Ku Bahebere

1 Kale, Lesa uwalelandila muli bakasesema+ ku fikolwe fyesu pa nshita+ ishingi na mu misango iingi, 2 nomba pa mpela ya nshiku+ shino alanda kuli ifwe ukupitila mu Mwana,+ uo asontele ukuba impyani ya fintu fyonse,+ kabili muli uyu wine e mo apangile+ ifya pano isonde ne fya mu muulu. 3 Muli ena e mumonekela ubukata+ bwa kwa Lesa kabili e cipasho cine cine ica fyo aba,+ kabili e ulenga ukuti ifintu fyonse fikonkanyepo ukubako ukubomfya amashiwi yakwe aya maka;+ kabili ilyo atusangulwile ku membu shesu,+ aikele mu muulu+ ku kuboko+ kwa ku kulyo ukwa Bucindami. 4 E ico alicila sana pali bamalaika,+ pantu balimupeela ishina+ ilyawamisha ukucila amashina yabo.

5 Pantu ni kuli malaika nshi atalile asosa ati: “Ni we mwana wandi; ine, buno bushiku nimba wiso”?+ No kuti: “Ine nkaba wishi, na o akaba umwana wandi”?+ 6 Lelo ilyo aleta na kabili Ibeli+ lyakwe mu bantu ba pano isonde, atila: “Na bamalaika+ bonse aba kwa Lesa bamufukamine.”+

7 Kabili pali bamalaika atila: “Alenga bamalaika bakwe ukuba aba maka,* na babomfi bakwe aba kubombela abantu abalenga ukuba ulubingu lwa mulilo.”+ 8 Lelo pa Mwana atila: “Lesa e cipuna cobe ica bufumu umuyayaya,+ ne nkonto ya bufumu+ bobe ni nkonto ya bulungami.+ 9 Watemenwe ubulungami, no kupata ifyabipa. E mulandu wine Lesa, Lesa obe, akusubile+ amafuta ya kwaanga ayengi ukucila abanobe.”+ 10 Kabili atila: “Imwe, mwe Shikulu, ku kutendeka mwabikile imifula ya pano isonde, ne myulu ni mwe mwapanga ku minwe yenu.+ 11 Ifi fyena fikaloba, lelo imwe mukekalilila umuyayaya; kabili fyonse fikakota filya fine ifya kufwala fikota,+ 12 na imwe mukafifunga nge nsalu,+ nge ca kufwala; kabili fikaaluka, lelo imwe mwaba cimo cine, kabili tamwakwata impela.”+

13 Lelo ni kuli malaika nshi atalile asosa ati: “Ikala ku kwa kulyo kwandi, mpaka nkalenge abalwani bobe ukuba nga kapuna ka kunyantapo amakasa yobe”?+ 14 Bushe bonse te mipashi+ ya kubombela abantu,+ iyatumwa ku kubombela abakapusuka?

2 E mulandu wine tufwile ukubikila sana amano ku fyo twaumfwile,+ pa kuti twisensenunwa.+ 2 Pantu amashiwi ayalandilwe muli bamalaika+ nga yali aya cishinka, kabili bonse abalepula mu mafunde na bonse abashali ne cumfwila balekandwa ukulingana ne fyo balelufyanya;+ 3 bushe tukapusuka+ shani nga twalekelesha+ ipusukilo ilyakula ifi?+ Pantu Shikulu+ e wabalilepo ukubila ili ipusukilo kabili abaumfwile kuli Shikulu bashimike kuli ifwe ukuti lya cine.+ 4 Kabili Lesa na o alangile ukuti ili ipusukilo lya cine pa kucita ifishibilo ne fipesha amano ne milimo ya maka+ iyalekanalekana na pa kupeela ababomfi bakwe ifya bupe+ fya mupashi wa mushilo ukulingana no kufwaya kwakwe.+

5 Pantu te bamalaika apeela ukulatungulula aba mu calo icikesa,+ ico tulelandapo. 6 Lelo inte imo yalembele ukuti: “Wa nshi mwibukisha no kwibukisha umuntu,+ nelyo wa nshi umwana wa muntu uwa kuti mulemusakamana?+ 7 Mwamulengele ukuti abe uwacepako panono pali bamalaika; mwamupeele ubukata no mucinshi,+ no kumupeela umulimo wa kwangalila ifyo mwabumba.+ 8 Ifintu fyonse mwafibikile pe samba lya makasa yakwe.”+ Apo alengele ifintu filetungululwa kuli ena,+ Lesa tashile icintu nangu cimo icishaletungululwa kuli ena.+ Lelo pali nomba, tatulati tumone ifintu fyonse filetungululwa kuli ena;+ 9 lelo tumona Yesu, uo bacefesheko panono pali bamalaika,+ nabamufwika ubukata+ no mucinshi pa mulandu wa kuti aliculile ukufika na ku mfwa.+ Ku cikuuku ca kwa Lesa afwilile umuntu onse.+

10 Pantu calilingile kuli ena uo ifintu fyonse fyabelapo+ kabili uo fyonse fyaishila muli ena ukuti alenge uo asala ukupeela+ ipusukilo lyabo ukupwililika ku macushi aculile,+ pa kuti atwale abana abengi ku bukata.+ 11 Pantu bonse, uulelenga bambi ukuba aba mushilo na bo alelenga ukuba aba mushilo+ batuntuka kuli umo,+ kabili e mulandu wine ashumfwila insoni ukubeta ati “bamunyinane,”+ 12 pa kusosa ati: “Nkalumbula ishina lyenu kuli bamunyinane; mu cilonganino e mo nkamulumbanishisha mu nyimbo.”+ 13 Na kabili atila: “E o nkacetekela.”+ Na kabili atila: “Moneni! Ine na bana abo Yehova ampeela.”+

14 E ico, apo “abana” balikwata umulopa no mubili, na o wine aishilekwata umulopa no mubili,+ ukuti mu mfwa+ yakwe onaule+ uwakwata amaka ya kulenga imfwa,+ e kutila, Satana Kaseebanya;+ 15 no kuti alubule+ bonse abatekelwe ubusha ubumi+ bwabo bonse pa mulandu wa kutiina imfwa.+ 16 Pantu kwena te bamalaika aleafwa iyo, lelo mwana wa kwa Abrahamu e o aleafwa.+ 17 E ico ali no kuba nga “bamunyina” muli fyonse,+ pa kuti abe shimapepo mukalamba uwa luse kabili uwa cishinka mu mulimo wa kwa Lesa,+ pa kuti atuule ilambo lya kufuta imembu*+ sha bantu.+ 18 Apo umwine aliculile ilyo ale-eshiwa,+ kuti ayafwa abale-eshiwa.+

3 E ico, mwe bamunyinefwe aba mushilo, mwe baba pa baitwa+ mu muulu, tontonkanyeni pali Yesu, umutumwa+ kabili shimapepo mukalamba uo twasuminamo.+ 2 Ali uwa cishinka+ ku wamusontele ukubomba uyu mulimo, filya na Mose+ ali mu ng’anda Yakwe yonse.+ 3 Pantu ena bamumwene ukuti alilinga ukuba no bukata+ ubukalamba nga nshi ukucila Mose, nga filya uwakuula+ ing’anda acindikwa ukucila ing’anda.+ 4 Ca cine, ing’anda yonse muntu akuula, lelo uwapangile ifintu fyonse ni Lesa.+ 5 Kabili Mose ali umubomfi+ wa cishinka mu ng’anda Yakwe yonse. Umulimo wakwe wali bushininkisho bwa fyali no kulandwa ku ntanshi,+ 6 lelo Kristu ali uwa cishinka ngo Mwana+ uwaleangalila ing’anda Yakwe. Ifwe tuli ng’anda Yakwe,+ nga twatwalilila ukulanda ukwabula umwenso no kutwalilila ukuitakishisha pe subilo ukufika na ku mpela.+

