Esekiele

1 Nomba mu mwaka walenga amakumi yatatu (30), mu mweshi uwalenga ine, mu bushiku bwalenga shisano muli uyo mweshi, ilyo nali muli bankole+ mupepi no mumana wa Kebari,+ e lyo umuulu waiswike,+ namwene ne fimonwa ifyafumine kuli Lesa.+ 2 Pa bushiku bwalenga shisano muli uyo mweshi, e kutila, mu mwaka walenga isano ukutula apo Mfumu Yehoyakini+ yailile muli bunkole, 3 e lyo icebo ca kwa Yehova caishile+ mu kulungatika kuli Esekiele+ mwana Busi shimapepo mu calo ca bena Kaldi+ lwa ku mumana wa Kebari, kabili kulya ukuboko kwa kwa Yehova kwaishile pali ena.+

4 Awe nalimwene, kabili moneni! kwali umwela wa nkuuka+ uwaleisa ukufuma ku kapinda ka ku kuso, ikumbi ilikalamba+ no mulilo+ uulebilima, kabili lyali ilyabuuta konse konse, na mu kati ka mulilo mwali icalebeeka nge cela casakanamo silfere na golde, mu kati ka mulilo.+ 5  Kabili mu kati ka mulilo mwali ifyalemoneka nge fya mweo fine,+ kabili fyalemoneka ifi: fyalemoneka ngo muntu. 6 Cimo na cimo cali ne finso fine,+ kabili cimo na cimo cali na mapindo yane.+ 7 Na molu ya fiko yali molu ayaololoka, na makasa ya molu ya fiko yali nga mabondo ya kuulu kwa mwana wa ng’ombe;+ kabili yalebengeshima ngo kubeeka kwa mukuba uwatelela.+ 8 Mwali na maboko mwi samba lya mapindo ya fiko mu mbali sha fiko shine (4),+ kabili fyonse fine (4) fyakwete ifinso fya fiko na mapindo ya fiko.+ 9 Amapindo ya fiko yalekumana. Tafyalealuka ilyo fileya; cimo na cimo kuti caya ukwalolele icinso ca ciko.+

10 Kabili imimonekele ya finso fya fiko yali ifi, fyonse fine (4) fyakwete icinso ca muntu+ ne cinso ca nkalamo+ ku kulyo,+ fyonse fine fyakwete icinso ca ng’ombe ilume+ ku kuso;+ fyonse fine fyakwete icinso ca kwa kapumpe.+ 11 E fyali ifinso fya fiko. Kabili amapindo ya fiko+ yafungulukile mu muulu. Cimo na cimo cakwete yabili ayalekumana, na yabili yalefimba pa mibili ya fiko.+

12 Kabili cimo na cimo kuti caya ukwalolele icinso ca ciko.+ Konse uko umupashi wafwaya ukuti fiye, e ko fyaleya.+ Tafyalealuka ilyo fileya.+ 13 Kabili ifi ifya mweo fyalemoneka nga malasha ayaleaka.+ Ifyapala ifyenge+ fyale-endauka pa kati ka fya mweo, no mulilo wali uwabeeka, na mu mulilo mwalefuma inkuba.+ 14 Ilyo ifya mweo fyalepita no kubwela fyalemoneka nge nkuba.+

15 Ilyo nalelolesha ifya mweo, moneni! kwali imipeto pe sonde lubali ku fya mweo,+ umupeto umo ku cinso cimo cimo ica fya mweo.+ 16 Imipeto+ yalemoneka iyabeeka kwati libwe lya krusoliti;+ kabili yonse ine (4) yali iyapalana. Kabili mu mipangilwe ya iko, yalemoneka kwati umupeto umo uuli mu kati ka mupeto ubiye.+ 17 Ilyo yaya umo na umo kuti waya ku mbali shine.+ Tayalealukila kumbi ilyo ileya.+ 18 Ne fyela fya mipeto, fyali ifyasansama ica kuti fyaletiinya; kabili muli ifi fyela fya mipeto mwaiswile amenso ukushinguluka.+ 19 Kabili ilyo ifya mweo fyaenda, imipeto na yo yale-enda ku lubali lwa fiko, kabili ilyo ifya mweo bafimya ukufuma pe sonde, imipeto na yo baleimya.+ 20 Konse uko umupashi wafwaya ukuti iye, e ko yaleya, uko umupashi wafwaya ukuti iye; imipeto yaleimina pamo na fyo, pantu umupashi wa fya mweo wali mu mipeto. 21 Uko fyaya, e ko na yo yaleya; kabili ilyo fyaiminina shilili, na yo yaleiminina shilili; kabili ilyo fyaima ukufuma pe sonde, imipeto yaleimina pamo na fyo, pantu umupashi wa fya mweo wali mu mipeto.+

22 Pa muulu wa mitwe ya fya mweo pali icapala icintamba+ icabeeka nge galasi* ica kutiinya, icali pa muulu wa mitwe ya fiko.+ 23 Na mwi samba lya capala icintamba, amapindo ya fiko yalifungulwike, ipindo limo ukulola kwi pindo lya ca mweo cimbi. Cimo cimo cakwete amapindo yabili aya kufimbila ulubali ulu na yabili aya kufimbila ulubali lulya ulwa pa mibili ya fiko. 24 Ilyo fyaleya, e lyo naumfwile icongo ca mapindo ya fiko, nge congo ca menshi ayengi,+ nge congo ca Wa Maka Yonse, icongo ca mpooma,+ nge congo ce bumba lya bashilika.+ Ilyo fyaiminina, e pa kubwesha amapindo ya fiko.

25 E lyo kwali ishiwi ilyafumine pa muulu wa cintamba icali pa mutwe wa fiko. (Ilyo fyaiminina, fyalebwesha amapindo ya fiko.)26 Kabili pa muulu wa cintamba icali pa muulu wa mitwe ya fiko, pali icapala icipuna ca bufumu+ icalemoneka nge libwe lya safiri.+ Kabili pa capala icipuna ca bufumu pali uwalemoneka ngo muntunse.+ 27 Kabili namwene cimo icalebeeka nge cela casakanamo silfere na golde,+ icalemoneka ngo mulilo ukushinguluka mu kati monse,+ ukufuma mu musana wakwe no kuya pa muulu; no kufuma mu musana ukwisa mwi samba namwene icalemoneka ngo mulilo, kabili kwali ifyabeeka ifyamushingulwike. 28 Kwali icalemoneka ngo mukolamfula+ uubako mu makumbi pa bushiku bwa mfula. E fyalemoneka ukubeeka ukwamushingulwike. Kwalemoneka kwati bukata bwa kwa Yehova.+ Ilyo namwene, nawile ubukupeme,+ e lyo naumfwile ishiwi lya walelanda.

2 E lyo anjebele ati: “We mwana wa muntu,+ iminina pa kuti nande na iwe.”+ 2 Ilyo alandile na ine umupashi waingile muli ine,+ kabili wasukile wanenga ukwiminina pa kuti ng’umfwe Uulelanda kuli ine.+

3 E lyo anjebele ati: “We mwana wa muntu, ndekutuma ku bena Israele,+ ku nko sha bacipondoka ishampondokela.+ Bena ne fikolwe fyabo balilufyanya kuli ine ukufika pali buno bushiku.+ 4 Awe abana abapama+ kabili abatalama imitima+—e bo ndekutumako, kabili ukatile kuli bena, ‘E fyo Shikulu Mulopwe Yehova asosa.’ 5 Na bo, nampo nga bakomfwa+ nelyo bakakaana ukuumfwa+—pantu ni ng’anda ya bacipondoka+—bakeshiba ukuti kasesema ali mu kati kabo.+

6 “Na iwe, we mwana wa muntu, wibatiina;+ witiina ne fyo balelanda, pantu balitalama+ kabili ni ficilasa+ fya kukulasa, kabili ni muli bakaling’ongo+ e mo waikala. Witiina amashiwi yabo,+ kabili witiina ifinso fyabo,+ pantu bena ni ng’anda ya bacipondoka.+ 7 Kabili ukabebe ifyebo fyandi, nampo nga bakomfwa nelyo bakakaana ukumfwa, pantu bena ni bacipondoka.+

8 “Na iwe, we mwana wa muntu, umfwa ifyo ndesosa kuli iwe. Wipondoka nge fyapondoka aba muli iyi ng’anda ya bucipondoka.+ Asamuna akanwa kobe no kulya ico ndekupeela.”+

9 E lyo naloleshe, kabili moneni! kwali ukuboko ukwatambikwe kuli ine,+ kabili moneni! mwali ibuuku ilyapombwa.+ 10 Kabili alifungulwile pa ntanshi yandi, kabili lyalilembelwepo pa ntanshi na ku numa;+ kabili mwalembelwe inyimbo sha bulanda no kuteta e lyo no kuloosha.+

3 E lyo anjebele ati: “We mwana wa muntu, ale lya ici ulemona. Lya ili ibuuku lyapombwa,+ e lyo uleya, uyelanda ku ba mu ng’anda ya kwa Israele.”

2 Awe nayasamwine akanwa kandi, na o andishishe ilyo ibuuku lyapombwa.+ 3 E lyo anjebele ati: “We mwana wa muntu, ulye, pa kuti wisushe mu nda yobe ili buuku lyapombwa ilyo ndekupeela.” E lyo naliile, kabili mu kanwa kandi lyalowele ngo buci.+

4 Kabili anjebele ati: “We mwana wa muntu, kabiye, kengile mu ba mu ng’anda+ ya kwa Israele, no kubeba amashiwi yandi. 5 Pantu te ku bantu aba lulimi lumbi lumbi+ nangu aba lulimi ulwayafya+ ndekutuma, lelo ni ku ba mu ng’anda ya kwa Israele, 6 te ku bantu na bantu aba lulimi lumbi lumbi nangu aba lulimi ulwayafya, abo ushingomfwa ifyo balesosa.+ Nga nakutuma kuli abo, kuti baumfwa kuli iwe.+ 7 Lelo aba mu ng’anda ya kwa Israele, tabakafwaye ukumfwa kuli iwe, pantu tabafwaya ukumfwa kuli ine;+ pantu bonse aba mu ng’anda ya kwa Israele ni bankosamitwe kabili abakosa imitima.+ 8 Mona! Nalenga icinso cobe ukukosa nge fyakosa ifinso fyabo+ ne mpumi yobe ukukosa nge fyakosa impumi shabo.+ 9 Nalenga impumi yobe ukukosa nga daimondi, iyakosa ukucila ilibwe lyakosesha.+ Wibatiina,+ kabili witiina ifinso fyabo,+ pantu ni ng’anda ya bacipondoka.”+

10 Kabili anjebele ati: “We mwana wa muntu, amashiwi yonse nalakweba, uyabike mu mutima obe+ no kumfwa mu matwi yobe. 11 Kabili kabiye, wingile muli bankole,+ mu bana ba bantu bobe, e lyo ubebe auti, ‘E fyo Shikulu Mulopwe Yehova asosa,’ nampo nga bakomfwa nangu bakakaana ukumfwa.”+

12 Awe umupashi walinsendele+ natampile no kumfwa ku numa yandi ishiwi kwati congo ca cipuupu cikalamba+ aliti: “Bucindikwe ubukata bwa kwa Yehova ku cifulo cakwe.”+ 13 Kabili kwali icongo ca mapindo ya fya mweo ayalekumyanya na yabiye,+ ne congo ca mipeto ku mbali ya fiko,+ ne congo ca cipuupu icikalamba. 14 No mupashi walinjimishe+ no kunsenda, na ine nali naliile ninshi ndi ne cipyu mu mutima wandi, no kuboko kwa kwa Yehova pali ine kwali ukwakosa.+ 15 Awe nafikile kuli bankole abali mu Tel-abibi, abaikele+ ku mumana wa Kebari,+ kabili naikele uko baikele; kabili naikeleko inshiku cinelubali (7) mu kati kabo ninshi nacimpesha amano.+

16 Nomba pa mpela ya nshiku cinelubali (7), icebo ca kwa Yehova caishile kuli ine aciti:

17 “We mwana wa muntu, nakupeela umulimo wa kuba kalinda wa ba mu ng’anda ya kwa Israele,+ kabili ilyo ukomfwa amashiwi yafuma mu kanwa kandi, e lyo ukabasoke ifyafuma kuli ine.+ 18 Ilyo nasosa ku mubifi nati, ‘Ukufwa ukafwa,’+ na iwe taumusokele kabili taulandile no kusoka umubifi ukuti aleke imibele yakwe iyabipa pa kuti abe no mweo,+ ena apo mubifi, akafwila pa membu shakwe,+ lelo umulopa wakwe nkaufwaya mu minwe yobe.+ 19 Lelo iwe, nga wasoka umubifi+ na o talekele ukucita ifyabipa, tafumine na ku mibele yakwe iyabipa, akafwila pa membu shakwe;+ na iwe, ukapususha umweo obe.+ 20 Kabili umulungami nga aleka ukucita ifyalungama+ kabili atampa ukucita ifyabipa, na ine nabika ica kuipununako ku ntanshi yakwe,+ ena akafwa pantu tawamusokele. Akafwila pa lubembu lwakwe,+ ne fyalungama ifyo acitile tafyakebukishiwe,+ lelo umulopa wakwe nkafwaya mu minwe yobe.+ 21 Lelo iwe nga wasoka umulungami ukuti tafwile ukucita ulubembu,+ na o tabembwike, ukuba no mweo akaba no mweo pantu alisokelwe,+ na iwe ukapususha umweo obe.”+

22 Kabili ukuboko kwa kwa Yehova kwaishile pali ine kulya, e lyo atile kuli ine: “Ima, kabiye ku mpanga iyabatama,+ kulya e ko nalalanda na iwe.” 23 Awe naliimine no kuya ku mpanga iyabatama, kabili moneni! kwali ubukata bwa kwa Yehova ubwaiminine,+ ngo bukata ubo namwene ku mumana wa Kebari,+ e lyo nawile ubukupeme.+ 24 Kabili umupashi waingile muli ine+ no kunenga ukwiminina,+ e lyo atampile ukusosa kuli ine no kutila:

“Ingila, uisalile mu ng’anda yobe. 25 Na iwe, we mwana wa muntu, mona! bakabuula intambo no kukukakila pa kuti wilaya mu kati kabo.+ 26 No lulimi lobe nkakakatika mu kanwa kobe,+ kabili ukaba tondolo,+ kabili tawakafunde,+ pantu ni ng’anda ya bacipondoka.+ 27 Nomba ilyo nkasosa kuli iwe nkasamuna akanwa kobe, kabili ukabebe auti,+ ‘E fyo Shikulu Mulopwe Yehova asosa.’ Uulefwaya ukumfwa omfwe,+ no ushilefwaya ukumfwa, eumfwa, pantu ni ng’anda ya bacipondoka.+

4 “Na iwe we mwana wa muntu, buula injelwa, uibike pa ntanshi yobe no kulengapo umusumba wa Yerusalemu.+ 2 Ushinge umusumba no kukuula icibumba uku-ushinguluka+ no kutuulika amaloba uku-ushinguluka,+ ubikepo ne nkambi ya ku-ulwisha+ ne fya kubongolwelako amalinga ne mpongolo.+ 3 Kabili ubuule icipaapaatu ca cela, ucimike nge cibumba ca cela pa kati kobe no musumba, no kulolekeshapo, ninshi umusumba washingwa, ni we waushinga. Cishibilo ku ba mu ng’anda ya kwa Israele.+

4 “Kabili iwe, ulaale kabafu ku kuso, kabili ubike imembu sha ba mu ng’anda ya kwa Israele ku kuso.+ Ukulingana ne mpendwa ya nshiku ukalaalila ku kuso, e fyo ukashingamwa imembu shabo. 5 Na ine ndekweba imyaka ya membu shabo,+ inshiku imyanda itatu na makumi pabula (390),+ kabili ukashingamwa imembu sha ba mu ng’anda ya kwa Israele. 6 Kabili ukafikilishe ishi nshiku.

“E lyo ukalaale kabafu ku kulyo, no kushingamwa imembu sha ba mu ng’anda ya kwa Yuda inshiku amakumi yane (40),+ ubushiku bumo ku mwaka umo, ubushiku bumo ku mwaka umo, e fyo nabika pali iwe.+ 7 Kabili ukaloshe icinso cobe+ kuli Yerusalemu uushingilwe, no kuboko kobe ukushafimbwako akantu, no kusesema pali ena.

8 “Kabili mona! Ndekukaka intambo+ pa kuti wialuka ukufuma ku lubali ulu no kulaala kabafu ku kulyo, mpaka ukafikilishe inshiku sha kushinga kobe.

9 “Kabili iwe, buula ingano+ na barle na cilemba+ ne landa+ na male ne ngano shapapa,+ ufibike na mu cipe cimo no kuipangila umukate, mu nshiku shonse isho ulelaala kabafu; inshiku imyanda itatu na makumi pabula (390) e fyo ukalya.+ 10 Kabili ica kulya cobe ico ukalalya bakalakupimina—ukufina kwa mashekele amakumi yabili (20) ubushiku bumo.+ Ukalalya mu nshita mu nshita.

11 “Amenshi na yo ukalanwa ayo bakalakupimina, amakapu yabili. Ukalanwa mu nshita mu nshita.

12 “Kabili ukalye icipaapaatu ca barle;+ kabili ukakoseshe umulilo ku mafi+ ya bantu e po ukapangile ici cipaapaatu ilyo balemonako na menso yabo.” 13 Kabili Yehova atile: “E fyo abana ba kwa Israele bakalya ifya kulya fyabo ifyakowela+ mu nko isho nkabatamfishako.”+

14 E lyo natile: “Iye, mwe Shikulu Mulopwe Yehova! Moneni! Nshili muntu wakowela;+ icaifwila nelyo ico bataakanya nshatala ndya ukutula ku bwaice bwandi ukufika nomba,+ kabili mu kanwa kandi tamwatala amwingila umunofu wakowela.”+

15 Na o atile kuli ine: “Mona, kanshi nakupeela amafi ya ng’ombe kabili epo upangile umukate obe, wibomfya amafi ya bantu.” 16 Kabili atile kuli ine: “We mwana wa muntu, mona, ndecilika intulo ya fya kulya+ mu Yerusalemu, kabili bakalya ifya kulya fya kubapimina kabili bakalalya nabasakamana,+ kabili amenshi bakanwa aya kubapimina kabili mu mwenso wine wine,+ 17 pa kuti babulwe ifya kulya na menshi no kuloleshanya nabapapa no kulobela mu membu shabo.+

5 “Kabili iwe, we mwana wa muntu, buula ulupanga lwatwa. Ulubuule lube e cela ca kubeyelako, kabili ulupishe pa mutwe obe na pa mwefu obe.+ E lyo ubuule isekelo no kwakanya umushishi mu fipo fitatu. 2 Icipo cimo ukoce mu mulilo pa kati ka musumba pa kupwa fye kwa nshiku sha kushingwa.+ E lyo ukabuule cimbi, ukacume ku lupanga mu mbali shonse isha musumba,+ ne ca butatu ukolwile mu mwela, na ine nkasomona ulupanga no kukonkamo.+

3 “Kabili ku cipo ca butatu, ukabuuleko uunono no ku-ukaka ku fisempe fya nsalu yobe.+ 4 Umbi ukaubuule no ku-upoosa mu kati ka mulilo pa kuti ukapye. Muli uyo e mukafuma umulilo wa kuya ku ba mu ng’anda ya kwa Israele bonse.+

5 “Shikulu Mulopwe Yehova atila, ‘Uyu e Yerusalemu. Namubika pa kati ka nko, ne fyalo fyashingulukako. 6 Kabili apondokele ubupingushi bwandi no kucita ifyabipa ukucila inko,+ apondokele ne fipope fyandi ukucila ifyalo fyamushinguluka, pantu bakeene ubupingushi bwandi, na mu fipope fyandi, tabaendelemo.’+

7 “E ico, Shikulu Mulopwe Yehova atila, ‘Pa mulandu wa kuti mwalyafya+ ukucila inko ishamushinguluka, mu fipope fyandi tamwaendelemo no bupingushi bwandi tamwakonkele;+ lelo mwalekonka ubupingushi bwa nko ishamushinguluka,+ 8 e ico Shikulu Mulopwe Yehova atila: “Mona, nakwalukila, we musumba,+ kabili nkakupingula ne nko shonse shikamonako na menso.+ 9 Kabili nkacita muli iwe ico nshatala ncita kabili nshakacite ica musango yo na kabili pa mulandu wa fya bunani fyobe fyonse.+

10 “‘“E ico bashibo bakalya abana baume mu kati kenu,+ na bana baume na bo bakalya bashibo, kabili nkakupingula na bakashalapo muli imwe nkabasalanganishisha ku ncende shonse.”’+

11 “‘E ico, na pali ne mwine,’ e fyasosa Shikulu Mulopwe Yehova, ‘cine cine pa mulandu wa kuti umwa mushilo mwandi e mo wakowesha ku fya bunani fyobe+ ne fya bunani fyobe fyonse,+ na ine nkaceefya abekashi bobe+ na menso yandi tayakekatwe ubulanda+ na ine wine nshakalanguluke.+ 12 Abantu bakaakanikana patatu, ibumba lya kubalilapo likafwa ku cikuko,+ kabili ku cipowe bakapwa mu kati kenu.+ Ibumba lya cibili likafwa ku lupanga ukukushinguluka. E lyo ilya butatu nkalisalanganishisha ku ncende shonse,+ kabili nkabasomwena ulupanga ukukonkamo.+ 13 E fyo ubukali bwandi bukapwa+ kabili nkanashako ubukali bwandi pali bena+ no kuisansamusha ne mwine;+ e lyo bakeshiba ukuti ine Yehova, ico nasosela ici ni co mfwaya ukupepwa fye neka,+ ilyo nkapwishisha pali bena ubukali bwandi.

14 “‘Kabili nkakulenga ukuba icibolya kabili nkakuseebanya mu nko ishakushinguluka ku menso ya mupitanshila onse.+ 15 Ukaseebana+ kabili bakalakutuka,+ ukaba icilangililo ca kusokelako+ kabili ica kutiinya ku nko ishakushinguluka, ilyo nkakupingula mu bukali bwandi ne cipyu kabili nkakukanda mu bukali bwandi.+ Ine Yehova, ninsosa.

16 “‘Ilyo nkatuma imifwi yabipa iya cipowe pali bena,+ iya konaula, imifwi iyo nkatuma ku kumonaula,+ nkacilika intulo ya fya kulya.+ 17 Kabili nkatuma pali imwe icipowe ne nama mbi,+ na fyo fikamwipaila abana, kabili icikuko+ no mulopa+ fikesa muli imwe, nkaleta no lupanga pali imwe.+ Ine Yehova, ninsosa.’”

6 Kabili icebo ca kwa Yehova caishile kuli ine, aciti: 2 “We mwana wa muntu, losha icinso cobe ku mpili sha kwa Israele no kushisesemena.+ 3 E lyo utile, ‘Mwe mpili sha kwa Israele, umfweni amashiwi ya kwa Shikulu Mulopwe Yehova:+ Shikulu Mulopwe Yehova asosa ku mpili na ku tupili,+ ku milonga na ku mipokapoka ati: “Moneni! nkaleta pali imwe ulupanga, no konaula ififulo fyenu ifya kupepelapo.+ 4 Ifiipailo fyenu fikonaulwa+ ne fya kufutumwinapo ifyanunkila fikatobaulwa, abo nkepaya ku lupanga bakawila pa ntanshi ya tulubi twenu utwa bunani.+ 5 Nkabika ne fitumbi fya bana ba kwa Israele ku ntanshi ya tulubi twabo utwa bunani, no kusalanganya amafupa yenu ukushingulusha ifiipailo fyenu.+ 6 Mu mekalo yenu yonse+ imisumba ikaba ifibolya+ ne fifulo fya kupepelapo fikonaulwa,+ pa kuti fikabe ifyabongoloka ne fiipailo fyenu fikonaulwe no kutobaulwa+ no tulubi twenu utwa bunani tukalobe+ ne fya kufutumwinapo ifyanunkila fikonaulwe+ ne fyo mwapanga fikalofiwe. 7 Na baipaiwa bakawa mu kati kenu,+ na imwe mukeshiba ukuti nine Yehova.+

8 “‘“Kabili ilyo cikacitika nkaleka kukashalepo ba abakapusuka ku lupanga mu nko, ilyo mukasalanganina mu fyalo.+ 9 Na bantu benu abakapusuka bakanjibukisha mu nko umo bakasendwa bunkole,+ pantu nalikalipe pa mulandu wa mitima yabo iya bucilende iyataluka kuli ine+ na pa mulandu wa menso yabo ayakonka utulubi twa bunani+ ku kucita bucilende; kabili bakaipata abene no kumfwa insoni pa fibi bacita mu fya bunani fyabo fyonse.+ 10 Kabili bakeshiba ukuti nine Yehova; nshasoseele apa fye+ ilyo natile nkacita kuli bena ububi ubu.”’+

11 “Shikulu Mulopwe Yehova asosa ati, ‘Toota amapi+ no kuuma ulushindo pa nshi no kutila: “Iye!” pa mulandu wa fya bunani fyonse ifya ba mu ng’anda ya kwa Israele,+ pantu ku lupanga,+ ku cipowe+ na ku cikuko e ko bakawila.+ 12 Lelo aba kutali,+ bakafwa ku cikuko; aba mupepi, bakafwa ku lupanga; na bakashalapo abacingililwa, bakafwa ku cipowe, kabili nkapwishisha ubukali bwandi pali bena.+ 13 Kabili mukeshiba ukuti nine Yehova,+ ilyo abo nkepaya muli imwe bakaba pa kati ka tulubi twenu utwa bunani,+ ukushinguluka ifiipailo fyenu,+ pa kapili konse akasansama,+ na pa muulu wa mpili+ na mwi samba lya muti onse uwalelema+ na mwi samba lya cimuti conse icapikana,+ konse uko bapeelela ifyanunkila ku tulubi twabo utwa bunani.+ 14 Kabili nkatambalika ukuboko kwandi ku kubalwisha+ no kulenga icalo ukuba icibolya, ukuba icibolya ukucila na pa matololo ya ku Dibla, mu mekalo yabo yonse. Na bo bakeshiba ukuti nine Yehova.’”

7 Kabili icebo ca kwa Yehova caishile kuli ine aciti: 2 “We mwana wa muntu, ifi e fyo Shikulu Mulopwe Yehova asosela icalo ca kwa Israele, ‘Impela, yaisa impela pa calo fye conse.+ 3 Nomba impela naisa pali iwe,+ kabili nkatuma ubukali bwandi pali iwe, kabili nkakupingula ukulingana ne mibele yobe+ no kukukanda pa fya bunani fyobe fyonse. 4 Amenso yandi tayakakwikatilwe ubulanda,+ kabili nshakakulangulukile, pantu nkakukanda pa mibele yobe, kabili nkakukandila pa fya bunani fyobe ifyaba mu kati kobe;+ e lyo mukeshiba ukuti nine Yehova.’+

5 “Shikulu Mulopwe Yehova atila, ‘Ububi, ububi ubwaibela, moneni! buleisa.+ 6 Impela ileisa.+ Impela ileisa; ikamupumikisha. Mona! Ileisa.+ 7 Icisote ca bucushi cikesa pali iwe, we mwikashi wa mu calo, inshita ikafika, bwapalama ubushiku.+ Kuli icimfulunganya, kabili te kuwelesha kwa mu mpili.

8 “‘Nomba nalaswa mpongolwele icipyu candi pali iwe,+ no kupwishisha ubukali bwandi pali iwe,+ kabili nkakupingula ukulingana ne mibele yobe+ no kukukanda pa fya bunani fyobe fyonse. 9 Amenso yandi tayakakwikatilwe ubulanda+ kabili nshakalangulukile.+ Nkakukanda ukulingana ne mibele yobe, ne fya bunani fyobe fikaba mu kati kobe;+ e lyo mukeshiba ukuti nine Yehova neulemuma.+

10 “‘Mona! Ubushiku! Mona! Buleisa.+ Icisote ca bucushi cileisa.+ Inkonto yabalula.+ Ukuituntumba kwapuuka.+ 11 Ubunkalwe bwamena bwaba inkonto ya kukandilako abacita ifyabipa.+ Bena, ne fyuma fyabo, na bene, te kuti baituule, ba fye. 12 Inshita ikafika, ubushiku bukafika. Uushita esamwa;+ uushitisha, eloosha, pantu ubukali bwaisa pali cinkupiti onse uwa mu calo. 13 Pantu uushitisha takabweshe ico ashitisha, ilyo bacili no mweo; pantu icimonwa ca kuli cinkupiti wa kwa Yuda onse. Takuli uukabwela, kabili bonse tabakapusushe imyeo yabo ku membu shabo.

14 “‘Nabalisha ipenga+ kabili bonse nabaiteyanya, lelo tapali uuleya ku bulwi, pantu ubukali bwandi buli pali cinkupiti+ onse uwa mu musumba. 15 Pa nse pali ulupanga,+ mu kati muli icikuko ne cipowe.+ Uuli mu mpanga akafwa ku lupanga, na bali mu musumba, icipowe ne cikuko fikabalofya.+ 16 Na bakapusuka muli bena bakafulumuka+ no kuba nge nkunda sha mu mipokapoka pa mpili,+ bonse balelila, cila muntu pa mulandu wa membu shakwe. 17 Kumfwa amaboko yonse, yakatompoka;+ na menshi yakalakonkoloka mu makufi yonse.+ 18 Bakaka insamu*+ mu misana, kabili batutuma;+ na pa finso fyonse pali insoni+ na pa mitwe yabo yonse pali amapala.+

19 “‘Bakapoosa silfere yabo mu misebo, na golde yabo ikaba ica bunani. Silfere yabo na golde tafyakabapokolole mu bushiku bwa bukali bwa kwa Yehova.+ Tabakekushe imyeo yabo nangu ni nda shabo, pantu e filenga balebembuka.+ 20 Baituntumbila pa cintu ica kubalenga ukuyemba; kabili bapangilako ifilubi fyabo ifya bunani,+ ifya bunani fyabo.+ E mulandu wine nkacilengela ukuba ica bunani.+ 21 Kabili nkacipeela mu minwe ya bambi bambi ukuti basampe na ku babifi ba pe sonde ukuti bacipokolole,+ na bo bakacikowesha.

22 “‘Kabili nkafumya icinso candi kuli bena,+ na bo bakakowesha icifulo candi icafisama, kabili ifipondo fikengilamo no kucisaalula.+

23 “‘Pangeni umunyololo,+ pantu icalo caisulamo ubupingushi bwa kwipaisha abantu+ no musumba wine waisulamo ubunkalwe.+ 24 Kabili nkaleta ababipisha aba mu nko,+ na bo bakapoka amayanda yabo,+ nkapwisha icilumba ca bakosa,+ no mwa mushilo mwabo mukakowela.+ 25 Bakaba inkumbabulili, kabili bakafwaya umutende lelo tabakausange.+ 26 Kukesa ubucushi pa bucushi,+ kabili kukaba imbila sha bulanda, na bantu bakafwaya icimonwa kuli kasesema,+ shimapepo takalesambilisha abantu ifunde na bakalamba tabakalepanda abantu amano.+ 27 Imfumu ikaloosha;+ ne ntungulushi ikaba no bulanda,+ na maboko ya bantu ba mu calo yakatutuma pa mulandu wa kusakamikwa. Nkacita kuli bena ukulingana ne mibele yabo,+ kabili nkabapingula ukulingana ne mipingwile yabo;+ e lyo bakeshiba ukuti nine Yehova.’”+

8 Nomba mu mwaka walenga mutanda (6), mu mweshi walenga mutanda, pa bushiku bwalenga shisano ubwa uyu mweshi, naikele mu ng’anda yandi na bakalamba ba mu Yuda baikele ku cinso candi,+ kabili ukuboko kwa kwa Shikulu Mulopwe Yehova kwawilile pali ine.+ 2 Awe nalimwene, kabili moneni! kwali uwalemoneka ngo mulilo;+ ukutula mu musana ukwisa mwi samba alemoneka ngo mulilo,+ kabili ukutula mu musana no kuya pa muulu kwali icalebeeka nge cela casakanamo silfere na golde.+ 3 E lyo atambalike icalemoneka ngo kuboko+ no kunjimisha ku mushishi wa ku mutwe wandi, no mupashi+ wansendele pa kati ka calo no muulu no kuntwala ku Yerusalemu mu fimonwa fya kwa Lesa,+ ku mwinshi wa mpongolo ya mu kati+ iyalosha ku kapinda ka ku kuso, umwaikala icimpashanya ca bufuba icilenga ubufuba.+ 4 Kabili moneni! e kwali ubukata bwa kwa Lesa wa kwa Israele,+ ubwalemoneka ngo bukata namwene mu mpanga iyabatama.

5 E lyo atile kuli ine: “We mwana wa muntu, inwina amenso yobe ku kapinda ka ku kuso.” Awe nainwinine amenso ku kapinda ka ku kuso, kabili moneni! lubali ku kapinda ka ku kuso aka mpongolo kwali icimpashanya icilenga ubufuba+ pa mwinshi. 6 E lyo atile kuli ine: “We mwana wa muntu, bushe wamona ifya bunani ifyabipisha ifyo balecita,+ ifyo aba mu ng’anda ya kwa Israele balecita pano pa kuti ntaluke ukufuma umwa mushilo mwandi?+ Walamona ifya bunani ifyabipisha na fimbi.”

7 Awe antwele ku mwinshi wa lubansa, kabili naliloleshe, moneni! kwali icipunda mu cibumba. 8 E lyo anjebele ati: “We mwana wa muntu, tula mu cibumba.”+ Awe natulile mu cibumba, kabili moneni! kwali umwinshi. 9 E lyo anjebele ati: “Ingila no kumona ifya bunani ifyabipa ifyo balecita pano.”+ 10 Awe nalingiile no kumona, kabili moneni! kwali ifimpashanya+ fyonse ifya fikulika ne fya finama fya muselu,+ no tulubi twa bunani tonse utwa ba mu ng’anda ya kwa Israele,+ ifyo balenga pa cibumba ukushinguluka konse konse. 11 Kabili abantu amakumi cinelubali (70)+ aba mu bakalamba ba mu ng’anda ya kwa Israele, na Yaasania mwana Shafani+ pa kati kabo, baiminine pa ntanshi ya fiko, umo umo ne cifutumwino mu minwe yakwe, ne cena cisuma icalefuma pa fyanunkila calefutumuka.+ 12 E lyo atile kuli ine: “We mwana wa muntu, bushe wamona ifyo abakalamba ba mu ng’anda ya kwa Israele balecita mu mfifi,+ cila muntu mu muputule wakwe umwaba ifyo balenga? Pantu baletila, ‘Yehova tatumona.+ Yehova alisha icalo.’”

13 Kabili anjebele ati: “Walamona na fimbi ifya bunani ifyabipisha ifyo balecita.”+ 14 Awe antwele ku mwinshi wa mpongolo ya ng’anda ya kwa Yehova, iyabela lwa ku kapinda ka ku kuso, kabili moneni! kwali abanakashi nabekala, baleloosha lesa Tamusi.

15 E lyo anjebele na kabili ati: “We mwana wa muntu, bushe wamona? Walamona na fimbi ifya bunani ifyabipisha+ ifyo balecita ifyacila pali ifi.” 16 Kabili antwele mu lubansa lwa mu kati ulwa ng’anda ya kwa Yehova,+ kabili moneni! pa mwinshi we tempele lya kwa Yehova, pa kati ka muputule wa kwingililapo ne ciipailo,+ pali abantu nalimo amakumi yabili na basano (25)+ nabafutatila itempele lya kwa Yehova+ ne finso baloseshe ku kabanga, kabili balepepa akasuba ku kabanga.+

17 E lyo anjebele ati: “We mwana wa muntu, bushe wamona? Bushe mulandu unono ku ba mu ng’anda ya kwa Yuda ukucita ifya bunani ifyo balecita pano, ukuti besushe ububifi+ mu calo no kuti bankalifye na kabili, kabili mona, balelosha akamusambo ku myona yandi?18 E ico na ine nkabemina mu bukali.+ Amenso yandi tayakabekatilwe ubulanda, kabili nshakabalangulukile.+ Kabili bakapunda mu matwi yandi ne shiwi ilikalamba, lelo nshakomfwe iyo.”+

9 E lyo abilikishe kuli ine ne shiwi ilikalamba, ati: “Nabapalame aba konaula umusumba, cila muntu ne canso cakwe ica konawilako mu minwe yakwe!”

