MALAKI

1 Imbila:

Aya e mashiwi ayo Yehova aebele abena Israele ukupitila muli Malaki:*

2 Yehova atila, “Nalimulanga imwe mwe bantu ukuti nalimutemwa.”+

Lelo mutila: “Mwatulanga shani ukuti mwalitutemwa?”

Yehova atila, “Bushe Esau taali ni munyina wa kwa Yakobo?+ Lelo ine natemenwe Yakobo. 3 Esau ena nalimupatile;+ kabili nalengele impili shakwe shashala icibolya,+ nalengele no bupyani bwakwe bwaba icifulo ca kwikalamo bamumbwe ba mu matololo.”+

4 Yehova wa mabumba atila, “Edomu atila, ‘Balitonaula, lelo tuli no kubwela no kukuula cipya cipya icalo cesu icashala icibolya.’ ‘Bakakuula, lelo ine nkabongolola. Kabili abantu bakalaita icalo cabo abati “icalo umwaisula abantu abacita ifyabipa” no kuti “abantu abo Yehova aeba ukuti alibapata umuyayaya.”+ 5 Mukaimwena ilyo ici cikacitika kabili mukatila: “Yehova nacindikwe mu calo ca bena Israele.”’”

6 “Yehova wa mabumba aeba imwe bashimapepo, mwe basuula ishina lyakwe ati, ‘Umwana umwaume alacindika wishi,+ no mubomfi alacindika shikulu wakwe. E ico nga ndi shinwe,+ cinshi mushincindikila?+ Kabili nga ndi shikulwinwe, cinshi mushintiinina?’*+

“‘Lelo imwe mutila: “Inga twasuula shani ishina lyenu?”’

7 “‘Ni co mutuula ifya kulya* ifyakowela pa ciipailo candi.’

“‘Kabili mutila: “Inga twamukowesha shani?”’

“‘Ni co mutila: “Itebulo lya kwa Yehova+ cintu icasuulwa.” 8 Kabili nga mwaisa mu kutuula inama iyapofula, mutila: “Tapali ico tulufyenye ” Na kabili nga mwaisa mu kutuula inama iyalemana nelyo iyalwala, mutila: “Tapali ico tulufyenye.”’”+

“Mukeshe ukutwalila umulashi wenu, mukamone nga akaitemwa nelyo nga akamupokelela bwino.” E fyo Yehova wa mabumba alanda.

9 Nomba lombeni kuli Lesa,* pa kuti atutemwe. Yehova wa mabumba alanda ati, “Bushe iyi imituulo muleta, kuti yalenga namupokelela bwino?”

10 Yehova wa mabumba atila, “Nani pali imwe uuitemenwa ukwisala ifiibi?*+ Pantu tamukosha umulilo pa ciipailo candi ukwabula amalipilo.+ Nshamutemwa, kabili nshatemwa ne mituulo iyo mundetela.”+

11 Yehova wa mabumba alanda ati, “Ukufuma uko akasuba katulila ukufika uko kawila,* inko shikalacindika ishina lyandi.+ Mu ncende shonse abantu bakalaoca amalambo, bakalatuula imituulo, ubupe ubwasanguluka pa kucindika ishina lyandi; pantu inko shikalacindika ishina lyandi.”+

12 “Lelo imwe mulasaalula ishina lyandi,*+ pantu mutila, ‘Itebulo lya kwa Yehova lyalikowela, kabili ifisabo ne fya kulya ifibapo fyalisuulwa.’+ 13 Yehova wa mabumba alanda ati, Na kabili mutila, ‘Moneni! Ili ishina lilatutendusha!’ kabili mulalifyola. Mundetela inama isha kwiba, ishalemana ne shalwala. Ifintu fya musango uyu e fyo mutuula kuli ine! Bushe ningile ukulapokelela imituulo yenu?”+ e fyo Yehova alanda.

14 Yehova wa mabumba atila, “Alitiipwa umuntu uwaba no bucenjeshi, uwa kuti nakwata inama iilume iituntulu mu mukuni wakwe, lelo cilya alapa umulapo, atuula Yehova inama iyalemana. Pantu ndi Mfumu iikalamba,+ kabili abantu ba mu nko bakalatiina ishina lyandi.”+

2 “Nomba ndepeela imwe bashimapepo ili ifunde.+ 2 Nga mwakaana ukukutika, mwakaana no kubika amano ku kucindika ishina lyandi, nkamutiipa+ kabili nkaalula amapaalo yenu yakabe ifitiipu.+ Na kuba ninjalula kale amapaalo yenu, yaba fitiipu pantu tamubikako amano.” E fyo Yehova wa mabumba alanda.

3 “Moneni! Ifyo mucita fikalenga nkonaule* imbuto isho mwabyala,+ kabili nkamukantaika amafi ya nama pa menso, amafi ya nama isho mwipaya ilyo mulesefya imitebeto yenu; kabili bakamupoosa pa miina ya aya yene amafi ya nama. 4 Lyena mukeshiba ukuti nine namupeele ili funde pa kuti icipangano candi na Lebi citwalilile,”+ e fyo Yehova wa mabumba alanda.