7 E ico, nga filya umupashi+ wa mushilo watila: “Nga mwaumfwa kwi shiwi lyakwe ubushiku bwa lelo,+ 8 mwitalamika imitima yenu nga filya cali ilyo ifikolwe fyenu fyankalifye,+ nga filya cali mu bushiku bwa kwesha+ mu matololo,+ 9 ilyo ifikolwe fyenu fyanjeseshe, nangu ca kutila balimwene imilimo+ yandi pa myaka amakumi yane (40).+ 10 E ico nalikalipe pali iyi nkulo kabili natile, ‘Balaluba lyonse mu mitima yabo,+ ne mibele yandi tabaishiba.’+ 11 Na ine e pa kulapa mu bukali bwandi nati, ‘Tabakengile+ mu kutuusha kwandi.’”+

12 Cenjeleni, mwe bamunyinefwe, epali umo pali imwe aba no mutima uwabipa uwabula icitetekelo pa kufuma kuli Lesa wa mweo;+ 13 lelo mulekonkomeshanya+ cila bushiku, ilyo lyonse batila “Ubushiku bwa lelo”+ pa kuti umo uwa muli imwe etalama pa mulandu wa kubeleleka+ kwa lubembu. 14 Pantu cine cine twaba na Kristu+ kulila fye twatwalilila no kucetekela uko twakwete pa kutendeka ukufika na ku mpela,+ 15 apo casoswa ati: “Nga mwaumfwa kwi shiwi lyakwe ubushiku bwa lelo,+ mwitalamika imitima yenu nga filya cali ilyo ifikolwe fyenu fyankalifye.”+

16 Pantu ni bani abaumfwile lelo abakalifye Lesa?+ Bushe te bonse abafumine mu Egupti abaletungululwa kuli Mose?+ 17 Na kabili, ni bani Lesa afuliilwe pa myaka amakumi yane (40)?+ Bushe te balya ababembwike, abo ifitumbi fyabo fyawilile mu matololo?+ 18 Kabili ni kuli bani alapile+ ukuti tabakengile mu kutuusha kwakwe? Bushe te kuli balya ababulilwe icumfwila?+ 19 E ico twamona ukuti tabaingilemo pantu tabakwete icitetekelo.+

4 E ico, apo kucili ubulayo bwa kwingila mu kutuusha+ kwakwe, tucenjele epali umo pali imwe afilwa ukwingilamo.+ 2 Pantu imbila nsuma yalibilwa na kuli ifwe,+ filya cali na kuli balya;+ lelo amashiwi ayo baumfwile tayabaafwile iyo,+ pantu tabakwete icitetekelo+ cimo cine na balya abaumfwilile.+ 3 Pantu ifwe fwe batetekela tuleingila mu kutuusha, nga filya asosa ati: “Na ine e pa kulapa+ mu bukali bwandi nati, ‘Tabakengile+ mu kutuusha kwandi,’”+ nangu ca kutila imilimo yakwe yapwile+ ilyo icalo caishilebako.+ 4 Pantu pe lembo limo alanda pa bushiku bwalenga cinelubali (7) ati: “Kabili Lesa atuushishe ku milimo yakwe yonse mu bushiku ubwalenga cinelubali,”+ 5 na kabili pano atila: “Tabakengile mu kutuusha kwandi.”+

6 E ico, apo kucili bamo abakengilamo, kabili abo imbila nsuma+ yabililweko intanshi tabaingilemo pa mulandu wa kubulwa icumfwila,+ 7 na kabili alilinga ubushiku bumo pa kusosa mu malumbo ya kwa Davidi pa numa ya nshita iyalepa ifi ati “Ubushiku bwa lelo”; nga filya cisoselwe kale ati: “Nga mwaumfwa kwi shiwi lyakwe ubushiku bwa lelo,+ mwitalamika imitima yenu.”+ 8 Pantu Yoshua+ nga alibengishe mu kutuusha,+ Lesa nga talandile+ na kabili pa bushiku bumbi. 9 E ico kanshi kucili isabata lya kutuushamo ku bantu ba kwa Lesa.+ 10 Pantu umuntu uwaingila mu kutuusha+ kwa kwa Lesa, ninshi atuusha na ku milimo yakwe,+ filya fine na Lesa atuushishe ku milimo yakwe.

11 E ico tuibikilisheko ukwingila muli uko kutuusha, epali umo awa no kupashanya balya ababulilwe icumfwila.+ 12 Pantu icebo+ ca kwa Lesa ca mweo+ kabili ca maka+ kabili calitwa ukucila ulupanga+ ulwatwila kubili kubili kabili cilapulinkanya ica kuti calekanya ifyo umuntu aba+ ne fyaba mu mutima wakwe,+ cilekanya na pasuntikanina amafupa no bufyompo, kabili cileshiba amatontonkanyo na mapange ya mutima.+ 13 Kabili takwaba icibumbwa icafisama ku cinso cakwe,+ lelo ifintu fyonse fyaba ubwamba kabili fyaba pa mbilibili ku menso ya uyo tukalubululako.+

14 E ico apo tuli na shimapepo mukalamba uwaya ku muulu,+ Yesu Umwana wa kwa Lesa,+ tutwalilile ukusumina muli ena.+ 15 Pantu tatuli na shimapepo mukalamba, uushingatulangulukilako+ pa kunapwililika kwesu, lelo tuli na shimapepo mukalamba uwaeshiwa muli fyonse nga ifwe, nomba ena taba na lubembu.+ 16 E ico, tupalamine+ ukwabula umwenso+ ku cipuna ca bufumu ica cikuuku ca kwa Lesa, pa kuti tupokelele uluse no kusanga icikuuku ca kwa Lesa pa kuti atwafwe pa nshita tulekabila ubwafwilisho.+

5 Pantu ico basontela shimapepo mukalamba onse uwasalwa pa bantu kulaimininako abantu ilyo alebomba umulimo wa kwa Lesa,+ ukuti atuule ifya bupe na malambo ifya pa membu.+ 2 Kuti alangulukilako abashaishiba na balelufyanya, pantu na o mubembu,+ 3 e mulandu wine afwile ukutuulila imituulo iya pa membu shakwe umwine pamo ne sha bantu.+

4 Kabili umuntu taipeela umwine ici cifulo icacindama,+ kano fye ilyo aitwa kuli Lesa,+ nga filya na Aarone+ aitilwe. 5 Na Kristu na o taicindamike fye umwine+ pa kuba shimapepo mukalamba,+ lelo acindamikwe+ ku walandile pali ena ati: “Uli mwana wandi; ine, buno bushiku, nimba wiso.”+ 6 Nga filya asosa na pambi ati: “Ni we shimapepo umuyayaya nga filya fine Melkisedeke ali.”+

7 Ilyo ali umuntunse, Kristu alipapeete no kulomba+ e lyo no kulila nga nshi+ ne filamba kuli Uyo uwali na maka ya kumupususha ku mfwa, kabili balimuumfwile pa mulandu wa kutiina Lesa.+ 8 Nangu ali Mwana, asambilile icumfwila ku fintu aculileko;+ 9 kabili ilyo bamulengele ukupwililika+ bamupeele umulimo wa kupususha+ umuyayaya bonse abamumfwila,+ 10 pantu e waitwa kuli Lesa ukuba shimapepo mukalamba nga filya Melkisedeke ali.+