2 Kabili moneni! kwali abaume mutanda (6) abaleisa ukufuma ku nshila ya ku mpongolo ya pa muulu+ iyalosha ku kapinda ka ku kuso, cila muntu ne canso cakwe ica kutobawilako mu minwe yakwe; kabili kwali no muntu umo mu kati kabo uwafwele insalu iisuma,+ kabili mu musana wakwe mwali ico kalemba abikamo inki, kabili baingile no kwiminina ku mbali ya ciipailo ca mukuba.+

3 Lelo ubukata bwa kwa Lesa wa kwa Israele,+ bwalifumine pa muulu wa bakerubi+ apo bwali no kuya ku mwinshi wa ng’anda,+ kabili abilikishe ku wafwele insalu iisuma,+ uo mu musana wakwe mwali ico kalemba abikamo inki. 4 E lyo Yehova amwebele ati: “Pita mu musumba, mu Yerusalemu, no kushila akashilwa pa mpumi sha bantu abateta no kuliliishika+ pa fya bunani ifilecitwa mu kati ka uko.”+

5 Na ba bambi abebele ninshi ndeumfwako ati: “Piteni mu musumba mulemukonka kabili komeni abantu. Mwileka amenso yenu yekatwe ubulanda, kabili mwilangulukila iyo.+ 6 Ipayauleni no kulofya abaume abakote, abalumendo na bakashana, abana na banakashi.+ Lelo mwipalama pa muntu onse uwashilwapo akashilwa,+ kabili mutampile apa mushilo pandi.”+ Awe batampile pa bakote abali pa ntanshi ya ng’anda.+ 7 Asosele kuli bena kabili ati: “Kowesheni ing’anda na mu mansa sha iko isushenimo abaipaiwa.+ Kabiyeni!” Na bo baliile no kukoma abantu mu musumba.

8 Nomba ilyo balekoma abantu, ine nalipuswike, kabili nawile ubukupeme+ nalapunda no kutila: “Iye,+ mwe Shikulu Mulopwe Yehova! Bushe muleonaula abashalapo bonse aba mu bena Israele ilyo mulepongolwela ubukali bwenu pali Yerusalemu?”+

9 Na o anjaswike ati: “Imembu sha ba mu ng’anda ya kwa Israele na Yuda+ nashibipisha icine cine,+ ne calo caisulamo imilopa+ no musumba waisulamo ifyabipa;+ pantu batila ‘Yehova alisha icalo,+ kabili Yehova tamona.’+ 10 Na ine amenso yandi tayaikatwe ubulanda,+ kabili nshalangulukile.+ Imibele yabo nkaibika pa mitwe yabo.”+

11 Kabili moneni! ulya muntu wafwele insalu iisuma, uo mu musana wakwe mwali ico kalemba abikamo inki, abweseshe amashiwi, ati: “Nincita filya fine fye munjebele.”+

10 Awe nalitwalilile ukulolesha, kabili moneni! pa capala icintamba+ icali pa mutwe wa bakerubi pali icapala ilibwe+ lya safiri, icalemoneka nge cipuna ca bufumu,+ icali pa muulu wabo. 2 E lyo asosele ku muntu wafwele insalu iisuma,+ no kutila: “Ingila pa kati ka mipeto,+ mwi samba lya bakerubi, kabili isusha mu ndupi shobe amalasha+ yaleaka pa kati ka bakerubi no kupoosa pa musumba.”+ Na o alingile ndemonako na menso.

3 Kabili bakerubi baiminine ku kulyo kwa ng’anda ilyo uyo muntu aingile, ne kumbi lyaiswile mu lubansa lwa mu kati.+ 4 E lyo ubukata bwa kwa Yehova+ bwaimine ukufuma pali bakerubi ukuya ku mwinshi wa ng’anda, ne ng’anda panono panono yaiswilemo ikumbi,+ no lubansa na lo lwaiswilemo ukubeeka kwa bukata bwa kwa Yehova. 5 Ne congo ca mapindo ya bakerubi+ caumfwikike ukufika na ku lubansa lwa ku nse, nge congo ca kwa Lesa Wa Maka Yonse ilyo asosa.+

6 Nomba ilyo aebele uyo muntu wafwele insalu iisuma ati: “Buula umulilo pa kati ka mipeto, ukufuma pa kati ka bakerubi,” e lyo aingile no kwiminina lubali ku mupeto. 7 E lyo kerubi atambalike ukuboko ukufika ku mulilo+ uwali pa kati ka bakerubi,+ alapulapo no ku-ubika mu ndupi sha ulya muntu wafwele insalu iisuma,+ na o alibuulile no kufuma. 8 Kabili kuli bakerubi kwali icalemoneka ngo kuboko kwa muntunse mwi samba lya mapindo yabo.+

9 Nalitwalilile ukulolesha kabili moneni! kwali imipeto ine mu mbali ya bakerubi, umupeto umo ku lubali lwa kwa kerubi umo no mupeto umo ku lubali lwa kwa kerubi umbi,+ ne mipeto yalemoneka iyabeeka kwati libwe lya krusoliti. 10 Kabili yonse ine (4) yali iyapalana, yalemoneka kwati mupeto uuli mu kati ka mupeto ubiye.+ 11 Ilyo yaya, kuti yalola ku mbali shine. Tayalealukila kumbi, pantu ukwalola umutwe, e ko yaleya. Tayalealukila kumbi ilyo yaleya.+ 12 Kabili imibili yabo yonse ne numa shabo ne minwe yabo na mapindo yabo ne mipeto fyaiswilemo amenso monse monse.+ Kwali umupeto ku mbali ya kwa kerubi umo na umo. 13 Kumfwa ulwa mipeto, naumfwile babilikisha kuli yena abati, “We mipeto, shingulukisha!”

14 Umo umo ali ne finso fine.+ Icinso ca ntanshi cinso ca kwa kerubi, ne cinso ca cibili cinso ca muntunse,+ ne cinso ca citatu cinso ca nkalamo, ne cinso ca cine cinso ca kwa kapumpe.+

15 Kabili bakerubi baliimine+—e fya mweo fimo fine namwene ku mumana wa Kebari+—16 kabili ilyo bakerubi baya, imipeto yaleba ku lubali lwabo;+ bakerubi nga baimya amapindo pa kuti beme ukufuma pa calo, imipeto taya-alukile kumbi ukufuma ku lubali lwabo.+ 17 Ilyo baiminina shilili, yaleiminina shilili; ilyo baima,+ na yo yaleima na bo, pantu umupashi wa fya mweo wali mu mipeto.+

18 Kabili ubukata+ bwa kwa Yehova bwafumine pa muulu wa mwinshi wa ng’anda no kuyaiminina pa muulu wa bakerubi.+ 19 Nomba bakerubi baimishe amapindo yabo no kwima ukufuma pa calo+ ndemonako na menso. Ilyo baleya, imipeto na yo yali mupepi na bo; e lyo baileiminina ku mwinshi wa ku kabanga uwa mpongolo ya ng’anda ya kwa Yehova, no bukata bwa kwa Lesa wa kwa Israele bwali pali bena, ukufuma mu muulu.

20 Ifi e fya mweo+ namwene mwi samba lya kwa Lesa wa kwa Israele ku mumana wa Kebari,+ e fyo naishibe ukuti kanshi ni bakerubi. 21 Kumfwa ulwa bakerubi,+ umo na umo ali ne finso fine kabili umo na umo ali na mapindo yane, ne fyalemoneka nga maboko ya muntunse mwi samba lya mapindo yabo. 22 E lyo ifinso fyabo, fyalemoneka nga filya fine+ finso namwene ku mumana wa Kebari. Umo na umo kuti aya ukwalolele icinso cakwe.+

11 Kabili umupashi+ walinjimishe+ no kuntwala ku mpongolo ya ku kabanga+ iya ng’anda ya kwa Yehova iyalosha ku kabanga, kabili moneni! pa mwinshi wa mpongolo pali abantu amakumi yabili na basano (25),+ na pa kati kabo namwenepo Yaasania mwana Asuri na Pelatia mwana Benaya, bacilolo ba bantu.+ 2 E lyo Lesa anjebele ati: “We mwana wa muntu, aba e bantu balepanga ukucita ububi no kupanda amano ayabipa pali uno musumba;+ 3 abaletila, ‘Bushe inshita ya kukuula amayanda taili mupepi?+ Uno musumba ni mpoto iikalamba,+ e lyo ifwe tuli munofu mu kati.’

4 “E ico sesema pali bena. Sesema, we mwana wa muntu.”+

5 E lyo umupashi wa kwa Yehova wawile pali ine,+ kabili anjebele ati: “Sosa auti, ‘Yehova asosa ati:+ “Imwe mwasosele ifyalungama, mwe ba mu ng’anda ya kwa Israele; ne fiima mu mitima yenu, nalifishiba.+ 6 Mwafusha ifitumbi fya baipaiwa muli uno musumba, na mu misebo ya uko mwaisushamo ifitumbi fya baipaiwa.”’”+ 7 “E ico, Shikulu Mulopwe Yehova asosa ati, ‘Abaipaiwa abo mwabika mu kati ka uko, e munofu,+ no musumba e mpoto;+ kabili nkamufumya mu kati ka uko.’”+

8 “‘Mulatiina ulupanga,+ kabili nkaleta ulupanga pali imwe,’ e fyasosa Shikulu Mulopwe Yehova.+ 9 ‘Kabili nkafumya imwe mu kati ka uko no kumupeela mu minwe ya bambi bambi+ no kumupingula.+ 10 Mukawa ku lupanga.+ Pa mupaka wa kwa Israele+ e po nkamupingwila; e lyo mukeshiba ukuti nine Yehova.+ 11 Umusumba tawakabe impoto iikalamba,+ na imwe tamwakabe umunofu mu kati ka uko. Nkamupingwila ku mupaka wa kwa Israele, 12 e lyo mukeshiba ukuti nine Yehova, pantu mu fipope fyandi tamwaendamo no bupingushi bwandi tamwakonka,+ lelo mwacita ukulingana no bupingushi bwa nko ishamushinguluka.’”+

13 Nomba ilyo fye napwishishe ukusesema, Pelatia mwana Benaya alifwile,+ e lyo nawile ubukupeme no kulila ishiwi ilikalamba,+ no kutila: “Iye, mwe Shikulu Mulopwe Yehova!+ Bushe mulelofya bonse abashalapo ba kwa Israele?”+

14 E lyo icebo ca kwa Yehova caishile kuli ine kabili, aciti: 15 “We mwana wa muntu, bamunonko,+ bamunonko, balupwa lobe, na bonse aba mu ng’anda ya kwa Israele, bonse fye, e bo abekashi ba mu Yerusalemu baeba abati, ‘Talukeni kuli Yehova. Ni kuli ifwe icalo capeelwa; capeelwa kuli ifwe’;+ 16 e ico soseni amuti, ‘Shikulu Mulopwe Yehova atila: “Nangu nalibatalusha ukufika ukutali mu nko, kabili nangu nalibasalanganishisha mu fyalo fimbi,+ nkaba icubo cabo pa nshita inono mu fyalo ifyo bayamo.”’+

17 “E ico, sosa auti, ‘Shikulu Mulopwe Yehova atila: “Kabili nkamulonganya ukufuma mu bantu na bantu no kumulonganika ukufuma mu fyalo umo mwasalanganina, no kumupeela icalo ca Israele.+ 18 Bakesa mu calo no kufumyamo fyonse ifya muselu ne fya bunani fyonse.+ 19 Kabili nkabapeela umutima umo,+ nkabika no mupashi upya mu kati kabo;+ nkafumya muli bena umutima wakosa nge libwe+ no kubapeela umutima wanaka ngo munofu,+ 20 pa kuti bakende mu fipope fyandi no kukonka ubupingushi bwandi no kubucita;+ no kuti bakabe abantu bandi+ na ine nkabe Lesa wabo.”’+

21 “‘“Lelo abo imitima yabo ile-enda mu fya bunani fyabo na mu fya muselu fyabo,+ nkabika imibele yabo pa mitwe yabo,” e fyasosa Shikulu Mulopwe Yehova.’”+

22 E lyo bakerubi+ baimishe amapindo yabo, ne mipeto yali mupepi na bo,+ no bukata+ bwa kwa Lesa wa kwa Israele bwali pa muulu wabo.+ 23 Kabili ubukata bwa kwa Yehova+ bwaimine ukufuma pa kati ka musumba no kuyaiminina pa lupili+ lwaba ku kabanga ka musumba.+ 24 No mupashi+ walinjimishe+ mpaka wantwala ku Kaldi kuli bankole,+ mu cimonwa ca mu mupashi wa kwa Lesa; ne cimonwa namwene calimine ukufuma pali ine. 25 E lyo natendeke ukweba bankole ifintu fyonse ifya kwa Yehova ifyo anengele ukumona.+

12 Kabili icebo ca kwa Yehova caishile kuli ine, aciti: 2 “We mwana wa muntu, uleikala mu ba mu ng’anda ya bacipondoka,+ abakwata amenso lelo tabamona,+ abakwata amatwi lelo tabomfwa,+ pantu ba mu ng’anda ya bacipondoka.+ 3 Lelo iwe, we mwana wa muntu, uipekanishishe ifipe fya bunkole no kuya muli bunkole akasuba, ninshi balemonako, kabili uye muli bunkole ukufuma uko uli ukuya ku cifulo cimbi ninshi balemonako. Nalimo kuti batontonkanyapo, nangu bena ni ng’anda ya bacipondoka.+ 4 E lyo ufumye ifipe fyobe nge fipe fya bunkole akasuba, ninshi balemonako, na iwe ufume icungulo ninshi balemonako, ifyo bafuma abaya muli bunkole.+

5 “Utule icibumba mu ng’anda yobe ninshi balemonako, epo ufifumishe.+ 6 Ufisende pa kubeya ninshi balemonako. Ufifumye ilyo kwafiita. Uifimbe pa menso pa kuti wimona umushili, pantu nakulenga ukuba icishibilo+ ku ba mu ng’anda ya kwa Israele.”+

7 Awe nacitile ifyo fine naebelwe.+ Nafumishe ifipe fyandi, nge fipe fya bunkole, akasuba; na ku cungulo natulile icibumba ku minwe yandi. Ilyo kwafiitile nalififumishe. Nafisendele pa kubeya, ninshi balemonako.

8 Kabili icebo ca kwa Yehova caishile kuli ine ulucelo, aciti: 9 “We mwana wa muntu, bushe aba mu ng’anda ya kwa Israele, ing’anda ya bacipondoka,+ tabakwipwishe abati, ‘Cinshi ulecita?’ 10 Bebe ati, ‘Shikulu Mulopwe Yehova atila: “Kuli ubukombe bwaluma pa ntungulushi,+ ubukombe pali Yerusalemu na pa ba mu ng’anda ya kwa Israele bonse abalimo.”’

11 “Sosa auti, ‘Ndi cishibilo+ cenu. Ifyo nacita, e fyo bakabacita na bo. Bakasendwa, bakaya muli bunkole.+ 12 Nomba intungulushi iili mu kati kabo, ikasenda ifipe pa kubeya ilyo kufiitile no kufuma; bakatula icibumba pa kuti bakafifumishepo.+ Ikafimba pa menso pa kuti ikamona umushili.’ 13 Nkapoosa isumbu lyandi pali iyi ntungulushi, na yo ikekatwa mwi sumbu lyandi;+ kabili nkaitwala ku Babiloni, ku calo ca bena Kaldi,+ lelo tayakacimone; kabili kulya e ko ikafwila.+ 14 Na bonse abaishinguluka ku kuyafwa, na mabumba ya bashilika ba iko, nkabasalanganishisha ku ncende shonse;+ kabili nkasomona ulupanga no kubakonka.+ 15 E lyo bakeshiba ukuti nine Yehova ilyo nkabasalanganishisha mu nko no kubasalanganishisha mu fyalo.+ 16 Kabili nkaleka abantu ba mpendwa fye bakapusuke ku lupanga,+ ku cipowe na ku cikuko, pa kuti bakalondolole ifya bunani fyabo+ fyonse mu nko isho bakayamo;+ na bo bakeshiba ukuti nine Yehova.”

17 Kabili icebo ca kwa Yehova caishile kuli ine, aciti:18 “We mwana wa muntu, uletutuma pa kulya ifya kulya, na pa kunwa amenshi ulekanka kabili ulenwa nausakamana.+ 19 Kabili usose ku bantu ba mu calo auti, ‘E fyo Shikulu Mulopwe Yehova asosa ku bekashi ba mu Yerusalemu abali mu mpanga ya kwa Israele+ ati: “Bakasakamana pa kulya ifya kulya, na pa kunwa amenshi bakaba no mwenso, pa kuti icalo cibe icibolya umwabula akantu+ pa mulandu wa bunkalwe bwa bonse abaikalamo.+ 20 Ne misumba yaikalwamo ikonaulwa,+ ne calo cikasanguka icibolya;+ e lyo mukeshiba ukuti nine Yehova.”’”+

21 Icebo ca kwa Yehova caishile kuli ine na kabili, aciti:22 “We mwana wa muntu, nge yi nsoselo mwakwata mu Israele,+ iya kutila ‘Papita inshiku ishingi+ ne fya mu cimonwa tafyacitika”?+ 23 E ico bebe auti, ‘Shikulu Mulopwe Yehova asosa ati: “Ndi no kupwisha iyi nsoselo, tabakaisose na kabili mu Israele.”’+ Lelo bebe auti, ‘Nashipalama inshiku,+ no kufishiwapo kwa cimonwa conse nakupalama.’24 Pantu takwakabe na kabili icimonwa ca fye+ nangu ukubuka kwa bumbimunda mu ng’anda ya kwa Israele.+ 25 ‘“Pantu ine, ne Yehova, nkasosa ico ndi no kusosa, na co cikacitika.+ Tacakakokole na kabili,+ pantu mu nshiku shenu,+ mwe ba mu ng’anda ya bacipondoka, nkasosa icebo no kucicita,” e fyasosa Shikulu Mulopwe Yehova.’”

26 Kabili icebo ca kwa Yehova caishile kuli ine, aciti:27 “We mwana wa muntu, mona! aba mu ng’anda ya kwa Israele baletila, ‘Icimonwa ico alemona ca nshiku sha ku ntanshi sana, kabili ico alesesema ca nshita sha ku ntanshi sana.’+ 28 E ico bebe auti, ‘Shikulu Mulopwe Yehova asosa ati: “‘Ifyebo fyandi tafyakakokole na kabili iyo.+ Icebo ico nkasosa cikacitwa,’+ e fyasosa Shikulu Mulopwe Yehova.”’”+

13 Kabili icebo ca kwa Yehova caishile kuli ine, aciti: 2 “We mwana wa muntu, sesemena bakasesema ba kwa Israele abalesesema,+ kabili webe abalesesema ifyafuma mu mitima yabo auti,+ ‘Umfweni icebo ca kwa Yehova.+ 3 Shikulu Mulopwe Yehova atila: “We bulanda kuli bakasesema abapumbu,+ abakonka ifya mu mitima yabo,+ ilyo tapali ne co bamwene!+ 4 Bakasesema bobe bali kwati ni bamumbwe bali mu fibolya, we Israele.+ 5 Tamwakeminine pa fipunda fya mu cibumba ifyo batula ku kuficingilila,+ nangu kukuulila aba mu ng’anda ya kwa Israele icibumba+ ca musumba, pa kuti mulwe mu bushiku bwa kwa Yehova.”+ 6 “Bamona ica fye no kubuka ifya bufi,+ abaleti, ‘Aya e mashiwi ya kwa Yehova,’ ilyo Yehova umwine tabatumine, kabili bapembelela ukuti amashiwi yafikilishiwe.+ 7 Bushe te ku cimonwa ca bufi ico mwamona, na ku kubuka kwa bufi uko mulelandapo, ilyo muleti, ‘Aya e mashiwi ya kwa Yehova,’ ilyo ne mwine nshasosa nangu cimo?”+

8 “‘E ico Shikulu Mulopwe Yehova asosa ati: “‘Pantu mwasosa ica fye no kumona ubufi, e ico moneni, ndemulwisha,’+ e fyasosa Shikulu Mulopwe Yehova.” 9 Kabili ukuboko kwandi kuli pali bakasesema abamona ica fye no kubuka ifya bufi.+ Mwi bumba lya bantu bandi+ tabakekalililemo, na mu fyalembwa fya ba mu ng’anda ya kwa Israele tabakalembwemo,+ na mu calo ca Israele tabakengilemo;+ e lyo mukeshiba ukuti nine Shikulu Mulopwe Yehova,+ 10 pa mulandu wa kuti nabalufya abantu bandi abati, “Kuli umutende!” ilyo takuli umutende,+ balekuula icibumba, lelo baleicusha fye+ abaleshingwilako impemba.’+

11 “Eba abaleshingwilako impemba ati cikawa. Kukaba imfula iikalamba, na we mfula ya mabwe, ukaloka, no mwela wa nkuuka ukacilepula.+ 12 Kabili moneni! icibumba cikawa. Bushe tabakasose kuli imwe abati, ‘Nge mpemba mwashingwileko ili kwi?’+

13 “E ico Shikulu Mulopwe Yehova atila, ‘Na ine nkaleta umwela wa nkuuka pa mulandu wa cipyu candi, kabili mu bukali bwandi kukaba imfula ya maka, kabili pa mulandu wa bukali bwandi kukaba imfula ya mabwe iya kulofya.+ 14 Kabili nkabongolola icibumba ico mwashingulako impemba no kuciwisha pa nshi, na pa mufula wa ciko uwa kukuulapo nkafimbulapo.+ Umusumba ukawa, na imwe mukapwila mu kati ka uko; e lyo mukeshiba ukuti nine Yehova.’+

15 “‘Kabili nkapwishisha ubukali bwandi pa cibumba na pa baleshingulako impemba, kabili nkasosa kuli imwe nati: “Icibumba tapali, na baleshingulako nabaloba,+ 16 bakasesema ba kwa Israele abalesesemena umusumba wa Yerusalemu no kumona ifimonwa fya mutende,+ ilyo tapali mutende,”’ e fyasosa Shikulu Mulopwe Yehova.+

17 “Kabili iwe, we mwana wa muntu, cincintila+ abana banakashi aba bantu bobe abalecita nga bakasesema+ no kulanda ifya mu mitima yabo,+ useseme pali bena. 18 Kabili usose auti, ‘Shikulu Mulopwe Yehova atila: “We bulanda ku banakashi ababilila abantu insalu sha kufwala pa nkonkoni no kupanga ififimbo fya ku mitwe ya bantu ba fiimo fyapusanapusana pa kuti balunge abantu!+ Bushe abantu mulelunga mwe banakashi, te bantu bandi, na bantu benu te bo mulesunga abatuntulu? 19 Kabili mulensaalula ku bantu bandi pa mulandu wa barle wa mu lupi no tumokolwa twa mikate,+ ku kwipaya abantu abashilingile ukufwa+ no kusunga abantu abashingile ukuba no mweo ku kubepa abantu bandi, abakutika ku bufi.”’+

20 “E ico Shikulu Mulopwe Yehova atila, ‘Moneni na-alukila insalu sha kufwala pa nkonkoni ishifwala imwe mwe banakashi isho mulelungilako abantu kwati fyuni, nkashifumpula ku maboko yenu no kuleka abantu abo mulunga baye, abantu abo mwikata kwati fyuni.+ 21 Nkafumpula ne fifimbo no kupokolola abantu bandi mu minwe yenu, tabakabe na kabili mu minwe yenu nge co balunga; e lyo mukeshiba ukuti nine Yehova.+ 22 Pa mulandu wa kulenga umutima wa mulungami ubulanda ku bufi,+ ilyo ne mwine nshamukalifye umutima, na pa kukosha amaboko ya mubifi+ pa kuti efuma ku mibele yakwe ibi no kuba no mweo,+ 23 e ico tamwakatwalilile ukumona ifimonwa fya fye,+ kabili tamwakatwalilile+ ukubuka;+ na ine nkapokolola abantu bandi mu minwe yenu,+ e lyo mukeshiba ukuti nine Yehova.’”+

14 E lyo abaume abakalamba bamo bamo aba kwa Israele baishile kuli ine no kwikala ku cinso candi.+ 2 Awe icebo ca kwa Yehova caishile kuli ine aciti: 3 “We mwana wa muntu, aba baume baleka utulubi twa bunani ukwikala mu mitima yabo, babika pa ntanshi yabo ifilenga bacite imembu.+ Bushe mbaasuke pa fyo balenjipusha?+ 4 E ico landa na bo kabili ubebe auti, ‘Shikulu Mulopwe Yehova asosa ati: “Onse uwa mu ng’anda ya kwa Israele uwaleka utulubi twa bunani+ ukwikala mu mutima wakwe no kubika ica kumulenga ukubembuka pa ntanshi yakwe no kwisa kuli kasesema, ine Yehova, nkamwasuka ne mwine ukulingana no bwingi bwa tulubi twakwe utwa bunani,+ 5 pa kuti njikate imitima ya ba mu ng’anda ya kwa Israele,+ pantu bonse fye nabafuma kuli ine pa mulandu wa tulubi twabo utwa bunani.”’+

6 “E ico sosa ku ba mu ng’anda ya kwa Israele auti, ‘Shikulu Mulopwe Yehova atila: “Bweleni no kufuma ku tulubi twenu utwa bunani+ no kwalula ifinso fyenu ukufuma ku fya bunani fyenu fyonse;+ 7 pantu umuntu onse uwa mu ng’anda ya kwa Israele nelyo uwa mu balebeshi abalebela mu Israele, uwaleka ukunkonka+ no kuleka utulubi twa bunani ukwikala mu mutima wakwe no kubika ica kumulenga ukubembuka pa ntanshi yakwe no kuya kuli kasesema ukuti amwipushisheko kuli ine,+ ine Yehova, nkamwasuka ne mwine. 8 Kabili nkalukila uyo muntu+ no kumulenga ukuba ica kusokelako bambi+ kabili akaba mu nsoselo,+ kabili nkamulofya mu bantu bandi;+ e lyo mukeshiba ukuti nine Yehova.”’+

9 “‘Kumfwa kasesema, nga asembelekwa no kusosa icebo, nine Yehova nasembeleka uyo kasesema;+ kabili nkamulimuna no kumulofya mu bantu bandi abena Israele.+ 10 Kabili bakashingamwa imembu shabo.+ Imembu sha uleipusha shikaba fye nge membu sha kwa kasesema,+ 11 pa ku ti aba mu ng’anda ya kwa Israele beluba pa kunkonka,+ nangu kuikowesha na kabili ku membu shabo shonse. Kabili bakaba abantu bandi na ine nkaba Lesa wabo,’ e fyasosa Shikulu Mulopwe Yehova.”+

12 Kabili icebo ca kwa Yehova caishile kuli ine aciti:13 “We mwana wa muntu, icalo nga cabembukila ine pa kucita ubusangu,+ na ine nkatambalikila ukuboko kwandi pali cena no kucilika intulo ya fya kulya,+ nkatumamo ne cipowe+ no kulofya umuntu ne nama.”+ 14 “‘Kabili amuba mu kati ka ciko aba bantu batatu, Noa,+ Daniele,+ na Yobo,+ bena pa mulandu wa bulungami bwabo+ kuti bapokolola imyeo yabo,’ e fyasosa Shikulu Mulopwe Yehova.”+

15 “‘Nangu nga napisha inama mbi mu calo+ na sho shaipaya abana+ no kulenga icalo ukuba icibolya ukwabula no wa kupitamo pa mulandu wa nama mbi,+ 16 aba bantu batatu nga bali mu kati ka ciko, na pali ne mwine,’ e fyasosa Shikulu Mulopwe Yehova, ‘teti bapokolole abana baume nangu abana banakashi; bena beka, e bengapokololwa ne calo kuti caba icibolya.’”+

17 “‘Nangu nga naleta ulupanga pali ico calo,+ kabili nga natila: “Nalupite mu calo ulupanga,” naipaya no muntu ne nama,+ 18 na ba bantu batatu nga bali mu kati ka ciko,+ na pali ne mwine,’ e fyasosa Shikulu Mulopwe Yehova, ‘teti bapokolole abana baume nangu abana banakashi, lelo bena beka, e bengapokololwa.’”+

19 “‘Nangu nga natumine icikuko muli co calo+ no kupongolwelapo ubukali bwandi no kwipayaula,+ pa kuti ndofye umuntunse ne nama, 20 e lyo Noa,+ Daniele+ na Yobo+ nga bali mu kati ka ciko,+ na pali ne mwine,’ e fyasosa Shikulu Mulopwe Yehova, ‘teti bapokolole umwana mwaume nangu umwana mwanakashi; bena beka e bengapokolola imyeo yabo+ pa mulandu wa bulungami bwabo.’”

21 “Pantu Shikulu Mulopwe Yehova atila, ‘E fyo cikaba ilyo nkatuma ubupingushi bwandi+ bune (4) ubwabipa—ulupanga ne cipowe ne nama mbi ne cikuko+—ubo nkatuma pali Yerusalemu ku kulofya umuntunse ne nama.+ 22 Lelo, moneni! kukashalamo abakapusuka, abakesa.+ Abana baume na bana banakashi, aba! Baleisa kuli imwe, na imwe mukamona imibele yabo ne micitile yabo.+ Na imwe mukasansamushiwa pa bubi ubo nkaleta pa musumba wa Yerusalemu, na pali conse ico nkaleta pali wena.’”

23 “‘Kabili bakamusansamusha ilyo mukamona imibele yabo ne micitile yabo; e lyo mukeshiba ukuti conse ico nacitile kuli wena nshacitile apa fye,’ e fyasosa Shikulu Mulopwe Yehova.”+

15 Kabili icebo ca kwa Yehova caishile kuli ine, aciti: 2 “We mwana wa muntu, bushe umuti wa mwangashi,+ nelyo akamusambo ka uko, fyapusana shani ne miti imbi iya mu mpanga? 3 Bushe kuti babuulako icimuti ca kubombelako umulimo? Nelyo bushe abantu balabuulako ulusunga lwa kukobekako icipe? 4 Mona! Uba ni nkuni sha pa mulilo.+ Impela shonse shibili isha uko umulilo uloca, na pa kati ka uko ulapya.+ Bushe kuti baubomfya ku mulimo uuli onse? 5 Mona! Nga uli uutuntulu, tabaubomfya ku mulimo nangu umo. Pali bufi umulilo nga wawoca kabili wapya, teti baubomfye ku mulimo nangu umo!”+

6 “E ico, Shikulu Mulopwe Yehova atila, ‘Ifyo waba umuti wa mwangashi pa miti ya mu mpanga, uo natila ni nkuni sha kukoseshako umulilo, e fyo ndecita na ku bekashi ba mu Yerusalemu.+ 7 Kabili ndebalwisha.+ Bafumine mu mulilo, lelo umulilo wine uli no kubapwisha.+ E lyo mukeshiba ukuti nine Yehova, ilyo nkabalukila.’”+

8 “‘Kabili nkasangula icalo ukuba icibolya,+ pantu nabapondoka,’+ e fyasosa Shikulu Mulopwe Yehova.”

16 Kabili icebo ca kwa Yehova caishile kuli ine, aciti: 2 “We mwana wa muntu, eba+ Yerusalemu ifya bunani ifyo acita.+ 3 Kabili utile, ‘Shikulu Mulopwe Yehova asosa kuli Yerusalemu ati: “Umo watuntwike kabili umo wafyalilwe ni mu calo ca mwina Kanaani.+ Wiso ali mwina Amore+ na noko ali mwina Hiti.+ 4 Ulwa kufyalwa kobe, mu bushiku wafyelwemo+ umutoto obe tawaputwilwe, na mu menshi tawasambilwemo pa kuti usanguluke, kabili tawasubilwe umucele, kabili tawapombelwe mu nsalu. 5 Takuli uwakumfwilile uluse ukuti akucitileko cimo pali ifi pa mulandu wa ku kulangulukilako,+ lelo bakupoosele mu mpanga pantu walipatilwe mu bushiku wafyelwe.

6 “‘“Ilyo napitile uko wali, nalikumwene ulealangana mu mulopa obe, e lyo nakwebele ninshi uli mu mulopa obe nati, ‘Wifwa!’+ awe nakwebele ninshi uli mu mulopa obe nati, ‘Ba no mweo!’ 7 Nakulengele ukufula nge fimenwa mwi bala pa kuti ukule+ no kulepa no kwingila ne fibekobeko ifyawamisha.+ Amabele yobe yalikulile, no mushishi obe walikulile, ilyo wali ubusokwa kabili ubwamba.”’

8 “‘Kabili napitile uko wali no kukumona, kabili mona! inshita yobe yali ni nshita ya citemwiko.+ E ico nakufimbile ica kufwala candi+ pa kuti nkufimbe pa bwamba no kulapa umulapo kuli iwe no kupangana icipangano na iwe,’+ e fyasosa Shikulu Mulopwe Yehova, ‘e fyo waishileba uwandi.+ 9 Kabili, nalikusambile mu menshi+ no kukusamba umulopa, e lyo nakusuba amafuta.+ 10 Kabili nakufwikile ica kufwala cayemba+ no kukufwika indyato sha mukupo wa silu+ no kukupomba insalu yawamisha+ ku mutwe, no kukufimba insalu iya mutengo nga nshi. 11 Kabili nakuyemfeshe ku fibekobeko no kukufwika amakoosa+ ku maboko na kamunyololo+ mu mukoshi. 12 Kabili nakubikile akamupeto ku moona+ na masikiyo ku matwi yobe+ ne cilongwe cayemba pa mutwe obe.+ 13 Kabili wafwele golde na silfere, ne fya kufwala fyobe fyali ifya kolokondwe umusuma ne nsalu shauma umutengo ne nsalu yayemfiwa.+ Ubunga bwapeleka no buci na mafuta+ e fyo walelya, kabili waishileba uwayemba icine cine, wasukile walinga ukuba ubufumu.’”+

14 “‘Kabili ululumbi lobe lwaile mu nko pa mulandu wa kuyemba kobe, kwali ukwine kwine pa mulandu wa fyo nakuyemfeshe,’+ e fyasosa Shikulu Mulopwe Yehova.”

15 “‘Lelo watampile ukutetekela ukuyemba kobe+ no kuba cilende pa mulandu wa lulumbi lobe+ no kucita bucilende no mupitanshila onse; ukuyemba kobe kwaishileba kwa mupitanshila.+ 16 Kabili wabuulile ifya kufwala fyobe fimo no kuipangila ififulo fya kupepelapo+ ifyabalabata kabili walecitilapo bucilende—ifintu fya musango yo tafifwile ukucitika, kabili fikatala aficitika.+ 17 Wabuulile ne fipe ifisuma ukufuma pali golde yandi na silfere ifyo nakupeele+ no kupangamo ifimpashanya fya bwaume+ no kucita na fyo bucilende.+ 18 Wabuulile ne nsalu shobe ishayemfiwa no kufimbapo; kabili watuulile ku cinso ca fiko amafuta yandi ne fyanunkila fyandi.+ 19 Ne fya kulya fyandi ifyo nakupeele—ubunga bwapeleka na mafuta no buci ifyo nakulishishe+—na fyo watuulile ku cinso ca fiko ku kuba umununko wa kacena ka kunasha umutima,+ kabili e fyo cali,’ e fyasosa Shikulu Mulopwe Yehova.”

20 “‘Kabili walebuula abana bobe abaume na bana bobe abanakashi abo wamfyalile,+ no kubapeela ukuba amalambo ya koca+—bushe ifi ifya bucilende fyobe tafifulile? 21 Kabili waipeye abana bandi,+ kabili wabapeele ku filubi pa kuboca mu mulilo.+ 22 Kabili ilyo walecita ifya bunani fyobe fyonse ne fya bucilende tawaibukishe inshiku sha bwaice bobe ilyo wali ubusokwa kabili ubwamba; ilyo walealangana mu mulopa obe.+ 23 E ico pa numa ya bubi bobe bonse (“ca bulanda, ca bulanda nga nshi,”+ e fyasosa Shikulu Mulopwe Yehova) 24 walundumanike umupili no kupanga apasansuka mu lubansa lonse.+ 25 Pa lutwe lwa musebo onse e po wakuulile ififulo fyobe ifya kupepelapo+ no kulenga ukuyemba kobe ukuba ica bunani+ no kutangalika amakasa yobe ku mupitanshila onse+ no kucilamo ukucita bucilende.+ 26 Kabili wacitile bucilende na bana baume ba ku Egupti,+ abena mupalamano bobe aba mibili iikulu,+ kabili watwalilile ukufusha bucilende bobe pa kuti unkalifye. 27 E ico, mona! nkatambalika ukuboko kwandi pali iwe+ kabili nkaceefya ifya kulya fyobe+ no kukupeela ku banakashi ba nsuuna+ abakupata,+ abana banakashi ba baPelishiti,+ abanakashi abo waseebenye pa mulandu wa micitile yobe iya nsoni.+

28 “‘Kabili wacitile bucilende na bana baume ba ku Asiria pantu tawaleikushiwa,+ kabili wacitile na bo bucilende na lyo line tawaikushiwe. 29 E ico wafushishe bucilende bobe ukulola mu calo ca Kaanani,+ ukulola ku bena Kaldi;+ muli ici na mo tawaikushiwe. 30 Nalikalipa nga nshi pa fyo wacita,’+ e fyasosa Shikulu Mulopwe Yehova, ‘fyonse ifi ulecita, imicitile ya mwanakashi,+ cilende wapama!+ 31 Ilyo walundumanike umupili pa lutwe lwa musebo onse no kuipangila apasansuka mu lubansa lonse, lelo tawali nga cilende pantu wakeene ukulipilwa. 32 Umwanakashi waupwa uucita ubucende asenda bambi bambi, ukucila umulume wakwe.+ 33 Abantu bapeela ica bupe+ kuli bacilende bonse, lelo iwe—wapeele ifya bupe kuli bonse abakutemwa+ abacita nobe bucilende, ubapeela ifilambu pa kuti bese ukufuma konse konse ku kucita ifya bucilende+ na iwe. 34 Iwe wacita ifyapusana ne ficita abanakashi bambi abacita bucilende, kabili tapali uucita bucilende mu nshila ucitilamo, ukulipila abalecita na iwe bucilende ilyo iwe tabalekulipila, e fyo wapusana ne ficita bacilende bambi.’

