IMILIMO YA BATUMWA

1 Teofile, mwi buuku lya kubalilapo nalilembele fyonse ifyo Yesu atendeke ukucita ne fyo alesambilisha,+ 2 mpaka fye na pa bushiku asendelwe mu muulu,+ pa numa ya kweba abatumwa abo asalile ifya kukonka ukupitila mu mupashi wa mushilo.+ 3 Pa numa ya kucula, alimoneke ku batumwa bakwe ninshi ali uwa mweo pa kuti abalange ubushininkisho bwa cine cine ubwingi.+ Balemumona pa nshiku shonse 40 kabili alelanda pa Bufumu bwa kwa Lesa.+ 4 Ilyo alelanshanya nabo abebele ati: “Mwikafuma mu Yerusalemu,+ lelo mukalelolela ico Tata alaya,+ ico namwebelepo; 5 pantu Yohane ena alebatishisha mu menshi, lelo tapakapite inshiku ishingi, imwe mukabatishiwa mu mupashi wa mushilo.”+

6 E ico ilyo balongene, bamwipwishe abati: “Mwe Shikulu, bushe ni pali ino nshita mwalabwesesha Israele ubufumu?”+ 7 Yesu abaswike ati: “Te mulimo wenu ukwishiba inshita nelyo inshiku* ilyo ifi fintu fikacitika, pantu Tata e wakwatapo amaka.+ 8 Lelo ilyo umupashi wa mushilo ukesa pali imwe,+ mukapokelela amaka kabili mukaba inte+ shandi mu Yerusalemu,+ mu Yudea monse na mu Samaria,+ na ku mpela ya pano isonde.”+ 9 Ilyo apwishishe ukulanda ifi fintu, ninshi balemulolesha, alisendelwe mu muulu, ne kumbi lyalimufimbile ica kuti baleka no kumumona.+ 10 Kabili ilyo balelolekesha mu muulu ninshi aleya, kwali abaume babili abafwele ifyabuuta+ abaishileiminina mupepi nabo, 11 kabili babebele abati: “Mwe bena Galili, cinshi ico mwimininine pano mulelolekesha mu muulu? Uyu Yesu uwasendwa ku muulu, ifi fine mwamumona asendwa ku muulu no kubwela e fyo akabwela.”

12 Lyena babweleele ku Yerusalemu+ ukufuma ku lupili ulo beta ukuti Ulupili lwa Miolife, ulwaba mupepi na Yerusalemu, apalepa ulwendo lwa bushiku bwe sabata. 13 Ilyo bafikile, baingile mu muputule wa pa muulu umo baleikala. Bali ni Petro na Yohane, Yakobo na Andrea, Filipi na Toma, Bartolomeo na Mateo, Yakobo umwana wa kwa Alfeo na Simone uwacincila, e lyo na Yuda umwana wa kwa Yakobo.+ 14 Aba bonse baali no mutima umo kabili balepepa ukwabula ukuleka. Balepepela pamo na banakashi bamo+ na Maria nyina wa kwa Yesu pamo pene na bamunyina ba kwa Yesu.+

15 Muli shilya shine nshiku e mo Petro aiminine pa kati ka ba bwananyina (abantu* abalimo bonse bali nalimo 120), kabili atile: 16 “Mwe baume, bamunyinane, calilingile ukuti ilembo lifikilishiwe. Umupashi wa mushilo walandile ukupitila muli Davidi pali Yuda,+ uwatungulwile abaikete Yesu.+ 17 Pantu ali pamo na ifwe,+ kabili twalibombele nankwe uyu mulimo. 18 (Uyu muntu, ashitile impanga mu malipilo ya fyabipa ifyo acitile,+ kabili ilyo aponene ninshi nalosha umutwe panshi, alilepwike* na mala yonse yalifumine.+ 19 Abaleikala mu Yerusalemu bonse balishibe ici icacitike, e mulandu wine bainikile ilya mpanga mu lulimi lwabo ukuti Akeldama, e kutila, “Impanga ya Mulopa.”) 20 Pantu mwi buuku lya Amalumbo mwalembwa ukuti, ‘Lekeni ing’anda yakwe ishale icibolya, kabili mwi-ikala nangu umo,’+ mwalembwa no kuti, ‘Lekeni umbi amupyane pali bukangalila.’+ 21 E ico nacilinga ukuti, pa baume abaleba na ifwe inshita yonse iyo Shikulu Yesu alebomba umulimo wakwe ninshi aali na ifwe, 22 ukufuma fye ilyo Yohane amubatishe+ ukufika na lintu asendelwe ku muulu,+ pabe umo uwaliko ilyo Yesu abuushiwe+ uufwile ukwisaba inte pamo na ifwe.”

23 E ico babulile abantu babili, Yosefe uo baleita ukuti Barisaba, uo baleita no kuti Yusti, e lyo na Matia. 24 Lyena bapepele abati: “Mwe Yehova,* mwe baishiba imitima ya bantu bonse,+ sonteni pali aba baume babili uo musalile, 25 uwa kuti alebomba uyu mulimo kabili abe umutumwa, pantu Yuda alisha ifi fintu kabili aliya mu nshila yakwe umwine.”+ 26 E ico balipendwile pali aba bantu,+ kabili icipendwilo cawilile pali Matia. Lyena Matia bamulundile* ku batumwa 11.

2 Nomba bonse bali pa ncende imo, ninshi ubushiku bwa Mutebeto wa Pentekoste+ tabulapwa. 2 Mu kupumikisha fye mu muulu mwaumfwikike icongo kwati cipuupu ca mwela icikalamba, kabili mu ng’anda umo baikele+ mwali fye icongo ceka ceka. 3 Kabili bamwene ifyalemoneka ngo mulilo ifyapala indimi fyasalangana apo bali, kabili fyaikele pali umo na umo. 4 Lyena bonse baiswilemo umupashi wa mushilo,+ kabili batendeke ukulandila mu ndimi ishalekanalekana nge fyo umupashi walengele balalanda.+

5 Pali ilya inshita abaYuda abaletiina Lesa aba mu nko shonse isha mwi samba lya muulu baleikala mu Yerusalemu.+ 6 E ico ilyo abantu baumfwile ici iciunda, ibumba lya bantu lyalilongene kabili balipapile, pantu umo na umo aumfwile abasambi balelandila mu lulimi lwakwe. 7 Ala balipapile icine cine kabili batile: “Moneni, bushe aba bonse abalelanda te bena Galili?+ 8 Nomba cinshi bonse umo umo tulebomfwila balelandila mu ndimi shesu? 9 Pali ifwe pali abena Partia, abena Madai,+ abena Elamu,+ na bekala mu Mesopotamia, mu Yudea na mu Kapadokia, aba mu Ponte na ba mu citungu ca Asia,+ 10 aba mu Frugia, mu Pamfulia, mu Egupti na mu ncende sha Libya ishabela mupepi na ku Kurene, abafumine ku Roma, abaYuda na basangwike abaYuda,+ 11 abena Krete na bena Arabia, lelo tulebomfwa balelandila mu ndimi shesu ifikalamba ifya kwa Lesa.” 12 Awe bonse balipapile kabili balipelenganishiwe, balelanshanya abati, “Bushe ici calola mwi?” 13 Lelo bambi balebapumya abati: “Nabanwesha umwangashi uwalowa.”*

14 Lelo Petro pamo na batumwa bambi 11 baliminine,+ e lyo alanda mwi shiwi ilikalamba ati: “Mwe baume ba mu Yudea na mwe bekala mu Yerusalemu, umfweni kabili kutikisheni ifyo nalalanda. 15 Aba bantu tabakolelwe nge fyo muletunganya, pantu ino nshita liawala lyalenga butatu.* 16 Lelo ifi e fyo Lesa alandiile muli kasesema Yoele. Alandile ati: 17 “‘Kabili mu nshiku sha kulekelesha,” e fyo Lesa alanda, “nkapongolwela umupashi wandi pa bantunse bonse, kabili abana benu abaume na bana benu abanakashi bakalasesema, abalumendo bakalamona ifimonwa na baume benu abakalamba bakalaloota ifiloto,+ 18 muli isho nshiku nkapongolwela umupashi wandi na pa basha bandi abaume na pa basha bandi abanakashi kabili bakalasesema.+ 19 Kabili nkacita ifipesha amano mu muulu ne fishibilo pe sonde. Kukaba umulopa, umulilo e lyo ne cushi. 20 Akasuba kakaaluka imfifi, no mweshi ukaaluka umulopa ilyo ubushiku bwa kwa Yehova* ubukalamba kabili ubwa lulumbi bushilafika. 21 Kabili bonse abalilila kuli Yehova* no kulumbula ishina lyakwe bakapusuka.’”+

22 “Mwe bena Israele, umfweni aya mashiwi: Yesu umwina Nasarete e o Lesa amulangile apabuuta tuutu mu fya maka ne fipesha amano ne fishibilo ifyo Lesa acitiile muli ena ilyo ali na imwe,+ nge fyo na imwe bene mwaishiba. 23 Uyu Yesu, uo bamupeele ukulingana ne fyo Lesa alefwaya ne fyo aishibile libela,+ mwasuminishe bampulamafunde ukuti bamupoopele pa cimuti kabili mwalimwipeye.+ 24 Lelo Lesa alimubuushishe+ ilyo amulubwile ku bukali bwa mfwa,* pantu imfwa tayakwete amaka ya kumwikatilila.+ 25 Na kuba e o Davidi alandilepo ilyo atile: ‘Nabika Yehova* pa ntanshi yandi lyonse. Apo aba ku kuboko kwandi ukwa ku kulyo, nshakatelentenshiwe. 26 E ico umutima wandi nausangalala no lulimi lwandi lulelanda amashiwi aya kusekelela nga nshi. Kabili nkatwalilila ukucetekela Lesa; 27 pantu tamwakanshe* mu Nshiishi,* kabili tamwakaleke uwa cishinka kuli imwe akabole.+ 28 Namulenga naishiba inshila sha ku bumi, kabili ukuba mupepi na imwe*+ kukalenga nkalesekelela nga nshi.’

29 “Mwe baume, bamunyinane, twalikwata insambu sha kumweba pa cikolwe Davidi ukwabula umwenso, ukuti alifwile kabili alishiikilwe,+ ne nshiishi yakwe yaba kuno kwine ukufika na lelo. 30 Apo ali ni kasesema kabili alishibe ukuti Lesa alilapile umulapo kuli ena ukuti ali no kubika umwana wakwe uo ali no kufyala pa cipuna cakwe ica Bufumu,+ 31 alimwenene libela kabili alandile pa kubuushiwa kwa kwa Kristu ukuti, taali no kutwalilila ukuba mu Nshiishi* kabili umubili wakwe tawali no kubola.+ 32 Lesa alibuushishe uyu Yesu, kabili na ifwe bonse twalimwene ukuti alibuushiwe.+ 33 E ico apo Lesa Wishi,+ alimusansabika pa kumubika pa cipuna ca ku kuboko kwakwe ukwa ku kulyo+ kabili alimupeela umupashi wa mushilo uo amulaile, na o napongolwela uyu mupashi pali ifwe. Kanshi uyu umupashi e o mulemona kabili e o muleumfwa. 34 Pantu Davidi taile ku muulu, lelo umwine alandile ati, ‘Yehova* aebele Shikulu ati: “Ikala ku kuboko kwandi ukwa ku kulyo, 35 mpaka nkalenge abalwani bobe bakabe nga kapuna ka kunyantapo amakasa yobe.’”+ 36 E ico, lekeni bonse aba mu ng’anda ya kwa Israele beshibe bwino bwino ukuti Lesa amulengele aba Shikulu+ kabili Kristu, uyu Yesu uo mwaipaile pa cimuti.”+

37 Nomba ilyo baumfwile ifi, balyumfwile ububi sana, kabili baipwishe Petro na batumwa bambi abati: “Mwe baume, bamunyinefwe, cinshi tufwile ukucita?” 38 Petro abebele ati: “Lapileni+ kabili mubatishiwe+ mwi shina lya kwa Yesu Kristu pa kuti mwelelwe imembu shenu,+ e lyo mwalapokelela umupashi wa mushilo uwa bupe fye. 39 Pantu balimulaile+ na bana benu na bonse ababa ukutali, bonse abo Yehova* Lesa wesu aketa.”+ 40 Kabili alibalondolwelele bwino ifyebo na fimbi ifingi, alebakonkomesha no kuti: “Talukeni kuli aba bantu ba muli iyi nkulo abacita ifyabipa,+ pa kuti mwikonaikila pamo nabo.” 41 E ico bonse abacetekele ifyo alelanda ne mitima yabo yonse balibatishiwe,+ kabili pali bulya bushiku abantu abalundilwe* ku basambi bali nalimo 3,000.+ 42 Kabili balebika amano ku fyalesambilisha abatumwa, baleba pamo,* baleliila pamo ifya kulya,+ kabili baali no mute wa kupepa.+

43 E ico abantu bonse balyumfwile umwenso, kabili abatumwa balecita ifipesha amano ifingi ne fishibilo ifingi.+ 44 Bonse abasumine baali pamo, kabili fyonse ifyo bakwete fyali fya bonse, 45 kabili baleshitisha impanga ne fintu fimbi ifyo bakwete+ e lyo ba-akanya abantu indalama isho balesangamo, ukulingana ne fyo cila muntu alekabila.+ 46 Kabili cila bushiku baleba pe tempele no mutima umo, baleliila ifya kulya mu mayanda ayapusanapusana kabili balepeelana ifya kulya ninshi balesekelela nga nshi. Balecita fyonse ne mitima ya cishinka, 47 balelumbanya Lesa kabili abantu bonse balibatemenwe. Cila bushiku Yehova* alelundako kwi bumba lyabo abalepusuka.+

3 Nomba Petro na Yohane baleya kwi tempele pa nshita ya kupepa, pe awala lyalenga 9,* 2 kabili kwali abasendele umwaume uwafyelwe uwalemana. Cila bushiku balemuteka mupepi no mwinshi we tempele uo baleita ukuti Uwayemba, pa kuti alelomba ifya bupe ku baleingila mwi tempele. 3 Ilyo amwene Petro na Yohane bali mu kwingila mwi tempele, atendeke ukubalomba ifya bupe. 4 Nomba ilyo Petro na Yohane bamulolekeshe, bamwebele abati: “Tuloleshe.” 5 E ico alibalolekeshe, pantu ale-enekela ukuti balamupeelako fimo. 6 Lelo Petro amwebele ati: “Silfere na golde nshikwete, lelo ico nkwete e co nalakupeela. Mwi shina lya kwa Yesu Kristu umwina Nasarete, ndekweba nati, ima wende!”+ 7 Lyena amwikete ku kuboko kwa ku kulyo, e lyo amwimya.+ Ilyo line uyu mwaume alikwete amaka mu makasa na mu nkolokoso;+ 8 kabili alitolweke,+ atendeke ukwenda kabili aingile nabo mwi tempele ninshi ale-enda, aletolauka kabili alelumbanya Lesa. 9 Kabili abantu bonse balimumwene ninshi ale-enda, alelumbanya na Lesa. 10 Abantu balimwishibe ukuti e waleikala pa Mpongolo Iyayemba iya pe tempele+ alelomba ifya bupe. Balipapile sana kabili balisekelele ilyo bamwene uyu mwaume ale-enda.

11 Ilyo uyu muntu acili naikatilila Petro na Yohane, abantu bonse balibabutukiile mu kakupitamo akakwete umutenge ako baleita ukuti Akakupitamo ka kwa Solomone,+ ninshi balepapa fye. 12 Ilyo Petro abamwene, abepwishe ati: “Mwe baume abena Israele, cinshi mwapapila pali ici kabili cinshi muletulolekesesha kwati nalimo maka yesu, nelyo ni bukapepa bwesu bulengele ukuti uyu muntu ende? 13 Lesa wa kwa Abrahamu, Lesa wa kwa Isaki kabili Lesa wa kwa Yakobo,+ Lesa wa fikolwe fyesu nacindamika Umubomfi wakwe+ Yesu,+ uo imwe mwapeele+ kuli Pilato kabili uo mwakaanine pa menso ya kwa Pilato, nangu ca kuti Pilato alefwaya ukumukakula. 14 Cine cine, mwalikeene umuntu wa mushilo kabili uwalungama, lelo mwalombele ukuti bamukakwile icipondo,+ 15 kabili Intungulushi iyo Lesa asala+ pa kuti ilepeela ubumi mwali-ipeye. Lelo Lesa alimubuushishe ku bafwa, kabili ifwe twalishiba ici.+ 16 E ico icitetekelo cesu mwi shina lyakwe, e cilengele uyu muntu mulemona kabili uo mwaishiba akwate amaka. Icitetekelo cesu muli Yesu, e cilengele ukuti uyu muntu apole pa menso yenu bonse. 17 E ico nomba mwe bamunyinane, ninjishiba ukuti mwacitile ifi fintu mu kukanaishiba,+ nga filya fine intungulushi shenu nasho shacitile.+ 18 Lelo iyi e nshila iyo Lesa afikilishishamo ifyo alandiile muli bakasesema bonse, ukuti Kristu wakwe aali no kucula.+

19 “E ico lapileni+ no kwalukila kuli Lesa+ pa kuti imembu shenu shifuutwe,+ e lyo Yehova* alamupuupuutula 20 na pa kuti atume Kristu uo asontele pa kuti alemwafwa, e kutila Yesu. 21 Mpaka inshita iyo Lesa akalenga ifintu fyonse fikabe nge fyo fyali pa kubala, ifyo alandiile muli bakasesema bakwe aba mushilo aba kale. 22 Na kuba Mose alandile ati: ‘Pali bamunyinenwe, Yehova* Lesa wenu akamusontelapo kasesema uukaba nga ine.+ Mukalekonka fyonse ifyo akalamweba.+ 23 Cine cine, umuntu onse* uushakomfwile uyo Kasesema akepaiwa.’+ 24 Kabili bakasesema bonse, ukutampila pali Samwele na bakonkelepo, bonse abalandapo, balandile pali shino nshiku.+ 25 Imwe muli bana baume ba bakasesema kabili aba cipangano ico Lesa apangene ne fikolwe fyenu.+ Aebele Abrahamu ati: ‘Kabili mu mwana* obe e mo indupwa shonse isha pe sonde shikapaalilwa.’+ 26 Ilyo Lesa abuushishe Umubomfi wakwe, abalilepo ukumutuma kuli imwe+ pa kuti amupaale na pa kuti alenge bonse muleke ukucita ifyabipa.”

4 Ilyo Petro na Yohane balelanda na bantu, bashimapepo, umukalamba wa balelinda itempele na baSaduke+ baishile kuli bena. 2 Balifulilwe pa mulandu wa kuti abatumwa balesambilisha abantu kabili balebila ukuti Yesu alibuushiwe ku bafwa.+ 3 E ico balibekete bababika na mu cifungo+ mpaka ubushiku bwakonkelepo, pantu cali cungulo. 4 Lelo abengi abaumfwile ifyo abatumwa balandile balitetekele, kabili impendwa ya baume abatetekele yafikile nalimo 5,000.+

5 Ubushiku bwakonkelepo intungulushi shabo, abakalamba na bakalemba balongene mu Yerusalemu, 6 pamo na Anasi+ intungulushi ya bashimapepo, Kayafa,+ Yohane, Alekisanda na bonse aba mu lupwa lwa iyi ntungulushi ya bashimapepo. 7 Baebele Petro na Yohane ukuti beminine pa ntanshi yabo, kabili batampile ukubepusha abati: “Nani amupeele amaka ya kucita ifi nelyo ni mwi shina lya kwa nani mwacitiile ifi?” 8 Lyena pa mulandu wa kuti Petro alipokelele umupashi wa mushilo,*+ abebele ati:

“Mwe ntungulushi sha bantu na mwe bakalamba, 9 nga ca kutila buno bushiku muletulubulwisha pa mulandu wa cintu icisuma ico twacitiile umuntu uwalemene,+ kabili nga mulefwaya ukwishiba uwalengele ukuti uyu muntu apole, 10 imwe bonse na bena Israele bonse, mufwile ukwishiba ukuti mwi shina lya kwa Yesu Kristu umwina Nasarete,+ uo mwaipaile pa cimuti,+ lelo uo Lesa abuushishe ku bafwa,+ e mo uyu muntu apoleele kabili e ulengele no kuti uyu muntu, eminine pa ntanshi yenu umutuntulu. 11 Uyu e ‘libwe ilyo mwe bakakuula mwalemona ukuti talyacindama ilyaisaba pa muulu pa koona.’*+ 12 Kabili takwaba umuntu umbi uo twingapusukilamo, pantu takwaba ishina limbi+ mwi samba lya muulu ilyo Lesa apeela abantu umo tufwile ukupusukila.”+

13 Nomba ilyo bamwene ukuti Petro na Yohane baali abashipa pa kulanda, kabili ilyo bailwike ukuti aba bantu baali abashasambilila,* abantu yaweyawe,+ balipapile. Kabili baishileishiba ukuti aba bantu baali pamo na Yesu.+ 14 Ilyo bamwene umwaume uo baundepe naiminina pamo na batumwa,+ tabakwete ifya kulanda.+ 15 E ico babebele ukuti bafumine panse ya cilye ca Sanhedrini, e lyo bena bashala balepandana amano, 16 batile: “Cinshi twalacita aba bantu?+ Pantu cine cine nabacita icishibilo icikalamba, ico bonse abekala mu Yerusalemu+ bamwene, kabili na ifwe bene te kuti tucikaane. 17 E ico pa kuti abantu abengi beishiba ici, natubatiinye pa kuti bekabwekeshapo ukulandila muli ili ishina ku muntu uuli onse.”+

18 Lyena balibetile no kubakonkomesha ukuti tabalingile ukulandila nelyo ukusambilishisha mwi shina lya kwa Yesu. 19 Lelo pa kwasuka, Petro na Yohane balandile abati: “Pinguleni mwe bene, nga nacilungama mu menso ya kwa Lesa ukumfwila imwe ukucila ukumfwila Lesa. 20 Nomba ifwe te kuti tuleke ukulanda pa fyo twamona ne fyo twaumfwa.”+ 21 E ico, ilyo babatiinishe na kabili, balibalekeleko, pantu tabasangile umulandu nangu umo uwa kubakandilapo kabili baletiina abantu,+ pantu abantu bonse balelumbanya Lesa pa cacitike. 22 Pantu umuntu uo baundepe mu cipesha amano aali ne myaka ukucila pali 40.

