KALATA YA BUBILI KU BENA KORINTI

1 Ine ne Paulo uwaishileba umutumwa wa kwa Kristu Yesu pa mulandu wa kufwaya kwa kwa Lesa, pamo na Timote+ munyinefwe, twalembela imwe mwe baba mu cilonganino ca kwa Lesa ica mu Korinti, e lyo na ba mushilo bonse ababa mu Akaya+ monse tuleti:

2 Icikuuku icaibela no mutende ififuma kuli Lesa Shifwe na kuli Shikulu Yesu Kristu fibe na imwe.

3 Acindikwe Lesa kabili Wishi wa kwa Shikulwifwe Yesu Kristu,+ Shifwe wa luse+ kabili Lesa wa cisansamushi conse,+ 4 uutusansamusha* mu macushi* yesu yonse,+ pa kuti tukwate amaka ya kusansamusha abali na macushi*+ ayalekanalekana ku cisansamushi ico Lesa atusansamushishako.+ 5 Pantu filya fine tucula sana pa mulandu wa kuba abasambi ba kwa Kristu,+ e fyo tusansamushiwa sana pa mulandu wa kwa Kristu. 6 Lelo nga twakwata amacushi,* ni pa mulandu wa kuti imwe musansamushiwe na pa kuti mupusuke; kabili nga twasansamushiwa, ni pa mulandu wa kuti imwe musansamushiwe, pa kuti icisansamushi cilenge muleshipikisha amacushi ayo na ifwe tuculako. 7 Kabili twalimucetekela sana, pantu twalishiba ukuti ifi mucula nga ifwe e fyo no kusansamuka mukasansamuka.+

8 Pantu tatulefwaya imwe, mwe bamunyinefwe mwi-ishiba ubucushi ubo twakwete mu citungu ca Asia.+ Bwali bucushi ubukalamba ica kuti twalifililwe ukubushipikisha ku maka yesu, kabili tatwaishibe nga twali no kupusuka nelyo iyo.+ 9 Na kuba fwe bene twalemona fye kwati twalafwa. Nomba ici cacitike pa kuti twi-icetekela fwe bene, lelo tucetekele Lesa+ uubuusha abafwa. 10 Apo alitupuswishe ku mafya ayali no kulenga tufwe, tatuletwishika, akulatupususha; kabili twalisubila ukuti akatwalilila ukutupususha.+ 11 Na imwe bene kuti mwatwafwa nga muletupaapaatilako,+ pa kuti abantu abengi bengalatootela Lesa pa bupe ubo atupeela pa mulandu wa mapepo ya bantu abengi.+

12 Pantu ico tuitakishishapo, kabili ico kampingu yesu ishininkisha ca kuti, twali aba mushilo kabili abafumacumi ku ba muli ici calo, kabili twalicililepo ukuba ifi kuli imwe ukulingana ne fyo Lesa atusambilishe. Ne calengele te mano ya bantunse,+ lelo cikuuku icaibela ica kwa Lesa. 13 Pantu tatulemulembela pa fintu fimbi, lelo tulemulembela pa fintu ifyo mwingabelenga* kabili ifyo mwingomfwa. Na kabili ndesubila ukuti mukatwalilila ukumfwikisha* ifi fintu, 14 nga filya fine mwaumfwako panono ukuti nifwe mufwile ukuitakishishapo, nga fintu na ifwe tukalaitakishisha pali imwe mu bushiku bwa kwa Shikulwifwe Yesu.

15 E ico apo nalishininkisha ifi, nalepanga ukubalilapo ukwisa kuli imwe, pa kuti mwingasekelela na kabili; 16 pantu nalepanga ukwisamupempula pa kuya ku Makedonia no kwisamupempula na kabili pa kufuma ku Makedonia, e lyo mukanshindikeko panono pa kuya ku Yudea.+ 17 Ilyo nalandile ifi nalepanga, bushe yali fye malandakanwa? Nelyo bushe ndapanga ifintu ukulingana ne fyo abantunse bapanga, pa kuti ndelanda nati “ee,” e lyo kabili ndetila “awe”? 18 Lelo mulingile ukucetekela Lesa, ukuti ifyo tumweba fya cine, tatulanda ati “ee” e lyo pa numa twaisalanda ati “awe.” 19 Pantu Umwana wa kwa Lesa, Kristu Yesu, uo ine na Silbani* na Timote,+ twabililepo kuli imwe taishileba “ee” e lyo pa numa aisaba “awe,” lelo lyonse aba “ee.” 20 Pantu amalayo ya kwa Lesa nangu yafula shani, yaishileba “ee” ukupitila muli Yesu.+ E ico muli ena e mo tulandila no kuti “Ameni” kuli Lesa+ pa kuti tucindike Lesa. 21 Lelo uutila ifwe na imwe tuli ba kwa Kristu ni Lesa umwine kabili e watusuba.+ 22 Alitufwatikapo ne cifwati+ kabili alitupeela icishibilo ca fintu ifikesa.* Ici cifwati ne cishibilo, mupashi+ uwaba mu mitima yesu.