35 “E ico, iwe cilende,+ umfwa icebo ca kwa Yehova.+ 36 Shikulu Mulopwe Yehova atila, ‘Pa mulandu wa kuti ulwinso lobe lwapongololwa+ ne fya mfwalo fyobe+ wafuulila abacita na iwe bucilende+ mu micitile yobe iya bucilende na ku tulubi tobe utwa muselu,+ na ku milopa ya bana bobe abo wabapeele,+ 37 e ico nkalonganya bonse abakutemwa abo walefwaya ukusekesha na bonse abo watemenwe na bo wapatile, nkabalonganika bonse ukukulwisha ukufuma konse konse no kufimbula pa fya mfwalo fyobe, kabili bakamona ifya mfwalo fyobe fyonse.+

38 “‘Kabili nkakupingula ifyo abanakashi bacende+ kabili abasumya umulopa+ bapingulwa, nkakupingula ubupingushi bwabipisha ubwa cipyu kabili ubwa bufuba.+ 39 Nkakupeela na mu minwe yabo, na bo bakabongolola imipili+ yobe ne fyasansuka fine bakafibongolola,+ bakakufuula na malaya yobe+ no kusenda ifipe fyobe ifisuma+ no kukusha ubusokwa kabili ubwamba. 40 Kabili bakaleta ibumba+ lya kukwimina no kukupoola amabwe+ no kukwipaya kuli bapanga babo.+ 41 Bakoca amayanda yobe ku mulilo+ no kukukanda pa menso ya banakashi abengi;+ kabili nkalenga ukaleke bucilende,+ ukaleke no kulipila bambi. 42 Kabili nkalenga ubukali bwandi ukupwila pali iwe,+ kabili nkaleka ukukumfwila ubufuba;+ e lyo nkaba tondolo, no kukalifiwa kabili iyo.’

43 “‘Pa mulandu wa kuti tawaibukishe inshiku sha bwaice bobe+ kabili walinkalifye pali ifi fyonse,+ e co na ine nkabikila imibele yobe pa mutwe obe,’+ e fyasosa Shikulu Mulopwe Yehova, ‘kabili tawakatwalilile ukucita ifya nsoni pamo ne fya bunani fyobe fyonse.

44 “‘Mona! Onse uuma ipinda+ akoma ipinda pali iwe ati: “Ifyaba nyina e fyaba no mwana wakwe umwanakashi!”+ 45 Uli mwana mwanakashi wa kwa noko,+ uwapata umulume+ wakwe na bana bakwe. Uli nkashi ya nkashi shibiyo, ishalengwa ubunani pa balume babo na bana babo. Nyinenwe ali mwina Hiti,+ na shinwe umwina Amore.’”+

46 “‘Nkashi mbiyo umukalamba ni Samaria+ ne mishi ya uko,+ uwaikala ku kuso kobe, ne nkashi mbiyo umwaice, uwaikala ku kulyo kobe, ni Sodomu+ ne mishi ya uko.+ 47 Tawaendele fye mu mibele yabo, kabili tawacitile fye ukulingana ne fya bunani fyabo.+ Lelo mu nshita fye inono watampile ukulufyanya sana ukucila bena mu mibele yobe yonse.+ 48 Na pali ne mwine,’ e fyasosa Shikulu Mulopwe Yehova, ‘Sodomu inkashi nobe, ena ne mishi yakwe, tacita ifyo iwe wacitile, iwe ne mishi yobe.+ 49 Mona! Ifi e fyali ifilubo fya kwa Sodomu nkashi nobe: Icilumba,+ ifya kulya ifingi+ no kwikala ubwanalale+ e fyali kuli ena na ku mishi yakwe,+ kabili takoseshe ukuboko kwa wacushiwa+ no mulanda.+ 50 Kabili batwalilile fye ukuba na matutumuko+ no kucita ifya bunani ku cinso candi,+ nasukile nabapasa, pantu namwene ukuti e calingile ukucita.+

51 “‘Kumfwa Samaria+ ena, tabembwike ukufika kuli hafu wa fyo iwe wabembwike, lelo walenga ifya bunani fyobe ukufula ukubacila, ica kuti walenga bankashi nobe ukumoneka nga balungama pa mulandu wa fya bunani fyobe fyonse.+ 52 Na iwe wine ukaseebana nga casangwa ukuti ulelubulwilako inkashi shibiyo. Pa mulandu wa membu shobe isho wacitilemo ifya kuselausha ukucila bena, bena balilungama ukucila iwe.+ E ico na iwe ba ne nsoni no kushingamwa ukuseebana kobe pantu walenga inkashi shibiyo ukumoneka nga balungama.’

53 “‘Kabili nkalonganya bankole babo,+ bankole ba kwa Sodomu na ba mu mishi yakwe, bankole ba kwa Samaria na ba mu mishi yakwe; nkalonganya na bankole bobe mu kati kabo,+ 54 pa kuti ukaseebane;+ kabili ukaseebana pali fyonse ifyo wacita, pantu walibasansamwishe.+ 55 Ne nkashi inobe, Sodomu ne mishi yakwe, bakabwelela ku fyo bali kale, na Samaria ne mishi ya uko bakaba ifyo bali kale, na iwe wine ne mishi yobe mukabwelela ku cifulo cenu ica kale.+ 56 Kabili wamwene Sodomu inkashi inobe ngo ushalinga ukulumbulwa mu kanwa kobe ilyo wali ne cilumba,+ 57 ilyo ububi bobe tabulasokololwa,+ nga pa nshita ya kuseebana kwa bana banakashi ba kwa Siria+ no kwa bonse abena mupalamano bakwe, abana banakashi ba baPelishiti,+ abalekupumya.+ 58 Ufwile ukushingamwa+ imibele yobe iya nsoni+ ne fya bunani fyobe,’ e fyasosa Yehova.”

59 “Pantu Shikulu Mulopwe Yehova atila, ‘Nkacita kuli iwe nge fyo wacita,+ pantu wasuula umulapo pa kufulunganya icipangano candi.+ 60 Na ine nkebukisha icipangano napangene na iwe mu nshiku sha bwaice bobe,+ kabili nkakupampamikila icipangano ca muyayaya.+ 61 E lyo ukebukisha imibele yobe+ no kuseebana ilyo ukapokelela inkashi shibiyo, abakalamba bobe na baice bobe, kabili nkabapeela kuli iwe ku kuba abana banakashi,+ lelo te pa mulandu wa cipangano na iwe.’+

62 “‘Na ine nkapampamika icipangano candi na iwe;+ e lyo ukeshiba ukuti nine Yehova, 63 pa kuti ukebukishe no kumfwa insoni+ no kukana-asamuna akanwa kobe+ pa mulandu wa kuseebana kobe, ilyo nkafuta+ ulubembu lobe lonse,’ e fyasosa Shikulu Mulopwe Yehova.”

17 Kabili icebo ca kwa Yehova caishile kuli ine, aciti: 2 “We mwana wa muntu, pika ubwile+ pa ba mu ng’anda ya kwa Israele no kubomina ipinda.+ 3 Utile, ‘Shikulu Mulopwe Yehova asosa ati: “Kapumpe umukalamba,+ uwa mapindo ayakalamba,+ ne ngala ishalepa, uwa masako ayengi, uwabalabata, aile ku Lebanone+ no kusenda akantongolilo+ ka mukedari.+ 4 Atimpwile akantongolilo ka uyu mukedari akalepuuka no kutwala ku calo ca Kanaani;+ mu musumba wa ba makwebo e mo alimbile. 5 Kabili, abuulilepo imbuto sha mu calo+ no kubyala mwi bala. Abyele nga filya fyaba ifimpusa fya muwilo mu mbali ya mumana.+ 6 Awe ulubuto lwalipuukile no kuba umwangashi walelema uwipi,+ na mabula ya uko tayasakalele; ne mishila ya uko, tayasalangene, yali fye mwi samba lya uko. Ulubuto lwasukile lwaba umwangashi, no yo mwangashi walitumbile no kufumya imisambo.+

7 “‘“Kwali kapumpe na umbi umukalamba,+ uwa mapindo ayakalamba,+ na masako ayatali, kabili, moneni! uyu wine umwangashi waloseshe imishila ya uko kuli uyu kapumpe.+ Kabili ukufuma pa mputa apo walimbilwe, watwala imisambo ya uko kuli ena ukuti autapilishe.+ 8 Mu mushili uusuma, mu lulamba lwa mumana, e mo walimbilwe,+ pa kuti ufumye imisambo no kutwala ifisabo, no kuba umwangashi ukankaala.”’

9 “Sosa auti, ‘Shikulu Mulopwe Yehova atila: “Bushe ukakula fye bwino?+ Bushe umo takanukule imishila ya uko+ no konaula ifisabo fya uko? Kabili bushe ululembelya lwa uko lonse ulo baputulako talwakome?+ Lukoma. Ukuboko ukukalamba nangu cinkupiti wa bantu tafyakafwaikwe pa ku-unukwila pamo ne mishila. 10 Kabili mona! nangu walimbwa, bushe ukapuuka? Bushe tawakominine, kwati ni lintu umwela wa ku kabanga waupuupapo?+ Ukomina mu mputa umo wamena.”’”+

11 E lyo icebo ca kwa Yehova caishile kuli ine na kabili, aciti: 12 “Shi sosa ku ba mu ng’anda ya bacipondoka+ auti, ‘Bushe ca cine tamwishibe umo ifi fintu fyalola?’ Sosa auti, ‘Moneni! Imfumu ya ku Babiloni yafikile ku Yerusalemu no kusenda imfumu+ ya uko na bacilolo no kubasenda ku Babiloni.+ 13 Kabili, yabuulile umwana wa mfumu umo+ no kupangana nankwe icipangano no kumulapisha umulapo;+ yasendele ne ntungulushi sha calo,+ 14 pa kuti ubufumu buwe,+ bufilwe ukuimya, pa kuti pa kusunga icipangano ca iko bwiminine.+ 15 Lelo asukile amupondokela+ pa kutuma inkombe shakwe ku Egupti, ukuti bamupeele bakabalwe+ na cinkupiti wa bantu. Bushe akatunguluka? Bushe akapusuka uucita ifi fintu, kabili uwapula mu cipangano? Bushe cine cine akapusuka?’+

16 “‘“Na pali ne mwine,”+ e fyasosa Shikulu Mulopwe Yehova, “ku cifulo ukwikala imfumu iyabikile pa bufumu uwasuulile umulapo+ wa iko no kupula mu cipangano ca iko, e ko akafwila, e kutila mu Babiloni.+ 17 Kabili Farao na bashilika bakwe abengi ne bumba ilikalamba nga nshi takamwafwe mu nkondo,+ pa kutuulika amaloba ukushinga umusumba no kukuula icibumba, pa kuti epaye abantu abengi.+ 18 Kabili asuulile umulapo+ pa kupula mu cipangano, kabili, moneni! apeele ukuboko kwakwe+ no kulapa kabili acitile fyonse ifi. Takapusuke iyo.”+

19 “‘E ico Shikulu Mulopwe Yehova atila: “Na pali ne mwine, cine cine nkamukandila pa mulapo wandi uo asuulile+ ne cipangano candi ico atoba. 20 Nkafungulwila pali ena isumbu lyandi, na o akekatwa mwi sumbu lyandi;+ nkamutwala na ku Babiloni no kulwishanya nankwe kulya pa mulandu wa kunsangukila.+ 21 Ne mbutushi shakwe shonse isha mwi bumba lyakwe, shikawa ku lupanga, na bakashalapo bakasalanganina mu ncende shonse.+ E lyo mukeshiba ukuti ine ne Yehova, nalisosa.”’+

22 “‘Shikulu Mulopwe Yehova atila: “Nkabuulapo akantongolilo ka mukedari+ no kukalimba; ku mpela ya tumisambo twa uko nkatimpulako akateku+ no kukalimba pa lupili lwasansama kabili ulutali.+ 23 Pa lupili ulutali mu Israele e po nkakalimba,+ na ko kakalimbuka no kutwala ifisabo+ no kuba umukedari ukankaala.+ Na mwi samba mukekala ifyuni fya misango yonse; mu cintelelwe ca misambo ya uko e mo fikekala.+ 24 E lyo imiti yonse iya mu mpanga ikeshiba ukuti ine Yehova,+ naceefya umuti wasansama,+ nalenga no muti uwacepa+ ukusansama, nalenga umuti uubishi+ ukuuma no kulenga umuti wauma ukupuuka. Ine ne Yehova ninsosa kabili nincita.”’”+

18 Kabili icebo ca kwa Yehova caishile kuli ine, aciti: 2 “Ni mwi mulosha pa kuuma ipinda ili mu calo ca Israele, amuti, ‘Bashibo e balya imyangashi iibishi, lelo ameno ya bana e yawa’?+

3 “‘Na pali ne mwine,’ e fyo Shikulu Mulopwe Yehova asosa, ‘tamwakaleuma ili pinda na kabili mu Israele. 4 Moneni! Abantu bonse bandi.+ Wishi muntu+ wandi no mwana na o muntu wandi.+ Umuntu uubembuka+ e ukafwa.+

5 “‘Nomba umuntu nga aba umulungami, kabili alacita ifya mulinganya ne fyalungama;+ 6 talya+ amalambo ya tulubi pa mpili+ e lyo amenso yakwe tenwina ku tulubi twa bunani utwa ba mu ng’anda ya kwa Israele,+ kabili tasendama no mukashi wa munankwe+ na ku mwanakashi uwakowela tapalamako;+ 7 tacululusha umuntu;+ alabwesha iciikatilo asendele ku wa nkongole;+ tebila abantu;+ ifya kulya fyakwe+ alapeelako uwa nsala no wasapula alamupeelako ifya kufwala;+ 8 takongwesha isha kaloba+ kabili tapoka isha kulundapo;+ taba no lufyengo;+ aba no mulinganya wa cine pa kati ka muntu no munankwe;+ 9 enda mu fipope fyandi+ alakonka no bupingushi bwandi pa kuti alecita ifya cishinka,+ ninshi mulungami.+ Akatwalilila uwa mweo,’+ e fyasosa Shikulu Mulopwe Yehova.

10 “‘Kabili umuntu nga alifyala umwana umwaume icipondo,+ uusumya umulopa,+ uucita ifyapala ifi 11 (lelo umwine tacita nangu cimo pali fi fintu); nga alalya na malambo ya tulubi pa mpili,+ kabili nga alasendama no mukashi wa munankwe;+ 12 alacululusha uwacula no mupiina;+ alapokolola ifintu ku maka,+ alasenda iciikatilo ku wa nkongole no kukanabwesha;+ kabili alenwina amenso yakwe+ ku tulubi twa bunani, ninshi alacita ifya bunani.+ 13 Nga alakongwesha no kufwaya isha kulundapo,+ ne sha kulundapo alapoka,+ ninshi takatwalilile uwa mweo. Ifya bunani fyonse ifi alicita.+ Uk wipaiwa akepaiwa. Umulopa wakwe ukaba pa mwine.+

14 “‘Kabili moneni! umuntu nga alifyala umwana umwaume, na o alamona imembu shonse isha kwa wishi isho acita, alamona lelo ena tacitako ifi ifintu.+ 15 Talya amalambo ya tulubi pa mpili, na menso yakwe tenwina ku tulubi twa bunani utwa ba mu ng’anda ya kwa Israele;+ tasendama no mukashi wa munankwe;+ 16 tacululusha umuntu,+ tekata iciikatilo,+ tapokolola ifintu ku maka;+ ifya kulya fyakwe+ alapeela uwa nsala, no wasapula alamupeelako ifya kufwala;+ 17 tacusha uwacula; tapoka isha kulundapo+ ne sha kaloba;+ akonka ubupingushi bwandi;+ enda mu fipope fyandi;+ ena takafwile pa membu sha kwa wishi.+ Akaba no mweo.+ 18 Lelo wishi, pa mulandu wa kuti acitile ubucenjeshi bwine bwine,+ aibile ifya kwa munyina,+ no kucita ifyabipa mu bantu bakwe,+ moneni! ena akafwila pa membu shakwe.+

19 “‘Kabili imwe mukatila: “Nga cinshi ico umwana ashikandilwa pa membu sha kwa wishi?”+ Pantu umwana ena alacita ifya mulinganya ne fyalungama,+ alakonka ne fipope fyandi fyonse no kulaficita.+ Akaba no mweo.+ 20 Umuntu uubembuka e ukafwa.+ Umwana takakandilwe pa membu sha kwa wishi, kabili wishi takakandilwe pa membu sha mwana.+ Ubulungami bwa mulungami bukaba pa mwine,+ ne fyabipa ifyo umubifi acita fikaba pa mwine.+

21 “‘Lelo umubifi nga aleka imembu shakwe shonse isho acita+ kabili alakonka ifipope fyandi fyonse no kucita ifya mulinganya ne fyalungama,+ akaba no mweo. Takafwe iyo.+ 22 Takapingwilwe+ pa membu shonse isho acita. Ifyalungama ifyo acita e fikalenga abe no mweo.’+

23 “‘Bushe ndasekela mu mfwa ya mubifi,’+ e fyasosa Shikulu Mulopwe Yehova, ‘bushe nshisekela mu kuti umubifi aleke imibele yakwe, no kuba no mweo?’+

24 “‘Lelo umulungami nga aleka ukucita ifyalungama, kabili atampa ukucita ifyabipa;+ alacita ukulingana ne fya bunani fyonse ificita umubifi+ kabili ali no mweo, ifyalungama fyonse ifyo alecita tafyakebukishiwe.+ Akafwila pa busangu bwakwe ubo acita na pa lubembu lwakwe ulo abembuka.+

25 “‘Lelo imwe mutila: “Imibele ya kwa Yehova tayalungama.”+ Shi umfweni, mwe ba mu ng’anda ya kwa Israele. Bushe imibele yandi tayalungama?+ Bushe te mibele yenu e ishalungama?+

26 “‘Umulungami nga aleka ukucita ifyalungama kabili atampa ukucita ifyabipa no kufwilapo, pa fyabipa ifyo+ acita e po akafwila.+

27 “‘Kabili umubifi nga aleka ukucita ifyabipa kabili atendeka ukucita ifya mulinganya ne fyalungama,+ ena akapususha umweo wakwe.+ 28 Ilyo amona+ no kuleka imembu shonse isho acita,+ akaba no mweo. Takafwe iyo.+

29 “‘E lyo aba mu ng’anda ya kwa Israele bakatila: “Imibele ya kwa Yehova tayalungama.”+ Bushe imibele yandi tayalungama mwe ba mu ng’anda ya kwa Israele?+ Bushe te mibele yenu e ishalungama?’+

30 “‘E ico umuntu onse nkamupingula ukulingana ne mibele yakwe,+ mwe ba mu ng’anda ya kwa Israele,’ e fyasosa Shikulu Mulopwe Yehova.+ ‘Bweleni, shi lekeni ukucita imembu,+ kabili mwileka icintu nangu cimo cimulenge ukulabembuka.+ 31 Lekeni imembu shenu shonse isho mwabembuka+ no kukwata umutima upya+ no mupashi upya,+ pantu cinshi ico mulefwila,+ mwe ba mu ng’anda ya kwa Israele?’

32 “‘Pantu nshisekela mu mfwa ya ulefwa,’+ e fyasosa Shikulu Mulopwe Yehova. ‘E ico bweleni no kuba no mweo,+ mwe bantu.’”

19 “Na iwe samwina intungulushi sha kwa Israele+ ulwimbo lwa bulanda,+ 2 no kutila, ‘Noko ali nga cinshi? Ali nga nankalamo pa kati ka nkalamo.+ Alelaala pa kati ka misepela ya nkalamo. Alekusha abana bakwe.

3 “‘Panono panono akushishepo umwana wakwe umo.+ Aishileba umusepela wa nkalamo, watampile no kusambilila ifya kutaakanya ico waikata.+ Walelya na bantu. 4 Na bantu ba mu nko baleumfwa pali wena. Wawilile mu bucinga bwabo, baukobele na ku fya kulobelako no ku-utwala ku calo ca Egupti.+

5 “‘Ilyo amwene ukuti alolela ne fyo apangile ukucita taficitike, abuulile umwana wakwe umbi.+ Alimukushishe aba no musepela wa nkalamo. 6 Na o watendeke ukwendauka mu kati ka nkalamo. Waishileba umusepela wa nkalamo. Panono panono wasambilile ifya kutaakanya ico waikata.+ Walelya na bantu.+ 7 Waishibe na mayanda yabo aya malinga no kulenga imisumba yabo yaba ifibolya,+ casukile icalo caba icibolya, mwashala fye ukulila kwa uko.+ 8 Na bantu ba mu nko shonse ukufuma ku fitungu fya bulashi baliwimine+ no ku-ufungulwila amasumbu yabo.+ Wasukile wawila mu bucinga bwabo.+ 9 Awe baubikile muli cikasalanga ku fya kulobelako no ku-utwala ku mfumu ya Babiloni.+ Bausendele mu masumbu, pa kuti ishiwi lya uko liumfwika na kabili pa mpili sha kwa Israele.+

10 “‘Noko+ ali ngo mwangashi mu mulopa obe,+ uwalimbwa ku menshi. Aletwala ifisabo kabili ali ne misambo iingi pa mulandu wa menshi ayengi.+ 11 Ne misambo ya uko yali iyakosa ica kuti kuti yaba inkonto ya bakateka.+ Wasukile walepa ukucila imisambo ya miti imbi, kabili walemoneka pa mulandu wa kuleepa kwa uko, pa mulandu wa misambo ya uko iyafulako amabula.+ 12 Lelo wasukile wanukulwa mu bukali.+ Wapooselwe pa nshi, kwali no mwela wa ku kabanga uwaumike ifisabo fya uko.+ Umusambo wa uko uwakosa baliukontwele no kuuma wauma.+ Umulilo waliwocele.+ 13 Nomba walimbwa mu matololo,+ mu calo icauma kabili umushaba amenshi.+ 14 Kwafumine no mulilo mu musambo wa uko.+ Waocele utwatumbileko, ifisabo fya uko, kabili tamwali muli ena umusambo wakosa, uwa kuba inkonto ya bukateka.+

“‘Ulu lwimbo lwa bulanda, kabili lukatwalilila ukuba ulwimbo lwa bulanda.’”+

20 Nomba mu mwaka walenga cinelubali (7), mu mweshi wa walenga isano, pa bushiku bwe kumi (10) ubwa muli uyo mweshi, e mo abaume bamo pa bakalamba ba mu Israele baishile ku kwipusha kuli Yehova,+ kabili baikele ku cinso candi.+ 2 E lyo kwaishile icebo ca kwa Yehova kuli ine, aciti: 3 “We mwana wa muntu, sosa ku bakalamba ba mu Israele, no kubeba auti, ‘Shikulu Mulopwe Yehova atila: “Bushe mwishile ku kwipusha kuli ine?+ ‘Na pali ne mwine, nshamusuminishe ukunjipusha,’+ e fyasosa Shikulu Mulopwe Yehova.”’

4 “Bushe ulebapingula? Bushe ulebapingula, we mwana wa muntu?+ Balenge ukwishiba ifya bunani ifyo ifikolwe fyabo fyacitile.+ 5 Kabili ubebe auti, ‘Shikulu Mulopwe Yehova atila: “Mu bushiku nasalile Israele,+ naimishe ukuboko kwandi+ no kulapa ku bana ba mu ng’anda ya kwa Yakobo+ no kulenga banjishibe mu calo ca Egupti.+ Awe, naimishe ukuboko kwandi no kulapa kuli bena, nati, ‘Nine Yehova Lesa wenu.’+ 6 Muli bulya bushiku naimishe ukuboko kwandi+ no kulapa kuli bena ukuti nkabafumya mu calo ca Egupti no kubatwala ku calo ico nabalengwilile, umwaba umukaka no buci.+ Icalo icisuma nga nshi pa fyalo fyonse.+ 7 Kabili natile kuli bena, ‘Umuntu onse aleke ukucita ifya bunani ifyo aloshako amenso yakwe,+ kabili mwi-ikowesha+ ku tulubi twa bunani utwa mu Egupti. Nine Yehova Lesa wenu.’+

8 “‘“Lelo batampile ukumpondokela,+ kabili bakeene ukumfwa kuli ine. Abantu tabalekele ifya bunani mu menso yabo, kabili tabalekele ukupepa utulubi twa bunani utwa ku Egupti,+ e ico natile ndi no kupongolwela icipyu candi pali bena, pa kuti mfishepo ubukali bwandi pali bena mu calo ca Egupti.+ 9 Kabili nalicitilepo cimo pa kuti ishina lyandi liisaalulwa ku menso ya nko isho balimo,+ pantu nailengele ukwishibikwa ku menso ya shiko ilyo nalebafumya mu calo ca Egupti.+ 10 Awe nabafumishe mu calo ca Egupti no kubatwala mu matololo.+

11 “‘“Nabapeele ifipope fyandi;+ kabili nalengele no kuti beshibe ubupingushi bwandi,+ pa kuti umuntu ulekonka ifi abe no mweo.+ 12 Nabapeele na masabata yandi,+ ku kuba icishibilo pa kati ka ine na bena,+ pa kuti beshibe ukuti nine Yehova uulebalenga ukuba aba mushilo.

13 “‘“Lelo, aba mu ng’anda ya kwa Israele balimpondokele mu matololo.+ Tabaendele mu fipope fyandi,+ balikeene no bupingushi bwandi,+ ifya kuti umuntu nga alefikonka kuti aba no mweo.+ Kabili basuulile nga nshi amasabata yandi,+ ica kuti natile ndi no kupongolwela pali bena ubukali bwandi mu matololo, ku kubalofya.+ 14 Lelo nalicitilepo cimo pa kuti ishina lyandi liiseebana mu menso ya nko, ishamweneko ilyo nabafumishe.+ 15 Na ine naimishe ukuboko kwandi no kulapa kuli bena mu matololo,+ ukuti nshakabatwale mu calo ico nabapeele, icalo umwaba umukaka no buci,+ (icisuma nga nshi pa fyalo fyonse,)+ 16 pa mulandu wa kuti bakeene ubupingushi bwandi; na mu fipope fyandi tabaendelemo, na masabata yandi baliyasuulile, pantu imitima yabo yalefwaya utulubi twabo utwa bunani.+

17 “‘“Lelo naleumfwa uluse nga nabamona, kabili nshabonawile,+ nshabalofeshe mu matololo. 18 E lyo naebele abana babo mu matololo+ nati, ‘Mu fipope fya fikolwe fyenu mwilaendamo,+ no bupingushi bwabo mwilabukonka,+ kabili mwilaikowesha ku tulubi twabo utwa bunani.+ 19 Nine Yehova Lesa wenu.+ Endeni mu fipope fyandi,+ konkeni no bupingushi+ bwandi no kubucita.+ 20 Kabili lekeni amasabata yandi yabe aya mushilo,+ ukuti yabe icishibilo pa kati ka ine na imwe, pa kuti mwishibe ukuti nine Yehova Lesa wenu.’+

21 “‘“Lelo abana balimpondokele.+ Tabaendele mu fipope fyandi, tabalekonka no bupingushi bwandi, ifya kuti umuntu nga aleficita akaba no mweo.+ Basaalwile amasabata yandi.+ E ico nabebele ukuti nkabapongolwela icipyu candi, pa kuti nkapwishishe ubukali bwandi pali bena mu matololo.+ 22 Lelo nabweseshe ukuboko kwandi,+ no kucitapo cimo pa kuti ishina lyandi liisaalulwa ku menso ya nko, ishamweneko ilyo nabafumishe.+ 23 Kabili naimishe ukuboko kwandi no kulapa kuli bena mu matololo,+ ku kubapashila mu nko no kubasalanganishisha mu fyalo fimbi,+ 24 pa mulandu wa kuti tabakonkele ubupingushi bwandi+ kabili bakeene ifipope fyandi+ no kusuula amasabata yandi,+ kabili ku tulubi twa bunani e ko baloseshe amenso yabo.+ 25 Kabili nabalekele babe ne fipope ifishaweme no kukonka ubupingushi ubo bashingabelamo no mweo.+ 26 Kabili nalekele bakowele ku fya bupe fyabo ilyo baleoca umwana onse ibeli mu mulilo,+ pa kuti mbonaule, na pa kuti beshibe ukuti nine Yehova.”’+

27 “E ico sosa ku ba mu ng’anda ya kwa Israele, we mwana wa muntu, no kubeba ati,+ ‘Shikulu Mulopwe Yehova atila: “Muli ici na mo, ifikolwe fyenu fyalimpontele, pa kunsangukila.+ 28 Kabili nabengishe mu calo+ ico naimishepo ukuboko kwandi no kulapa ukuti nkabapeela.+ Baleti nga bamona akapili+ konse no muti onse uwafumba, ninshi kwipailapo amalambo yabo+ no kutuula imituulo ya kunkalifya, no kupeela ifyanunkila+ no kwitila kulya imituulo yabo iya mwangashi.+ 29 E ico natile kuli bena, ‘Ca nshi ici cifulo ca mapepo muyako, pa kuti cileitwa ishina lya kuti Icifulo ca Mapepo ukufika kuli buno bushiku?’”’+

30 “E ico sosa ku ba mu ng’anda ya kwa Israele auti, ‘Shikulu Mulopwe Yehova atila: “Bushe muleikowesha ku mibele ya fikolwe fyenu,+ kabili bushe mulecita bucilende ukukonka ifya bunani fyabo?+ 31 Kabili mu kwimya ifya bupe fyenu pa koca abana benu mu mulilo,+ bushe muleikowesha pa kuti mucindike utulubi twenu utwa bunani ukufika kuli buno bushiku?+ Kabili bushe ndeke ukuti munjipushe, mwe ba mu ng’anda ya kwa Israele?”’+

“‘Na pali ne mwine,’ e fyasosa Shikulu Mulopwe Yehova, ‘nshasumine ukuti munjipushe.+ 32 Kabili icaima mu mitima yenu+ te kuti cicitike nakalya,+ apo muleti: “Tube nge nko, nge nko sha mu fyalo,+ tulebombela ifimuti na mabwe.”’”+

33 “‘Na pali ne mwine,’ e fyasosa Shikulu Mulopwe Yehova, ‘ku kuboko kwakosa na ku kuboko ukwatambululwa+ na ku bukali ubo nkapongolola e ko nkamutekela.+ 34 Nkamufumya mu bantu na bantu, kabili nkamulonganya ukufuma mu fyalo ifyo mwasalanganinamo ku kuboko kwakosa na ku kuboko ukwatambululwa na ku bukali ubo nkapongolola.+ 35 Nkamutwala mu matololo ya bantu na bantu+ no kulwishanya na imwe kulya, natuloshanya impumi.+

36 “‘Ifyo nalwishenye ne fikolwe fyenu mu matololo ya calo ca Egupti,+ e fyo nkalwishanya na imwe,’ e fyasosa Shikulu Mulopwe Yehova. 37 ‘Kabili nkamupisha mwi samba lya nkonto+ no kupangana na imwe icipangano.+ 38 Nkafumya muli imwe abasangu na bampulamafunde,+ pantu nkabafumya mu calo ico balebelamo, lelo mu calo ca Israele tabakengilemo;+ na imwe mukeshiba ukuti nine Yehova.’+

39 “Na kuli imwe, mwe ba mu ng’anda ya kwa Israele, Shikulu Mulopwe Yehova atila, ‘Kabiyeni, kabombeleni cila muntu utulubi twakwe utwa bunani.+ E lyo pa numa ya ifyo nga tamwakomfwe kuli ine, ninshi tamwakasaalule na kabili ishina lyandi ilya mushilo ku fya bupe fyenu no tulubi twenu utwa bunani.’+

40 “‘Pantu mu lupili lwandi ulwa mushilo, mu lupili ulutali ulwa kwa Israele,’+ e fyasosa Shikulu Mulopwe Yehova, ‘e mo bakamombela aba mu ng’anda ya kwa Israele bonse, bonse fye, mu calo.+ Mulya e mo nkasekelela muli bena, kabili e mo nkafwaya imisangulo yenu ne fisabo fya ntanshi ifya mituulo yenu iya fya mushilo fyenu.+ 41 Pa mulandu wa fyanunkila+ nkasekelela muli imwe, ilyo nkamufumya mu bantu na bantu no kumulonganya ukufuma mu fyalo umo mwasalanganine,+ kabili nkaba uwa mushilo muli imwe pa menso ya nko.’+

42 “‘Na imwe mukeshiba ukuti nine Yehova,+ ilyo nkamutwala mu mpanga ya kwa Israele,+ mu calo ico naimishepo ukuboko kwandi no kulapa ukuti ndi no kucipeela ku fikolwe fyenu. 43 E ko mukebukishisha imibele yenu+ ne micitile yenu iyo mwaleikoweshako,+ na pa finso fyenu pakaba insoni pa mulandu wa fibi fyonse ifyo mwacitile.+ 44 E lyo mukeshiba ukuti nine Yehova+ ilyo nkamucita akantu pa mulandu we shina lyandi,+ te kulingana ne mibele yenu iyabipa nangu imibele yenu iya bufumfuntungu,+ mwe ba mu ng’anda ya kwa Israele,’ e fyasosa Shikulu Mulopwe Yehova.”

45 Kabili icebo ca kwa Yehova caishile kuli ine, aciti:46 “We mwana wa muntu, losha icinso cobe+ ku kapinda ka ku kulyo no kusosa+ ifyebo ku kapinda ka ku kulyo, kabili sesemena umutengo wa mu mpanga ya ku kapinda ka ku kulyo. 47 Usose ku mutengo wa ku kapinda ka ku kulyo auti, ‘Umfwa icebo ca kwa Yehova. Shikulu Mulopwe Yehova asosa ati: “Mona, ndesonteka umulilo muli iwe,+ na o ukoca muli iwe umuti onse uubishi no muti onse uwauma.+ Ulubingu lwa mulilo talwakashime,+ kabili lukoca ifinso fyonse ukufuma ku kapinda ka ku kulyo ukufika ku kapinda ka ku kuso.+ 48 Na bantu bonse bakamona ukuti ine Yehova, nine naukoseshe, ica kuti tawakashime.”’”+

49 E lyo natile: “Iye, mwe Shikulu Mulopwe Yehova! Balelanda pali ine abati, ‘Lyonse alandila fye mu mapinda.’”+

21 Icebo ca kwa Yehova caishile kuli ine na kabili aciti: 2 “We mwana wa muntu, losha icinso cobe ku Yerusalemu, no kusosa+ amashiwi ku fifulo fya mushilo,+ no kusesemena icalo ca Israele.+ 3 Kabili usose ku calo ca Israele auti, ‘E fyo Yehova atila: “Mona ndekulwisha,+ kabili nkasomona ulupanga lwandi mu cikwama ca luko+ no kulofya umulungami no mubifi muli iwe.+ 4 Pa kuti nkalofye muli iwe umulungami no mubifi, ulupanga lwandi lukasomonwa mu cikwama ca luko ku kulwisha abantunse bonse ukufuma ku kapinda ka ku kulyo ukufika ku kapinda ka ku kuso.+ 5 E lyo abantunse bonse bakeshiba ukuti ine ne Yehova, ninsomona ulupanga lwandi mu cikwama ca luko.+ Talwakabwelelemo na kabili.”’+

6 “Nobe, we mwana wa muntu, teta pa mulandu wa mwenso.+ Utete mu bukali pa menso yabo.+ 7 Nomba nga bakwipusha abati, ‘Cinshi uletetela?’+ e lyo ukatile, ‘Ni pa mulandu wa mbila.’+ Pantu ukwisa ileisa,+ no mutima onse ukasunguluka+ na maboko yonse yakatompoka no muntu onse akaba no bulanda na menshi yakalakonkoloka mu makufi yonse.+ ‘Moneni! Ubucushi buleisa+ kabili bukacitika,’ e fyasosa Shikulu Mulopwe Yehova.”