23 Ilyo babalekeleko, baile ku basambi banabo kabili balibashimikile ifyo intungulushi sha bashimapepo na bakalamba babebele. 24 Ilyo abasambi bonse baumfwile ifi, bapepeele pamo kuli Lesa abati:

“Mwe Shikulu Mulopwe, nimwe mwapangile umuulu ne sonde na bemba na fyonse ifyabamo,+ 25 kabili nimwe mwalandiile mu mubomfi wenu Davidi+ ukupitila mu mupashi wa mushilo amuti: ‘Cinshi inko shibelele mu cimfulumfulu, kabili cinshi abantu mu nko baletontonkanishisha ifya fye? 26 Imfumu sha pano isonde nashi-ipekanya, ne ntungulushi na sho nashilongana pa kuti shilwishe Yehova* no wasubwa wakwe.’*+ 27 Pantu na cine, Herode na Ponti Pilato+ pamo na bena fyalo e lyo na bena Israele abengi balilongene muli uno musumba pa kuti bemine umubomfi wenu uwa mushilo Yesu, uo mwasuba,+ 28 pa kuti acite ifyo mwapangiile libela ukuti fikacitike ku maka yenu* na ku kufwaya kwenu.+ 29 E ico nomba mwe Yehova,* lolekesheni pa fintiinya fyabo, kabili suminisheni abasha benu pa kuti balelanda icebo cenu ukwabula umwenso, 30 ilyo muletambika ukuboko kwenu pa kuti mundape abalwele, kabili ilyo ifishibilo ne fipesha amano filecitilwa+ mwi shina lya mubomfi wenu uwa mushilo Yesu.”+

31 Ilyo bapwishishe ukupepa,* umo balongene mwalitenkene. Lyena bonse balipokelele umupashi wa mushilo*+ kabili balelanda icebo ca kwa Lesa ninshi nabashipa.+

32 Kabili abengi abatetekele bali no mutima umo, kabili baletontonkanya cimo cine. Takwali uwalelanda ukuti conse ico akwete cali cakwe, lelo fyonse fyali fya bonse.+ 33 Na kabili, abatumwa balitwalilile ukubomba bwino umulimo wa kushimikila abantu ukuti Shikulu Yesu+ alibuushiwe; kabili bonse Lesa alebalanga sana icikuuku icaibela. 34 Na kuba, pali bena tapali uwabulishe,+ pantu bonse abakwete amabala nelyo amayanda baleyashitisha kabili baletwala indalama balesangamo 35 ku batumwa,+ nabo baleakanya umo na umo ishi indalama ukulingana ne fyo alekabila.+ 36 E ico Yosefe, uo abatumwa baleita ukuti Barnaba,+ (ili ishina nga balipilibula lyalola mu kuti, “Umwana wa Cisansamushi”), umwina Lebi, uwa ku Kupro, 37 alikwete ibala kabili alilishitishe atwalila na batumwa indalama.+

5 Lelo umuntu umo uwe shina lya kuti Anania no mukashi wakwe Safira, balishitishe ibala lyabo. 2 Nomba alifishilepo indalama shimo; kabili no mukashi wakwe alishibe. E ico atwelepo fye indalama shimo ku batumwa.+ 3 Lelo Petro amwebele ati: “Anania, cinshi ico Satana akubelelekela pa kuti ubepe+ umupashi wa mushilo+ no kufisapo indalama shimo pa sho washitishe ibala? 4 Ilyo ushilashitisha ibala, bushe talyali lyobe, kabili ilyo walishitishe, bushe indalama tashali shobe? Cinshi wapangiile ukucita ica musango uyu mu mutima obe? Te bantu ubepele, ubepele Lesa.” 5 Ilyo Anania aumfwile ifi, awile panshi afwa no kufwa. Kabili bonse abaumfwileko icacitike balitiinine nga nshi. 6 Lyena abalumendo balimine, bamupomba mu nsalu, bamufumisha panse bayamushika no kumushika.

7 Nomba ilyo papitile nalimo ama-awala yatatu umukashi wakwe na o alingile, ninshi teshibe ne cacitike. 8 Petro amwipwishe ati: “Njeba, bushe ishi e ndalama shonse isho imwe babili mwashitishemo ibala?” Na o amwaswike ati: “Ee, e isho shine.” 9 E ico Petro amwebele ati: “Cinshi imwe babili mwaumfwanine ukuti mweshe umupashi wa kwa Yehova?* Mona! Abashiikile umulume obe bali pa mwinshi, na iwe wine balakufumisha panse.” 10 Ilyo line fye aliwile panshi mupepi na makasa ya kwa Petro afwa no kufwa. Ilyo abalumendo baingile basangile nafwa, kabili bamufumishe panse bayamushika na mupepi no mulume wakwe. 11 E ico aba mu cilonganino bonse na bonse abaumfwileko balitiinine nga nshi.

12 Kabili abatumwa balecita ifishibilo ifingi ne fipesha amano ifingi ninshi na bantu balemonako;+ kabili bonse balekumanina mu kakupitamo akakwete umutenge ako baleita ukuti Akakupitamo ka kwa Solomone.+ 13 Kwena takwali bambi abashipile ukuti bailunde kuli bena; lelo abantu balebacindika. 14 Na kabili abaume na banakashi+ abengi nga nshi abalesumina muli Shikulu balelundwako fye. 15 Baleleta na bantu abalwele mu misebo iikalamba kabili balebalalika pa misengele na pa matanda, pa kuti ilyo Petro alepita kusuka icinshingwa cakwe capita pali bamo.+ 16 Na kabili, abantu abengi baleisa mu mabumba ukufuma mu misumba iyaba mupepi na Yerusalemu, ninshi nabasenda abalwele na bo imipashi yakowela yalecusha, kabili bonse balebondapa

17 Lelo pa mulandu wa mufimbila, shimapepo mukalamba na bonse abo ali nabo, aba mwi bumba lya mapepo ilya baSaduke, baliimine. 18 Kabili baikete abatumwa no kubabika mu cifungo ca bantu bonse.+ 19 Lelo ubushiku malaika wa kwa Yehova* aiswile ifiibi fya cifungo+ no kubafumyamo, e lyo abeba ati: 20 “Kabiyeni keminineni mwi tempele, kabili mutwalilile ukweba abantu fyonse pa bumi.”* 21 Ilyo baumfwile ifi, baileingila mwi tempele ulucelocelo kabili batendeke ukusambilisha.

Nomba ilyo shimapepo mukalamba na bonse abo ali nabo baishile, balongenye aba mu cilye ca Sanhedrini ne bumba lyonse ilya bakalamba mu Israele, kabili batumine aba kuyasenda abatumwa ku cifungo. 22 Lelo ilyo abalelinda itempele abo batumine bafikile, tababasangile mu cifungo. E ico balibwelele bashimika ne fyo basangile. 23 Batile: “Twacisanga icifungo nacikomwa bwino bwino na balelinda icifungo nabeminina pa minshi, lelo ilyo twacisula tatwacisangamo nangu umo.” 24 Nomba ilyo umukalamba wa balelinda itempele ne ntungulushi sha bashimapepo baumfwile ifi, balipelenganishiwe pantu tabaishibe ifyali no kufumamo. 25 Lelo kwali umuntu uwaishilebeba ati: “Moneni! Abaume abo mwabikile mu cifungo bali mwi tempele, nabeminina balesambilisha abantu.” 26 Lyena umukalamba wa balelinda itempele aile nabalelinda itempele no kuleta abatumwa, lelo pa kubaleta tabalebasunkasunka, pantu baletiina abantu ukubapoola amabwe.+

27 E ico balibaletele babeminika na mu cilye ca Sanhedrini. Lyena shimapepo mukalamba atampile ukubalubulwisha 28 ati: “Twalimukonkomeshe ukuti mwilasambilishisha muli ili ishina,+ nomba moneni! namusalanganya isambilisho lyenu mu Yerusalemu monse, kabili mulefwaya ukuleta umulopa wa uyu muntu pali ifwe.”+ 29 Pa kwasuka, Petro na batumwa bambi balandile abati: “Tufwile ukunakila Lesa ukucila ukunakila abantu.+ 30 Lesa wa fikolwe fyesu aimishe Yesu, uo imwe mwaipeye, ilyo mwamukobeke pa cimuti.+ 31 Lesa alimusansabike pa kuti abe Intungulushi+ kabili Umupusushi+ ilyo amubikile ku kuboko kwakwe ukwa ku kulyo,+ pa kuti abena Israele balapile kabili belelwe imembu.+ 32 Ifwe tuli nte sha ifi fintu,+ kabili umupashi wa mushilo+ uo Lesa apeela abamunakila, walilenga twaishiba ifi fintu.”

33 Ilyo baumfwile aya mashiwi, balikalipe icine cine, kabili balefwaya fye ukubepaya. 34 Lelo umuFarise uwe shina lya kuti Gamaliele;+ uwali kasambilisha wa Mafunde uo abantu bonse bacindike, aliminine mu cilye ca Sanhedrini, e lyo alanda ati babale bafumishe aba bantu panse. 35 Lyena abebele ati: “Mwe bena Israele, mutontonkanyepo sana pa fyo mulefwaya ukucita aba bantu. 36 Moneni, ku numa kwali Teuda, uwaleimona kwati pali ico aali, kabili abantu abengi, nalimo 400 bailundile ku kabungwe kakwe. Lelo abantu balimwipeye, na bali mu kabungwe kakwe balisalangene kabili tapashele nangu umo. 37 Pa numa kwaishileba Yuda umwina Galili mu nshiku sha kulembesha abantu, kabili aleongola abantu pa kuti balemukonka. Lelo na o wine alifwile, na bonse abalemukonka balisalangene. 38 E ico pa mulandu ne fi ifintu ifilecitika, ndemweba nati, talukeni aba bantu, balekeni babe. Pantu ili ipange nelyo uyu mulimo nga wa bantu, tawakatwalilile; 39 lelo nga wa kwa Lesa, mukafilwa ukubalesha.+ Pantu nga mwatwalilila, mukasanga ukuti mulelwa na Lesa.”+ 40 E ico balyumfwile ifyo alandile. Lyena baitile abatumwa, babafopaula+ e lyo babalesha ukulandila mwi shina lya kwa Yesu. Pa numa balibalekele baya.

41 Lyena balifumine pa ntanshi ya cilye ca Sanhedrini, ninshi balesekelela+ pantu Lesa alisuminishe ukuti bacule pa mulandu wa kulandila mwi shina lya kwa Yesu. 42 Kabili cila bushiku balesambilisha no kubila imbila nsuma pali Kristu Yesu+ mwi tempele na ku ng’anda ne ng’anda+ ukwabula ukuleka.

6 Nomba muli isho nshiku, ilyo abasambi balefulilako, abaYuda abalelanda iciGriki batendeke ukuilishanya pa fyalecita abaYuda abalelanda iciHebere, pantu bamukamfwilwa babo tabalebapeelako ifya kulya ifyo balingile ukulabapeela cila bushiku.+ 2 E ico abatumwa 12 balongenye ibumba lya basambi no kubeba abati: “Te kuti ciwame tuleke ukusambilisha icebo ca kwa Lesa e lyo tutampe ukulapeela abantu ifya kulya pa matebulo.+ 3 E ico bamunyinefwe, mwi bumba lyenu fwayenimo abaume abacetekelwa*+ 7, abatungululwa no mupashi wa mushilo* kabili aba mano,+ pa kuti tubasonte ukulabomba uyu mulimo uulingile ukubombwa;+ 4 lelo ifwe twakulabika amano mu kupepa na mu kusambilisha icebo ca kwa Lesa.” 5 Ibumba lyonse lyalitemenwe ifi balandile, kabili basalile Stefani, umwaume uwakwete sana icitetekelo no mupashi wa mushilo, Filipi,+ Prokore, Nikanore, Timone, Parmena na Nikola umwina Antioke uwaishileba umuYuda. 6 Babatwele ku batumwa, kabili ilyo abatumwa bapepele, balibabikilepo iminwe.+

7 E ico abantu abaleumfwa icebo ca kwa Lesa balefulilako fye,+ kabili abasambi balefulilako nga nshi+ mu Yerusalemu; ne bumba ilikalamba ilya bashimapepo lyalitetekele.+

8 Nomba apo Lesa alitemenwe Stefani kabili alimupeele amaka, Stefani alecita ifipesha amano ifikalamba ne fishibilo ifyo abantu balemona. 9 Lelo kwali abantu bamo aba mwi Sunagoge ilyo beta ukuti ilya Balubulwa, abaishile mu kuumanya Stefani. Bali pamo na bena Kurene, abena Alekisandria, abena Kilikia na bena Asia. 10 Lelo balifililwe ukumucincintila pantu umupashi wa mushilo walengele alalanda na mano sana.+ 11 Lyena mu bumfisolo batunkile abantu ukuti balande ukuti: “Twalimumfwile alepontela Mose na Lesa.” 12 Kabili balengele abantu, abakalamba na bakalemba bafulilwa Stefani. Lyena balimufukukiile, bamufyambata e lyo bamutwala ku cilye ca Sanhedrini. 13 Kabili baletele bakambone ba bufi, abalandile abati: “Uyu muntu taleka ukupontela ili itempele na Mafunde. 14 Pantu twamumfwile aleti uyu Yesu umwina Nasarete akawisha lino itempele kabili akaalula intambi isho Mose atushilile.”

15 Nomba ilyo bonse abaikele mu cilye ca Sanhedrini bamulolekeshe, bamwene icinso cakwe cilemoneka kwati cinso ca kwa malaika.

7 Lelo shimapepo mukalamba amwipwishe ati: “Bushe ifi balelanda fya cine?” 2 Stefani amwaswike ati: “Mwe baume, bamunyinane na batata, umfweni. Lesa wa bukata amoneke kuli Abrahamu icikolwe cesu ilyo aali mu Mesopotamia, ninshi talakuukila ku Harani.+ 3 Kabili amwebele ati: ‘Fuma mu calo cobe, ushe na balupwa lobe uleya ku calo ico nkakulanga.’+ 4 Lyena alifumine mu calo ca bena Kaldi no kukuukila ku Harani. Kabili ilyo wishi afwile,+ Lesa amwebele ukuti akuukile muli cino calo ico muleikalamo nomba.+ 5 Nomba tamupeelemo impanga, nangu fye ya kunyantapo ulukasa; lelo amulaile ukumupeela ino mpanga ukuti ikabe yakwe, pamo na bana abo aali no kukwata,*+ nangu ca kuti pali iyi nshita ninshi talakwatapo umwana nangu umo. 6 Na kabili Lesa amwebele ukuti abana bakwe* bali no kuba abalebeshi mu calo ca bene, bali no kubateka ubusha kabili bali no kulabacusha pa myaka 400.+ 7 Lesa alandile no kuti: ‘Uluko ulukabateka ubusha nkalupingula,+ kabili pa numa bakafumamo bakese na mu kumombela muli cino cifulo.’+

8 “Na kabili apangene nankwe icipangano ca kusembulula,+ kabili ilyo afyele Isaki+ alimusembulwile pa bushiku bwalenga 8.+ Isaki afyele* Yakobo, Yakobo na o afyele abana 12 abaishileba ifikolwe.* 9 Ifi ifikolwe fyalifimbiile Yosefe+ kabili fyamushitishe ku bena Egupti.+ Lelo Lesa aali nankwe,+ 10 kabili amupokolwele mu macushi yakwe yonse, alengele na Farao imfumu ya ku Egupti yamutemwa yalamumona no kuti wa mano. Kabili yamusontele ukuba cilolo pa calo ca Egupti na pa ba mu ng’anda yaiko bonse.+ 11 Lelo kwaliponene icipowe icalengele mu Egupti na mu Kanaani monse mube ubucushi ubukalamba, ica kuti ifikolwe fyesu tafyakwete ifya kulya.+ 12 Nomba Yakobo aumfwile ukuti ku Egupti kwali ifya kulya.* E ico atumine ifikolwe fyesu umuku wa kubalilapo.+ 13 Ilyo babweleleko umuku walenga bubili, Yosefe ali-isokolwele kuli bamunyina, kabili Farao+ aishileishiba ukuti Yosefe alikwete ulupwa. 14 E ico Yosefe atumine abakuyaita wishi Yakobo no lupwa lwakwe,+ bonse pamo abaile ku Egupti baali* 75.+ 15 Lyena Yakobo akuukiile ku Egupti.+ Kabili kulya kwine e ko afwilile,+ ne fikolwe fyesu na fyo fyalifwile.+ 16 Bafitwele ku Shekemu uko bailefishiika mu nshiishi iyo Abrahamu ashitile ku bana baume ba kwa Hamore mu Shekemu+ mu ndalama sha silfere.

17 “Ilyo inshita ya kuti ifyo Lesa alaile Abrahamu fifikilishiwe yapaleme, abena Israele balifulile nga nshi mu Egupti, 18 mpaka mu Egupti mwaba imfumu imbi iishaishibe Yosefe.+ 19 Iyi mfumu yacenjeshe umushobo wesu kabili yapatikiishe bashifwe ukupoosa utunya twabo, pa kuti twitwalilila ukuba utwa mweo.+ 20 Pali ilya ine nshita Mose alifyelwe, kabili aali umusuma nga nshi.* Bamuleleele* mu ng’anda ya kwa wishi pa myeshi itatu.+ 21 Lelo ilyo bamushile,+ umwana mwanakashi wa kwa Farao alilemusenda kabili atendeke ukumukusha kwati fye mwana wakwe.+ 22 E ico Mose balimusambilishe amano yonse aya bena Egupti. Na kuba, aali uwa maka mu fyo alelanda na mu fyo alecita.+

23 “Nomba ilyo afishishe imyaka 40, alefwaya ukuyapempula bamunyina,* abana ba kwa Israele.+ 24 Ilyo Mose amwene umwina Egupti alecusha umwina Israele, alipokolweleko munyina kabili alyumine umwina Egupti pa kuti alandule. 25 Amwene kwati bamunyina balailuka ukuti Lesa alebapusushisha muli ena, lelo tabailwike. 26 Ubushiku bwakonkelepo aile ku bena Israele na kabili. Lyena asangile abalelwa, kabili aeseshe ukubawikishanya mu mutende. Abebele ati: ‘Mwe baume mwe, muli ba bwananyina. Mulandu nshi mulelwila?’ 27 Lelo uwalecusha umunankwe alisunkile Mose, e lyo amweba ati: ‘Nani akusontele ukuba intungulushi kabili kapingula pali ifwe? 28 Bushe ulefwaya unjipaye nga filya waipeye umwina Egupti mailo?’ 29 Aya mashiwi yalengele Mose afulumuke kabili aileba umulebeshi mu calo ca Midiani, umo ailefyalila abana abaume babili.+

30 “Ilyo papitile imyaka 40, malaika aishile kuli ena mu lubingu lwa mulilo ulwaleaka mu cimpusa ca myunga+ mu matololo yaba mupepi no Lupili lwa Sinai. 31 Mose alipapile sana pa fyo amwene. Lelo ilyo alepalamina pa kuti alolekeshe, aumfwile ishiwi lya kwa Yehova* lileti: 32 ‘Nine Lesa wa fikolwe fyobe, Lesa wa kwa Abrahamu, Lesa wa kwa Isaki kabili Lesa wa kwa Yakobo.’+ Lyena Mose alitutwime, ica kuti talefwaya no kupalamako pa kuti alolekeshe. 33 Yehova* amwebele ati: ‘Fuula indyato shobe, pantu umushili wimininepo wa mushilo. 34 Nimona ifyo abantu bandi balebacusha mu Egupti, ning’umfwa ne fyo baleteta+ kabili njishile mu kubapususha. Nomba umfwa, nalakutuma ku Egupti.’ 35 Uyu wine Mose uo bakeene, ilyo batile: ‘Nani akusontele ukuba intungulushi kabili kapingula?’+ e o Lesa atumine+ ukuyaba intungulushi kabili kalubula wabo, ukupitila muli malaika ulya wine uwaishile kuli Mose mu cimpusa ca myunga. 36 Uyu wine e wabatungulwile+ ilyo balefuma mu Egupti+ kabili e wacitile ifipesha mano ne fishibilo mu Egupti, pali Bemba Wakashika+ na mu matololo pa myaka 40.+

37 “Uyu e Mose uwaebele abena Israele ati: ‘Pali bamunyinenwe Lesa akamusontelapo kasesema uukaba nga ine.’+ 38 Uyu wine Mose e wali pamo no lukuta mu matololo. Kabili aali pamo na malaika+ uwalandile nankwe+ pa Lupili lwa Sinai. Mose wine uyu uwapokelele amashiwi ya kwa Lesa aya muyayaya aya kutupeela,+ ali pamo ne fikolwe fyesu. 39 Ifikolwe fyesu fyalikeene ukumumfwila,+ ne mitima yabo yalibwelele ku Egupti.+ 40 Baebele Aarone abati: ‘Tupangile balesa aba kututungulula. Pantu tatwishibe icicitikiile uyu Mose uwatutungulwile ilyo twalefuma mu Egupti.’+ 41 E ico muli isho nshiku, bapangile akalubi ka mwana wa ng’ombe batendeke no kulatuula amalambo kuli aka kene kalubi, kabili balesefya nga nshi pali aka akalubi ako abene baipangiile.+ 42 E ico Lesa alibashile kabili alibalekele balapepa ifya mu muulu,+ nga filya calembwa mu mabuuku ya bakasesema ukuti: ‘Mwe ba mu ng’anda ya kwa Israele, bushe ni kuli ine mwaletuula inama isho mwaleipaya na malambo pa myaka 40 iyo mwali mu matololo? 43 Lelo mwalesenda itenti lya kwa Moloke+ no lutanda lwa kwa lesa Refani, ifimpashanya ifyo mwaipangile pa kuti mulefipepa. E ico nkamutamfisha ukutali ukucila ku Babiloni.’+

44 “Ilyo ifikolwe fyesu fyali mu matololo fyalikwete itenti ilyalelangilila ukuti Lesa ali na fyo, nga fintu aebele Mose ifya kukonka pa kulipanga ukulingana ne fyo amulangile ukuti e fyo lyalingile ukuba.+ 45 Kabili ifikolwe fyesu ifyali pamo na Yoshua fyalipyene ili itenti no kulingisha mu calo ca nko shimbi,+ isho Lesa atamfishe mu nshiku sha fikolwe fyesu.+ Ili itenti lyalitwalilile ukuba muli ici cine calo ukufika na mu nshiku sha kwa Davidi. 46 Lesa alitemenwe Davidi kabili Davidi alilombele ukuti engakuulila Lesa wa kwa Yakobo umwa kwikala.+ 47 Lelo Solomone e wakuuliile Lesa ing’anda.+ 48 Na lyo line, Uwapulamo tekala mu mayanda ayo abantu bakuula,+ nga filya fine kasesema alandile. Alandile ati: 49 ‘Umuulu e cipuna candi ica bufumu,+ kabili isonde ca kunyantapo amakasa.+ Ni ng’anda ya musango nshi mwingankuulila? E fyo Yehova* alanda. Nelyo cifulo nshi ningatuushishamo? 50 Bushe te kuboko kwandi kwapangile ifintu fyonse?’+

51 “Mwe bakosa imitima kabili mwe bashumfwa.* Lyonse mulalwisha umupashi wa mushilo; filya fine ifikolwe fyenu fyalecita, na imwe e fyo mucita.+ 52 Nani pali bakasesema uo ifikolwe fyenu fishacushishe?+ Na kuba fyalipeye ababilishishe libela ukuti kwali uwalungama uwali no kwisa,+ uo imwe mwafutwike kabili uo mwaipeye,+ 53 imwe mwe bapokelele Amafunde ukupitila muli bamalaika,+ lelo tamwayakonka.”

54 Ilyo baumfwile ifi balikalipe nga nshi, ica kuti batendeke ukulasumanya ameno. 55 Lelo apo Stefani alipokelele umupashi wa mushilo,* alolekeshe mu muulu kabili amwene ubukata bwa kwa Lesa no bwa kwa Yesu, ninshi Yesu eminine ku kuboko kwa kulyo ukwa kwa Lesa,+ 56 kabili atile: “Moneni! Ndemona umuulu nawisuka no Mwana wa muntu+ naiminina ku kuboko kwa ku kulyo ukwa kwa Lesa.”+ 57 Lyena babilikishe amashiwi ayakalamba bacilika na matwi, e lyo bonse pamo bamufukukila. 58 Ilyo bamutwele kunse ya musumba, batendeke ukumupoola amabwe.+ Bakambone+ babikile ifya kufwala fyabo ifya kunse pa ntanshi ya mulumendo umo uo baleita ukuti Sauli.+ 59 Ilyo balepoola Stefani amabwe, apaapeete ati: “Mwe Shikulu Yesu, pokeleleni umupashi wandi.” 60 Lyena alifukeme no kubilikisha ishiwi ilikalamba ati: “Mwe Yehova,* mwibapeela umulandu pali ulu lubembu.”+ Ilyo alandile ifi, aponene mu tulo twa mfwa.

8 Sauli alisuminisheko ukuti bepaye Stefani.+

Pali ubo bushiku abaYuda batampile ukucusha sana aba mu cilonganino icali mu Yerusalemu; kabili bonse basalanganine mu Yudea na mu Samaria,+ ukufumyako fye abatumwa. 2 Lelo abaume abatiina Lesa balisendele Stefani no kuyamushiika, kabili balimulooseshe nga nshi. 3 Nomba Sauli atendeke ukusansa aba mu cilonganino. Alesansa amayanda imo na imo, alekulamo abaume na banakashi kabili alebatwala ku cifungo.+

4 Lelo abasambi abo basalangenye baile balebila imbila nsuma ya cebo ca kwa Lesa.+ 5 Nomba Filipi ena aile ku musumba wa* Samaria+ kabili atendeke ukusambilisha abantu pali Kristu. 6 Amabumba yalibikileko amano ilyo Filipi alelanda kabili yalekutikisha, yalemona ne fishibilo ifyo alecita. 7 Pantu kwali abantu abengi abali ne mipashi iyakowela, kabili yaleti nga yabilikisha ishiwi ilikalamba yafuma muli bena.+ Na bantu abengi abalwele ubulebe na balemene balipolele. 8 E ico abantu abali muli ulya musumba balesekelela nga nshi.