23 Nomba ndetila Lesa e kambone wandi uwa kunshinina ukuti ico nshaishila ku Korinti ni co nshifwaya kumukalifya imitima. 24 Te kutila nifwe bakapitao ba citetekelo cenu,+ lelo tuli babomfi banenu aba kulenga muleba ne nsansa, pantu icitetekelo cenu e cilenga muleba abashangila.

2 Pantu nimpingulapo ukuti ilyo nkesa kuli imwe na kabili, nikalenga mukabe no bulanda. 2 Pantu nga nalenga imwe mwe balenga ndesekelela mwaba no bulanda, ninshi ni bani bakalenga nkalesekelela? Bushe te imwe bene mwebo nalenga mube no bulanda? 3 Ico namulembeele ilya kalata, ni pa kuti ilyo nkesa nikaba no bulanda pali mwebo mfwile ukusekelelapo, pantu nincetekela ukuti ifilenga ndesekelela e filenga na imwe mulesekelela. 4 Pantu nali no bulanda nga nshi kabili umutima walikalipe sana, nalelila ne filamba ilyo nalemulembela ilya kalata. Nshamulembeele pa kuti nenge mube no bulanda,+ lelo nalefwaya fye mwishibe ukuti nalimutemwa icine cine.

5 Nomba uucita ifyabipa talenga fye ine naba no bulanda,+ lelo alalenga na imwe bonse mwaba no bulanda. Nomba kwena nshilefwaya ukukosha umulandu. 6 Ifi fine mwe bengi mukalipile uwabembwike nafilinga; 7 kanshi imwe nomba, mulingile fye ukumubelela uluse no kumusansamusha,+ pantu nalimo kuti afwa ku cikonko.+ 8 E ico ndemukoselesha ukuti mumulange ukuti mwalimutemwa.+ 9 Ici cine e calengele no kuti imulembele kalata: pa kuti nshininkishe nga muli ba cumfwila mu fintu fyonse. 10 Nga ca kuti mwabelela umuntu uluse, ninshi na ine nimubelela uluse. Na kuba icilubo conse ico nabelelapo umuntu uluse (nga ca kutila nalibelelapo umuntu uluse), ninshi ni pa mulandu wenu nacitila ifi pa cinso ca kwa Kristu, 11 pa kuti Satana e tucimfya,+ pantu twalishiba amapange yakwe.+

12 Nomba ilyo nafikile mu Troa+ pa kuti mbile imbila nsuma pali Kristu, nalikwete ishuko lya kubomba umulimo wa kwa Shikulu, 13 lelo icansakamike fye ca kuti munyinane Tito+ nshamusangile. E ico nalishalikepo abasambi kulya naya na ku Makedonia.+

14 Lelo ndetootela Lesa uututungulula pamo na Kristu mu kusefya kwa kucimfya, kabili uulenga icena icisuma ica kumwishiba cishibikwe mu ncende shonse ukupitila muli ifwe! 15 Pantu fwe babila pali Kristu, Lesa atumona kwati cena icanunkila bwino icifika ku balelola kwi pusukilo na balelola ku bonaushi; 16 abaleonaika ici cena cibatwala ku mfwa,+ e lyo abalepusuka ici cena cibatwala ku mweo. Kabili nani uwafikapo bwino bwino ukubomba uyu mulimo? 17 Nifwe, pantu tatwaba nga bantu abengi abaya baleshitisha icebo ca kwa Lesa.+ Lelo tuli bafumacumi, e kutila abo Lesa atuma, kabili ifwe pamo na Kristu tulandila pa cinso ca kwa Lesa.

