KALATA KU BENA ROMA

1 Ine ne Paulo, umusha wa kwa Kristu Yesu ne o aita ukuba umutumwa kabili uo asala ukubila imbila nsuma ya kwa Lesa,+ 2 iyo alaile kale sana mu Malembo ya mushilo ukupitila muli bakasesema bakwe. 3 Iyi imbila nsuma iilanda pa Mwana wakwe uwaishilefyalilwa mu lupwa lwa kwa Davidi,*+ 4 lelo Mwana wa kwa Lesa+ pantu Lesa amubuushishe ku bafwa+ ukupitila mu mupashi wa mushilo—uyu ni Yesu Kristu Shikulwifwe. 5 Twapokelele icikuuku icaibela ukupitila muli ena pa kuti tube abatumwa+ na pa kuti abena fyalo+ babe ne citetekelo ne cumfwila kabili bacindike ishina lyakwe, 6 na imwe bene mwaba pali aba abena fyalo abo Lesa aita, pa kuti mube ku lubali lwa kwa Yesu Kristu— 7 nalembela imwe bonse mwe baba mu Roma abo Lesa atemwa, kabili abo aita pa kuti mube aba mushilo:

Ndeti icikuuku icaibela no mutende ukufuma kuli Lesa Shifwe na kuli Shikulwifwe Yesu Kristu fibe na imwe.

8 Ica kubalilapo, ndetootela Lesa wandi pali imwe bonse ukupitila muli Yesu Kristu, pantu abantu abengi pano calo ponse balalanda pa citetekelo cenu. 9 Pantu Lesa uo mombela no mutima wandi onse pa kubila imbila nsuma iilanda pa Mwana wakwe, e nte yandi pa fyo imulumbula lyonse mu mapepo yandi,+ 10 ndapaapaata ukuti Lesa nga atemwa nomba kuti naisa kuli imwe. 11 Pantu ndefwaisha ukwisamumona, pa kuti nkamupeeleko ica bupe icafuma kuli Lesa icikamukosha; 12 nelyo ntile, pa kuti nkesemukoselesha e lyo na imwe mukankoseleshe,+ umo na umo akakoshe icitetekelo ca munankwe, e kutila icitetekelo cenu ne citetekelo candi.

13 Nomba bamunyinane ndefwaya mwishibe ukuti, pa miku iingi ndafwaya ukwisa kuli imwe, nomba kulaba ifilenga ndefilwa ukwisa ukufika na lelo. Ndefwaya ukwisalenga abantu na bambi babe abasambi ba kwa Kristu, nga filya fine nacita mu bena fyalo bambi. 14 Ndi wa nkongole ku baGriki na ku bashili baGriki, ku ba mano na ku batuutu; 15 e ico ndefwaisha ukubila imbila nsuma na kuli imwe, mwe ba uko ku Roma.+ 16 Pantu nshumfwa insoni sha kubila mbila nsuma;+ na kuba, e maka ya kwa Lesa aya kupususha onse uwaba ne citetekelo.+ Mu kubalilapo abaYuda+ e lyo abaGriki.+ 17 Pantu ababa ne citetekelo balishiba ukuti mu mbila nsuma e mo Lesa asokolwela ubulungami bwakwe, kabili ici cilakosha icitetekelo+ cabo, nga filya fine Amalembo yatila: “Lelo uwalungama akaba no mweo pa mulandu wa citetekelo cakwe.”+

18 Pantu Lesa alelanga ubukali+ bwakwe ukufuma ku muulu ubuleisa pa bantu bonse abashipepa na bacita ifyabipa pa kucilikila icine,+ 19 pantu ifyo abantu bengeshiba pali Lesa filamoneka bwino bwino, pantu Lesa alibalanga.+ 20 Pantu imibele yakwe ukutula fye apo abumbiile icalo, bailukila ku fyo abumba,+ muli ifi e mo belukila amaka yakwe ayashingapwa,+ pamo na buLesa bwakwe,+ ica kuti tabakwata umwa kubepekesha. 21 Pantu nangu ca kuti balishibe Lesa, tabamucindike ukuti e Lesa kabili tabamutooteele, lelo baletontonkanya ifya buwelewele, kabili imitima yabo tayaleiluka.+ 22 Nangu ca kuti baleimona ukuti ba mano, baishileba abatumpa, 23 kabili ubukata ubo balingile ukupeela Lesa, balepeela ifimpashanya fya muntu umwina kufwa, ifimpashanya fya fyuni, ifimpashanya fya nama isha molu 4 ne fimpashanya fya fikulika panshi.+

24 E ico Lesa alibalekele balecita ifyakowela, ukulingana ne fyo imitima yabo yalefwaya, pa kuti baseebanye imibili yabo. 25 Basalilepo ukusumina ifya bufi ukucila ukusumina icine pali Lesa, balepepa kabili balebombela ifyabumbwa mu cifulo ca kupepa no kubombela Kabumba, uwacindikwa umuyayaya. Ameni. 26 E mulandu wine Lesa alekeele insuuna ya kulaala no muntu iishili ya cifyalilwa yalabatungulula,+ pantu abanakashi batampile ukucita ifintu ifishili fya cifyalilwa, ifyo Lesa ashababumbile;+ 27 ifi fine e fyo na baume balecita, balilekele ukulaala na banakashi kabili baishilekwata sana insuuna ya kulaala na baume banabo.+ Abaume balecita ifye shiku na baume banabo, kabili bakakandwa ukulingana ne fyabipa ifyo balecita.+

28 Filya fine bashalefwaya ukwishiba Lesa,* Lesa na o abalekele batwalilila ukutontonkanya ifya buwelewele kabili balacita ifintu ifyo bashilingile ukucita.+ 29 Kabili balecita fyonse ifishalungama,+ ifibi, bali no bufunushi,*+ balecita ifyabipa, bali no mufimbila,+ baleipaya,+ bali ne fikansa, bali no bucenjeshi+ no mufulo,+ bali ba mulomo, 30 bali aba lwambo,+ abapata Lesa, aba musaalula, aba matutumuko, aba mataki, abapanga ukucita ifyabipa, abashumfwila abafyashi,+ 31 abashiiluka,+ abashifikilisha amalayo, abashatemwa abantu banabo kabili abashaba no luse. 32 Nangu ca kutila balishiba bwino bwino icipope calungama ica kwa Lesa, ica kuti abacita ifya musango uyu balingile fye ukufwa,+ bena bakonkanyapo fye ukuficita kabili balasuminisha na baficita.

2 E ico we muntu, apo fye uli muntu,+ nga ulapingula abacita ifyo na iwe ucita ninshi tawakwata umwa kubepekesha; pantu nga wapingula umuntu umbi, ninshi uleishinina we mwine.+ 2 Nomba ifwe twalishiba ukuti Lesa apingula abacita ifi, ukulingana ne cine.

3 Bushe we muntu ilyo upingula abacita ifyo na iwe ucita, umona kwati ukapusuka ubupingushi bwa kwa Lesa? 4 Nelyo bushe ni co walisuula icikuuku+ ca kwa Lesa icikalamba, ukushipikisha+ kwakwe no kutekanya+ kwakwe? Bushe tawaishiba ukuti icikuuku ca kwa Lesa kuti calenga walapila?+ 5 Lelo pa mulandu wa kuti walitalama kabili taufwaya ukulapila, ulaisungila ubukali bwa kwa Lesa ubukesa mu bushiku bwa bukali bwakwe, ilyo akalanga ubupingushi+ bwakwe ubwalungama. 6 Kabili akapingula umo umo ukulingana ne fyo acita:+ 7 abatwalilila ukubomba imilimo iisuma pa kuti balefwaya ubukata, umucinshi no bumi ubushakonaike,+ akabapeela ubumi bwa muyayaya; 8 nomba aba lubuli na bashinakila icine, lelo abacita ifyabipa Lesa akabalanga ubukali bwakwe ne cipyu+ cakwe. 9 Umuntu onse* uucita ifyabipa, akacula kabili akaba no bulanda, nampo nga muYuda nelyo muGriki; 10 lelo onse uucita ifisuma akaba no bukata, umucinshi no mutende, pa kubala umuYuda+ lyena umuGriki.+ 11 Pantu Lesa taba na kapaatulula.+

12 Pantu bonse ababembwike ninshi tabalaishiba amafunde bakaloba ukwabula amafunde;+ lelo bonse ababembwike ninshi balishiba na mafunde bakabapingula ukulingana na aya yene mafunde.+ 13 Pantu abomfwa fye amafunde te balungama mu menso ya kwa Lesa, lelo abacita ifyo amafunde yalanda e bo bakatila balilungama.+ 14 Pantu ilyo abena fyalo abashakwata mafunde+ mu cifyalilwa fye bacita ifyaba mu mafunde, aba bantu nangu tabakwata amafunde, baba e mafunde abene. 15 Aba bene e balanga ukuti ifyaba mu mafunde fyalembwa mu mitima yabo, ilyo kampingu yabo ilesuminishanya nabo, kabili mu matontonkanyo yabo abene balaipeela imilandu nelyo balailungamika. 16 Ifi fikacitika mu bushiku ubo Lesa ukupitila muli Kristu Yesu akapingula abantu pa fyo bacita mu bumfisolo,+ ukulingana ne mbila nsuma iyo mbila.