9 Nomba muli uyu musumba mwali umuntu we shina lya kuti Simone, uwalecita ifinjelengwe, kabili alepapusha abena Samaria. Alelanda ukuti aali muntu uwacindama. 10 Abantu bonse fye, ukutampila fye pa bashacindama ukufika kuli bashimucindikwa, balekutikisha ifyo alelanda, kabili baleti: “Uyu muntu Maka ya kwa Lesa, Amaka Ayakalamba.” 11 E ico balimucindike, pantu pa nshita iitali alibapapwishe pa mulandu ne finjelengwe ifyo alecita. 12 Lelo abaume na banakashi nga basumina ifyo Filipi alelanda, uwalebila imbila nsuma pa Bufumu bwa kwa Lesa+ na pe shina lya kwa Yesu Kristu, balebatishiwa.+ 13 Simone na o alisumiine, kabili ilyo abatishiwe, lyonse aleba na Filipi.+ Alipapile ilyo amwene ifishibilo ne milimo ya maka iikalamba ifyo Filipi alecita.

14 llyo abatumwa mu Yerusalemu baumfwile ukuti abena Samaria balitetekele icebo ca kwa Lesa,+ batumineko Petro na Yohane; 15 kabili baile ku Samaria no kubapepelako pa kuti bapokelele umupashi wa mushilo.+ 16 Pantu pali iyi nshita tapali nangu umo pali bena uwapokelele umupashi wa mushilo, lelo babatishiwe fye mwi shina lya kwa Shikulu Yesu.+ 17 E ico abatumwa babikile iminwe pali bena,+ e lyo batendeka ukupokelela umupashi wa mushilo.

18 Nomba ilyo Simone amwene ukuti abantu balepokelela umupashi wa mushilo abatumwa nga bababikapo iminwe, atambike abatumwa indalama, 19 e lyo abeba ati: “Na ine mpeeniko aya maka, aya kuti onse uo nabikapo iminwe alepokelela umupashi wa mushilo.” 20 Lelo Petro amwebele ati: “Indalama shobe isha silfere shilobele pamo na iwe, pantu wacilamona kwati kuti washita ica bupe ca kwa Lesa mu ndalama.+ 21 Taukwete insambu nangu panono muli uyu mulimo, pantu Lesa namona ukuti umutima obe taulungeme. 22 E ico ulapile pali ubu ububi bobe, kabili upaapaate Yehova,* pantu nalimo kuti akwelela pa fyabipa ifyo ulepanga mu mutima obe; 23 pantu nimona ukuti ububi bobe cimo cine fye na sumu iyalula* kabili ifyabipa fyalikuteka ubusha.” 24 Pa kwasuka Simone aebele abatumwa ati: “Mpaapaatileniko kuli Yehova* pa kuti fyonse ifyo mwalanda fincitikila.”

25 Pa numa ya kubila sana imbila nsuma no kusambilisha abantu icebo ca kwa Yehova,* babweleele ku Yerusalemu. Kabili baile balebila imbila nsuma ku mishi iingi iya bena Samaria.+

26 Lelo malaika wa kwa Yehova*+ aebele Filipi ati: “Ima kabiye ku kapinda ka ku kulyo mu musebo wafuma ku Yerusalemu ukuya ku Gasa.” (Uyu musebo wa mu ciswebebe.) 27 E ico alimine no kuya, kabili amwene mutungwi* umwina Etiopia, umulashi wa kwa Namfumu Kandake uwa bena Etiopia, uwaleangalila icuma ca kwa namfumu conse. Aile ku Yerusalemu mu kupepa Lesa,+ 28 nomba alebwelelamo ku mwabo. Aikele mwi celeta lyakwe alebelenga mwi buuku lya kwa kasesema Esaya ninshi naikatisha ne shiwi. 29 E ico umupashi waebele Filipi auti: “Kabiye usange lilya iceleta.” 30 Filipi abutukiile ku mbali no kumumfwa alebelenga mwi buuku lya kwa Esaya kasesema, e lyo amwipusha ati: “Bushe cine cine nawishiba* ifyo ulebelenga?” 31 Na o amwaswike ati: “Inga kuti naishiba shani ukwabula uwa kuntungulula?” E ico apaapeete Filipi ukuti anine ekale nankwe mwi celeta. 32 Ne ciputulwa ca Malembo ico alebelenga citila: “Bamusendele nge mpaanga iyo baletwala mu kwipaya, kabili ekala tondolo ngo mwana wa mpaanga uwikele tondolo+ ilyo balemubeya amasako. 33 Balimucushishe kabili balimufyengele.+ Nani akalondolola fyonse pa nkulo yakwe? Pantu nafwa.”+

34 Lyena uyu mutungwi aebele Filipi ati: “Nondolwelako, ni nani uo kasesema alelandapo? Bushe alelanda pa mwine nelyo alelanda pa muntu umbi?” 35 Filipi atampile ukulanda nankwe, kabili alimushimikile imbila nsuma pali Yesu ukutendekela pali ili line ilembo. 36 Nomba ilyo baleya mu musebo, bafikile apali amenshi, kabili uyu mutungwi alandile ati: “Mona! Amenshi aya; cinshi cilendesha ukubatishiwa?” 37* —— 38 E ico alandile ukuti iceleta liminine. Lyena bonse babili Filipi na mutungwi baile mu menshi, kabili Filipi abatishe uyu mutungwi. 39 Ilyo bafumine mu menshi, bwangu bwangu umupashi wa kwa Yehova* wasendele Filipi, kabili mutungwi tamumwene, lelo uyu mutungwi aile uko aleya ninshi alesekelela. 40 Nomba Filipi aisangile fye ali mu Ashidode, kabili aile alebila imbila nsuma mu misumba yonse mpaka afika na ku Kaisarea.+

9 Lelo pali iyi nshita ninshi Sauli acili aletiinya abasambi ba kwa Shikulu,+ kabili alefwaya ukubepaya. E ico aile kuli shimapepo mukalamba 2 kabili ailelomba amakalata ya kutwala ku masunagoge ya ku Damaseke, pa kuti Aba Nshila,+ bonse abaume na banakashi, abo ali no kusanga engabaleta ku Yerusalemu ninshi nabakakwa.

3 Nomba ilyo aleya, cilya apalama ku Damaseke, mu kupumikisha fye ulubuuto lwalibyashishe e lyo lwamusanika,+ 4 kabili ilyo awile panshi aumfwile ishiwi lilemweba aliti: “Sauli, Sauli, cinshi ulencushisha?” 5 Sauli aipwishe ati: “Nimwe bani mwe Shikulu?” Lyena ishiwi lyatile: “Nine Yesu,+ uo ulecusha.+ 6 Nomba ima, uye wingile mu musumba, kabili bakakweba ifyo ufwile ukucita.” 7 Nomba abaume abo ali nabo pa bulendo baiminine fye tondolo, balyumfwile iciunda ce shiwi, lelo tabamwene umuntu nangu umo.+ 8 Lyena Sauli alimine, kabili nangu ca kuti alishibatwike talemona nangu cimo. E ico bamwikete pa kuboko bamutungulula na mu Damaseke. 9 Kabili pa nshiku shitatu talemona,+ talelya kabili talenwa nangu cimo.

10 Mu Damaseke mwali umusambi uwe shina lya kuti Anania,+ kabili Shikulu amwebele mu cimonwa ati: “Anania!” Na o alandile ati: “Ndi pano mwe Shikulu.” 11 Shikulu amwebele ati: “Ima, kabiye mu musebo uwitwa Uwaololoka, kabili pa ng’anda ya kwa Yuda ufwayepo umuntu we shina lya kuti Sauli, umwina Tarsi.+ Pantu mona! alepepa, 12 kabili mu cimonwa namona umuntu we shina lya kuti Anania aingila, amubikapo iminwe pa kuti engatampa ukumona na kabili.”+ 13 Lelo Anania alandile ati: “Mwe Shikulu, nalyumfwa ku bengi pali uyu muntu, ne fyabipa ifingi ifyo acitile abantu benu aba mushilo mu Yerusalemu. 14 Kabili aisa kuno ninshi intungulushi sha bashimapepo shalimupeela amaka ya kwikata* bonse abalilila mwi shina lyenu.”+ 15 Lelo Shikulu amwebele ati: “Kabiye, pantu uyu muntu cipe ico nasala+ pa kuti ale-eba abena fyalo,+ ishamfumu+ na bana ba kwa Israele pe shina lyandi. 16 Pantu nkamulanga bwino bwino ifingi ifyo akaculila ishina lyandi.”+

17 E ico Anania alile, kabili ilyo aingile mu ng’anda abikile iminwe yakwe pali Sauli, e lyo amweba ati: “Sauli munyinane, Shikulu Yesu ulya wamwene ilyo wali mu musebo, nantuma pa kuti ushibulwe amenso na pa kuti upokelele umupashi wa mushilo.”*+ 18 Kabili ilyo line mu menso yakwe mwaponene ifyalemoneka kwati mamba ye sabi, alitampile no kumona na kabili. Lyena aliimine abatishiwa no kubatishiwa, 19 kabili aliliile ifya kulya akwata na maka.

Lyena aikele na basambi inshiku shimo mu Damaseke.+ 20 Ilyo line fye atendeke ukushimikila abantu pali Yesu mu masunagoge, ukuti Mwana wa kwa Lesa. 21 Lelo bonse abaleumfwa ifyo alelanda balepapa, kabili baleti: “Bushe uyu te walesansa aba mu Yerusalemu abalilila muli ili shina?+ Bushe ico aishile te mu kubasansa pa kuti abekate,* abatwale na ku ntungulushi sha bashimapepo?”+ 22 Lelo Sauli alekwatilako fye amaka mu mulimo wakwe kabili alepapusha abaYuda abaleikala mu Damaseke ilyo alebalondolwela bwino ukuti Yesu e wali Kristu.+

23 Nomba ilyo papitile inshiku ishingi, abaYuda bapangene ukumwipaya.+ 24 Lelo Sauli aishileishiba ukuti balepanga ukumwipaya. Balelinda ne mpongolo akasuba no bushiku pa kuti bamwipaye. 25 E ico abasambi bakwe balimusendele ubushiku, bamupushisha pa cipunda icali mu cibumba, e lyo bamwikisha ninshi ali mu museke.+

26 Ilyo afikile ku Yerusalemu,+ aeseshe ukuilunda ku basambi, lelo bonse balemutiina, pantu tabasumine ukuti alyalwike umusambi. 27 E ico Barnaba+ alimwafwile, lyena amutungulwile na ku batumwa, e lyo alabalondolwela fyonse pa fyo Sauli amwene Shikulu+ ne fyo alandile nankwe mu musebo. Alibalondolwelele ne fyo Sauli alelanda pe shina lya kwa Yesu mu Damaseke+ ukwabula umwenso. 28 Kabili Sauli atwalilile ukuba pamo nabo, aleyendela* mu Yerusalemu ukwabula ukutiina nangu cimo kabili alelanda pe shina lya kwa Shikulu ukwabula umwenso. 29 Alelanda na baYuda abalelanda iciGriki kabili alepaashanya nabo. Lelo aba abaYuda balefwaya ukumwipaya.+ 30 Ilyo aba bwananyina baishibe ifi, bamutwele ku Kaisarea e lyo bamutuma ku Tarsi.+

31 Lyena aba mu cilonganino bonse mu Yudea, mu Galili na mu Samaria+ baikele umutende, balekoshiwa; kabili ilyo batwalilile ukutiina Yehova* na pa mulandu wa kuti umupashi wa mushilo+ walebasansamusha, balefulilako.

32 Nomba ilyo Petro alepita mu fitungu fyonse aile na ku ba mushilo abaleikala mu Luda.+ 33 E ko asangile umwaume umo uwe shina lya kuti Enea, uushaleima pa busanshi bwakwe pa myaka 8, pa mulandu wa kuti alilwele ubulebe. 34 Petro amwebele ati: “Enea, Yesu Kristu akundapa.+ Ima wanshike ubusanshi bobe.”+ Na o aliimine ilyo line. 35 Ilyo bonse abaleikala mu Luda na mwi lungu lya Sharone bamumwene, balisumine muli Shikulu.

36 Nomba mu Yopa mwali umusambi we shina lya kuti Tabita, ili ishina nga balipilibula ni Dorka.* Alebomba imilimo iingi isuma kabili aleafwa abapiina. 37 Lelo muli isho nshiku alilwele afwa no kufwa. E ico balimusambile bamubika na mu muputule wa pa muulu. 38 Apo Luda yali mupepi na Yopa, ilyo abasambi baumfwile ukuti Petro ali muli ulya musumba batumine abaume babili ukuyamweba abati: “Twapaapaata isa kuno bwangu bwangu.” 39 Petro na o aliimine ilyo line aya nabo. Kabili ilyo afikile, bamutwele mu muputule wa pa muulu; lyena bamukamfwilwa bonse baishile kuli ena balelila kabili balemulanga ifya kufwala ifingi e lyo ne mingila iingi,* ifyo Dorka ababilile ilyo aali nabo. 40 Lyena Petro afumiishe abantu bonse panse,+ kabili ilyo afukeme, alipepele. Lyena ilyo apilibukile ku citumbi alandile ati: “Tabita, ima!” Na o aliloleshe, kabili ilyo amwene Petro, aliimine aikala.+ 41 Petro amutambike ukuboko e lyo amwimya, kabili aitile aba mushilo na bamukamfwilwa e lyo abalanga Dorka ninshi ali uwa mweo.+ 42 Ici icacitike calishibikwe mu Yopa monse, kabili abengi balisumine muli Shikulu.+ 43 Petro aikele ku Yopa pamo na Simone kanyuka wa mpapa pa nshiku ishingi.+

10 Nomba mu Kaisarea mwali umuntu we shina lya kuti Korneli, uwali umukalamba wa bashilika* abali mwi bumba ilyo baleita ukuti ilya bena Italia.* 2 Alepepa Lesa, kabili ena na ba mu ng’anda yakwe bonse baletiina Lesa. Alepeela abapiina ifya bupe ifingi kabili lyonse alepaapaata Lesa. 3 Bushiku bumo nalimo pe awala lyalenga 9*+ Korneli amwene mu cimonwa malaika wa kwa Lesa aingila umo ali, e lyo amwita ati: “Korneli!” 4 Korneli alimulolekeshe, kabili alitiinine icine cine. Lyena aipwishe ati: “Cinshi mulefwaya ncite mwe Shikulu?” Na o amwaswike ati: “Lesa naumfwa amapepo yobe, namona ne fya bupe ifyo upeela abapiina kabili pali ifi nakwibukishishapo.+ 5 E ico nomba tuma abantu ku Yopa, bayeita Simone uo beta ukuti Petro. 6 Uyu muntu afikilila mu ng’anda ya kwa Simone,* kanyuka wa mpapa, uwakwatila ing’anda ku lulamba lwa bemba.” 7 Ilyo malaika uwalandile nankwe afuminepo fye, Korneli aitile ababomfi bakwe babili, aita no mushilika uwali pa balemubombela uwalepepa Lesa. 8 Lyena alibashimikile fyonse e lyo abatuma ku Yopa.

9 Pa bushiku bwakonkelepo ninshi bacili pa lwendo lwabo kabili balepalamina ku musumba, Petro aninine pa mutenge* mu kupepa nalimo pe awala lyalenga 6.* 10 Lelo insala yalimwikete nga nshi kabili alefwaya ukulya. Nomba ilyo bacili balepekanya ifya kulya, atampile ukumona icimonwa.+ 11 Amwene umuulu nawisuka ne cintu* icapala insalu iikalamba cileika pe sonde ninshi nabacikata ku makoona ya ciko 4; 12 kabili mu kati mwali imisango yonse iya nama isha molu 4, ifikulika ifya pano isonde ne fyuni fya mu muulu. 13 Lyena aumfwile ishiwi lileti: “Petro, ima, ipaya ulye!” 14 Lelo Petro alandile ati: “Awe mwe Shikulu, pantu nshabalalyapo icakowela kabili icishasanguluka.”+ 15 Ishiwi lyalandile nankwe umuku wa bubili aliti: “Leka ukwita ifyo Lesa asangulwile ukuti ifyakowela.” 16 Aumfwile ili ishiwi pa muku walenga butatu, kabili ilyo line icapala insalu icikalamba* balicisendele mu muulu.

17 Ilyo Petro acili napelenganishiwa pa fyo icimonwa amwene calepilibula, ilyo line abo Korneli atumine baipwishe ukwabelele ing’anda ya kwa Simone kabili baiminine pa mpongolo.+ 18 Babilikishe uwali pa ng’anda e lyo baipusha nga ca kuti epafikilile Simone uo beta ukuti Petro. 19 Ilyo Petro acili aletontonkanya pa cimonwa, umupashi+ wamwebele auti: “Mona! Abantu batatu balekufwaya. 20 E ico ima, ika kabili uye nabo, witwishika nangu panono, pantu nine mbatumine.” 21 Lyena Petro alikiile aya na kuli aba bantu e lyo abeba ati: “Nine wine mulefwaya. Cinshi mwaishila?” 22 Bamwaswike abati: “Korneli+ umukalamba wa bashilika, umuntu uwalungama kabili uutiina Lesa, uo abaYuda bonse bashimikapo ifisuma e ututumine. Malaika wa mushilo amwebele amashiwi ya kwa Lesa aya kuti twise tumwite muye ku ng’anda ku mwakwe pa kuti aye omfwe amashiwi yenu.” 23 E ico Petro alibengishe mu ng’anda abalanga na pa kulaala.

Ubushiku bwakonkelepo alimine aya nabo, kabili aba bwananyina bamo aba ku Yopa baile nankwe. 24 Kabili ubushiku bwakonkelepo aingile mu Kaisarea. Na kuba Korneli alebalolela kabili alilongenye balupwa lwakwe ne fibusa ifyo atemenwe sana. 25 Ilyo Petro aingile, Korneli alimusengele, amufukamina e lyo amutootela.* 26 Lelo Petro alimwimishe e lyo amweba ati: “Ima, na ine wine ndi muntu fye.”+ 27 Ilyo alelanda nankwe, alingile mu ng’anda kabili asangile abantu abengi nabalongana. 28 Abebele ati: “Mwalishiba ukuti amafunde tayasuminisha abaYuda ukupalamina ku muntu uwa mushobo umbi+ nelyo ukulanda nankwe. Lelo Lesa nanjeba ukuti nshifwile ukwita umuntu nangu umo ukuti alikowela nangu ukutila tasanguluka.+ 29 E co nshakaaniine ilyo mwatumine abakwisanjita. Nomba kuti natemwa ukwishiba ico munjitile.”

30 Lyena Korneli alandile ati: “Napapita inshiku 4 ukufuma pali lino iawala ilyo nalepepa mu ng’anda mu mwandi pe awala lyalenga 9,* kabili ilyo nalepepa namwene umuntu uwafwele ifya kufwala ifya buuta aisaiminina pa ntanshi yandi 31 e lyo anjeba ati: ‘Korneli, ipepo lyobe nalyumfwika na Lesa nakwibukisha pa fya bupe ifyo upeela abapiina. 32 E ico tuma abantu ku Yopa, aba kuti bayeita Simone uo beta ukuti Petro. Uyu muntu afikilila mu ng’anda ya kwa Simone, kanyuka wa mpapa, uwakwatila ing’anda ku lulamba lwa bemba.’+ 33 E ico ilyo line natumine abakwisamwita kabili mwacita bwino pa kwisa. Nomba ifwe bonse tuli pa ntanshi ya kwa Lesa pa kuti tumfwe fyonse ifyo Yehova* amwebele ukulanda.”

34 Lyena Petro alandile ati: “Cine cine nomba nashininkisha ukuti Lesa taba na kapaatulula,+ 35 lelo umuntu uwa mu luko lonse uumutiina kabili uucita icalungama, alamupokelela.+ 36 Lesa atumiine abana ba kwa Israele amashiwi ilyo abilile imbila ya mutende+ kuli bena ukupitila muli Yesu Kristu—uyu e Shikulu wa bonse.+ 37 Mwalishiba ilyashi ilyo balelandapo mu Yudea monse, ilyatendekele ku Galili+ pa numa ya lubatisho ulo Yohane alebilapo, 38 ilyalelanda pali Yesu uwafumine ku Nasarete. Lesa alimusubile no mupashi wa mushilo,+ alimupeele amaka, kabili aendawike mu calo alecita ifisuma, aleundapa na bonse abo Satana Kaseebanya atitikishe,+ pantu Lesa ali na Yesu.+ 39 Kabili tuli nte ya fintu fyonse ifyo acitile mu calo ca baYuda na mu Yerusalemu; lelo balimwipeye ilyo bamukobeke pa cimuti. 40 Lesa alimubuushishe pa bushiku bwalenga shitatu+ kabili alengele abantu bamumona, 41 te bantu bonse bamumwene, lelo ni nte isho Lesa asonteele libela, nifwe, fwe baliile no kunwa nankwe ilyo abuushiwe ku bafwa.+ 42 Kabili atwebele ukulashimikila abantu no kulabila sana ubunte+ bwa kuti, uyu e o Lesa asontele ukuba kapingula wa ba mweo na bafwa.+ 43 E o bakasesema bonse balandapo,+ ukuti onse uumutetekela aleleelwa imembu mwi shina lyakwe.”+

44 Ilyo Petro acili alelanda pali ifi fintu, umupashi wa mushilo waishile pali bonse abaleumfwa ifyo alelanda.+ 45 Kabili abasambi abaali abasembululwa* abaishile na Petro balipapile ilyo bamwene umupashi wa mushilo uwaba bupe bwa kwa Lesa, wapongolwelwa pa bena fyalo. 46 Pantu babomfwile balelandila mu ndimi shimbi kabili balecindika Lesa.+ Lyena Petro aipwishe ati: 47 “Bushe nani uwingakaanya aba bantu ukubatishiwa+ mu menshi abapokelele umupashi wa mushilo nga fintu na ifwe twapokelela?” 48 E ico abebele ukuti babatishiwe mwi shina lya kwa Yesu Kristu.+ Nabo bamwebele ukuti ekale nabo pa nshiku shimo.

11 Nomba abatumwa na ba bwananyina abali mu Yudea baumfwile ukuti abena fyalo nabo balitetekele icebo ca kwa Lesa. 2 E ico ilyo Petro afikile ku Yerusalemu, abalefwaya ukuti abena fyalo nabo balesembululwa+ batampile ukumusuusha* 3 abati: “Walingiile mu ng’anda ya bantu abashasembululwa kabili walelya nabo.” 4 E ico Petro atendeke ukubalondolwela ifyo cali, atile:

5 “Nali mu musumba wa Yopa ndepepa, kabili mu cimonwa namwene icintu* icalemoneka nge nsalu iikalamba, balecikisha ukufuma mu muulu ninshi nabacikata ku makoona 4, kabili caishile apo nali.+ 6 Ilyo nalolekeshe ifyalimo, namwene inama sha pano isonde isha molu 4, inama mpanga, ifikulika e lyo ne fyuni fya mu muulu. 7 Kabili naumfwile ishiwi lilenjeba aliti: ‘Petro, ima, ipaya ulye!’ 8 Lelo natile: ‘Te kuti ncite ifyo mwe Shikulu, pantu nshabalalyapo icakowela nelyo icishasanguluka.’ 9 Ishiwi lyafumine ku muulu umuku walenga bubili aliti: ‘Leka ukwita ifintu ifyo Lesa asangulwile ukuti ifyakowela.’ 10 Ilyo naumfwile ishiwi pa muku walenga butatu, fyonse balifitintiile mu muulu. 11 Kabili ilyo line fye abaume batatu abafumine ku Kaisarea+ abo batumine ukwisa mu kunjita, balifikile pa ng’anda apo twali. 12 Lyena umupashi wanjebele ukuya nabo, ukwabula ukutwishika nangu cimo. Lelo aba aba bwananyina 6 naile nabo, kabili twaileingila mu ng’anda ya kwa Korneli.

