Ibuuku lya Kubalilapo Ilya kwa Samwele
16 Yehova asukile aeba Samwele ati: “Ni lilali ukaleka ukuba no bulanda pa fyo Shauli+ acitile? Ine nomba nshamusuminisha ukutwalilila ukuba imfumu ya bena Israele.+ Bika amafuta+ mu lusengo lobe kabili uleya. Ndekutuma kuli Yese+ umwina Betelehemu, pantu pa bana bakwe abaume ninsalapo uwa kuba imfumu.”+ 2 Lelo Samwele atile: “Inga kuti naya shani? Shauli nga aumfwa, akanjipaya.”+ Yehova amwebele ati: “Usende ing’ombe iyana, kabili uye ulande ati, ‘Naisa mu kutuulila Yehova ilambo.’ 3 Ukete Yese kwi lambo; lyena nkakweba ifyo ufwile ukucita. Ufwile ukusuba uo nkakweba.”+
4 Samwele alicitile ifyo Yehova amwebele. Ilyo afikile ku Betelehemu,+ abakalamba ba mu musumba batampile ukututuma ilyo bakumene nankwe, kabili bamwipwishe abati: “Bushe kuli ifilubene?” 5 Na o abebele ati: “Awe, naisa fye mu kutuulila Yehova ilambo. Muisangulule, kabili mwise kwi lambo.” Lyena asangulwile Yese na bana bakwe abaume, e lyo abeta kwi lambo. 6 Ilyo baleingila, amwene Eliabu,+ e lyo alatontonkanya ati: “Cine cine uyu eminine pa cinso ca kwa Yehova e o asubile.” 7 Lelo Yehova aebele Samwele ati: “Wibika amano ku fyo alemoneka na ku fyo alepa,+ pantu te o nsalile. Pantu ifyo umuntu amona te fyo Lesa amona, umuntu amona fye kunse, lelo Yehova ena amona mu mutima.”+ 8 Lyena Yese aitile Abinadabu+ e lyo amwiminika pa ntanshi ya kwa Samwele, lelo Samwele atile: “Uyu na o Yehova tamusalile.” 9 E lyo Yese aletele Shama,+ lelo Samwele atile: “Na uyu wine Yehova tamusalile.” 10 E ico Yese aliminike abana bakwe 7 pa ntanshi ya kwa Samwele, lelo Samwele aebele Yese ati: “Yehova tasalilepo nangu umo pali aba.”
11 Samwele asukile aipusha Yese ati: “Bushe abana bobe abaume bonse bapwa?” Na o ayaswike ati: “Kwashala fye umwaice pali bonse;+ alecema impaanga.”+ Lyena Samwele aebele Yese ati: “Tuma aba kuyamuleta, pantu tatwaikale tutampe ukulya mpaka ese.” 12 E ico atumine aba kuyamuleta kabili balimuletele. Nomba ali mulumendo uwakashikila, ali na menso ayasuma kabili alemoneka bwino.+ Lyena Yehova amwebele ati: “Ima umusube, pantu e uyu wine nsalile!”+ 13 Samwele abuulile ulusengo lwa mafuta+ kabili alimusubile ninshi na bamunyina balemonako. Kabili ukutula bulya bushiku+ umupashi wa kwa Yehova watampile ukulalenga Davidi alaba na maka. Pa numa Samwele abweleele ku Rama.+
14 Nomba Yehova alifumishe umupashi wakwe pali Shauli,+ kabili Yehova alekele umupashi wabipa walamucusha.+ 15 Ababomfi ba kwa Shauli bamwebele abati: “Namumona ukuti Lesa naleka umupashi wabipa ulemucusha. 16 Mukwai shikulwifwe ebe ababomfi bakwe bafwaye umuntu uwaishiba sana ukulisha nsango.+ Lesa nga aleka umupashi wabipa waisa pali imwe, uyo muntu akalalisha nsango, kabili mukalaumfwako bwino.” 17 E ico Shauli aebele ababomfi bakwe ati: “Mfwaileniko umuntu uwaishiba sana ukulisha nsango, kabili mumulete kuno.”
18 Umo pa babomfi bakwe alandile ati: “Mukwai ine nalimona ifyo umwana wa kwa Yese umwina Betelehemu alisha bwino nsango, kabili mushilika uwashipa kabili uwa maka.+ Alalanda bwino, alamoneka bwino+ kabili Yehova aba nankwe.”+ 19 Lyena Shauli atumine aba kuyaeba Yese ati: “Tuma Davidi umwana obe uucema impaanga ese kuno.”+ 20 E ico Yese abikile umukate ne nyambi ya mwangashi pa mpunda. Abuulile na kana ka mbushi apeela Davidi umwana wakwe pa kuti atwalile Shauli. 21 E fyo Davidi aile kuli Shauli kabili atendeke ukumubombela.+ Shauli alimutemenwe nga nshi, kabili amupeele umulimo wa kumusendela ifyanso. 22 Shauli atumine amashiwi kuli Yese ati: “Shi leka Davidi atwalilile ukumombela pantu nimutemwa.” 23 Lyonse ilyo Lesa aleleka umupashi wabipa waisa pali Shauli, Davidi alebuula nsango alalisha, kabili Shauli aleumfwako bwino, kabili umupashi wabipa walefuma pali ena.+