17 Lelo nga utila uli muYuda+ kabili washintilila pa mafunde e lyo ulaitakishisha muli Lesa, 18 walishiba ne fyo afwaya kabili kuti wailuka ifyacindama pantu balikusambilisha Amafunde;+ 19 kabili walishininkisha ukuti uli ntungulushi ya mpofu, waba ngo lubuuto ku baba mu mfifi, 20 niwe kalungika wa bawelewele, kasambilisha wa bana abanono, kabili walishibako fimo pali Lesa e lyo ne cine icaba mu Mafunde— 21 nomba iwe, we usambilisha umbi, taubala waisambilisha we mwine?+ We ubila auti “Wilaiba,”+ bushe uleba? 22 We utila “Wilacita bucende,”+ bushe ulacita ubucende? We wapata sana utulubi, bushe uleba ifya mu matempele? 23 We uitakishisha mu Mafunde, bushe ulasaalula Lesa ukupitila mu kupula mu mafunde? 24 Pantu abena fyalo balepontela “ishina lya kwa Lesa pa mulandu wenu,” nga filya fine calembwa.+

25 Na kuba ukusembululwa+ kuli no kukuwamina fye nga ulekonka amafunde;+ lelo nga taukonka amafunde, ninshi nangu walisembululwa cimo cine fye no ushasembululwa. 26 E ico kanshi, nga ca kuti umuntu uushasembululwa+ alekonka ifyalungama ifyaba mu Mafunde, bushe tabakamumone ngo wasembululwa nangu ca kutila tasembululwa?+ 27 Kabili uushasembululwa uulekonka Amafunde, alakupingula we upula mu mafunde, we uli na mafunde ayalembwa kabili uwasembululwa no kusembululwa. 28 Pantu ukuba umuYuda wine wine te kwa kunse fye,+ no kusembululwa te kwa kunse ya mubili fye.+ 29 Lelo ukuba umuYuda wine wine kwa mu mutima,+ no kusembululwa kwine kwine kusembululwa kwa mutima+ ukupitila mu mupashi wa mushilo, te kupitila mu mafunde ayalembwa.+ Umuntu uwaba ifi, ni Lesa e umutasha, te bantu iyo.+

3 Busuma nshi bwaba mu kuba umuYuda, nelyo busuma nshi bwaba mu kusembululwa? 2 Mwaliba ubusuma ubwingi sana. Ica kubalilapo abaYuda e bo bapeele fyebo fya mushilo ifya kwa Lesa.+ 3 Inga ca kuti bamo tabali ne citetekelo? Bushe nga tabali ne citetekelo, ninshi calola mu kuti Lesa taba na cishinka? 4 Nakalya! Nangu abantu bonse bengaba aba bufi,+ Lesa ena alanda icine,+ nga filya fine calembwa ukuti: “Mulalungika mu fyo mulanda kabili tabakamusange no mulandu ilyo balemulubulwisha.”+ 5 Nomba finshi twingalanda, nga ca kuti ifishalungama ifyo tucita fyalenga camoneka ukuti Lesa alilungama? Bushe Lesa nga akalipa kuti twatila wa lufyengo? (Ndelanda fye nge fyo abantu bamo balanda.) 6 Awe nakalya! Bushe nga cali ifyo, ninshi Lesa akapingula shani icalo?+

7 Lelo nga ca kuti ubufi bwandi bwalilenga abantu abengi baishiba sana ukuti Lesa alanda icine, kabili balamulumbanya, mulandu nshi Lesa alempingwila ukuti ndi mubembu? 8 Kanshi natulande nga filya fine abantu batubepesha ukuti e fyo tulanda, batila tulanda atuti: “Natulecita ifyabipa pa kuti mulefuma ifisuma.” Ubupingushi ubo bakapingula aba bantu bukaba ubwalungama.+

9 Nomba finshi twingalanda? Bushe twalicila abantu bambi? Nakalya! Pantu natushininkisha kale ukuti abaYuda na baGriki bonse babembu;+ 10 nga filya fine calembwa aciti: “Takwaba uwalungama, takwaba nangu fye umo;+ 11 takwaba uwiluka, takwaba uufwayafwaya Lesa. 12 Abantu bonse nabafuma mu nshila, bonse nabasanguka ifinangwa; takwaba nangu umo uwaba ne cikuuku, takwaba nangu fye umo.”+ 13 “Imikolomino yabo ni nshiishi ishacenama, kabili balabepa ku milomo+ yabo.” “Pa milomo+ yabo paba ubusungu bwa mpini.”* 14 “Kabili mu tunwa twabo mwaisula fye ukutiipa na mashiwi ayabipa.”+ 15 “Amakasa yabo yalangufyanya ukuya mu kusumya umulopa.”+ 16 “Ubonaushi no bucushi fyaba mu nshila shabo. 17 Tabaishiba inshila ya mutende.”+ 18 “Tabatiina Lesa.”+

19 Lelo ifwe twalishiba ukuti fyonse ifyo Amafunde yalandapo, fya bantu abafwile ukulakonka Amafunde pa kuti bekwata umwa kubepekesha, na pa kuti bonse aba muli ici calo bengakwata umulandu uo Lesa engabakandilapo.+ 20 E ico Lesa takalungamikile umuntu nangu umo pa mulandu wa kukonka amafunde,+ na kuba amafunde yalalenga twaishiba bwino bwino ulubembu.+

21 Lelo nomba Lesa alilanga+ ubulungami bwakwe ukwabula ukupitila mu mafunde, nge fyo amabuuku ya Mafunde na ya Bakasesema yalanda.+ 22 Bonse abatetekela Yesu Kristu, Lesa abamona ukuti balilungama. Pantu Lesa taba na kapaatulula.+ 23 Pantu bonse babembu kabili balifilwa ukufikapo ukulanga ubukata bwa kwa Lesa,+ 24 kabili luse fye+ lulenga alebamona ukuti balilungama pa mulandu wa cikuuku+ cakwe icaibela ukupitila mu cilubula ico Kristu Yesu+ alipiile. 25 Lesa apeele Kristu pa kuti abe ilambo lya kufutilako+ imembu sha batetekela mu mulopa wakwe.+ Ico acitile ifi, ni pa kulanga ukuti alilungama, pa mulandu wa kuti Lesa alitekanya kabili aleleela imembu sha bantu isho bacitile kale. 26 Ico acitile ifi pali ino nshita, ni pa kuti alange ukuti alilungama+ na pa kutila abe uwalungama na lintu ale-eba onse uutetekela Yesu+ ukuti alilungama.

27 Nomba bushe kuli ico tulingile ukulaitakishishapo? Tatulingile ukulaitakisha. Bushe kwaliba ifunde ilyo tulingile ukulaitakishishapo? Bushe lifunde ililanda pa fyo abantu bacita?+ Awe, lelo ni pa kukonka ifunde ililanda pa citetekelo. 28 Pantu twalishiba ukuti icitetekelo e cilenga umuntu aba uwalungama te kukonka ifyo amafunde+ yalanda. 29 Nelyo bushe Lesa, ni Lesa wa baYuda fye beka?+ Bushe na bena fyalo+ nabo te Lesa wabo? Cine cine, na bena fyalo+ nabo ni Lesa wabo. 30 Apo ni Lesa umo,+ akamona abasembululwa ukuti balilungama+ pa mulandu wa citetekelo cabo, kabili na bashasembululwa bene akabamona ukuti balilungama+ pa mulandu wa citetekelo cabo. 31 Bushe tulafumyapo amafunde pa mulandu ne citetekelo cesu? Nakalya! Lelo tulayakosha.+

4 Ifi nga e fyo caba, finshi twingalanda pali Abrahamu icikolwe cesu? 2 Pantu nga ca kuti milimo yalengele Abrahamu abe uwalungama, nga alikwete ica kuitakishishapo; lelo nga taleitakishisha pa cinso ca kwa Lesa. 3 Bushe ilembo lilanda shani? Litila: “Abrahamu atetekele Yehova,* na o amumwene ukuti alilungama.”+ 4 Nomba uubomba, amalipilo tayamona ukuti bupe fye,* lelo ayamona ukuti malipilo pa mulimo abombele. 5 Lelo umuntu uwatetekela Lesa kabili uushishintilila pa milimo yakwe, Lesa amumona ukuti alilungama pa mulandu ne citetekelo cakwe. Ni Lesa e umona ababembu ukuti balilungama.+ 6 Nga filya fine Davidi alanda ukuti wa nsansa umuntu uo Lesa amona ukuti alilungama ukwabula imilimo. Atila: 7 “Ba nsansa abo baeleela pali bumpulamafunde bwabo kabili abo imembu shabo shafimbwapo;* 8 wa nsansa umuntu uo Yehova* ashakalubulwishe nangu panono pa lubembu lwakwe.”+

9 E ico bushe, abakwata ishi nsansa bantu basembululwa fye nelyo na bashasembululwa bene?+ Pantu tutila: “Lesa amwene Abrahamu ukuti alilungama+ pa mulandu wa citetekelo cakwe.” 10 Ni lilali amumwene ukuti alilungama? Bushe ni lintu ali uwasembululwa nelyo ilyo ashilasembululwa? Te lintu ali uwasembululwa, lelo ni lintu ashilasembululwa. 11 Kabili Lesa amupeele icishibilo,+ e kutila, ukusembululwa—icalelangilila* ukuti ali uwalungama pa mulandu ne citetekelo ico akwete ilyo ashilasembululwa, pa kuti abe wishi wa bantu bonse ababa ne citetekelo+ nangu ca kuti tabasembululwa, pa kuti Lesa alebamona ukuti balilungama; 12 kabili pa kuti abe wishi wa basembululwa, te basembululwa fye beka, lelo na benda mu ntampulo sha citetekelo ca kwa shifwe Abrahamu+ ico akwete ilyo ashilasembululwa.

13 Pantu te mafunde yalengele Abrahamu nelyo abana bakwe* babalaye ukuti bali no kupyana icalo,+ lelo ni co ali ne citetekelo+ icalengele abe uwalungama. 14 Pantu abakonka amafunde nga e mpyani, ninshi icitetekelo ca fye kabili ninshi ne fyo babalaya fine tafyakafikilishiwe. 15 Na kuba ukupula mu Mafunde kulalenga umuntu bamukanda,*+ lelo nga takuli amafunde takuba na bumpulamafunde.+

16 E ico citetekelo calengele ukuti Lesa atulaye pa mulandu ne cikuuku+ cakwe icaibela. Abana+ ba kwa* Abrahamu bonse bakapokelela ifyo abalaile, te bakonka fye Amafunde beka, lelo nabakwata icitetekelo nge co Abrahamu akwete. Pantu e shifwe, ifwe bonse.+ 17 (Ifi nafilingana na filya fine calembwa ukuti: “Nakusonta ukuba wishi wa nko ishingi.”)+ Ifi fyacitikiile pa cinso ca kwa Lesa uo atetekele, uulenga abafwa baba aba mweo kabili uwita ifishilabako kwati e ko fyaba.* 18 Nangu ca kuti tale-enekela ukukwata abana, lelo apo ali ne subilo, ali ne citetekelo, ica kuti ali no kuba wishi wa nko ishingi ukulingana ne fyo bamwebele. Bamwebele ukuti: “E fyo na bana bobe* bakafula.”+ 19 Kabili nangu ca kuti icitetekelo cakwe tacanakile, atontonkenye pa mubili wakwe uwali kwati walifwa, pantu ali ne myaka nalimo 100+ kabili atontonkenye na pa cisa ca kwa Sara+ icali kwati cintu cafwa.* 20 Nomba pa mulandu ne fyo Lesa amulaile, Abrahamu aali ne citetekelo kabili tapungaile, lelo icitetekelo calengele aba na maka, kabili acindike Lesa. 21 Alishininkishe bwino bwino no kuti Lesa, alikwete amaka yakufikilisha+ ifyo amulaile. 22 E ico “Lesa amumwene ukuti ali uwalungama.”+