8 Icebo ca kwa Yehova caishile kuli ine na kabili, aciti: 9 “We mwana wa muntu, sesema, no kutila, ‘Yehova atila: “Landa auti, ‘Ulupanga, ulupanga!+ Balunoona,+ kabili balupukuta lwabeeka. 10 Balunoona pa kuti lwipayaule; balupukuta pa kuti lubengeshime.’”’”+

“Lelo bushe tatufwile ukusekelela?”+

“‘Bushe lulekaana inkonto ya bufumu+ iya mwana wandi,+ ifyo lukaana icimuti conse?+

11 “‘Umuntu apeela ulupanga pa kuti balupukute lubengeshime, pa kuti balusende mu minwe. Balunoona, kabili balupukuta lwabengeshima, pa kuti bapeele uwa kwipayaula.+

12 “‘Punda no kulila umusowa,+ we mwana wa muntu, pantu ulupanga lulelwisha abantu bandi;+ lulelwisha intungulushi shonse isha kwa Israele.+ Baipaiwa ku lupanga capamo na bantu bandi.+ E ico uma ulupi pe tanta lyobe.+ 13 Pantu balilwesha,+ kabili cinshi cikacitika ku nkonto ya bukateka nga ca kuti ulupanga lulekaana inkonto ya bukateka?+ Iyi nkonto tayakatwalilile ukubako,’+ e fyasosa Shikulu Mulopwe Yehova.

14 “Na iwe, we mwana wa muntu—sesema, toota amapi mu bukali,+ kabili usose auti ‘Ulupanga!’ imiku itatu.+ Ulupanga ulwipaya. Ulupanga ulwipaya umukalamba, e lulebashinguluka.+ 15 Pa kuti umutima usunguluke+ na pa kuti impendwa ya balewa pa mpongolo shabo shonse ikule,+ ndi no kwipaya ku lupanga. Iye, lulebengeshima, balupukuta ukuti lwipayaule!+ 16 Ilange ukuti nautwa;+ kabiye ku kulyo! Iteyanye; kabiye ku kuso! Konse uko uloseshe! 17 Na ine nkatoota mu bukali,+ no kulenga ubukali bwandi+ ukutuusha.+ Ine ne Yehova ninsosa.”

18 Icebo ca kwa Yehova na kabili caishile kuli ine, aciti: 19 “Na iwe we mwana wa muntu, teyanya inshila shibili isha kwingililapo ulupanga lwa mfumu ya Babiloni.+ Mu calo cimo e mo shonse shibili shifume, upange ne cishibilo ca kulanga inshila;+ ukacibike ku lutwe lwa nshila ya kwingilila mu musumba. 20 Uteyanye inshila ya kwingilamo ulupanga ku Raba+ wa bana ba kwa Amone, ne ya ku Yuda na Yerusalemu we linga.+ 21 Pantu imfumu ya Babiloni yaiminine shilili pa masansa ya nshila, apatula inshila shibili, pa kuti ibuke imbuko.+ Yasunkanya imifwi. Yaipushisha mu tulubi twa terafimu;+ yalolesha mu libu. 22 Ulubuko ulwali mu kuboko kwakwe ukwa kulyo lwalangile ukuti baye ku Yerusalemu, ku kubika ifya kubongolwelako amalinga,+ ku kwasamuna akanwa no kubilisha ukwipaya, ku kupunda ishiwi lya bulwi,+ ku kubika ifya kubongolwelako pa mpongolo, ku kukuula ica kuninapo pa kusansa umusumba, ne linga lya kusanshilapo.+ 23 Kabili kuli bena fyaba kwati kubuka kwa fye mu menso yabo+—kuli abo abalapile imilapo kuli bena;+ kabili aibukisha ifilubo fyabo,+ pa kuti bekatwe.+

24 “E ico Shikulu Mulopwe Yehova asosa ati, ‘Pa mulandu wa kuti mwalenga ifilubo fyenu ukwibukishiwa pa kusokolola ifya bumpulamafunde fyenu, pa kuti imembu shenu shimoneke ukulingana ne micitile yenu yonse, pa mulandu wa kuti abalwani benu bakamwibukisha,+ bakamwikata ku minwe.’+

25 “Na iwe, we ntungulushi+ yabipa iyacenwa icibi iya mu Israele,+ we o ubushiku bobe bwaisa mu nshita ya membu shobe isha ku mpela,+ 26 ifi e fyo Shikulu Mulopwe Yehova asosa ati, ‘Fuula icitebo, fuula ne cisote ca bufumu.+ Ifintu tafyakabelelele ifi fine.+ Imyeni uwaba pa nshi,+ no kuwisha pa nshi uwaba pa muulu.+ 27 Nkaconaula, nkaconaula, nkaconaula.+ Kabili ici, tacakabe ca muntu nangu umo mpaka akese uwakwata insambu sha kucikwata,+ kabili e o nkapeela.’+

28 “Na iwe, we mwana wa muntu, sesema, no kutila, ‘E fyo Shikulu Mulopwe Yehova asosa pa bana ba kwa Amone na pa museebanya wabo.’ E lyo usose auti, ‘Ulupanga, ulupanga lwasomonwa ku kwipayaula, balupukuta pa kuti lulofye, pa kuti lubengeshime,+ 29 pa mulandu wa kukumwena ifimonwa fya fye, pa mulandu wa kubuka ifya bufi,+ pa kuti bakubike pa baipaiwa, ababifi abo ubushiku bwabo bwaisa mu nshita ya membu sha ku mpela.+ 30 Lubweseshe mu cikwama ca luko. Mulya wabumbiilwe, mu calo umo watuntwike,+ e mo nkakupingwila. 31 Kabili nkapongolwela pali iwe ubukali bwandi. Ku bukali bwandi ubupya ngo mulilo nkapuuta pali iwe,+ kabili nkakupeela mu minwe ya baume abashitontonkanya, abacenjela ku konaula.+ 32 Iwe ukaba inkuni sha mulilo.+ Umulopa obe ukaba mu kati ka calo. Tawakebukishiwe, pantu ine ne Yehova ninsosa.’”+

22 Kabili icebo ca kwa Yehova caishile kuli ine, aciti: 2 “Na iwe, we mwana wa muntu, bushe ulepingula,+ bushe ulepingula umusumba uwaba no mulandu wa mulopa+ no kuleka uyu musumba wishibe ifya bunani fya uko fyonse?+ 3 Kabili usose auti, ‘Shikulu Mulopwe Yehova atila: “We musumba uusumya umulopa+ mu kati kobe mpaka inshita yobe iya kupingulwa yafika,+ kabili uwapanga utulubi twa bunani mu kati ka uko ku kuikowesha,+ 4 Uli no mulandu pa mulopa waba muli iwe uo wasumishe,+ kabili nauikowesha ku tulubi twa bunani uto wapanga.+ Waipifya inshiku shobe, no kufika ku myaka yobe iya kupingulwa. E co ndekuseebanishisha ku nko kabili ndelenga ifyalo fyonse filekuwela.+ 5 Aba mu fyalo fyapalama kuli iwe ne fyataluka kuli iwe bakakuwela, we wakowela ishina, uwafula icimfulumfulu.+ 6 Mona! Intungulushi+ sha kwa Israele shali muli iwe, umo na umo aleipeelesha ku kuboko kwakwe ku kusuumya umulopa.+ 7 Wishi na nyina basaalulwa muli imwe.+ Umulebeshi bamwibila mu bucenjeshi mu kati kobe.+ Bacululusha abana ba nshiwa na bamukamfwilwa mu kati kobe.”’”+

8 “‘Wasuula apa mushilo pandi, na masabata yandi wayasaalula.+ 9 Aba lwambo bene bene baba muli iwe, pa kuti basuumye umulopa;+ balya amalambo ya tulubi pa mpili muli iwe.+ Bacita ifya nsoni mu kati kobe.+ 10 Balaala bashibo na banyinabo mu kati kobe;+ basendama no mwanakashi uwakowela uuli ku mweshi.+ 11 Kabili umwaume acita ica bunani ku mukashi wa munankwe,+ kabili umwaume akowesha nafyala, pa kucita nankwe ifya nsoni;+ na nkashi yakwe, umwana mwanakashi wa kwa wishi, umwaume asendama nankwe mu kati kobe.+ 12 Bapoka amafisakanwa muli iwe pa kuti basumye umulopa.+ Wapoka isha kaloba+ ne sha kulundapo,+ kabili ulepanga icibwesha+ pa kucenjesha+ abanobe, na ine wandaba,’+ e fyasosa Shikulu Mulopwe Yehova.

13 “‘Kabili mona! Natoota mu mapi+ pa fyo wanonkela mu lufyengo,+ na pa mulopa wasuumya mu kati kobe.+ 14 Bushe umutima obe ukakonkanyapo ukushipikisha+ nangu bushe amaboko yobe yakaba na maka mu nshiku nkakucita akantu?+ Ine ne Yehova ninsosa, kabili nkacicita.+ 15 Kabili nkakusalanganishisha mu nko no kukusalanganisha mu fyalo,+ nkapwisha ne micitile iyakowela iyaba muli imwe.+ 16 Kabili iwe wine ukaseebana pa menso ya nko, e lyo ukeshiba ukuti nine Yehova.’”+

17 Na kabili kwaishile icebo ca kwa Yehova kuli ine, aciti: 18 “We mwana wa muntu, aba mu ng’anda ya kwa Israele basanguka munyela+ kuli ine. Bonse mukuba kabili kapotwe kabili icela kabili umutofwe mwi lungu lya mulilo. Basanguka fimunyela, fimunyela fya silfere.+

19 “E ico Shikulu Mulopwe Yehova atila, ‘Pa mulandu wa kuti bonse mwasanguka fimunyela,+ kanshi ndemulonganya pamo mu kati ka Yerusalemu.+ 20 Ifyo abantu balonganya silfere no mukuba ne cela no mutofwe+ na kapotwe mu kati ke lungu, pa kuti bapuutepo+ no mulilo ku kufisungulula,+ e fyo nkabalonganya pamo mu bukali bwandi na mu cipyu candi, kabili nkapuuta no kulenga imwe mukasunguluke. 21 Nkamulonganya pamo no kupuuta pali imwe ku bukali bwandi ubwaba ngo mulilo,+ kabili mukasunguluka mu kati kakwe.+ 22 Ifyo silfere asunguluka mwi lungu, e fyo mukasunguluka mu kati ka uko; e lyo mukeshiba ukuti ine ne Yehova napongolwele ubukali bwandi pali imwe.’”+

23 Na kabili icebo ca kwa Yehova caishile kuli ine, aciti: 24 “We mwana wa muntu, sosa kuli wena auti, ‘Uli calo icishasangululwa, icishalokapo imfula mu bushiku bwa bukali.+ 25 Kuli ukupangana kwa bakasesema bakwe mu kati kakwe,+ nge nkalamo iilebuluma, iiletaakanya ico ikete.+ Na bo e fyo bepaya abantu.+ Basenda ifyuma ne fintu fyauma umutengo.+ Bafusha bamukamfwilwa mu kati kakwe.+ 26 Bashimapepo bakwe ba-alula amafunde yandi,+ kabili bakonkanyapo fye ukusaalula apa mushilo pandi.+ Tabalekenye+ ica mushilo ne ca fye,+ tabalengele abantu ukwishiba ubupusano pa cakowela ne casanguluka,+ kabili basuula amasabata yandi,+ kabili ninseebana mu kati kabo.+ 27 Bacilolo bakwe mu kati kakwe baba nge mimbuulu iitakanya ico ikete ku kusumya umulopa,+ mu kwipaya abantu ku kumwenamo ifya mu lufyengo.+ 28 Bakasesema bakwe bafisa imembu sha bacilolo,+ ukubamwena ifimonwa fya fye+ no kubabukila ifya bufi,+ abati: “Ifi e fyo Shikulu Mulopwe Yehova asosa,” ilyo Yehova umwine tasosele iyo. 29 Abantu ba mu calo balacita ifya bucenjeshi+ no kupokolola bambi ifintu ku maka,+ kabili balacululusha umulanda no mupiina,+ umulebeshi balamucenjesha no kumufyenga.’+

30 “‘Kabili nalefwaya umuntu muli bena uwingawamya icibumba ca musumba+ no kwiminina pa cipunda+ pa cinso candi ku kwimininako aba mu calo, pa kuti niconaula;+ lelo nshasangile nangu umo. 31 E ico nkapongolwela ubukali bwandi+ pali bena. Nkabalofya ku bukali bwandi ubwaba ngo mulilo.+ Imibele yabo nkaibika pa mitwe yabo,’+ e fyasosa Shikulu Mulopwe Yehova.”

23 Kabili kwaishile icebo ca kwa Yehova kuli ine,+ aciti: 2 “We mwana wa muntu, kwali abanakashi babili, abana banakashi abafyelwe kuli nyinabo umo.+ 3 Kabili batampile ukulacita bucilende mu Egupti.+ Bacitile bucilende mu bukashana bwabo.+ Kulya e ko balebatonya amabele,+ kabili kulya kwine e ko balebatina insota ilyo bali abakashana. 4 Na mashina yabo ni Ohola, e mukalamba na Oholiba nkashi inankwe. Kabili baishileba abandi+ no kufyala abana baume na bana banakashi.+ Kumfwa amashina yabo, Ohola e Samaria,+ na Oholiba e Yerusalemu.+

5 “Ohola atendeke ukucita bucilende,+ nangu ca kuti ali wandi, kabili abikile sana amano ku bacende bakwe,+ abena Asiria,+ abali mupepi, 6 abalashi abalefwala ifya bluu, ne nkonkani sha bakateka—bonse abawama, abale-endela pali bakabalwe. 7 Atwalilile ukucita bucilende na bonse abana baume ba kwa Asiria abawama; na kuli bonse abo abikileko sana amano—na ku tulubi twabo utwa bunani—e ko aikoweshe.+ 8 Kabili talekele imisango yakwe iya bucilende iyo afumine na yo ku Egupti, pantu baleele nankwe ku bukashana bwakwe, kabili e baletonya amabele yakwe ilyo ali umukashana no kucita sana nankwe bucilende.+ 9 E ico namupeele mu minwe ya bacibusa bakwe abamutemwa,+ mu minwe ya bana ba kwa Asiria, abo abikileko sana amano.+ 10 E balelaala nankwe.+ Basendele abana bakwe abaume na bana bakwe abanakashi,+ na o bamwipaile ku lupanga. Aliseebene ku banakashi, kabili balimupingwile.

11 “Nkashi inankwe Oholiba alimwene ifi fyonse,+ lelo ena alicililemo ukuba ne nsuuna pa nkashi inankwe, acitile na bucilende ukucila nkashi inankwe.+ 12 Apoosele sana amano ku bena Asiria,+ abalashi ne nkonkani sha bakateka abali mupepi, abalefwala ifisuma nga nshi, abale-endela pali bakabalwe—abalumendo abasuma bonse.+ 13 Kabili nalimwene ukuti apo na o ali-ikoweshe, bonse babili bali ne mibele imo ine.+ 14 Awe alicishishemo bucilende ilyo amwene abaume abalengwa pa cibumba,+ ifimpashanya+ fya bena Kaldi ifyo bapenta ku fyakashika,+ 15 ifyakakwa imishipi+ mu misana ya fiko, ne fitebo fya fiko ifipeleela ku mitwe ya fiko, ifyalemoneka nga bashilika ba nkondo, fyonse, ifyapala abena Babiloni, abafyalilwe mu calo ca Kaldi. 16 E lyo atampile ukufikumbwa ilyo afimwene+ kabili atumine inkombe ku Kaldi.+ 17 Na bena Babiloni baleisa kuli ena, no kulaala pa busanshi bwakwe ubwa citemwiko, ukumukowesha pa kucita nankwe bucilende;+ kabili balimukoweshe, atampile no kubataluka pa mulandu wa kuselaushiwa.

18 “Awe atampile ukucita bucilende pa lwalaala no kufuula pa fya mfwalo fyakwe,+ ica kuti nalimutalwike pa mulandu wa kuselaushiwa, filya fine naselaushiwe ku nkashi inankwe nafumako no kufumako.+ 19 Kabili akonkenyepo fye ukucita bucilende+ ica kuti aibukishe inshiku sha bukashana bwakwe,+ ilyo alecita bucilende mu calo ca Egupti.+ 20 Kabili ali ne nsuuna nge ya kwa kanakashi wa bantu abakwata ubwamba ngo bwa mpunda ishilume ne fya mfwalo fyabo fyaba nge fya mfwalo fya bakabalwe abalume.+ 21 Kabili waikalile fye ukufuluka ifya nsoni ifyo walecita ku bukashana ilyo balekutonya amabele yobe ukutula fye ilyo wali mu Egupti,+ walefwaisha ukuti balekutonya amabele nga filya baleyatonya ilyo wali umukashana.+

22 “E ico, we Oholiba, Shikulu Mulopwe Yehova atila, ‘Mona, ndelenga bacibusa bobe bakwimine,+ abakuselausha, wafuma na kuli bena, nkabaleta pali iwe ukufuma monse monse,+ 23 abena Babiloni+ na bena Kaldi+ bonse, aba ku Pekode+ na ba ku Shoa na ba ku Koa, na bena Asiria bonse kumo, abalumendo abasuma, abalashi ne nkonkani sha bakateka shonse, abashilika ne mpanda mano, abanina pali bakabalwe, bonse. 24 Na bo bakesa pali iwe ne congo ca maceleta ya bulwi ne mipeto,+ ne cilibumba ca bantu, ne nkwela iikalamba ne inono ne fisote fya mukuba. Bakakushinguluka konse konse, kabili nkaleka bakakupingule, na bo bakakupingula ukulingana no bupingushi bwabo.+ 25 Nkabika ubukali bwandi pali iwe,+ na bo bakakucita akantu mu cipyu.+ Bakakutetako umona na matwi, ne fikashalako fikonaulwa ku lupanga. Abana bobe abaume na bana bobe abanakashi+ bakabasenda,+ na bakashalako+ bakaboca ku mulilo. 26 Kabili bakakufuula amalaya yobe+ ne fisamo fyobe ifyayemba.+ 27 E fyo nkalenga ifya nsoni fyobe ukupwa,+ na bucilende ubo wafumine na bo mu Egupti;+ tawakenwineko amenso yobe kuli bena, na Egupti tawakamwibukishe na kabili.’

28 “Pantu Shikulu Mulopwe Yehova atila, ‘Mona, ndekupeela mu minwe ya bantu abo wapata, abakuselausha kabili abo watalukako.+ 29 Na bo bakakucita akantu pa mulandu wa lupato no kubuula fyonse ifyafuma mu kucucutika kobe no kukusha ubusokwa kabili ubwamba;+ ne fya bucilende fyobe fikamoneka ne fya nsoni ifyo walecita ne fya bucilende fyobe fikasokololwa.+ 30 Ifi fintu fikacitwa kuli iwe pantu walekonka inko mu kucita bucilende,+ pantu waikoweshe ku tulubi twabo utwa bunani.+ 31 Wale-enda mu mibele ya nkashi inobe;+ e ico nkapeela kapu yakwe mu minwe yobe.’+

32 “Shikulu Mulopwe Yehova atila, ‘Kapu ya nkashi inobe iyo ukanwamo, yalishika kabili ikalamba.+ Bakakuseka kabili bakakutumfya, pantu muli kapu mwaba ifingi.+ 33 Ukakolwa no kuba no bulanda, ukanwa kapu ya kupapa kabili iya bonaushi, kapu ya nkashi inobe Samaria. 34 Ukanwa ifyabamo no kufyompelela,+ ne fi-inga fya iko ukakokota, ukalepaula na mabele yobe.+ “Pantu ine ninsosa,” e fyasosa Shikulu Mulopwe Yehova.’

35 “E ico Shikulu Mulopwe Yehova atila, ‘Pa mulandu wa kuti walindaba+ no kumpoosa ku numa yobe,+ na iwe ukakandwa pa fya nsoni na pali bucilende bobe.’”

36 E lyo Yehova asosele kuli ine kabili ati: “We mwana wa muntu, bushe uli no kupingula+ Ohola na Oholiba+ no kubeba ifya bunani fyabo?+ 37 Pantu balacita ubucende+ na mu minwe yabo muli umulopa,+ bacita ubucende no tulubi twabo utwa bunani.+ Na kabili, abana baume abo bamfyalile baboca mu mulilo nga malambo ya kupeela utulubi.+ 38 Kabili, ici e co bacita kuli ine: Bakowesha+ umwa mushilo mwandi+ muli ubo bwine bushiku, no kusaalula amasabata yandi.+ 39 Kabili ilyo baipaile utulubi twa bunani abana babo abaume+ baingile no mwa mushilo mwandi muli ubo bwine bushiku no kusaalulamo,+ kabili mona! e fyo bacita mu kati ka ng’anda yandi.+ 40 Na kabili ilyo batumine aba kwita abaume abafuma ukutali, abo batumiine inkombe,+ awe mona! balishile,+ abo wasambiile,+ waisuba ku menso,+ waisaamika ne fisaamo.+ 41 E lyo mwaikele pa ca kwikalapo icacindama,+ ne tebulo ilyateyanishiwa pa ntanshi yenu,+ mwabikilepo ne fyanunkila+ fyandi na mafuta yandi.+ 42 Mu kati kakwe mwali ne congo ce bumba lya bali ubwanalale,+ na mu baume ba muli cinkupiti mwafumine bacakolwa+ abaleletwa ukufuma mu matololo, na bo bafwikile abanakashi amakoosa ku maboko no kubafwika ifilongwe fyayemba ku mutwe.+

43 “E lyo natile kuli uyu mwanakashi uwanakuka ku bucende+ nati, ‘Nomba ali no kukonkanyapo ukucita bucilende.’+ 44 Na bo batwalilile ukwingila kuli ena, ifyo abantu bengila ku mwanakashi cilende; e fyo baingile kuli Ohola na kuli Oholiba abanakashi abacita ifya nsoni.+ 45 Lelo abaume balungama,+ e bakamupingula ifyo bapingula abanakashi abacende+ na banakashi abasumya umulopa;+ pantu bena banakashi abacende, na mu minwe yabo muli umulopa.+

46 “Pantu Shikulu Mulopwe Yehova atila, ‘Nkaninika pali bena icilibumba+ no kubakanda ica kuti uwabamona akatiina kabili bakaba ba kupokolola ifipe.+ 47 Ne cilibumba cili no kubapoola amabwe,+ no kubakomena kuli bapanga babo. Bakepaya abana babo abaume na bana babo abanakashi,+ na mayanda yabo bakayoca.+ 48 Kabili nkalenga ifya nsoni+ ukupwa mu calo,+ na banakashi bonse bakasambililako, pa kuti belacita ifya nsoni nge fyo mucita.+ 49 Na bo bakamukanda pa fya nsoni fyenu,+ mukashingamwa ne membu sha tulubi twenu utwa bunani; e lyo mukeshiba ukuti nine Shikulu Mulopwe Yehova.’”+

24 Icebo ca kwa Yehova caishile na kabili kuli ine mu mwaka walenga pabula (9), mu mweshi we kumi (10), pa bushiku bwalenga ikumi ubwa uyo mweshi aciti: 2 “We mwana wa muntu, lemba ishina lya bushiku buno, buno bwine ubushiku. Imfumu ya Babiloni naimina Yerusalemu buno bwine bushiku.+ 3 Uma umulumbe pa ba mu ng’anda ya bacipondoka,+ no kusosa pali bena auti,

“‘Shikulu Mulopwe Yehova atila: “Teka impoto iikalamba pa mulilo; tekapo, witilemo na menshi.+ 4 Bikamo ifipimfya fya nama,+ icipimfya conse icisuma, itanta no kuboko; isushamo na mafupa ayasuma sana. 5 Buula impaanga iyawamisha,+ utuulike ne nkuni mwi samba lya iko. Bilausha ifipimfya fya iko, no kwipika amafupa ya iko ayali mu kati ka iko.”’”+

6 “E ico Shikulu Mulopwe Yehova atila, ‘We bulanda ku musumba wabamo ukusuumya umulopa,+ impoto iikalamba, umwaba ne ndalawa, kabili indalawa sha iko tashafumamo! Fumya icipimfya ne cipimfya;+ wipendwilapo.+ 7 Pantu umulopa wa iko waba mu kati ka iko.+ Pa cilibwe icasansuka icabeeka, apashaba kantu epo aubikile. Twaupongolwelele pa nshi, pa kuti ashiikepo iloba.+ 8 Ico nabikila umulopa wakwe pa cilibwe icasansuka icabeeka pa kuti wishiikwapo,+ ni pa kuti njimye ubukali bwandi no kulandula.’+

9 “E ico, Shikulu Mulopwe Yehova atila, ‘We bulanda ku musumba wabamo ukusuumya umulopa!+ Na ine nkakusha umwina wa nkuni.+ 10 Fusha inkuni. Kosha umulilo. Ipikisha iminofu. Kabili itulula umuto, leka na mafupa yakabe sana. 11 Teka impoto umushili kantu pa malasha pa kuti ikabe; no mukuba wa iko ukakaba, ne fiko fya iko fikasunguluke mu kati.+ Ne ndalawa sha uko shipwililile.+ 12 Ukubombesha! Kwalenga umo ukunaka, lelo indalawa sha iko tashifumamo.+ Yaya mu mulilo ne ndalawa sha iko!’

13 “‘Mu kukowela kobe mwali ne fya nsoni.+ E mulandu wine nakusangulwilile, lelo tawasangulwike ku kukowela kobe.+ Tawakasanguluke na kabili mpaka nkalenge ubukali bwandi ukutuushisha muli iwe.+ 14 Ine ne Yehova ninsosa.+ Cikesa,+ kabili nkacicita. Nshakalekepo fye,+ kabili nshakakulilile ubulanda+ nangu kulanguluka.+ Ukulingana ne mibele yobe kabili ukulingana ne micitile yobe e fyo bakakupingula,’+ e fyasosa Shikulu Mulopwe Yehova.”

15 Icebo ca kwa Yehova caishile kuli ine na kabili aciti: 16 “We mwana wa muntu, mona, ndecita icintu cimo+ pa kukupoka ico watemwisha,+ lelo wikooma pa cifuba, nangu kulila nangu ukuponya ifilamba.+ 17 Ukashinshimukile umutalalila. Wikaloosha abafwa.+ Icitebo cobe ukakake ku mutwe,+ ne ndyato shobe ukafwale ku makasa.+ Wikafimba pa mwefu wa pa muulu,+ ne fya kulya fya bantu wikalyako.”+

18 Awe nalandile na bantu ulucelo, kabili icungulo, umukashi wandi alifwile. Kabili ulucelo nacitile ifyo naebelwe. 19 Kabili abantu balenjipusha ati: “Bushe tawatwebe ifyo ifi fitukumine, ifi fintu ulecita?”+ 20 E lyo nabebele ati: “Icebo ca kwa Yehova caishile kuli ine, aciti, 21 ‘Sosa ku ba mu ng’anda ya kwa Israele auti: “Shikulu Mulopwe Yehova atila, ‘Moneni, nkasaalula umwa mushilo mwandi,+ icintu ico muituntumbilapo,+ icintu ico mwatemwisha+ kabili ico mwabikapo imitima, na bana benu abaume na bana benu abanakashi abo mwasha—bakafwa ku lupanga.+ 22 Kabili mukacita nge fyo nacita. Tamwakafimbe pa mwefu wa pa muulu,+ ne fya kulya fya bantu tamwakalye.+ 23 Kabili ifitebo fyenu fikaba ku mitwe yenu, ne ndyato shenu shikaba ku makasa yenu. Tamwakalooshe+ nangu kulila, mukalobela pa membu shenu,+ no kuteta umuntu onse pa munankwe.+ 24 Esekiele aba muli imwe icishibilo.+ Ukulingana na fyonse ifyo acita, e fyo mukacita. Ilyo cikacitika,+ e lyo mukeshiba ukuti nine Shikulu Mulopwe Yehova.’”’”+

25 “Na iwe, we mwana wa muntu, mu bushiku nkabapoka ukwa kufisama, icintu cawamisha ico baitakishishamo, icintu batemwisha+ kabili ico babikapo imitima, abana babo abaume na bana babo abanakashi,+ 26 bushe te muli ubo bwine bushiku akesa kuli iwe uwapusuka no kulenga amatwi ukumfwa imbila?+ 27 Muli ubo bushiku ukasamuna akanwa kobe no kulanda no wapusuka,+ kabili ukasosa, tawakabe tondolo na kabili iyo;+ kabili ukaba kuli bena icishibilo,+ e lyo bakeshiba ukuti nine Yehova.”+

25 Kwaishile icebo ca kwa Yehova na kabili kuli ine, aciti: 2 “We mwana wa muntu, losha icinso cobe ku bana ba kwa Amone, no kusesema pali bena.+ 3 Kabili usose pa bena Amone auti, ‘Umfweni amashiwi ya kwa Shikulu Mulopwe Yehova. Shikulu Mulopwe Yehova atila: “Apo wasosa auti Eya! ilyo bakowesha umwa mushilo mwandi, ilyo icalo ca Israele caba icibolya, na lintu aba mu ng’anda ya kwa Yuda, baya muli bunkole,+ 4 e co ndekupeelela ku bena Kabanga,+ na bo bakapanga inkambi shabo isha malinga muli iwe no kukuula ififulo fya kwikalamo muli iwe. Bakalya ifisabo fyobe no kunwa umukaka obe.+ 5 Kabili nkalenga Raba+ ukuba impanga ya mulemfwe umwa kulya ingamila ne calo ca bena Amone ukuba umwa kutuushisha impaanga;+ e lyo mukeshiba ukuti nine Yehova.”’”+

6 “Pantu Shikulu Mulopwe Yehova atila, ‘Pa mulandu wa kuti watootele amapi+ no kuuma inshindo pa nshi no kusekelela no kutumfya icalo ca Israele mu mutima obe,+ 7 mona, nintambalika ukuboko kwandi pali iwe,+ kabili nkaleka inko shikakupokolole ifipe; nkakulofya ukaleka ukuba uluko kabili nkakonaula ne calo cobe.+ Nkakulofya,+ e lyo ukeshiba ukuti nine Yehova.’

8 “Shikulu Mulopwe Yehova atila, ‘Apo Moabu+ na Seiri+ batile: “Moneni! Aba mu ng’anda ya kwa Yuda baba fye nge nko shonse,”+ 9 e ico moneni ndeisula apa kuninina ukuya ku Moabu ku misumba yakwe iya ku mupaka, imisumba iisuma nga nshi mu calo, Bete-yeshimote,+ Baali-meone,+ na Kiriataimu,+ 10 ndeiswila abena Kabanga,+ pamo na bena Amone;+ kabili nkalenga Moabu ukupokwa, pa kuti abena Amone bekebukishiwa+ mu kati ka nko. 11 Kabili nkakanda aba muli Moabu;+ e lyo bakeshiba ukuti nine Yehova.’+

12 “Shikulu Mulopwe Yehova atila, ‘Pa mulandu wa kuti Edomu alandula aba mu ng’anda ya kwa Yuda na pa mulandu wa kuti akonkenyepo fye ukucita ifyabipa sana no kuilandwila umwine,+ 13 e co Shikulu Mulopwe Yehova asosela ati: “Nkatambika ukuboko kwandi ukulwisha icalo ca Edomu+ no kulofya umuntu ne fitekwa,+ kabili nkacilenga ukuba icibolya ukufuma pa Temani+ ukufika ku Dedani.+ Bakafwa ku lupanga. 14 ‘Kabili nkabomfya abantu bandi abena Israele pa kulandula Edomu;+ na bo bakacita mu Edomu ukulingana no bukali bwandi kabili ukulingana ne cipyu candi; kabili bakeshiba icilandushi candi,’+ e fyasosa Shikulu Mulopwe Yehova.”’

15 “Shikulu Mulopwe Yehova atila, ‘Pa mulandu wa kuti abaPelishiti bacita icilandushi+ no kulandula musaalula musaalula, pa kuti bonaule,+ pa mulandu wa mpatila yabo iya muyayaya,+ 16 e co Shikulu Mulopwe Yehova asosela ati: “Moneni ndetambika ukuboko kwandi pa baPelishiti,+ nkalofya na bena Kerete+ no konaula abashala aba ku lulamba lwa bemba.+ 17 Nkacita muli bena icilandushi cikalamba, no kubakanda bukali bukali;+ e lyo bakeshiba ukuti nine Yehova ilyo nkacita icilandushi pali bena.”’”+

26 Nomba mu mwaka walenga ikumi na umo (11), pa bushiku bwa ntanshi mu mweshi, e po icebo ca kwa Yehova caishile kuli ine aciti: 2 “We mwana wa muntu, pa mulandu wa kuti Turi+ aleseka Yerusalemu+ ati, ‘Eya! Atobaulwa,+ uwali ifiibi fya nko!+ Nomba ifintu fikawamina ine. Nkaba ne fyuma—ena naonaulwa,’+ 3 e ico Shikulu Mulopwe Yehova atila, ‘Mona, nakwalukila, we Turi, kabili nkakwimisha inko ishingi,+ ifyo bemba emya amabimbi.+ 4 Na sho shikonaula amalinga ya Turi+ no kubongolola impungu shakwe,+ nkafumya no lukungu muli ena no kumulenga ukuba icilibwe icabeeka icasansuka. 5 Akaba apa kwanika amasumbu+ mu kati ka bemba.’+

“‘Pantu ine ninsosa,’ e fyasosa Shikulu Mulopwe Yehova, ‘kabili bakamonaula ku nko. 6 Na ba mu mishi yakwe iyaba mu mpanga—bakepaiwa ku lupanga, na bo bakeshiba ukuti nine Yehova.’+

7 “Pantu e fyo Shikulu Mulopwe Yehova atila, ‘Moneni, nkaleta pali Turi, Nebukadresari imfumu ya ku Babiloni ukufuma ku kapinda ka ku kuso,+ imfumu ya shamfumu,+ na bakabalwe+ na maceleta+ na bendela pali bakabalwe ne cilibumba+ ca bantu abengi. 8 Akepaya aba mu mishi yobe iya mu mpanga ku lupanga, akakuula ilinga lya kusanshilapo, no kukuula ica kusanshilapo umusumba+ no kwimya pali iwe inkwela iikalamba; 9 akalosha ne fyanso fyakwe ifya kubongolwelako ku malinga yobe, akabongolola ne mpungu shobe ku fyanso fyakwe. 10 Pa mulandu wa kufulisha kwa bakabalwe bakwe, ulukungu lukakufimba.+ Pa mulandu wa bakalaendela pali bakabalwe ne mipeto na maceleta ya nkondo, amalinga yobe yakatenta, ilyo akengila pa mpongolo, nga pa kwingila mu musumba umwapongolwa. 11 Ku mabondo ya bakabalwe bakwe akanyantaula imisebo yobe yonse.+ Abantu bobe akepaya ku lupanga, ne nceshi shobe ishakosa shikawa pa nshi. 12 Bakasenda ifyuma fyobe+ no kupokolola ifipe fyobe ifya makwebo,+ no kubongolola amalinga yobe, na mayanda yobe ayawamisha bakabongolola. Na mabwe yobe ne fyapangilwa ku fimuti no lukungu lobe bakabika pa kati na nkati ka menshi.’

13 “‘Awe nkaputula ishiwi lya kwimba kobe,+ no kulila kwa bansango bobe takwakomfwike na kabili iyo.+ 14 Kabili nkakulenga ukuba icilibwe icasansuka icabeeka, apashaba kantu.+ Ukaba apa kwanika amasumbu.+ Tawakakuulwe na kabili iyo; pantu ine ne Yehova ninsosa,’ e fyasosa Shikulu Mulopwe Yehova.+

15 “E fyo Shikulu Mulopwe Yehova asosa kuli Turi ati, ‘Bushe ifishi tafyakatente ku congo ca kuwa kobe, ku kuteta kwa bacenwa icabipisha, ku kwipayaula mu kati kobe?+ 16 E lyo intungulushi shonse isha kuli bemba shikekila pa fipuna fya shiko+ no kufuula ifya kufwala fya shiko ifyabula amaboko, shikafuula na malaya ya shiko ayayemfiwa. Shikafwala ukututuma nge fya kufwala. Shikekala pa nshi,+ shikatutuma inshita shonse+ kabili shikakulolesha no kupapa. 17 Kabili shikakusamwina ulwimbo lwa bulanda+ no kutila kuli iwe:

“‘“Ifyo waloba, we waikelwemo na bantu bafumine kuli bemba,+ we musumba baletasha, uwaishileba uwakosa muli bemba,+ wena na baikelemo, abaletiinya abekashi bonse aba pe sonde! 18 Nomba ifishi fikatutuma pa kuwa kobe. Ne fishi fyaba muli bemba fikasakamikwa pa mulandu wa kufumapo kobe.”’+

19 “Pantu e fyo Shikulu Mulopwe Yehova atila, ‘Ilyo nkawisha iwe we musumba, nge misumba iishaikalwamo, ilyo nkaleta mulamba pali iwe, amenshi ayengi yakakufimba,+ 20 nkakutentemushisha ku manda ukwaba abantu abafwile kale,+ filya ntentemushishako bambi, kabili nkakwikalika pa nshi ya calo,+ pamo ne fifulo ifyaonaulwa pa nshita yalepa, kabili pamo na baya ku manda,+ pa kuti wikekalwamo; kabili nkayemfya icalo ca ba mweo.+

21 “‘Nkaleta pali iwe ubonaushi bwa kupumikisha,+ kabili tawakabepo; bakakufwaya,+ lelo tawakasangwe na kabili umuyayaya,’+ e fyasosa Shikulu Mulopwe Yehova.”

