HAGAI

1 Mu mwaka wa bubili ukutula apo Imfumu Dariusi yatendekeele ukuteka, mu mweshi walenga 6, pa bushiku bwa kubalilapo ubwa mu mweshi, e po icebo ca kwa Yehova caishiile muli kasesema Hagai*+ ico alingile ukweba umulashi wa mu Yuda, Serubabele+ mwana Shealtiele, na shimapepo mukalamba Yoshua, mwana Yehosadaki, aciti:

2 “Ifi e fyo Yehova wa mabumba alanda, ‘Aba bantu batila, “Inshita ya kuti ing’anda* ya kwa Yehova ikuulwe cipya cipya tailafika.”’”+

3 Kabili icebo ca kwa Yehova caishiile na kabili muli kasesema Hagai,+ aciti: 4 “Bushe ni nshita ya kuti imwe muleikala mu mayanda yenu ayo mwayemfya ne mbao ishisuma, ilyo ing’anda yandi yalyonaika?+ 5 E ico nomba Yehova wa mabumba atila, ‘Tontonkanyeni bwino* pa fyo mucita. 6 Mulatanda imbuto ishingi, lelo mulobolola ifinono.+ Mulalya, lelo tamwikuta. Mulanwa, lelo umwangashi ulacepa. Mulafwala, lelo takuba uumfwa ukukaba. Uubombela amalipilo ayabika mu mufuko uwatulika.’”

7 “Yehova wa mabumba atila, ‘Tontonkanyeni bwino* pa fyo mucita.’

8 “‘Nineni ulupili no kuleta imbao.+ Kabili mukuule ing’anda,+ pa kuti ntemwe iyi ng’anda kabili ncindamikwe,’+ e fyo Yehova alanda.”

9 “‘Mwalefwaya ifingi, lelo mwasangile ifinono; kabili ilyo mwafiletele mu ng’anda, nalifipuutilepo kabili fyalisalangene.+ Mulandu nshi?’ e fyo Yehova wa mabumba alanda. ‘Pantu ing’anda yandi yalyonaika, lelo imwe namupamfiwa, cila muntu abikile fye amano ku ng’anda yakwe.+ 10 E co imyulu yamutaniine umume wa iko, ne sonde na lyo e co lyamutaniine ifisabo fya liko. 11 Kabili naletele icilala pe sonde, pa mpili, pa ngano, pa mwangashi uupya, pa mafuta, pali conse icimena pa mushili, pa bantunse, pa fitekwa, na pa milimo yenu yonse.’”

12 Awe Serubabele+ mwana Shealtiele,+ na shimapepo mukalamba Yoshua, mwana Yehosadaki+ na bantu bonse balikonkele ifyo Yehova Lesa wabo abebele, ne fyo Hagai kasesema abebele, pantu Yehova Lesa wabo alimutumine; kabili abantu batendeke ukutiina Yehova.

13 Lyena Hagai inkombe ya kwa Yehova, aebele abantu ukulingana ne fyo Yehova amwebele, ati: “‘Ine ndi na imwe,’+ e fyo Yehova alanda.”

14 E ico Yehova acincishe Serubabele+ mwana Shealtiele, umulashi wa calo ca Yuda,+ na shimapepo mukalamba Yoshua,+ mwana Yehosadaki, na bantu bonse; kabili balishile no kutendeka ukukuula cipya cipya ing’anda ya kwa Yehova wa mabumba, Lesa wabo.+ 15 Ifi fyacitike pa bushiku bwalenga 24 ubwa mu mweshi walenga 6 mu mwaka walenga bubili ukutula apo Imfumu Dariusi yatendekele ukuteka.+

2 Mu mweshi walenga 7, pa bushiku bwalenga 21, e po icebo ca kwa Yehova caishiile muli kasesema Hagai,+ aciti, 2 “Shi ipusha Serubabele+ mwana Shealtiele, umulashi wa calo ca Yuda,+ na shimapepo mukalamba Yoshua+ mwana Yehosadaki,+ na bantu abashala auti: 3 ‘Nani pali imwe uwamwene iyi ng’anda* mu bukata bwa iko ubwa ntanshi?+ Bushe muleimona shani nomba? Bushe taili iya fye nga kuilinganya ku ya ntanshi?’+

4 “‘Lelo kosa, we Serubabele,’ e fyo Yehova alanda, ‘kabili kosa, we Yoshua shimapepo mukalamba, mwana Yehosadaki.’

“‘Kabili koseni, mwe bantu bonse aba mu calo,+ ‘kabili bombeni,’ e fyo Yehova alanda.