5 “Icipangano ico napangene na Lebi calengele atwalilile ukuba no mweo, kabili aleba no mutende. Ifi namupaalile fyalengele alentiina.* Apo alecindika ishina lyandi, talefwaya ukucita nangu cimo icingankalifya. 6 Alesambilisha ifunde lya cine kabili talelanda ifyabipa.+ Pali ine na ena pali umutende. Kabili ali mulungami,+ alilengele na bantu abengi baleka ukucita ifyabipa. 7 Pantu shimapepo afwile ukulasambilisha abantu ifyo aishiba pali Lesa, kabili abantu bafwile ukulaya kuli ena pa kuti abasambilishe amafunde,*+ pantu ni nkombe ya kwa Yehova wa mabumba.

8 “Lelo imwe mwalifuma mu nshila. Mwalilenga abantu abengi baleka ukukonka* amafunde.*+ Tamukonka icipangano ico napangene na Lebi,”+ e fyo Yehova wa mabumba alanda. 9 “E ico nkalenga abantu bakamusuule, kabili bakalemumona ukuti muli ba panshi pa bantu bonse, pantu mwalifumine mu nshila shandi, kabili tamwalekonka bwino amafunde pa kupingula abantu.”+

10 “Bushe ifwe bonse tatwakwata fye shifwe umo?+ Bushe te Lesa umo wine atubumba bonse? E ico, cinshi tubela no bucenjeshi ku banensu?+ Ifi tucita, tulatoba icipangano ca fikolwe fyesu. 11 Yuda alicita ubucenjeshi, kabili aba mu Israele na mu Yerusalemu balicita icintu ica bunani; pantu Yuda alikowesha umushilo* wa kwa Yehova+ uo umwine atemwa, kabili Yuda alyupa umwana mwanakashi wa kwa lesa wa bena fyalo.+ 12 Onse* uwa mu matenti ya kwa Yakobo uucita ifi, Yehova akamulofya, nangu fye alatuula Yehova wa mabumba imituulo.”+

13 “Kabili kwaliba na cimbi* ico mucita, icalenga iciipailo ca kwa Yehova cisulepo ifilamba, ukulila no kulilishika, ica kuti alileka ukubika amano ku mituulo mumutuula nelyo alileka ukupokelela ifyo mumuletela.+ 14 Kabili mutila, ‘Cinshi calenga?’ Ni co Yehova ni nte pali iwe no mukashi obe uo waupile ilyo wali umulumendo, uo wapondokela, nangu ca kuti munobe kabili mukashi uo wapangana nankwe icipangano.*+ 15 Lelo kwali bamo pali imwe abashalefwaya ukulacita ifi. Cinshi calengele? Ni co balefwaya abakatuntuka* muli bena bakabe abantu ba kwa Lesa. E ico na imwe mufwile ukulafwaisha ukucita ifisuma kabili mwilapondokela abakashi ba ku bulumendo bwenu. 16 Pantu nalipata ukulekana,”+ e fyo Yehova Lesa wa kwa Israele alanda, “kabili nalipata* umuntu umunkalwe,” e fyo Yehova wa mabumba alanda. “Mulingile ukulafwaisha ukucita ifisuma kabili mwilaba no bucenjeshi.+

17 “Mwalilenga Yehova atendwa amashiwi yenu.+ Lelo mutila, ‘Bushe amashiwi yesu yamutendusha shani?’ Ni co mutila, ‘Onse uucita ifyabipa musuma mu menso ya kwa Yehova, kabili alimutemwa,’+ nelyo mutila, ‘Bushe Lesa wa mulinganya aba kwisa?’”

3 “Moneni! Nkatuma inkombe yandi, iikawamya* inshila ya kuti nkapitemo.+ Kabili Shikulu wa cine uo mufwaya, akesa kwi tempele+ mu kupumikisha; ne nkombe ya cipangano iyo mwatemwa ikesa. Moneni! Nangu cibe shani ikesa,” e fyo Yehova wa mabumba alanda.

2 “Lelo nani akashipikisha pa bushiku akesa, kabili nani akeminina nga amoneka? Pantu akaba ngo mulilo wa ulopolola ifyela kabili nga sopo+ ya bawasha ifya kufwala. 3 Akekala filya uulopolola ekala, kabili uuwamya silfere+ akasangulula abana baume ba kwa Lebi; akabasangulula* nga filya balopolola golde na silfere, kabili nangu cibe shani Yehova akalabamona ukuti bantu abalungama, abatuula imituulo kuli ena. 4 Kabili imituulo iyo aba mu Yuda na mu Yerusalemu bakalatuula kuli Yehova, ikalamusekesha nga filya cali mu nshiku sha kale na mu myaka ya kale sana.+

5 Yehova wa mabumba atila, “Nkesa mu kumupingula kabili nkangufyanya ukushinina indoshi,+ abacende, abalapa imilapo ya bufi,+ abacenjesha ababomfi pa kubalipila,+ abacenjesha ba mukamfwilwa, abacenjesha abana abashakwata bashibo*+ na bakaana ukwafwa* abalebeshi.+ Pantu abacita ifi tabantiina.”