3 Bushe twalatendeka ukuitasha fwe bene na kabili? Nelyo bushe tulekabila ukumuletela amakalata ya kututasha? Nangu bushe tulekabila mutulembele amakalata ya kututasha filya bamo bakabila ukubalembela amakalata ya kubatasha? 2 Imwe bene nimwe kalata yesu,+ iyalembwa mu mitima yesu iyo na bantu bonse baishiba kabili iyo babelenga. 3 Pantu mwalimoneka ukuti nimwe kalata ya kwa Kristu iyo fwe babomfi twalemba.+ Yalembelwa ku mupashi wa kwa Lesa wa mweo te kuli inki, tayalembwa pa mabwe ayapaapaatala,+ lelo yalembwa pa mitima.+

4 Muli Kristu e mo twingalandila ukuti twalicetekela Lesa. 5 Te kuti tuitakishe ukuti icalenga ukuti tufikepo bwino bwino kubombesha kwesu, lelo uwalenga tufikepo bwino bwino ni Lesa,+ 6 pantu cine cine e walenga ukuti tufikepo bwino bwino pa kuti tube ababomfi ba cipangano cipya,+ te babomfi abakonka Amafunde ayalembwa,+ lelo ababomfi abatungululwa no mupashi; pantu Amafunde ayalembwa yapingula umuntu ukuti afwe,+ lelo umupashi ulenga umuntu aba no mweo.+

7 Nomba nga ca kuti Amafunde ayapingula umuntu ukuti afwe, kabili ayalembelwe pa mabwe+ yaishile no bukata, ica kuti abana ba kwa Israele balifililwe ukulolekesha icinso ca kwa Mose pa mulandu wa bukata ubwalengele icinso cakwe cilebengeshima,+ nangu ca kuti ubu bukata bwali no kufumishiwapo, 8 bushe ifyo umupashi ubomba+ tafifwile ukucilapo ukuba no bukata?+ 9 Pantu nga ca kuti Amafunde ayapingula ukuti umuntu akandwe+ yali no bukata+ bwa musango uyo, ninshi imilimo iilenga abantu baba abalungama+ yalicilapo ukuba no bukata! 10 Na kuba, nangu fye ni cilya icali no bukata balicipoka ubukata, pantu kwalisa icakwata ubukata ukucicila.+ 11 Pantu nga ca kuti ico bali no kufumyapo caishile no bukata,+ ninshi ici icikekalilila cena calicilapo ukuba no bukata!+

12 Apo twalikwata isubilo lya musango uyu,+ tatutiina ukulanda ifyo tufwile ukulanda, 13 kabili tatucita nge fyalecita Mose uwaleifimba icifimbo ku menso,+ pa kuti abana ba kwa Israele belolekesha pa cali no kufumishiwapo. 14 Nomba tabailwike.+ Pantu ukushinta na lelo balatwalilila ukuba na cilya cifimbo ilyo balebelenga icipangano ca kale,+ pantu cifumishiwapo fye ukupitila muli Kristu.+ 15 Na kuba, ukufika na lelo icifimbo calitwalilila ukufimba imitima yabo.+ E ico tabomfwa nga babelenga amabuuku ya kwa Mose.+ 16 Lelo umuntu nga ayalukila kuli Yehova,* icifimbo cilafumapo.+ 17 Nomba Yehova* Mupashi,+ kabili ukuli umupashi wa kwa Yehova,* kulaba ubuntungwa.+ 18 Kabili ifwe bonse fwebo bafumyapo icifimbo pa menso, tulalanga ubukata bwa kwa Yehova* nga filya icilola* cicita. Tulaaluka pa kuti tube nga Lesa. Kabili tulaya tulecilapo ukulanga ubukata bwa kwa Lesa, nga filya fine Yehova* Umupashi afwaya.*+