13 “Atushimikile ifyo amwene malaika naiminina mu ng’anda yakwe e lyo amweba ati: ‘Tuma abantu ku Yopa abakuyaita Simone uo beta ukuti Petro,+ 14 kabili akakweba ifintu ifingalenga iwe na ba mu ng’anda yobe bonse mukapusuke.’ 15 Lelo ilyo natendeke ukulanda, umupashi wa mushilo waishile pali bena nga filya fine waishile pali ifwe pa muku wa kubalilapo.+ 16 E lyo naibukishe amashiwi ayo Shikulu alelanda. Alelanda ati: ‘Yohane alebatisha abantu mu menshi,+ lelo imwe mukabatishiwa mu mupashi wa mushilo.’+ 17 E ico nga ca kuti Lesa abapeele ica bupe cimo cine, nge co apeele na ifwe fwe basumina muli Shikulu Yesu Kristu, bushe ine, nga nine naleseshe Lesa?”*+

18 Ilyo baumfwile ifyo alandile, balilekele ukumusuusha* kabili bacindike Lesa abati: “Kanshi Lesa nalenga abena fyalo balapila pa kuti nabo bene bakakwate umweo wa muyayaya.”+

19 Ilyo abalwani baipeye Stefani, batampa no kucuusha abasambi, aba basambi balisalangene+ ukufika fye na ku Foinike, ku Kupro na ku Antioke. Lelo tabalebila icebo ku bantu bambi, kano fye ku baYuda.+ 20 Nomba pali aba, pali bamo aba ku Kupro na ku Kurene abaishile ku Antioke. Batendeke ukulanda nabalelanda iciGriki, kabili balebila imbila nsuma pali Shikulu Yesu. 21 Kabili Yehova* alebafwa, ne bumba ilikalamba ilya bantu balitetekele kabili baishileba abasambi ba kwa Shikulu.+

22 Aba mu cilonganino cali mu Yerusalemu balyumfwile ululumbi lwabo, e ico batumine Barnaba+ ku Antioke. 23 Ilyo afikile amona ne fyo Lesa alebalanga icikuuku icaibela, alisekelele kabili atendeke ukukoselesha bonse ukuti batwalilile ukuba aba cishinka kuli Shikulu ne mitima yabo yonse;+ 24 pantu aali muntu umusuma, alikwete umupashi wa mushilo* kabili ali ne citetekelo icakosa. Kabili ibumba ilikalamba lyalitetekele Shikulu.+ 25 E ico aile ku Tarsi mu kufwaya Sauli+ kabili alimufwaile sana. 26 Ilyo amusangile, amuletele ku Antioke. E ico pa mwaka umo uutuntulu Barnaba na Sauli balelongana pamo na ba mu cilonganino ca ku Antioke, kabili balesambilisha ibumba ilikalamba. Mu Antioke mwine e mo Lesa alengele abasambi balaitwa ukuti Abena Kristu+ pa muku wa kubalilapo.

27 Muli isho nshiku, bakasesema+ bafumine ku Yerusalemu baisa ku Antioke. 28 Umo pali bena uwe shina lya kuti Agabu+ alimine no kutendeka ukusesema ukuti, icipowe icikalamba cali mupepi no kupona mwi sonde lyonse.+ Na kuba ici cipowe caliponene mu nshita ya kwa Klaudi. 29 E ico umusambi umo na umo alefwaisha ukutuma ifya kwafwilisha*+ aba bwananyina abaleikala mu Yudea ukulingana na po akwatile;+ 30 kabili ifi fine e fyo bonse bacitile. Bapeele Barnaba na Sauli+ pa kuti bafitwale ku bakalamba.

12 Pali ilya iine nshita, Imfumu Herode yatampile ukucusha bamo aba mu cilonganino.+ 2 Yalipeye Yakobo munyina Yohane+ ku lupanga.+ 3 Ilyo yamwene ukuti abaYuda balitemenwe ifi yacitile, yakonkeshepo ukwikata Petro. (Ifi fyacitike mu nshiku sha mukate uushatutumuka.)+ 4 Ilyo yamwikete, yamubikile mu cifungo+ kabili abashilika abaleba mu fipani 4 e bo yaebele ukuti balemulinda, kabili mu cipani cimo na cimo mwaleba abashilika 4. Herode alepanga ukufumisha Petro ku bantu* pa numa ya Cakucilila. 5 E ico batwalilile ukusungila Petro mu cifungo, lelo icilonganino calemupepelako sana kuli Lesa.+

6 Ilyo Herode aali mupepi no kumufumya, mu nshita ya bushiku Petro aleele pa kati ka bashilika babili ninshi nabamukaka amaceni yabili, kabili pa mwinshi pali abashilika babili abalelinda icifungo. 7 Lelo moneni! Malaika wa kwa Yehova* aishileiminina apo ali,+ kabili ulubuuto lwasanike mu cifungo. Ilyo asunkile Petro mu mbafu, alimushibwishe e lyo amweba ati: “Ima bwangu!” Na maceni ayali ku maboko yakwe yaliponene.+ 8 Malaika amwebele ati: “Kaka umushipi, ufwale ne ndyato shobe.” Na o alicitile ifyo fine. Lyena malaika amwebele ati: “Fwala ne ca kufwala cobe ica kunse e lyo unkonke.” 9 Kabili alifumine alamukonka, lelo taishibe ukuti ico malaika alecita cali ca cine cine. Ena alemona kwati cimonwa alemona. 10 Ilyo bapitile pa bashilika ba kubalilapo na balenga bubili, bafikile pa mpongolo ya cela iya kupitapo pa kuya mu musumba. Iyi impongolo yali-isukile fye iine. Ilyo bafumine bapitile mu musebo umo ifi, kabili ilyo line malaika alekene na Petro. 11 Lyena Petro alikutulwike, kabili atile: “Nomba naishiba ukuti Yehova* acituma malaika wakwe uwakwisampokolola mu minwe ya kwa Herode, na kuli fyonse ifyo abaYuda bale-enekela ukuti e fyalancitikila.”+

12 Ilyo akutulwike aile ku ng’anda ya kwa Maria nyina wa kwa Yohane uo beta ukuti Marko,+ uko abantu abengi balongene balepepa. 13 Ilyo akonkonseshe pa ciibi ca pa mpongolo, umubomfi umukashana uwe shina lya kuti Roda e waishile mu kumona uwalekonkosha. 14 Nomba ilyo aishibe ishiwi lya kwa Petro, alisekelele sana ica kuti taiswile ne mpongolo, lelo abutukiile mu kati no kushimikila abali mu ng’anda ukuti Petro e wali pa mpongolo. 15 Nabo bamwebele abati: “Bushe naupena?” Lelo akoselepo fye ukubeba ukuti ni Petro ali pa mpongolo. E lyo balamweba abati: “Ni malaika wakwe.” 16 Lelo Petro ashele alekonkonsha pa mpongolo. Ilyo baiswileko, balimumwene kabili balipapile sana. 17 Nomba alimishe ukuboko pa kuti batalale e lyo abalondolwela fyonse ifyo Yehova* amufumishe mu cifungo. Lyena abebele ati: “Kashimikileni Yakobo+ na ba bwananyina ifi fintu.” E lyo afuminepo aya na ku cifulo cimbi.

18 Nomba ilyo bwacele, abashilika balisakamene sana pantu tabaishibe icacitike kuli Petro. 19 Herode alimufwaile sana, nomba tamusangile. E ico alubulwishe abashilika abalemulinda kabili alandile ukuti babakande;+ lyena afumine ku Yudea aya ku Kaisarea uko aileikala pa nshita iinono.

20 Nomba Herode alifuliilwe* abena Turi na bena Sidone. E ico baishile kuli ena kabili bakonkele icintu cimo. Pa numa ya kunashanasha Blasti uwaleangalila ing’anda ya mfumu, baile kuli Herode pa kuti bomfwane nankwe pa lwa mutende, pantu icalo cabo calefumya ifya kulya ku calo ca kwa Herode. 21 Pa bushiku basalile, Herode afwele ifya kufwala fya bufumu aikala na pa cipuna ca kupingwilapo e lyo atendeka ukulanda na bantu. 22 Lyena abantu abalongene batendeke ukubilikisha abati: “Ilyo lishiwi lya kwa lesa, te lya muntu iyo!” 23 Apo pene malaika wa kwa Yehova* alimuumine, pa mulandu wa kuti tacindike Lesa, kabili imititi yalimuliile asuka afwa.

24 Lelo icebo ca kwa Yehova* calelunduluka kabili abantu abengi baletetekela.+

25 Ilyo Barnaba+ na Sauli bafishishe ifya kwafwilisha aba bwananyina ku Yerusalemu,+ balibwelulwike, basenda na Yohane+ uo beta no kuti Marko.

13 Nomba mu cilonganino+ ca mu Antioke mwali bakasesema na bakasambilisha pamo nga: Barnaba, Sumeone uo baleita ukuti Nigere, Luki umwina Kurene, Manaene uwalesambilila pamo na Herode kateka wa citungu, e lyo na Sauli. 2 Ilyo balebombela Yehova* no kufunga, umupashi wa mushilo wabebele auti: “Pa bantu bonse mpaatwilenipo Barnaba na Sauli+ pa kuti bengabomba umulimo uo nabetila.”+ 3 Lyena balifungile kabili balipepele, e lyo bababikapo iminwe babaleka baya no kuya.

4 Apo umupashi wa mushilo walitumine aba baume, baile ku Selukia kabili ilyo bafumineko baile no bwato ku Kupro. 5 Ilyo bafikile mu Salami batendeke ukubila icebo ca kwa Lesa mu masunagoge ya baYuda. Bali pamo na Yohane uwalebafwako imilimo.+

6 Ilyo bapwishishe ukubila pa cishi conse bafikile ku Pafu, uko bakumenye umwaume umuYuda uwe shina lya kuti Bar-Yesu, uwalecita ifinjelengwe kabili uwali kasesema wa bufi. 7 Ali pamo no mulashi* Sergi Pauli, uwali uwacenjela. Uyu mulashi aitile Barnaba na Sauli pantu alefwaisha ukumfwa icebo ca kwa Lesa. 8 Lelo Eluma uwalecita ifinjelengwe (na kuba ishina lya kuti Eluma nga balipilibula lyalola mu kuti, uucita ifinjelengwe) atendeke ukubakaanya, ale-esha ukukaanya umulashi pa kuti etetekela. 9 Lyena ilyo Sauli uo beta no kuti Paulo apokelele umupashi wa mushilo,* alimulolekeshe 10 e lyo amweba ati: “We ncenjeshi yakamamo na menshi kabili kabepa, we mwana wa kwa Satana Kaseebanya,+ we mulwani wa fintu fyonse ifyalungama, bushe tawakaleke ukupondamika inshila shalungama isha kwa Yehova?* 11 Mona! Yehova* alakukanda, kabili walapofula, tawamone ulubuuto lwa kasuba pa nshita imo.” Ilyo line fye pa menso yakwe paishile fubefube, akwata na kafiifi kabili alepulumpunta fye alefwaya uwa kuti amwikateko ku kuboko pa kuti amutungulule. 12 Lyena ilyo uyu mulashi amwene ifyacitike, alitetekele, pantu alipapile sana pa fyo asambilile pali Yehova.*

13 Nomba Paulo na banankwe baninine ubwato ku Pafu no kuya ku Perga mu Pamfulia. Lelo Yohane+ alibashile abwelelamo na ku Yerusalemu.+ 14 Nomba bena bafumine mu Perga, baya ku Antioke mu Pisidia. Ilyo baingile mwi sunagoge+ pa bushiku bwe Sabata, baliikele. 15 Pa numa ya kubelengela abantu Amafunde+ na mabuuku ya Bakasesema, abakalamba be sunagoge babatumiine amashiwi ya kuti: “Mwe baume, bamunyinefwe, nga ca kuti namukwata amashiwi ya kukoselesha abantu, yalandeni.” 16 E ico Paulo aliimine, kabili ilyo aimishe ukuboko pa kuti batalale, alandile ati:

“Mwe baume, mwe bena Israele na imwe bambi mwe batiina Lesa, umfweni. 17 Lesa wa aba bantu abena Israele asalile ifikolwe fyesu, kabili alengele baba uluko ulwa maka ilyo bali abalebeshi mu calo ca Egupti. Lyena alibafumishe muli ici calo ku maka yakwe.+ 18 Kabili pa myaka nalimo 40 iyo bali mu matololo,+ aleshipikisha fye pa fyo balecita. 19 Ilyo aonawile inko 7 mu calo ca Kanaani, alibapeele ici calo pa kuti cibe cabo.+ 20 Fyonse ifi fyacitike mu myaka nalimo 450.

“Pa numa alebapeela bakapingula, ukufika fye na kuli Kasesema Samwele.+ 21 Lelo pa numa balombele ukuti babapeele imfumu,+ kabili Lesa abapeele Shauli umwana wa kwa Kishi, uwa mu mukowa wa kwa Benjamini,+ uwabatekele pa myaka 40. 22 Ilyo amufumishepo, abapeele Davidi pa kuti e o abe imfumu+ yabo, uo alandilepo ati, ‘Ninsanga Davidi umwana wa kwa Yese,+ uo umutima wandi watemwa,+ kabili uukacita fyonse ifyo mfwaya.’ 23 Mu bufyashi* bwa uyu muntu, e mo Lesa afumishe Yesu uwa kupususha abena Israele+ ukulingana na fintu alaile. 24 Ilyo Yesu ashilaisa, Yohane alishimikile abena Israele bonse ukuti balingile ukubatishiwa pa kulanga ukuti balilapiile.+ 25 Lelo ilyo Yohane aleya alepwisha umulimo wakwe, alelanda ati: ‘Bushe mutila nine ani? Te ine ulya mulolela. Lelo moneni! Kuli umuntu uukankonkapo uo nshalinga no kukakula indyato shakwe.’+

26 “Mwe baume, bamunyinane, mwe batuntuka mu lupwa lwa kwa Abrahamu na imwe bonse mwe batiina Lesa, Lesa alitutumina aya mashiwi ye pusukilo.+ 27 Pantu abekala mu Yerusalemu na babatungulula tabamwishibe, lelo ilyo bamupingwile bafikilishe ifyo Bakasesema balandilepo+ ifyo batubelengela lyonse pe sabata. 28 Nangu ca kuti tabasangile umulandu wa kumwipailapo,+ bapatikishe Pilato ukuti uyu muntu bamwipaye.+ 29 Kabili ilyo bafikilishe fyonse ifyalembelwe pali ena, balimwikishe pa cimuti bamubika na mu nshiishi.*+ 30 Lelo Lesa alimubuushishe ku bafwa,+ 31 kabili pa nshiku ishingi abo aile nabo ku Yerusalemu ukufuma ku Galili balimumwene. Aba e baleshimikila abantu pali ena.+

32 “E ico tulebila kuli imwe imbila nsuma pa fintu ifyo balaile ifikolwe fyesu. 33 Lesa alifikilisha fyonse ifyo alaile pa kuti fwe bana babo tunonkelemo pantu alibuusha Yesu;+ nga filya fine calembwa mwi lumbo lyalenga bubili, calembwa ukuti: ‘Uli mwana wandi, buno bushiku nimba wiso.’+ 34 Kabili pa mulandu wa kuti Lesa alimubuushishe ku bafwa kabili amulengele ebwelela ku kubola, alandile ati: ‘Nkaba uwa cishinka+ kabili nkamulanga ukutemwa ukushipwa uko nalaile Davidi.’ 35 E ico na kabili alilanda mwi lumbo na limbi ati: ‘Tamwakaleke uwa cishinka kuli imwe akabole.’+ 36 Lelo Davidi ena alibombeele Lesa* mu nkulo yakwe, aliponene mu tulo twa mfwa, bamubikile mu nshiishi umwali ifikolwe fyakwe kabili alibolele no kubola.+ 37 Nomba uo Lesa abuushishe ku bafwa ena tabolele.+

38 “E ico mwe bamunyinane ishibeni ukuti, tulebila kuli imwe ukutila kuti mwaelelwa imembu ukupitila muli Yesu.+ 39 Amafunde ya kwa Mose+ tayalengele mwaba abalungama, lelo pa mulandu wa kuti Yesu alifwile, Lesa akalamona onse uwatetekela ukuti alilungama.+ 40 E ico muleba abacenjela pa kuti ifyo Bakasesema balandilepo fikamucitikila. Batile: 41 ‘Ifi ifyo ndecita mu nshiku shenu, nangu umuntu engamulondolwela bwino bwino+ ukuti nalificita te kuti musumine, lelo mukapapa sana kabili mukaloba.’”

42 Nomba ilyo balefuma, abantu balibapaapeete ukuti bakayebebako pali ifi fintu pe Sabata ilyali no kukonkapo. 43 E ico ilyo abantu bafumine mwi sunagoge, abaYuda abengi na baishileba abaYuda abalepepa Lesa bakonkele Paulo na Barnaba, kabili ilyo Paulo na Barnaba balelanda nabo, babakoseleshe ukuti batwalilile ukulacita ifingalenga Lesa atwalilila ukubalanga icikuuku icaibela.+

44 Pe Sabata lyakonkelepo, mupepi na bantu bonse mu musumba balilongene pa kuti bomfwe icebo ca kwa Yehova.* 45 Ilyo abaYuda bamwene amabumba, baishileba no mufimbila kabili batampile ukusuusha ifyo Paulo alelanda.+ Ifi balecita balesaalula Lesa. 46 Lyena Paulo na Barnaba balandile ukwabula umwenso abati: “Twalingile ukubalilapo ukweba imwe icebo ca kwa Lesa.+ Nomba apo namukaana kabili tamulemona ukuti namulinga ukwisakwata umweo wa muyayaya, moneni! twalaya mu kubila ku bena fyalo.+ 47 Pantu Yehova* alitweba amashiwi ya kuti: ‘Nalimusala ukuba ulubuuto lwa bena fyalo, pa kuti mukalenge abekala ku mpela ye sonde bakapusuke.’”+

48 Ilyo abena fyalo baumfwile ifi, balisekelele kabili bacindike icebo ca kwa Yehova.* Bonse abaali ne mitima iisuma iyalefwaya umweo wa muyayaya balitetekele. 49 Na kabili icebo ca kwa Yehova* calebilwa muli ilya ncende yonse. 50 Lelo abaYuda batunkile abanakashi abali abacindikwa abalepepa Lesa na bakalamba ba mu musumba. Batampile ukucusha+ Paulo na Barnaba kabili babatamfiishe kunse ya musumba. 51 E ico Paulo na Barnaba bakuntiile abalebacusha ulukungu ulwali ku makasa yabo baya na ku Ikonia.+ 52 Na kabili abasambi balitwalilile ukupokelela umupashi wa mushilo* kabili balesekelela+ nga nshi.

14 Ilyo Paulo na Barnaba bali mu Ikonia, baileingila mwi sunagoge lya baYuda kabili balilandile bwino sana ica kuti ibumba ilikalamba ilya baYuda na baGriki lyalitetekele. 2 Lelo abaYuda abashatetekele batunkile abena fyalo* kabili balengele baimina aba bwananyina.+ 3 E ico balilandile ukwabula umwenso pa nshita iitali pantu Yehova* alibapeele amaka, alengele bacita ifishibilo ne fipesha amano pa kuti abantu bashininkishe ukuti amashiwi ayo balelanda pa cikuuku cakwe icaibela ya cine.+ 4 Lelo abaleikala mu musumba balyakanikene; bamo bali ku lubali lwa baYuda e lyo bambi bali ku lubali lwa batumwa. 5 Ilyo abena fyalo na baYuda ne ntungulushi shabo balefwaya ukuti babasaalule kabili babapoole amabwe,+ 6 kwali abailebeba. E ico balifulumwike baya ku musumba wa Lukaonia, uwa Lustra, uwa Derbe na mu mishi iyali mupepi.+ 7 Balitwalilile ukubila imbila nsuma kulya kwine bafulumukile.

8 Nomba mu Lustra mwali umwaume uwaikele, uwalemene amakasa. Afyelwe fye uwalemana kabili tabalile endapo. 9 Uyu mwaume alekutika ilyo Paulo alelanda. Ilyo Paulo amulolekeshe amona no kuti alikwete icitetekelo kabili alicetekele ukutila kuti apola,+ 10 alandile mwi shiwi ilikalamba ati: “Iminina.” Na o alitolweke atampa no kwenda.+ 11 Ilyo abantu abali mu mabumba bamwene ifyo Paulo acitile, basanswile amashiwi yabo e lyo balanda mu cina Lukaonia abati: “Balesa nabaaluka abantunse kabili nabesa kuli ifwe!”+ 12 E ico batendeke ukwita Barnaba abati Seu, e lyo Paulo balamwita abati Herme, pantu e walelanda sana. 13 Kabili shimapepo wa kwa Seu, uo itempele lyakwe lyaloshenye no musumba, aletele ing’ombe ishilume ne filongwe fya maluba ku mpongolo, kabili ena na mabumba balefwaya ukutuula amalambo.

14 Nomba ilyo umutumwa Barnaba no mutumwa Paulo baumfwile ifi, balepwile amalaya yabo, batolokela mwi bumba e lyo basansula amashiwi abati: 15 “Mwe baume mwe, cinshi mulecitila ifi? Na ifwe bene tuli bantu fye abakwata amafya nga ayo mukwata.+ Tulebila imbila nsuma kuli imwe pa kuti mutaluke ifi fintu ifya fye, lelo mulepepa Lesa wa mweo, uwapangile umuulu na pano isonde, bemba na fyonse ifyabamo.+ 16 Mu nkulo ishapitapo alisuminishe inko shonse ukuti shilecita ifyo shalefwaya,+ 17 nangu ca kuti alicita ifilanga ukuti e ko aba+ pantu alicita ifisuma, alimupeela imfula ukufuma mu muulu ne nshita ilyo ifya kulya fifula mu mabala,+ alimupeela ifya kulya ifingi kabili alilenga imitima yenu ilesekelela.”+ 18 Na lintu balandile ifi, calikosele ukulesha amabumba ukubatuulila amalambo.

19 Lelo abaYuda abafumine ku Antioke na ku Ikonia baishiletunka amabumba,+ kabili bapoolele Paulo amabwe no kumukulila kunse ya musumba, pantu bamwene kwati nafwa.+ 20 Nomba ilyo abasambi bamushingulwike, aliimine aingila na mu musumba. Pa bushiku bwakonkelepo aile na Barnaba ku Derbe.+ 21 Ilyo babilile imbila nsuma muli uyu musumba balenga na bantu abengi baba abasambi, babweleele ku Lustra, ku Ikonia na ku Antioke. 22 Ilyo bali muli iyi misumba balekoselesha abasambi*+ ukuti batwalilile ukuba ne citetekelo. Balebeba abati: “Ilyo tushilaingila mu Bufumu bwa kwa Lesa, tufwile ukupita mu macushi ayengi.”+ 23 Na kabili babasonteele abakalamba mu cilonganino cimo na cimo.+ Ilyo bapepele bafunga no kufunga,+ bapeele aba bakalamba kuli Yehova* uo batetekele.

24 Lyena bapitile mu Pisidia e lyo baisa mu Pamfulia,+ 25 kabili ilyo babilile icebo ca kwa Lesa mu Perga, baile ku Atalia. 26 Ilyo bafumineko baile no bwato ku Antioke, uko pa kubala babapeelele umulimo wa kubomba pa mulandu wa cikuuku icaibela ica kwa Lesa. Pali iyi nshita balipwishishe ukubomba uyu mulimo babapeele.+

27 Ilyo bafikile, balonganike aba mu cilonganino, kabili batendeke ukubashimikila ifintu ifingi ifyo Lesa acitile ukupitila muli bena, no kuti alilengele abena fyalo batetekela.+ 28 E ico balikele na basambi pa nshita iitali.