6 “Pantu nine Yehova; nshaluka.*+ Na imwe muli bana ba kwa Yakobo; tamulaloba. 7 Ukutendekela fye mu nshiku sha fikolwe fyenu mwalisuula amafunde yandi kabili tamuyakonka.+ Bweleleni kuli ine, na ine nkabwelela kuli imwe,”+ e fyo Yehova wa mabumba alanda.

Lelo mutila: “Kuti twabwelela shani kuli imwe?”

8 “Bushe umuntunse kuti aibila Lesa? Lelo imwe mulanjibila.”

Nomba mutila: “Bushe tumwibila shani?”

“Ni co tamundetela ica pe kumi ne misangulo. 9 Cine cine mwalitiipwa,* pantu mulanjibila—bonse fye mu calo mulanjibila. 10 Leteni ifya pe kumi fyonse kabili mufibike umwakusungila ifintu+ pa kuti mu ng’anda yandi mube ifya kulya;+ njesheni, mumone nga ca kuti nshakamwiswile ifipunda fya mu muulu+ no kumupongolwela amapaalo, mpaka amapaalo yakafule ica kuti tamwakalebulisha nangu cimo,”+ e fyo Yehova wa mabumba alanda.

11 Yehova wa mabumba atila, “Kabili nkakalipila makanta pa kuti ikonaula ifisabo fya mu calo cenu, kabili nkalenga ku myangashi ya mu mabala yenu kukaleba ifisabo.”+

12 Yehova wa mabumba atila, “Abantu ba mu nko shonse bakalatila muli bantu ba nsansa,+ pantu icalo cenu cikatemwikwa.”

13 “Amashiwi ayo mulanda pali ine ya musaalula,” e fyo Yehova alanda.

Lelo mutila: “Mashiwi nshi aya musaalula ayo tulanda pali imwe?”+

14 “Mutila, ‘Tamwaba ubusuma mu kubombela Lesa.+ Busuma nshi twasangamo ifi twatwalilila ukumumfwila, ne fi twatwalilila ukulaenda aba bulanda pa cinso ca kwa Yehova wa mabumba? 15 Nomba tumona abantu abaituntumba ukuti ba nsansa. Na bacita ifyabipa ukuti ifintu filabendela bwino.+ Balesha Lesa, lelo takwaba uubakanda.’”

16 Pali ilya nshita abaletiina Yehova balelanshanya, cila muntu alelanshanya no munankwe, na Yehova aalebikako amano kabili aalekutika. Kabili ibuuku umwali amashina ya baletiina Yehova na baletontonkanya sana* pe shina lyakwe+ abo alingile ukwibukisha lyalilembelwe pa ntanshi yakwe.+

17 Yehova wa mabumba atila, “Mu bushiku nkabalenga ukuba abaibela,*+ bakaba abantu bandi.+ Nkaba ne cikuuku kuli bena nga filya fine umuntu aba ne cikuuku ku mwana wakwe umwaume uumubombela.+ 18 Na kabili mukamona ubupusano bwaba pa walungama no mubifi,+ pa ubombela Lesa no ushimubombela.”

4 Yehova wa mabumba atila: “Pantu moneni! Ilyo ubushiku ubulepya nge lungu lya mulilo bukafika,+ bonse abaituntumba na bonse abacita ifyabipa bakaba nge mpimbili. Bakapya bonse, kabili ilyo bukesa takwakashale imishila nelyo imisambo. 2 Lelo akasuba ka bulungami kakabalikila imwe mwe bacindika* ishina lyandi, kakaba ne myengelele* ya kundapilako; kabili mukalacilauka nga bana ba ng’ombe abaina.”

3 Yehova wa mabumba atila, “Mu bushiku nkacita ifi, mukanyantaula ababifi kabili bakaba ngo lukungu pe samba lya makasa yenu.”

4 “Ibukisheni Amafunde ya kwa Mose umubomfi wandi ayo napeele abena Israele bonse pa Horebu kabili ayo nabebele ukuti balekonka, e kutila ifyo mulingile ukulakonka no bupingushi bwandi.+

5 “Moneni! Ilyo ubushiku bwa kwa Yehova ubukalamba kabili ubwa kutiinya bushilafika,+ nkamutumina kasesema Eliya.+ 6 Kabili nkalenga imitima ya bashibo ikabe nge ya bana babo,+ ne ya bana babo ikabe nge ya bashibo; pa kuti nikesaonaula isonde.”

(Apa e papwila Amalembo ya ciHebere ne ciAramaiki, e lyo pakonka Amalembo ya ciGriki aya Bena Kristu)