4 E ico apo balitupeela uyu mulimo ukulingana no luse ulo Lesa atulangile, tatunenuka. 2 Nomba twalikaana ifya nkaama fyonse ifilenga insoni, tatwakwata ubucenjeshi, kabili tatukowesha icebo ca kwa Lesa;+ lelo ilyo tusambilisha abantu icine pa menso ya kwa Lesa,+ tulenga baletupashanya.* 3 Na kuba nga ca kuti imbila nsuma iyo tubila yalifimbwapo, ninshi yafimbwapo ku bakonaika, 4 abashatetekela abo lesa wa bwikashi buno*+ apofwisha*+ pa kuti ulubuuto lwa mbila nsuma ya bukata bwa kwa Kristu, uwaba cipasho ca kwa Lesa,+ lwisanika muli bena.+ 5 Pantu tatubila pali fwe bene, lelo tubila pali Yesu Kristu ukuti ni Shikulu, na pa fyo twaisaba abasha benu pa mulandu wa kwa Yesu. 6 Pantu Lesa e watile: “Lekeni ulubuuto lusanike mu mfifi,”+ kabili alisanika mu mitima yesu pa kuti iyi imitima+ ishibe bwino Lesa ukupitila muli Kristu.

7 Nomba twalikwata ici icuma+ mu fipe fye bumba,+ pa kuti amaka ayacila aya bantunse yabe ya kwa Lesa, te yesu iyo.+ 8 Monse monse balatutitikisha, lelo tabatufyenenkesha ica kuti twafilwa na pa kusunkanina; tulapelenganishiwa, lelo tatupelenganishiwa ica kuti twafilwa no mwa kulosha;+ 9 balatucusha, lelo tatulekeleshiwa;+ nangu batupoosa panshi, tatonaika.+ 10 Lyonse tulakwata amacushi ayengalenga twafwa, nga yalya Yesu alekwata.+ Ifi filenga abantu balamona ukuti tulacula nga filya Yesu alecula. 11 Pantu fwe ba mweo lyonse fye tulalolenkana ne mfwa+ pa mulandu wa kwa Yesu. Ici cilenga abantu bamona ukuti tulacula nga filya fine Yesu alecula. 12 E ico ifwe tulalolenkana ne mfwa, kabili ici cikalenga imwe mukabe no mweo.

13 Nomba apo twalikwata icitetekelo nga cilya cakwete uwatile: “Icitetekelo e calengele ukuti nande”;+ na ifwe bene twalikwata icitetekelo kabili e cilenga tulelanda, 14 pantu twalishiba ukuti uwabuushishe Yesu, na ifwe bene akatubuusha nga filya abuushishe Yesu, kabili akatuleta pamo na imwe pa ntanshi yakwe.+ 15 Pantu ifi fintu fyonse fyacitikiile pa mulandu wenu, pa kuti icikuuku icaibela cilekulilako pantu abantu abengi baletootela Lesa pa kuti acindikwe.+

16 E ico tatunenuka, lelo nangu ca kuti imibili yesu ileya ilepwa, mu kati mwena tulabelako abapya cila bushiku. 17 Pantu nangu ca kuti ubucushi* ubo tucula bwa pa kashita fye kabili bwalyanguka, bukatuletela ubukata ubukalamba kabili ubwa muyayaya;+ 18 pali ino nshita tatulebika imitima yesu pa fimoneka, lelo tuleibika pa fishimoneka.+ Pantu ifimoneka fya pa kashita fye, lelo ifishimoneka fyena fya muyayaya.

5 Pantu twalishiba ukuti ing’anda yesu iya pano isonde, e kutila ili itenti, nga baiwisha+ tukakwata imbi iikafuma kuli Lesa. Iyi ni ng’anda iishakuulwa ne minwe,+ lelo iya muyayaya ku muulu. 2 Pantu mu mibili yesu tulateta, kabili tulafwaisha ukuyaingila mu ng’anda imbi iyaba ku muulu,+ e kutila umubili umbi, 3 pa kuti ilyo tukengilamo, bekatusanga ubwamba. 4 Na kuba, ifwe fwe baba muli ili tenti tulateta, pa mulandu wa kuti tulasakamikwa sana, pantu tatufwaya ukufuma muli ili itenti, lelo tufwaya ukwingila muli limbi,+ pa kutila pali ili ilifwa pakapyane ilya mweo.+ 5 Nomba uwatupekenye ukuti tukabe muli uyu musango ni Lesa,+ uwatupeele umupashi wakwe uwaba cikatilo ca fintu ifikesa.*+