15 Nomba abantu bamo bafumine ku Yudea kabili batendeke ukusambilisha aba bwananyina abati: “Nga tamusembulwilwe ukulingana no lutambi lwa kwa Mose,+ tamwakapusuke nakalya.” 2 Lelo ilyo aba bantu bapusene na Paulo na Barnaba no kukansana nga nshi, aba bwananyina bapekenye ukuti Paulo na Barnaba na basambi bamo batwale uyu mulandu ku batumwa na bakalamba mu Yerusalemu.+

3 E ico ilyo icilonganino cabashindikeko panono, aba bantu balitwalilile pa lwendo lwabo ukuyapita mu Foinike na mu Samaria, baleshimika ne fyo abena fyalo balepilibuka no kutendeka ukubombela Lesa, kabili balelenga aba bwananyina bonse balesekelela nga nshi. 4 Ilyo bafikile mu Yerusalemu, aba mu cilonganino, abatumwa na bakalamba balibapokelele bwino kabili balilondolwele ifingi ifyo Lesa acitile ukupitila muli bena. 5 Lelo bamo abali mwi bumba lya mapepo ilya baFarise, nomba aba-alwike abasambi, balimine apo baikele e lyo balanda abati: “Aba bantu balingile ukusembululwa kabili tufwile ukubakonkomesha ukulakonka Amafunde ya kwa Mose.”+

6 E ico abatumwa na bakalamba balilongene pa kuti balanshanye pali uyu mulandu. 7 Ilyo balanshenye* pa nshita iitali, Petro aliimine e lyo alanda ati: “Mwe baume, bamunyinane, mwalishiba bwino ukuti kale Lesa alinsalile pali imwe pa kuti abena fyalo bomfwe imbila nsuma kabili batetekele.+ 8 Kabili Lesa uwaishiba imitima ya bantu,+ alilanga ukuti alibapokelela pantu alibapeela umupashi wa mushilo+ nga filya fine na ifwe atupeele. 9 Na kabili talengele paba ubupusano pali bena na ifwe,+ lelo alibasangulwile imitima pa mulandu ne citetekelo cabo.+ 10 E ico nomba, cinshi mule-esesha Lesa pa kubika ikoli pa mikoshi ya basambi+ ilyo ifikolwe fyesu nangu nifwe bene tushali na maka ya kusenda?+ 11 Lelo ifwe twalicetekela ukuti, icalenga ukuti tupusuke cikuuku icaibela ica kwa Shikulu Yesu+ kabili e calenga nabo bene bapusuke.”+

12 Lyena bonse mwi bumba batalele fye tondolo, batendeka no kukutika uko Barnaba na Paulo baleshimika ifishibilo ifingi ne fipesha amano ifyo Lesa acitiile abena fyalo ukupitila muli bena. 13 Ilyo balekele ukulanda, Yakobo atile: “Mwe baume, bamunyinane, umfweni ifyo nalalanda. 14 Sumeone+ nalondolola bwino bwino ifyo pa muku wa kubalilapo Lesa apilibukiile ku bena fyalo pa kuti abulemo abantu abakwitilwa kwi shina lyakwe.+ 15 Kabili ifi nafilingana ne fyo Bakasesema balanda. Balanda abati: 16 ‘Pa numa ya ifi fintu nkabwela, kabili nkemya insakwe* ya kwa Davidi iyawa; nkawamya ifyaonaikako kabili nkaikuula cipya cipya pa kuti ikabe ifyo yali kale, 17 pa kuti abantu abashalapo, pamo na bena fyalo bonse, e kutila abantu abetilwa kwi shina lyandi, bakafwaye Yehova,* e fyo Yehova* alanda, uulecita ifi fintu+ 18 ifyaishibikwa ukufuma kale.’+ 19 E ico ine ndetila* twicusha abena fyalo abalealuka no kutendeka ukubombela Lesa,+ 20 lelo tubalembele fye ukuti baletaluka ku fyo batuula ku tulubi,*+ ku bulalelale,*+ ku fyatitilwa,* na ku mulopa.+ 21 Pantu ukufuma fye na kale, Mose balamulandapo mu misumba yonse, pantu balabelenga pali ena mu masunagoge lyonse pe sabata.”+

22 Lyena abatumwa na bakalamba pamo ne cilonganino conse bapingwile ukuti batume abaume bamo aba mwi bumba lyabo ku Antioke pamo na Paulo na Barnaba; batumine Yuda uo baleita no kuti Barisaba na Sila+ abali intungulushi pa ba bwananyina. 23 Balembele kalata e lyo babapeela. Muli kalata balembelemo ukuti:

“Kuli bamunyinefwe abena fyalo aba mu Antioke,+ aba mu Siria, na ba mu Kilikia. Ifwe fwe bamunyinenwe, fwe batumwa na bakalamba, tuleti: Mwapoleni! 24 Apo twalyumfwa ukuti bamo pali ifwe balishile uko kabili balelanda ifya kumusakamika,+ ne fya kufulunganya ifyo mwasuminamo,* nangu ca kuti te ifwe twabebele ukucita ifi, 25 bonse twapingula ukuti tusale abaume kabili tubatume kuli imwe, pamo na Barnaba na Paulo abo twatemwa, 26 abaume abapeela imyeo yabo pa mulandu we shina lya kwa Shikulu Yesu Kristu.+ 27 E ico twatuma Yuda na Sila, pa kuti nabo bese bamushimikile fimo fine pa kanwa nkati.+ 28 Pantu umupashi wa mushilo+ watwafwa pa kuti tusalepo ukukanamutwika icisendo na cimbi, lelo ifyo mufwile ukulakonka ni fi: 29 muletaluka ku fyo batuula ku tulubi,+ ku mulopa,+ ku fyatitilwa,*+ na ku bulalelale.*+ Nga muletalukililako fye kuli ifi, ifintu fikalamuwamina. Umutende ube na imwe!”

30 E ico ilyo aba bantu babalekele baya, baile ku Antioke. Ilyo bafikile ku Antioke balonganike aba bwananyina bonse babapeela na kalata. 31 Ilyo babelengele, balisekelele pantu balibakoseleshe. 32 Kabili apo Yuda na Sila nabo bali ni bakasesema, balilandile amalyashi ayengi aya kukoselesha kabili yalikoseleshe aba bwananyina.+ 33 Ilyo baikeleko inshita iinono, aba bwananyina balibalekele babwelelamo umutende ku babatumine. 34* —— 35 Lelo Paulo na Barnaba balitwalilile ukwikala mu Antioke kabili balesambilisha no kubila imbila nsuma ya cebo ca kwa Yehova,* capamo na ba bwananyina bambi abengi.

36 Ilyo papitile inshiku shimo, Paulo aebele Barnaba ati: “Natutale* tubwelelemo, tuyepempula aba bwananyina mu misumba yonse umo twabilile icebo ca kwa Yehova,* pa kuti tuyemona ifyo bali.”+ 37 Barnaba alefwaisha ukuti basende Yohane, uo baleita ukuti Marko.+ 38 Lelo Paulo alikeene ukumusenda, pantu alibashile ku Pamfulia kabili taile nabo mu kubomba umulimo wa kubila pa cebo ca kwa Lesa.+ 39 E ico balikansene nga nshi pali uyu mulandu, ica kuti bapaatukana no kupaatukana; kabili Barnaba+ asendele Marko e lyo aya nankwe mu bwato ku Kupro. 40 Paulo asalile Sila kabili ilyo aba bwananyina bapepele kuli Yehova* pa kuti alange Paulo icikuuku icaibela,+ aliimine aya. 41 Apitile mu Siria na mu Kilikia, alekosha ifilonganino.

16 E ico Paulo afikile ku Derbe e lyo aya ku Lustra.+ Kulya e kwali umusambi umo uwe shina lya kuti Timote.+ Nyina ali muYuda kabili ali musambi, lelo wishi aali muGriki, 2 kabili aba bwananyina mu Lustra na mu Ikonia baleshimika ifisuma pali Timote. 3 Paulo alefwaisha ukuti aye nankwe. Lelo ilyo ashilamusenda abalile amusembulula pa mulandu wa baYuda abali kulya,+ pantu bonse fye balishibe ukuti wishi aali muGriki. 4 Ilyo balepita mu misumba, balepeela abantu ifipope ifyo abatumwa na bakalamba abali mu Yerusalemu bapingwile ukuti e fyo balekonka.+ 5 E ico icitetekelo ca ba bwananyina abali mu filonganino calekoselako kabili balefulilako cila bushiku.

6 Kabili bapitile mu Frugia na mu calo ca Galatia,+ pantu umupashi wa mushilo walibaleseshe ukubila icebo ca kwa Lesa mu citungu ca Asia. 7 Na kabili, ilyo bafikile mu Musia baeseshe ukuya ku Bitunia,+ lelo umupashi wa kwa Yesu walibakeenye. 8 E ico balipitilile* mu Musia baya ku Troa. 9 Kabili ubushiku Paulo amwene icimonwa—umwina Makedonia umo aliminine alemupaapaata ati: “Abukileni kuno ku Makedonia mwise mutwafwe.” 10 Ilyo amwene fye icimonwa, twalimine twaya ku Makedonia, pantu twalimwene ukuti Lesa alitwitile ukuyabila imbila nsuma kuli bena.

11 E ico twafumine ku Troa mu bwato twalungama ku Samotrake, lelo pa bushiku bwakonkapo twaile ku Neapoli; 12 kabili ilyo twafumineko twaile ku musumba wa Filipi+ uo abena Roma baletungulula. Uyu e wali umusumba uukalamba mu citungu ca Makedonia. Umu mwine e mo twaikele inshiku shimo. 13 Pa bushiku bwe Sabata twafumine kunse ya mpongolo ku lulamba lwa mumana, uko twalemona kwati e kwali icifulo ca mapepo, e ko twaileikala twatampa no kulanshanya na banakashi abalongene. 14 Kabili kwali umwanakashi uwe shina lya kuti Lidia, uwaleshitisha insalu ishakashikila, uwa mu musumba wa Tuatira+ kabili ali ni kapepa wa kwa Lesa. Ilyo Paulo alelanda, alekutika kabili Yehova* aliswile sana umutima wakwe pa kuti abike amano ku fyo Paulo alelanda. 15 Ilyo ena na ba mu ng’anda yakwe babatishiwe,+ atupaapeete ati: “Nga namumona ukuti ndi wa cishinka kuli Yehova,* tuleyeni muyeikala ku ng’anda ku mwandi.” Kabili akoselepo fye mpaka twaya nankwe.

16 Nomba ilyo twaleya ku cifulo ca mapepo, umukashana umo umubomfi uwali no mupashi wa kubuka,+ alitukumenye. Aleletela bashikulu wakwe ifyuma ifingi mu kubuka. 17 Uyu mukashana alekonka Paulo na ifwe kabili alebilikisha ati: “Aba babomfi ba kwa Lesa Uwapulamo,+ kabili balebila inshila ye pusukilo kuli imwe.” 18 Ifi fine e fyo alecita pa nshiku ishingi. Paulo asukile akalipa, apilibuka e lyo aeba umupashi wabipa ati: “Ndekwebela mwi shina lya kwa Yesu Kristu ukuti fumamo mu mukashana.” Ilyo line fye walifuminemo.+

19 Ilyo bashikulu wakwe bamwene ukuti nomba capwa tabakulamwenamo ifyuma,+ baikete Paulo na Sila, babakulila mu maliketi e lyo babatwala ku ntungulushi.+ 20 Ilyo babatwele kuli bamafumu, balandile abati: “Aba bantu balefulunganya sana aba mu musumba wesu.+ BaYuda, 21 kabili balesambilisha intambi isho amafunde yashatusuminisha ukukonka nelyo ukucita pantu tuli bena Roma.” 22 Lyena ibumba lyonse lyalibemiine, kabili ilyo bamafumu babalepwilile ifya kufwala, baebele aba kuti babome ukubomfya inkonto.+ 23 Ilyo babomine sana, bababikile mu cifungo, basopesha no walelinda icifungo ukuti abasope sana.+ 24 Pa mulandu wa kuti balimukonkomeshe muli uyu musango, ababikile mu cifungo ca mu kati, akakisha na makasa yabo mu makusu.

25 Lelo ilyo cali nalimo pa kati ka bushiku, Paulo na Sila balepepa kabili baleimba pa kulumbanya Lesa,+ na bafungwa balebomfwa. 26 Mu kupumikisha fye kwapitile icinkukuma icikalamba, no mufula wa cifungo walitenkene. Kabili ilyo line ifiibi fyonse fyaliswike, ne fyo bakakileko abafungwa bonse fyalikakwike.+ 27 Ilyo uwalelinda icifungo ashibwike mu tulo amona ne fiibi fya cifungo nafisuka, asomwene ulupanga lwakwe pa kuti aipaye, pantu alemona kwati abafungwa balifyukile.+ 28 Lelo Paulo abilikishe mwi shiwi ilikalamba ati: “Wiyipaya, pantu bonse e mo tuli!” 29 E ico uwalelinda icifungo alombele ifya kusanikilako e lyo aingilamo ulubilo. Pa mulandu wa kuti ali no mwenso kabili aletutuma, ailefukamina Paulo na Sila. 30 Abafumiishe panse e lyo abepusha ati: “Cinshi mfwile ukucita pa kuti mpusuke?” 31 Nabo bamwaswike abati: “Nga watetekela Shikulu Yesu, iwe na ba mu ng’anda yobe mukapusuka.”+ 32 Lyena balimushimikile icebo ca kwa Yehova* pamo na ba mu ng’anda yakwe bonse. 33 Kabili alibasendele muli ilya ine nshita ya bushiku ayabasambila ne filonda. Lyena ena na ba mu ng’anda yakwe bonse balibatishiwe ilyo line.+ 34 Abengishe mu ng’anda yakwe abapekanishisha ne fya kulya, kabili ena pamo na ba mu ng’anda yakwe bonse balisekelele nga nshi pa mulandu wa kuti nomba alitetekele Lesa.

35 Ilyo bwacele, bamafumu batumine bakapaso ukuyaeba uwalelinda icifungo ukuti: “Kakula abo bantu.” 36 Uwalelinda icifungo aile-eba Paulo ati: “Bamafumu nabatuma abantu abeshilenjeba ukuti imwe babili imukakule. E ico nomba fumeni, kabiyeni umutende.” 37 Lelo Paulo abebele ati: “Batufopawilile pa bantu ukwabula ukutulubulwisha nangu ca kuti tuli bena Roma,+ e lyo batubika na mu cifungo. Nomba bushe balefwaya batutamfye mu bumfisolo? Awe iyo! Lekeni abene e bo bese batufumye.” 38 Bakapaso bailefisha aya mashiwi kuli bamafumu. Nabo balitiinine ilyo baumfwile ukuti Paulo na Sila bali bena Roma.+ 39 E ico balileko no kupaapaata Paulo na Sila, kabili ilyo babafumishe, babapaapeete ukuti bafume mu musumba. 40 Nomba ilyo bafumine mu cifungo baile ku ng’anda ya kwa Lidia; kabili ilyo bamwene aba bwananyina balibakoseleshe.+ Lyena balifumineko baya no kuya.

17 Nomba bapitile mu Amfipoli na mu Apolonia e lyo bafika ku Tesalonika+ ukwali isunagoge lya baYuda. 2 E ico nga fintu Paulo alecita lyonse,+ aleingila umo baleba kabili pa masabata yatatu alelanshanya nabo Amalembo,+ 3 alebalondolwela kabili alebalanga ubushininkisho bwa mu malembo ukuti Kristu alingile ukucula+ no kubuuka ku bafwa.+ Alebeba ukuti: “Yesu e Kristu, uo ine ndebilapo kuli imwe.” 4 E ico bamo pali bena balitetekele, bailunda na kuli Paulo na Sila.+ Kabili ibumba ilikalamba ilya baGriki abalepepa Lesa na banakashi abengi abalumbwike nabo balitetekele.

5 Lelo pa mulandu wa kuti abaYuda bali no mufimbila,+ balonganike abantu bamo abalecita ifyabipa kabili abalelulumba fye pa maliketi, e lyo bapanga ibumba ilyaile mu kucita ifimfulunganya mu musumba. Lyena bailesansa ing’anda ya kwa Yasone kabili balefwaya ukufumisha Paulo na Sila panse apali ibumba. 6 Ilyo bafililwe ukubasanga, batintenye Yasone na ba bwananyina bamo babatwala na ku ntungulushi sha mu musumba, uku ninshi balepunda abati: “Aba bantu abo mumfwa ukuti balaleta ifimfulunganya mpanga yonse nabafika na kuno,+ 7 kabili Yasone nabapokelela mu ng’anda mu mwakwe. Aba bonse balasuusha ifipope fya kwa Kaisare, batila kwaliba imfumu na imbi, Yesu.”+ 8 Ilyo ibumba ne ntungulushi sha mu musumba baumfwile ifi, balisakamikwe; 9 kabili ilyo Yasone na basambi bambi balipiile indalama sha cikatila mulandu, balibalekele baya.

10 Ilyo bwailile fye, aba bwananyina baebele Paulo na Sila ukuti baye ku Berea. Ilyo bafikile, baingile mwi sunagoge lya baYuda. 11 Nomba aba, baali no mutima wa kusambilila ukucila aba mu Tesalonika, pantu bena balefwaisha ukupokelela amashiwi ya kwa Lesa. Cila bushiku balefwailisha mu Malembo pa kuti bashininkishe nga ca kuti ifyo balesambilila fya cine. 12 E ico abengi pali aba balitetekele, kabili abanakashi abengi abaGriki abo abantu bacindike na baume bamo nabo balitetekele. 13 Lelo ilyo abaYuda ba ku Tesalonika baumfwile ukuti Paulo alisabankenye icebo ca kwa Lesa na mu Berea, balileko mu kutunka amabumba pa kuti yabemine.+ 14 Lyena aba bwananyina baebele Paulo ukuti aye kuli bemba ilyo line,+ lelo Sila na Timote bena bashele kulya kwine. 15 Nomba abaleshindika Paulo bamufishishe ku Atena, kabili balibwelelemo ilyo Paulo abebele ukuti Sila na Timote+ balingile ukwangufyanya ukuya kuli ena.

16 Nomba ilyo Paulo alebalolela mu Atena, alikalipe ilyo amwene ukuti muli uyu musumba mwali sana utulubi. 17 E ico atendeke ukulanshanya na baYuda mwi sunagoge pamo na bantu bambi abalepepa Lesa, kabili cila bushiku alelanshanya na baleba pa maliketi. 18 Lelo bamo pa bena Epikuri na bena Stoiki abasambilile amano ya bantunse batendeke ukutalikana nankwe, kabili bamo baleti: “Finshi uyu cilandelande alefwaya ukulanda?” Bambi baleti: “Alemoneka kwati alesambilisha pali balesa bambi bambi.” Pantu alebila imbila nsuma pali Yesu na pa kubuuka kwa bafwa.+ 19 E ico balimwikete bamutwala na ku Areopagi, e lyo bamweba abati: “Bushe kuti watulondolwelako pali ifi fintu ifipya ifyo ulelandapo? 20 Pantu uletweba ifintu ifyo tushabalaumfwapo. E ico tulefwaya twishibe umo filolele.” 21 Na kuba abena Atena bonse na balebeshi* bonse nga baletuusha tabalecita ifintu fimbi, kano fye ukulanshanya nelyo ukukutika ifintu ifipya. 22 Nomba Paulo aiminine mu kati ka Areopagi+ e lyo alanda ati:

“Mwe bena Atena, nimona ukuti muli fyonse imwe mulemoneka nga batiina sana balesa ukucila ifyo abantu bambi babatiina.*+ 23 Pantu ilyo nalepita ninshi ndelolekesha ne fyo mupepa, nasangile ne ciipailo apalembwa ukuti ‘Kuli Lesa Uushaishibikwa.’ E ico Lesa uushaishibikwa uo mupepa e o ndebilapo kuli imwe. 24 Lesa uwapangile cino calo na fyonse ifyabapo, apo ni Shikulu wa muulu ne sonde,+ tekala mu matempele ayo abantu bakuula;+ 25 kabili takabila ukuti abantu balemwafwa,+ pantu e upeela abantu bonse umweo, e ulenga baba no bumi+ kabili e ubapeela ifintu fyonse. 26 Mu muntu umo e mo alengeele inko shonse isha bantunse,+ pa kuti shileikala pano isonde ponse.+ E wabikako ne nshita ne mipaka ya ncende isho abantunse bafwile ukulaikalamo,+ 27 pa kuti bengafwaya Lesa, nalimo bengamupampanta no kumusanga,+ nangu ca kuti taba ukutali na ifwe umo umo. 28 Pantu e walenga ukuti tube abomi, ukuti tule-enda kabili tubeko, nga filya fine na bakalemba benu bamo aba mishikakulo balanda ukuti, ‘Pantu na ifwe tuli bana bakwe.’

29 “E ico apo tuli bana ba kwa Lesa,+ tatufwile ukulamona ukuti Lesa aba nga golde nelyo silfere nelyo ilibwe, nangu ukulamona kwati aba nge cintu ico abacenjela mu fya kupangapanga babasa.+ 30 Kwena Lesa alisuulako iyi nshita iyo mushamwishibe,+ nomba pali ino nshita, alebila ku bantu bonse mpanga yonse ukuti bafwile ukulapila. 31 Pa mulandu wa kuti alisala ubushiku ilyo akapingula+ abantu bonse pano isonde mu bulungami, alisala na kapingula kabili alipeele na fwe bantu bonse ubushininkisho ilyo amubuushishe ku bafwa.”+

32 Nomba ilyo baumfwile Paulo alanda pa kubuuka kwa bafwa, bamo batendeke ukumupumya,+ e lyo bambi bena baleti: “Tukesaumfwako na kabili pali ifi.” 33 E ico Paulo alibashiile, 34 lelo abantu bamo baile nankwe kabili balitetekele. Pali aba pali na Dionusi, kapingula wa mu cilye ca Areopagi, umwanakashi uwe shina lya kuti Damari, e lyo na bantu bambi.

18 Pa numa ya ifi, Paulo afumine ku Atena aya na ku Korinti. 2 Kulya e ko asangile umuYuda umo uwe shina lya kuti Akula,+ umwina Ponte. Pali iyi nshita ninshi e lyo fye afumine ku Italia pamo no mukashi wakwe Prisila, pantu Klaudi aebele abaYuda bonse ukuti bafume mu Roma. E ico aile kuli bena, 3 kabili apo bonse balebomba umulimo umo wine, atendeke ukwikala ku mwabo kabili alebombela pamo nabo,+ pantu balebomba umulimo wa kupanga amatenti. 4 Lyonse pe sabata+ alelanda ilyashi* mwi sunagoge+ kabili alelenga abaYuda na baGriki batetekela.

5 Nomba ilyo Sila+ na Timote+ baishile ukufuma ku Makedonia, Paulo atendeke ukubila sana pa cebo ca kwa Lesa. Alebila ku baYuda no kubashinina ukuti Yesu e Kristu.+ 6 Nomba ilyo batwalilile ukumukaanya no kumusaalula, akuntile ifya kufwala fyakwe+ e lyo abeba ati: “Umulopa wenu ube pa mitwe yenu.+ Ine ndi wa kaele.+ Ukufuma nomba nakulaya ku bena fyalo.”+ 7 E ico alifuminemo* aya mu ng’anda ya muntu we shina lya kuti Tito Yusti, uwalepepa Lesa, uwakwete ing’anda iyashintene ne sunagoge. 8 Lelo Krispi+ umukalamba we sunagoge alitetekele Shikulu, pamo na bonse aba mu ng’anda yakwe. Na bena Korinti abengi abaumfwile balitetekele no kubatishiwa. 9 Ilyo bwailile Shikulu aebele Paulo mu cimonwa ati: “Witiina, lelo konkanyapo fye ukushimikila abantu, wiikala tondolo, 10 pantu ndi nobe,+ kabili takuli uukakusansa pa kuti akucite icabipa; pantu muli uno musumba mwaliba abantu bandi abengi.” 11 E ico aikele kulya umwaka umo ne myeshi 6, alesambilisha abantu icebo ca kwa Lesa.