8 “‘“Abekashi ba ku Sidone+ na ba ku Aavadi+ bali e bacooba bobe. Walikwete abantu abacenjela,+ we Turi; bali e bakensha ba mato yobe.+ 9 Nangu bakalamba ba mu musumba wa Gebali+ na bacenjela ba uko bali muli iwe kabili e balecilika imilale yobe.+ Amato yonse aya pali bemba na bacooba bali muli iwe, pa kuti balekabushanya na iwe amakaabu. 10 Aba ku Persia+ na Ludimu+ na ba ku Puti+ bali mwi bumba lyobe ilya bashilika, bali e bantu bobe aba bulwi. Inkwela ne cisote bakobeke muli iwe.+ E bakucindamike. 11 Abena Aavadi,+ ne bumba lyobe ilya bashilika, bali pa malinga yobe ukushinguluka, na baume bashipa e bali mu mpungu shobe. Inkwela shabo bakobeke pa malinga yobe ukushinguluka.+ E balengele uyembe icine cine.

12 “‘“Aba ku Tarshishi+ e bo waleshitishanya na bo ifipe fya mutengo ifyalekanalekana ifingi.+ Pantu balikupeele ifya silfere, ifya cela, ifya kapotwe, ne fya mutofwe.+ 13 Aba ku Yabani,+ Tubali,+ na Mesheke+ baleshitishanya na iwe. Pantu abantu+ ne fipe fya mukuba e fyo bakupeele pa fya kukaabula fyobe. 14 Abatuntuka ku Togarma+ bakupeele bakabalwe na bakabalwe ba bulwi ne mfalashi, pa fyuma fyobe. 15 Abena Dedani+ e baleshitishanya na iwe; abantu ba mu fishi ifingi e bo waingishe incito; ameno ya nsofu+ ne fimuti fya kansalonsalo e fyo bakupeele ngo bupe. 16 Edomu aleshitishanya na iwe pa mulandu wa kuti ifipe walepanga fyalifulile. Tokwasi,+ amasako ya mpaanga ayakashikila ne nsalu shalekanalekana ne sha kolokondwe ishisuma, na bakorali na mabwe ya rubi, bakupeele pa kukaabushanya ne fyuma fyobe.

17 “‘“Yuda na ba ku calo ca kwa Israele baleshitishanya na iwe. Ingano+ sha ku Miniti+ ne fya kulya ifyaibela no buci+ na mafuta na balsamu,+ e fyo bakupeele pa kukaabushanya ne fipe fyobe.+

18 “‘“Damaseke+ aleshitishanya na iwe pa mulandu wa kuti ifipe walepanga fyalifulile, pa mulandu wa kufula kwa fyuma fyobe, no mwangashi+ wa ku Helboni na masako ya mpaanga ayakashikila. 19 Abena Vedani na bena Yabani ukufuma ku Usali—bakupeele ifipe pa fyuma fyobe. Icela icafulwa, kasia ne fyanunkila+—bakupeele pa kukaabushanya. 20 Aba ku Dedani+ e baleshitishanya na iwe insalu shapikulwa isha kufimba pa fya kwikalapo pa nama sha kwendelapo. 21 Abena Arabia+ na bakankaala bonse aba ku Kedari+ e ba makwebo abo waingishe incito. Abana ba mpaanga na basukusuku ne mbushi+—e fyo baleshitishanya na iwe. 22 Bashimakwebo ba ku Sheba+ na ba ku Raama+ baleshitishanya na iwe; ifyawamisha fyonse ifyanunkila ne misango yonse iya mabwe yauma umutengo na golde, bakupeele pa kukaabushanya.+ 23 Harani+ na Kane na Edene,+ bashimakwebo ba ku Sheba,+ ku Ashuri+ na ku Kilmadi baleshitishanya na iwe. 24 Pa cifulo cobe ica makwebo e po baleshitishanya na iwe insalu shawamisha, insalu shapikulwa ku nsalu sha bluu ne shapusanapusana ne fya kwanshika pa nshi ifyabalabata, ifyalukwa ku myando yakosa.

25 “‘“Amato ya ku Tarshishi+ e yalekusendela ifipe fya kukaabushanya, ica kuti ifyuma fyaleisula mu calo cobe kabili waishileba umukankaala pa kati na nkati ka bemba.+

26 “‘“Mu menshi ayengi e mo bacooba bobe bakutwala.+ Umwela wa ku kabanga wakubunsha mu kati na nkati ka bemba.+ 27 Ifyuma fyobe ne fya makwebo fyobe,+ ifya kukaabula fyobe,+ bacooba ba mato yobe na bakensha,+ aba kucilika imilale+ na bapokelela ifya kukaabula fyobe na baume bobe bonse aba nkondo,+ ababa muli iwe na mwi bumba lyobe lyonse, ababa mu kati kobe,—bakawila mu kati na nkati ka bemba mu bushiku bwa kuwa kobe.+

28 Icebo ca kwa Yehova caishile kuli ine na kabili aciti: 2 “We mwana wa muntu, sosa ku ntungulushi ya ku Turi auti, ‘Shikulu Mulopwe Yehova atila:

“‘“Apo umutima obe waba uwa matutumuko,+ kabili utila, ‘Ine ndi lesa.+ Pa cipuna ca kwa lesa e po naikala,+ pa kati na nkati ka bemba,’+ lelo uli muntunse fye,+ tauli lesa iyo,+ kabili ucita umutima obe ngo mutima wa kwa lesa— 3 mona! uli wa mano ukucila Daniele.+ Takuli ifya nkama ifyo wingafilwa ukwilula.+ 4 Ku mano yobe na ku mucetekanya obe wamwenamo ifyuma, kabili ulalonganika golde na silfere umwa kututila mobe.+ 5 Ku mulandu wa kufula kwa mano yobe,+ ku fipe fyobe ifya makwebo,+ e ko wafushishe ifyuma fyobe,+ no mutima obe watampile ukuba na matutumuko pa mulandu wa fyuma fyobe.”’+

6 “‘E ico e fyo Shikulu Mulopwe Yehova atila: “Pa mulandu wa kuti walenga umutima obe ukuba ngo mutima wa kwa lesa,+ 7 e ico mona, nkaleta pali iwe abantu abo ushaishiba,+ abankalwe ba mu nko,+ na bo bakasomwena bapanga babo pa fintu fyayemba ifyo wapanga ku mano yobe no kusaalula ukusaama kobe.+ 8 Bakakutentemushisha ku nindi,+ kabili ukafwa imfwa nge ya waipaiwa pa kati na nkati ka bemba.+ 9 Bushe ukasosa ku ulekwipaya ati,+ ‘Ine ndi lesa,’ apo uli muntunse fye, tauli lesa,+ kuli abo abalekusaalula?”’

10 “‘Ukafwa imfwa ya bashasembululwa ku minwe ya bantu ushaishiba,+ pantu ine ninsosa,’ e fyasosa Shikulu Mulopwe Yehova.”

11 Na kabili icebo ca kwa Yehova caishile kuli ine aciti: 12 “We mwana wa muntu, samwina imfumu ya ku Turi ulwimbo lwa bulanda,+ no kuyeba auti, ‘E fyo Shikulu Mulopwe Yehova atila:

“‘“Uli cilangililo ca kupwililika, walikwatisha amano+ kabili waliyemba icine cine.+ 13 Mu Edene, ibala lya kwa Lesa, e mo wali.+ Ilibwe lyonse ilyauma umutengo lyali e ca kufwala cobe, kadikode, topasi na yaspi; krusoliti, shohamu,+ yade; safiri, tokwasi+ na emarodi; kabili walefwala ifyapangilwa na golde. Mu bushiku bwa kubumbwa kobe fyalipekanishiwe. 14 Ni we kerubi uwasubwa uucingilila, e mulimo nakupeela. Wali pa lupili lwa mushilo ulwa kwa Lesa.+ Pa kati ka mabwe ya mulilo e po wale-endauka. 15 Wali uwa kaele mu mibele yobe ukutula pa bushiku wapangilwe+ mpaka ilyo ububifi bwasangilwe muli iwe.+

16 “‘“Pa mulandu wa kufula kwa fipe fyobe ifya makwebo,+ bacitile nga nshi ubunkalwe mu kati kobe, na iwe watampile ukubembuka.+ E ico nkakufumya mu lupili lwa kwa Lesa nge casuulwa, kabili nkakonawila+ mu mabwe ya mulilo, we kerubi uucingilila.

17 “‘“Umutima obe waishileba na matutumuko pa mulandu wa kuyemba kobe.+ Waonawile amano yobe pa mulandu wa kusaama kobe.+ Nkakufwinta pe sonde.+ Nkakubika ku cinso ca shamfumu, pa kuti shikakumone.+

18 “‘“Pa mulandu wa kufula kwa filubo fyobe,+ pa mulandu wa lufyengo pa fipe fyobe ifya makwebo,+ wasaalula umwa mushilo mobe. Kabili nkafumya umulilo mu kati kobe. E ukakoca.+ Na ine nkakulenga ukuba imito pa nshi pa menso ya bonse abalekumona.+ 19 Kumfwa inko ishakwishiba, shikakulolesha nashipapa.+ Nkaleta pali iwe ubucushi bwa kupumikisha, kabili tawakabepo umuyayaya.”’”+

20 Icebo ca kwa Yehova caishile kuli ine kabili aciti: 21 “We mwana wa muntu, losha icinso cobe ku musumba wa Sidone,+ no kusesema pali wena. 22 Usose auti, ‘Shikulu Mulopwe Yehova atila: “Mona nakwalukila,+ we Sidone, kabili nkaicindamikila muli iwe;+ na bantu bakeshiba ukuti nine Yehova ilyo nkaupingula+ no kuilenga uwa mushilo muli wena.+ 23 Nkatuma icikuko muli wena na bantu bakafwa mu misebo ya uko.+ Na baipaiwa bakawa mu kati ka uko ku lupanga ulukesa pali wena konse konse;+ na bantu bakeshiba ukuti nine Yehova.+ 24 Takwakabe na kabili ficilasa+ fyabipisha mu ng’anda ya kwa Israele nangu muunga uukali ukufuma muli bonse ababashinguluka, abalebasaalula; na bantu bakeshiba ukuti nine Shikulu Mulopwe Yehova.”’

25 “‘E fyo Shikulu Mulopwe Yehova atila: “Ilyo nkalonganya aba mu ng’anda ya kwa Israele ukufuma mu nko umo basalanganina,+ nkacindikwa mu kati kabo mu menso ya nko.+ Na bo bakekala mu calo cabo+ ico napeele umubomfi wandi Yakobo.+ 26 Kabili bakekalamo umutelelwe+ no kukuula amayanda+ no kulima amabala ya myangashi,+ bakekala umutelelwe+ ilyo nkapingula bonse abalebasaalula ababashinguluka;+ e lyo bakeshiba ukuti nine Yehova Lesa wabo.”’”

29 Mu mwaka walenga ikumi (10), mu mweshi we kumi, pa bushiku bwalenga ikumi na shibili (12) muli uyo mweshi, icebo ca kwa Yehova caishile kuli ine, aciti: 2 “We mwana wa muntu, losha icinso cobe kuli Farao imfumu ya ku Egupti+ no kusesema pali ena na pali Egupti yonse.+ 3 Sosa no kutila, ‘Shikulu Mulopwe Yehova atila: “Mona nakwalukila, we Farao, imfumu ya ku Egupti,+ we shimweshimwe mukalamba uwa muli bemba,+ uwalambalala pa kati ka mifoolo ya menshi iya Naelo,+ uwatila, ‘Umumana wandi uwa Naelo wandi, kabili ine—nine naupanga.’+ 4 Nkabika ifya kulobelako mu nsekete shobe,+ nkalambatika ne sabi lya mu mifoolo ya Naelo ku mamba yobe. Kabili nkakufumya mu mifoolo ya Naelo ne sabi lyonse ilya mu mifoolo ya Naelo ilyakakatila ku mamba yobe. 5 Nkakupoosa mu matololo, iwe ne sabi lyonse fye ilya mu mifoolo ya Naelo.+ Pa muulu wa mpanga e po ukawila.+ Tapali uukakusenda no kukushiika. Nkakupeela ku nama sha pe sonde na ku fyuni fya mu muulu ukuti fikakulye.+ 6 Na bekashi ba mu Egupti bonse bakeshiba ukuti nine Yehova,+ pantu bali ica kutungilila, kabili bali itete ku ba mu ng’anda ya kwa Israele.+ 7 Ilyo bakwikete ku kuboko, walikontweke,+ walepwile no kubeya kwabo konse. Kabili ilyo bashintilile pali iwe, walikontweke,+ walengele ne misana yabo yonse ukututuma.”+

8 “‘E ico, Shikulu Mulopwe Yehova atila: “Mona, nkaleta pali iwe ulupanga,+ kabili nkepaya umuntunse ne nama mu kati kobe.+ 9 Ne calo ca Egupti cikaba icibolya kabili umushaba akantu;+ e lyo bakeshiba ukuti nine Yehova, pantu atile, ‘Umumana wa Naelo wandi, nine naupangile.’+ 10 E ico, mona, na-alukila iwe ne mifoolo yobe iya Naelo,+ kabili nkalenga icalo ca Egupti ukuba icibolya, icauma, umushaba akantu,+ ukufuma ku Migdole+ ukufika na ku Syene+ no kufika ku mupaka wa Etiopia. 11 Tamwakapite ulukasa lwa muntunse,+ no lukasa lwa nama talwakapitemo,+ kabili pa myaka amakumi yane (40) tacakekalwemo.+ 12 Nkalenga icalo ca Egupti ukuba icibolya mu kati ka fyalo fyaba ifibolya;+ ne misumba ya ciko ikaba ifibolya mu kati ka misumba yaba ifibolya pa myaka amakumi yane (40);+ kabili nkasalanganishisha abena Egupti mu nko no kubapashila mu fyalo.”+

13 “‘Pantu Shikulu Mulopwe Yehova atila: “Pa mpela ya myaka amakumi yane (40)+ nkalonganya abena Egupti ukubafumya mu bantu na bantu umo bakapashilwa,+ 14 kabili nkabwesha bankole ba bena Egupti; nkababwesesha na ku calo ca Patrose,+ ku calo uko batuntuka, kulya e ko bakaba ubufumu bwasaaluka. 15 Bukaba ubwasaaluka ukucila amabufumu yambi, kabili tabwakaimye na kabili pa nko shimbi,+ kabili nkabaceefya ica kuti tabakateke inko shimbi na kabili.+ 16 Aba mu ng’anda ya kwa Israele tabakabacetekele na kabili,+ ica kuti tabakanenge ukwibukisha ifilubo fyabo pa kwalukila kuli bena na kabili.+ E lyo bakeshiba ukuti nine Shikulu Mulopwe Yehova.”’”

17 Nomba mu mwaka walenga amakumi yabili na cinelubali (27), mu mweshi wa kubalilapo, pa bushiku bwa kubalilapo muli uyo mweshi, icebo ca kwa Yehova caishile kuli ine aciti: 18 “We mwana wa muntu, Nebukadresari imfumu ya ku Babiloni,+ alengele abashilika bakwe ukubomba umulimo ukalamba uwa kulwisha Turi.+ Umutwe onse walisebelwe ipala, na mabeya yonse yalisukwike.+ Lelo ena na bashilika bakwe tabapokele icilambu+ kuli Turi pa mulimo uo babombele pali ena.

19 “E ico Shikulu Mulopwe Yehova atila, ‘Mona nkapeela Nebukadresari imfumu ya ku Babiloni icalo ca Egupti,+ na o akasenda ifyuma fya ciko no kupokolola ifyabamo no kusampa ifyabamo;+ na fyo e fikaba icilambu ca bashilika bakwe.’

20 “‘Kabili pa kumulambula pa mulimo abombele pali ena namupeele icalo ca Egupti, pantu babombeele ine,’+ e fyasosa Shikulu Mulopwe Yehova.

21 “Muli ubo bushiku nkalenga ulusengo* ukumena mu ng’anda ya kwa Israele,+ kabili nkakupeela insambu ya kulanda mu kati kabo;+ e lyo bakeshiba ukuti nine Yehova.”

30 Icebo ca kwa Yehova caishile kuli ine na kabili, aciti: 2 “We mwana wa muntu, sesema, no kusosa auti,+ ‘Shikulu Mulopwe Yehova atila: “Welesheni, mwe bantu amuti, ‘Iye bulya bushiku!’+ 3 pantu nabupalama ubushiku, nabupalama ubushiku bwa kwa Yehova.+ Ubushiku bwa makumbi,+ bukaba ni nshita ya kupingula abena fyalo.+ 4 Kabili kukesa ulupanga mu Egupti,+ kukaba no kucululuka kwabipisha mu Etiopia ilyo kukaba abakepaiwa mu Egupti ilyo bakasenda icuma cakwe no kubongolola ifyo ashintililapo.+ 5 Etiopia+ na Puti+ na Ludi na bonse aba mu nko shimbi+ na Kubu na bana ba mu calo abo napangana na bo icipangano—na bo bakafwa ku lupanga.”’+

6 “Yehova atila, ‘Abatungilila Egupti na bo bakawa, na maka yakwe ayo ayumfwilapo yakapwa.’+

“‘Ukutula ku Migdole+ ukufika ku Syene+ bakawa ku lupanga,’ e fyasosa Shikulu Mulopwe Yehova. 7 ‘Na bo bakonaulwa mu fyalo ifyashala ifibolya, ne misumba yakwe ikaba mu kati ka misumba ya fibolya.+ 8 Kabili bakeshiba ukuti nine Yehova ilyo nkasonteka umulilo mu Egupti na bamwafwa bonse bakonaulwa.+ 9 Muli ubo bushiku inkombe shikafuma ku cinso candi mu ngalaba, no kulenga abena Etiopia abacilamo ukuicetekela bakatutume.+ No kucululuka kukaba muli bena mu bushiku bwa kukandwa kwa kwa Egupti, pantu moneni! ukwisa bukesa.’+

10 “Shikulu Mulopwe Yehova atila, ‘Nkalenga na cinkupiti wa bena Egupti ukupwila mu minwe ya kwa Nebukadresari imfumu ya ku Babiloni.+ 11 Ena na bantu bakwe pamo nankwe, abankalwe ba mu nko,+ bakaletwa ku konaula icalo. Na bo bakasomwena bapanga babo pali Egupti na mu calo mukesula fye abaipaiwa.+ 12 Nkakamya ne mifoolo ya menshi iya Naelo,+ nkapeela ne calo mu minwe ya babi,+ nkalenga ne calo ne fyabamo ukonaulwa kuli bambi bambi.+ Ine ne Yehova ninsosa.’+

13 “Shikulu Mulopwe Yehova atila, ‘Nkonaula utulubi twabo utwa bunani+ no kulofya balesa ba fye mu Nofu,+ takwakabe na kabili intungulushi ya mu calo ca Egupti; nkalenga ne calo ca Egupti cibe no mwenso.+ 14 Nkonaula Patrose+ no kusonteka umulilo mu Soani+ no kupingula mu No.+ 15 Kabili nkapongolwela ubukali bwandi+ pali Sini, uko Egupti aya ku kushina, no kwipaya cinkupiti wa ku No.+ 16 Kabili nkasonteka umulilo mu Egupti. Sini akacula nga nshi, no musumba wa No bakaupoka; e lyo ku Nofu—kukaba abalwani akasuba!17 Kumfwa abalumendo ba ku One+ na Pibesete, bakafwa ku lupanga, na ba mu misumba bakaya muli bunkole. 18 Na ku Tafne+ kukafiita, ilyo nkafunaula amakoli ya ku Egupti.+ Na maka yakwe ayo ayumfwilapo yakapwa.+ Amakumbi yakamufimba,+ na ba mu mishi yakwe bakaya muli bunkole.+ 19 Nkapingula mu Egupti;+ na bo bakeshiba ukuti nine Yehova.’”

20 Nomba mu mwaka we kumi na umo (11), mu mweshi wa kubalilapo, pa bushiku bwa cinelubali (7) muli uyo mweshi, icebo ca kwa Yehova caishile kuli ine, aciti: 21 “We mwana wa muntu, ndi no kufuna+ ukuboko kwa kwa Farao imfumu ya ku Egupti, kabili mona! takwakakakwe insalu ukuti kundapwe no kwikashiwa,+ ukuti kukose, kwikate no lupanga.”

22 “E ico Shikulu Mulopwe Yehova atila, ‘Mona ndelwisha Farao imfumu ya ku Egupti,+ kabili nkafuna amaboko yakwe,+ ukutuntulu no kwafunika,+ kabili nkalenga ulupanga ukupona mu minwe yakwe.+ 23 Kabili nkasalanganishisha abena Egupti mu nko no kubasalanganishisha mu fyalo.+ 24 Kabili nkakosha amaboko ya mfumu ya ku Babiloni+ no kupeela ulupanga lwandi mu minwe ya iko,+ e lyo nkafuna amaboko ya kwa Farao, kabili akateta nga nshi ku cinso ca iko ngo wacenwa icabipisha.+ 25 Kabili nkakosha amaboko ya mfumu ya ku Babiloni, na maboko ya kwa Farao yakatompoka; kabili bakeshiba ukuti nine Yehova ilyo nkapeela ulupanga mu minwe ya mfumu ya ku Babiloni na yo ikalutambika pa calo ca Egupti.+ 26 Awe nkapashila abena Egupti mu nko+ no kubasalanganishisha mu fyalo; e lyo bakeshiba ukuti nine Yehova.’”

31 Nomba mu mwaka we kumi na umo (11), mu mweshi wa butatu, pa bushiku bwa kubalilapo ubwa uyo mweshi, icebo ca kwa Yehova caishile kuli ine, aciti: 2 “We mwana wa muntu, sosa kuli Farao imfumu ya ku Egupti na kuli cinkupiti wakwe auti,+

“‘Nani uo wapala ubukulu? 3 Mona! Waba ngo mwina Asiria, kabili waba ngo muti wa mukedari wa ku Lebanone,+ uwayemba imisambo,+ uwatemfuma kabili uupeela icintelelwe, uutali,+ ica kuti akatongolilo ka uko kaba mu makumbi.+ 4 Amenshi e yaukushishe;+ amenshi ayengi yaulengele ukulepa. Imilonga ya menshi yashingulwike apo walimbwa; yaile na ku miti yonse iya mu mpanga. 5 E mulandu wine uyu muti walepeele ukucila imiti yonse iya mu mpanga.+

“‘Na mampanda yakonkenyepo ukufula, ne misambo yakonkenyepo ukulepa pa mulandu wa menshi ayengi mu tumifoolo twa uko.+ 6 Mu mampanda ya uko e mo ifyuni fyonse ifya mu lwelele fyapangile ifinsa,+ na mwi samba lya misambo ya uko e mo inama shonse isha mpanga shalefyalila,+ na mu cintelelwe ca uko e mo shaleikala inko shonse ishafulamo abantu. 7 Awe wali uwapuulama,+ mu kulepa kwa misambo ya uko, pantu imishila ya uko yali pa menshi ayengi. 8 Imikedari imbi mwi bala lya kwa Lesa tayalingene na o.+ Kumfwa ku miti ya mikupri, amampanda ya iko tayapalileko. Imisambo ya miti ya miarmone tayapalileko. Takwali umuti umbi mwi bala lya kwa Lesa uwapalileko ukuyemba.+ 9 Naulengele ukuyemba pa mulandu wa misambo ukufula,+ ne miti yonse iya mu Edene, iya mwi bala lya kwa Lesa yaleufimbila.’+

10 “E ico Shikulu Mulopwe Yehova atila, ‘Pa mulandu wa kuti walilepele, ica kuti watekele na kantongolilo ka uko mu makumbi+ no mutima wa uko walituumine pa mulandu wa kulepa kwa uko,+ 11 nkaupeela kuli kateka wakwatisha amaka uwa mu nko.+ Na o akaucita akantu. Nkaupoosa pa mulandu wa fyabipa ifyo ucita.+ 12 Bambi bambi, abankalwe ba mu nko, bakauputula, na bantu bakausha pa mpili; na mabula ya uko yakawila mu mipokapoka yonse, ne misambo ya uko ikafunaikila monse mu milonga ya pe sonde.+ Na bantu bonse aba pe sonde bakafuma mu cintelelwe ca uko no kufumako.+ 13 Ifyuni fyonse ifya mu muulu fikesaikala pali uyo muti uwawa, ne nama shonse isha mpanga shikekala mu misambo ya uko;+ 14 pa kuti imiti yonse iitapililwa tailepele, kabili pa kuti taifishishe utuntongolilo twa iko mu makumbi, pa kuti imiti yonse iitapililwa, tailepele ukufika mu makumbi, pantu yonse ili no kufwa,+ ikaya pa nshi ya calo,+ mu kati ka bana ba bantu, ku batentemukila ku nindi.’

15 “Shikulu Mulopwe Yehova atila, ‘Mu bushiku ukatentemukila ku Nshiishi* nkalenga kukabe ukuloosha.+ Pa mulandu wa uko nkafimba pa menshi ayengi, pa kuti nkacilike imilonga ya uko no kuti nkaleshe amenshi ya uko ayengi; na pa mulandu wa uko nkafiisha Lebanone, na pa mulandu wa uko imiti ya mu mpanga ikabonsa. 16 Pa mulandu wa congo ca kuwa kwa uko nkalenga inko ukutenta ilyo nkautentemushisha ku Nshiishi* pamo ne yatentemukila ku nindi,+ kabili imiti yonse iya mu Edene iyaba mu calo ca pa nshi,+ iisuma nga nshi ne yawamisha iya ku Lebanone, kabili yonse iinwa amenshi ikasansamushiwa.+ 17 Na yo ikatentemukila pamo na o ku Nshiishi,*+ ku baipaiwa ku lupanga, kabili ku bana ba uko abaikele mu cintelelwe ca uko mu nko.’+

18 “‘Muti nshi pa miti ya mu Edene uwingalingana na iwe ukucindama+ no bukulu? Lelo ukatentemushiwa pamo ne miti ya mu Edene+ ku calo ca pa nshi.+ Mu bashasembululwa e mo ukalaala pamo na baipaiwa ku lupanga. Uyu e Farao na cinkupiti wakwe,’ e fyasosa Shikulu Mulopwe Yehova.”

32 Nomba mu mwaka walenga ikumi na ibili (12), mu mweshi we kumi na ibili, pa bushiku bwa kubalilapo muli uyo mweshi, icebo ca kwa Yehova caishile kuli ine, aciti: 2 “We mwana wa muntu, samuna ulwimbo lwa bulanda pali Farao imfumu ya ku Egupti, no kutila kuli ena, ‘Waonaulwa,+ we o inko shimona ngo musepela wa nkalamo.

“‘Kabili waba nga shimweshimwe muli babemba,+ walompokela mu menshi mu mimana yobe no kufundaula amenshi ku makasa yobe no kukandila imilonga.’

3 “Shikulu Mulopwe Yehova asosa ati, ‘Nkafungulwila pali iwe isumbu+ ukubomfya ibumba lya bantu, na bo bakalenga ukekatwe mwi sumbu lyandi.+ 4 Na ine nkakusha pa mulundu. Nkakupoosa pa mpanga.+ Nkalenga ne fyuni fya mu muulu fyonse ukwikala pali iwe, nkakupeela ku nama sha mpanga shonse isha pano isonde ponse shikakulye no kwikuta.+ 5 Nkapoosa umubili obe pa mpili no kwisusha ifipimfya fya citumbi cobe mu mipokapoka.+ 6 Nkanwensha icalo umulopa+ obe uwafuma muli iwe, pa mpili; ne mimana ikesulamo iwe.’

7 “‘Kabili ilyo nkakushimya nkafimba imyulu no kufiisha intanda. Akasuba nkakafimba amakumbi, no mweshi tawakaleke ulubuuto lwa uko ukubalika.+ 8 Fyonse ifisanika ulubuuto ifya mu muulu nkafilenga ukufiita pa mulandu obe, no kubika imfifi pa calo cobe,’ e fyasosa Shikulu Mulopwe Yehova.

9 “‘Nkakalifya imitima ya bengi ilyo nkatwala bankole ukufuma muli iwe mu nko ku fyalo ifyo ushaishiba.+ 10 Awe nkalenga abantu na bantu ukukupapa,+ ne shamfumu shabo shikatutuma ku mwenso pa mulandu obe ilyo nkasunsha ulupanga lwandi pa menso yabo,+ kabili pa bushiku bwa kuwa kobe, shikalatutuma lyonse, umo umo akalilila umweo wakwe.’+

11 “Pantu Shikulu Mulopwe Yehova atila, ‘Ulupanga lwa mfumu ya ku Babiloni lukesa pali iwe.+ 12 Nkalenga impalume shonse isha culukusu isha mu nko ukwipaya ibumba lyobe kuli bapanga;+ na bo bakapwisha icilumba ca Egupti, na cinkupiti wakwe onse akaloba.+ 13 Nkalofya ne fitekwa fyakwe fyonse ifya mu lulamba lwa menshi ayengi,+ kabili ulukasa lwa muntu talwakayafundaule na kabili,+ na mabondo ya fitekwa tayakayafundaule.’

14 “‘Iyo nshita nkalenga amenshi ya uko ukulengama, ne mimana ya uko nkalenga ikakonkoloke nga mafuta,’ e fyasosa Shikulu Mulopwe Yehova.

15 “‘Ilyo nkalenga icalo ca Egupti ukuba icibolya ne fyuma fyonse ifya calo ukupokololwa,+ ilyo nkoma abekashi ba ciko bonse, e lyo bakeshiba ukuti nine Yehova.+

16 “‘Ulu, lwimbo lwa bulanda, na bantu bakalwimbako. Na banakashi ba mu nko bakalwimba; bakalwimba pali Egupti na cinkupiti wakwe onse,’+ e fyasosa Shikulu Mulopwe Yehova.”

17 Na kabili mu mwaka walenga ikumi na ibili (12), pa bushiku bwe kumi na shisano (15) muli uyo mweshi, icebo ca kwa Yehova caishile kuli ine, aciti: 18 “We mwana wa muntu, loosha cinkupiti wa ku Egupti kabili bilisha ukuti akawa,+ ena na bantu ba mu nko ishikankaala, bakabatentemushisha pa nshi ya calo,+ pamo na batentemukila ku nindi.+

19 “‘Bushe nani uo wacila ukuyemba?+ Tentemuka, kabili bakakusendamika na bashasembululwa!’+

20 “‘Mu baipaiwa ku lupanga e mo bakawila.+ Akepaiwa ku lupanga. Mukuleni na cinkupiti wakwe onse.

21 “‘Abakalamba mu mpalume bakalanda nankwe mu Nshiishi,* na balemwafwa.+ Bakaya pa nshi;+ bakasendama abashasembululwa, abaipaiwa ku lupanga. 22 Kulya e kwaba Asiria ne bumba lyakwe lyonse.+ Inshiishi sha bena Asiria shashinguluka imfumu yabo. Bonse balipaiwa, baipaiwe ku lupanga.+ 23 Pantu inshiishi shakwe shabikwa mu kati na nkati ka nindi,+ ne bumba lyakwe lyashinguluka inshiishi yakwe, bonse balipaiwa, bawile ku lupanga, pantu balengele aba mu calo ca ba mweo ukwikatwa umwenso.

24 “‘Elamu+ e ko ali na cinkupiti wakwe onse ukushinguluka inshiishi yakwe, bonse abaipaiwa, abaipaiwe ku lupanga, abaya ku calo ca pa nshi abashasembululwa, abalenga umwenso mu calo ca ba mweo; kabili bakaseebanina pamo na baya kale ku nindi.+ 25 Bamubikila ubusanshi+ mu baipaiwa pa kati ka kwa cinkupiti wakwe. Inshiishi shakwe shabushinguluka. Bonse bantu bashasembululwa, abaipaiwe ku lupanga,+ pantu balengele aba mu calo ca ba mweo ukwikatwa umwenso; kabili bakaseebanina pamo na baya kale ku nindi. Abikwa pa kati ka baipaiwa.

26 “‘Kulya e kwaba Mesheke+ na Tubali+ na cinkupiti wabo onse. Inshiishi shabo shalimushinguluka. Bonse bantu bashasembululwa, abalaswa ulupanga, pantu balengele aba mu calo ca ba mweo ukwikatwa umwenso. 27 Bushe tabakasendame ne mpalume,+ ishaipaiwa pa bashasembululwa, ishaya ku Nshiishi* ne fyanso fya shiko ifya bulwi? Kabili bakabashiika na bapanga babo ku mitwe, ne membu shabo shikaba pa mafupa yabo,+ pantu impalume shaletiinya aba mu calo ca ba mweo.+ 28 Kumfwa iwe, pa bashasembululwa e po ukafunaikila, no kusendama pamo na baipaiwe ku lupanga.

29 “‘Kulya e kwaba Edomu,+ ishamfumu shakwe na bakankaala bakwe bonse, abo, te mulandu na bumpalume bwabo, babikilwe pamo na baipaiwe ku lupanga;+ bena bakasendama pamo na bashasembululwa+ na baya kale ku nindi.

30 “‘Kulya e kwaba bashimucindikwa ba ku kapinda ka ku kuso, bonse, na bena Sidone+ bonse, abaya ne nsoni pamo na baipaiwa, mu bubi bwabo pa mulandu wa bumpalume bwabo. Kabili bakalaala ukwabula ukusembululwa pamo na baipaiwe ku lupanga kabili bakaseebanina pamo na baya kale ku nindi.+

31 “‘Aba e bo Farao akamona, kabili akasansamuka pali cinkupiti wakwe onse.+ Farao ne bumba lya bashilika bakwe bonse bakepaiwa ku lupanga,’ e fyasosa Shikulu Mulopwe Yehova.

32 “‘Pantu e walenga umwenso mu calo ca ba mweo,+ kabili afwile ukusendamikwa mu bashasembululwa, pamo na baipaiwe ku lupanga, Farao na cinkupiti wakwe onse,’ e fyasosa Shikulu Mulopwe Yehova.”

6 “‘Nomba umulinshi nga amona ulupanga luleisa lelo talishishe intandala+ na bantu tabasokelwe nakalya, e lyo ulupanga lwaisa no kwipaya abo bantu, abo bantu kwena bakafwa pa mulandu wa membu shabo,+ lelo umulopa wabo nkaufwaya mu minwe ya mulinshi.’+

7 “Awe iwe, we mwana wa muntu, nakupeela umulimo wa kuba kalinda wa ba mu ng’anda ya kwa Israele,+ kabili wakulaumfwa amashiwi ya mu kanwa kandi, e lyo wabasoka ukulingana ne fyo nalanda.+ 8 Ilyo nasosa ku mubifi nati, ‘We mubifi, ukufwa ukafwa!’+ na iwe tausokele umubifi ukuti aleke imibele yakwe,+ uyo mubifi akafwila pa membu shakwe,+ lelo umulopa wakwe nkaufwaya mu minwe yobe. 9 Lelo nga wasoka umubifi ukuti aleke imibele yakwe na o akaana ukuleka imibele yakwe, akafwila pa membu shakwe,+ na iwe ukapokolola umweo obe.+

10 “Nomba iwe, we mwana wa muntu, sosa ku ba mu ng’anda ya kwa Israele auti, ‘Imwe mutila: “Apo ifilubo fyesu ne membu shesu fyaba pali ifwe kabili e mo tulelobela,+ kuti twaba shani aba mweo?”’+ 11 Sosa kuli bena auti, ‘“Na pali ne mwine,” e fyasosa Shikulu Mulopwe Yehova, “Nshisekela mu mfwa ya mubifi,+ lelo mfwaya ukuti umubifi aleke+ imibele yakwe no kwikalilila uwa mweo.+ Pilibukeni, pilibukeni no kufuma ku mibele yenu iibi,+ nga cinshi ico mulefwila, mwe ba mu ng’anda ya kwa Israele?”’+

12 “Na iwe, we mwana wa muntu, sosa ku bana ba bantu bobe auti, ‘Ubulungami bwa mulungami tabwakamupokolole nga apondoka.+ Lelo ifyabipa ifyo umubifi acita, tafyakamuwishe nga apilibuka aleka no kuficita.+ Kabili umulungami takekalilile uwa mweo pa bulungami bwakwe ilyo akabembuka.+ 13 Ilyo nasosa ku mulungami nati: “Ukaba no mweo,” na o acetekela ubulungami bwakwe no kucita ifyabipa,+ fyonse ifyalungama ifyo acitile tafyakebukishiwe, lelo pa fyabipa fyakwe ifyo acita, e po akafwila.+

14 “‘Kabili ilyo nasosa ku mubifi nati: “Ukufwa ukafwa,”+ na o apilibuka aleka no kucita imembu+ atampa no kucita umulinganya no bulungami,+ 15 no mubifi abwekeshamo iciikatilo,+ abwekeshamo ne co aibile,+ no kwenda mu fipope ifitwala ku bumi pa kukanacita ulufyengo,+ ukuba no mweo akaba no mweo.+ Takafwe iyo. 16 Imembu shakwe shonse isho acita tashakebukishiwe pa kuti apingwilwepo iyo.+ Umulinganya no bulungami e fyo acita. Ukuba no mweo akaba no mweo.’+

17 “Na bana ba bantu bobe batila, ‘Imibele ya kwa Yehova tayalungama,’+ lelo, mibele yabo e ishalungama.