11 Tuli ne fintu ifingi ifya kusosa pali ena kabili ifya-afya ukulondolola, pantu tamumfwa bwangu.+ 12 Pantu kwena, nangu ca kutila mufwile ukuba bakasambilisha+ pa mulandu wa nshita iyapitapo, mucili mulekabila umo uwa kumusambilisha ukufuma ku kutendeka ifya kubalilapo+ ukwishiba mu mashiwi ya mushilo aya kwa Lesa;+ kabili mukabila umukaka, te fya kulya ifyakosa iyo.+ 13 Pantu onse uunwa umukaka taishiba amashiwi ya bulungami, pantu mucece.+ 14 Lelo ifya kulya ifyakosa fya bakalamba, abo ukupitila mu kubelesha balikwata amano+ aya kulekanya icalungama ne calubana.+

6 E ico, apo nomba twalifuma ku masambililo ya kutendekelako+ pali Kristu,+ natubombeshe tulole ku bukalamba.+ Twibwelela kabili ku masambililo ya kutendekelako,+ e kutila, aya kulapila ku milimo ya fye,+ na ya pa citetekelo kuli Lesa,+ 2 ukusambilisha ifya lubatisho,+ no kubikapo iminwe,+ ukubuushiwa kwa bafwa+ no bupingushi bwa muyayaya.+ 3 Kabili ici e co tukacita, nga cine cine Lesa asuminisha.+

4 Pantu abo ulubuuto lwa kwa Lesa lwasanikila,+ kabili abaumfwapo ifyo ica bupe ca mu muulu cawama,+ kabili abapokelela umupashi wa mushilo,+ 5 kabili abaumfwapo+ ifyo icebo ca kwa Lesa cawama kabili abasondapo ifya maka ifyo Lesa acita ifikaba mu mitekele iileisa,+ 6 lelo abafumako,+ te kuti babalenge ukulapila,+ pantu abene beka bapoopela cipya cipya Umwana wa kwa Lesa pa cimuti no kumuseebanya apabuuta.+ 7 Pantu no mushili uunwa imfula iilokelapo libili libili, e lyo wamesha ifimenwa ifya kulya abaulimine,+ ulapokelela ipaalo ukufuma kuli Lesa. 8 Lelo nga wamesha imyunga na bacilasa, balauleka kabili ni cikanga no ku-utiipa;+ kabili balasuka baoca.+

9 Lelo, pali imwe mwe batemwikwa, nangu tulelanda ifi, tuli abashininkisha ukuti imwe mulecita ifyawamapo ne fintu ifitwala kwi pusukilo. 10 Pantu Lesa taba uushalungama, takalabe umulimo wenu no kutemwa uko mwalangile kwi shina+ lyakwe, apo mwa-afwile* aba mushilo+ kabili muletwalilila ukubafwa. 11 Lelo tulefwaisha onse uwa muli imwe alange ukucincila kumo kwine pa kuti mucetekele+ sana isubilo+ ukufika na ku mpela,+ 12 pa kuti mwiba abanang’ani,+ lelo mube abapashanya+ abo abapokelele ifyalaiwe pantu balitetekele kabili balitekenye.+

13 Pantu ilyo Lesa alaile ubulayo bwakwe kuli Abrahamu,+ apo tali na kulapa umbi uwamucila, ailapile+ umwine 14 ati: “Ukupaala kwena nkakupaala, no kufusha nkakufusha.”+ 15 Kabili ico Abrahamu alitekenye, apokelele ubu bulayo.+ 16 Pantu abantu balapa uwabacila,+ no mulapo wabo e mpela ya kukansana konse, pantu waba e bushininkisho kuli bena.+ 17 E fyo na Lesa, pa kufwaya ukulangisha bwino bwino ku mpyani+ sha bulayo ukuti ukufwaya kwakwe takwali na kwaluka,+ alilapile no mulapo, 18 pa kuti, muli ifi fintu fibili ifishaluka umo Lesa ashingabepa,+ e mo ifwe fwe bafulumukila ku cubo tukoseleshiwe nga nshi pa kuti twikatishe isubilo+ ilyabikilwa ifwe. 19 Ili isubilo+ tukwete lyaba nge nanga ya mweo, ilyashininkishiwa kabili ilyakosa, kabili lingila mu kati ka nsalu,+ 20 umo Yesu, uwaba shimapepo mukalamba umuyayaya nga filya Melkisedeke ali,+ atutangilila ukwingila.+

7 Pantu uyu Melkisedeke, imfumu ya ku Salemu, shimapepo wa kwa Lesa Uwapulamo,+ uwakumenye Abrahamu alefuma ku kwipaya ishamfumu no kumupaala+ 2 kabili uo Abrahamu ayakenyeko ica pe kumi ica pali fyonse,+ ishina lyakwe intanshi lipilibula “Imfumu ya Bulungami,” e lyo na kabili ni mfumu ya ku Salemu,+ e kutila, “Imfumu ya Mutende.” 3 Ico takwete wishi, nangu ni nyina, kabili takwete ifikolwe, e lyo kabili takwali intendekelo ya nshiku+ shakwe nangu impela ya bumi bwakwe, lelo apo bamulengele ukupalana no Mwana wa kwa Lesa,+ aba ni shimapepo umuyayaya.+

4 Moneni, kanshi, ifyo uyu muntu acindeme uo Abrahamu, icikolwe, apeele ica pe kumi pa fisuma ifyo apokolwele.+ 5 Cine cine, abantu aba mu bana ba kwa Lebi+ abapokelela bushimapepo baebwa ukupoka ku bantu+ ifya pe kumi+ nge fyo Amafunde yalanda, e kutila, kuli bamunyinabo, nangu ca kuti aba bafuma muli Abrahamu;+ 6 lelo umuntu uushafumine mu lupwa+ lwa kwa Lebi apokele ifya pe kumi kuli Abrahamu+ no kupaala uwakwete amalayo.+ 7 Lelo te ca kutwishika ukuti umunono bamupaala ku mukalamba.+ 8 Lyonse abapokelela ifya pe kumi+ bantu abena kufwa, lelo pano, umuntu uo batila aba no mweo wa muyayaya e wapokelele ifya pe kumi.+ 9 Kabili, nalimo nsose fye nati, muli Abrahamu, na Lebi wine uupokelela ifya pe kumi alipeela ifya pe kumi, 10 pantu ali mu musana+ wa kwa wishi ilyo Melkisedeke amukumenye.+

11 Kwena, nga cine cine ukupwililika+ kwaishiile muli bushimapepo bwa bena Lebi,+ (pantu bwali mu Mafunde ayo bapeele abantu,)+ bushe shimapepo umbi kuti afwaikwa ukwima na kabili+ mu musango wa kwa Melkisedeke+ kabili te mu musango wa kwa Aarone iyo? 12 Apo bushimapepo bulealulwa,+ ninshi kufwile kwaba no kwaluka ukwe funde.+ 13 Pantu umuntu uo balandapo ifi fintu wa mu mukowa umbi,+ umushaba nangu umo uwalebombela ku ciipailo.+ 14 Pantu calishibikwa bwino ukuti Shikulwifwe atuntuka muli Yuda,+ umukowa uo Mose ashalandilepo nangu cimo pali bashimapepo.