12 Ilyo Galio aali umulashi* wa mu Akaya, abaYuda balyumene akapi e lyo baimina Paulo. Lyena bamutwele ukwali icipuna ca kupingwilapo. 13 Balelanda abati: “Uyu muntu alelenga abantu balepepa Lesa mu nshila iyapusana na mafunde.” 14 Lelo cilya Paulo ati alande, Galio aebele abaYuda ati: “Mwe baYuda, kwena uyu muntu acita icilubo nelyo apanga umulandu uukalamba nga nacumfwa ifyo mulelanda kabili nga nacimutekanishisha. 15 Lelo nga mulekansanina pa mashiwi, pa mashina na pa mafunde yenu,+ mwalaishiba ifyo mwalacita mwe bene. Nshilefwaya ukulapingula pali ifi fintu.” 16 Lyena alibatamfishe pa kuti bafume ukwali icipuna ca kupingwilapo. 17 E ico bonse baikete Sostene+ umukalamba we sunagoge, batendeka no kumupuma ninshi bali mupepi na pali icipuna ca kupingwilapo. Lelo Galio tacitilepo nangu cimo.

18 Nomba ilyo Paulo aikele kulya inshiku ishingi, alishalikepo aba bwananyina anina no bwato aya ku Siria, kabili Prisila na Akula baile nankwe. Ilyo ali ku Kenkrea,+ alibeyele umushishi pantu alilapile umulapo. 19 E ico ilyo bafikile ku Efese, alibashiile; lelo ena aingile mwi sunagoge atampa no kulanshanya na baYuda.+ 20 Nangu ca kuti balimupaapeete ukuti ekaleko nabo inshita iitali, alikeene, 21 lelo alibashalikepo e lyo abeba ati: “Yehova* nga atemwa, nkabwela na kabili.” Kabili afumine ku Efese no bwato 22 aya na ku Kaisarea. Lyena aile ku Yerusalemu ayashalikapo icilonganino e lyo aya ku Antioke.+

23 Ilyo aikeleko inshita iinono, alifumineko aya alekoselesha abasambi bonse+ mu misumba iyalekanalekana iya mu calo ca Galatia ne ca Frugia.+

24 Nomba kwali umuYuda umo uwaishile mu Efese uwe shina lya kuti Apolo,+ umwina Alekesandria; ali uwacenjela mu kulanda kabili alishibe sana Amalembo. 25 Uyu muntu balimusambilishe pali* Yehova,* kabili apo umupashi walilengele aba uwacincila, alelanda no kusambilisha bwino bwino pali Yesu, lelo aishibe fye ulubatisho lwa kwa Yohane. 26 Uyu muntu atendeke ukulanda ukwabula umwenso mwi sunagoge. Ilyo Prisila na Akula+ bamuumfwile, balimusendele e lyo bamulondolwela bwino bwino pali Lesa.* 27 Kabili apo alefwaisha ukwabukila ku Akaya, aba bwananyina balembeele abasambi kalata, umo babakonkomeshe ukuti bamupokelele bwino. E ico ilyo afikile kulya, alyafwile sana abatetekele pa mulandu wa cikuuku icaibela ica kwa Lesa. 28 Apo ali uwacincila alishinine bwino bwino abaYuda pa cintubwingi ukuti balilubile, alebalanga mu Malembo ukuti Yesu e Kristu.+

19 Ilyo ifi fyalecitika ninshi Apolo+ acili mu Korinti, Paulo apitile ku mulundu aya ku Efese.+ Kulya kwine e ko ailesanga abasambi bamo 2 kabili abepwishe ati: “Bushe mwalipokelele umupashi wa mushilo ilyo mwatetekele?”+ Nabo bamwaswike abati: “Tatwatala atumfwapo ukuti kwaliba umupashi wa mushilo.” 3 E ico abepwishe ati: “Nomba lubatisho nshi mwabatishiwe? Nabo bamwaswike abati: “Lubatisho lwa kwa Yohane.”+ 4 Paulo alandile ati: “Yohane alebatisha abantu pa kuti balange ukuti nabalapila.+ Ale-eba abantu ukuti balingile ukutetekela uwali no kumukonka pa numa,+ e kutila Yesu.” 5 Ilyo baumfwile ifi, balibatishiwe mwi shina lya kwa Shikulu Yesu. 6 Kabili ilyo Paulo ababikilepo iminwe, umupashi wa mushilo waishile pali bena,+ batendeka no kulandila mu ndimi shimbi kabili balasesema.+ 7 Bonse pamo bali nalimo abaume 12.

8 Pa myeshi itatu Paulo aleya mwi sunagoge+ kabili alelanda amalyashi ukwabula umwenso, na kabili alepelulushanya na bantu pa Bufumu bwa kwa Lesa.+ 9 Lelo ilyo bamo bakeene ukutetekela pa mulandu wa cilumba, kabili ilyo balepontela aba Nshila+ pa cintubwingi, Paulo alibashile+ asenda na basambi. Cila bushiku alelanda amalyashi mu muputule uukalamba uwa pe sukulu lya kwa Turani. 10 Ifi fine e fyo alecita pa myaka ibili, kabili bonse abaYuda na baGriki abaleikala mu citungu ca Asia balyumfwile amashiwi ya kwa Shikulu.

11 Kabili Lesa alitwalilile ukucita ifipesha amano ukupitila muli Paulo,+ 12 ica kuti abantu baletwala ututambala ne nsalu ishakumishepo umubili wa kwa Paulo ku balwele,+ kabili abalwele balepola, ne mipashi yabipa yalefuma mu bantu.+ 13 Lelo kwali na baYuda bamo abaleya balefumya ifibanda mu bantu, kabili balyeseshe ukulumbula ishina lya kwa Shikulu Yesu ilyo balefumya ifibanda mu bantu. Baleti: “Ndekwebela muli Yesu uo Paulo abilapo+ ndeti fumamo.” 14 Nomba kwali abana baume 7 aba muntu we shina lya kuti Skefa abalecita ifi. Uyu umuYuda ali ni ntungulushi ya bashimapepo. 15 Lelo umupashi wabipa wabebele auti: “Yesu nalimwishiba+ na Paulo wine nalimwishiba;+ inga imwe nimwe bani?” 16 Lyena umuntu uwali no mupashi wabipa alibafukukile, alibanashishe bonse kabili alibacimfishe, ica kuti bafulumwike muli ilya ng’anda ubwamba ninshi nabacena. 17 Bonse abaYuda na baGriki abaleikala mu Efese balishibe ifi ifyacitike; no mwenso walibekete bonse kabili abantu batwalilile ukucindika ishina lya kwa Shikulu Yesu. 18 Kabili abengi abatetekele baleya pa cintubwingi mu kuyebelela ifyabipa ifyo balecita. 19 Na cine abengi abalecita ifinjelengwe balilonganike amabuuku yabo e lyo bayocela pa menso ya bantu bonse.+ Kabili ilyo bayapendele, basangile ukuti umutengo wa yako wali ni ndalama sha silfere 50,000. 20 E ico icebo ca kwa Yehova* caleya cilelunduluka kabili calekwatilako fye amaka.+

21 Pa numa ya ifi fintu, Paulo apangile mu mutima wakwe ati, pa numa ya kupita mu Makedonia+ na mu Akaya, ali no kuya ku Yerusalemu.+ Atile: “Nga nafika kulya, mfwile no kuya ku Roma.”+ 22 E ico pa balemwafwako imilimo asalilepo babili, Timote+ na Erasti,+ e lyo abatuma ku Makedonia, lelo ena ashele mu citungu ca Asia pa nshita imo.

23 Pali ilya nshita kwaimine icimfulunganya icikalamba+ pa mulandu wa ba Nshila.+ 24 Pantu umuntu umo uwe shina lya kuti Demetri, kafula wa fyela fya silfere, alepanga utumatempele twa silfere utwa kwa Artemi, utwalelenga na bambi abalefula ifyela fya silfere balepanga sana indalama.+ 25 Alibalonganike pamo na bambi abalebomba uyu mulimo e lyo abeba ati: “Mwe baume, mwalishiba bwino ukuti uyu mulimo eulenga tulekwata icuma. 26 Nomba mwalimona kabili mwalyumfwa ukuti Paulo eba abantu ukuti ifyo abantu bapanga te balesa ba cine.+ Kabili uyu wine Paulo alilenga ibumba ilikalamba mu Efese+ na mu citungu ca Asia conse basumina ifintu fimbi. 27 Na cimbi icibipile ca kuti, abantu bakasuula umulimo wesu, ne tempele lya kwa lesa mwanakashi umukalamba Artemi na lyo line bakalisuula, kabili umucinshi aba mu citungu ca Asia conse na bantu ba pano isonde bonse bamupeela ukapwa.” 28 Ilyo baumfwile ifi, balikalipe nga nshi, e lyo balabilikisha abati: “Artemi wa bena Efese mukalamba!”

29 E ico mu musumba mwali fye icimfulumfulu ceka ceka, kabili bonse babutukile umwa kutambila ifyangalo, ninshi baletintanya na Gai na Alistaaki,+ abena Makedonia, abale-endela pamo na Paulo. 30 Lelo Paulo alefwaya ukuya mu kati umwali abantu, nomba abasambi balimukeenye. 31 Na bakalamba ba mitebeto ne fyangalo bamo abali ifibusa fyakwe, batumine amashiwi ya ku mupaapaata ukuti, eingila umwa kutambila ifyangalo pa kuti eibika mu kapoosa mweo. 32 Pa balongene umwa kutambila ifyangalo pali icimfulumfulu, pantu balepunda ifintu ifyapusanapusana, kabili abengi tabaishibe ne co balonganine. 33 E ico bamo bafumishe Alekisanda mwi bumba, ninshi abaYuda balemusunkila ku ntanshi. Lyena Alekisanda aimishe ukuboko pa kuti ibumba litalale pantu alefwaya ukuipokolola. 34 Lelo ilyo baishibe ukuti ali muYuda, bonse batampile ukubilikisha pamo abati: “Artemi wa bena Efese mukalamba!” Babilikiishe pa ma-awala yabili.

35 Kalemba wa musumba asukile atalalika ibumba, e lyo alanda ati: “Mwe bena Efese, bushe kwena nani uushaishiba ukuti mu musumba wa Efese e mwaba itempele lya kwa Artemi umukalamba ne cimpashanya icaponene mu muulu? 36 Apo ifi fintu fya cine, mulingile ukwikala tondolo no kutekanya. 37 Pantu aba muletele te fipondo fya matempele, kabili tabapontela lesa wesu umwanakashi. 38 E ico nga ca kuti Demetri+ na bo abomba nabo umulimo wa kufula ifyela fya silfere nabakwata umulandu wa kupeela umuntu; inshiku sha kulubulula e ko shaba, na balashi* nabo e ko baba, lekeni bakalubulule. 39 Nomba nga ca kuti mulefwaya icicilile apa, ninshi icilye ca mu musumba e cifwile ukupingula. 40 Pantu pali ifi ifyacitika lelo, kuti batupeelelapo umulandu wa kulenga abantu baimina ubuteko. Tapali ico twingalanda ukuti e cilengele mulecita ici cimfulunganya.” 41 Kabili ilyo alandile ifi, alisalangenye abalongene.

20 Ilyo icimfulunganya capwile, Paulo atumine abakuyaita abasambi, kabili ilyo abakoseleshe no kubashalikapo, alimine ubulendo bwa kuya ku Makedonia. 2 Ilyo apitile muli ishi ncende ninshi alekoselesha sana abasambi abaleikalamo, afikile ku Grisi. 3 Aikeleko imyeshi itatu, lelo pa mulandu wa kuti abaYuda balimupangiile+ ilyo alefwaya ukuya no bwato ku Siria, asalilepo ukupita mu Makedonia pa kubweluluka. 4 Abaile nankwe ni Sopatere umwana wa kwa Puri umwina Berea, Alistaaki+ na Sekundi abena Tesalonika, Gai umwina Derbe, na Timote.+ Kabili abaile nankwe ukufuma ku citungu ca Asia ni Tukiki+ na Trofimu.+ 5 Aba bena balitangileko kabili baletulolela mu Troa; 6 lelo ilyo inshiku sha mukate uushatutumuka+ shapwile, twaninine ubwato ukufuma ku Filipi, kabili mu nshiku 5 twafikile mu Troa; uku kwine e ko twaikele inshiku 7.

7 Pa bushiku bwa kubalilapo mu mulungu, ilyo twalongene mu kulya ifya kulya, Paulo atendeke ukulanda na balongene, pantu ali no kufumapo ubushiku ubwali no kukonkapo; alilandile pa nshita iitali ukufika na pa kati ka bushiku. 8 E ico mu muputule wa pa muulu umo twalongene mwali inyali ishingi. 9 Ilyo Paulo alelanda, pa windo paikele umulumendo we shina lya kuti Yutuki kabili aponeene mu tulo utukalamba. Nomba pa mulandu wa kuti Yutuki alileele sana, aponene panshi ukufuma pa ntunti iyalenga shitatu. Ilyo baileko basangile nafwa. 10 Lelo Paulo alikiile, ainamina pali ena, amukumbatila,+ e lyo alanda ati: “Lekeni ukupanga icongo, pantu ali no mweo.”+ 11 Lyena abweleele mu muputule wa pa muulu, abula ifya kulya* atampa no kulya, e lyo atwalilila ukulanda mpaka ku macaca, lyena aliile. 12 E ico balisendele umulumendo uwaponene ninshi ali uwa mweo kabili balisansamwike nga nshi.

13 Nomba twaile ku bwato e lyo twaya ku Aso, uko twalefwaya ukuyasendela Paulo, pantu e fyo atwebele. Alefwaya ukuya kulya na makasa. 14 E ico ilyo atusangile mu Aso, twalimusendele mu bwato e lyo twaya ku Mitulene. 15 Kabili pa bushiku bwakonkelepo twalifumine kulya no bwato, e lyo twaya ku Kio, lelo ubushiku bwakonkelepo twafikile ku Samo. Lyena pa bushiku bwakonkelepo twafikile ku Milete. 16 Paulo asalilepo ukuya no bwato ku Efese,+ pa kuti ekokola mu citungu ca Asia; pantu alefwaya ukwangufyanya ukuya ku Yerusalemu+ pa kuti engayafika pa bushiku bwa Mutebeto wa Pentekoste.

17 Lelo ilyo afikile pa Milete, atumine abantu ku Efese abakuyaita abakalamba ba cilonganino. 18 Ilyo baishile, abebele ati: “Mwalishiba bwino ifyo naikele na imwe ukufuma fye pa bushiku bwa kubalilapo ilyo naingile mu citungu ca Asia.+ 19 Pa kubombela Shikulwifwe nali uwaicefya sana,+ nalelila ifilamba, nalekwata amacushi pa mulandu na mapange ya baYuda, 20 nshashimunwike ukumweba conse icali no kumwafwa, kabili nshashimunwike ukumusambilishisha pa bantu+ na ku ng’anda ne ng’anda.+ 21 Lelo naleshimikila sana abaYuda na baGriki, nalebeba nati balingile ukulapila+ no kwalukila kuli Lesa kabili balingile ukutetekela Shikulwifwe Yesu.+ 22 Kabili nomba moneni! ukulingana ne fyo umupashi ulefwaya, nalaya ku Yerusalemu, nangu ca kuti nshishibe ifikayancitikila kulya. 23 Ico naishiba fye ca kuti mu misumba yonse umo mpita, umupashi wa mushilo ulanjeba ukuti bakankaka mu cifungo kabili nkakwata amacushi.+ 24 Lelo umweo wandi nshiumona ukuti walicindama, ine kulila fye napwisha ulubilo lwandi+ no mulimo uo Shikulu Yesu ampeele, uwa kubila sana imbila nsuma iya cikuuku icaibela ca kwa Lesa.

25 “Nomba umfweni! Ninjishiba ukuti pali imwe bonse mwebo nashimikile pa Bufumu, tapakabe nangu umo uukamonapo na kabili. 26 E ico buno bushiku ndefwaya mube inte sha kuti ine ndi wa kaele ku mulopa wa bantu bonse,+ 27 pantu nshatalashimunukapo ukumweba fyonse ifyo Lesa afwaya ukucitila abantu.*+ 28 Muleisakamana mwe bene,+ mulesakamana no mukuni onse uo umupashi wa mushilo wamusontapo ukuba bakangalila,+ pa kuti mulecema icilonganino ca kwa Lesa,+ ico ashitile mu mulopa wa Mwana wakwe.+ 29 Ninjishiba ukuti ilyo nkafumapo imimbulu iikali ikengila muli imwe+ kabili tayakalesunga bwino umukuni, 30 kabili muli imwe mukesaba abantu abakala-alula icine pa kuti bongole abasambi balebakonka.+

31 “E ico mulelola, kabili muleibukisha ukuti pa myaka itatu,+ ubushiku na kasuba, nshalekele ukukonkomesha umo na umo ica kuti nalelukushishapo ne filamba. 32 Nomba ndemutuula kuli Lesa, kabili amashiwi ya cikuuku cakwe icaibela yengalamucingilila, amashiwi ayengamukosha kabili ayengalenga mwakwata ubupyani ubo bakapeela bonse aba mushilo.+ 33 Nshaeshapo ukusendela umuntu silfere nelyo golde nangu ica kufwala.+ 34 Mwe bene mwalishiba ukuti ndaibombela ne mwine na maboko yandi aya pa kuti ndekwata ifyo nkabila+ ne fyo abo mba nabo bakabila. 35 Nalimulangilila muli fyonse ukuti mu kubombesha+ e mo mufwile ukwafwila abanaka, kabili mufwile ukulaibukisha amashiwi ayo Shikulu Yesu alandile. Umwine atile: ‘Mwaliba insansa ishingi mu kupeela+ ukucila mu kupokelela.’”

36 Kabili ilyo alandile ifi fintu, alifukeme pamo nabo, bapepa no kupepa. 37 Lyena bonse balililile nga nshi, kabili bakumbatile Paulo* bamutomona no kumutomona, 38 pantu bali no bulanda pa mashiwi alandile aya kuti tabali no kumumonapo na kabili.+ Lyena balimushindike ku bwato.

21 Kwena nangu ca kuti taca-angwike ukusha bamunyinefwe, twalisukile twabasha twaya na mu bwato, kabili twalyabwike bemba twayafika na ku cishi ca Kosi. Lyena pa bushiku bwakonkelepo twafikile ku Rode, kabili ilyo twafumine kulya twaile ku Patara. 2 Ilyo twasangile ubwato ubwaleabukila ku Foinike, twalininine twaya no kuya. 3 Ilyo twamwene icishi ca Kupro twacishile lubali ku kuso, e lyo twalola ku Siria. Lyena twafikile ku Turi, pantu kulya e ko bali no kufumishamo ifipe mu bwato. 4 Lyena twalifwaile sana abasambi kabili ilyo twabasangile, twaikele nabo pa nshiku 7. Nomba ukulingana ne fyabebele umupashi wa mushilo, balekonkomesha Paulo ukuti talingile ukunyanta ulukasa mu Yerusalemu.+ 5 E ico ilyo inshita ya kufumako yafikile, twalimine twatwalilila no bulendo bwesu, lelo bonse kumo na banakashi na bana, balitushindike batufisha na kunse ya musumba. Kabili ilyo twafukeme mu lulamba twalipepele 6 e lyo twalayana. Lyena twalininine ubwato, lelo bena babweleele ku mayanda ku mwabo.

7 Ulwendo lwesu ulwa mu bwato ulwa kufuma ku Turi lwapwile ilyo twafikile ku Tolemai. Ilyo twafikile kulya twaliposeshe aba bwananyina kabili twaikele nabo ubushiku bumo. 8 Ubushiku bwakonkelepo twaliimine twayafika na ku Kaisarea, kabili twaingile mu ng’anda ya kwa Filipi kabila wa mbila nsuma. Uyu Filipi aali pali balya abaume 7+ abo abatumwa basalile mu Yerusalemu, kabili twaikele mu ng’anda mu mwakwe. 9 Uyu muntu alikwete abana abanakashi 4 abashimbe,* abalesesema.+ 10 Lelo pa numa ya kwikala kulya inshiku ishingi, kasesema umo uwe shina lya kuti Agabu+ alishile ukufuma ku Yudea. 11 Kabili aishile kuli ifwe, abuula umushipi wa kwa Paulo, aikaka amakasa na maboko e lyo atila: “Umupashi wa mushilo walanda auti, ‘Ifi e fyo abaYuda bakakaka umwine wa uyu mushipi mu Yerusalemu,+ kabili bakamupeela ku bena fyalo.’”+ 12 Nomba ilyo twaumfwile ifi, ifwe na bo twali nabo kulya, twatampile ukupaapaata Paulo ukuti eya ku Yerusalemu. 13 Lyena Paulo alandile ati: “Cinshi mulelilila? Cinshi mulenenwina?* Ala ine ninjipekanya ukuyakakwa no kufwila ishina lya kwa Shikulu Yesu+ ku Yerusalemu.” 14 Ilyo twafililwe ukumunasha, twalilekele ukumukaanya* kabili twatile: “Lekeni ifyo Yehova* alefwaya e fyo ficitike.”

15 Nomba ilyo ishi nshiku shapwile, twalipekenye ubulendo kabili twalimine ukuya ku Yerusalemu. 16 Na basambi bamo abafumine ku Kaisarea twaile nabo. Batutwele ku ng’anda kuli Minasone umwina Kupro, uko twali no kulaikala. Uyu ali pa babalilepo ukuba abasambi. 17 Ilyo twafikile ku Yerusalemu, aba bwananyina balitupokelele ne nsansa. 18 Lelo pa bushiku bwakonkelepo Paulo aile na ifwe kuli Yakobo,+ kabili abakalamba bonse nabo e ko bali. 19 Paulo alibaposeshe, alabalondolwela na fyonse ifyo Lesa acitiile abena fyalo ukupitila mu mulimo wa kubila imbila nsuma uo alebomba.

20 Ilyo baumfwile ifi, batendeke ukucindika Lesa kabili baebele Paulo abati: “Munyinefwe, mona, abaYuda abatetekela bengi; kabili bonse balicincila mu kukonka Amafunde.+ 21 Lelo balyumfwa ukuti usambilisha abaYuda bonse ababa mu bena fyalo ukuti belakonka* Amafunde ya kwa Mose. Ubeba ukuti belasembulula abana babo ne lyo belakonka intambi isho tukonka ukufuma na kale.+ 22 Nomba twalacita shani? Pantu nangu cibe shani ukumfwa kwena balaumfwa ukuti nawisa. 23 E ico ucite ifi twalakweba: Natukwata abaume 4 abalapa umulapo kuli Lesa. 24 Senda aba baume uyesangululwa pamo nabo ukulingana no lutambi, ubalipilileko pa kuti bababeye umushishi. Lyena bonse bakeshiba ukuti ifyo baumfwile pali iwe te fya cine, bakomfwa no kuti imyendele yobe isuma kabili ulakonka Amafunde.+ 25 Lelo abena fyalo abatetekela bena twalibatumina kalata, umo twabalembeele ifyo twapingwile ukuti baletaluka ku fyo batuula ku tulubi,+ ku mulopa,+ ku fyatitilwa*+ na ku bulalelale.”*+

26 Lyena pa bushiku bwakonkelepo Paulo asendele balya baume kabili aileisangulwila pamo nabo ukulingana no lutambi.+ Pa numa aingile mwi tempele alaishibisha na bantu ilyo ukusangululwa ukulingana no lutambi kwali no kupwa, na lintu shimapepo alingile ukutuulila cila muntu umutuulo.