18 “Ilyo umulungami aleka ukucita ifyalungama kabili atampa ukucita ifyabipa, akafwilapo.+ 19 Kabili umubifi nga aleka ukucita ifyabipa atampa no kucita umulinganya no bulungami, akaba no mweo pa mulandu wa kucita ifyo.+

20 “Na imwe mutila, ‘Imibele ya kwa Yehova tayalungama.’+ Nkamupingula cila muntu ukulingana ne micitile yakwe,+ mwe ba mu ng’anda ya kwa Israele.”

21 Nomba mu mwaka walenga ikumi na ibili (12), mu mweshi we kumi (10), pa bushiku bwa cisano muli bunkole bwesu, kwaishile uwapuswike ukufuma ku Yerusalemu,+ ati: “Nabawisha umusumba!”+

22 Nomba ukuboko kwa kwa Yehova kwali pali ine icungulo ilyo uwapuswike ali talaisa,+ kabili ilyo uwapuswike talaisa kuli ine ulucelo alengele natendeka ukusosa, awe nalitendeke ukusosa, nshali tondolo na kabili iyo.+

23 Kwaishile icebo ca kwa Yehova kuli ine na kabili, aciti: 24 “We mwana wa muntu, abekashi ba muli ifi fibolya+ balesosa pa mpanga ya Israele abati, ‘Abrahamu ali fye muntu umo lelo alipokele icalo caba cakwe.+ Na ifwe tuli bengi; icalo capeelwa kuli ifwe pa kuti cibe cesu.’+

25 “E ico ubebe auti, ‘Shikulu Mulopwe Yehova asosa ati: “Mulya inama no mulopamo,+ na menso yenu mwinwina ku tulubi twenu utwa bunani,+ no mulopa mulasuumya.+ E ico bushe mufwile ukukwata icalo?+ 26 Imwe mwacetekela ulupanga lwenu.+ Mwacita ifya bunani,+ kabili cila muntu asendama no mukashi wa munankwe.+ E ico bushe mufwile ukukwata icalo?”’+

27 “E fyo usose kuli bena auti, ‘Shikulu Mulopwe Yehova atila: “Na pali ne mwine, cine cine abali mu fibolya bakawa ku lupanga;+ no uli mu mpanga, nkamupeela ku finama fya mpanga ukuti fikamulye;+ na bali umwacingililwa na mu ncengo+ bakafwa ku cikuko. 28 Nkalenga icalo ukuba umwabula akantu,+ kabili cikashala icibolya, icintu baituntumbilapo cikapwa+ ne mpili sha kwa Israele shikonaika,+ ukwabula no wa kupitamo. 29 E lyo bakeshiba ukuti nine Yehova ilyo nkalenga icalo ukuba icibolya,+ pa mulandu wa fya bunani fyabo fyonse ifyo bacita.”’+

30 “Na iwe, we mwana wa muntu, abana ba bantu bobe balelanda pali iwe mupepi na ku fibumba na pa miinshi ya mayanda,+ balelanshanya, umo umo na munyina, abati, ‘Shi iseni no kumfwa amashiwi ayalefuma kuli Yehova.’+ 31 Awe bakesa kuli iwe filya fine besa, no kwikala ku cinso cobe, kwati bantu bandi;+ bakomfwa ne fyo ukasosa lelo tabakaficite iyo,+ pantu ku tunwa twabo balelanda ifya lunkumbwa ne mitima yabo yalola ku fya bufumfuntungu.+ 32 Kabili mona! bakumona nga kemba wa nyimbo sha citemwiko, ngo wakwata ishiwi ilisuma kabili uwacenjela ukulisha icilimba.+ Ukumfwa bakomfwa ifyo ukasosa, lelo tapali abakaficita.+ 33 Nomba ilyo cikacitika—kabili mona! cikacitika+—e lyo bakeshiba ukuti paali kasesema pa kati kabo.”+

34 Kabili icebo ca kwa Yehova caishile na kabili kuli ine, aciti: 2 “We mwana wa muntu, sesemena abacemi ba kwa Israele. Sesema, no kusosa kuli bena, e kutila ku bacemi, auti, ‘Shikulu Mulopwe Yehova atila: “We bulanda ku bacemi ba kwa Israele,+ abailiisha abene!+ Bushe te mpaanga abacemi bafwile ukuliisha?+ 3 Nomba imwe mulya amafuta ya mpaanga,+ kabili mufwala amasako ya shiko. Impaanga iyaina+ mulepaya.+ Lelo tamushiliisha iyo. 4 Ishalwala tamwashikosha,+ ne yanakuka tamwaundapa, iyafunika tamwaikaka, ne yauluba tamwaibwesha, ne yaluba tamwaifwaya,+ lelo mwashitekela mu bunkalwe na mu bukali.+ 5 Awe shasukile shasalangana pantu takwali umucemi,+ kabili shali ifya kulya fya nama sha mu mpanga shonse, kabili shali fye ishasalangana.+ 6 Impaanga shandi shalelulumba fye mu mpili shonse na pa tupili tonse ututali;+ impaanga shandi+ shasalanganine na pa calo conse, ukwabula no wa kushifwaya kabili ukwabula no wa kushisokota.

7 “‘“E ico, umfweni icebo ca kwa Yehova mwe bacemi, 8 ‘“Na pali ne mwine,” e fyasosa Shikulu Mulopwe Yehova, “cine cine apo impaanga shandi shali isha kusampa kabili impaanga shandi shali ica kulya ca finama fya mpanga fyonse, pantu takwali umucemi, kabili abacemi bandi tabafwaile impaanga shandi, lelo bena baikalile ukuiliisha abene,+ ne mpaanga shandi tabashiliishishe,”’ 9 e ico mwe bacemi, umfweni icebo ca kwa Yehova. 10 Shikulu Mulopwe Yehova atila, ‘Moneni, ndealukila abacemi,+ kabili nkafwaya impaanga shandi mu minwe yabo no kubalesha ukuliisha impaanga shandi,+ na bacemi tabakaleiliisha fye kabili iyo;+ nkapokolola ne mpaanga shandi ukufuma mu tunwa twabo, tashakabe ica kulya cabo iyo.’”+

11 “‘Pantu Shikulu Mulopwe Yehova asosa ati: “Moneni, ine, ndi no kufwaya impaanga shandi no kushisakamana.+ 12 Ifyo uuliisha umukuni wakwe asakamana+ pa bushiku bwa kuba pa kati ka mpaanga shakwe ishasalanganina ukutali,+ e fyo na ine nkasakamana impaanga shandi; nkashipokolola na konse uko shasalanganina mu bushiku bwa makumbi ne mfifi yafiitisha.+ 13 Nkashifumya+ na mu bantu no kushilonganya ukufuma mu fyalo no kushileta mu calo ca shiko+ no kushiliishisha pa mpili sha kwa Israele, mu milonga na monse umwa kwikala mu calo.+ 14 Nkashiliishisha umwaba umulemfwe usuma, kabili amacinka ya shiko yakaba pa mpili ishitali isha kwa Israele.+ Kulya e ko shikayolwela mu macinka ayasuma,+ shikalya umulemfwe uwatemfuma pa mpili sha kwa Israele.”

15 “‘“Ine ne mwine nkaliisha impaanga shandi,+ kabili ine ne mwine nkashilenga ukuyolola,”+ e fyasosa Shikulu Mulopwe Yehova. 16 “Iyaluba nkaifwaya,+ ne yauluba nkaibwesha, ne yafunika nkaikaka ne yanakuka nkaikosha, lelo iyaina+ ne yakosa nkailofya. Nkashicemena ku bupingushi.”+

17 “‘Na imwe, mwe mpaanga shandi, Shikulu Mulopwe Yehova asosa ati: “Moneni, ndepingula pa kati ka mpaanga ne mpaanga, na pa kati ka basukusuku na basawe.+ 18 Bushe mumona ukuti mulandu uunono ifi mulya umulemfwe uusuma+ no kunyantaula uwashala, no kunwa amenshi ayalengama lelo ayashala mwafundaula pa kunyantaulamo ku makasa yenu? 19 E lyo bushe impaanga shandi, shakulalya apanyantaula amakasa yenu no kunwa amenshi ayo mwafundaula ku makasa yenu?”

20 “‘E ico, Shikulu Mulopwe Yehova asosa kuli bena ati: “Moneni ine, ne mwine, nkapingula pa kati ka mpaanga ishaina ne mpaanga ishaonda, 21 pantu mwasunkiile ku mbafu na ku mabeya na ku nsengo shenu e ko mwaletunkwila shonse ishalwala mpaka mwasuka mwashisalanganishisha ku nse.+ 22 Awe nkapususha impaanga shandi, tashakabe na kabili isha kusampa;+ kabili nkapingula pa kati ka mpaanga ne mpaanga ibiye. 23 Kabili nkemika umucemi umo pali shena,+ umubomfi wandi Davidi, na o akashicema.+ Ena akashiliisha, kabili akaba kacema wa shiko.+ 24 Na ine, ne Yehova, nkaba Lesa wa shiko,+ no mubomfi wandi Davidi akaba intungulushi mu kati ka shiko.+ Ine ne Yehova, ninsosa.

25 “‘“Kabili nkapangana na sho icipangano ca mutende,+ nkalenga ne nama mbi ukupwa mu calo,+ na sho shikekala umutende mu matololo no kulaala utulo mu mpanga.+ 26 Kabili nkalenga shena na pashinguluka akapili kandi ukuba ipaalo,+ nkalenga ne mfula ukuloka mu nshita ya iko. Ikaba ni mfula ya kuleeta ipaalo.+ 27 Umuti wa mu mpanga ukapeela ifisabo fya uko,+ no mushili ukafumya ubulimi bwa uko,+ kabili shikaba umutende mu mpanga ya shiko.+ Na sho shikeshiba ukuti nine Yehova ilyo nkafunaula ifimuti fye koli lya shiko+ no kushipokolola ku maboko ya bashitekele ubusha.+ 28 Inko tashakashisampe na kabili;+ ne nama ya mpanga iya mu calo tayakashilye, kabili shikekala mu mutende, ukwabula no wa kushitiinya.+

29 “‘“Kabili nkashilimbila ifilimwa fya lulumbi,+ tashakafwe na kabili ku nsala mu calo+ nangu kucula na kabili ku museebanya wa nko.+ 30 ‘E lyo bakeshiba ukuti ine, ne Yehova Lesa wabo, ndi na bo+ no kuti aba mu ng’anda ya kwa Israele, bantu bandi,’ e fyasosa Shikulu Mulopwe Yehova.”’+

31 “‘Na imwe mwe mpaanga shandi,+ mwe mukuni uo ndiisha umulemfwe, muli bantunse. Ine ndi Lesa wenu,’ e fyasosa Shikulu mulopwe Yehova.”

35 Kabili icebo ca kwa Yehova caishile kuli ine na kabili, aciti: 2 “We mwana wa muntu, losha icinso cobe+ ku calo ca mpili ica Seiri+ no kucisesemena.+ 3 Usose kuli cena auti, ‘Shikulu Mulopwe Yehova asosa ati: “Mona nakwalukila, we calo ca mpili ica Seiri,+ kabili nkatambalikila ukuboko kwandi pali iwe+ no kukucita icibolya, kabili umushaba akantu.+ 4 Imisumba yobe nkailenga ukuba ifibolya, na iwe ukaba fye icibolya;+ e lyo ukeshiba ukuti nine Yehova,+ 5 pantu wali umulwani lyonse+ kabili waleleka abana ba kwa Israele ukwipaiwa ku lupanga,+ mu nshita ya busanso bwabo,+ mu nshita ya kupwa kwa membu shabo.”’+

6 “‘E ico na pali ne mwine,’ e fyasosa Shikulu Mulopwe Yehova, ‘pantu nakupekanishishe ukusuuma umulopa, umulopa ukakukonka.+ Cine cine wapatile umulopa uo wasuumishe, kabili umulopa ukakukonka.+ 7 Kabili nkalenga icalo ca mpili ica Seiri ukuba icibolya kabili umushaba akantu,+ kabili nkepaya onse uupitamo no ubwela.+ 8 Nkesusha na baipaiwa mu mpili sha ciko; kumfwa utupili tobe ne mipokapoka ne mimana yobe yonse, abantu abaipaiwa ku lupanga e mo bakawila.+ 9 Nkakupomona umuyayaya, ne misumba yobe tayakekalwemo;+ e lyo mukeshiba ukuti nine Yehova.’+

10 “Pa mulandu wa kuti mwatile, ‘Ishi nko shibili ne fyalo ifi fibili—fikaba fyandi, kabili tukafikwata fyonse fibili,’+ nelyo Yehova e ko ali,+ 11 ‘e ico na pali ne mwine,’ e fyasosa Shikulu Mulopwe Yehova, ‘nkacita ukulingana no bukali bobe no kulinganana no kucincila kobe ukwa pa mulandu wa fyo wabapata;+ kabili nkalenga bakanjishibe ilyo nkakupingula.+ 12 E lyo mukeshiba ukuti ine, ne Yehova, ning’umfwa ifya musaalula fyonse ifyo walandile pa lwa mpili sha kwa Israele+ auti: “Tamwashala akantu. Nashipeelwa kuli ifwe ukuti tulye.”+ 13 Kabili mwaituumika pali ine ku tunwa twenu,+ no kulanda amashiwi ayengi pali ine.+ Ine ning’umfwa.’+

14 “Shikulu Mulopwe Yehova atila, ‘Ilyo pano isonde ponse pakala-anga, nkakulenga ukuba icibolya. 15 Filya fine kwali ukwanga pa calo ca ba mu ng’anda ya kwa Israele pantu baliconawile, e fyo nkakucita na iwe.+ Ukaba icibolya, we calo ca mpili ica Seiri, na Edomu onse, onse fye;+ e lyo bakeshiba ukuti nine Yehova.’”+

36 “Na iwe, we mwana wa muntu, sesemena impili sha kwa Israele, no kutila, ‘Mwe mpili sha kwa Israele,+ umfweni icebo ca kwa Yehova. 2 Shikulu Mulopwe Yehova atila: “Pa mulandu wa kuti umulwani asosa pali iwe+ ati, ‘Eya! Ne fifulo fya kupepelapo ifya kale na kale+ nomba fyesu!’”’+

3 “E ico sesema no kutila, ‘Shikulu Mulopwe Yehova asosa ati: “Pa mulandu wa kuti bakusha icibolya+ no kukutaakanya konse fye,+ pa kuti ube icuma ca bashalapo aba mu nko+ kabili bakulandapo fye pe ku bantu,+ kuli ne lyashi ilibi pa bantu,+ 4 e ico, mwe mpili sha kwa Israele,+ umfweni amashiwi ya kwa Shikulu Mulopwe Yehova! E fyo Shikulu Mulopwe Yehova asosele ku mpili na ku tupili, ku mimana na ku mipokapoka na ku ncende shaonaika umushaba akantu+ na ku misumba iyaba ifibolya iya kupokololamo ifipe no kusekwa ku bashalapo ba mu nko ishashinguluka;+ 5 e ico Shikulu Mulopwe Yehova atila, ‘Cine cine mu kucincila kwandi ukwaba ngo mulilo e mo nkasosela+ ku bashalapo aba mu nko na ku bena Edomu bonse,+ e kutila inko ishaipeela icalo candi ku kuba icabo shileanga na mu mitima ya shiko yonse,+ no kutumfya,+ pa mulandu wa mpanga ya ciko iya mulemfwe pa kuti bacipoke.’”’+

6 “E ico sesemena icalo ca Israele, usose na ku mpili no tupili, ku mimana na ku mipokapoka auti, ‘Shikulu Mulopwe Yehova asosa ati: “Moneni! Nasosa ku kucincila kwandi kabili ku bukali bwandi, pa mulandu wa kuti inko shalikuseebanya.”’+

7 “E ico Shikulu Mulopwe Yehova atila, ‘Ine naimya ukuboko kwandi no kulapa+ nati inko ishakushinguluka e shikaseebana.+ 8 Na imwe, mwe mpili sha kwa Israele, mukapuuka imisambo no kutwala ifisabo fya kulya abantu bandi abena Israele,+ pantu balaswa bese.+ 9 Pantu ndemwafwa, kabili ndi no kupilibukila kuli imwe,+ kabili mukalimwa no kubyalwamo imbuto.+ 10 Kabili nkafusha pali iwe abantunse, aba mu ng’anda ya kwa Israele bonse,+ ne misumba ikekalwamo,+ ne ncende shaonaulwa shikakuulwa cipya cipya.+ 11 Cine cine, nkafusha pali iwe abantunse ne nama,+ fikafula no kufyalana, nkalenga mukekalwemo nga fintu cali kale+ kabili nkacita ifisuma ifingi muli imwe ukucila ifyo nacitile kale;+ e lyo mukeshiba ukuti nine Yehova.+ 12 Awe nkalenga abantunse ukwenda pali imwe, e kutila abantu bandi abena Israele, na imwe mukaba abantu babo,+ kabili mukaba ubupyani bwabo,+ kabili tamwakabalenge ukufwilwa+ abana na kabili.’”

13 “Shikulu Mulopwe Yehova atila, ‘Pa mulandu wa kuti kuli abatila kuli imwe: “Ni mwe mulya abantu, kabili muli calo icilenga inko shenu ukufwilwa abana,”’+ 14 ‘e ico tamwakalye abantu na kabili,+ nangu kulenga inko shobe ukufwilwa abana,’+ e fyasosa Shikulu Mulopwe Yehova. 15 ‘Nshakaleke na kabili ukuti kukomfwike umuseebanya wa nko pali imwe,+ tamwakomfwe no musaalula wa bantu na bantu na kabili,+ kabili tamwakapunwishe ne nko shenu,’ e fyasosa Shikulu Mulopwe Yehova.”

16 Icebo ca kwa Yehova caishile kuli ine na kabili, aciti: 17 “We mwana wa muntu, aba mu ng’anda ya kwa Israele baleikala mu calo cabo, kabili balecikowesha ku mibele yabo ne micitile yabo.+ Imibele yabo yaba nga makowesha ya mwanakashi ilyo ali ku mweshi.+ 18 E ico napongolwele ubukali bwandi pali bena pa mulandu wa mulopa basumishe pa calo,+ icalo ico bakoweseshe ku tulubi twabo utwa bunani.+ 19 Kabili nabapashiile mu nko, na bo basalanganine mu fyalo.+ Nabapingwile ukulingana ne mibele yabo kabili ukulingana ne micitile yabo.+ 20 Awe balifikile ku nko isho baileko, kabili abantu batendeke ukuseebanya ishina lyandi ilya mushilo+ pantu abantu basosele pali bena ati, ‘Aba bantu ba kwa Yehova, kabili bafumina mu calo cakwe.’+ 21 Kabili nkomfwila ishina lyandi ilya mushilo uluse, ilyo aba mu ng’anda ya kwa Israele baseebanya mu nko isho bayamo.”+

22 “E ico sosa ku ba mu ng’anda ya kwa Israele auti, ‘Shikulu Mulopwe Yehova atila: “Te pa mulandu wa imwe ndecitila ici, mwe ba mu ng’anda ya kwa Israele, lelo ni pa mulandu we shina lyandi ilya mushilo, ilyo mwaseebanya mu nko isho mwayamo.”’+ 23 ‘Kabili nkalenga ishina lyandi ilikalamba ukuba ilya mushilo,+ ishina ilyo mwaseebanya mu nko; ne nko shikeshiba ukuti nine Yehova,’+ e fyasosa Shikulu Mulopwe Yehova, ‘ilyo nkailenga ukuba uwa mushilo muli imwe pa menso yabo.+ 24 Kabili nkabuula imwe ukufuma mu nko no kumulonganika ukufuma mu fyalo fyonse no kumutwala mu calo cenu.+ 25 Nkamusansa amenshi ya busaka, na imwe mukaba aba busaka;+ nkamulenga ukuba aba busaka ku kukowela kwenu konse+ na ku tulubi twa bunani tonse.+ 26 Kabili nkamupeela umutima upya,+ no kubika mu nda shenu umupashi upya,+ nkafumya umutima wa libwe mu mibili yenu no kumupeela umutima wanaka ngo munofu.+ 27 Kabili nkabika umupashi wandi mu nda shenu,+ no kucitapo fimo pa kuti mukale-enda mu fipope fyandi,+ kabili mukalakonka ubupingushi bwandi no kubucita.+ 28 Kabili mukekala mu calo ico napeele ifikolwe fyenu,+ kabili mukaba abantu bandi na ine nkaba Lesa wenu.’+

29 “‘Kabili nkapususha imwe ku kukowela kwenu konse+ kabili nkasosa ku ngano no kushifusha, kabili nshakamuletele icipowe.+ 30 Nkafusha ne fisabo fya miti, no busomboshi bwa mu mabala yenu, pa kuti mwikaseebana na kabili ku nko pa mulandu wa cipowe.+ 31 E lyo mukebukisha imibele yenu ibi ne micitile yenu iishali isuma,+ kabili mukomfwa ubunani mwe bene pa membu shenu na pa fya bunani ifyo mwacitile.+ 32 Ishibeni ukuti te pa mulandu wenu ndecitila ifi,’+ e fyasosa Shikulu Mulopwe Yehova. ‘Umfweni insoni no kuseebana pa mulandu wa mibele yenu, mwe ba mu ng’anda ya kwa Israele.’+

33 “Shikulu Mulopwe Yehova asosa ati, ‘Mu bushiku ubo nkamusangulula ku membu shenu shonse, nkalenga ne misumba ukwikalwamo,+ ne ncende ishaonaulwa shikakuulwa cipya cipya.+ 34 Ne calo icali icibolya bakalimamo, icali icaonaika ku menso ya mupitanshila onse.+ 35 Na bantu bakasosa abati: “Moneni icalo cilya icali icibolya caba nge bala lya Edene,+ ne misumba iyali ifibolya kabili iyaonaika kabili iyabongoloka yakuulwako amalinga; mwaikala na bantu.”+ 36 E lyo inko ishikashala ishamushinguluka shikeshiba ukuti ine ne Yehova, nine nkuulile ifyabongolweke,+ nalimba imiti umwali umwaonaika. Ine ne Yehova ninsosa, kabili nincita.’+

37 “Shikulu Mulopwe Yehova atila, ‘Ici e co nkaleka aba mu ng’anda ya kwa Israele ukunjipusha ukuti mbacitile:+ nkabafusha ngo mukuni.+ 38 Ngo mukuni wa bantu ba mushilo, ngo mukuni wa Yerusalemu mu nshita ya mitebeto yakwe,+ e fyo imisumba iyali ifibolya ikesulamo ibumba lya bantu;+ e lyo abantu bakeshiba ukuti nine Yehova.’”

37 Awe ukuboko kwa kwa Yehova kwali pali ine,+ kabili antwele mu mupashi wa kwa Yehova+ no kunteka mu mpanga iyabatama umwali amafupa ayengi nga nshi.+ 2 Kabili alimpishishemo anshingulushamo konse konse, kabili moneni! yali ayengi konse konse mu mpanga iyatabama, kabili yalyumine sana.+ 3 E lyo anjipwishe ati: “We mwana wa muntu, bushe aya amafupa kuti yaba no mweo?” Na ine natile: “Mwe Shikulu Mulopwe Yehova, ni mwe mwishibe.”+ 4 Na o anjebele ati: “Sesema pali aya mafupa, no kuyeba ati, ‘Mwe mafupa ayauma, umfweni icebo ca kwa Yehova:

5 “‘E fyo Shikulu Mulopwe Yehova asosa kuli aya mafupa ati: “Moneni, ndepuuta umupu muli imwe, na imwe mukaba no mweo.+ 6 Ndebika imishipa muli imwe no kumubikako umunofu, ndebika ne nkanda pali imwe no kupuuta umupu muli imwe pa kuti mube no mweo;+ e lyo mukeshiba ukuti nine Yehova.”’”+

7 Awe na ine naliseseme nge fyo anjebele.+ Kabili ilyo nalesesema kwaishile icongo, kabili kwali ukukolonkonta, na mafupa yatampile ukulundana, ifupa kwi fupa libiye. 8 Naliloleshe, kabili moneni! pa mafupa paishile imishipa no munofu walishilepo, ne nkanda yafimbile pa muulu. Lelo tamwali umupu.

9 E lyo akonkenyepo ukusosa kuli ine ati: “Sesema ku mwela. Sesema, we mwana wa muntu, no kweba umwela auti, ‘Shikulu Mulopwe Yehova atila: “We mwela, isa ukufuma ku kapinda ka ku kuso na ku kapinda ka ku kulyo, ukufuma ku kabanga na ku masamba, upuute na pali aba baipaiwa,+ pa kuti babe no mweo.”’”+

10 Na ine naliseseme ukulingana ne fyo anjebele, no mwela waingile muli bena, na bo bali no mweo no kwiminina ku makasa yabo,+ bali nge bumba lya bashilika ilikulu nga nshi.

11 E lyo atile kuli ine: “We mwana wa muntu, aya mafupa e ba mu ng’anda ya kwa Israele bonse.+ Mona baleti, ‘Amafupa yesu yalyuma, isubilo lyesu lyaliloba.+ Ifwe twaliputulwako.’ 12 E ico sesema, no kutila kuli bena, ‘Shikulu Mulopwe Yehova atila: “Moneni ndeisula inshiishi shenu,+ kabili nkamufumya mu nshiishi shenu, mwe bantu bandi, no kumutwala mu calo ca Israele.+ 13 Kabili mukeshiba ukuti nine Yehova ilyo nkesula inshiishi shenu, no kumufumya mu nshiishi shenu, mwe bantu bandi.”’+ 14 ‘Nkabika no mupashi wandi muli imwe, na imwe mukaba no mweo,+ kabili nkamubika mu calo cenu; e lyo mukeshiba ukuti ine, ne Yehova, ninsosa, kabili nincita,’ e fyo Yehova asosa.”+

15 Icebo ca kwa Yehova caishile kuli ine na kabili, aciti: 16 “Na iwe, we mwana wa muntu, buula umusambo+ no kulembapo ati, ‘Kuli Yuda na ku bana ba kwa Israele abanankwe.’+ Ubuule umusambo na umbi no kulembapo ati, ‘Kuli Yosefe, umusambo wa kwa Efraimu,+ na ba mu ng’anda ya kwa Israele bonse abanankwe.’+ 17 Uibike pamo pa kuti ibe umusambo umo, na yo yalaba umusambo umo mu minwe yobe.+ 18 Kabili ilyo abana ba bantu bobe batila kuli iwe, ‘Bushe tawatwebe umo walosha pa kucita ifi?’+ 19 usose kuli bena auti, ‘Shikulu Mulopwe Yehova atila: “Moneni, nkabuula umusambo wa kwa Yosefe, uwaba mu minwe ya kwa Efraimu, na mu mikowa ibiye iya kwa Israele, e lyo nkaibika pa musambo wa kwa Yuda, na ine nkalenga ikabe umusambo umo,+ na yo ikaba umusambo umo mu minwe yandi.”’ 20 Imisambo iyo ukalembapo ikabe mu minwe yobe pa menso yabo.+

21 “E lyo ukabebe auti, ‘Shikulu Mulopwe Yehova atila: “Moneni, nkabuula abana ba kwa Israele mu nko isho bayamo, nkabalonganya monse monse no kubaleta mu calo cabo.+ 22 Kabili nkabalenga ukuba uluko lumo mu calo,+ pa mpili sha mu Israele, kabili imfumu fye imo e ikaba imfumu pali bonse,+ tabakabe inko shibili na kabili, nangu kwakanikana mu mabufumu yabili.+ 23 Tabakaikoweshe na kabili ku tulubi twabo utwa bunani na ku fya bunani fyabo na ku membu shabo;+ kabili nkabapususha mu mekalo yabo yonse umo babembukila, kabili nkabasangulula,+ e lyo bakaba abantu bandi, na ine nkaba Lesa wabo.+

24 “‘“Umubomfi wandi Davidi e ukaba imfumu yabo,+ kabili bonse bakaba no mucemi umo;+ kabili bakenda mu bupingushi bwandi,+ bakakonka ne fipope fyandi+ no kuficita.+ 25 Bakekala mu calo ico napeele umubomfi wandi, Yakobo, icalo umwaikele ifikolwe fyenu,+ kabili bakekalamo,+ bena na bana babo na bana ba bana babo umuyayaya,+ kabili Davidi umubomfi wandi akaba intungulushi yabo umuyayaya.+

26 “‘“Nkapangana na bo icipangano ca mutende;+ cikaba cipangano ca muyayaya ico nkapangana na bo.+ Nkabapeela icalo cabo no kubafusha+ kabili nkabika no mwa mushilo mwandi pa kati kabo umuyayaya.+ 27 Ne cikuulwa candi ica mushilo cikaba pali bena,+ na ine nkaba Lesa wabo, na bo bakaba abantu bandi.+ 28 E po inko shikeshibila ukuti ine, ne Yehova,+ ndelenga Israele ukuba uwa mushilo ilyo umwa mushilo mwandi mukaba pa kati kabo umuyayaya.”’”+

38 Kabili icebo ca kwa Yehova cakonkenyepo ukwisa kuli ine aciti: 2 “We mwana wa muntu,+ losha icinso cobe kuli Goge wa mu calo ca Magoge,+ intungulushi ya pali Mesheke+ na Tubali,+ no kumusesemena. 3 Usose auti, ‘Shikulu Mulopwe Yehova asosa ati: “Mona nakwalukila, we Goge, we ntungulushi ya pali Mesheke na Tubali. 4 Nkakwalulula no kukubika ifinkobwe mu nsekete shobe+ kabili nkakuleta pamo na bashilika bobe bonse,+ bakabalwe na bendela pali bakabalwe, bonse abafwala ubusaka sana,+ ibumba ilikalamba, ne nkwela ishikalamba ne shinono, bonse ababomfya bapanga;+ 5 pamo na Persia,+ Etiopia+ na Puti,+ bonse ne nkwela inono ne ca kucinga umutwe; 6 Gomere+ na mabumba yakwe yonse, aba mu ng’anda ya kwa Togarma,+ aba ku kapinda ka ku kuso ukutali sana, na mabumba yakwe yonse, abantu na bantu abengi abo uli na bo.+

7 “‘“Iteyanye, kabili ipekanye, iwe ne bumba lyobe lyonse,+ abalongana pamo nobe, na iwe ube uwa kubasunga.

8 “‘“Nkakubalamuna ilyo papita inshiku ishingi. Ku myaka ya kulekelesha ukaya ku calo+ ca bantu babweshiwa ku lupanga, abalonganikwa ukufuma ku bantu na bantu abengi,+ pa mpili sha kwa Israele, ishaba icibolya umuyayaya; icalo icapangwa na bantu abo bafumya mu bantu bambi, umo bonse baikala umutende.+ 9 Kabili ukanina. Ukesa nge cimwela icikalamba.+ Ukaba nga makumbi ya kukupa icalo,+ iwe na mabumba yobe yonse ne nko sha bantu ishingi ishaba pamo na iwe.”’

10 “Shikulu Mulopwe Yehova atila, ‘Muli ubo bushiku mukesa ifintu mu mutima obe,+ kabili ukaba na mapange ayabipa;+ 11 e lyo ukatila: “Nalayasansa icalo ca mishi iishacingililwa.+ Nalaingilila abaikala icibote, abaikala umutende, bonse fye abaikala ukushaba amalinga,+ kabili abashakwata imipindo nangu fiibi.” 12 Ukaba na mapange ya kupokolola ifintu ifingi+ no kusampa ifingi, pa kuti usanse ifibolya ifyaikalwamo cipya cipya+ na bantu abalonganikwa pamo ukufuma mu nko,+ abalonganika ifyuma ne fipe,+ abaikala pa kati na nkati+ ke sonde.

13 “‘Sheba+ na Dedani+ na ba makwebo ba ku Tarshishi+ ne misepela yabo iya nkalamo+ bakatila kuli iwe: “Bushe ni ku kupokolola ifipe ifingi waishila? Bushe ni ku kusampa ifipe ifingi e co walonganikila ibumba lyobe, pa kuti usende silfere na golde, usende ne fyuma ne fipe, upokolole ne fintu ifingi nga nshi?”’

14 “E ico sesema, we mwana wa muntu, no kutila kuli Goge, ‘Shikulu Mulopwe Yehova atila: “Bushe te muli ubo bushiku ilyo abantu bandi abena Israele bakekala mu cibote e lyo ukeshiba?+ 15 Ukesa ukufuma ku cifulo cobe, ukufuma ku kapinda ka ku kuso ukutali sana,+ iwe pamo ne nko ishingi, bonse abendela pali bakabalwe, ibumba ilikalamba, kabili ibumba lya bashilika ilikalamba.+ 16 Ukaninina abantu bandi abena Israele, nge kumbi ilyakupa icalo.+ Ici cikacitika ku nshiku sha ku mpela, kabili nkakuleta ku kulwisha icalo+ candi, pa kuti inko shikanjishibe ilyo nkailenga ukuba uwa mushilo muli iwe pa menso ya shiko, we Goge.”’+

17 “Shikulu Mulopwe Yehova asosa ati, ‘Bushe te iwe+ nalandilepo mu nshiku sha kale ukupitila mu babomfi bandi bakasesema ba mu Israele, abaseseme mu nshiku shilya—pa myaka iingi—ukuti nkakuleta pali bena?’+

18 “‘Nomba mu bushiku ubo Goge akesa pa calo ca kwa Israele,’ Shikulu Mulopwe Yehova atila, ‘e lyo ubukali bwandi bukema kabili nkakalipa nga nshi.+ 19 E lyo mu kucincila kwandi,+ mu bukali bwandi ubupya ngo mulilo, e mo nkalandila.+ Cine cine muli ubo bushiku mukaba ukutenta kukalamba mu mpanga ya kwa Israele.+ 20 Kabili pa mulandu wandi fikatutuma, isabi lya muli bemba ne fyuni fya mu muulu ne nama sha mpanga na fyonse ifikulika pa nshi pamo na bantunse bonse abali pe sonde,+ ne mpili shikawa ne fimabwe fyasuluka fikawa,+ ne linga lyonse likawa pa nshi.’

21 “‘Nketa ulupanga mu mpili shandi shonse ukuti lwise pali ena,’ e fyasosa Shikulu Mulopwe Yehova.+ ‘Cila muntu akasansa munyina.+ 22 E lyo nkamupingula,+ ku cikuko+ na ku mulopa;+ nkalenga imfula ya maka ne mfula ya mabwe,+ umulilo+ ne libwe lya mingu ukumulokela no kulokela pa mabumba yakwe na pa nko ishikaba nankwe.+ 23 Kabili nkaikusha no kuilenga ukuba uwa mushilo+ no kuilenga ukwishibikwa pa menso ya nko ishingi; e lyo shikeshiba ukuti nine Yehova.’+

39 “Kabili iwe, we mwana wa muntu, sesemena Goge,+ no kusosa auti, ‘Shikulu Mulopwe Yehova atila: “Mona, nakwalukila, we Goge, we ntungulushi ya Mesheke+ na Tubali.+ 2 Nkakwalulula no kukutungulula+ no kukuninika ukufuma ku kapinda ka ku kuso+ ukutali sana no kukuleta pa mpili sha kwa Israele. 3 E lyo nkoma ubuta bobe ukufuma mu kuboko kobe ukwa ku kuso, nkaponya ne mifwi ukufuma mu kuboko kobe ukwa ku kulyo. 4 Pa mpili sha kwa Israele e po ukawila,+ iwe na mabumba yobe na bantu abakaba na iwe. Nkakupeela ku fyuni ifiswango ukuti fikakulye, ifyuni fya misango yonse iya mapindo, na ku finama fya mpanga.”’+

5 “‘Mu mpanga e mo ukafwila,+ pantu ine ninsosa,’ e fyasosa Shikulu Mulopwe Yehova.

