Abapingushi

20 E ico abaume bonse abena Israele ukufuma ku Dani+ ukufika ku Beere-sheba na bonse aba ku Gileadi+ balongene pamo pa cinso ca kwa Yehova pa Mispa.+ 2 Lyena abakalamba ba bantu bonse e lyo na ba mu mikowa yonse iya kwa Israele baliminine mu lukuta lwa bantu ba kwa Lesa. Abaume bali 400,000 abaipangeshe ne mpanga sha kulwilako.+

3 Abena Benjamini balyumfwile ukuti abaume abena Israele balile ku Mispa.

Lyena abaume abena Israele baipwishe abati: “Twebeni, bushe icintu cabipa ifi cacitike shani?”+ 4 E lyo umwina Lebi,+ umulume wa mwanakashi baipeye abaswike ati: “Ine no mukashi wandi umunono twaile ku Gibea+ iya mu Benjamini pa kuti e ko tuyelaala. 5 Kabili abena Gibea* balinjimine kabili bashingulwike ing’anda umo nali ubushiku. Balefwaya ukunjipaya, lelo baulunganinemo na kanakashi wandi, kabili alifwile.+ 6 E ico nabuulile icitumbi ca kwa kanakashi wandi naciputaula mu fipimfya e lyo natuma ifipimfya mu fitungu fyonse ifya calo ca Israele,+ pantu ico bacitile mu Israele ca nsoni kabili ca museebanya. 7 Nomba mwe bena Israele bonse, lanshanyeni e lyo mutwebe ifya kucita.”+

8 Lyena abantu bonse baimine pamo kabili batile: “Takuli nangu umo pali ifwe uwalaya kwi tenti lyakwe, nangu ku ng’anda yakwe. 9 Nomba ifyo twalacita ku bena Gibea ni ifi: Natupendule, pa kuti tusale aba kuyalwa nabo.+ 10 Pa baume 100 aba mu mikowa yonse iya kwa Israele tulebuulapo abaume 10, kabili pa baume 1,000 tulebuulapo abaume 100, na pa baume 10,000 tulebuulapo abaume 1,000, aba kuyasendela abashilika ifya kulya, pa kuti bayelwa na bena Benjamini, pantu balicita ica museebanya mu Israele.” 11 E ico abaume bonse aba mu Israele balyumene akapi pa kuti bayelwa na ba mu musumba wa Gibea.

12 Lyena aba mu mikowa ya mu Israele batumine abaume ku baume bonse aba mu mukowa wa kwa Benjamini, kabili babepwishe abati: “Bushe ici cintu cabipa ifi cacitike shani mu musumba wenu? 13 Nomba tupeeleni abaume ifinangwa, abali mu Gibea,+ pa kuti tubepaye, kabili tufumye ifyabipa mu Israele.”+ Lelo abena Benjamini balikeene ukucita ifyo abena Israele banabo balandile.

14 Lyena abena Benjamini balifumine mu misumba bayalongana pa Gibea pa kuti bayelwa na baume abena Israele. 15 Pali bulya bushiku abaume abaipangeshe ne mpanga sha kulwilako abo abena Benjamini baitile ukufuma mu misumba yabo bali 26,000, ukufumyako abaume 700 abo basalile mu Gibea. 16 Pali aba bashilika pali abaume 700 abalebomfya amaboko ya ku kuso. Onse pali aba abaume nga asukusa ilibwe ku cisukushilo talepusa na kantu akanono ngo mushishi.

17 Abaume abena Israele abaipangeshe ne mpanga sha kulwilako abo baitile, bena bali 400,000+ kabili bonse balishibe ukulwa inkondo. 18 E ico baliimine baya ku Betele mu kwipusha Lesa ifyo balingile ukucita.+ Lyena abena Israele baipwishe abati: “Nani pali ifwe uwalaba pa ntanshi pa kuya mu kulwa na bena Benjamini?” Yehova abaswike ati: “Ni Yuda e walaba pa ntanshi.”

19 Pa numa ya ifi abena Israele baimine ulucelo bayapanga inkambi pa kuti balwe na bena Gibea.

20 Nomba abaume abena Israele balifumine mu nkambi, kabili pa kuya mu kulwa na bena Benjamini pa Gibea bali mu mabumba mabumba. 21 E ico abena Benjamini balifumine mu Gibea, kabili baipeye abaume abena Israele 22,000 pali bulya bushiku. 22 Lelo abashilika abena Israele balishipile, kabili baile pa ncende imo ine mu mabumba mabumba nge fyo bacitile pa bushiku bwa kubalilapo. 23 Na kabili abena Israele baile mu kulilila kuli Yehova ukufika icungulo kabili baipwishe Yehova abati: “Bushe tufwile ukuyalwa na bena Benjamini bamunyinefwe na kabili?”+ Yehova abaswike ati: “Kabiyeni.”