15 Kabili calishibikwa bwino nga nshi ukuti kwalima shimapepo+ umbi uwaba nga Melkisedeke,+ 16 uwaba shimapepo, nomba te kulingana ne funde lya buntunse,+ lelo ukulingana na maka ya bumi ubushingonaika,+ 17 pantu mwi lembo limo, basosele ati: “Ni we shimapepo umuyayaya nga filya fine Melkisedeke ali.”+

18 Kanshi balefumyapo icipope icabalilepo pa mulandu wa kuti calinaka+ kabili tacibomba bwino.+ 19 Pantu tapali nangu cimo ico Amafunde yalengele ukupwililika,+ lelo isubilo+ ilyawamisha ilyo baleta lyena lyalilenga ifintu ukupwililika, kabili umu e mo tulepalamina kuli Lesa.+ 20 Kabili, apo pali no mulapo, 21 (pantu kwena kwaba abantu ababa bashimapepo apabula umulapo, lelo kwaba umo uwaba shimapepo ku mulapo uo Lesa alapile pali ena ilyo atile: “Yehova nalapa,+ kabili takalanguluke, atile, ‘Ni we shimapepo umuyayaya,’”)+ 22 ifyo fine na Yesu e bushininkisho bwa cipangano icawamako.+ 23 Na kabili, abengi bali bashimapepo mu bupyani+ pa mulandu wa mfwa+ iyalebalesha ukutwalilila, 24 lelo ena pa mulandu wa kuti aba uwa mweo umuyayaya,+ aba na bushimapepo bwakwe ubwabula impyani nangu shimo. 25 E ico kuti apususha umupwilapo bonse abalepalama kuli Lesa muli ena, pantu lyonse aba uwa mweo ku kubapapaatilako.+

26 Pantu shimapepo mukalamba uwaba ifi e watulinga,+ pantu wa cishinka,+ takwata akabi,+ takowela,+ alipaatuka ku babembu,+ kabili alicila imyulu.+ 27 Takabila ukulatuula amalambo cila bushiku,+ intanshi pa membu+ shakwe umwine e lyo na pa sha bantu,+ filya bashimapepo bakalamba bacita: (pantu acitile ici umuku umo+ fye capwa ilyo aituulile+ umwine;) 28 pantu Amafunde yasonta abantu ababa no kunaka+ ukuba bashimapepo+ bakalamba, lelo amashiwi ya mu mulapo+ ayaishile pa numa ya Mafunde yasonta Umwana, uwalengwa ukuba uwapwililika+ umuyayaya.

8 Awe pa fyo tulelandapo, icishinka cikalamba ni ci: Tuli no yu shimapepo+ mukalamba uwaba ifi, uwaikala ku kuboko kwa ku kulyo ukwa cipuna ca bufumu ica Bucindami mu muulu,+ 2 uubombela abantu mu ncende ya mushilo+ kabili mu cikuulwa ca mushilo ica cine cine, ico Yehova+ apangile, te muntu iyo.+ 3 Pantu shimapepo mukalamba onse asontelwa ukutuula ifya bupe na malambo;+ e ico no yu wine afwile ukukwata cimo ica kutuula.+ 4 Nomba ena nga aba pano isonde, nga taba shimapepo,+ pantu e ko baba abatuula ifya bupe ukulingana na Mafunde, 5 lelo aba bantu babomba umulimo wa kwa Lesa mu caba fye icimpashanya+ kabili icinshingwa+ ca fintu ifya mu muulu; nga filya Mose na o bamwebele icipope+ ca bulesa, ilyo ali mupepi no kupanga icikuulwa ca mushilo+ no kucipwisha. Pantu ena atila: “Ukashininkishe ukuti wapanga ifintu fyonse ukulingana ne mimonekele ya fiko iyo walangilwe mu lupili.”+ 6 Lelo nomba Yesu alipokelela umulimo wa kubombela abantu uwacilapo ukuwama, ica kuti aba kabili kawikishanya+ wa cipangano+ ico na co icawamisha, icashintilila pa mafunde na pa malayo ayawamisha.+

7 Pantu icipangano ca ntanshi nga cali icabulwa akalema, nga takwali ukufwaya icipangano ca bubili;+ 8 pantu alisanga icilubo mu bantu pa kulanda ati: “Yehova atila, ‘Moneni! Inshiku shikesa, ilyo nkapangana icipangano icipya na ba mu ng’anda ya kwa Israele na ba mu ng’anda ya kwa Yuda;+ 9 icipangano,+ icishakabe nga cilya napangene ne fikolwe fyabo mu bushiku nabekete ku kuboko kwabo pa kuti mbafumye mu calo ca Egupti,+ pantu tabaikalilile mu cipangano candi,+ na ine e pa kuleka ukubasakamana,’ e fyo asosa Yehova.”+

10 “Yehova atila, ‘Pantu ici e cipangano ico nkapangana na ba mu ng’anda ya kwa Israele pa numa ya nshiku shilya, nkabika amafunde yandi mu matontonkanyo yabo, kabili nkayalemba mu mitima yabo.+ Kabili nkaba Lesa wabo,+ na bo bakaba abantu bandi.+

11 “‘Kabili umuntu onse takasambilishe umwikashi munankwe kabili umuntu onse takasambilishe munyina, ati: “Ishiba Yehova!”+ Pantu bonse bakanjishiba,+ ukufuma ku munono ukufika ku mukalamba. 12 Pantu nkababelela uluse pa micitile yabo iishalungama, kabili nshakebukishe imembu+ shabo na kabili.’”+

13 Pa kulanda ati “icipangano cipya” ninshi alenga ica ntanshi ukupwa.+ Awe ico balengele ukupwa kabili ica kale cilepalamina ku kuloba.+

9 Lelo, icipangano ca ntanshi cena cali na mafunde ya kukonka mu mulimo+ wa kwa Lesa kabili cali no mwa mushilo pano calo.+ 2 Pantu bakuulile umuputule+ wa ntanshi uwa mu cikuulwa ca mushilo umwali ica kutekapo inyali+ ne tebulo+ ne mikate+ ya kutuula; kabili uyu e witwa ati “Umuputule wa Mushilo.”+ 3 Kabili ku numa ya nsalu+ ya kucingilako iya bubili kwali umuputule na umbi uwitwa ati “Umuputule wa Mushilo Nga Nshi.”+ 4 Umu e mwali icifutumwino+ ica golde ne cipao ca cipangano+ ico babikileko golde+ konse konse, umwali inongo iya golde iyabamo mana+ ne nkonto iya kwa Aarone iyabalwile amaluba,+ na mabwe ayapaapaatala+ aya cipangano; 5 lelo pa muulu wa iko pali bakerubi+ ba bukata abo ifinshingwa fyabo fyalekupa pa nciliko ya pa cipao iyo baleita ati ica kufutilako imembu.+ Awe ino te nshita ya kuti nondolole fyonse pali ifi fintu.

