YONA
1 Yehova aebele Yona*+ umwana wa kwa Amitai amashiwi ya kuti: 2 “Ima, kabiye ku musumba uukalamba uwa Ninebe,+ uyebila imbila ya bupingushi ku bekalamo, pantu nimona ifyabipa ifyo bacita.”
3 Lelo Yona aliimine no kuya ku Tarshishi pa kuti abutuke Yehova; aile ku Yopa uko asangile ubwato ubwaleya ku Tarshishi. E ico alilipile aba bwato anina na mu bwato pa kuti aye ku Tarshishi, pantu alefwaya ukubutuka Yehova.
4 Lyena Yehova alengele pali bemba paba icimwela icikalamba, kabili pali icikuuku ca mwela icikalamba ica kuti kwempe fye ubwato nga bwalyonaike. 5 Abale-ensha ubwato batendeke ukulilila kuli balesa babo pa kuti babafwe. Kabili batendeke ukufumya ifipe mu bwato no kufipoosa muli bemba, pa kuti ubwato bwangukeko.+ Lelo Yona aile mu kati ka bwato mu muputule uwa panshi, kabili alisendeme apona na mu tulo. 6 Umukalamba wa bwato aile kuli ena no kumweba ati: “Cinshi ulaalile? Ima, lilila kuli lesa obe! Nalimo Lesa wa cine alatulangulukilako, pa kuti twifwa.”+
7 Lyena batampile ukulanshanya abati: “Iseni tupendule+ pa kuti twishibe uwalenga tukwate ubu bwafya.” E ico balipendwile kabili icipendwilo cawilile Yona.+ 8 E lyo bamwipwishe abati: “Shi twebe, nani walenga tukwate ubu bwafya? Mulimo nshi ubomba, kabili ni kwi wafuma? Uli wa ku calo nshi, kabili bantu nshi wafumako?”
9 Na o abaswike ati: “Ndi muHebere, kabili Yehova Lesa wa mu muulu uwabumbile bemba no mulundu e o mpepa.”*
10 Ilyo abebele ifi, aba baume balitiinine nga nshi, kabili bamwipwishe abati: “Cinshi wacitila ifi?” (Balishibe ukuti alefulumuka Yehova, pantu alibebele.) 11 E ico bamwipwishe abati: “Cinshi twalakucita pa kuti bemba atalale?” Pantu icikuuku ca mwela pali bemba calekulilako fye. 12 Na o abaswike ati: “Njimyeni mumpoose muli bemba, na bemba alatalala; pantu ninjishiba ukuti nine nengele pali bemba pabe ici icikuuku ca mwela.” 13 Nomba aba baume balyeseshe na maka ukubwesesha ubwato ku mulundu, lelo balifililwe, pantu icikuuku ca mwela calekulilako fye pali bemba.
14 Lyena baliliile kuli Yehova abati: “Iye mwe Yehova, mwileka tufwile pa mulandu wa uyu muntu!* Kabili mwitupeela umulandu wa kwipaya uyu muntu* wa kaele, pantu fyonse ifi filecitika kufwaya kwenu mwe Yehova.” 15 E lyo baimishe Yona no kumupoosa muli bemba; na bemba alitalele. 16 Lyena aba bantu balitiinine Yehova+ nga nshi, kabili balituulile Yehova ilambo balapa ne milapo.
17 E lyo Yehova atumine icisabi icikalamba icaminine Yona, kabili Yona ali mu nda ya cisabi inshiku shitatu, akasuba no bushiku.+
2 Lyena Yona apepele kuli Yehova Lesa wakwe ninshi ali mu nda ya cisabi,+ 2 apepele ati:
“Ilyo nalecula naliliile kuli imwe mwe Yehova, kabili mwalinjaswike.+
Ilyo nali panshi* ya Nshiishi* nalilombele ukuti mungafwe.+
Na imwe mwaling’umfwile.
3 Ilyo mwampoosele muli bemba uwapabuka kabili uwashika,
Lyena amenshi aya mukuku yalinshingulwike.+
Amabimbi yenu aya maka yalepita pa muulu wandi.+
4 Kabili natile, ‘Namuntamfya pa cinso cenu!
Bushe nkatala monapo itempele lyenu ilya mushilo na kabili?’
Kabili ifitabilila fya muli bemba fyalimpombele ku mutwe.
6 Nalibiile ukuyafika na panshi ya mpili.
Isonde lyalinjisaliile impongolo sha liko umuyayaya.
Kabili nali mu kati ka liko, lelo mu cilindi e mo mwamfumishe, mwe Yehova Lesa wandi.+
7 Ilyo nali mupepi no kufwa,* nalimwibukishe mwe Yehova.+
Lyena mwalyumfwile ipepo lyandi, mwi tempele lyenu ilya mushilo.+
8 Abapepa utulubi utwa fye, basuula intulo yabo iya kutemwa ukushipwa.*
9 Nkamutootela kabili nkamutuula ilambo.
Ico nalaya, nkafikilisha.+
Yehova alapususha.”+
10 E lyo Yehova aebele icisabi ukuti cilukile Yona ku mulundu, na co calimulukile.
3 Lyena Yehova aebele Yona pa muku walenga bubili ati:+ 2 “Ima, kabiye ku musumba uukalamba uwa Ninebe,+ kabili uyebila imbila iyo ndekweba.”
3 E ico Yona alyumfwilile Yehova+ kabili aliimine aya na ku Ninebe.+ Nomba Ninebe wali musumba uukalamba,* uwa kwendamo inshiku shitatu. 4 Lyena Yona aingile mu musumba kabili alyendele akasuba konse ninshi alebila ati: “Kwashala fye inshiku 40, ninshi Ninebe bayonaula.”