23 Nomba amashiwi ya kuti, “Lesa amumwene ukuti ali uwalungama” te Abrahamu eka+ yalembeelwe, 24 lelo yalembeelwe na ifwe bene fwebo Lesa amona ukuti twalilungama, pantu twalitetekela uwabuushishe Yesu Shikulwifwe ku bafwa.+ 25 Lesa alilekele ukuti Yesu afwe pa mulandu wa membu+ shesu, kabili ico amubuushiishe ni pa kuti aletumona ukuti twalilungama.+

5 E ico apo nomba Lesa atumona ukuti twalilungama pa mulandu ne citetekelo,+ natube no mutende* na Lesa ukupitila muli Shikulwifwe Yesu Kristu.+ 2 Muli uyu wine e mo tukwatila+ icikuuku icaibela pa mulandu ne citetekelo; kabili natusekelele* pantu twalikwata isubilo lya kupokelela ubukata bwa kwa Lesa. 3 Te ico ceka, lelo natulesekelela* na lintu tulecula,+ pantu twalishiba ukuti ukucula e kulenga tuleshipikisha;+ 4 ukushipikisha na ko kulenga Lesa alatumona ukuti natufikapo;+ e lyo nga natufikapo tulaba ne subilo,+ 5 kabili isubilo taliseebanya;+ pantu Lesa alipongolwela ukutemwa kwakwe mu mitima yesu ukupitila mu mupashi wa mushilo uo atupeele.+

6 Pantu cine cine, ilyo twali tucili abanaka,+ e lyo Kristu afwilile abashipepa ilyo inshita yafikile. 7 Pantu calikosa umuntu ukufwila umuntu uwalungama; lelo nalimo umuntu kuti aitemenwa ukufwila umuntu umusuma. 8 Lelo Lesa alitulanga ifyo atutemwa pantu ilyo twali tucili ababembu, Kristu alitufwilile.+ 9 E ico pali bufi, apo nomba Lesa atumona ukuti twalilungama pa mulandu wa mulopa+ wa kwa Yesu, tukapusuka ubukali+ bwa kwa Lesa ukupitila muli Yesu. 10 Pantu nga ca kuti ilyo twali abalwani twabweleele kuli Lesa pa mulandu ne mfwa ya Mwana+ wakwe, pali bufi nomba apo twalibwelela kuli ena, tukapusukila mu mweo wa mwana wakwe. 11 Te ico ceka, lelo tulesekelela na muli Lesa pa mulandu wa kwa Shikulwifwe Yesu Kristu, uwalenga ukuti nomba tubwelele+ kuli Lesa.

12 Pantu nga filya fine ulubembu lwaingilile mu mwaume umo pano calo ne mfwa yaingilile mu lubembu,+ e fyo ne mfwa yasalanganine ku bantu bonse pantu bonse balibembwike+—. 13 Pantu ilyo pano calo pashilaba Amafunde, ulubembu e po lwali, lelo umuntu tabamulubulwisha pa lubembu nga takuli amafunde.+ 14 Lelo imfwa yalitekele ukutendekela fye pali Adamu ukwisafika fye na kuli Mose. Kabili yatekele na bashabembwike nga filya Adamu abembwike, uwali cipasho ca wali no kwisa.+

15 Lelo ubupe bwa kwa Lesa bwalicila ulubembu ulo Adamu acitile. Pantu nga ca kuti ulubembu lwa muntu umo e lwalenga abengi balefwa, ninshi icikuuku icaibela ica kwa Lesa no bupe bwakwe fyalilenga abengi bapaalwa.+ Lesa apeele ubu bupe ne cikuuku icaibela ukupitila mu muntu umo,+ Yesu Kristu. 16 Na kabili ubupusano bwaba pa bupe bwa kwa Lesa no lubembu ulo umuntu umo acitile+ ni ubu: Ubupingushi ubwaishile pa mulandu no lubembu ulo umuntu umo acitile bwalengele abengi baba no mulandu,+ lelo ubupe bwalengele Lesa alamona abengi abali no mulandu ukuti balilungama.+ 17 Pantu nga ca kuti ulubembu lwa muntu umo lwalengele imfwa yalateka ukupitila muli uyu muntu,+ ninshi abakapokelela icikuuku icaibela no bupe bwakwe ubwalungama+ ilyo bakaba abomi bakacilapo ukuteka+ ukupitila mu muntu umo, Yesu Kristu.+

18 E ico kanshi, nga filya fine icilubo ca muntu umo calengele abantu ba misango yonse baba no mulandu,+ e fyo no bulungami bwa muntu umo bwalenga Lesa alemona abantu ba misango yonse+ ukuti balilungama kabili bakabe no mweo.+ 19 Pantu filya fine bucintomfwa bwa muntu umo bwalengele abantu abengi baba ababembu,+ e fyo ne cumfwila ca muntu umo cikalenga abantu abengi bakabe abalungama.+ 20 Nomba kwaishileba Amafunde pa kuti cimonekeshe+ ifyo abantu baba ababembu. Lelo uko ulubembu lwafulile, e ko icikuuku icaibela cafulile ukucilapo. 21 Pa kuti cibe shani? Pa kuti filya fine ulubembu lwatekele pamo ne mfwa,+ e fyo ne cikuuku icaibela citekele mu bulungami no kutungulula abantu ku mweo wa muyayaya ukupitila muli Yesu Kristu Shikulwifwe.+

6 Nomba finshi twingalanda? Bushe tutwalilile ukucita imembu pa kuti icikuuku icaibela cifule? 2 Awe nakalya! Apo ubumi bwesu ubwa lubembu+ bwalifwa, kuti twatwalilila shani ukulacita imembu?+ 3 Nelyo bushe tamwaishiba ukuti bonse fwe babatishiwe muli Kristu Yesu+ twabatishiwe mu mfwa+ yakwe? 4 E ico twashiikilwe nankwe ilyo twabatishiwe mu mfwa+ yakwe, pa kuti filya Kristu abuushiwe ku bafwa mu bukata bwa kwa Wishi, e fyo na ifwe tulingile ukulaikala imikalile ipya.+ 5 Nga ca kuti twalikatana nankwe pa mulandu wa kuti twalifwa nga filya fine afwile,+ ninshi tukekatana nankwe ilyo tukabuushiwa nga filya fine abuushiwe.+ 6 Pantu twalishiba ukuti ubuntu bwesu ubwa kale bwapoopeelwe pamo nankwe+ pa cimuti, pa kuti umubili wesu uwa lubembu wiba na maka+ pali ifwe na pa kuti twitwalilila ukuba abasha ba lubembu.+ 7 Pantu umuntu nga afwa, ninshi umulandu wakwe uwa lubembu wapwa.

8 Na kabili nga ca kuti twalifwile pamo na Kristu, twalisumina ukuti tukalaikala pamo nankwe aba mweo. 9 Pantu twalishiba ukuti apo Kristu alibuushiwa ku bafwa,+ te kuti afwe na kabili;+ nomba imfwa tayakwata amaka pali ena. 10 Pantu imfwa iyo afwile, afwilile fye umuku walimo+ pa kuti afumyepo ulubembu, lelo ubumi ubo ekala, ekala pa kuti alecita ifyo Lesa afwaya. 11 Ifi fine e fyo na imwe mulecita, muleimona ukuti mwalifwa ku lubembu, lelo muli ba mweo pa kuti mulecita ifyo Lesa afwaya apo muli basambi ba kwa Kristu Yesu.+

12 E ico mwileka ulubembu luleteka mu mibili+ yenu iifwa pa kuti mulenakila ifya lunkumbwa fya iko. 13 Kabili mwilatuula imibili yenu ku lubembu pa kuti ibe ifyanso fya kucitilako ifishalungama, lelo ituuleni mwe bene kuli Lesa nga bantu ababuushiwa ku bafwa, mutuule ne mibili yenu kuli Lesa pa kuti ibe ifyanso fya bulungami.+ 14 Pantu ulubembu talufwile ukukwata amaka pali imwe, apo tamutungululwa na mafunde+ lelo Lesa alimulanga icikuuku+ icaibela.

15 Nomba finshi twingalanda? Bushe tulebembuka pantu fye tatutungululwa na mafunde lelo Lesa alitulanga icikuuku+ icaibela? Nakalya! 16 Bushe tamwaishiba ukuti nga muleitemenwa ukuba abasha ba muntu uuli onse pa kuti mulemumfwila, ninshi muli basha ba uyo wine muntu pa mulandu wa kuti mulemumfwila?+ E ico kuti mwaba abasha ba lubembu+ ulutwala ku mfwa+ nelyo abasha ba cumfwila icitwala ku bulungami. 17 Lelo ndetasha Lesa, pantu nangu ca kuti mwali abasha ba lubembu pa nshita imo, mwaishileba ne cumfwila ukufuma panshi ya mitima yenu pantu mwalekonka sana isambilisho ilyo bamusambilishe. 18 Cine cine apo mwalilubwike ku lubembu,+ mwaishileba abasha ba bulungami.+ 19 Ndelanda ifyo abantu baishiba pa mulandu wa kunaka kwa mibili yenu; pantu nga filya fine mwaleitemenwa ukuba abasha ba kukowela na ba bumpulamafunde ubwalefulilako fye, e fyo nomba muleitemenwa ukuba abasha ba bulungami pa kuti mube aba mushilo.+ 20 Pantu ilyo mwali abasha ba lubembu, tamwalekabila ukulacita ifyalungama.