6 Pa numa ya kuteyanya ifi fintu muli uyu musango, bashimapepo bengila lyonse mu muputule+ wa ntanshi uwa mu cikuulwa ca mushilo ku kubomba imilimo ya kwa Lesa;+ 7 lelo mu muputule walenga bubili e mo shimapepo mukalamba engila eka umuku umo pa mwaka,+ kabili engila no mulopa,+ uo atuula pa mulandu wakwe umwine+ e lyo na pa membu isho abantu bacita mu kukanaishiba.+ 8 E fyo umupashi wa mushilo ulangilila bwino ukuti inshila+ ya kuya mu ncende ya mushilo yali tailasokololwa ilyo icikuulwa ca mushilo ica ntanshi calipo.+ 9 Ici cine cikuulwa ca mushilo ca kulanga+ ifyo cali no kuba pali ino nshita,+ kabili ukufika na nomba ifya bupe na malambo filatuulwa.+ Lelo, ifi tafilenga uulebomba umulimo wa kwa Lesa abe+ na kampingu umusuma,+ 10 lelo fyaba fye pa fya kulya+ na pa fya kunwa+ na pa kutubika abantu ne fintu mu menshi*+ ukwalekanalekana. Aya yali mafunde ya fya ku mubili+ fye kabili yali no kubako mpaka ne nshita ya kulungika ifintu.+

11 Lelo, ilyo Kristu aishile nga shimapepo+ mukalamba uwa fintu ifisuma ifyafikilishiwa, apitile mu cikuulwa ca mushilo icikalamba kabili icapwililika nga nshi icishapangwa ku minwe, e kutila, icishili ca pano calo,+ 12 nomba taingilemo no mulopa+ wa mbushi no wa bana ba ng’ombe, lelo aingile no mulopa wakwe,+ kabili aingile mu ncende ya mushilo umuku fye umo capwa, no kutuletela ukulubuka kwa muyayaya.+ 13 Pantu nga ca kutila umulopa wa mbushi+ no wa ng’ombe+ ne mito+ ya bana ba ng’ombe ifyo basansa pa bantu abakowela+ filabalenga ukuba aba mushilo pa kuti Lesa alebamona abasanguluka,+ 14 ninshi umulopa+ wa kwa Kristu, uwaituulile+ umwine uwabula akalema kuli Lesa ukupitila mu mupashi wa muyayaya, wena walicilapo ukusangulula+ bakampingu besu ku milimo+ iyafwa pa kuti tubombele+ Lesa wa mweo.

15 E mulandu wine abela kawikishanya+ wa cipangano cipya, pa kuti abaitwa bapokelele ubulayo bwa bupyani bwa muyayaya,+ pantu kwali imfwa iya kubalubula+ ku fya bumpulamafunde fya mu cipangano ca kale.+ 16 Pantu ukuli icipangano,+ umuntunse uwapanga icipangano afwile ukufwa. 17 Pantu icipangano cibomba pa bantu abafwa, pantu taciba na maka nakalya ilyo umuntu uwapanga ico cipangano acili uwa mweo. 18 E ico nangu cipangano+ ca kale tacatendeke apabula umulopa.+ 19 Pantu ilyo Mose aebele abantu+ bonse icipope conse icalingana na Mafunde, abuulile umulopa wa ng’ombe no wa mbushi na menshi kabili asanshile kwi buuku na pa bantu bonse ukubomfya amasako ya mpanga ayakashika ce na husope,+ 20 no kutila: “Uyu e mulopa wa cipangano ico Lesa amweba ukulasunga.”+ 21 Kabili asanshile umulopa ku cikuulwa ca mushilo+ na ku fipe fyonse ifya kubomfya mu mulimo wa kubombela abantu.+ 22 Awe, ukulingana na Mafunde ni cikanga umulopa+ usangulule fyonse, e ico umulopa nga tausuumine+ te kuti kube ukubelelwa uluse.+

23 E ico calilingile ukuti ifimpashanya+ fya fintu fya mu muulu fyali no kusangululwa kuli aya yene malambo,+ lelo ifya mu muulu fyena fyali no kusangululwa ku malambo ayawamisha ukucila amalambo ya musango yu. 24 Pantu Kristu taingile mu ncende ya mushilo iyapangwa ku minwe ya bantu,+ iyaba cimpashanya fye ica ncende ya mushilo iya cine cine,+ lelo aingile mu muulu mulya mwine fye,+ pa kuti amonekele ku cinso ca kwa Lesa pa mulandu wesu.+ 25 Kabili taingile ukuti aleituula libili libili, nga filya shimapepo mukalamba engila mu ncende ya mushilo+ cila mwaka+ no mulopa uushili wakwe. 26 Nga cali ifyo, nga ali no kulacula libili libili ukufuma pa kutendeka+ kwa ba pano calo. Lelo nomba alimoneka+ umuku umo+ fye capwa ku mpela ya nshita+ ino pa kuti afumyepo ulubembu ukupitila mwi lambo lyakwe.+ 27 Kabili nga filya fine abantu+ bafwile ukufwa umuku umo fye capwa, e lyo pakonka ubupingushi,+ 28 e fyo na Kristu atuulilwe ilambo umuku fye umo+ capwa pa kuti asende imembu sha bengi;+ e lyo umuku+ walenga bubili akamoneka+ te pa mulandu wa membu,+ kabili abamufwaisha pa kuti bapusuke bakamumona.+

10 Apo Amafunde yaba e cinshingwa+ ca fintu ifisuma ifikesa, lelo tayali e filya fine fintu iyo, abantu te kuti balenge abapalamina kuli Lesa ukuba abapwililika ku malambo yamo yene aya cila mwaka ayo batuula lyonse.+ 2 Nga tacali ifi, bushe nga tabalekele ukutuula amalambo, pantu ababomba umulimo wa kwa Lesa kabili abasangululwa limo fye tabali no kulaibukisha imembu?+ 3 Lelo, muli aya malambo mwaba ukwibukisha imembu cila mwaka,+ 4 pantu umulopa wa ng’ombe ishilume no wa mbushi te kuti usende imembu.+

5 E ico pa kwisa pano calo, atila: “‘Tamwalefwaya+ ilambo no mutuulo, lelo mwampekanishishe umubili.+ 6 Tamwatemenwe imituulo iituntulu iya koca no mutuulo wa pa lubembu.’+ 7 E lyo natile, ‘Moneni! Naisa (filya Amalembo* yalanda pali ine)+ ku kucita ukufwaya kwenu, mwe Lesa.’”+ 8 Ilyo intanshi atila: “Tamwafwaile nangu ukutemwa amalambo ne mituulo, ne mituulo iituntulu iya koca no mutuulo wa pa lubembu”+—amalambo ayatuulwa ukulingana na Mafunde+— 9 e lyo kabili atila: “Moneni! Naisa ku kucita ukufwaya kwenu.”+ Afumyapo ica ntanshi pa kuti abikepo icalenga bubili.+ 10 Ni ku “kufwaya”+ uku kwine twalengeelwe ukuba aba mushilo+ mu mubili wa kwa Yesu Kristu uwatuulilwe+ umuku umo+ fye capwa.

