Yeremia

41 Mu mweshi walenga 7, Ishmaele+ umwana wa kwa Netania umwana wa kwa Elishama uwali uwa ku bufumu* kabili uwakwete icifulo icikalamba nga nshi kwi sano, aishile na baume 10 kuli Gedalia umwana wa kwa Ahikamu ku Mispa.+ Ilyo baleliila pamo ifya kulya mu Mispa, 2 Ishmaele umwana wa kwa Netania na baume 10 abo ali nabo balimine, baipaya Gedalia umwana wa kwa Ahikamu, umwana kwa Shafani ku lupanga. E ico aipeye uo imfumu ya ku Babiloni yasontele ukuti aleteka mu calo. 3 Ishmaele aipeye na baYuda bonse abali na Gedalia ku Mispa, kumo na bashilika abena Kaldi abali kulya.

4 Pa bushiku bwalenga shibili ukutula apo baipaile Gedalia, ninshi umuntu nangu umo talaishiba ifyacitike, 5 kwaishile abaume 80 abafumine ku Shekemu,+ ku Shilo+ na ku Samaria.+ Balibeyele umwefu, bafwele ifya kufwala ifyalepauka, kabili bali-itetawile.+ Bali ne mituulo ya ngano no bubani bwabuuta+ ifyo baletwala ku ng’anda ya kwa Yehova. 6 E ico Ishmaele umwana wa kwa Netania afumine ku Mispa, aya mu kubakumanya, kabili aile alelila. Ilyo akumene nabo abebele ati: “Tuleyeni kuli Gedalia umwana wa kwa Ahikamu.” 7 Nomba ilyo baingile mu musumba, Ishmaele umwana wa kwa Netania na bashilika ali nabo baipeye balya bantu no kubapoosa mu cishima.

8 Lelo pali balya bantu, pali abaume 10 abaebele Ishmaele abati: “Witwipaya, pantu natukwata ingano, barle, amafuta no buci ifyo twafisa mwi bala.” E ico tabepaile pamo na bamunyinabo. 9 Nomba Ishmaele apoosele ifitumbi fyonse ifya bantu aipeye mu cishima icikalamba, ico Imfumu Asa yaimbile pa mulandu wa kwa Baasha imfumu ya mu Israele.+ Muli ici icishima e mo Ishmaele umwana wa kwa Netania aiswishe abantu abo baipeye.

10 Ishmaele asendele abantu bonse abashele mu Mispa+ pa kuti bayeba bankole. Asendele na bana abanakashi aba mfumu na bantu bonse abashele mu Mispa, abo Nebusaradani umukalamba wa balelonda aebele Gedalia+ umwana wa kwa Ahikamu ukuti alebateka. Ishmaele umwana wa kwa Netania alibasendele pa kuti bayeba bankole, kabili aile ku calo ca bena Amone.+

11 Ilyo Yohanani+ umwana wa kwa Karea na bakalamba ba bashilika bonse abo ali nabo baumfwile ifyabipa fyonse ifyo Ishmaele umwana wa kwa Netania acitile, 12 basendele abashilika bonse no kuyalwisha Ishmaele umwana wa kwa Netania, kabili bamusangile apali amenshi ayengi* mu Gibeone.

13 Abantu bonse abali na Ishmaele balisekelele ilyo bamwene Yohanani umwana wa kwa Karea na bakalamba bonse aba bashilika abo ali nabo. 14 Lyena abantu bonse abo Ishmaele afumishe mu Mispa+ pa kuti bayeba bankole, balipilibwike babwelelamo na Yohanani umwana wa kwa Karea. 15 Lelo Ishmaele umwana wa kwa Netania na baume 8 abo ali nabo balifulumwike Yohanani, kabili baile ku bena Amone.

16 Yohanani umwana wa kwa Karea na bakalamba bonse aba bashilika abo ali nabo, basendele abantu abashelepo abo bapokolwele kuli Ishmaele umwana wa kwa Netania uwabafumishe mu Mispa, pa numa ya kwipaya Gedalia+ umwana wa kwa Ahikamu. Basendele abaume, abashilika, abanakashi, abana na balebombela kwi sano, ukubafumya mu Gibeone. 17 E ico baile mu kwikala mu Kimhamu, icifulo ca kutushishamo icali mupepi na Betelehemu,+ pa kuti bakaye ku Egupti,+ 18 pa mulandu wa kuti baletiina abena Kaldi. Balebatiina pantu Ishmaele umwana wa kwa Netania alipeye Gedalia umwana wa kwa Ahikamu, uo imfumu ya ku Babiloni yasontele ukuti aleteka icalo.+