nshi mu Tibhati na mu Kuni, iyali imisumba ya kwa Hadadesere. Muli uyu umukuba, Solomone apangilemo Icishiba ca mukuba,+ inceshi ne fipe fya mukuba.+
9 Ilyo Tou imfumu ya ku Hamati aumfwile ukuti Davidi alicimfishe abashilika bonse aba kwa Hadadesere imfumu+ ya ku Soba,+ 10 ilyo line atumine Hadoramu umwana wakwe ku Mfumu Davidi pa kuti ayeiposha kabili aitashe pantu yalilwile na Hadadesere kabili yalimucimfishe (pantu Hadadesere alelwa na Tou libili libili), kabili Hadoramu atwalile Davidi ifipe fyalekanalekana ifya golde, ifya silfere ne fya mukuba. 11 Imfumu Davidi yapeele Yehova ifi fyonse+ pamo na silfere na golde ifyo yapokele aba muli ifi fyalo: icalo ca bena Edomu, ica bena Moabu, ica bena Amone,+ ica baPelishiti+ ne ca bena Amaleke.+
12 Abishai+ umwana wa kwa Seruya+ aipeye abena Edomu 18,000 mu Mupokapoka wa Mucele.+ 13 Alipangile inkambi sha bashilika mu Edomu, kabili abena Edomu bonse baishileba ababomfi ba kwa Davidi.+ Yehova alelenga Davidi alecimfya* konse uko aleya.+ 14 Davidi alitwalilile ukuteka abena Israele bonse.+ Alepingula abantu bakwe bonse mu mulinganya kabili mu bulungami.+ 15 Yoabu umwana wa kwa Seruya e wali umukalamba wa bashilika,+ Yehoshafati+ umwana wa kwa Ahiludi e walelembela imfumu ifyebo, 16 Sadoke umwana wa kwa Ahitubu na Ahimeleke umwana wa kwa Abiatari e bali bashimapepo, e lyo Shabsha e wali kalemba. 17 Benaya umwana wa kwa Yehoyada e wali intungulushi ya bena Kerete+ na bena Pelete.+ Kabili abana ba kwa Davidi e baishileba bacilolo bakalamba.