11 Kabili shimapepo onse eminina+ cila bushiku+ ku kubombela abantu no kutuula amalambo yamo yene libili libili, apo yena te kuti yafumyepo imembu nakalya.+ 12 Lelo uyu muntu atuulile ilambo limo ilya pa membu ku ciyayaya+ no kwikala ku kuboko kwa ku kulyo ukwa kwa Lesa,+ 13 ukufuma lilya line alalolela mpaka abalwani bakwe bakabikwe ukuba apa kunyanta amakasa yakwe.+ 14 Pantu ni ku mutuulo+ umo uwe lambo e ko alengela abantu abalelengwa ukuba aba mushilo ukupwililika+ umuyayaya. 15 Kabili umupashi+ wa mushilo na o ulatushinina pali ici, pantu ilyo watila: 16 “‘Ici e cipangano ico nkapangana na bo pa numa ya nshiku shilya,’ e fyo asosa Yehova. ‘Nkabika amafunde yandi mu mitima yabo, kabili nkayalemba mu matontonkanyo yabo,’”+ 17 pa numa usosa auti: “Kabili nshakebukishe na kabili imembu shabo ne micitile yabo iyabipa.”+ 18 Awe apo kuli ukubabelela uluse,+ takulekabilwa na kabili umutuulo wa pa membu.+

19 E ico, mwe ba bwananyina, apo tuli abashipa ukwingila+ mu ncende ya mushilo+ pa mulandu wa mulopa wa kwa Yesu, 20 uo atwiswilile ku kuba inshila iipya kabili iya mweo ukupitila mu nsalu,+ e kutila, mu mubili wakwe,+ 21 kabili apo tuli na shimapepo mukalamba uwangalila ing’anda ya kwa Lesa,+ 22 natupalame kuli Lesa ne mitima ya cine no kucetekela nga nshi pa mulandu wa citetekelo, apo imitima yesu na kampingu+ uwabipa fyalisangululwa* ne mibili yesu yalisambwa mu menshi ayalengama.+ 23 Tutwalilile ukulanda pe subilo+ lyesu ku bantu bonse ukwabula ukunenuka,+ pantu wa cishinka+ uwalaile. 24 Kabili tutontonkanye pa banensu ku kucincishanya+ ku kutemwa kabili ku kubomba imilimo iisuma,+ 25 twilapuswa ku kulongana,+ filya waba umusango wa bamo, lelo tulekoseleshanya,+ maka maka apo mulemona ubushiku bulya bulepalama.+

26 Pantu nga tulacita ulubembu ku mufulo+ fye pa numa ya kwishiba icine+ bwino bwino, ninshi takwashala na kabili ilambo nangu limo ilya pa membu shesu,+ 27 lelo kwashala fye ukulolela mwenso mwenso ubupingushi,+ e lyo no bukali ubulepya ngo mulilo ubuli no konaula abakaanya.+ 28 Umuntu uwasuula amafunde ya kwa Mose afwa ukwabula ukubelelwa uluse, nga ca kuti pali inte shibili nelyo shitatu.+ 29 Bushe muletila akakandwa+ shani, umuntu uunyantaula+ Umwana wa kwa Lesa kabili uumona umulopa+ wa cipangano uo bamulengelemo ukuba uwa mushilo ukuti tawacindama sana, kabili uukalifya no kusaalula umupashi+ wa cikuuku ca kwa Lesa? 30 Pantu twalimwishiba uwatile: “Nine mfwile ukulandula; nine nkabweseshapo”;+ kabili uwatile: “Yehova akapingula abantu bakwe.”+ 31 Ala ca kutiinya ukuwila mu minwe ya kwa Lesa wa mweo.+

32 Lelo, muleibukisha inshiku sha kale, ilyo mwashipikishe ukushomboka ukukalamba mu macushi+ pa numa ya kupokelela ulubuuto,+ 33 inshita shimo mwaleseebana no kucula pa menso ya bantu kwati muli umwa kutambila ifyangalo,+ ne nshita shimbi mwaleculila pamo na baleponenwa ne fya musango yu.+ 34 Pantu mwalelangulukilako abali mu cifungo no kusekelela ilyo mwapokelwe+ ifipe fyenu, pa kwishiba mwe bene ukuti muli ne cuma icawamisha kabili icibelelela.+

35 E ico, mwileka ukulanda ukwabula umwenso,+ pantu mwaliba icilambu+ icikalamba. 36 Pantu mukabila ukushipikisha,+ pa kuti, ilyo mwacita ukufwaya kwa kwa Lesa,+ mukapokelele ifyo bamulaya.+ 37 Pantu kushele fye “akashita akanono,”+ ninshi “uukesa afika kabili takakokole iyo.”+ 38 “Lelo uwalungama wandi akaba uwa mweo pa mulandu wa citetekelo cakwe,”+ kabili, “nga abwelela inuma, ninshi nshakasekelele muli ena.”+ 39 Awe ifwe tatuli bantu ababwelela inuma no konaika,+ lelo tuli bantu abakwata icitetekelo icikatupususha.+

11 Icitetekelo+ kulolela kwashininkishiwa ukwa kuti ifintu tulesubila+ fikacitika, kabili e bushininkisho bwa kuti ifintu nangu tafilamoneka, fya cine cine.+ 2 Pantu Lesa atashishe aba ku kale pa mulandu wa citetekelo cabo.+

3 Citetekelo cilenga twiluke ukuti ifintu+ fya pano calo ne fya muulu fyateyanishiwe ku mashiwi ya kwa Lesa,+ ica kuti ifimoneka fyafumine ku fintu ifishimoneka.+

4 Citetekelo calengele ukuti Abele atuule ilambo ilyacindama ukucila ilya kwa Kaini,+ kabili ici citetekelo e calengele ukuti balemumona ukuti alilungama, kabili Lesa alangile+ ici pa kupokelela ifya bupe fyakwe; kabili muli ici cine e mo acili alandila nangu ca kuti alifwa.+

5 Citetekelo calengele ukuti Enoke+ bamusende pa kuti emona imfwa, kabili tasangilwe pantu Lesa alimusendele;+ pantu ilyo tabalamusenda ashimikwe ukuti alesekesha Lesa.+ 6 Kabili ukwabula icitetekelo+ te kuti tusekeshe Lesa,+ pantu uupalamina kuli Lesa afwile ukusumina ukuti e ko aba+ no kuti alalambula+ abamufwaisha.+

7 Citetekelo calengele ukuti Noa,+ ilyo asokelwe kuli Lesa pa fintu ifyali tafilamoneka,+ alange ukuti alatiina Lesa no kukuula icibwato+ pa kuti apusushe aba mu ng’anda yakwe; kabili muli ici icitetekelo ashinine aba muli ici calo,+ no kuba impyani ya bulungami+ ubufuma ku citetekelo.

8 Citetekelo calengele ukuti Abrahamu,+ ilyo aitilwe, omfwe no kuya ku cifulo ico ali no kupokelela no kupyana; kabili afumine uko aleikala, nangu taishibe uko aleya.+ 9 Citetekelo calengele ukuti ekale umweni mu calo ca bulayo kwati ni mu calo cimbi,+ no kwikala mu matenti+ pamo na Isaki+ na Yakobo,+ impyani pamo nankwe isha bulayo ubu bwine.+ 10 Pantu alelolela umusumba+ uwakwata imifula ine ine iya kukuulapo, uo kakuula kabili kalenga wa uko ni Lesa.+

11 Citetekelo calengele ukuti Sara+ apokelele amaka ya kwimita, nangu ca kuti alicilile pa mushinku wa kufyala,+ apo alishibe ukuti wa cishinka uwalaile.+ 12 E ico na ku muntu+ umo, uwali ngo wafwa,+ kwafyelwe abana abafulile nge ntanda sha mu muulu kabili ngo mucanga uwa mu lulamba lwa bemba, uushingapendwa.+

13 Bonse aba bafwile ne citetekelo,+ nangu ca kuti tabapokelele ifyo babalaile,+ lelo bafimwenene ukutali+ no kufisekelela kabili balandile ku bantu bonse ukuti bali abeni kabili abalendo mu calo.+ 14 Pantu bonse abasosa ifya musango yu balanga ukuti balafwaisha icifulo icikaba icabo.+ 15 Na lyo line, nga balefuluka icifulo uko bafumine,+ nga balibwelelamo.+ 16 Lelo nomba balefwaisha icifulo icawamapo, e kutila, ica mu muulu.+ E ico Lesa tomfwa insoni ukuti balemwita ati Lesa wabo,+ pantu alibapekanishisha umusumba.+