5 Lyena abantu ba mu Ninebe balitetekele Lesa,+ kabili babilile imbila ya kuti abantu bonse mu Ninebe batendeke ukufunga kabili bafwale insamu, nampo nga bakankaala, bapiina, bakalamba, nelyo baice. 6 Ilyo imfumu yaumfwile aya mashiwi yalimine pa cipuna ca iko ica bufumu, yafuula ne ca kufwala ca bufumu, yafwala insamu yaikala na mu mito. 7 Kabili yabikileko icipope ico abena Ninebe bonse bali no kukonka ica kuti,
“Imfumu na bacilolo nababikako icipope ca kuti: Takuli umuntu uufwile ukulya nangu cimo. Takuli uufwile ukulya ifya kulya nelyo ukunwa amenshi. Kabili takuli inama iifwile ukulya icili conse nelyo ukunwa amenshi. 8 Lekeni bonse bafwale insamu, ne nama na sho bashifimbe insamu; kabili balilile kuli Lesa ne mitima yabo yonse, baleke ifyabipa ifyo bacita kabili baleke ubunkalwe. 9 Tatwishibe nalimo Lesa kuti ayalula ubupingushi bwakwe* kabili kuti abweshamo ubukali bwakwe ubulepya ngo mulilo, pa kuti twiloba.”
10 Ilyo Lesa wa cine amwene ifyo bacitile, ifyo balekele ukucita ifyabipa ifyo balecita,+ alyalwile ubupingushi bwakwe* kabili tabakandile filya alefwaya ukubakanda.+
4 Lelo Yona tatemenwe nangu panono pali ifi fyacitike, kabili alikalipe nga nshi. 2 E ico Yona apepele kuli Yehova ati: “Iye, mwe Yehova, bushe ifi te fyo naishibe ukuti e fyo mukacita ilyo nali ku calo ca ku mwesu? E co pa kubala nalefwaila ukubutukila ku Tarshishi;+ pantu nalishibe ukuti nimwe Lesa uulangulukilako* kabili muli ba luse, mulakokola ukukalipa kabili mwaliba sana no kutemwa ukushipwa,+ nalishibe no kuti mulaalula ubupingushi bwenu pa kuti mwikanda ababifi. 3 Nomba mwe Yehova, lekeni fye mfwe, pantu cawamapo nafwa* ukucila ukutwalilila ukuba no mweo.”+
4 Yehova amwipwishe ati: “Bushe naulungika ifi wakalipa nga nshi?”
5 E lyo Yona afumine mu musumba no kuyaikala ku kabanga ka musumba. Lyena apangile umusakuta, kabili aikele mwi samba lya musakuta umwali icintelelwe pa kuti amone ifyali no kucitikila umusumba.+ 6 Yehova Lesa ameseshe ulungu* ulwatabiliile pa musakuta wa kwa Yona, ulwalengele akwata icintelelwe pa kuti omfweko bwino, kabili Yona alitemenwe nga nshi pali filya ulungu lwamenene.
7 Lelo pa bushiku bwakonkelepo ku macaca Lesa atumine icinsenda, kabili caliile ulungu no kuma lwalyumine. 8 Ilyo akasuba kabalike, Lesa atumine umwela uwakaba uwa ku kabanga, na o waleoca Yona ica kuti kwempe fye nga alifwile icipuupu. Kabili alelomba Lesa ukuti afwe.* Aleti: “Cawamapo nafwa ukucila ukutwalilila ukuba no mweo.”+
9 Lesa aipwishe Yona ati: “Bushe naulungika ifi wakalipa nga nshi pali ulu ulungu?”+
Na o ayaswike ati: “Ee ninungika, ninkalipa nga nshi ica kuti ni cikanga fye mfwe.” 10 Lelo Yehova amwebele ati: “Iwe waumfwila ulungu ubulanda, ulo ushabombeele kabili ulo ushameseshe; ulwakulile fye mu bushiku bumo, kabili mu bushiku bukonkelepo lwauma. 11 Bushe na ine nshifwile ukumfwila Ninebe ubulanda, umusumba uukalamba+ umwaba abantu ukucila pali 120,000 abashaishiba ukulekanya icalungama ne calubana,* kabili umwaba inama ishingi?”+
Ilyalola mu kuti “Inkunda.”
Mu ciHebere, “e o ntiina.”
Nelyo “pa mulandu wa mweo wa uyu muntu!”
Mu ciHebere, “umulandu wa mulopa.”
Mu ciHebere, “mu nda.”
Nelyo “Sheol,” e kuti inshiishi ya bantu bonse. Moneni Amashiwi ya mu Baibo ne fyo Yapilibula.
Nelyo “ilyo umweo wandi wali mupepi no kufwa.”
Nelyo kuti yapilibula no kuti “basuula bucishinka bwabo.”
Mu ciHebere, “Lesa aleumona ukuti wali musumba uukalamba.”
Nelyo “kuti alanguluka.”
Nelyo “alilangulwike.”
Nelyo “uwa nkumbu.”
Nelyo “sendeni umweo wandi.”
Nelyo ici icimenwa kuti caba ni “imono.”
Nelyo “alefwaya ukuti umweo wakwe ufwe.”
Nelyo “abashaishiba ubupusano bwaba pa kuboko kwabo ukwa ku kulyo no kuboko kwabo ukwa ku kuso.”