21 Nomba fisabo nshi mwaletwala pali ilya nshita? Fintu ifyo nomba mumfwilapo ne nsoni. Pantu impela ya ifyo fintu ni mfwa.+ 22 Lelo apo nomba mwalilubuka ku lubembu no kuba abasha ba kwa Lesa, ifisabo mutwala fintu fya mushilo,+ kabili fikalenga mukabe no mweo wa muyayaya.+ 23 Pantu amalipilo ya lubembu ni mfwa,+ lelo ubupe bwa kwa Lesa mweo wa muyayaya+ ukupitila muli Kristu Yesu Shikulwifwe.+

7 Bushe kwena tamwaishiba bamunyinane, (pantu ndeeba imwe mwe baishiba amafunde) ukuti Amafunde e yatungulula umuntu inshita yonse iya bumi bwakwe? 2 Ku ca kumwenako, umwanakashi uwaupwa alakakilwa kwi funde lya mulume wakwe ilyo umulume wakwe acili uwa mweo; lelo umulume wakwe nga afwa, alakakulwa kwi funde lya mulume+ wakwe. 3 E ico kanshi, nga aupwa ku mwaume+ umbi ilyo umulume wakwe acili uwa mweo, bakamwita ukuti mucende. Lelo umulume wakwe nga afwa, alakakulwa kwi funde lya mulume, ica kuti nangu nga aupwa ku mwaume+ umbi tabakamwite ukuti mucende.

4 E ico bamunyinane, na imwe mwalifwile ku Mafunde ukupitila mu mubili wa kwa Kristu uo atuulile, pa kuti mube abantu ba muntu umbi+ uwabuushiwe ku bafwa,+ na pa kuti tutwale ifisabo ificindika Lesa.+ 5 Pantu ilyo twalekonkelela ifyalefwaya imitima yesu, Amafunde yalengele twaishiba ulunkumbwa ululenga tulecita imembu ulwaba mu mibili yesu ululenga tuletwala ifisabo ifitwala ku mfwa.+ 6 Lelo nomba twalilubuka ku Mafunde,+ apo twalifwa kuli cilya icaletwikata, pa kuti tube abasha mu musango upya uwa mupashi,+ kabili te mu musango wa kale uwa mafunde ayalembwa.+

7 Nomba finshi twingalanda? Bushe Amafunde lubembu? Nakalya! Cine cine nga takwali Amafunde+ nga nshaishiba ulubembu. Ku ca kumwenako, Amafunde ayakaanalanda ukuti: “Wilakumbwa,”+ nga nshaishibe ukuti ulunkumbwa lubi. 8 Lelo amafunde e yalengele ukuti ulubembu lulenge mbe no lunkumbwa lwa misango yonse, pantu ilyo kushali amafunde ulubembu lwalifwile.+ 9 Na kuba, ilyo kushilaba ifunde nali uwa mweo; nomba ilyo kwaishileba ifunde, ulubembu lwalibukulwike, lelo ine nalifwile.+ 10 Kabili ifunde ilyo nalemona ukuti lya kuntwala ku mweo,+ e lyo nasangile ukuti kanshi lya kuntwala ku mfwa. 11 Pantu ulubembu lwabomfeshe ifunde pa kumbeleleka no kunjipaila muli ili line ifunde. 12 E ico Amafunde yena ya mushilo, ne fyo yalanda na fyo fya mushilo, fyalilungama kabili fisuma.+

13 Bushe icisuma e calengele mfwe? Awe! Lelo lubembu e lwalengele mfwe, amafunde yasuma+ lelo yalengele cimonekeshe ukuti ulubembu e lwalengele mfwe, e co ifunde lyalengele cimonekeshe ifyo ulubembu lwabipa.+ 14 Pantu twalishiba ukuti Amafunde yafuma kuli Lesa ukupitila mu mupashi, lelo ine nkonkelela ififwaya umutima wandi, ndi musha wa lubembu.+ 15 Pantu nshaishiba ico ncita. Pantu ico mfwaya, te co ncita, lelo ico napata e co ncita. 16 Nalisumina ukuti Amafunde yasuma, na lyo line ifintu ifyo nshifwaya ukucita, e fyo ncita. 17 Nomba te ine ncita ifi fintu, lelo lubembu ulwaba muli ine.+ 18 Pantu nalishiba ukuti muli ine, e kutila mu mubili wandi, tamwaba icisuma nangu cimo; pantu ndafwaya ukucita icisuma, lelo amaka ya kucicita e yo nshakwata.+ 19 Pantu ifisuma ifyo mfwaya nshificita, lelo ifyabipa ifyo nshifwaya e fyo ncita. 20 E ico nga ca kuti ico nshifwaya e co ncita, ninshi te ine ncicita, lelo lubembu ulwaba muli ine.

21 Lyena ifyo ciba ni fi: Lyonse nga ndefwaya ukucita icalungama, nsanga ndecita icabipa.+ 22 Mu mutima wandi+ mwena nalitemwisha amafunde ya kwa Lesa, 23 lelo ndamona ifunde limbi mu mubili wandi lilelwa ne funde lya matontonkanyo+ yandi, kabili lilantwala bunkole kwi funde+ lya lubembu ilyaba mu mubili wandi. 24 Yangu ne mulanda wine wine! Nani akampokololako kuli uno mubili uulentwala ku mfwa? 25 Ndetootela Lesa pantu akampususha muli Yesu Kristu Shikulwifwe! E ico kanshi, mu matontonkanyo yandi ndi musha we funde lya kwa Lesa, lelo ku mubili ndi musha we funde+ lya lubembu.

8 E ico ababa muli Kristu Yesu tabakwata umulandu. 2 Pantu ifunde lya mupashi uupeela umweo muli Kristu Yesu lyalimulubula+ kwi funde lya lubembu kabili ilya mfwa. 3 Ifyo Amafunde yafililwe ukucita+ pa mulandu wa kuti umubili walinaka,+ Lesa alificitile, ilyo atumine Umwana+ wakwe uwaishile mu mubili uwaba ngo mubili+ wa lubembu pa kuti afumyepo ulubembu, ici calengele Lesa ashinine ulubembu ulwaba mu mubili, 4 pa kuti ifyalungama ififwaikwa pa kuti Amafunde yafikilishiwe, fifikilishiwe muli ifwe+ fwe bashenda ukulingana ne fifwaya imitima yesu, lelo fwe benda ukulingana ne fyo Lesa afwaya.+ 5 Pantu abakonka ififwaya imitima yabo babika amano ku fifwaya imitima yabo,+ lelo abatungululwa no mupashi babika amano ku fya kwa Lesa.+ 6 Pantu ukubika amano ku fifwaya imitima kutwala ku mfwa,+ lelo ukubika amano ku fya kwa Lesa kutwala ku mweo na ku mutende;+ 7 pantu ukubika amano ku fifwaya imitima yesu kulenga twaba abalwani ba kwa Lesa,+ pantu umubili taunakila ifunde lya kwa Lesa, kabili no kunakila te kuti unakile. 8 E ico abakonkelela ififwaya imitima yabo te kuti basekeshe Lesa.

9 Nomba imwe tamukonkelela ififwaya imitima yenu, lelo nga cine cine umupashi+ wa kwa Lesa waba muli imwe, ninshi mutungululwa no mupashi wa kwa Lesa. Umuntu nga takwata umupashi wa kwa Kristu, ninshi uyo muntu te wa kwa Kristu. 10 Nomba nga ca kuti Kristu aba muli imwe,+ ninshi umubili wenu walifwa pa mulandu wa lubembu, lelo umupashi wena utuntulu pa mulandu wa bulungami. 11 Nomba nga ca kuti umupashi wa kwa Lesa uwabuushishe Yesu ku bafwa waba muli imwe, ninshi uwabuushishe Kristu Yesu ku bafwa,+ akalenga ne mibili yenu iifwa ikabe iya mweo+ ukupitila mu mupashi wakwe uwaba muli imwe.

12 E ico mwe bamunyinane, tatulingile ukulaikala ukulingana ne fifwaya imitima yesu;+ 13 pantu nga mwikala ukulingana ne fifwaya imitima yenu nangu cibe shani muli no kufwa; lelo nga mwaleka umupashi ulemwafwa pa kuti mulekaninina+ ififwaya imitima yenu, mukaba no mweo.+ 14 Pantu bonse abo umupashi wa kwa Lesa utungulula, bana+ ba kwa Lesa. 15 Pantu tamwapokelele umupashi wa busha uulenga muletiina na kabili, lelo mwapokelele umupashi wa kuba abana, uyu wine mupashi e ulenga tulebilikisha atuti: “Abba,* Tata!”+ 16 Umupashi wa kwa Lesa ulalenga imitima+ yesu yashininkisha ukuti tuli bana+ ba kwa Lesa. 17 E ico kanshi nga tuli bana, ninshi tuli mpyani—e kuti impyani sha kwa Lesa, lelo impyani shinankwe+ isha kwa Kristu, kulila fye twaculila pamo+ nankwe pa kuti no kucindamikwa tukacindamikilwe pamo+ nankwe.

18 Pantu ndemweba nati ubucushi bwa pali ino nshita tapali ifyo buli nga kubulinganya ku bukata ubukamonekela muli ifwe.+ 19 Pantu ifibumbwa filalolela kabili filafwaisha ukumona ilyo Lesa+ akasokolola abana bakwe. 20 Pantu ifibumbwa tafyalefwaya ukufipingula ukukwata ubumi ubwabula isubilo,*+ lelo ifi fine e fyo Lesa asuminishe. Nomba ilyo Lesa apingwile ifi, alitupeele isubilo 21 ilya kuti ifibumbwa na fyo fikalubuka+ ku busha bwa kubola kabili fikaba abana ba kwa Lesa. 22 Pantu twalishiba ukuti ifibumbwa fyonse fitetela capamo no kuculila capamo ukufika na nomba. 23 Te ico ceka, lelo na ifwe bene fwe baba ne fisabo fya ntanshi, e kutila umupashi, cine cine na ifwe bene tulateta mu mutima,+ ilyo tulelolela no kufwaisha ukwisaba abana+ ba kwa Lesa, ilyo tukalubuka ku mibili yesu ukupitila mu cilubula. 24 Pantu twapusukiile muli ili subilo; lelo isubilo ilyamoneka taliba lisubilo iyo, pantu umuntu nga amona icintu, bushe kuti atwalilila ukucisubila? 25 Lelo nga tusubila+ ico tushilamona,+ tulacifwaisha kabili tulashipikisha+ ilyo tulecilolela.

26 Ifi fine e fyo caba, umupashi ulatwafwako mu kunaka+ kwesu; pantu ubwafya tulingile ukupepela ilyo tulefwaya ukupepa tatubwishiba, lelo umupashi ulatupaapaatilako ilyo tuletetela mu kati.* 27 Lelo uufwayafwaya mu mitima+ aleshiba ifyo umupashi upaapaatilako aba mushilo pantu ubapaapaatilako ukulingana ne fyo Lesa afwaya.