“‘Pantu ndi na imwe,’+ e fyo Yehova wa mabumba alanda. 5 ‘Ibukisheni ifyo namulaile ilyo mwafumine mu Egupti,+ kabili ncili ndemutungulula na maka yandi.*+ Mwitiina.’”+

6 “Pantu ifi e fyo Yehova wa mabumba alanda, ‘Na kabili mu nshita fye iinono ndi no kutensha imyulu ne sonde na bemba no mulundu.’+

7 “‘Awe nkatensha inko shonse, kabili ifyuma* fya nko shonse fikesa muli iyi ng’anda;+ kabili nkesushamo ubukata,’+ e fyo Yehova wa mabumba alanda.

8 “‘Silfere yandi, na golde yandi,’ e fyo Yehova wa mabumba alanda.

9 “‘Ubukata bwa iyi ng’anda bukacila pa bwa ng’anda ya ntanshi,’+ e fyo Yehova wa mabumba alanda.

“‘Kabili nkalenga muli iyi ncende mukabe umutende,’+ e fyo Yehova wa mabumba alanda.”

10 Pa bushiku bwalenga 24 ubwa mu mweshi walenga 9, mu mwaka walenga bubili ukutula apo Dariusi atendekeele ukuteka, e po icebo ca kwa Yehova caishile kuli kasesema Hagai,+ aciti: 11 “Ifi e fyo Yehova wa mabumba alanda, ‘Shi ipusha bashimapepo pa mafunde,+ auti: 12 “Bushe umuntu nga asendela umunofu wa mushilo mu ca kufwala cakwe, kabili cakumya umukate nelyo ica kulya icaipikwa nelyo umwangashi nelyo amafuta nelyo umusango onse uwa ca kulya, bushe ico ica kulya kuti caba ica mushilo?”’”

Bashimapepo ba-aswike abati: “Awe!”

13 Lyena Hagai aipwishe ati: “Bushe umuntu nga nakowela pa mulandu wa kuti nakumya ku citumbi* e lyo akumya kuli cimo pali ifi fintu, bushe kuti cakowela?”+

Bashimapepo ba-aswike abati: “Ee kuti cakowela.”

14 E ico Hagai atile: “‘E fyaba na ba bantu, kabili e fyo ulu luko lwaba kuli ine, kabili e fyaba ne milimo yonse iya minwe yabo; conse ico batuula calikowela,’ e fyo Yehova alanda.

15 “‘Nomba ukutula lelo no kuya ku ntanshi muletontonkanya* pali ici: Cali shani ilyo ilibwe lishilabikwa pe libwe libiye mwi tempele lya kwa Yehova?+ 16 Ilyo umo aishile ku mwiina wa ngano uwa fipimo 20, kwali fye ifipimo 10; kabili ilyo umo aishile ku ca kukaminamo umwangashi pa kuti atapulemo ifipimo 50, mwali fye 20;+ 17 nalimukandile ilyo nalengele amabuula ya filimwa fyenu yababuka no kufufuma,+ kabili namuleteele ne mfula ya mabwe, lelo tapali nangu umo pali imwe uwabwelele kuli ine,’ e fyo Yehova alanda.

18 “‘Ukutula lelo no kuya ku ntanshi muletontonkanya* pali ici, ukufuma pa bushiku bwalenga 24 ubwa mweshi walenga 9, ukufuma pa bushiku umufula we tempele lya kwa Yehova wapangilwe;+ muletontonkanya pali ici: 19 Bushe mu butala mucili imbuto?+ Bushe umwangashi, umukunyu, umupomegranate no muolife fyalitwala ifisabo? Ukutula lelo nakulamupaala.’”+

20 Pa bushiku bwalenga 24 ubwa mweshi,+ Yehova aebele Hagai umuku walenga bubili, ati: 21 “Eba Serubabele umulashi wa calo ca Yuda, auti, ‘Ndi no kutensha imyulu ne sonde.+ 22 Nkawisha ifipuna fya mabufumu no kupwisha amaka ya mabufumu ya nko;+ kabili nkonaula amaceleta na baninamo, kabili bakabalwe bakafwa na bendelapo bakepayana ku lupanga.’”+

23 “‘Muli ubo bushiku,’ e fyo Yehova wa mabumba alanda, ‘nkakubuula, we mubomfi wandi Serubabele+ mwana Shealtiele,’+ e fyo Yehova alanda, ‘kabili nkalenga ukabe nge nindaminwe ya kufwatikilako, pantu ni we nasala,’ e fyo Yehova wa mabumba alanda.”