17 Citetekelo calengele ukuti Abrahamu, ilyo aeshiwe,+ apene atuule Isaki ilambo, kabili umuntu uwapokelele amalayo apene atuule umwana wakwe uwafyelwe eka ilambo,+ 18 nangu ca kuti balimwebele ukuti: “Uuketwa ‘umwana obe’ akafuma muli Isaki.”+ 19 Lelo alishibe ukuti Lesa ali na maka ya kumwimya ku bafwa;+ kabili ukufuma uko kwine e ko amupokelele, kabili ici cali cilangililo.+

20 Citetekelo calengele na Isaki ukupaala Yakobo+ na Esau+ pa fikesa.

21 Citetekelo calengele ukuti Yakobo, ilyo ali mupepi no kufwa,+ apaale abana baume aba kwa Yosefe+ umo umo no kupepa ninshi nashintilila pa nkonto yakwe.+

22 Citetekelo calengele ukuti Yosefe, ilyo ali mupepi no kufwa, alande pa kufuma+ kwa bana ba kwa Israele; kabili abebele ifyo bali no kucita na mafupa yakwe.+

23 Citetekelo calengele ukuti Mose ilyo afyelwe,+ afiswe imyeshi itatu ku bafyashi bakwe, pantu bamwene ukuti umwana ali uwayemba+ kabili tabatiinine icipope+ ca mfumu. 24 Citetekelo calengele ukuti ilyo Mose akulile,+ akaane ukwitwa umwana wa mwana mwanakashi wa kwa Farao,+ 25 asalile ukuculila pamo na bantu ba kwa Lesa ukucila ukuipakisha ubusuma bwa pa kashita fye ubwa lubembu, 26 pantu alishibe ukuti ukuseebana+ aseebene ico ali Uwasubwa* kwali no bucindami ukucila ifyuma fya mu Egupti; pantu atontele amenso pa kupoka icilambu.+ 27 Citetekelo calengele afume ku Egupti,+ lelo tatiinine icipyu ca mfumu,+ pantu atwalilile uwashangila kwati alemona Uushimoneka.+ 28 Citetekelo calengele asefye ica kucilila+ no kusansa umulopa+ pa nceshi sha pa mwinshi, pa kuti uwa konaula ekumyako ku mabeli yabo.+

29 Citetekelo calengele bapite pali Bemba Wakashika kwati ni pa mushili uwauma,+ lelo ilyo abena Egupti baeseshe ukupitapo, balifwile.+

30 Citetekelo calengele amalinga ya Yeriko ukuwa ilyo bayashingulwike inshiku cinelubali (7).+ 31 Citetekelo calengele Rahabu+ cilende ukukanafwila pamo na bashali ne cumfwila, pantu alipokelele inengu mu mutende.+

32 Kabili finshi fimbi ifyo ningasosa? Pantu inshita kuti yancepela nga nati nkonkanyepo ukushimika pali Gideone,+ Baraki,+ Samsone,+ Yefta,+ Davidi+ na Samwele+ na bakasesema bambi,+ 33 abo ku citetekelo bacimfishe amabufumu mu bulwi,+ bacitile ubulungami,+ bapokelele amalayo,+ bacilike utunwa twa nkalamo,+ 34 bacimfishe amaka ya mulilo,+ bapuswike ku lupanga,+ nangu ca kuti bali abanaka balengelwe ukuba aba maka,+ baishileba abakosa mu nkondo,+ bacimfishe abashilika aba ku fyalo fimbi.+ 35 Abanakashi bapokelele abantu babo ababuushiwe ku bafwa;+ lelo abantu bambi balibacushishe pantu balikeene ukulubulwa, pa kuti bamone ukubuuka ukwawamapo. 36 Awe, bambi balibeseshe pa kubapumya no kubafopaula, no kucilapo, balebakaka+ no kubapoosa mu fifungo.+ 37 Babapolele amabwe,+ balibeseshe,+ babaputwile pa kati kuli basoo, babepeye+ ku lupanga, baendawike nabafwala impapa sha mpaanga,+ ne mpapa sha mbushi, ilyo bali abapiina,+ abacula,+ kabili ilyo balebacusha;+ 38 kabili icalo tacalingile ukukwata aba bantu. Baendawike mu matololo na mu mpili na mu ninga+ na mu ncengo sha pano isonde.

39 Na lyo line bonse aba, nangu ca kuti babamwene ukuti balungami pa mulandu wa citetekelo cabo, tabapokelele ifyo babalaile,+ 40 pantu Lesa amwenene libela icintu icacilapo ubusuma+ ico aali no kupeela ifwe,+ pa kuti belengwa+ abapwililika+ ukwabula ifwe.+

12 Kanshi, apo twalishingulukwa ne bumba lya nte*+ ilyakula ifi, na ifwe tufuule conse icafina+ no lubembu ulutwikata bwangu,+ kabili tubutuke no kushipikisha+ ulubilo+ ulwabikwa pa ntanshi yesu,+ 2 ilyo tuletonta amenso kuli Yesu, Intungulushi+ iikalamba kabili uulenga icitetekelo+ cesu ukupwililika. Pa mulandu wa kusekelela ukwabikilwe pa ntanshi yakwe alishipikishe+ ilyo alecula pa cimuti ca kucushiwilwapo, asuulile insoni, kabili aikala ku kuboko kwa ku kulyo ukwa cipuna ca bufumu ica kwa Lesa.+ 3 E ico tontonkanyeni pa washipikishe amashiwi+ ayabipa aya babembu aya kuipilika abene, pa kuti mwinaka no kutompoka.+

4 Mu kulwisha ulubembu mucili tamulalulwisha ica kuti mwasuuma no mulopa,+ 5 kabili namulabilila fye ukukonkomesha uko bamukonkomesha imwe mwe bana,+ ati: “We mwana wandi, wilasuula ukusalapula kwa kwa Yehova, kabili wilatendwa ilyo alekulungika;+ 6 pantu uo Yehova atemwa alamusalapula; na kuba, alafopaula umuntu onse uo apokelela ukuba umwana.”+

7 Ico mushipikishisha ni pa kuti mufundwe.+ Lesa alemusunga nga bana.+ Pantu mwana mwaume nshi uo wishi ashifunda?+ 8 Lelo nga tamufundwa filya bonse babafunda, ninshi tamuli bana iyo, lelo muli bana+ ba kupula fye. 9 Kabili twali na bashifwe abantunse abaletufunda,+ kabili twalebacindika. Bushe nomba te kuti tunakile Shifwe uwatufyaliile ku mupashi pa kuti tutwalilile aba mweo?+ 10 Pantu bena baletufunda inshiku ishinono ukulingana ne fyo abene baletila fisuma,+ lelo Lesa alatufunda pa kuti cituwamine, na ifwe tube aba mushilo ifyo na o aba uwa mushilo.+ 11 Cine cine, ukufunda konse takuleta insansa ilyo line, lelo kuleta ubulanda;+ nomba pa numa, kuli abo abasambililako kulatwala icisabo+ ca mutende, e kutila, ubulungami.+