28 Twalishiba ukuti Lesa alalenga imilimo yakwe yonse ilebombelwa pamo pa kuti cilewamina abatemwa Lesa, abo aita ukulingana ne fyo afwaya;+ 29 pantu abo aishibiile libela no kulinga alibalingiile libela pa kuti bakapalane no Mwana+ wakwe, na pa kuti Umwana wakwe engaba ibeli+ pali bamunyina abengi.+ 30 Kabili abo alingiile libela+ e bo aitile no kwita;+ kabili abo aitile e bo alemona ukuti bali abalungama.+ Na mu kulekelesha abo alemona ukuti bali abalungama e bo acindamike.+

31 Nomba finshi twingalanda pali ifi fintu? Nga ca kuti Lesa ali na ifwe, nani engatulwisha?+ 32 Apo tacilikiile Umwana wakwe ukucuula, lelo alimupeele kuli ifwe bonse,+ cinshi cingamulesha ukutupeela ifintu fyonse ukulunda pa Mwana wakwe? 33 Nani engapeela abo Lesa asala+ umulandu? Lesa e ubamona ukuti balilungama.+ 34 Nani akabapingula? Kristu Yesu e wafwile, ne cacilapo, alibuushiwe ku bafwa, aba ku kuboko kwa ku kulyo ukwa kwa Lesa,+ kabili alatupaapaatilako.+

35 Nani akatupaatulako ku kutemwa kwa kwa Kristu?+ Bushe bucushi, bushe bulanda, bushe kutucusha, bushe ni nsala, bushe kusapula, bushe busanso, nelyo bushe lupanga?+ 36 Nga filya fine calembwa ukuti: “Apo tuli bantu benu, balatwipaya akasuba konse, abalwani besu batumona nge mpaanga isho baleya mu kwipaya.”+ 37 Lelo muli ifi fyonse tulecimfya+ icine cine pa mulandu wa watutemenwe. 38 Pantu ninshininkisha ukuti nangu ni mfwa, nangu mweo, nangu ni bamalaika, nangu mabuteko, nangu fintu ifyabapo, nangu fintu ifikesabako, nangu fya maka,+ 39 nangu ifya pa muulu, nangu ifya panshi, nangu ifyabumbwa, tafyakakwate amaka ya kutupaatulako ku kutemwa kwa kwa Lesa ukwaba muli Kristu Yesu Shikulwifwe.

9 Ndelanda icishinka pa menso ya kwa Kristu; nshilebepa iyo, pantu kampingu yandi iitungululwa no mupashi wa mushilo ilenjimininako ubunte 2 ukuti ndi no bulanda ubukalamba kabili umutima wandi ulecula ukwabula ukuleka. 3 Pantu kuti natemwa ukuti nine bafumye kuli Kristu ngo muntu uwatiipwa pa mulandu wa bamunyinane, balupwa lwandi, 4 e kutila abena Israele. Abo Lesa asalile ukuba abana+ bakwe abo apeele ubukata, ifipangano,+ Amafunde no+ mulimo wa mushilo+ kabili abo alaile amalayo.+ 5 Batuntwike mu fikolwe fyesu+ umwatuntwike na Kristu.+ Lesa uwakwata amaka pali fyonse nacindikwe umuyayaya. Ameni.

6 Lelo ici tacilolele mu kuti ifyo icebo ca kwa Lesa calandile tafyafikilishiwa. Pantu te bonse abatuntuka muli Israele ababa “abena Israele”+ bene bene. 7 Kabili te kutila pantu fye batuntuka muli Abrahamu*+ ninshi bonse bana iyo, lelo calembwa ukuti: “Muli Isaki+ e mukafuma uuketwa ati ‘umwana obe.’”* 8 Kanshi abana abo Abrahamu afyele tabali bana bene bene aba kwa Lesa,+ lelo abana abo Abrahamu aishilefyala pa mulandu wa fyo Lesa alaile,+ e abana* bene bene. 9 Pantu Lesa alaile ukuti: “Nkabwela kuli iwe uyu mwaka uleisa pa nshita nga ino ine, kabili Sara akakwata umwana umwaume.”+ 10 Ifi fine e fyo cali na kuli Rebeka ilyo aimite bampundu kuli Isaki icikolwe cesu;+ 11 pantu ilyo abana baali tabalafyalwa kabili ninshi tabalacitapo icisuma nangu icabipa, pa kuti ifyo Lesa afwaya fishibikwe ukuti tasala umuntu ukulingana ne milimo yakwe, lelo asala uo umwine alefwaya, 12 Rebeka bamwebele ati: “Umwana umukalamba akaba umusha wa mwaice.”+ 13 Nga filya fine Amalembo yalanda ukuti: “Ine natemenwe Yakobo, lelo Esau nalimupatile.”+

14 E ico cinshi twingalanda? Bushe Lesa aliba no lufyengo? Nakalya!+ 15 Pantu aebele Mose ati: “Nkabelela uluse uo nkafwaya ukubelela uluse, kabili nkalangulukilako uo nkafwaya ukulangulukilako.”+ 16 E ico kanshi, te kulingana ne fyo umuntu alefwaya nelyo ifyo acita,* lelo kulingana no luse+ lwa kwa Lesa umwine. 17 Pantu Amalembo yalandile pali Farao ati: “Lelo ico nakulekela ube no mweo, ni pa kuti umone amaka yandi, na pa kuti ishina lyandi lishibikwe mu calo+ conse.” 18 E ico kanshi, alabelela uluse uo alefwaya ukubelela uluse, lelo uo alefwaya ukuti atalame,+ alamuleka atalama.

19 Bamo kuti banjipusha abati: “Nomba cinshi afwaila ifilubo muli ifwe? Pantu nani engakaanya ico umwine afwaya?” 20 We muntu we, bushe niwe nani uwa kuti ulelengulula Lesa?+ Bushe icabumbwa kuti caeba uwacibumbile aciti: “Cinshi ico wamumbiile ifi?”+ 21 Bushe tamwaishiba ukuti nakabumba alikwata amaka pe bumba?+ Kwi loba limo line kuti abumbako icipe cimo ica mucinshi, abumbako na cimbi icishili ca mucinshi. 22 Nomba inga ca kuti Lesa alishipikishe kabili alitekenye nga nshi pa kuti aleke fye ifipe fya bukali ifyapangilwa ubonaushi, nangu ca kuti alafwaya ukulanga ubukali bwakwe no kusokolola amaka yakwe? 23 Kabili inga ca kuti acitile ifi pa kuti asokolole ifyo ubukata bwakwe bwacindama pa fipe fya luse,+ ifyo apekanishishe libela pa kuti aficindamike, 24 e kutila ifwe, fwebo aitile, te pa baYuda beka fye lelo na pa bena fyalo+ bene? 25 Caba fye nga filya fine alandile na mwi buuku lya kwa Hosea, atile: “Abashali abantu bandi+ nkabeta ati ‘abantu bandi,’ no mwanakashi uo nshatemenwe, nkamwita ati ‘uwatemwikwa’;+ 26 kabili ku cifulo uko aba bantu baebelwe ukuti, ‘Tamuli bantu bandi,’ e ko bakebwa ukuti, ‘abana ba kwa Lesa wa mweo.’”+

27 Na kuba Esaya abilikishe pali Israele ati: “Nangu abana ba kwa Israele bengafula ngo mucanga wa kuli bemba, banono fye* e bakapusuka.+ 28 Pantu Yehova* akalubulwisha aba pano isonde, kabili akangufyanya ukucita ifyo akabapingula.”+ 29 Kabili nga filya fine Esaya asobele ati: “Yehova* wa mabumba nga tatushilileko abana,* nga twaba fye nga Sodomu, kabili nga twaba fye nga Gomora.”+

30 E ico cinshi twingalanda? Tuletila abena fyalo nangu tabaile balefwaya ubulungami, basukile basanga ubulungami,+ ubulungami ubufuma mu kutetekela;+ 31 lelo nangu ca kuti Israele ena alile alefwaya ili ifunde lya bulungami, tafikilepo ukulakonka ifyo ili ifunde lilanda. 32 Cinshi calengele? Ni co tabali ne citetekelo ilyo balekonka ili ifunde, lelo balelikonka mu milimo. Bali-ipunwine ku “libwe lya kuipununako”;+ 33 nga filya Amalembo yalanda ayati: “Moneni! Ndebika mu Sione ilibwe+ lya kuipununako kabili icilibwe ca kupunwisha, lelo uulitetekela takomfwe insoni.”+

10 Bamunyinane, cine cine ico umutima wandi ufwaisha kabili ico mpaapaatilako abena Israele kuli Lesa, ca kuti bakapusuke.+ 2 Pantu kuti nabalandilako ukuti balicincila mu kubombela Lesa;+ lelo te pa mulandu wa kwishiba bwino icine. 3 Pantu apo tabaishibe ubulungami bwa kwa Lesa,+ lelo bafwaya ukuilungamika abene,+ tabanakiile ubulungami bwa kwa Lesa.+ 4 Pantu Kristu e mpela ya Mafunde,+ pa kuti onse uwatetekela abe uwalungama.+

5 Pantu Mose alilembele pa fyo Amafunde yalenga umuntu aba uwalungama. Atile: “Onse uwa kulacita ifi akaba no mweo.”+ 6 Lelo icebo ca kwa Lesa cilanda pa fyo icitetekelo cilenga umuntu aba uwalungama aciti: “Witila mu mutima+ obe, ‘Nani akaya ku muulu?’+ pa kuti akekishe Kristu, 7 nelyo ati, ‘Nani akengila mu cilindi icabula impela?’+ pa kuti akafumye Kristu ku bafwa.” 8 Nomba finshi Ilembo lilanda? “Litila ici Icebo cili fye mupepi na imwe, cili mu tunwa twenu na mu mitima+ yenu”; ici, e “cebo” ca kutetekela, ico tulebila. 9 Pantu ukapusuka nga wailandila pa cintubwingi ku kanwa kobe auti, Yesu e Shikulu,+ kabili watetekela mu mutima obe ukuti Lesa alimubuushishe ku bafwa. 10 Pantu mu mutima e mo umuntu atetekela, aba no walungama, lelo ku kanwa e ko ailandila umwine,+ apusuka no kupusuka.