6 “‘Nkatuma umulilo pa calo ca Magoge+ na pa baikala umutelelwe pa fishi;+ e lyo abantu bakeshiba ukuti nine Yehova. 7 Nkalenga ne shina lyandi ilya mushilo ukwishibikwa mu bantu bandi, abena Israele, nshakaleke bakaseebanye ishina lyandi ilya mushilo na kabili;+ ne nko shikeshiba ukuti nine Yehova,+ Uwa Mushilo wa mu Israele.’+

8 “‘Moneni! Cileisa kabili cikacitika,’+ e fyasosa Shikulu Mulopwe Yehova. ‘Ubu e bushiku nalelandapo.+ 9 Kabili abekashi ba mu misumba ya mu Israele bakafuma, bakoca mu mulilo ifyanso ne nkwela shinono ne nkwela shikalamba, amata ne mifwi ne nkonto na mafumo; e fyo bakakoseshako umulilo+ pa myaka cinelubali (7). 10 Tabakatebe inkuni mu mpanga, nangu kutema inkuni mu mitengo, pantu ku fyanso e ko bakakosesha umulilo.’

“‘Kabili bakapokolola ifipe fya balebapokolola,+ no kusampa ifipe fya balesampa ifipe fyabo,’ e fyasosa Shikulu Mulopwe Yehova.

11 “‘Nomba muli ubo bushiku e mo nkapeela Goge+ incende, apa kushiikwa mu Israele, mu mupokapoka wa bapitanshila ku kabanga ka bemba, kabili ukacilikila abapitanshila. Kulya e ko bakashiika Goge ne bumba lyakwe, kabili ukenikwa Umupokapoka we Bumba lya kwa Goge.+ 12 Kabili aba mu ng’anda ya kwa Israele bakalabashiika pa myeshi cinelubali (7) pa kuti bawamye icalo.+ 13 Abantu bonse aba mu calo e bakabashiika, kabili ici e cikalenga ukuti balumbuke mu bushiku nkaicindamika,’+ e fyasosa Shikulu Mulopwe Yehova.

14 “‘Kukaba abantu ba kubomba umulimo abo bakapaatulula, bakalapita mu calo pamo na bambi, no kushiika abashala pa mbilibili pa mushili pa kuti bawamye icalo. Bakafwayafwaya ukufika ku mpela ya myeshi cinelubali (7). 15 Kabili aba kupita mu calo bakapita, ilyo umo amona ifupa lya muntu, afwile ukwimikapo icishibilo mupepi, mpaka aba kushiika bakashiike mu Mupokapoka we Bumba lya kwa Goge.+ 16 Ne shina lya musumba likaba Hamona. E fyo bakasangulula icalo.’+

17 “Nomba kuli iwe, we mwana wa muntu, Shikulu Mulopwe Yehova atila, ‘Sosa ku fyuni fya musango onse na ku nama sha mpanga shonse+ auti: “Longaneni no kwisa. Longaneni pamo konse konse mwise kwi lambo lyandi, ilyo ndemwipaila, ilambo ilikalamba pa mpili sha kwa Israele.+ Kabili mukalya umunofu no kunwa umulopa.+ 18 Mukalya umunofu wa mpalume,+ no kunwa umulopa wa ntungulushi sha pe sonde. Bonse baba nga basukusuku, abana ba mpaanga abalume,+ na basawe, abana ba ng’ombe abalume,+ utunama twaina utwa ku Bashani.+ 19 Kabili mukalya ifyanona no kwikuta+ no kunwa umulopa mukasuke mukakolwe, kwi lambo lyandi ilyo ndemwipaila.”’

20 “‘Awe mukekuta pe tebulo lyandi ilyo mukalya bakabalwe na baninapo, impalume na ba bulwi ba misango yonse,’ e fyasosa Shikulu Mulopwe Yehova.+

21 “‘Nkabika no bukata bwandi pa nko; ne nko shonse shikamona ne fyo nkapingula+ e lyo na maka ya kuboko kwandi uko nabika pali shena.+ 22 Kabili aba mu ng’anda ya kwa Israele bakeshiba ukuti nine Yehova Lesa wabo ukufuma pali bulya bushiku ukuya na ku ntanshi.+ 23 Ne nko shikeshiba ukuti ni pa mulandu wa membu shabo aba mu ng’anda ya kwa Israele bailile muli bunkole,+ pa mulandu wa kuti balimfutwike ica kuti nalifishile icinso candi kuli bena+ no kubapeela mu minwe ya balwani babo, e lyo bonse balafwa ku lupanga.+ 24 Nabacitile ukulingana no kukowela kwabo kabili ukulingana ne membu shabo,+ nalefisa icinso candi kuli bena.’

25 “E ico, Shikulu Mulopwe Yehova, atila, ‘Nomba e lyo nkabwesha bankole ba kwa Yakobo+ no kubelela uluse aba mu ng’anda ya kwa Israele bonse;+ nkomfwa ubufuba pe shina lyandi ilya mushilo.+ 26 Bakaba nabaseebana+ kale no kukandwa pa kukanaba ne cishinka kuli ine,+ ilyo bakekala umutelelwe+ mu mpanga yabo, ukwabula no wa kubatiinya.+ 27 Ilyo nkababwesha ukufuma mu nko no kubalonganya ukubafumya mu fyalo fya balwani babo,+ e lyo nkailenga ukuba uwa mushilo pa menso ya nko ishingi.’+

28 “‘E lyo bakeshiba ukuti nine Yehova Lesa wabo, ilyo nkabaleka bakaye muli bunkole mu nko no kubalonganya pa mpanga yabo,+ ica kuti nshakasheko nangu umo mu nko.+ 29 Nshakafise na kabili icinso candi kuli bena,+ pantu nkapongolwela umupashi wandi pa ba mu ng’anda ya kwa Israele,’+ e fyasosa Shikulu Mulopwe Yehova.”

40 Mu mwaka walenga amakumi yabili na isano (25) muli bunkole bwesu,+ pa bushiku bwalenga ikumi (10) muli uyo mweshi, mu mwaka walenga ikumi na ine (14) pa numa ya konaulwa kwa musumba,+ mu bushiku ubu bwine e mo ukuboko kwa kwa Yehova kwaishile pali ine,+ kabili antwele ku cifulo cimbi.+ 2 Mu fimonwa fya kwa Lesa antwele ku calo ca Israele kabili asukile anteeka pa lupili ulwalepesha+ apali icikuulwa icapala umusumba ku kapinda ka ku kulyo.+

3 Awe antwele kulya, kabili moneni! kwali umuntu. Alemoneka ngo mukuba,+ na mu minwe yakwe mwali intambo ya nsalu, ne tete lya kupiminako,+ kabili aiminine pa mpongolo. 4 No yo muntu atampile ukusosa kuli ine ati: “We mwana wa muntu,+ mona ku menso yobe, umfwa na ku matwi yobe, kabili bika umutima obe pali fyonse ifyo ndekulanga, pantu ico waletelwa kuno ni pa kuti nkulange. Webe aba mu ng’anda ya kwa Israele fyonse ifyo ulemona.”+

5 Kabili moneni! kwali ilinga ukushinguluka ing’anda yonse. Na mu minwe ya uyo muntu mwali itete lya kupiminako ilyalepele imikono mutanda (6), cila mukono walingene no mukono umo ukubikapo no lupi mu bwipi. Awe atampile ukupima icibumba mu bwipi, kabili calepele itete limo; no kufuma pa nshi ukuya pa muulu cali itete limo.

6 E lyo aishile ku mpongolo, iyalosha ku kabanga,+ aninine pa matabo ya iko. Atampile ukupima umwinshi wa mpongolo.+ Umo walepele itete limo mu bwipi, na umbi wali itete limo mu bwipi. 7 Umuputule wa balinshi wali itete limo mu butali ne tete limo mu bwipi, na pa kati ka miputule ya balinshi+ pali imikono isano; no mwinshi wa mpongolo lubali ku cikuulwa ca kwingililapo ica pa mpongolo uwalolele mu kati wali itete limo.

8 Awe apimine icikuulwa ca kwingililapo ica pa mpongolo icalolele mu kati, kabili calepele itete limo.+ 9 Awe apimine icikuulwa ca kwingililapo ica pa mpongolo, cali imikono cinekonsekonse (8); ne nceshi sha ciko isha mu mbali, shali imikono ibili; ne cikuulwa ca kwingililapo calolele mu kati.

10 Ne miputule ya balinshi iya ku mpongolo yalosha ku kabanga yali itatu ulubali lumo na itatu ulubali lumbi. Yonse itatu yalilingene, ne nceshi sha mu mbali shalilingene, uku no ku.

11 E lyo apimine pa mwinshi wa pa mpongolo mu bwipi, wali imikono ikumi (10); ubutali bwa mpongolo bwali imikono ikumi na itatu (13).

12 Ne ncende iyo bacingilila iya pa ntanshi ya miputule ya balinshi yali umukono umo, kabili kwali incende iyo bacingilila iyali umukono umo ku mbali shonse shibili. No muputule wa balinshi wali imikono mutanda (6) ku lubali ulu ne mikono mutanda ku lubali lulya.

13 E lyo apimine impongolo ukufuma ku mutenge wa muputule wa balinshi umo ukufika na ku mutenge wa muputule wa balinshi uubiye. Yali imikono amakumi yabili na isano (25) mu bwipi;+ iminshi ya ku miputule ya balinshi yaliloshenye. 14 E lyo apimine ne nceshi sha ku mbali ishali imikono amakumi mutanda (60), inceshi sha ku mbali ishalosha mu lubansa isha ku mpongolo shonse. 15 Ukufuma pa ntanshi ya mpongolo ya kwingililapo ukufika pa ntanshi ya muputule wa kwingililapo uwa mu mpongolo ya mu kati pali imikono amakumi yasano (50).

16 Kabili ku miputule ya balinshi na ku nceshi sha ku mbali kwali amawindo+ ayakulila mu kati, mu mpongolo konse konse, e fyo cali na ku miputule ya kwingililapo. Aya mawindo yali konse konse ukulola mu kati, na ku nceshi sha ku mbali balilengeleko utuncindu.+

17 E lyo antwele mu lubansa lwa pa nse, kabili moneni! mwali imiputule ya kuliilamo,+ kabili pa lubansa palambatikwe amabwe konse konse. Apalambatikwe amabwe pali imiputule ya kuliilamo amakumi yatatu (30).+ 18 Kabili apalambatikwe amabwe ku mbali ya mpongolo mu butali palingene fye no muputule wa pa mpongolo—apalambatikwa amabwe apa mwi samba.

19 E lyo apimine mu bwipi bwa lubansa ukutula pa ntanshi ya mpongolo ya mwi samba ukufika pa ntanshi ya lubansa lwa mu kati. Pali imikono umwanda umo (100) ku kabanga na ku kapinda ka ku kuso.

20 Kabili ulubansa lwa ku nse lwali ne mpongolo iyaloseshe ku kapinda ka ku kuso. Apimine ubutali bwa iko no bwipi bwa iko. 21 Ne miputule ya iko iya balinshi yali itatu ulubali lumo na itatu ulubali lumbi. Kabili inceshi sha iko isha ku mbali shalilingene ne nceshi sha mpongolo ya ntanshi. Yali imikono amakumi yasano (50) mu butali, na mu bwipi yali imikono amakumi yabili na isano (25). 22 Na mawindo ya iko no muputule wa iko uwa kwingililapo no tuncindu twalengwapo+ fyali ifyalingana ne fyali pa mpongolo iyalosha ku kabanga. Kabili pali amatabo cinelubali (7) apo abantu baleninina, no muputule wa kwingililapo walungatene na matabo.

23 Ne mpongolo ya mu lubansa lwa mu kati iya ku kapinda ka ku kuso yalungatene ne mpongolo ya ku kapinda ka ku kuso ne ya ku kabanga yalungatene ne ya ku kabanga. Ilyo apimine ukutula pa mpongolo imo ukufika ku mpongolo iyalungatene na yo, asangile ukuti pali imikono umwanda umo (100).

24 Awe asukile antwala ku kapinda ka ku kulyo, kabili moneni! kwali impongolo iyalosha ku kapinda ka ku kulyo,+ kabili apimine inceshi sha iko isha mu mbali no muputule wa kwingililapo kabili fyalingene na shilya impongolo shimbi. 25 Yali na mawindo no muputule wa kwingililapo na o wine wali na mawindo konse konse, ayapalene na ya mawindo. Wali imikono amakumi yasano (50) mu butali, na mu bwipi wali imikono amakumi yabili na isano. 26 Kwali na matabo cinelubali (7) apo abantu baleninina pa kuya kuli iyi mpongolo,+ no muputule wa kwingililapo wali pa ntanshi ya matabo. Pa nceshi sha mu mbali palengelwe no tuncindu, kamo ku lubali ulu na kambi ku lubali lulya.

27 Na mu lubansa lwa mu kati mwali impongolo yalola ku kapinda ka ku kulyo. Kabili apimine ukutula pa mpongolo ukufika ku mpongolo yalola ku kapinda ka ku kulyo imikono umwanda umo (100). 28 Asukile antwala mu lubansa lwa mu kati ukwingilila ku mpongolo ya ku kapinda ka ku kulyo. Awe apimine impongolo ya ku kapinda ka ku kulyo, yalingene fye na shilya shimbi. 29 Ne miputule ya balinshi ne nceshi sha iko isha mu mbali no muputule wa kwingililapo fyalingene na filya fimbi. Kabili yena no muputule wa iko uwa kwingililapo fyali na mawindo ukushinguluka fye konse. Wali imikono amakumi yasano (50) mu butali, na mu bwipi wali imikono amakumi yabili na isano (25).+ 30 Kwali ne miputule ya kwingililapo ukushinguluka fye konse; mu butali yali imikono amakumi yabili na isano (25), na mu bwipi yali imikono isano. 31 Kabili umuputule wa iko uwa kwingililapo wali lwa ku lubansa lwa ku nse, kwali no tuncindu twalengwa ku nceshi sha mu mbali,+ kwali na matabo ya kunininako cinekonsekonse (8).+

32 Asukile antwala mu lubansa lwa mu kati ukupita ku kabanga, no kupima impongolo, na yo yalingene fye na shilya impongolo shimbi. 33 Ne miputule ya balinshi ne nceshi sha mu mbali no muputule wa kwingililapo fyalingene na filya fimbi, kabili yena no muputule wa iko uwa kwingililapo fyali na mawindo konse konse. Wali imikono amakumi yasano (50) mu butali na mu bwipi wali imikono amakumi yabili na isano (25). 34 No muputule wa iko uwa kwingililapo wali lwa ku lubansa lwa ku nse, na pa nceshi sha ku mbali palengelwe utuncindu ulubali luno no lubali lulya. Kwali na matabo ya kunininako cinekonsekonse (8).

35 E lyo antwele ku mpongolo ya ku kapinda ka ku kuso+ no kuipima, na yo yalingene na shilya mpongolo shimbi,+ 36 imiputule ya iko iya balinshi, inceshi sha iko isha mu mbali no muputule wa iko uwa kwingililapo. Kabili yalikwete amawindo ukushinguluka konse konse. Wali imikono amakumi yasano (50) mu butali, na mu bwipi wali imikono amakumi yabili na isano (25). 37 Kabili ku lubansa lwa ku nse e kwabelele inceshi sha uko isha mu mbali, kabili pa nceshi sha mu mbali palengelwe utuncindu uku no ku.+ Pali na matabo ya kunininako cinekonsekonse (8).

38 No muputule wa kuliilamo no mwinshi wa uko wali mupepi ne nceshi sha mpongolo. E mo balesamfisha umutuulo wa koca.+

39 Kabili mu cikuulwa ca kwingililapo ica ku mpongolo mwali amatebulo yabili uku lubali na yabili kulya lubali, aya kwipailapo umutuulo wa koca+ no mutuulo wa pa lubembu+ no mutuulo wa pa mulandu.+ 40 Kabili lwa ku nse, apaninina abantu ilyo baleya ku mwinshi wa ku mpongolo ya ku kapinda ka ku kuso, pali amatebulo yabili. Na ku lubali lumbi ulwa cikuulwa ca kwingililapo ica pa mpongolo kwali amatebulo yabili. 41 Ku mbali ya mpongolo kwali amatebulo yane kuno lubali na matebulo yane kulya lubali—yonse pamo amatebulo yali cinekonsekonse (8), apo baleipaila ifya kutuula. 42 Amatebulo yonse yane aya mituulo yali ya mabwe ayaputulwa bwino. Yali umukono umo na hafu mu butali, na mu bwipi yali umukono umo na hafu, kabili yalepele umukono umo. Apo pene e po balebika ne fya kwipailako imituulo ne lambo. 43 Kwali no tumashelufu twa kubikamo ifintu utwali ngo lupi mu bwipi, uto bapoopeele mu kati konse konse; kabili pa matebulo e po balebika inama ya mutuulo.+

44 Na ku nse ya mpongolo ya mu kati kwali imiputule ya kuliilamo bakemba,+ mu lubansa lwa mu kati, iyabelele ku mbali ya mpongolo ya ku kapinda ka ku kuso. Yaloseshe ku kapinda ka ku kulyo. Kwali na umbi uwabelele ku mpongolo ya ku kabanga. Waloseshe ku kapinda ka ku kuso.

45 E lyo anjebele ati: “Uyu, umuputule wa kuliilamo uwalosha ku kapinda ka ku kulyo, wa bashimapepo abalebomba pa ng’anda.+ 46 No muputule wa kuliilamo uwalosha ku kapinda ka ku kuso wa bashimapepo abalebomba pa ciipailo.+ Ni bamwana Sadoke,+ aba mu bana baume ba kwa Lebi, abapalama kuli Yehova ku kumubombela.”+

47 E lyo apimine no lubansa lwa mu kati. Lwali imikono umwanda umo (100) mu butali, na mu bwipi lwali imikono umwanda umo, ulwa mbali shine ishalingana. Ne ciipailo cali pa ntanshi ya ng’anda.

48 E lyo antwele ku muputule wa kwingililapo uwa ku ng’anda,+ apimine no luceshi lwa ku mbali ya muputule wa kwingililapo, lwali mikono isano ulubali lumo ne mikono isano ulubali lumbi. Ne mpongolo mu bwipi yali imikono itatu ulubali luno ne mikono itatu ulubali lulya.

49 Umuputule wa kwingililapo wali imikono amakumi yabili (20) mu butali, na mu bwipi wali imikono ikumi na umo (11). Pali na matabo ya kunininapo. Mupepi ne nceshi pali inceshi shimbi, uku lumo no ku lumo.+

41 E lyo antwele mwi tempele, apimine ne nceshi sha mu mbali, shali imikono mutanda (6) mu bwipi lubali lumo ne mikono mutanda lubali lumbi. 2 Kabili umwinshi wali imikono ikumi (10) mu bwipi, ne fibumba fyali ku mbali ya mwinshi fyali imikono isano ku lubali lumo ne mikono isano ku lubali lumbi. Apimine ubutali bwa liko, lyali imikono amakumi yane (40); na mu bwipi lyali imikono amakumi yabili (20).

3 Aingile na mu kati no kupima uluceshi lwa ku mbali ya mwinshi, lwali imikono ibili; no mwinshi, wali imikono mutanda (6); kabili mu bwipi umwinshi wali imikono cinelubali (7). 4 Awe apimine no muputule wa mu kati, walepele imikono amakumi yabili (20); na mu bwipi,+ wali amakumi yabili, ku ntanshi ye tempele. E lyo anjebele ati: “Umu e mwa Mushilo Nga Nshi.”+

5 E lyo apimine icibumba ca ng’anda, catikeme imikono mutanda (6). Ne miputule ya mu mbali yali imikono ine (4) mu bwipi, ukushinguluka konse konse; yashingulwike ing’anda yonse fye.+ 6 Ne miputule ya mu mbali yali umuputule pa muulu wa muputule, intunti shitatu, kabili intunti imo na imo yakwete imiputule amakumi yatatu (30); kabili shafikile mu cibumba ca ng’anda, e kutila imiputule ukushinguluka konse konse, pa kuti shikate bwino bwino, lelo tayasuntinkene ne cibumba ca ng’anda.+ 7 Kumfwa imiputule ya mu mbali, iya kubalilapo yalicepelepo pa ya pa ntunti ya bubili, ne ya pa ntunti ya butatu yalikulile ukucila iya pa ntunti ya bubili, kabili kwali na matabo ku ng’anda ayaile yaleshinguluka ukuya ku miputule ya pa muulu.+ Kanshi ing’anda yakuliile ku muulu, kabili umo kuti anina ukufuma pa nshi ukuya pa ntunti ya butatu,+ ukupita pa ntunti ya bubili.

8 Namwene no kuti ing’anda yakuulilwe pa cibumbili icasansuka. Kumfwa imifula iyakuulilwepo imiputule ya ku mbali, ukufuma pa mifula ukufika apo icikuulwa calundanine kuli iyi mifula, palepele itete limo ilituntulu ilya mikono mutanda (6).+ 9 Ubwipi bwa cibumba ca muputule wa ku mbali, ukulola ku nse, bwali imikono isano. Kabili kwali incende iyashele apashali akantu ilyo bakuulile imiputule ya ku mbali iya ng’anda.

10 Incende iyali pa kati ka miputule ya kuliilamo+ ne ng’anda, yali imikono amakumi yabili (20) mu bwipi ukushinguluka konse konse. 11 No mwinshi wa ku miputule ya ku mbali wabelele ku ncende yashele apashali akantu, umwinshi umo waloseshe ku kapinda ka ku kuso na umbi waloseshe ku kapinda ka ku kulyo; ne ncende iyashele apashali kantu yali imikono isano mu bwipi, ukushinguluka konse konse.

12 Ne cikuulwa icali ku masamba, icalungatene ne ncende iyapaatulwa, cali imikono amakumi cinelubali (70) mu bwipi. Ne cibumba ca ico cikuulwa catikeme imikono isano kabili cashingulwike konse konse; ne ci cikuulwa cali imikono amakumi pabula (90) mu butali.

13 Apimine ne ng’anda, kabili yali imikono umwanda umo (100) mu butali; ne ncende yapaatulwa ne cikuulwa ne fibumba fya ciko, fyalepele imikono umwanda umo. 14 Ubwipi bwa ng’anda pa ntanshi ukulundapo ne ncende yapaatulwa lwa ku kabanga, fyali imikono umwanda umo (100).

15 Apimine no butali bwa cikuulwa pa ntanshi ya ncende yapaatulwa iyali ku numa ya ciko no lukungu lwa ciko lubali uku na lubali kulya, bwali imikono umwanda umo (100).

Apimine ne tempele no muputule wa mu kati+ ne cikuulwa ca kwingililapo icaloseshe mu lubansa; 16 fyonse fitatu fyali ne minshi, na mawindo ayakulila mu kati,+ no lukungu. Ku fibumba fya pa ntanshi ya mwinshi na ku fibumba fyonse, ukufuma pa nshi ukufika pa mawindo, bakupileko imbao konse konse;+ na pa mawindo pali ifya kufimbapo. 17 Fyonse, e kutila pa muulu wa mwinshi na mu kati ka ng’anda na ku nse ne cibumba conse ukushinguluka konse konse, fyalipiminwe, 18 kwali na bakerubi babaswa+ no tuncindu utwalengelwe,+ na kancindu kamo pa kati ka bakerubi babili, kabili kerubi umo umo ali ne finso fibili.+ 19 Icinso ca muntu caloseshe ku kancindu lubali uku, ne cinso ca musepela wa nkalamo caloseshe ku kancindu lubali kulya,+ kabili fyalengelwe mu ng’anda yonse ukushinguluka konse konse. 20 Ukufuma pa nshi ukufika pa muulu wa mwinshi, pa cibumba ce tempele palengelwe bakerubi no tuncindu.

21 Ne nceshi sha pa mwinshi we tempele shali ne mbali shine ishalingana;+ na pa ntanshi ya ncende ya mushilo pali icalemoneka ifi:22 iciipailo ca cimuti icalepele imikono itatu, na mu butali cali imikono ibili, calikwete na makoona.+ Mu mbali ukulola mu butali cali ca mbao. E lyo anjebele ati: “Ili e tebulo lya ku cinso ca kwa Yehova.”+

23 Kwi tempele kwali ifiibi fibili na ku ncende ya mushilo na ko kwali ifiibi fibili.+ 24 Kabili iciibi cimo na cimo cali ne fipandwa fibili, ifipandwa fibili ifya kupeta. Iciibi cimo cali ne fipandwa fibili, ne cibiye na co cali ne fipandwa fibili. 25 Kabili pa fiibi fye tempele, palengelwe bakerubi no tuncindu,+ nge fyalengelwe pa fibumba, kabili pali na kamutenge ka fimuti fyatikama pa muulu wa cikuulwa ca kwingililapo ku nse. 26 Kwali na mawindo ayakwete amafulemu ayakulile mu kati+ no tuncindu twalengelwe lubali uku na lubali kulya ku mbali sha muputule wa kwingililapo ne miputule ya ku mbali ya ng’anda na ku tumitenge.

42 E lyo amfumiishe+ ku lubansa lwa ku nse ukupitila ku nshila iyalosha ku kapinda ka ku kuso.+ Awe antwele ku muputule wa kuliilamo+ uwali pa ntanshi ya ncende yapaatulwa iyali pa ntanshi ya cikuulwa+ lwa ku kapinda ka ku kuso. 2 Pa ntanshi ya mwinshi wa ku kapinda ka ku kuso, pali incende yalepa imikono umwanda umo (100), na mu bwipi yali imikono amakumi yasano (50). 3 Apalungatana ne ncende yali imikono amakumi yabili (20) iya lubansa lwa mu kati+ kabili apalungatana na palambatikwa amabwe+ pa lubansa lwa pa nse pali icikuulwa+ icalungatana ne cikuulwa ica ntunti shitatu. 4 Pa ntanshi ya miputule ya kuliilamo pali apa kwenda apali imikono ikumi (10) mu bwipi ukulola mu kati,+ no mukono umo mu butali, ne miinshi ya ku miputule ya kuliilamo yabelele ku kapinda ka ku kuso. 5 Kumfwa imiputule ya kuliilamo, iya pa muulu yali iipi ukucila iya pa nshi no kucila iya pa kati ka cikuulwa, pantu incende imo ku miputule ya pa muulu yalisendelwe ku lukungu. 6 Pantu yali intunti shitatu,+ kabili tayakwete inceshi nge nceshi sha mu mansa. E mulandu wine incende iikalamba yasendeelwe ku ya pa muulu ukucila ku ya pa nshi ne ya pa kati ukufuma pa nshi.

7 Ne cibumba ca ku nse cali mupepi ne miputule ya kuliilamo ukulola ku lubansa lwa ku nse pa ntanshi ya miputule imbi iya kuliilamo. Na mu butali cali imikono amakumi yasano (50). 8 Pantu ubutali bwa miputule ya kuliilamo iyalolele ku lubansa lwa ku nse bwali imikono amakumi yasano, kabili pa ntanshi ye tempele bwali imikono umwanda umo (100). 9 Kabili pa ntunti ya kubalilapo iya iyi miputule ya kuliilamo, pali umwinshi wabelele ku kabanga, uwa kwingililamo nga wapita mu lubansa lwa ku nse.

10 Ku numa ya cibumba ca lubansa ukulola ku kabanga, ukulungatana ne ncende yapaatulwa+ no kulungatana ne cikuulwa, kwali imiputule ya kuliilamo.+ 11 Kwali ne nshila pa ntanshi ya iyi miputule iyapalene ne nshila ya mu miputule ya kuliilamo iya ku kapinda ka ku kuso.+ Yalilingene mu butali na mu bwipi; ne minshi ya kufuminako yonse yalipalene, na mapulani yali ayapalana ne minshi ya kwingililako yali iyapalana. 12 Kabili ifyali iminshi ya ku miputule ya kuliilamo iyali ku kapinda ka ku kuso, e fyali umwinshi uwali ku lutwe lwa nshila, inshila ya pa ntanshi ya cibumba lubali ku kabanga, iya kwingililamo nga wapita ku lubansa lwa ku nse.+

13 E lyo anjebele ati: “Imiputule ya kuliilamo iili ku kapinda ka ku kuso ne miputule ya kuliilamo iili ku kapinda ka ku kulyo ukulungatana ne ncende yapaatulwa,+ miputule ya kuliilamo iya mushilo, umo bashimapepo abapalama+ kuli Yehova baliila ifya mushilo nga nshi.+ E mo babika ifya mushilo nga nshi no mutuulo wa ngano no mutuulo wa pa lubembu no mutuulo wa pa mulandu, pantu mwa mushilo.+ 14 Ilyo bashimapepo baingilamo, te kuti bafume umwa mushilo ukuya ku lubansa lwa ku nse, lelo bakasha ifya kufwala fyabo ifyo babombelamo,+ pantu fya mushilo. Bakafwale ifya kufwala fimbi,+ e lyo bengapalama ku lubansa ukuba abantu.”

15 Ilyo apwile ukupima mu kati ka ng’anda, amfumishe ku nse ku nshila ya ku mpongolo iyalosha ku kabanga,+ kabili alipimine ukushinguluka konse konse.

16 Apimine ulubali lwa ku kabanga kwi tete lya kupiminako. Lwali imikono imyanda isano (500) kwi tete lya kupiminako,+ ukushinguluka konse konse.

17 Apimine ulubali lwa ku kapinda ka ku kuso kwi tete lya kupiminako, lwali amatete imyanda isano (500), ukushinguluka konse konse.

18 Apimine no lubali lwa ku kapinda ka ku kulyo kwi tete lya kupiminako, lwali amatete imyanda isano (500).

19 Ashingulukile ku lubali lwa ku masamba. Apimine amatete imyanda isano (500), kwi tete lya kupiminako.

20 Apimine imbali shine. Kabili icibumba icashingulwike konse konse,+ cali amatete imyanda isano (500) mu butali na mu bwipi cali amatete imyanda isano,+ calepaatulanya ica mushilo ne cishili ca mushilo.+

43 E lyo antwele ku mpongolo, impongolo iyalosha ku kabanga.+ 2 Kabili moneni! ubukata+ bwa kwa Lesa wa kwa Israele bwaletula ku kabanga,+ ne shiwi lyakwe lyali nge congo ca menshi ayengi;+ ne sonde lyalibuutile ku bukata bwakwe.+ 3 Kabili camoneke nge cimonwa namwene,+ nge cimonwa namwene ilyo naile ku konaula umusumba;+ kabili kwali ifyalemoneka nga filya namwene ku mumana wa Kebari,+ awe nawile ubukupeme.

4 No bukata+ bwa kwa Yehova bwaingile mu Ng’anda ukupitila ku mpongolo iyalosha ku kabanga.+ 5 E lyo umupashi wanjimishe+ no kuntwala mu lubansa lwa mu kati, kabili moneni! Ing’anda yaiswilemo ubukata bwa kwa Yehova.+ 6 Kabili naumfwile umo alelanda na ine mu Ng’anda,+ no yo muntu aiminine ku mbali yandi.+ 7 E lyo Lesa anjebele ati:

“We mwana wa muntu, cino e cifulo ca cipuna candi ica bufumu+ kabili icifulo apa kunyanta amakasa yandi,+ apo nkekala pa kati ka bana ba kwa Israele umuyayaya;+ kabili aba mu ng’anda ya kwa Israele, bena nangu ishamfumu shabo, tabakakoweshe ishina lyandi ilya mushilo+ na kabili ku bulalelale bwabo na ku fitumbi+ fya shamfumu shabo+ pa mfwa ya shiko, 8 pa kubika umwinshi wa shiko ku mwinshi wandi ne nceshi sha shiko ku nceshi shandi, ukuti pabe fye icibumba pali ine ne fitumbi fya shamfumu.+ Kabili bakoweshe ishina lyandi ilya mushilo ku fya bunani fyabo ifyo bacitile,+ e co nabalofeshe mu bukali bwandi.+ 9 Nomba leka batalushe bucilende bwabo+ ne fitumbi fya shamfumu shabo kuli ine,+ na ine nkekala pa kati kabo umuyayaya.+

10 “Lelo iwe, we mwana wa muntu, eba aba mu ng’anda ya kwa Israele pali iyi Ng’anda,+ ukuti baseebane pa mulandu wa membu shabo,+ ukuti bapime imikuulile ya iko. 11 Kabili nga baseebana pa mulandu wa fintu fyonse ifyo bacita, ubalenge beshibe pulani ya Ng’anda,+ ifyo yateyanishiwa ne minshi ya kufuminako ne minshi ya kwingililako, na mapulani ya pa nshi yonse ne mikuulile yonse, na mapulani ya pa nshi yonse na mafunde ya iko ulembe ninshi balemonako, pa kuti bamone pulani ya pa nshi yonse ne mikuulile ya iko no kulakonka ifyebo fya iko fyonse.+ 12 Ili e funde pali iyi Ng’anda. Pa muulu wa lupili umupaka wa iko onse uukushinguluka konse konse wa mushilo nga nshi.+ Mona! Ili e funde lya Ng’anda.

13 “Ne fi e fipimo fya ciipailo mu mikono,+ umukono umo uli umukono umo ukubikapo no lupi mu bwipi.+ Ishinte lya ciko mukono umo. Mu bwipi na mo umukono umo. Kwali no mwalepita umulopa ukushinguluka, umwalepele nge cisansa. Ne li e shinte lya ciipailo. 14 Ukutula pe shinte pa nshi ukufika umwalepita umulopa mwi samba pali imikono ibili, na mu bwipi, umukono umo. Kabili ukutula umwalepita umulopa pa muulu ukufika pa mwalepita umulopa mwi samba pali imikono ine, na mu bwipi, umukono umo. 15 Ne shiko lya ciipailo lyali imikono ine, ukutula pe shiko lya ciipailo no kulola ku muulu kwali insengo shine.+ 16 Ne shiko lya ciipailo lyali imikono ikumi na ibili (12) mu butali, ne mikono ikumi na ibili mu bwipi,+ ilya mbali shine ishalingana.+ 17 No mwalepita umulopa ukushinguluka mwalepele imikono ikumi na ine (14), ne mikono ikumi na ine mu bwipi, na mu mbali shine isha ciko; no mupaka uwashinguluka wali hafu wa mukono, ne shinte lya ciko lyali umukono umo ukushinguluka.

“Na matabo ya ciko yaloseshe ku kabanga.”

18 Kabili anjebele ati: “We mwana wa muntu, Shikulu Mulopwe Yehova atila, ‘Ifi e fipope fya pa ciipailo mu bushiku cikakuulwa, pa kuti muleninikapo imituulo ya koca+ no kusansapo umulopa.’+

19 “‘Kabili ukapeele umwana wa ng’ombe umulume kuli bashimapepo abena Lebi,+ aba mu bana ba kwa Sadoke,+ abapalama kuli ine ku kumombela,’+ e fyasosa Shikulu Mulopwe Yehova, ‘ukuti akabe umutuulo wa pa lubembu.+ 20 Ukabuule no mulopa wakwe umo no kubika pa nsengo shine na pa makoona yane aya mupita umulopa ukushinguluka no kucisangulula ku lubembu+ no kucifuta.+ 21 Ukabuule no yo umwana wa ng’ombe umulume, umutuulo wa pa lubembu, no muntu akaocele ku ncende iyaba mupepi ne Ng’anda, ku nse ya mwa mushilo.+ 22 Na pa bushiku bwa cibili ukaleta sawe, umusuma, ku kuba umutuulo wa pa lubembu; e lyo bakasangulule iciipailo ku lubembu filya fine bacisangulwile ku lubembu ku mwana wa ng’ombe umulume.’

23 “‘Ilyo wapwa ukucisangulula ku lubembu, ukalete umwana wa ng’ombe umulume ukufuma mu mukuni, umusuma, na sukusuku wa mu mukuni, umusuma. 24 Ukafilete pa ntanshi ya kwa Yehova, na bashimapepo bakasansepo umucele, no kufyoca+ ukuba ilambo lya koca kuli Yehova. 25 Pa nshiku cinelubali (7) mukatuule sawe ukuba umutuulo wa pa lubembu ubushiku no bushiku;+ no mwana wa ng’ombe umulume uwa mu mukuni, na sukusuku uwa mu mukuni, umusuma, e fyo bakatuula. 26 Pa nshiku cinelubali (7) bakafuta+ iciipailo, kabili bakacisangulule no kucipekanya. 27 Kabili bakapwisha inshiku ishi. Nomba pa bushiku bwalenga cinekonsekonse (8)+ ukuya na ku ntanshi bashimapepo bakalatuula pa ciipailo imituulo yenu iya koca na malambo yenu aya mutende; na ine nkasekela muli imwe,’+ e fyasosa Shikulu Mulopwe Yehova.”

