Ibuuku lya Kubalilapo Ilya kwa Samwele
19 Pa numa Shauli aebele Yonatani umwana wakwe na babomfi bakwe bonse ukuti alefwaya ukwipaya Davidi.+ 2 Apo Yonatani umwana wa kwa Shauli alitemenwe sana Davidi,+ Yonatani aebele Davidi ati: “Shauli tata alefwaya ukukwipaya. E ico ulucelo ukacenjele, ukaye ukwa kubelama kabili uko kwine e ko ukekale. 3 Nkaya mu mpanga iyo ukabelamamo kabili nkeminina mupepi na tata. Nkakulandilako kuli tata, kabili fyonse ifyo akalanda nkakweba.”+
4 E ico Yonatani aebele Shauli wishi ifisuma pali Davidi.+ Amwebele ati: “Imfumu taifwile ukubembukila umubomfi wa iko Davidi, pantu tamubembukila kabili ifyo acita fyalilenga ifintu fyamuwamina. 5 Aibikile mu kapoosa mweo pa kuti epaye umuPelishiti,+ kabili Yehova alengele abena Israele bacimfye sana.* Mwalimwene kabili mwalisekelele nga nshi. Nomba cinshi mulefwaila ukwipaila Davidi apabula umulandu? Cinshi mulefwaila ukwipaila uwa kaele?”+ 6 Shauli alyumfwile ifyo Yonatani amwebele, kabili Shauli alilapile ati: “Na pali Yehova, Davidi nshakamwipaye.” 7 Pa numa Yonatani aitile Davidi kabili alimwebele fyonse ifi. E ico Yonatani atwele Davidi kuli Shauli, kabili atwalilile ukumubombela nge fyo alemubombela kale.+
8 Mu kupita kwa nshita kwali inkondo na kabili, kabili Davidi aile mu kulwa na baPelishiti kabili alipeye abengi nga nshi. Abashelepo balifulumwike.
9 Kabili Yehova alengele umupashi wabipa waisa pali Shauli+ ilyo aikele mu ng’anda mu mwakwe naikata ne fumo, ninshi Davidi alelisha nsango.+ 10 Shauli apoosele ifumo pa kuti apampamine Davidi ku cibumba, lelo alilewike kabili ifumo lyalashile mu cibumba. Davidi alifulumwike kabili alifyukile ubushiku. 11 Shauli atumine aba kuya mu kulinda ing’anda ya kwa Davidi pa kuti nga bwaca bakamwipaye,+ lelo Mikali umukashi wa kwa Davidi amwebele ati: “Nga tawafyuke ubushiku, mailo ulucelo bakakwipaya.” 12 Ilyo line Mikali aishishe Davidi pa windo, pa kuti afulumuke kabili bemwipaya. 13 Mikali abuulile icilubi ca terafimu* acibika pa busanshi, kabili abikile ku mitwe insalu iyo bapikwilile na masako ya mbushi, e lyo acifimba insalu.
14 Nomba Shauli atumine abakuyaikata Davidi, lelo Mikali abebele ati: “Nalwala.” 15 E ico Shauli atumine abakuyamona Davidi kabili abebele ati: “Mumulete pa busanshi bwine pa kuti njise imwipaye.”+ 16 Ilyo abo atumine baingile, basangile pa busanshi pali icilubi ca terafimu* kabili ku mitwe kwali insalu iyo bapikwilile na masako ya mbushi. 17 Shauli aipwishe Mikali ati: “Cinshi wambepela ifi, kabili waleka no mulwani wandi+ aya pa kuti apusuke?” Mikali ayaswike Shauli ati: “Anjebele ati, ‘Leka ndeya, pantu nga tawandeke nalakwipaya!’”
18 Nomba Davidi alifulumwike kabili aile kuli Samwele ku Rama.+ Ashimikiile Samwele fyonse ifyo Shauli amucitile. Lyena Davidi na Samwele baileikala ku Nayote.+ 19 Mu kupita kwa nshita kwali abaebele Shauli abati: “Davidi ali ku Nayote mu Rama.” 20 Ilyo line fye Shauli atumine abakuyaikata Davidi. Ilyo bamwene bakasesema abakalamba balesesema kabili Samwele naiminina alebatungulula, umupashi wa kwa Lesa waishile pa bo Shauli atumine, kabili batendeke ukulacita kwati nabo ni bakasesema.
21 Ilyo baebele Shauli ifyacitike, ilyo line atumine bambi kabili nabo bene batendeke ukulacita kwati ni bakasesema. E ico Shauli atumine ibumba lyalenga butatu, kabili nabo bene batendeke ukulacita kwati ni bakasesema. 22 Mu kulekelesha na o wine alile ku Rama. Ilyo afikile ku cishima icikalamba ica mu Seku, aipwishe abantu ati: “Bushe Samwele na Davidi bali kwi?” Nabo bamwaswike abati: “Bali ku Nayote+ mu Rama.” 23 Ilyo Shauli aleya ku Nayote mu Rama, umupashi wa kwa Lesa waishile na pali ena, kabili aleya alecita kwati ni kasesema mpaka afika ku Nayote mu Rama. 24 Na o wine alifuulile ifya kufwala atendeka no kucita kwati ni kasesema pa cinso ca kwa Samwele, kabili aleele panshi ubwamba* akasuba konse no bushiku bonse. E co abantu balandila abati: “Bushe Shauli na o ni kasesema?”+