11 Pantu Ilembo litila: “Onse uumutetekela+ takomfwe insoni.” 12 Pantu tapaba ubupusano pa muYuda no muGriki,+ pantu bonse babili bakwata fye Shikulu umo, uwafwilisha bonse abalilila kuli ena. 13 Pantu “onse uulilila kuli Yehova* no kulumbula ishina lyakwe akapusuka.”+ 14 Lelo bakalilila shani ku o bashatetekela? Inga bakatetekela shani uo bashaumfwa? Nomba bakomfwa shani apabula uwa kubila? 15 Kabili bushe bakabila shani nga tababatumine?+ Nga filya fine Amalembo yalanda ayati: “Ifyo yayemba amakasa ya babila imbila nsuma iya fisuma!”+

16 Lelo te bonse abapokelele imbila nsuma. Pantu Esaya atile: “Mwe Yehova,* nani uwatetekele ico baumfwile kuli ifwe?”*+ 17 Kanshi ifyo umuntu omfwa+ e filenga aba ne citetekelo. Kabili afyumfwa ilyo umuntu umo alanda pali Kristu. 18 Nomba ndeipusha nati, Bushe kwena tabaumfwile? Balyumfwile, pantu Amalembo yatila, “iciunda cabo cilafika mwi sonde lyonse, kabili amashiwi+ yabo yalafika ku mpela she sonde.” 19 Nomba ndeipusha nati, bushe kwena Israele alifililwe ukwishiba?+ Ica kubalilapo Mose atile: “Nkalenga mukalefimbila abantu abashaba uluko; nkalenga mukakalipe nga nshi pa mulandu wa luko lwa bantu abawelewele.”+ 20 Lelo Esaya alishipa kabili atila: “Abashalemfwaya balinsangile;+ abashalenjipushapo balishilenjishiba.”+ 21 Lelo pali Israele atila: “Akasuba konse nafungulwila amaboko yandi ku bantu abashumfwa kabili abatalama.”+

11 E ico ndeipusha nati, Bushe Lesa alikeene abantu bakwe?+ Awe iyo! Pantu na ine wine ndi mwina Israele, natuntuka muli* Abrahamu, ndi wa mu mukowa wa kwa Benjamini. 2 Lesa takeene abantu bakwe abo aisalile pa kubala.+ Bushe tamwaishiba ifyo Ilembo lilanda pali Eliya ilyo aleilishanya kuli Lesa pa mulandu wa bena Israele? 3 Atile: “Mwe Yehova,* balipaya bakasesema benu, balyonaula ifiipailo fyenu, kabili nine fye nashalapo. Nomba balefwaya ukuti na ine banjipaye.”*+ 4 Lelo bushe Lesa amwaswike shani? Lesa atile, “Ncili ninkwata abantu 7,000, abashafukaminapo Baali.”+ 5 Ifi fine e fyo caba na pali ino nshita, kwaliba abashalapo+ abo Lesa asala pa mulandu wa cikuuku icaibela. 6 Nomba nga ni pa mulandu wa cikuuku icaibela,+ ninshi nomba te pa mulandu ne milimo twabomba;+ pantu nga te ifyo, icikuuku icaibela te kuti cibe na kabili cikuuku icaibela.

7 Nomba finshi twingalanda? Ico Israele afwaya tacisangile. Abacisangile bantu abo Lesa asalile.+ Bambi bena Lesa alekele imitima yabo yatalama,+ 8 nga filya fine Amalembo yalanda ayati: “Lesa abapeele umupashi wa tulo utukalamba,+ amenso yabo tayamona na matwi yabo tayomfwa, ukufika fye na kuli buno bushiku.”+ 9 Davidi na o atile: “Lekeni itebulo lyabo libe ulukose kuli bena, iciteyo ica kuipununako kabili ica kubakanda. 10 Lekeni amenso yabo yabe na kafifi pa kuti baleke ukumona, kabili lekeni babe abakongama+ inshita yonse.”

11 E ico ndeipusha nati, Bushe ilyo abaYuda bawile, baliwililile capwa no kupwa? Awe iyo! Lelo ifyo balufyenye fyalilengele abena fyalo bamwenamo ipusukilo, kabili ici calengele abaYuda baba na kalumwa.+ 12 Nomba nga ca kuti ifyo abaYuda balufyenye fyalilengele abena fyalo bacindamikwa, kabili nga ca kuti ifi bacepa fyalilenga abena fyalo bacindamikwa, ninshi ilyo abaYuda bonse bakabwelela kuli Lesa, abena fyalo+ bakacilapo ukucindamikwa!

13 Nomba nalalanda kuli imwe mwe bena fyalo. Apo ndi mutumwa ku bena fyalo,+ nalicindika* umulimo+ wandi 14 pa kuti nalimo ningalenga abantu bandi baba na kalumwa, no kupusushapo bamo pali bena. 15 Pantu nga ca kuti ifi babapoosa+ fyalilenga aba muli ici calo babwelela kuli Lesa, ninshi kanshi cikaba shani ilyo Lesa akapokelela abaYuda na kabili? Bushe tacakabe kwati babuuka ku bafwa? 16 Nga ca kuti umufuba uo mwabalilapo ukutuula nge fisabo fya kubalilapo wa mushilo, ninshi umufuba onse wa mushilo, kabili nga ca kuti umushila wa mushilo, ninshi ne misambo nayo ya mushilo.

17 Nomba nga baputula imisambo imo ku muolife uo abantu balimba, e lyo babikako imwe mwe bena fyalo mwe baba nge misambo ya muolife wa mu mpanga, mwatendeka no kupokelela amapaalo ayafuma ku mushila wa muolife uo abantu balimba, 18 ninshi mwilasuula* imisambo inenu. Nga ca kuti ulesuula* imisambo inobe,+ uleibukisha ukuti te iwe utungilila umushila lelo umushila e ukutungilila. 19 Bamo pali imwe mukatila: “Ico bafumiisheko imisambo ni pa kuti banundeko.”+ 20 Ca cine! Iyo misambo bali-ifumisheko+ pantu tayakwete icitetekelo, lelo iwe balikulundileko pantu waliba ne citetekelo.+ Kanshi wilaba ne cilumba, lelo uleba na katiina. 21 Pantu Lesa nga aliputwileko imisambo iyine ya ici cimuti, ninshi na iwe wine kuti akuputulako. 22 E ico kuti wamona ukuti Lesa wa cikuuku+ kabili mukali. Abawile+ pa mulandu wa kuti tabali ne citetekelo alibalangile ubukali bwakwe, lelo iwe alakulanga icikuuku, kulila fye watwalilila ukwikalilila mu cikuuku cakwe; nga te ifyo, na iwe wine akakuputulako. 23 Kabili abaYuda nabo nga ba-aluka no kutetekela na kabili, bakabalundako+ na kabili ku muolife, pantu Lesa te kuti afilwe ukubalundako na kabili. 24 Pantu nga ca kuti imwe mwe bena fyalo mwebo baputwile ku muolife wa mu mpanga, balimulundile ku muolife wa kulimba fye, ninshi kuti ca-anguka imisambo iyo baputwile ku muolife wa kulimba fye ukuilunda na kabili ku muolife yaliko!

25 Pantu mwe bamunyinane, nshilefwaya imwe mwi-ishiba iyi nkaama ya kwa Lesa,+ pa kuti mwiba aba mano mu menso yenu mwe bene: Abena Israele bamo balitalamika imitima yabo mpaka impendwa yonse iya bena fyalo ikakumane. 26 Kabili ifi fine e fyo abena Israele+ bonse bakapusuka. Filya calembwa ati: “Kalubula* akafuma mu Sione+ kabili akafumya ifyabipa muli Yakobo. 27 Kabili ici e cipangano nkapangana nabo,+ ilyo nkasenda+ imembu shabo.” 28 Ca cine, abaYuda balwani ba mbila nsuma. Ici calilenga na imwe munonkelemo; lelo apo Lesa alibasala, alibatemwa pa mulandu wa fikolwe fyabo.+ 29 Pantu Lesa takomfwe ububi pa bupe ubo apeela umuntu kabili takomfwe ububi pa bantu abo aita. 30 Pantu nga filya fine imwe mushaleumfwila Lesa+ lelo balimubelela uluse+ pa mulandu na bucintomfwa+ bwa baYuda, 31 e fyo caba na kuli aba. Apo tabomfwila Lesa pali ino nshita, Lesa alimubelela uluse pa kuti nabo bene engababelela uluse nge fi fine amubelela uluse. 32 Pantu Lesa alileka bonse baba nga bafungwa pa mulandu wa bucintomfwa bwabo,+ e pa kuti engababelela uluse+ bonse.

33 Yangu amapaalo ubwingi ayafuma kuli Lesa! Ifyo akwatisha amano! Ne fintu ubwingi ifyo aishibisha! Takuli nangu umo uwingeluka ubupingushi bwakwe ne nshila shakwe! 34 Pantu “nani aishiba ifyo Yehova* atontonkanya nelyo nani uwingaba impanda mano+ yakwe?” 35 Nelyo, “nani uwapeelapo Lesa fimo, pa kuti Lesa na o akamubweseshe?”+ 36 Pantu ifintu fyonse fyafuma kuli ena, e walenga ukuti fibeko kabili e o fyabelako. Kuli ena kube ubukata umuyayaya. Ameni.

12 Mwe bamunyinane, apo Lesa alimulanga inkumbu shakwe, ndemupaapaata ukuti mutuule imibili+ yenu nge lambo ilituntulu, ilyasanguluka+ kabili ilyo Lesa engapokelela, pa kuti mulebomfya amaka yenu aya kupelulula+ ilyo mulemubombela. 2 Kabili lekeni ukupalana no bwikashi buno,* lelo mupilibuke no kwalula amatontonkanyo yenu,+ pa kuti mushininkishe mwe bene+ ico Lesa afwaya, icisuma, ico engapokelela kabili icapwililika.

