Ulwimbo lwa kwa Davidi.
143 Mwe Yehova umfweni ipepo lyandi;+
Umfweni ifyo ndemupaapaata ukuti mungafwe.
Pantu muli ba cishinka kabili mwalilungama.
2 Mwipingula umubomfi wenu,
Pantu takwaba umuntu nangu umo uwa mweo uwingaba uwalungama pa cinso cenu.+
3 Pantu umulwani alafwaya ukunjipaya;
Alishonawila umweo wandi panshi.
Alenga naikala umwafiita nga bantu abafwa kale.
4 Umupashi muli ine naupwa;+
Umutima wandi taukwete amaka.+
5 Ndebukisha inshiku sha kale;
Ndatontonkanya sana pa milimo yenu yonse;+
Ndatontonkanya sana pa fyo iminwe yenu yacita.
6 Njimisha amaboko yandi kuli imwe;
Ndamufwaisha nga filya impanga iyauma ifwaisha imfula.+ (Selah)
7 Mwe Yehova+ angufyanyeni ukunjasuka;
Amaka yandi yapwa.+
Mwimfisa icinso cenu,+
Pantu kuti naba nga baleya mu cilindi.+
8 Lekeni ng’umfwe pa kutemwa kwenu ukushipwa mu nshita ya lucelo,
Pantu nimwe nacetekela.
Lengeni njishibe inshila iyo mfwile ukwendamo,+
Pantu naisa kuli imwe pa kuti muntungulule.
9 Mpokololeni ku balwani bandi mwe Yehova.
Ncingilileni.+
10 Nsambilisheni ifya kucita ifyo mufwaya,+
Pantu nimwe Lesa wandi.
Umupashi wenu usuma;
Nauntungulule mu nshila iyaololoka.
11 Pa mulandu we shina lyenu mwe Yehova, nsungeni uwa mweo.
Mpususheni ku mafya, pantu mwalilungama.+
12 Ipayeni+ abalwani bandi, pantu mwaliba no kutemwa ukushipwa;
Lofyeni bonse abancusha,+
Pantu ndi mubomfi wenu.+