27 Nomba ilyo inshiku 7 shaile shilepwa, abaYuda abafumine ku Asia bamwene Paulo mwi tempele, kabili balengele abantu bacita ifimfulunganya, e lyo baikata Paulo, 28 kabili balebilikisha abati: “Mwe baume abena Israele, twafweni! Uyu e usambilisha abantu bonse konse fye ukuti balesuula abantu besu na mafunde yesu, e lyo na cino cifulo. Kabili icibipishe ca kuti alingiishe na baGriki mwi tempele kabili nakowesha cino cifulo ica mushilo.”+ 29 Icalengele balande ifi ni co balimwene Trofimu+ umwina Efese ali pamo na Paulo mu musumba. E ico balemona kwati alimwingishe mwi tempele. 30 Mu musumba onse mwali icimfulunganya, kabili abantu bonse baishile kwi tempele ninshi balebutuka e lyo bafumya Paulo mwi tempele. Kabili ilyo line balisele ifiibi. 31 Ilyo balefwaya ukumwipaya, umukalamba we bumba lya bashilika apokelele amashiwi ya kuti mu Yerusalemu monse mwali icimfulunganya; 32 kabili ilyo line asendele abashilika na bakalamba ba bashilika baya na kubalecita icimfulunganya. Ilyo abalecita icimfulunganya bamumwene ali pamo na bashilika, balilekele ukupuma Paulo.

33 Lyena uyu umukalamba we bumba lya bashilika alipaleme, amusenda e lyo aeba aba kumukaka amaceni yabili;+ lyena aipwishe ati, “Nani uyu muntu? Kabili cinshi acitile?” 34 Lelo abantu balepunda ifyapusanapusana. E ico apo umukalamba we bumba lya bashilika alifililwe ukwishibapo icishinka pa mulandu ne cimfulunganya, aebele abashilika ukuti batwale Paulo mu nkambi ya bashilika. 35 Lelo ilyo afikile pa matabo, abashilika balimusendele pa mulandu wa kuti ibumba lyalicililemo ukukalipa, 36 pantu ibumba lya bantu lyalemukonka, kabili lyalebilikisha aliti: “Mwipayeni!”

37 Ilyo bali mupepi no kumwingisha mu nkambi ya bashilika, Paulo aipwishe umukalamba we bumba lya bashilika ati: “Bushe kuti mwansuminisha ukumwebako fimo?” Na o amwaswike ati: “Bushe ulalanda iciGriki? 38 Bushe te iwe ulya umwina Egupti uwacitile ifyalengele abantu baimina ubuteko e lyo asenda ifipondo 4,000 mu matololo?” 39 Lyena Paulo alandile ati: “Mukwai ine ndi muYuda,+ umwina Tarsi,+ umusumba uwacindama uwa mu Kilikia. E ico napaapaata nsuminisheni ukulandako na bantu.” 40 Ilyo amusuminishe, Paulo aiminine pa matabo, e lyo aimya ukuboko pa kuti abantu batalale. Ilyo abantu batalele, atendeke ukulanda nabo mu ciHebere+ ati:

22 “Mwe baume, bamunyinane na bashifwe, umfweni ifyo nalamweba ukuti ine nshili no mulandu.”+ 2 Ilyo baumfwile alelanda nabo mu ciHebere, batalele fye tondolo. Lyena atile: 3 “Ine ndi muYuda+ uwafyalilwe mu Tarsi mu citungu ca Kilikia,+ lelo ukusambilila kwena nasambilile muli uno wine musumba kabili uwansambilishe ni Gamaliele.+ Alinsambilishe ukulakonka sana Amafunde ya fikolwe,+ nali uwacincila mu kubombela Lesa nge fi fine na imwe bonse muli pali lelo.+ 4 Nalecusha aba iyi Nshila ica kuti balefwa no kufwa, nalekaka abaume na banakashi kabili nalebatwala ku fifungo.+ 5 Shimapepo mukalamba na ba mu cilye cikalamba bonse kuti basumina ifi ndelanda. E bampeele na makalata ya kutwalila intungulushi sha baYuda isha ku Damaseke. Nali mu nshila ya kuya ku Damaseke mu kusenda aba iyi Nshila no kubaleta ku Yerusalemu ninshi nabakakwa pa kuti bese babakande.

6 “Lelo ilyo naleya ndepalamina ku Damaseke, ninshi akasuba kali nalimo pa kati, mukupumikisha fye ulubuuto ulukalamba lwalibyatile ukufuma ku muulu e lyo lwansanika,+ 7 kabili nawile panshi e lyo naumfwa ishiwi lilenjeba aliti: ‘Sauli, Sauli, cinshi ico ulencushisha?’ 8 Na-aswike nati: ‘Nimwe bani mwe Shikulu?’ Na o anjebele ati: ‘Nine Yesu umwina Nasarete, uo ulecusha.’ 9 Kwena abaume abo nali nabo balimwene ulubuuto, lelo tabaumfwile ishiwi lya walelanda na ine. 10 Lyena natile: ‘Cinshi mfwile ukucita mwe Shikulu?’ Na o Shikulu anjebele ati: ‘Ima, kabiye ku Damaseke, kulya kwine e ko bakayakwebela fyonse ifyo ufwile ukucita.’+ 11 Lelo apo ulubuuto lwalisanikiishe, nshalemona nangu cimo kabili abo nali nabo e bantungulwile ku Damaseke ninshi nabanjikata pa kuboko.

12 “Lyena umuntu we shina lya kuti Anania, uwaletiina Lesa kabili uwalekonka Amafunde, uo abaYuda bonse abaleikala kulya baleshimikapo ifisuma, 13 alishile kuli ine. Ilyo aiminine apo nali anjebele ati: ‘Sauli munyinane, tampa ukumona na kabili!’ Kabili ilyo line naliloleshe namumona no kumumona.+ 14 Anjebele ati: ‘Lesa wa fikolwe fyesu nakusala pa kuti wishibe ifyo afwaya kabili umone uwalungama,+ umfwe ne shiwi lyakwe, 15 pa kuti ukabe inte yakwe ku bantu bonse pa fintu ifyo wamona na pa fyo waumfwa.+ 16 Nomba mulandu nshi uleshingashingila? Ima ubatishiwe, kabili ulilile kwi shina lyakwe+ pa kuti imembu shobe shelelwe.’+

17 “Lelo ilyo nabweleele ku Yerusalemu+ kabili ilyo nalepepa mwi tempele, namwene icimonwa 18 umo namwene Shikulu alenjeba ati: ‘Angufyanya, kabili fuma bwangu mu Yerusalemu, pantu tabasumine ifyo walabeba pali ine.’+ 19 Na ine natile: ‘Mwe Shikulu, balishiba ukuti naleya mu masunagoge yonse, kabili abatetekela muli imwe nalebapoosa mu cifungo no kuboma ifikoti;+ 20 kabili ilyo baleipaya Stefani inte yenu, e po nali kabili nalisuminisheko, nine nasungile ne fya kufwala fyabalemwipaya.’+ 21 Lelo anjebele ati: ‘Kabiye, pantu nkakutuma ku bena fyalo ukutali.’”+

22 Nomba balekutika fye ilyo Paulo alelanda. Lyena ilyo alandile aya mashiwi basanswile amashiwi yabo abati: “Ipayeni uyu muntu, pantu umuntu wa musango uyu talinga ukuba no mweo!” 23 Pa mulandu wa kuti balepunda kabili balepoosaika ifya kufwala fyabo ifya kunse ninshi balekuba no lukungu mu mwela,+ 24 umukalamba wa bashilika alandile ukuti batwale Paulo ku nkambi ya bashilika kabili bamuume ifikoti pa kuti asokolole ifyo acitile, pantu alefwaya ukwishiba ico balepangila icongo ca musango ulya pali Paulo. 25 Lelo ilyo bamukakile pa kuti bamuume ifikoti, Paulo aipwishe umushilika* uwaiminine mupepi ati: “Bushe imwe amafunde yalimusuminisha ukuuma umwina Roma ifikoti uo bashilapingula?”*+ 26 Ilyo uyu mushilika aumfwile ifi, aile ku mukalamba wabo e lyo amweba ati: “Nomba cinshi mwalacita, apo uyu muntu mwina Roma?” 27 E ico umukalamba wa bashilika apaleme kuli Paulo e lyo amwipusha ati: “Njeba, bushe uli mwina Roma?” Na o amwaswike ati: “Ee.” 28 Uyu umukalamba wa bashilika alandile ati: “Nashitile nsambu sha kuba umwina Roma pa mutengo uukalamba.” Lelo Paulo amwebele ati: “Ine nafyelwe fye nasho.”+

29 E ico ilyo line, abali mu kumuma ifikoti pa kumulubulwisha balimutalwike; kabili umukalamba wa bashilika alitiinine ilyo aishibe ukuti Paulo ali mwina Roma na pa mulandu wa kuti alimukakile amaceni.+

30 E ico ubushiku bwakonkelepo, apo alefwaisha ukwishiba bwino ico abaYuda bapeelele Paulo umulandu, alimukakwile e lyo aeba intungulushi sha bashimapepo na ba mu cilye ca Sanhedrini bonse ukuti balongane. Lyena aletele Paulo amwiminika na pa ntanshi yabo.+

23 Ilyo Paulo alolekeshe bashicilye ba mu Sanhedrini, atile: “Mwe baume, bamunyinane, ine naliba na kampingu iisuma+ pa ntanshi ya kwa Lesa ukufika na buno bushiku.” 2 Lyena shimapepo mukalamba Anania aebele abaiminine mupepi na Paulo ukuti bamume pa kanwa. 3 E lyo Paulo amwebele ati: “Lesa alakuuma we cibumba cashingulwako impemba we! Ulempingula ukulingana na Mafunde, lelo iwe ulepula mu Mafunde yene aya, pantu ule-eba abantu ukuti bangume.” 4 Abaiminine mupepi batile: “Bushe ulesaalula shimapepo mukalamba uwa kwa Lesa?” 5 Lyena Paulo alandile ati: “Bamunyinane, nshacishiba ukuti ni shimapepo mukalamba. Pantu amalembo yatila, ‘Wilapontela intungulushi ya bantu bobe.’”+

6 Nomba apo Paulo alishibe ukuti mu Sanhedrini mwali amabumba yabili, ilya baSaduke ne lya baFarise, aikatishe ishiwi e lyo alanda ati: “Mwe baume, bamunyinane, ine ndi muFarise,+ umwana wa baFarise. Pe subilo lya kubuuka kwa bafwa e po balempingwila.” 7 Ilyo alandile ifi, abaFarise na baSaduke batampile ukukansana, kabili icilye ca Sanhedrini calipaatukene. 8 Pantu abaSaduke batila takwaba ukubuuka, takwaba bamalaika, kabili takwaba no mupashi, lelo abaFarise bena basumina* ukuti ifi fyonse e ko fyaba.+ 9 E ico mu cilye mwaimine icimfulunganya icikalamba kabili bakalemba bamo aba mu kabungwe ka baFarise baliimine balalanda bukali bukali abati: “Uyu muntu tatumusangile no mulandu; lelo nga ca kutila mupashi ulandile nankwe nelyo nga ni malaika alandile nankwe+  . . .” 10 Nomba ilyo bacililemo ukukansana, umukalamba wa bashilika alitiinine ukuti nalimo Paulo balamulya akanama kabishi, e ico aebele abashilika ukuti bayemupokololako kuli bena e lyo bamutwale ku nkambi ya bashilika.

11 Lelo pa bushiku bwakonkelepo mu nshita ya bushiku, Shikulu aishile kuli ena e lyo amweba ati: “Shipa!+ Pantu filya fine wabilile sana imbila nsuma pali ine mu Yerusalemu, e fyo ufwile ukubila na mu Roma.”+

12 Ilyo bwacele, abaYuda balipangene no kulapa umulapo wa kuti, tabali no kulya nangu ukunwa mpaka bepaye Paulo. 13 Abaume ukucila pali 40 e balapile uyu mulapo kabili e bapangene. 14 Aba baile ku ntungulushi sha bashimapepo na ku bakalamba, no kubeba ati: “Natulapa ukuti tatwalye nangu cimo mpaka twipaye Paulo. 15 E ico nomba imwe, pamo ne cilye ca Sanhedrini mwebe umukalamba wa bashilika ukuti amulete kuli imwe mucite kwati mulefwaya ukwishibilapo na fimbi pa mulandu wakwe. Lelo ilyo ashilafika kuli imwe, ifwe twalamwipaya.”

16 Lelo umwipwa wa kwa Paulo alyumfwile ukuti balepanga ukumubelamina, e ico aileingila mu nkambi ya bashilika no kushimikilako Paulo. 17 Lyena Paulo aitile umushilika* umo e lyo amweba ati: “Twala uyu mulumendo ku mukalamba wa bashilika, pantu pali ifyo alefwaya ukumweba.” 18 Na o alimusendele amutwala ku mukalamba wa bashilika e lyo atila: “Umufungwa Paulo acinjita e lyo anomba ukuti ndete uyu mulumendo kuli imwe, pantu pali ifyo alefwaya ukumweba.” 19 Uyu umukalamba wa bashilika aikete umulumendo pa kuboko, amusenda pa mbali e lyo amwipusha ati: “Finshi ulefwaya ukunjeba?” 20 Na o atile: “AbaYuda nabapangana ukumulomba ukuti mukatwale Paulo ku cilye ca Sanhedrini mailo, bakacita kwati balefwaya ukwishibilapo na fimbi pa mulandu wakwe.+ 21 Lelo mwikabasuminisha, pantu abaume ukucila pali 40 bakabelamina Paulo, kabili nabalapa umulapo wa kuti tabalye kabili tabanwe nangu cimo mpaka bakamwipaye;+ e ico nabaipekanya balelolela fye ukuti mubasuminishe.” 22 Lyena umukalamba wa bashilika alekele umulumendo aya, ninshi namukonkomesha ukuti: “Tekwesha ukwebako umuntu nangu umo ukuti naunjebako ili lyashi.”

23 Kabili aitile abashilika babili* e lyo abeba ati: “Pekanyeni abashilika 200 aba kuti baye ku Kaisarea, na bashilika 70 abendela pali bakabalwe e lyo na bashilika 200 abalwila ku mafumo, beme pe awala lyalenga butatu ubushiku.* 24 Mupekanye na bakabalwe apa kuninika Paulo pa kuti akayefika umutende kuli Felikisi umulashi.” 25 Kabili alembele kalata umwali amashiwi ya kuti:

26 “Ine ne Klaudi Lusia, natuma kalata kuli imwe Kanabesa, mwe Balashi baFelikisi: Ndeti mwapoleni mukwai! 27 AbaYuda balikete uyu muntu kabili balefwaya ukumwipaya, lelo nalileko bwangu bwangu ne bumba lya bashilika bandi no kumupususha,+ pantu nalyumfwile ukuti mwina Roma.+ 28 Kabili apo nalefwaya ukwishiba umulandu bamupeele, namutwele mu cilye cabo ica Sanhedrini.+ 29 Nasangile ukuti umulandu bamupeele wakumine Amafunde yabo abene,+ lelo tabamupeele umulandu nangu umo uwakufwilapo nelyo uwa kumukakilapo mu cifungo. 30 Nomba apo ni ng’umfwa ifyo balepanga ukucita uyu muntu,+ ili line namutuma kuli imwe kabili ninjeba abalemupeela umulandu ukuti bakesemushinina pa menso yenu.”

31 E ico aba bashilika basendele Paulo+ nga filya fine babebele kabili bamutwele ku Antipatri ubushiku. 32 Ubushiku bwakonkelepo basuminishe abashilika abendela pali bakabalwe ukuti baye nankwe, lelo bena babweleele mu nkambi ya bashilika. 33 Aba bashilika abendela pali bakabalwe baingile mu Kaisarea bapeela no mulashi kalata, batwela na Paulo kuli uyu mulashi. 34 Na o alibelengele kalata e lyo aipusha Paulo icitungu uko afumine, kabili amwebele ukuti afumine ku Kilikia.+ 35 Lyena Felikisi alandile ati: “Nkomfwikisha umulandu obe ilyo abalekupeela umulandu bakesa.”+ Alandile no kuti basungile Paulo mwi sano lya kwa Herode kabili balemulinda.

24 Ilyo papitile inshiku 5, shimapepo mukalamba Anania+ aile pamo na bakalamba bamo e lyo na ndubulwila uwe shina lya kuti Tertuli, kabili bailelondolwela umulashi umulandu uo balepeela Paulo.+ 2 Ilyo baebele Tertuli ukuti atendeke ukulanda, atampile ukupeela Paulo umulandu pa menso ya kwa Felikisi. Atile:

“Mwalilenga tuleikala umutende kabili pa mulandu wa mano yenu, ifintu nafiwama mu luko lwesu. 3 E ico mu ncende shonse umo twaikala kabili inshita yonse tulamutootela nga nshi mwe Kanabesa ba Felikisi. 4 Lelo nshilefwaya ukumupoosela inshita, e ico ndelomba ukuti mutumfweko panono. 5 Pantu natusanga ukuti uyu muntu lisakamika*+ kabili alalenga abaYuda konse uko baikala pano isonde baleimina ubuteko.+ E ntungulushi ya mipepele ya bena Nasarete.+ 6 Alefwaya no kukowesha itempele, e ico twalimwikete.+ 7* —— 8 Nga mwamwipusha mwe bene mwalayumfwila imilandu yonse iyi iyo tulemupeela.”

9 AbaYuda nabo balisuminisheko ukuti ifyo Tertuli alandile fya cine. 10 Ilyo umulashi acebwishe Paulo pa kutila alandepo, Paulo atile:

“Ninjishiba bwino ukuti imyaka naifula ukutula apo mwatampila ukupingula luno luko, e ico ninjipekanya ukuipokolola.+ 11 Na kuba na mwe bene nga mwafwailisha, mwalasanga ukuti tapalapita ne nshiku 12 ukutula apo nailile ku Yerusalemu mu kupepa;+ 12 kabili tabansangile ndekansana no muntu nangu umo mwi tempele nelyo ukulenga abantu balacita icimfulunganya mu masunagoge nangu mu musumba monse. 13 Kabili te kuti banshinine pa milandu iyo balempeela. 14 Lelo ndesumina ici pa menso yenu, ica kuti muli iyi ine iyo baleti imipepele, e mo naba kabili e mo mombela Lesa wa fikolwe fyandi,+ apo nalisumina fyonse ifyaba mu Mafunde ne fyaba mu mabuuku ya Bakasesema.+ 15 Kabili nalicetekela Lesa, nge fyo aba baume nabo bamucetekela. Kabili bonse twalikwata isubilo lya kuti abalungama na bashalungama+ bakabuushiwa.+ 16 Ici calilenga lyonse ndeibikilishako ukukanacita ifyabipa kuli Lesa na ku bantu pa kuti lyonse ndeba na kampingu iyasanguluka.*+ 17 Nomba ilyo papitile imyaka iingi, naishile mu kuletela abapiina aba mu luko lwesu ifya bupe+ na mu kutuula umutuulo kuli Lesa. 18 Ilyo nalecita ifi, bansangile mwi tempele ninshi ninsangululwa ukulingana no lutambi,+ lelo nshali ne bumba kabili nshalelenga abantu balecita icimfulunganya. Kwali fye abaYuda bamo aba ku citungu ca Asia, 19 abafwile ukuba pano kabili abengampeela umulandu pa cinso cenu nga ca kuti nabakwata umulandu wa kumpeela.+ 20 Nangu aba bene abali pano balekeni balande umulandu bansangile na o ilyo naiminine mu cilye ca Sanhedrini, 21 kano fye amashiwi ayo nalandile ninshi ninjikatisha ishiwi ilyo naiminine pa ntanshi yabo aya kuti: ‘Pa kubuushiwa kwa bafwa e po balempingwila!’”+

22 E ico, apo Felikisi, alishibe bwino bwino iyi mipepele ya ba Nshila,+ aebele abantu ukuti balolele. Abebele ati: “Ilyo Lusia umukalamba wa bashilika akesa, e lyo nkapingula umulandu wenu.” 23 Kabili aebele umushilika ukuti Paulo atwalilile ukuba umufungwa, lelo akwateko ubuntungwa, kabili baleleka abantu bakwe baleisa mu kumwafwa mu fyo alekabila.

24 Ilyo papitile inshiku shimo Felikisi aishile na Drusila umukashi wakwe, uwali muYuda, kabili atumine aba kuyaita Paulo pa kuti ese omfwe uko Paulo alelondolola ifyo abantu bafwile ukucita pa kuti basumine muli Kristu Yesu.+ 25 Nomba ilyo Paulo alelanda pa bulungami, pa kuilama na pa bupingushi ubwali no kwisa,+ Felikisi alitiinine kabili atile: “Pali ino nshita kuti waya, lelo ilyo nkakwata inshita nkakwita na kabili.” 26 Lelo Felikisi alesubila ukuti Paulo ali no kumupeelako indalama. E ico libili libili aletuma aba kuyaita Paulo kabili alelanda nankwe. 27 Nomba ilyo papitile imyaka ibili, Porki Feste alipyene Felikisi; kabili pa mulandu wa kuti Felikisi alefwaya abaYuda bamutemwe,+ ashiile Paulo mu cifungo.

25 E ico pa numa ya nshiku shitatu ukutula apo Feste+ aingilile mu citungu ca Yudea no kutendeka ukubomba imilimo yakwe, afumine ku Kaisarea aya ku Yerusalemu. 2 Kabili intungulushi sha bashimapepo na bakalamba ba baYuda batwele umulandu wa kwa Paulo kuli ena.+ E ico batampile ukumupaapaata 3 ukuti abacitile ifyo balefwaya, kabili abaletele Paulo ku Yerusalemu, lelo balepanga ukumubelamina pa kuti bamwipaile mu nshila.+ 4 Lelo Feste abaswike ukuti Paulo alingile ukuba kulya kwine ku Kaisarea kabili tapali no kukokola Feste ali no kubwelela kulya kwine. 5 Atile: “Kanshi lekeni tuile pamo ne ntungulushi shenu pa kuti shikayemupeela umulandu, nga ca kuti cine cine kwaliba umulandu aacita.”+

6 E ico ilyo Feste aikeleko nabo inshiku nalimo 8 nelyo 10, aile ku Kaisarea, kabili ubushiku bwakonkelepo aikele pa cipuna ca kupingwilapo e lyo aeba abantu ukuti balete Paulo. 7 Ilyo aingile, abaYuda abaileko abafumine ku Yerusalemu balimushingulwike ninshi nabeminina, kabili balemupeela imilandu iikalamba iingi iyo bafililwe ukumushinina.+

8 Lelo pa kuipokolola Paulo atile: “Nshapula mu Mafunde ya baYuda nangu ukubembukila itempele nelyo Kaisare.”+ 9 Apo Feste alefwaya ukuti abaYuda bamutemwe,+ aipwishe Paulo ati: “Bushe ulefwaya ukuya ku Yerusalemu e ko nkakupingwile pali ifi fintu?” 10 Lyena Paulo amwaswike ati: “Ine njiminine pa ntanshi ya cipuna ca kupingwilapo ica kwa Kaisare uufwile ukumpingula. Takuli icabipa nangu cimo ico nacita abaYuda, nge fyo na imwe bene mwishibe bwino. 11 Nga cine cine ndacita ifyabipa kabili nalicita umulandu wa kufwilapo,+ nshilekaana ukufwa; lelo nga ca kuti imilandu iyo aba bantu balempeela ya bufi, takuli uukwete nsambu sha kumpeela mu minwe yabo pa kuti abasekeshe. Ndetwala uyu mulandu kuli Kaisare!”+ 12 Lyena ilyo Feste alanshenye na bakabilo bakwe, aebele Paulo ati: “Apo ulefwaya ukutwala umulandu kuli Kaisare; ukaya kuli Kaisare.”