3 Pantu apo Lesa alinanga icikuuku icaibela, nde-eba imwe bonse ukuti mwilaitunga ukucila pa fyo mwaba,+ lelo muletontonkanya ifilanga ukuti mwaliba na mano ayatuntulu, cila muntu aleipima ukulingana ne citetekelo+ ico Lesa amupeela. 4 Pantu filya umubili wesu waba ne filundwa+ ifingi lelo ifilundwa fyonse tafyakwata umulimo umo wine, 5 e fyo na ifwe twaba. Nangu ca kuti twaba abengi, tuli mubili umo muli Kristu, kabili umuntu onse cilundwa ca munankwe.+ 6 Kanshi apo twalikwata ifya bupe ifyapusanapusana ukulingana ne cikuuku icaibela ico Lesa atulanga,+ nampo nga ca bupe ca kusesema, natuseseme ukulingana ne citetekelo atupeela; 7 nelyo nga bupe bwa kubombela bambi, natubike amano kuli uyu wine mulimo. Nangu umuntu nga akwata ubupe bwa kusambilisha, nabike amano ku kusambilisha;+ 8 kabili nga bamupeele ubupe bwa kukoselesha,* nabike amano ku kukoselesha;*+ uupeela,* abe kapekape;+ uutungulula, alebombesha ukutungulula bwino;+ uubelela uluse, nalebelela abantu uluse ne nsansa.+

9 Mu kutemwa kwenu mwiba ubumbimunda.+ Mulepatisha icabipa;+ muleikatisha icisuma. 10 Muletemwa aba bwananyina kabili muletemwana nga nshi. Pa kucindikana nimwe mulebalilapo.+ 11 Mulebombesha, mwilaba abanang’ani.*+ Muleleka umupashi+ ulelenga muleba abacincila. Mulebombela Yehova.*+ 12 Lekeni isubilo lyenu lilelenga mulesekelela. Muleshipikisha ilyo mulecula.+ Muleba no mute wa kupepa.+ 13 Mulepeelako aba mushilo ifyo balekabila.+ Mutwalilile ukupokelela+ abeni. 14 Mulepaala abamucusha;+ mulebapaala, mwilabatiipwila+ iyo. 15 Mulesekelela pamo na balesekelela; mulelilila pamo na balelila. 16 Ifyo muletontonkanya pali mwe bene, e fyo muletontonkanya na pali bambi; mwilaba no mutima wa cilumba, lelo muleicefya.+ Mwilamona+ kwati muli ba mano ukucila abantu bambi.

17 Mwilabwesesha ububi pa bubi.+ Mulecita ifyo abantu bonse balemona ukuti fisuma. 18 Mule-esha na maka yenu yonse ukuba aba mutende ku bantu bonse.+ 19 Mwe batemwikwa, mwilalandula, lelo shiileni ubukali+ bwa kwa Lesa incende; pantu calembwa ati: “Nine mfwile ukulandula; nine nkabakanda pa fyabipa ifyo bacita, e fyo Yehova*+ alanda.” 20 Lelo “umulwani obe nga ali ne nsala, umupeele ifya kulya; nga ali ne cilaka, umupeele ifya kuti anwe; pantu nga wacita ifi ninshi watuulika amalasha ayaleaka umulilo pa mutwe+ wakwe.”* 21 Wileka ububi bukucimfye, lelo ulecita ifisuma+ pa kucimfya ububi.

13 Umuntu onse alenakila ubuteko,+ pantu amaka ya kuteka yafuma kuli Lesa;+ bakateka bonse ababapo ni Lesa+ e wabasuminisha ukuti babepo. 2 E ico uushikonka ifyo ubuteko bulanda ninshi takonka ifyo Lesa apekanya; abashikonka ifyo ubuteko bulanda bakailetela ubupingushi. 3 Pantu abacita ifisuma tabatiina bakateka, lelo abacita ifyabipa+ balabatiina. E ico bushe ulefwaya wilatiina ubuteko? Ninshi ulecita ifisuma,+ kabili ubuteko bukakutasha; 4 pantu babomfi ba kwa Lesa aba kukucitila icisuma. Lelo nga ulacita ifyabipa, ufwile uletiina, pantu ubuteko tabwimya ulupanga apabula umulandu. Babomfi ba kwa Lesa abalandula no kukanda uulecita ifyabipa.

5 E ico mufwile ukulanakila ubuteko, te pa mulandu fye wa kuti bwalikalipa, lelo na pa mulandu na kampingu+ yenu. 6 E mulandu wine musonkelela ne misonko; pantu bakateka babomfi ba kwa Lesa ababombela icintubwingi imilimo iyo bafwile ukubomba. 7 Mulepeela abantu bonse ifyo mufwile ukubapeela, uulefwaya umusonko, mulemupeela umusonko;+ uulefwaya umutuulo, mulemupeela umutuulo; uulefwaya ukumumfwila,* mulemumfwila,*+ uulefwaya umucinshi; mulemucindika+ ifyo fine.

8 Mwilaba ne nkongole nangu shimo ku muntu, kano fye inkongole sha kutemwana;+ pantu uwatemwa umunankwe ninshi nakonka bwino Amafunde.+ 9 Pantu Amafunde ayatila, “Wilacita bucende,+ wilaipaya,+ wilaiba,+ wilakumbwa+ ifya bene,” na mafunde fye yambi ayabako, yaingila mu mashiwi ya kuti, “Uletemwa umunobe nge fyo waitemwa we mwine.”+ 10 Umuntu uwatemwa umunankwe te kuti acite icabipa kuli ena;+ pantu umuntu uwaba no kutemwa alakonka bwino bwino Amafunde.+

11 Apo namwishiba ukuti ino ni nshita ya kushibuuka mu tulo,+ mulecita ifi nalanda. Ilyo twatendeke fye ukutetekela, ipusukilo lyesu lyali ukutali, lelo nomba nalipalama. 12 Ubushiku buli mu kuca; akasuba nakapalama. E ico natuleke ukucita ifya mu mfifi,+ e lyo tufwale ifyanso fya kulwilako ifya lubuuto.+ 13 Natube ne myendele iisuma+ nga bantu ababa mu lubuuto. Twilaba ne ciwowo, twilakolwa, twilacita ubulalelale nangu ukulacita ifya nsoni,*+ kabili twilaba ne fikansa na kalumwa.+ 14 Lelo natulepashanya sana* Shikulu Yesu Kristu,+ kabili twilapangila kabela ukucita ifilefwaya imitima+ yesu.

14 Mulepokelela uwanaka mu citetekelo,+ kabili mwilamupingula pa mulandu fye wa kuti namupusana ifyo mumona ifintu.* 2 Umuntu umo icitetekelo cakwe kuti camusuminisha ukulya ifintu fyonse, lelo uo icitetekelo cakwe canaka alya fye umusalu. 3 Uulya ifintu fyonse esuula uushilya, kabili uushilya esuula uulya+ ifintu fyonse, pantu Lesa alimupokelela. 4 Niwe nani uwa kuti ulepingula umubomfi wa mu ng’anda ya muntu umbi?+ Shikulu wakwe e wakwata insambu sha kumupingula nampo nga nalufyanya nelyo iyo.+ Pantu Yehova* nga amwafwa kuti atunguluka.*

5 Umuntu umo amona ubushiku bumo ukuti bwalicindama ukucila bumbi;+ umbi na o amona ubushiku bumo ukuti bwaba fye nge nshiku shimbi;+ cila muntu ashininkishe ukuti ifyo aishiba fya cine. 6 Uucindika ubushiku bumo ukucila inshiku shimbi, acita ifi pa kuti acindike Yehova.* Kabili uulya ifya kulya fyonse, acita ifi pa kuti acindike Yehova,* pantu alatootela Lesa;+ no uushilya na o acita ifi pa kuti acindike Yehova,* lelo na o wine alatootela Lesa.+ 7 Na kuba, tapaba nangu umo pali ifwe uuikalila fye umwine,+ kabili tapaba nangu umo pali ifwe uuifwila fye umwine. 8 Pantu nga tuli no mweo, tuba aba mweo pa kuti tucindike Yehova,*+ kabili nga twafwa, tufwa pa kuti tucindike Yehova.* E ico nga tuli aba mweo nelyo nga twafwa, tuli ba kwa Yehova.*+ 9 Pantu ici e co Kristu afwilile no kuba no mweo na kabili, pa kuti engaba Shikulu wa bonse abafwa na ba mweo.+

10 Nomba iwe cinshi upingwila munonko?+ Nelyo cinshi usuulila munonko? Pantu ifwe bonse tukeminina pa ntanshi ya cipuna ca bupingushi ica kwa Lesa.+ 11 Pantu calembwa ati: “Yehova* atila, ‘na pali ne mwine,+ ikufi lyonse likamfukamina, no lulimi lonse lukasumina ukuti lwalishiba Lesa.’”+ 12 E ico kanshi ifwe bonse umo umo tukalubulula kuli Lesa.+

13 E ico natuleke ukulapingulana,+ lelo tule-esha na maka pa kuti twilacita icingapunwisha munyinefwe,+ nelyo icingalenga alufyanya. 14 Nalishiba kabili nalishininkisha ukupitila muli Shikulu Yesu ukuti takwaba icakowela icine;+ kano fye umuntu atila calikowela, kuli ena ninshi calikowela. 15 Pantu nga ca kuti ifya kulya ifyo ulelya filelenga munonko aleba no bulanda, ninshi taulemulanga ukutemwa.+ Wileka ifya kulya fyobe fyonaule umuntu uo Kristu afwilile.+ 16 E ico mwilenga abantu balelanda ifyabipa pa fisuma ifyo mucita. 17 Pantu ifyo tulya ne fyo tunwa,+ te fyacindama pa kwingila mu Bufumu bwa kwa Lesa, lelo ifyacindama kuba uwalungama, ukuba no mutende no kulasekelela mu mupashi wa mushilo. 18 Pantu uucita ifi ilyo alebombela Kristu, Lesa alamupokelela kabili abantu balamutasha.

19 E ico kanshi, natule-esha apapelele amaka yesu ukucita ifingaleta umutende+ kabili ifingalenga tulekoshanya.+ 20 Lekeni ukonaula umulimo wa kwa Lesa pa mulandu fye wa fya kulya.+ Ca cine ukuti fyonse fyalisanguluka, lelo calibipa ukupunwisha+ umuntu pa mulandu wa fya kulya. 21 Kanshi cawamapo ukukanalya inama nelyo ukukananwa umwangashi nelyo ukukanacita icili conse icingapunwisha+ munonko. 22 Ifyo watetekela ukuti fyaliba fye bwino pa fintu fya musango uyu, fyobe na Lesa. Wa nsansa umuntu uushi-ipeela imilandu nga acita ifyo eshibe ukuti fintu fyalungama. 23 Lelo nga aletwishika, e lyo alya, ninshi napingulwa kale, pantu te citetekelo cilengele alye. Na kuba conse ico umuntu acita ukwabula icitetekelo lubembu.