44 E lyo ambweseshe ku mpongolo ya pa nse iye tempele, iyalosha ku kabanga,+ kabili yalisalike.+ 2 E lyo Yehova anjebele ati: “Iyi mpongolo ikaba iyaisalika pe. Tayakesulwe, kabili takuli umuntu nangu umo uukengililapo; pantu Yehova umwine, Lesa wa kwa Israele+ e po aingilile, e ico ikaba iyaisalika pe. 3 Lelo intungulushi+—apo ni ntungulushi, epo ikekala pa kulya ifya kulya ku cinso ca kwa Yehova.+ Ikengilila pa cikuulwa ca kwingililapo ica pa mpongolo, kabili e po ikafumina.”+

4 E lyo ampishishe ku mpongolo ya ku kapinda ka ku kuso pa ntanshi ya Ng’anda, ukuti mone, kabili moneni! ubukata bwa kwa Yehova bwaiswile mu ng’anda ya kwa Yehova.+ Na ine nawile ubukupeme.+ 5 E lyo Yehova atile kuli ine: “We mwana wa muntu, bikapo umutima+ no kumona na menso yobe, no kumfwa mu matwi yobe fyonse ifyo ndesosa kuli iwe pa fipope fyonse ifya ng’anda ya kwa Yehova na pa mafunde ya iko yonse, kabili ubike umutima pa mwinshi wa Ng’anda na ponse apa kufumina mwi tempele. 6 Kabili usose kuli Bacipondoka,+ ku ba mu ng’anda ya kwa Israele auti, ‘Shikulu Mulopwe Yehova atila: “Mwacita ifya bunani pafula, mwe ba mu ng’anda ya kwa Israele,+ 7 ilyo muleta abena fyalo abashasembululwa imitima kabili abashasembululwa imibili,+ ukuti babe mwi tempele lyandi no kukowesha ing’anda yandi; pa nshita mutuula ifya kulya fyandi,+ e kutila amafuta+ no mulopa,+ e lyo bena balepula mu cipangano candi pa mulandu wa fya bunani fyenu.+ 8 Kabili tamwabikako amano ku kubomba umulimo wandi uwakuma ifya mushilo fyandi,+ nangu kubikapo bambi ukumubombelako umulimo mwi tempele lyandi.”’+

9 “‘Shikulu Mulopwe Yehova atila: “Takuli umbi umbi, uushasembululwa umutima kabili uushasembululwa umubili, uwingengila mwi tempele lyandi, e kutila, umbi umbi uuli mu kati ka bana ba kwa Israele.”’+

10 “‘Lelo abena Lebi abatalwike kuli ine+ ilyo Israele uwafumine kuli ine akonkele utulubi twabo utwa bunani, na bo bafwile ukukandwa pa membu shabo.+ 11 Kabili bakaba ababomfi mwi tempele lyandi, ukuba bakangalila pa mpongolo sha Ng’anda no kuba bakabomba mu Ng’anda.+ E bakalaipaya inama ya mutuulo wa koca ne lambo lya pa membu sha bantu,+ kabili e bakeminina pa ntanshi yabo no kubabombela.+ 12 Pa mulandu wa kuti baalebabombela pa ntanshi ya tulubi twabo utwa bunani+ no kuba ica kupunwisha ica kulenga aba mu ng’anda ya kwa Israele ukubembuka,+ e co naimisha ukuboko kwandi ku kubalwisha,’+ e fyasosa Shikulu Mulopwe Yehova, ‘kabili bakashingamwa imembu shabo. 13 Kabili tabakapalame kuli ine ukubomba bushimapepo nangu ukupalama ku ca mushilo candi conse,+ ku fya mushilo nga nshi, kabili bakashingamwa ukuseebana kwabo ne fya bunani fyabo ifyo bacitile.+ 14 Nkabasonta ukuba aba kubomba umulimo wa mu Ng’anda, bakabomba fyonse ifibombwamo na fyonse ifilingile ukubombwamo.’+

15 “‘Lelo bashimapepo abena Lebi,+ abana ba kwa Sadoke,+ ababombele umulimo wa mwi tempele lyandi ilyo abana ba kwa Israele bafumine kuli ine,+ bena e bakapalama kuli ine ku kumombela, kabili bakeminina ku cinso candi+ pa kuti batuule amafuta+ no mulopa,’+ e fyasosa Shikulu Mulopwe Yehova. 16 ‘Bena e bakalaingila mwi tempele lyandi,+ kabili e bakalapalama kwi tebulo lyandi ku kumombela,+ no kubomba umulimo wandi.+

17 “‘Nomba ilyo baingila mu mpongolo sha mu lubansa lwa mu kati, bakafwale ifya kufwala fya nsalu sha kolokondwe, kabili bekafwala ifya kufwala fya masako ya mpaanga ilyo balebombela mu mpongolo sha mu lubansa lwa mu kati nangu ni mu kati ka mpongolo.+ 18 Ku mitwe yabo bafwile ukufwala ifitebo fya nsalu sha kolokondwe,+ na bakaputula ba nsalu sha kolokondwe e bo bafwile ukufwala mu misana yabo.+ Tabafwile ukufwala ifya kufwala ifingabalenga ukupiba. 19 Kabili ilyo bafumina mu lubansa lwa ku nse, mu lubansa lwa ku nse ku bantu, bafwile ukufuula ifya kufwala fyabo ifyo babombelamo,+ no kufibika mu miputule ya kuliilamo iya mushilo,+ no kufwala ifya kufwala fimbi pa kuti belenga abantu ukuba aba mushilo ku fya kufwala fyabo.+ 20 No mushishi wa ku mitwe yabo tabalingile ukubeya+ kabili bekauleka ukusakalala. Bafwile ukukaka umushishi wa ku mitwe yabo.+ 21 Kabili shimapepo onse tafwile ukunwa umwangashi ilyo aingila mu lubansa lwa mu kati.+ 22 Kabili te kuti bope mukamfwilwa nangu umwanakashi uwalekwa,+ kano umukashana uushatala opwa uwa mu bana ba mu ng’anda ya kwa Israele+ atemwa mukamfwilwa wa kwa shimapepo, e bo bengopa.’

23 “‘Bakasambilishe abantu bandi ubupusano bwaba pa fya mushilo ne fyasaaluka; no kubalenga bakeshibe ubupusano pa fyakowela ne fyasanguluka.+ 24 Kabili nga kwaba umulandu, bakeminine ku kupingula;+ bakakonke ubupingushi bwandi pa kupingula.+ Bakakonke na mafunde yandi ne fipope fyandi pa lwa nshita sha mitebeto yandi,+ na masabata yandi bakayalenge ukuba aya mushilo.+ 25 Na ku muntu uwafwa bekayako pa kuti bekakowela, lelo nga ni shibo nangu nyinabo nangu umwana wabo umwaume nangu umwana wabo umwanakashi nangu munyinabo nangu nkashi yabo uushaba no mulume, kuti baikowesha.+ 26 Pa numa ya kusanguluka kwakwe, bakamupendele inshiku cinelubali (7).+ 27 Na pa bushiku ubo aingila umwa mushilo, mu lubansa lwa mu kati, ku kubombela umwa mushilo, afwile ukuleta umutuulo wakwe uwa pa lubembu,’+ e fyasosa Shikulu Mulopwe Yehova.

28 “‘Kabili ubupyani bwabo ni ubu: ni ne ubupyani bwabo.+ Kabili mwikabapeela impanga mu Israele: ni ne ubupyani bwabo. 29 Umutuulo wa buunga no mutuulo wa pa lubembu no mutuulo wa pa mulandu—e bakalya.+ Na conse icapeelwa mu Israele—cikaba cabo.+ 30 Ne filimwa fyonse ifyawamisha ifyabalilapo ukupya ne misangulo yawamisha yonse pa misangulo yenu—fikaba fya bashimapepo;+ no buunga mu fisabo fya kubalilapo mukapeele bashimapepo,+ pa kuti ipaalo likabe pa ng’anda yobe.+ 31 Bashimapepo tabafwile ukulya conse icaifwila nelyo ifyuni ifyo bataakanya nangu inama iyaipaiwa ku nama imbi.’+

45 “‘Kabili ilyo mwa-akanya icalo ku kuba ubupyani,+ mukabulepo impanga imo no kupeela Yehova,+ ni mpanga ya mushilo mu calo;+ mu butali ikabe imikono amakana amakumi yabili na yasano (25,000), na mu bwipi ikabe amakana ikumi (10,000).+ Ikaba ni mpanga ya mushilo monse mu mupaka wa iko ukushinguluka. 2 Muli iyi mpanga e mukaba icifulo ca mushilo, ica mikono imyanda isano (500) mu butali ne mikono imyanda isano mu bwipi, ica mbali shine ishalingana konse konse;+ kabili cikaba ne mpanga ya mulemfwe iya mikono amakumi yasano (50) mu mbali shonse.+ 3 Muli iyi ncende, mukaputulemo incende ya mikono amakana amakumi yabili na yasano (25,000) mu butali na makana ikumi (10,000) mu bwipi, e mukaba icifulo ca mushilo, incende ya mushilo nga nshi.+ 4 Ikaba iya mushilo mu calo, ikaba ya bashimapepo,+ aba kubombela umwa mushilo, abapalama kuli Yehova ku kumubombela.+ E mo bakakuula amayanda, kabili apa mushilo e pakaba itempele lyandi.

5 “‘Kabili kukaba impanga ya mikono amakana amakumi yabili na yasano (25,000) mu butali ne mikono amakana ikumi (10,000) mu bwipi.+ Ikaba ya bena Lebi, ababombela pa Ng’anda. E ikaba impanga yabo iikabamo imiputule ya kuliilamo amakumi yabili (20).+

6 “‘Kabili mukaputule ne mpanga ya musumba, imikono amakana yasano (5,000) mu bwipi ne mikono amakana amakumi yabili na yasano (25,000) mu butali, ukulingana ne mpanga ya mushilo iyo mukapeela.+ Ikaba ya ba mu ng’anda ya kwa Israele bonse.

7 “‘Kukaba ne mpanga ya ntungulushi ulu lubali na lulya lubali ulwa mpanga ya mushilo iyo bapeela+ na ku mpanga ya musumba, lubali ku mpanga ya mushilo iyo bapeela na lubali lwa mpanga ya musumba, lubali ku masamba ukulola ku masamba, na lubali ku kabanga ukulola ku kabanga. Ubutali bwa iko bukaba ubwalingana na cimo ica fiputulwa, ukufuma ku mupaka wa ku masamba ukufika ku mupaka wa ku kabanga.+ 8 Icalo cena, cikaba cakwe mu Israele. Kabili intungulushi shandi tashakacululushe abantu bandi+ na kabili, ne calo bakapeela ku ba mu ng’anda ya kwa Israele ukulingana ne mikowa yabo.’+

9 “Shikulu Mulopwe Yehova asosa ati, ‘Mwalufyanya pafula, mwe ntungulushi sha kwa Israele!’+

“‘Fumyeni ulufyengo kabili lekeni ukupokolola abantu ifipe,+ beni no mulinganya no kucita ifyalungama.+ Fumyeni umutitikisha pa bantu bandi,’+ e fyasosa Shikulu Mulopwe Yehova. 10 ‘Ica kupiminako icalungama ne tepe ilyalinga ne mbeketi ya kupiminako iyalinga, e fyo mukwate.+ 11 E lyo itepe ne mbeketi fikabe icipimo cimo, imbeketi ikumi (10) e shilingile ukwingila mwi dalamu limo na matepe+ ikumi e yalingile ukwingila mwi dalamu limo, idalamu e lya kupiminako. 12 Kabili ishekele+ likabe bagera+ amakumi yabili (20). Amashekele amakumi yabili, ukubikapo amashekele amakumi yabili na yasano (25), ukubikapo na mashekele ikumi na yasano (15) e yakalingana na mane umo.’

13 “‘Uyu e mutuulo mukaletuula, galoni imo ukufuma mwi dalamu lya ngano, na galoni imo ukufuma mwi dalamu lya barle;14 kabili umutuulo wa mafuta, mukalepimina ku mbeketi. Imbeketi ikumi (10) e shilingile ukwingila mwi dalamu limo. Imbeketi ikumi e dalamu limo; pantu mwi dalamu limo mwingila imbeketi ikumi. 15 Kabili mukatuule impaanga imo ukufuma mu mukuni, e kutila, impaanga imo ukufuma pa mpaanga imyanda ibili (200) ukufuma pa fitekwa fya mu Israele.+ Ifi e fyo mukalaleta pa kutuula umutuulo wa ngano+ no mutuulo wa koca+ na malambo ya mutende,+ ku kufuta imilandu yabo,’+ e fyasosa Shikulu Mulopwe Yehova.

16 “‘Abantu ba mu calo bonse e bakasangula uyu musangulo+ ku ntungulushi ya mu Israele.+ 17 Kabili intungulushi+ e ikala-angalila imituulo ya koca+ ne mituulo ya buunga+ no mutuulo wa mwangashi+ mu mitebeto+ ne myeshi yamoneka+ na mu masabata,+ mu nshita sha mitebeto yonse iya ba mu ng’anda ya kwa Israele.+ E ikapeela ica kutuula pa mutuulo wa lubembu no mutuulo wa ngano no mutuulo wa koca na malambo ya mutende, pa kufuta aba mu ng’anda ya kwa Israele.’

18 “Shikulu Mulopwe Yehova atila, ‘Mu mweshi wa ntanshi, pa bushiku bwa ntanshi muli uyo mweshi, ukabuule ing’ombe iilume iinono, iisuma,+ no kusangulula umwa mushilo ukufuma ku lubembu.+ 19 Na shimapepo akabuule umulopa umo uwa mutuulo wa pa lubembu no kushinga pa nceshi sha pa mwinshi+ wa Ng’anda na pa makoona yane aya mwa kupita umulopa umwa ciipailo+ na pa nceshi sha pa mpongolo ya ku lubansa lwa mu kati. 20 E fyo ukacita mu bushiku bwa cinelubali (7) mu mweshi pa mulandu wa muntu onse uwabifya mu kuluba+ na pa mulandu wa muntu onse uushaishiba; e fyo mukafute Ing’anda.+

21 “‘Mu mweshi wa ntanshi, pa bushiku bwe kumi na shine (14) muli uyo mweshi, mukacite ica kucilila.+ Mukacite umutebeto wa nshiku cinelubali (7) apo mukalalya umukate uushatutumuka.+ 22 Muli ubo bushiku, intungulushi ikailetela iine no kuletela abantu ba mu calo ing’ombe iilume iinono ukuba umutuulo wa pa lubembu.+ 23 Kabili pa nshiku cinelubali (7) isha mutebeto,+ ikapekanye ing’ombe ishilume ishinono cinelubali ku kuba umutuulo wa koca kuli Yehova na basukusuku cinelubali, abasuma, cila bushiku pa nshiku cinelubali,+ no mutuulo wa pa lubembu ni sawe cila bushiku.+ 24 Umutuulo wa ngano, itepe limo pa ng’ombe iilume iinono imo ne tepe limo pali sukusuku umo e fyo ikapekanye, nomba amafuta, ni galoni imo iya mafuta pe tepe limo.+

25 “‘Mu mweshi wa cinelubali (7), pa bushiku bwalenga ikumi na shisano (15) muli uyo mweshi, pa mutebeto,+ ikapekanye fimo fine inshiku cinelubali,+ ifyalingana no mutuulo wa pa lubembu, umutuulo wa koca, ku mutuulo wa ngano na ku mafuta.’”

46 “Shikulu Mulopwe Yehova asosa ati, ‘Impongolo ya ku lubansa lwa mu kati iyalosha ku kabanga,+ ikabe iyaisalwa+ pa nshiku mutanda (6)+ isha kubombamo imilimo, lelo pa bushiku bwe sabata ikesulwe, na pa bushiku umweshi wamoneka ikesulwe.+ 2 Kabili intungulushi ilyo ileingila, ikengilile pa cikuulwa ca kwingililapo,+ no kwiminina ku luceshi lwa pa mpongolo;+ na bashimapepo bakatuule umutuulo wa iko uwa koca na malambo ya iko aya mutende, e lyo ikakontame pa mpongolo,+ no kufuma, lelo impongolo taifwile ukwisalwa mpaka icungulo. 3 Na bantu ba mu calo bakakontamine ku cinso ca kwa Yehova pa mwinshi wa iyo mpongolo pa masabata na lyonse ilyo umweshi upya wamoneka.+

4 “‘Kabili umutuulo wa koca uo intungulushi ikaleta kuli Yehova mu bushiku bwe sabata bana ba mpaanga mutanda (6) abasuma na sukusuku umusuma;+ 5 e lyo umutuulo wa ngano litepe pali sukusuku,+ na pa bana ba mpaanga abalume+ ikatuula ingano ukulingana na po ikwatile, kumfwa ku mafuta, ni galoni imo pe tepe limo.+ 6 Na mu bushiku umweshi wamoneka+ mukalete ing’ombe iilume iinono iya mu mukuni, iisuma, na bana ba mpaanga abalume mutanda (6) na sukusuku; shonse shifwile ukuba ishisuma.+ 7 Itepe limo ilya ngano pa ng’ombe iilume iinono ne tepe limo pali sukusuku, e mutuulo wa ngano, na pa bana ba mpaanga ikapeela ukulingana na po ikwatile; kumfwa ku mafuta, ni galoni imo pe tepe limo.+

8 “‘Ilyo intungulushi+ ileingila, ifwile ukwingilila pa cikuulwa ca kwingililapo ica pa mpongolo, no kufuma ikafumine uko kwine.+ 9 Kabili ilyo abantu ba mu calo baisa ku cinso ca kwa Yehova mu nshita sha mutebeto,+ uwaingilila ku mpongolo ya ku kapinda ka ku kuso+ ku kwisakontama afwile ukufumina ku mpongolo ya ku kapinda ka ku kulyo;+ no waingilila ku mpongolo ya ku kapinda ka ku kulyo afwile ukufumina ku mpongolo ya ku kapinda ka ku kuso. Takuli uwa kufumina ku mpongolo iyo engililepo, uko alungama e ko akafumine. 10 Kumfwa ku ntungulushi iili pa kati kabo, ilyo baleingila, na yo e lyo ikengile; kabili ilyo bafuma, na yo e lyo ikafume.+ 11 Pa mutebeto na mu nshita sha mutebeto,+ umutuulo wa ngano ukabe itepe limo pa ng’ombe iilume iinono ne tepe limo pali sukusuku, na pa bana ba mpaanga ikapeela ukulingana na po ikwatile; kumfwa ku mafuta, ni galoni imo pe tepe limo.+

12 “‘Kabili nge ntungulushi yaleta umutuulo wa koca+ ukuti e mutuulo wa kuitemenwa, napamo yaleta umutuulo wa mutende ukuti e mutuulo wa kuitemenwa kuli Yehova, umo akaiswileko ku mpongolo iyalosha ku kabanga,+ na yo ikapeela umutuulo wa koca na malambo ya mutende nga filya icita pa bushiku bwe sabata.+ E lyo ikafume, kabili umo akesaleko ku mpongolo ilyo intungulushi ikafuma.+

13 “‘Kabili umwana wa mpaanga umulume, uwa mwaka umo, umusuma, e o ukapeele ukuba umutuulo wa koca cila bushiku kuli Yehova.+ Cila lucelo ukalepeela. 14 Kabili umutuulo wa ngano uwa kupeela pali ena cila lucelo ukabe galoni imo, nomba amafuta, amakapu yane ku kusansa pa buunga bwapeleka.+ Umutuulo wa ngano kuli Yehova cipope ca pe, ica muyayaya. 15 Bakalete umwana wa mpaanga umulume no mutuulo wa ngano na mafuta cila lucelo ku kuba umutuulo wa koca pe.’

16 “Shikulu Mulopwe Yehova atila, ‘Intungulushi nga yapeela ku mwana wa iko umo na umo ubupyani bwakwe, bukaba bwa bana bakwe abaume. Bupyani bwabo. 17 Nga yapeela ubupyani bwa iko kuli umo pa babomfi ba iko, bukaba bwakwe ukufikila umwaka wa buntungwa;+ e lyo bukabwelela ku ntungulushi. Kano fye ubupyani bwa iko, ubo yapeela abana ba iko, e bukatwalilila ukuba ubupyani bwabo. 18 Kabili intungulushi ikabuula ica bupyani ca bantu no kubapatikisha ukufuma pa mpanga yabo.+ Pa mpanga ya iko e po ikafumya iya kupeela abana ba iko, pa kuti abantu bandi bekapaswa cila muntu ukufuma pa mpanga yakwe.’”+

19 E lyo antwele apa kwingilila+ pa mbali ya mwinshi wa miputule ya kuliilamo iya mushilo, iya bashimapepo, iyalosha ku kapinda ka ku kuso,+ kabili moneni! pali icifulo uku no ku lwa ku masamba. 20 E lyo anjebele ati: “Apa e po bashimapepo bepikila umutuulo wa pa mulandu+ no mutuulo wa pa lubembu,+ kabili e po bafumbikila umutuulo wa ngano,+ pa kuti tabafumiishe icintu ku lubansa lwa pa nse ku kulenga abantu ukuba aba mushilo.”+

21 E lyo amfumishe ku lubansa lwa ku nse no kuntwala ku nceshi shine isha mu makoona ya lubansa, kabili moneni! kwali ulubansa mupepi no luceshi lwali mu koona imo iya mu lubansa, no lubansa mupepi no luceshi lwali mu koona imbi iya mu lubansa. 22 Pa nceshi shine (4) isha pa makoona ya lubansa kwali imansa shinono, imikono amakumi yane (40) mu butali, na makumi yatatu (30) mu bwipi. Kuli isho shine kwali ne fikuulwa, kabili shalilingene. 23 Kwakuulilwe icibumba ukushishinguluka, ukushinguluka isho inceshi shine, kabili kwali apa kwipikila+ mwi samba lya cibumba cashingulwikeko. 24 E lyo anjebele ati: “Aya e mayanda ya kwipikilamo, umo ababombela mu Ng’anda bepikila ilambo lya pa membu sha bantu.”+

47 E lyo ambweseshe ku mwinshi wa Ng’anda,+ kabili moneni! kwali amenshi+ ayalefuma pa nshi ya mwinshi wa Ng’anda ukulola ku kabanga,+ pantu Ing’anda yaloseshe ku kabanga. Kabili amenshi yalefuma mwi samba, lwa ku kulyo kwa Ng’anda, ku kapinda ka ku kulyo aka ciipailo.

2 Asukile amfumisha ku mpongolo ya ku kapinda ka ku kuso+ no kunshingulushisha ku nshila ya ku nse ukuya ku mpongolo ya ku nse iyalosha ku kabanga,+ kabili moneni! amenshi+ yalekonkoloka ukufuma ku kulyo.

3 Ilyo uyo muntu aile ku kabanga ne ntambo ya kupiminako mu minwe yakwe,+ apimine imikono ikana limo (1,000) no kumpisha mu menshi, amenshi yafikile mu nkolokoso.

4 Kabili akonkenyepo ukupima imikono na imbi ikana limo (1,000) no kumpisha mu menshi, na menshi yafikile mu makufi.

Kabili akonkenyepo ukupima imikono na imbi ikana limo no kumpishamo, na menshi yafikile mu musana.

5 Kabili akonkenyepo ukupima imikono na imbi ikana limo (1,000). Amenshi yaishileba umumana uwa kuti nafilwa no kwabuka, pantu amenshi yalifulile, amenshi aya kuti umuntu kuti aowamo, umumana uo umuntu ashingaabuka.

6 E lyo anjebele ati: “We mwana wa muntu, bushe wamona?”

E lyo anyenseshe no kumbwesesha ku lulamba lwa mumana. 7 Ilyo nabwelele, moneni! mu lulamba lwa mumana mwali ifimuti ifingi nga nshi, ku lubali ulu na ku lubali lulya.+ 8 E lyo anjebele ati: “Aya menshi yaleya ku citungu ca ku kabanga kabili yalepongolokela ku Araba+ no kwita muli bemba.+ Ilyo yafika muli bemba,+ amenshi ya muli bemba yalawama. 9 Nomba ifibumbwa fyonse ifyaba+ konse uko uyu mumana waya, fikaba no mweo. Kabili kukaba isabi ilingi nga nshi, pantu e ko amenshi yakaya, na menshi ya muli bemba yakawama,+ na fyonse fye fikaba ifya mweo konse uko umumana ukaya.

10 “E lyo abalondo bakalaiminina mu lulamba lwa uko ukufuma ku En-gedi+ ukufika na ku En-eglaimu. E kukaba apa kwanika amasumbu. Isabi likaba ilya misango misango, nge sabi lya muli Bemba Mukalamba,+ ilingi nga nshi.

11 “Amanika ne ncende sha matipa matipa tafyakawame.+ Mukaba fye umucele.+

12 “Kabili ukukonka umumana, mu lulamba lwa uko uku no ku, mukamena imiti ya fya kulya.+ Amabula ya iko tayakabonse,+ ne fisabo fya iko tafyakapwe.+ Ikalatwala ifisabo fipya umweshi no mweshi, pantu amenshi yatapilila yatula ku ncende ya mushilo.+ Kabili ifisabo fya iko fikaba fya kulya na mabula ya iko yakaba aya kuundapilako.”+

13 Shikulu Mulopwe Yehova asosa ati: “Iyi e ikaba impanga yenu iyo imikowa ikumi na ibili (12) iya kwa Israele ikapyana, kabili ifiputulwa fibili ifya mpanga fikaba fya kwa Yosefe.+ 14 Na imwe mukakwata ici calo ico naimishepo ukuboko kwandi pa kulapa+ ukuti nkacipeela ku fikolwe fyenu, cila muntu icalingana na munyina;+ kabili ici calo cikaba cenu.+

15 “Uyu e mupaka wa calo ku kapinda ka ku kuso, ukutula pali Bemba Mukalamba ukuya mu nshila ya ku Hetelone,+ ukuyafika na ku Sedadi,+ 16 ukuya na ku Hamati,+ na ku Berota,+ no kuya ku Sibraimu, incende iyabela pa kati ka mupaka wa ku Damaseke+ no mupaka wa Hamati; ukuya na ku Haserehatikone, incende iyabela ku mupaka wa ku Haurani.+ 17 No mupaka ukatula kuli bemba ukaya ku Hasari-enani,+ e kutila ku mupaka wa Damaseke no kupitilila ukuya ku kapinda ka ku kuso, ukulola ku kapinda ka ku kuso, no kuya ku mupaka wa ku Hamati.+ Uyu e mupaka wa ku kapinda ka ku kuso.

18 “No mupaka wa ku kabanga kufuma pa kati ka Haurani+ na Damaseke+ na pa kati ka Gileadi+ ne calo ca Israele; ukuya umwalola Umumana wa Yordani,+ ukufuma ku mupaka ukufika kuli bemba wa ku kabanga e fyo mukapime. Uyu e mupaka wa ku kabanga.

19 “No mupaka wa ku kapinda ka ku kulyo, ukatula pa Tamari+ ukufika ku menshi ya Meribati-kadeshe,+ na ku mupokapoka wa Egupti+ ukufika na kuli Bemba Mukalamba. Uyu e mupaka wa ku kapinda ka ku kulyo, ukulola ku Negebu.

20 “No mupaka wa ku masamba ni Bemba Mukalamba, ukutula pa mupaka wa ku kapinda ka ku kulyo ukufika ku mupaka wa Hamati.+ Uyu e mupaka wa ku masamba.”

21 “Kabili mukaakane ici calo, cikabe ica mikowa ikumi na ibili (12) iya kwa Israele. 22 Cikabe icalo cenu+ na balebeshi abekala mu kati kenu,+ abafyala abana mu kati kenu. Kabali mukalebamona nga bana calo mu kati kenu. Bakapeelwe impanga pamo na imwe mu kati ka mikowa ya kwa Israele.+ 23 Nomba mu mukowa umo umulebeshi ekala, e mo mukamupeele impanga,” e fyasosa Shikulu Mulopwe Yehova.

48 “Kabili aya e mashina ya mikowa. Dani+ akakwata iciputulwa ca mpanga cimo. Cikafuma ku kapinda ka ku kuso, ukukonka inshila ya ku Hetelone+ ukufika na ku Hamati.+ Ukufuma kulya cikaya ku Hasar-enone,+ umupaka wa ku Damaseke ku kapinda ka ku kuso, na ku mpanga yabela ku Hamati. Ici ciputulwa cikafuma ku kabanga ukufika ku masamba. 2 Ashere+ akakwata iciputulwa ca mpanga cimo, ukufuma ku kabanga ukufika ku masamba, ukupakana na Dani. 3 No ukapakana na Ashere, ukutula ku mupaka wa ku kabanga ukufika na ku mupaka wa ku masamba ni Naftali,+ iciputulwa ca mpanga cimo. 4 No ukapakana na Naftali, ukutula ku mupaka wa ku kabanga ukufika ku mupaka wa ku masamba ni Manase,+ iciputulwa ca mpanga cimo. 5 No ukapakana na Manase, ukutula ku mupaka wa ku kabanga ukufika ku mupaka wa ku masamba ni Efraimu,+ iciputulwa ca mpanga cimo. 6 No ukapakana na Efraimu, ukutula ku mupaka wa ku kabanga ukufika ku mupaka wa ku masamba ni Rubene,+ iciputulwa ca mpanga cimo. 7 No ukapakana na Rubene, ukutula ku mupaka wa ku kabanga ukufika ku mupaka wa ku masamba ni Yuda,+ iciputulwa ca mpanga cimo. 8 Kabili pa mupaka wa kwa Yuda, ukutula pa mupaka wa ku kabanga ukufika pa mupaka wa ku masamba, pakaba impanga iyo mukapeela, ikaba imikono amakana yabili na yasano (25,000) mu bwipi,+ no mu butali ikalingana ne ciputulwa cimo ica mikowa ukutula ku mupaka wa ku kabanga ukufika ku mupaka wa ku masamba. Ne tempele likabe pa kati ka iko.+

9 “Impanga iyo mukapeela Yehova, ikaba imikono amakana amakumi yabili na yasano (25,000) mu butali, ne minkono amakana ikumi (10,000) mu bwipi. 10 Muli iyi mpanga e mukaba impanga ya mushilo iyo mukapeela bashimapepo,+ ku kapinda ka ku kuso imikono amakana amakumi yabili na yasano (25,000), ku masamba imikono amakana ikumi (10,000) mu bwipi, ku kabanga imikono amakana ikumi mu bwipi, na ku kapinda ka ku kulyo imikono amakana amakumi yabili na yasano mu butali. Ne tempele lya kwa Yehova likabe mu kati ka iko.+ 11 Ikaba ya bashimapepo, abasalwa mu bana ba kwa Sadoke,+ ababombele umulimo wandi, abashafumine kuli ine ilyo abana ba kwa Israele bafumine kuli ine, filya fine abena Lebi na bo bafumine kuli ine.+ 12 Bakakwata impanga iikapeelwa ukufuma pa mpanga ikapeelwa ku kuba iya mushilo nga nshi, ku mupaka wa bena Lebi.+

13 “Kabili abena Lebi bakakwate+ impanga mupepi no mupaka wa bashimapepo, iciputulwa cabo ica mikono amakana amakumi yabili na yasano (25,000) mu butali, ne mikono amakana ikumi (10,000) mu bwipi; mu butali, conse cikaba imikono amakana amakumi yabili na yasano no bwipi cikaba imikono amakana ikumi.+ 14 Kabili te kuti bashitishe iyi mpanga, nangu kukaabulamo, nangu ukupeela impanga yawamisha kuli umbi; pantu ya mushilo kuli Yehova.+

15 “Kumfwa ku mpanga imikono amakana yasano (5,000) mu bwipi iyashalapo pamo ne mikono amakumi yabili na yasano (25,000), ni mpanga ya fye iya musumba,+ iya kwikalamo kabili ni mpanga ya mulemfwe. No musumba ukabe mu kati ka iko.+ 16 Kabili ifi e fyo mukapima umusumba: umupaka wa ku kapinda ka ku kuso imikono amakana yane ne myanda isano (4,500), umupaka wa ku kapinda ka ku kulyo imikono amakana yane ne myanda isano, umupaka wa ku kabanga imikono amakana yane ne myanda isano, no mupaka wa ku masamba imikono amakana yane ne myanda isano. 17 No musumba ukakwata impanga ya mulemfwe nge fi,+ ku kapinda ka ku kuso imikono imyanda ibili na makumi yasano (250), ku kapinda ka ku kulyo imikono imyanda ibili na makumi yasano, ku kabanga imikono imyanda ibili na makumi yasano, na ku masamba imikono imyanda ibili na makumi yasano.

18 “Ne yashalapo mu butali ikalingane ne mpanga ya mushilo iyo mukapeela,+ imikono amakana ikumi (10,000) ku kabanga, ne mikono amakana ikumi ku masamba; kabili ikalingane ne mpanga ya mushilo iyo mukapeela, ne fikalimwamo fikaba fya kulya abalebomba mu musumba.+ 19 Na balebomba mu musumba aba mu mikowa ya kwa Israele yonse e bakalalimamo.+

20 “Impanga yonse iyo mukapeela ikabe imikono amakana amakumi yabili na yasano (25,000) konse konse. Mukapeele impanga ya mushilo iya mbali shine ishalingana pamo ne mpanga ya musumba.

21 “Kabili iikashalapo ikaba ya intungulushi,+ ku lubali ulu na ku lubali lulya ulwa mpanga ya mushilo iyo mukapeela ne mpanga ya musumba,+ imikono amakana amakumi yabili na yasano (25,000) iya mpanga ya mushilo iyo mukapeela ukukonka umupaka wa ku kabanga; na ku masamba imikono amakana amakumi yabili na isano ukukonka umupaka wa ku masamba.+ Iyalingana ne fiputulwa fya mikowa, e ikaba iya ntungulushi. Pa kati ka iko e pakaba impanga ya mushilo iyo mukapeela no mwa mushilo mwa mu Ng’anda.

22 “Nomba impanga ya bena Lebi ne mpanga ya musumba, ikaba pa kati ka mpanga ya ntungulushi. Pa kati ka mupaka wa kwa Yuda+ no mupaka wa kwa Benjamini e po impanga ya ntungulushi ikaba.

23 “Imikowa iyashalako, ukufuma pa mupaka wa ku kabanga ukufika pa mupaka wa ku masamba, ni Benjamini,+ iciputulwa ca mpanga cimo. 24 No ukapakana na Benjamini, ukufuma pa mupaka wa ku kabanga ukufika pa mupaka wa ku masamba, ni Simeone,+ iciputulwa ca mpanga cimo. 25 No ukapakana na Simeone, ukutula pa mupaka wa ku kabanga ukufika pa mupaka wa ku masamba ni Isakari,+ iciputulwa ca mpanga cimo. 26 No ukapakana na Isakari, ukutula pa mupaka wa ku kabanga ukufika pa mupaka wa ku masamba ni Sebuluni,+ iciputulwa ca mpanga cimo. 27 No ukapakana na Sebuluni, ukutula pa mupaka wa ku kabanga ukufika pa mupaka wa ku masamba ni Gadi,+ iciputulwa ca mpanga cimo. 28 Kabili pa mupaka wa kwa Gadi, lwa ku kapinda ka ku kulyo, ukalola ku kapinda ka ku kulyo, umupaka ukaba ukutula pa Tamari+ ukufika ku menshi ya Meribati-kadeshe,+ na ku mupokapoka wa Egupti,+ ukufika kuli Bemba Mukalamba.+

29 “Iyi e mpanga iyo mukaakanya imikowa ya kwa Israele+ ku kuba ubupyani, kabili ifi e fikaba ifiputulwa fyabo,”+ e fyasosa Shikulu Mulopwe Yehova.

30 “Ishi e mpongolo umusumba ukakwata: Ulubali lwa ku kapinda ka ku kuso, lukaba imikono amakana yane ne myanda isano (4,500).+

31 “Kabili impongolo sha musumba shikenikwa amashina ya mikowa ya kwa Israele, impongolo shitatu ku lubali lwa ku kapinda ka ku kuso, impongolo ya kwa Rubene imo, impongolo ya kwa Yuda imo; impongolo ya kwa Lebi imo.

32 “Na ku lubali lwa ku kabanga kukaba imikono amakana yane ne myanda isano (4,500), ne mpongolo shitatu, impongolo ya kwa Yosefe imo; impongolo ya kwa Benjamini imo; impongolo ya kwa Dani imo.

33 “Na ku lubali lwa ku kapinda ka ku kulyo kukaba imikono amakana yane ne myanda isano (4,500), ne mpongolo shitatu, impongolo ya kwa Simeone imo; impongolo ya kwa Isakari imo; impongolo ya kwa Sebuluni imo.

34 “Ulubali lwa ku masamba lukaba imikono amakana yane ne myanda isano (4,500), ne mpongolo shitatu, impongolo ya kwa Gadi imo; impongolo ya kwa Ashere imo; impongolo ya kwa Naftali imo.

35 “Ukushinguluka umusumba kukaba imikono amakana ikumi na makana cinekonsekonse (18,000); no musumba ulya ukufuma bulya bushiku ukuya ku ntanshi ukenikwa ati Yehova E mo Aba.”+