13 Ilyo papitile inshiku shimo, Imfumu Agripa na Berenike bafikile ku Kaisarea ku kuposha Feste. 14 Apo balikeleko inshiku ishingi, Feste atuulile umulandu wa kwa Paulo ku mfumu. Atile:

“Kuli umuntu umo uo Felikisi ashiile mu cifungo, 15 kabili ilyo nali ku Yerusalemu, intungulushi sha bashimapepo na bakalamba ba baYuda balindeteele umulandu wakwe,+ kabili balefwaya ukuti imupingule. 16 Lelo nabaswike nati, amafunde ya bena Roma tayasuminisha ukukaka umuntu pa mulandu fye wa kuti abalemupeela umulandu balefwaya akakwe, e lyo ninshi uyo muntu talamonana nabalemupeela umulandu pa kuti aipokolole.+ 17 E ico ilyo bafikile kuno, nshapoosele ne nshita, ubushiku bwakonkelepo naikele pa cipuna ca kupingwilapo kabili naebele abantu ukuti balete uyu muntu. 18 Ilyo abalemupeela umulandu baimine, tabalandile nangu cimo icalelanga ukuti alicitile ifyabipa ifyo naleenekela ukuti alicitile.+ 19 Balekansanina fye pa fya kupepa lesa wabo*+ na pa muntu uwafwa uwe shina lya kuti Yesu, uo Paulo aleti wa mweo.+ 20 Apo nshaishibe ifya kucita pali ifi fikansa, namwipwishe nga kuti atemwa ukuya ku Yerusalemu pa kuti e ko bakayemupingwila pali ifi fintu.+ 21 Lelo ilyo Paulo alombele ukuti atwalilile ukuba mu cifungo mpaka Kanabesa+ akaye mupingula, natile nacibe ifyo fine mpaka nkamutume kuli Kaisare.”

22 Lyena Agripa aebele Feste ati: “Na ine wine kuti natemwa ukuyumfwila kuli uyu muntu.”+ Na o amwebele ati: “Mukayumfwila mailo.” 23 E ico pa bushiku bwakonkelepo, Agripa na Berenike baishile bale-enda cilumba cilumba kabili baingile mu muputule wa kumfwilamo imilandu, bali pamo na bakalamba ba bashilika na bashimucindikwa ba mu musumba; kabili ilyo Feste aebele aba kuti balete Paulo, balimuletele. 24 Kabili Feste alandile ati: “Mwe Mfumu Agripa na bantu bonse abalongene pamo na ifwe, uyu muntu mulemona e o abaYuda bonse mu Yerusalemu na kuno kwine banombele uku ninshi balebilikisha no kuti afwile fye ukufwa.+ 25 Lelo namwene ukuti tacitile umulandu wa kufwilapo.+ E ico ilyo umwine alombele ukutwala umulandu kuli Kanabesa, natile cili fye bwino. 26 Nomba nshikwete ifya kulembela Shikulu pali uyu muntu, e co namuleta kuli imwe bonse, maka maka kuli imwe, mwe Mfumu Agripa, pa kuti nga alubulula, nalimo na ine kuti nakwata ifya kulembela Kanabesa. 27 Pantu ndemona kwati te kuti ciwame ukutuma umufungwa ukwabula ukulondolola bwino imilandu bamupeele.”

26 Agripa+ aebele Paulo ati: “Ale, ipokolole tumfwe.” Lyena Paulo atambalike ukuboko e lyo atendeka ukulanda ati:

2 “Mwe Mfumu Agripa, nintemwa sana buno bushiku pantu ndeipokolola pa menso yenu pa milandu yonse iyo abaYuda bampeele,+ 3 pantu imwe mwalishiba bwino intambi shonse isha baYuda ne fyo bakansaninapo. E ico ndemupaapaata ukuti munteekele umutima ilyo muleumfwa ifyo nalalanda.

4 “Na cine, abaYuda bonse balishiba ifyo naleikala na bantu bandi* mu Yerusalemu ukutula fye ku bwaice.+ 5 Abanjishibe ukutula fye ku bwaice nga balefwaya kuti bailandila abene, ukuti nali umuFarise+ kabili abaFarise balakonka sana Amafunde ukucila abaYuda bambi.+ 6 Nomba pa mulandu wa kusubila ifyo Lesa alaile ifikolwe fyesu+ e po balendubulwishisha; 7 aba mu mikowa yesu 12 balicincila mu kubombela Lesa akasuba no bushiku pa kuti bakamoneko ilyo ifi fikafikilishiwa. Ifi fine ifyo tusubila, e fyo abaYuda balempeelelapo umulandu+ mwe Mfumu.

8 “Cinshi calenga cimukosele ukusumina ukuti Lesa alabuusha abafwa? 9 Ine nalishininkishe ukuti nalingile ukucita ifintu ifingi pa kuti ishina lya kwa Yesu umwina Nasarete lilumbuka. 10 Ifi fine e fyo nalecita mu Yerusalemu. Nalebika aba mushilo abengi mu fifungo,+ pantu intungulushi sha bashimapepo shalimpeele amaka;+ ilyo aba mushilo balebepaya, nalesuminishako. 11 Apo nalebakanda imiku iingi mu masunagoge yonse, nalebapatikisha ukuleka ukuba abena Kristu; kabili apo nalebafulilwa sana, naleya mu kucusha na baleikala mu misumba imbi.

12 “Bushiku bumo naleya ku Damaseke pantu intungulushi sha bashimapepo shalintumine ukuya mu kucita ifi fine. 13 Nomba mwe mfumu ilyo twaleya, cilya akasuba kafika pa kati namwene ulubuuto ulwalebengeshima ukucila akasuba lwabyasha ukufuma mu muulu, kabili lwalinsanike pamo na bo nali nabo.+ 14 Kabili ilyo bonse twawile panshi naumfwile ishiwi lilenjeba mu ciHebere aliti, ‘Sauli, Sauli, cinshi ulencushisha? Ifi ulepanta ifya kusonkwelako* uleicusha fye.’ 15 Lelo naipwishe nati: ‘Nimwe bani mwe Shikulu?’ E lyo Shikulu anjaswike ati: ‘Nine Yesu, uo ulecusha. 16 Lelo ima no kwiminina. Pantu ico namonekela kuli iwe, ni pa kuti nkusale ukuba umubomfi wandi kabili inte ya fintu ifyo wamona ne fyo nkakulanga.*+ 17 Kabili nkalakupokolola kuli aba bantu na ku bena fyalo abo ndekutumako+ 18 ku kushibula amenso yabo,+ ukubafumya mu mfifi+ no kubaleta mu lubuuto,+ kabili ukubafumya ku maka ya kwa Satana+ no kubaleta kuli Lesa, pa kuti bengababelela uluse pa membu shabo+ kabili bengapokelela ubupyani pamo na ba mushilo pa mulandu wa kuntetekela.’

19 “E ico mwe Mfumu Agripa, nalicitile ifyo Yesu anjebele ukucita muli cilya cimonwa. 20 Nabalilepo ukubila imbila nsuma mu Damaseke.+ Lyena nabilile mu Yerusalemu,+ na mu calo conse ica Yudea. Nalibilile na ku bena fyalo pa kuti balapile kabili balecita ifilanga ukuti nabalapila pa kuti balukile kuli Lesa.+ 21 Ifi e fyalengele ukuti abaYuda banjikate ilyo nali mwi tempele kabili balefwaya ukunjipaya.+ 22 Lelo pa mulandu wa kuti Lesa alingafwile, ukufika na lelo ncili ndebila imbila nsuma ku bapiina na ku bakankaala. Nshilanda ifintu fimbi kano fye ifyo Bakasesema na Mose balandile ukuti fyali no kucitika.+ Balembele ukuti 23 Kristu ali no kucula+ kabili apo e wali no kubalilapo ukubuuka ku bafwa,+ ali no kusabankanya ulubuuto kuli aba bantu na ku bena fyalo.”+

24 Nomba ilyo Paulo alelanda ifi, Feste apundile ati: “Paulo naupena! Ukusambilila sana nakukupenya!” 25 Lelo Paulo atile: “Nshipenene, mwe Balashi baFeste, lelo ifyo ndelanda fya cine kabili fya mano. 26 Na kuba imfumu iyo ndeeba ifi fintu yalifishiba bwino kabili ninshininkisha ukuti tapali nangu cimo ico ishishibe, pantu ifi fintu tafyacitikiile mu bumfisolo.+ 27 Mwe Mfumu Agripa, bushe mwalisumina mu fyalemba Bakasesema? Ninjishiba ukuti mwalisuminamo.” 28 Lelo Agripa aebele Paulo ati: “Nga watwalilila ukulanda, mu kashita fye akonono kuti walenga naba Umwina Kristu.” 29 Paulo na o atile: “Kuti natemwa nga ca kuti mu nshita iinono nelyo mu nshita iikalamba, Lesa alenga imwe na bonse abaleng’umfwa baba nga ine, lelo ukwabula ukuti babakake mu maceni.”

30 Lyena imfumu yaliimine, kabili umulashi, Berenike na bantu abaikele pamo nabo, nabo bene balimine. 31 Lelo ilyo balefuma, balelanshanya abati: “Uyu muntu tacita umulandu wa kufwilapo nelyo uwakumukakilapo mu cifungo.”+ 32 Lyena Agripa aebele Feste ati: “Uyu muntu akaanatwala umulandu kuli Kaisare nga twamukakula.”+

27 Nomba ilyo batwebele ukuti tuye ku Italia,+ bapeele Paulo na bafungwa bambi mu minwe ya mushilika* uwe shina lya kuti Yuli, uwali mwi bumba lya bashilika ilya kwa Augusti. 2 Ilyo twaninine mu bwato bwa kuya ku Adramuti ubwali mupepi no kuya ku fyabu fya lulamba lwa citungu ca Asia, twalimine ubulendo, twali pamo na Alistaaki+ umwina Makedonia uwa ku Tesalonika. 3 Pa bushiku bwakonkelepo twafikile ku Sidone, kabili Yuli aumfwilile Paulo uluse. E ico alimusuminishe ukuya ku fibusa fyakwe pa kuti fimusakamane.

4 Ilyo twaimine no bwato, twakonkele fye ululamba lwa Kupro, pantu umwela walefumina uko twaleya. 5 Lyena twapitile muli bemba mupepi na Kilikia na Pamfulia e lyo twafika pa cabu ca ku Mura mu Lukia. 6 Kulya e ko umushilika asangile ubwato ubwa ku Alekesandria ubwaleya ku Italia, kabili e mo atuninike. 7 Twaendele panono panono pa nshiku ishingi e lyo twafika pa Kinidi pa numa ya kucula nga nshi. Apo umwela walikosele twalifililwe ukulungama intunga iyo twaleyako, e ico twakonkele fye ululamba lwa Krete ukufuma pa Salumone. 8 Na lintu twakonkele ululamba twaliculile pa koba ubwato mpaka twafika apo beta ukuti Ifyabu Ifisuma, mupepi no musumba wa Lasea.

9 Apo inshita iikalamba yalipitilepo kabili pali iyi nshita calimoneke ukuti nga twaba pa bulendo kuti twaba mu busanso, pantu ninshi inshita ya kufunga ukwa pa Bushiku bwa Cifuta Mulandu+ yalipita, Paulo abapandile amano 10 ati: “Mwe baume mwe, ndemona kwati tukaba mu busanso muli ubu bulendo kabili ifipe ifingi no bwato fikonaika, nalimo na ifwe bene tukafwa.”* 11 Lelo umushilika akonkele ifyo uwale-ensha ubwato no mwine wa bwato balelanda mu cifulo ca kukonka ifyo Paulo alelanda. 12 Apo tacaweme ukwikala pali ici cabu mu nshita ya mpepo, abengi batile bafumeko, bamone nga kuti bayafika ku Fenikisi pa kuti e ko bekale mu nshita ya mpepo. Fenikisi cabu ca mu Krete ico abantu bengafikako nga baingilila ku kabanga lwa ku kapinda ka ku kuso nangu ku kabanga lwa ku kapinda ka ku kulyo.

13 Ilyo umwela wa ku kapinda ka ku kulyo watampile ukupuupa panono panono, bamwene kwati balayafika uko baleya, e co baimishe inanga e lyo batampa ukukonka ululamba lwa Krete. 14 Lelo tapapitile ne nshita iikalamba, icipuupu ca mwela ico beta ukuti Yuroakwilo calitendeke ukupuupa. 15 Apo ubwato bwalifililwe ukwenda pa mulandu wa kuti icipuupu ca mwela icikalamba calefumina ukwaleya ubwato, twabulekele fye bwalasendwa no mwela. 16 Lyena twaobele ubwato ukulungama ukwaleya umwela e lyo twakonka ululamba lwa cishi icinono ico beta ukuti Kauda, lelo calitukoseele ukubuula akabwato* akali ku numa ya bwato. 17 Nomba ilyo twakatintiile mu kati, bapishishe intambo mwi samba lya bwato pa kuti babukake, kabili apo baletiina ukuti ubwato bwalashiika mu mucanga wa pa Suriti,* banenwine intambo pa kuti banaosa babwele mwi samba, e lyo ubwato bwalasendwa fye no mwela. 18 Pa mulandu wa kuti icimwela icikalamba caletusunkanya sana, ubushiku bwakonkelepo batendeke ukupoosa ifipe ifyali mu bwato pa kuti bwanguke. 19 Kabili pa bushiku bwalenga shitatu, abene balipoosele ifyo balebomfya mu bwato pali bemba.

20 Pa mulandu wa kuti akasuba ne ntanda tafyamoneke pa nshiku ishingi, kabili kwali imfula ya cimwela icikalamba, isubilo lyesu ilya kuti twalapusuka lyailelilepwa. 21 Ilyo papitile inshita iitali ukwabula ukulya, Paulo aiminine pa kati kabo e lyo alanda ati: “Mwe baume mwe, amumfwa ifyo namwebele ukuti twifuma ku Krete nga tatuponenwe no bu ubusanso kabili nga tatulufishe ifipe.+ 22 Na lyo line ndemweba nati shipeni, pantu pali ifwe tapakafwe nangu umo, bwato fye bukonaika. 23 Pantu lelo ubushiku Lesa wandi uo mombela acituma malaika+ uwacisaiminina mupepi na ine, 24 kabili acinjeba ati: ‘Witiina Paulo. Ukuyaiminina pa cinso ca kwa Kaisare,+ kabili mona! Lesa alepususha bonse abo uli nabo mu bwato.’ 25 E ico shipeni mwe baume, pantu nincetekela Lesa kabili ninjishiba ukuti filya fine malaika acinjeba e fyo cikaba. 26 Lelo icimwela cili no kuyatupoosa pa cishi cimo.”+

27 Ilyo ubushiku bwalenga 14 bwafikile, ubwato bwalesensenunwa pali bemba wa Adria, kabili pa kati ka bushiku abale-ensha ubwato balemona kwati ubwato bwalipaleme ku mulundu. 28 E ico ilyo bapooselemo ica kupiminako ukushika kwa bemba, basangile ukuti yashikile amamita nalimo 36. Ilyo baendeleko panono, na kabili bapooselemo ica kupiminako ukushika kwa bemba kabili basangile ukuti yashikile amamita nalimo 27. 29 Kabili apo baletiina ukuti ubwato kuti bwayapuma mu mabwe, bapoosele inanga 4 ku numa ya bwato, e lyo balafwaisha fye ukuti buce. 30 Lelo ilyo abale-ensha ubwato baleikisha akabwato akanono muli bemba pa kuti bafyukilemo, ninshi balecita kwati balefwaya ukwikisha inanga ku ntanshi ya bwato, 31 Paulo aebele uwaletungulula abashilika na bashilika bakwe ati: “Aba bantu nga bafuma mu bwato baya, ninshi imwe tamwapusuke.”+ 32 Lyena abashilika baputwile intambo ishaikeshe akabwato akanono ku bwato ubukalamba e lyo bakaleka kaya.

33 Nomba ilyo bwaile buleca, Paulo akoseleshe bonse ukuti balyeko fimo, abebele ati: “Inshiku nomba shaba 14 tamwalyapo nangu cimo pa mulandu wa kuti mwalisakamikwa. 34 E ico ndemukoselesha ukuti, lyeniko ifya kulya pa kuti cimuwamine, pantu pali imwe tapakabe nangu umo uukalofya nangu fye mushishi umo uwa ku mutwe wakwe.” 35 Ilyo alandile ifi, abuulile umukate, atootela Lesa pa menso ya bonse, e lyo aumokaula atampa no kulya. 36 E ico bonse balilekele ukusakamikwa, batendeka no kulya. 37 Bonse fwe bali mu bwato twali* 276. 38 Ilyo baliile baikuta no kwikuta, batendeke ukupoosa ingano muli bemba pa kuti ubwato bwanguke.+

39 Ilyo bwacele, abaleoba ubwato balimwene umulundu lelo tabawishibe.+ Nomba bamwene apo bemba aingilako mu mulundu apaba umucanga, kabili e po balelwisha ukuti bayeshiika ubwato. 40 E ico baputwile inanga, shaponena na muli bemba, bakakwile intambo sha banaosa; kabili ilyo baimishe itanga lya ku ntanshi ukulilosha ukwalefumina umwela, balolele ku mulundu. 41 Ilyo bafikile apali umucanga apo bemba ashashikile, ubwato bwashiikile mu mucanga kabili bwalilekele ukusunkana ku ntanshi, lelo bwatampile ukulepauka ku numa pa mulandu wa mabimbi.+ 42 Ilyo abashilika bamwene ifi, bafwaile ukwipaya abafungwa pa kuti beowa no kufyuka. 43 Lelo apo uwaletungulula abashilika alefwaisha ukufisha Paulo umutende, aleseshe abashilika ukwipaya abafungwa. Kabili aebele bonse abaishibe ukowa ukuti baipoose muli bemba, pa kuti babalilepo ukufika ku mulundu, 44 e lyo abashala bakonkepo, bamo ba-abukile pa mbao na bambi pa fipimfya fya bwato. E ico bonse balifikile ku mulundu abatuntulu.+

28 Ilyo twapuswike, e lyo batwebele ukuti icishi ico twafikilepo baleciita ukuti Melita.+ 2 Kabili abantu abalanda ululimi lumbi* bali ne cikuuku sana kuli ifwe, balitukoseeshe umulilo kabili balitupokelele bwino bonse pantu imfula yaleloka kabili kwali impepo. 3 Lelo ilyo Paulo ateebele inkuni ashibika na pa mulilo, mwalifumine ifwafwa pa mulandu wa kukaba kabili lyalimusumine ku kuboko lyakakatila na ku kuboko kwine. 4 Ilyo aba bantu abalanda ululimi lumbi bamwene insoka ya busungu ilepeleela ku kuboko kwakwe, batampile ukulanshanya abati: “Cine cine uyu muntu ni kepaya wa bantu, nangu apuswike muli bemba, nacilinga* ukuti afwe.” 5 Lelo akuntiile iyi nsoka mu mulilo, kabili tapali nangu cimo icabipa icamucitikiile. 6 Nomba bena bale-enekela ukuti alafiimba nelyo alawa panshi afwe. Ilyo balolele pa nshita iitali kabili bamona ukuti tapali nangu cimo icabipa icimucitikile, balyalwike balalanda abati, uyu muntu ni lesa.

7 Nomba mupepi na kuli ilya ncende kwali umulashi wa pali ici cishi, uwe shina lya kuti Popli, uwakwete amabala. Uyu mulashi alitupokelele bwino kabili alitulangile icileela pa nshiku shitatu. 8 Lelo icacitike ca kuti wishi wa kwa Popli alilwele ubulwele bwa mpepo no bwa kupolomya umulopa, kabili aleele pa busanshi. Lyena Paulo alingiile umo aleele apepa, amubikapo iminwe e lyo amundapa.+ 9 Ilyo ici cacitike, abantu bambi abalwele aba pali ici cishi, nabo batendeke ukwisa kuli ena kabili alebondapa.+ 10 Balitupeele ne fya bupe ifingi pa kulanga ukutasha, kabili ilyo twaimine balitulongeleshe fyonse ifyo twalekabila.

11 Pa numa ya myeshi itatu twaile mu bwato ubwakwete icipampa ku ntanshi ico balembelepo ukuti “Abana Abaume ba kwa Seu.” Ubu bwato bwafumine ku Alekesandria kabili bwali pali ici cishi mu nshita ya mpepo. 12 Ilyo twafikile pa cabu ca Surakuse, twaikeleko inshiku shitatu; 13 ilyo twafumine ku Surakuse twakonkele ululamba e lyo twafika ku Regi. Ilyo papitile ubushiku bumo, umwela wa ku kapinda ka ku kulyo waliimine kabili twafikile ku Puteoli pa bushiku bwalenga shibili. 14 Ku Puteoli e ko twasangile aba bwananyina kabili batupapeete ukuti twikale nabo pa nshiku 7, lyena twaile ku Roma. 15 Ilyo twaimine, aba bwananyina balyumfwile ukuti tuli mu nshila tuleisa, kabili balitukonkeele baisatukumanishisha pa Maliketi ya Api palya paba Amayanda ya Beni Yatatu. Ilyo Paulo abamwene alitootele Lesa+ kabili alikoseleshiwe. 16 Ilyo twafikile mu Roma, Paulo balimusuminishe ukuti aleikalila e lyo umushilika umo alemulinda.

17 Lelo pa numa ya nshiku shitatu Paulo alongenye abakalamba ba baYuda. Ilyo balongene, abebele ati: “Mwe baume, bamunyinane, nangu ca kuti nshacitile icabipa nangu cimo ku bantu besu kabili takwali ulutambi nangu lumo ulwa fikolwe fyesu ulo nasuulile,+ balinkakile mu Yerusalemu kabili bampeele mu minwe ya bena Roma.+ 18 Nabo bene ilyo banjipukishishe,+ balefwaisha ukunkakula, pantu nshakwete umulandu wa kunjipailapo.+ 19 Lelo pa mulandu wa kuti abaYuda bakoselepo fye ukuti benkakula, natwele umulandu kuli Kaisare,+ nomba ico natwalile umulandu kuli Kaisare te kutila ni co nalefwaya ukupeela abantu bandi umulandu. 20 E ico nalombele ukuti tumonane na imwe kabili inande na imwe, pantu pe subilo lya kwa Israele e po bankakiile iyi ceni.”+ 21 Nabo bamwebele abati: “Na ifwe tatwapokelelapo kalata nangu imo ukufuma ku Yudea, kabili pa babwananyina abafumine kulya tapaba nangu umo uwatuletelapo ilyashi pali iwe nelyo uwalandapo ifyabipa pali iwe. 22 Lelo tulemona ukutila kuti cawama twayumfwila ifyo uletontonkanya, pantu cine cine twalishiba ukuti abantu konse fye balalanda ifyabipa+ pali ili ibumba lya mapepo.”+

23 Nomba balyumfwene ubushiku bwa kuyamonana nankwe, kabili abantu abengi baile ku ng’anda uko aleikala. Kabili ukufuma ulucelo ukufika icungulo alebalondolwela ili lyashi, pa kubalondolwela, alebashimikila sana pa Bufumu bwa kwa Lesa kabili pa kuti batetekele Yesu,+ alebeba ifyalembelwe mu Mafunde ya kwa Mose+ ne fyalembele Bakasesema.+ 24 Bamo batendeke ukusumina ifyo Paulo alelanda; lelo bambi tabasumine. 25 E ico pa mulandu wa kuti tabasuminishenye, batendeke ukuya. Lyena Paulo alandile amashiwi ya kuti:

“Umupashi wa mushilo walilungike ilyo waebele ifikolwe fyenu ukupitila muli Kasesema Esaya 26 auti, ‘Kabiye webe aba bantu auti: “Ukumfwa mukomfwa, lelo tamwakeluke nakalya, kabili ukulolesha mukalolesha, lelo tamwakamone nakalya.+ 27 Pantu imitima ya aba bantu yalikunkuma, balomfwa lelo tapali ico bacitapo, balishibatika amenso yabo pa kuti yemona, kabili amatwi yabo yeumfwa ne mitima yabo iiluka no kwalukila kuli ine, pa kuti mbaposhe.’”+ 28 E ico ishibeni ukuti, ifyo Lesa akapususha abantu, nafibilwa ku bena fyalo+ kabili bena bakafyumfwa.”+ 29* ——

30 E ico Paulo aikele imyaka ibili iituntulu mu ng’anda yakwe iya kusonkela,+ kabili bonse abaleisa kuli ena alebapokelela bwino, 31 alebasambilisha pa Bufumu bwa kwa Lesa na pali Shikulu Yesu Kristu ukwabula umwenso nangu panono,+ kabili takwali nangu umo uwalemulesha.