24 E ico abena Israele baile mupepi no kwali abena Benjamini pa bushiku bwalenga bubili. 25 Abena Benjamini nabo balifumine mu Gibea pa kuti balwe nabo pa bushiku bwalenga shibili, kabili baipeye abena Israele na bambi 18,000+ abaipangeshe ne mpanga sha kulwilako. 26 Abaume abena Israele bonse baile ku Betele. Balililile kabili baikele pa cinso ca kwa Yehova+ kabili tabaliile nangu cimo+ mpaka icungulo. Balituulile ne mituulo ya koca+ ne mituulo ya mutende+ pa cinso ca kwa Yehova. 27 Pa numa abaume abena Israele baipwishe Yehova ifyo balingile ukucita,+ pantu muli shilya nshiku icipao ca cipangano ica kwa Lesa wa cine cali kulya. 28 Nomba Finehasi+ umwana wa kwa Eleasari, umwana wa kwa Aarone, e walebombela* ku cipao pali ilya nshita. E ico baipwishe abati: “Bushe tufwile ukuyalwa na bena Benjamini bamunyinefwe nelyo tatufwile ukuya?”+ Yehova abaswike ati: “Mukaye pantu mailo nkalenga mukabacimfye.” 29 Lyena abena Israele babelamike abashilika+ mu mbali shonse isha Gibea.

30 Abena Israele baile mu kulwa na bena Benjamini pa bushiku bwalenga shitatu, kabili bali mu mabumba mabumba pa kulwa na bali mu Gibea nge fyo bacitile pa nshiku shimbi.+ 31 Ilyo abena Benjamini bafumine mu musumba pa kuti balwishe abashilika abena Israele, abena Benjamini balitalwike ku musumba.+ Lyena batendeke ukusansa abaume abena Israele nge fyo bacitile pa nshiku shimbi, kabili baipaile abaume bamo mu nshila yaya ku Betele ne yaya ku Gibea. Baipeye abaume nalimo 30 mu mpanga.+ 32 E ico abena Benjamini balandile abati: “Tulebacimfya nga filya fine twabacimfishe pa kubala.”+ Lelo abena Israele batile: “Natucite kwati twafulumuka pa kuti tubatalushe ku musumba bese mu misebo.” 33 E ico abaume abena Israele bafumine umo babeleme kabili baile ku Baali-tamari pa kuti baipekanye ukulwa inkondo, ninshi abena Israele bambi balesokoloka umo babeleme mupepi na Gibea. 34 E ico abaume abena Israele abaishibishe ukulwa inkondo abali 10,000 baile ku ntanshi ya musumba wa Gibea, kabili inkondo yalikosele. Lelo abena Benjamini tabaishibe ukuti ifyabipa fyali no kubacitikila.

35 Yehova alilengele abena Israele bacimfya abena Benjamini,+ kabili pali bulya bushiku abena Israele baipeye abaume abena Benjamini 25,100. Bonse aba bali-ipangeshe ne mpanga sha kulwilako.+

36 Nomba ilyo abena Benjamini bamwene abena Israele bafulumuka batontonkenye ukuti balacimfya abaume abena Israele,+ lelo icalengele abena Israele bafulumuke ni co balicetekele ababelamine abali mu musumba wa Gibea.+ 37 Ababeleme balisokolweke bwangu bwangu baingila na mu Gibea. Lyena balisalangene kabili baipeye abali mu musumba bonse ku lupanga.

38 Nomba abaume abena Israele bapangene na babelamine abali mu musumba ukuti nga baingila mu musumba bafutumune icushi ca kwishibilako ukuti nabapoka umusumba.

39 Ilyo abena Israele bafulumwike, abena Benjamini balisanshile abena Israele kabili baipeyepo abaume nalimo 30,+ kabili abena Benjamini baleti: “Cine cine tulebacimfya nga filya fine twabacimfishe pa kubala.”+ 40 Lelo intumba ya cushi yatendeke ukwima mu musumba. E ico ilyo abena Benjamini baloleshe ku numa, bamwene umusumba onse ulebilima. 41 Lyena abaume abena Israele balipilibwike, kabili abaume abena Benjamini balifuupwike, pantu balimwene ukuti ifyabipa fyalibacitikiile. 42 E ico balifulumwike abaume abena Israele, balola ku matololo, lelo abashilika balebakonka, kabili abaume abafumine mu misumba nabo batampile ukwipaya abena Benjamini. 43 Bashingulwike abena Benjamini kabili batwalilile fye ukubakonka. Babanyantawilile apalungatana na Gibea ku kabanga. 44 Basukile baipaya abaume abena Benjamini 18,000. Bonse aba bali bashilika ba maka.+

45 Abaume abena Benjamini balyalwike bafulumukila na ku matololo ku cilibwe ca Rimone,+ kabili abena Israele baipeye abaume 5,000 abashele mu misebo, kabili batwalilile fye ukubakonka ukuyafika fye na ku Gidomu; e ico baipeye abaume na bambi 2,000. 46 Abena Benjamini bonse abafwile pali bulya bushiku bali abaume 25,000. Bonse aba bali-ipangeshe ne mpanga+ sha kulwilako kabili bali bashilika ba maka. 47 Lelo abaume 600 bafulumukiile ku matololo ku cilibwe ca Rimone, kabili baikele ku cilibwe ca Rimone imyeshi 4.

48 Kabili abaume abena Israele balibwelele mu kulwa na bena Benjamini kabili baipeye bonse abashele mu misumba kumo ne fitekwa ku lupanga. Balyocele ne misumba yonse iyali umo balepita.