12 E ico kosheni amaboko yenu ayatompoka+ na makufi ayanakuka,+ 13 kabili mulewamya inshila sha kwendamo amakasa yenu,+ pa kuti icilundwa icalemana cifyutuka, lelo cipole.+ 14 Lyonse mulebombesha ukuba aba mutende ku bantu bonse,+ no kuba aba mushilo+ pantu umuntu nga tali uwa mushilo takamone Shikulu,+ 15 mulecenjela pa kuti umuntu nangu umo epusulwa icikuuku ca kwa Lesa;+ ukuti umushila+ uwalula wimena no kuleta amafya kabili wikowesha abengi;+ 16 ukuti kwiba uwa bulalelale nangu umuntu uwasuula ifya mushilo, uwaba nga Esau,+ uwakaabwile ububeli bwakwe ne mbale imo iya fya kulya.+ 17 Pantu namwishiba ukuti na pa numa ilyo afwaile ukupyana ipaalo+ balimukeene,+ pantu, nangu ca kutila afwaile ukwalula wishi ninshi alelila ne filamba,+ alifililwe.+

18 Pantu tamwapalamina ku lupili ulumoneka+ kabili ululebilima umulilo,+ na kwi kumbi ilyafiita na ku mfifi iyafiita fititi na ku nkuuka,+ 19 na ku kulila kwe penga+ na kwi shiwi.+ Ilyo abantu baumfwile ili shiwi, bapapeete ukuti bebeba amashiwi na yambi.+ 20 Pantu lyalibafishe ifunde ilyatila: “Ne nama nga yakumya ku lupili, ipoolwe amabwe.”+ 21 Kabili icamoneke cali ica kutiinya nga nshi ica kuti Mose atile: “Natiina no kututuma.”+ 22 Lelo imwe mwalipalamina ku Lupili lwa Sione+ kabili umusumba+ wa kwa Lesa wa mweo, Yerusalemu+ wa mu muulu, na kuli bamalaika iminshipendwa,+ 23 mu kulongana kwa bonse,+ na ku cilonganino ca mabeli+ ayalembwa+ mu muulu, na kuli Lesa Kapingula wa bonse,+ na ku bumi+ bwa ku mupashi ubwa balungama abalengwa ukuba abapwililika,+ 24 na kuli Yesu kawikishanya+ wa cipangano cipya,+ na ku mulopa asuumishe,+ uulanda bwino ukucila umulopa wa kwa Abele.+

25 Cenjeleni ukuti mwikaana ukumfwa uulelanda.+ Pantu nga tabapuswike abakeene ukumfwa uwalesoka ukusoka kwa kwa Lesa pano isonde,+ cikaba shani kuli ifwe nga twakaana ukumfwa ku ulelanda ukufuma mu muulu?+ 26 Pali ilya nshita ishiwi lyakwe lyatenseshe isonde,+ lelo nomba alaya, ati: “Na kabili te sonde fye lyeka nkatenkanya lelo no muulu wine.”+ 27 Awe amashiwi ayatila “Na kabili” yalangilila ukuti ifintu ifiletenshiwa ifyapangwa+ bakafifumyapo, pa kuti ifintu ifishiletenshiwa fikalilile.+ 28 E ico, apo twamona ukuti tuli no kupokelela ubufumu ubushingatenshiwa,+ tutwalilile ukuba ne cikuuku ca kwa Lesa, icitwafwa ukubombela Lesa bwino umulimo wa mushilo, pamo no kutiina Lesa no kututuma.+ 29 Pantu Lesa wesu ena mulilo uonaula.+

13 Mutwalilile ukutemwa aba bwananyina.+ 2 Mwilaba ukulapokelela abeni,+ pantu e mo bamo bapokelele bamalaika ukwabula ukwishiba.+ 3 Muleibukisha abo bakaka+ mu fifungo kwati na imwe balimukaka pamo na bo,+ e lyo na bo balecusha,+ apo na imwe bene mucili mu mubili. 4 Icupo cifwile ukuba ica mucinshi kuli bonse, kabili tacifwile ukuba icakowela,+ pantu aba bulalelale na bacende Lesa akabakanda.+ 5 Mu mikalile yenu mwilatemwa indalama,+ lelo muteke imitima+ ku fintu+ ifyo mukwete. Pantu atila: “Nshakakushe nakalya nangu ukukulekelesha nakalya.”+ 6 E mulandu wine twingabela abashipa+ no kusosa atuti: “Yehova e kaafwa wandi; nshakatiine. Cinshi ico umuntu engancita?”+

7 Muleibukisha abalemutungulula,+ abalanda amashiwi ya kwa Lesa kuli imwe, kabili ilyo mwamona ififuma mu myendele yabo, mupashanye+ icitetekelo cabo.+

8 Yesu Kristu aba cimo cine, ifyo ali mailo e fyo aba na lelo, kabili e fyo akaba umuyayaya.+

9 Mwilufiwa ku fisambilisho+ ifyalekanalekana kabili fimbi fimbi; pantu cisuma umutima ukukoshiwa ku cikuuku+ ca kwa Lesa, te ku fya kulya+ iyo, ifishafwa abafitemwisha.

10 Tuli ne ciipailo ico ababomba umulimo wa mushilo mu cikuulwa ca mushilo tababa ne nsambu sha kulya ifilipo.+ 11 Pantu imibili ya nama isho umulopa wa shiko shimapepo mukalamba atwala mu ncende ya mushilo pa mulandu wa lubembu, yena yocelwa ku nse ya nkambi.+ 12 E ico na Yesu aculile ku nse ya mpongolo,+ pa kuti alenge abantu ukuba aba mushilo+ ku mulopa+ wakwe. 13 E ico, kanshi tufume mu nkambi tuye uko ali, tuseebane ukuseebana uko aseebene,+ 14 pantu pano tatukwete umusumba uwikalilila,+ lelo tulefwaisha uukesa.+ 15 Muli Yesu e mo lyonse tuletuulila ilambo lya kulumbanya+ Lesa, e kutila, icisabo ca milomo+ iilumbula apabuuta ishina lyakwe.+ 16 Kabili, mwilaba ukucita icisuma+ no kupeelana ifintu, pantu amalambo ya musango yu e yasekesha Lesa.+

17 Umfwileni abalemutungulula+ no kubanakila,+ pantu balinda imyeo yenu nga bantu abakalubulula;+ pa kuti bacite ici ne nsansa, te mu bulanda iyo, pantu nga caba ifi kuti camubipila.+

18 Muletupepelako,+ pantu natucetekela ukuti tuli na kampingu umusuma,* apo tufwaya ukuba aba cishinka muli fyonse.+ 19 Lelo ndemukoselesha nga nshi ukucita ici, pa kuti nkabwelele bwangu kuli imwe.+

20 Awe Lesa wa mutende,+ uwaimishe ku bafwa+ Shikulwifwe Yesu uwali no mulopa wa cipangano+ ica muyayaya, kabili uwaba umucemi+ mukalamba uwa mpaanga,+ 21 amupangashe na conse icisuma pa kuti mulecita ukufwaya kwakwe, pa kucitila muli ifwe icawama mu menso yakwe,+ ukupitila muli Yesu Kristu; kuli ena kube ubukata umuyayaya.+ Ameni.

22 Awe ndemukoselesha, mwe bamunyinane, ukuti mumfwile aya mashiwi aya kukoselesha, pantu ine, kwena, nembele kalata kuli imwe uwa mashiwi ayanono.+ 23 Ishibeni ukuti munyinefwe Timote+ nakakulwa, kabili nga aisa bwangu, ninshi tukaba nankwe pa kwisamumona.

24 Posheni bonse abalemutungulula,+ na ba mushilo bonse. Abali mu Italia+ bamuposha.

25 Icikuuku+ ca kwa Lesa cibe na imwe bonse.