15 Nomba ifwe fwe bakosa tufwile ukwafwa abanaka mu fyo banakamo,+ kabili twilacita fye ifya kutuwamina.+ 2 Ifwe umo umo natulecitila abanensu ifingabawamina kabili ifingabakuula.+ 3 Pantu nangu fye ni Kristu talecita fye ifyalemuwamina,+ nga filya fine amalembo yalanda ayati: “Umuseebanya wa bantu abamuseebanya wishile pali ine.”+ 4 Pantu fyonse ifyo balembele kale bafilembele pa kuti tulesambililako,+ pa kuti ilyo tuleshipikisha+ na lintu Amalembo yaletusansamusha, twingaba ne subilo.+ 5 Nomba Lesa uulenga muleshipikisha kabili uumusansamusha engalenga mube no mutima umo wine uo na Kristu Yesu akwete, 6 e pa kuti bonse pamo mwikatane+ kabili mwi shiwi limo* mucindike Lesa, Wishi wa kwa Shikulwifwe Yesu Kristu.

7 E ico mulepokelelana,+ filya na Kristu amupokelele,+ pa kuti Lesa alecindikwa. 8 Pantu ndetila Kristu cine cine aishile mu kubombela abasembululwa+ pa mulandu wa cine ca kwa Lesa, pa kuti Lesa abalange ukuti ifyo Lesa alaile ifikolwe fyabo+ fya cine, 9 na pa kuti abena fyalo bacindike Lesa pa luse+ lwakwe. Filya calembwa ukuti: “E co nkamucindikila mu nko kabili ishina lyenu nkalimbila amalumbo.”+ 10 Na kabili atila: “Sangalaleni mwe nko, pamo na bantu bakwe.”+ 11 Ilembo na limbi litila: “Lumbanyeni Yehova,* mwe nko shonse, kabili lekeni abantu bonse bamulumbanye.”+ 12 Kabili Esaya na o alanda ati: “Kukesaba umushila wa kwa Yese,+ kabili ukema pa kuti uleteka inko;+ e o inko shikatetekela.”+ 13 Shi Lesa uupeela isubilo alenge mube ne nsansa nga nshi kabili mube no mutende pa mulandu wa citetekelo cenu, e pa kuti amaka ya mupashi wa mushilo+ yalenge isubilo lyenu lilekoselako fye.

14 Bamunyinane, nalishiba ukuti muli basuma icine cine, kabili mwalishiba fyonse ifyo mufwile ukucita. Kanshi mulesambilishanya.* 15 Lelo nimulembela ukwabula ukumupita mu mbali pa fishinka fimo, pa kuti imucinkuleko na kabili, pa mulandu wa cikuuku icaibela ico Lesa ananga 16 pa kuti mbe umubomfi wa kwa Kristu Yesu uwa kubombela abena fyalo.+ Ndabomba umulimo wa mushilo uwa kubila imbila nsuma iya kwa Lesa,+ pa kuti Lesa apokelele aba abena fyalo ngo mutuulo uo umupashi wa mushilo wasangulula.

17 E ico ndasekelela pa kuba umusambi wa kwa Kristu Yesu na pa kubomba umulimo wa kwa Lesa. 18 Pantu nshalande nangu cimo pa fyo nacita ne mwine, nalalanda fye pa fyo Kristu acita ukupitila muli ine pa kuti abena fyalo balemumfwila, pa mulandu ne fyo nabeba e lyo ne fyo ncita. 19 Balamumfwila pa mulandu ne fishibilo ne fipesha amano+ ifyo umupashi wa mushilo wacita. Ici calilenga ndebila sana imbila nsuma pali Kristu+ ukufuma ku Yerusalemu ukuyafika fye na ku Iluriki. 20 Kanshi ico mfwaisha ca kuti, nibila imbila nsuma uko abantu baishiba kale Kristu, pa kuti nikuula pa mufula wa muntu umbi; 21 nga filya fine amalembo yalanda ayati: “Abantu abo bashatala ebapo pali ena bakamona, na bashatala abomfwapo bakamwishiba.”+

22 Ici cine e calengele no kuti pa miku iingi mfilwe ukwisa kuli imwe, nangu ca kuti nalefwaisha ukwisa. 23 Nomba pali ino nshita kuli ino ncende takwaba icifulo ico nshabombelamo, kabili pa myaka iingi ndafwaisha ukwisa kuli imwe. 24 E ico ndesubila ukwisamumona ilyo nkalaya ku Speni, kabili ndesubila ukuti mukanshindika pa numa ya kwikalako na imwe no kusekelela na imwe pa kashita akanono. 25 Lelo pali ino nshita ndi pa kuya ku Yerusalemu mu kutwalila aba mushilo+ ifya kubafwilisha. 26 Pantu abena Makedonia na bena Akaya bali-itemenwe ukusangwilako fimo ifyo bakwata ifya kupeela abapiina pa ba mushilo ababa mu Yerusalemu.+ 27 Ca cine, bali-itemenwe ukucita ifi, na lyo line e fyo fye balingile ukucita, pantu abena fyalo nga balibapeelako ifisuma ifyafuma kuli Lesa, ninshi nabo balingile ukula-afwilishako abaYuda ukubomfya ifyo bakwata.+ 28 E ico nga napwisha uyu mulimo wa kubatwalila umusangulo,* nkesapita kuli imwe pa kuya ku Speni. 29 Kabili ninjishiba ukuti ilyo nkesa kuli imwe, nkamuletela ipaalo ilikalamba ukufuma kuli Kristu.

30 Nomba ndemukoselesha bamunyinane, muli Shikulwifwe Yesu Kristu na pa mulandu wa kutemwa ukufuma ku mupashi, ukuti mulempepelako sana kuli Lesa nge fyo na ine njipepelako,+ 31 pa kuti ningapusuka+ ku bashatetekela Lesa aba mu Yudea na pa kuti nkafishe bwino bwino ifintu ifyo ndetwalila aba mushilo+ ku Yerusalemu, 32 pa kuti Lesa nga atemwa, nkese kuli imwe ninshi ndesekelela kabili nkasansamukile pamo na imwe. 33 Shi Lesa uupeela umutende abe na imwe bonse.+ Ameni.

16 Ndemukoselesha ukuti mupokelele Febi nkashi yesu, uubombela mu cilonganino ca mu Kenkerea.+ 2 Mumupokelele muli Shikulu nga filya fine mupokelela aba mushilo, kabili mumwafwe muli fyonse ifyo engakabila,+ pantu na o aleafwa* abengi, ukubikako fye na ine wine.

3 Mposesheniko Priska na Akula+ ababomfi banandi mu mulimo wa kwa Kristu Yesu, 4 abaibikile mu kapoosa mweo* pa mulandu wandi.*+ Te ine neka ndebatootela lelo ne filonganino fyonse ifya bena fyalo filebatootela. 5 Posheni na bonse abalonganina mu ng’anda yabo.+ Posheni Epainete uo natemwa, uwabalilepo* ukwisa kuli Kristu pa ba mu Asia. 6 Posheni Maria, uwamubombela apakalamba nga nshi. 7 Posheni Androniki na Yunia balupwa lwandi+ kabili abafungwa banandi, abaume abo abatumwa baishiba sana kabili abakokola muli Kristu ukuncila.

8 Mposesheniko Ampiliati uwatemwikwa wandi muli Shikulu. 9 Posheni Urbani umubomfi munensu mu mulimo wa kwa Kristu, na Staku uo natemwa. 10 Posheni Apele, umubomfi wine wine uwa kwa Kristu. Posheni aba mu ng’anda ya kwa Aristobuli. 11 Posheni Herodio lupwa wandi. Posheni aba mu ng’anda ya kwa Narkisi abakonka Shikulu. 12 Posheni Trufaena na Trufosa, abanakashi ababombesha mu mulimo wa kwa Shikulu. Posheni Persida uo twatemwa, pantu uyu mwanakashi alabombesha mu mulimo wa kwa Shikulu. 13 Posheni Rufu umubomfi wa kwa Shikulu uwasalwa, muposhe na banyina kabili bamayo. 14 Posheni Asunkriti, Flegone, Herme, Patroba, Herma, na ba bwananyina abali pamo nabo. 15 Posheni Filologe na Yulia, Nere na nkashi yakwe, na Olumpa, e lyo na ba mushilo bonse abali pamo nabo. 16 Poshanyeni kabili tomonaneni.* Aba mu filonganino fyonse ifya kwa Kristu bamuposha.

17 Nomba ndemukoselesha bamunyinane, ukuti mulecenjela na baleta amalekano kabili abasambilisha ifyapusana ne fyo mwasambilila, mulebataluka.+ 18 Pantu ababa ifi te Shikulwifwe Kristu babombela, lelo babombela ifya kuisekesha* abene; kabili ku milandile yabo na ku fyo balumbilisha balongola imitima ya bashaishiba ifingi. 19 Abantu bonse balimona ifyo mwaba ne cumfwila. E ico ndesekelela pali imwe. Nomba ndefwaya mube na mano ya kucita ifisuma, lelo mube aba kaele ku fyabipa.+ 20 Pantu nomba line Lesa uupeela umutende akashonawila Satana+ mwi samba lya makasa yenu. Icikuuku icaibela ica kwa Shikulwifwe Yesu cibe na imwe bonse.

21 Timote umubomfi munandi amuposha, kabili ba lupwa lwandi+ Luki, Yasone, na Sosipatere nabo bamuposha.

22 Ine, ne Terti, ne walemba ino kalata, namuposha muli Shikulu.

23 Gai,+ uumpokelele mu mwakwe kabili uo icilonganino conse cilonganina mu mwakwe, amuposha. Erasti uusunga icipao ca musumba* amuposha, na Kwartu munyina na o amuposha. 24* ——

25 Nomba Lesa kuti amukosha ukupitila mu mbila nsuma iyo mbila e lyo ne mbila nsuma pali Yesu Kristu. Iyi imbila iyali ni nkaama ya kwa Lesa+ iyafishilwe pa nshita iitali yalisokololwa. 26 Lelo balitusokolwela kabili twali-ishiba ukupitila mu Malembo ya bakasesema. Lesa wesu uwa muyayaya alitupeela ifunde lya kuti abena fyalo bonse bafwile ukuishiba pa kuti babe ne cumfwila kabili bamutetekele; 27 kuli Lesa uwa mano eka,+ kube ubukata ukupitila muli Yesu Kristu umuyayaya. Ameni.