6 E ico twalishininkisha kabili twalishiba ukuti nga tuli muli iyi ng’anda, tatuba pamo na Shikulu,+ 7 pantu twendela mu kutetekela, te mu kumona. 8 Lelo tatutwishika kabili ico twingatemwa sana, kufuma muli iyi mibili no kuyaikala na Shikulu.+ 9 E ico nampo nga tuli pamo nankwe nelyo tatuli pamo nankwe, ico tufwaisha kumusekesha. 10 Pantu bonse tulingile ukumonekela ku cipuna ca bupingushi ica kwa Kristu, pa kuti cila muntu akapokelele icilambu pa fyo acitile ilyo ali muli uyu mubili, nampo nga fisuma nelyo fibi.+

11 E ico apo twalishiba ukuti tufwile ukulatiina Shikulu, tulanashanasha abantu, lelo Lesa alitwishiba bwino. Nomba ndesubila ukuti bakampingu benu balilenga mwatwishiba bwino. 12 Na kabili tatuleitasha kuli imwe, lelo tulefwaya mukwate apa kuitakishisha pali ifwe, pa kuti mukwate ifya kwasuka abaitakisha pa mimonekele ya kunse+ ukucila ukulaitakishisha pa fyaba mu mutima. 13 Pantu nga twalecita ifintu nga bantu abapena,+ ninshi ni kuli Lesa twaleficitila; lelo nga tucita ifya mano, ni pa mulandu wenu tuficitila. 14 Pantu ukutemwa kwa kwa Kristu e kulenga tuleba abacincila, pantu ico twaishiba ca kuti, apo umuntu umo afwilile abantu bonse;+ ninshi bonse balifwile. 15 Kabili afwilile bonse pa kuti aba mweo belacita fye ifya kuisekesha,+ lelo balecita ifya kusekesha uwabafwilile kabili uwabuushiwe.

16 E ico ukufuma pali ino nshita tatwakulamona abantu ukulingana ne fyo bamoneka kunse.+ Nangu ca kuti fwe bamo twaishibe Yesu ukulingana ne fyo twalemumona, pali ino nshita te fyo twamwishiba.+ 17 Kanshi umuntu nga aba Umwina Kristu, alalengwa cipya cipya;+ ifya kale fyalipita, moneni! kwaisa ifipya. 18 Lelo ifintu fyonse fyafuma kuli Lesa, uwalengele ukuti tubwelele kuli ena ukupitila muli Kristu+ kabili uwatupeele umulimo wa kubwesesha abantu kuli Lesa,+ 19 e kutila, Lesa alelenga aba pano calo babwelele kuli ena ukupitila muli Kristu.+ Talebapendela imembu shabo,+ kabili alipeele ifwe ubukombe bwa kubwesesha abantu kuli ena.+

20 E ico ifwe tuli nkombe+ ishibomba umulimo wa kwa Kristu,+ caba kwati ni fwe Lesa alebomfya pa kukunkumba abantu. Apo tuli beminishi ba kwa Kristu, tupaapaata abantu atuti: “Bweleleni kuli Lesa.” 21 Alengele uushakwete ulubembu+ aba ilambo lya pa membu pa mulandu wesu, pa kuti Lesa aletumona ukuti twalilungama.+

6 Apo tubombela pamo nankwe,+ tulemupaapaata no kuti mwilacita ifipusene ne cikuuku icaibela ico Lesa amulanga.+ 2 Pantu atila: “Mu nshita ya kukupaala, nalikumfwile, na mu bushiku bwe pusukilo nalikwafwile.”+ Mona! Ino ine e nshita iyo Lesa alepaalamo abantu bakwe. Mona! Buno e bushiku ubo Lesa alepusushamo abantu bakwe.

3 Tatucita nangu cimo icingapunwisha abantu, pa kuti abantu bekwata apa kusangila ifilubo mu mulimo wesu;+ 4 lelo muli fyonse ifyo tucita tulalanga ukuti tuli babomfi ba kwa Lesa,+ ilyo tuleshipikisha amesho ayengi, ilyo tukwete amacushi, ilyo tulekabila ifintu fimo, ilyo tukwete amafya,+ 5 ilyo baletupuma, ilyo batubika mu fifungo,+ ilyo kuli ifimfulunganya, ilyo tulebombesha, ilyo tulefufiwa utulo, ilyo tushikwete ifya kulya;+ 6 ilyo tuli abasanguluka, ilyo tulelanga ukuti twalishiba Lesa, ilyo tuli abatekanya,+ ilyo tuli ne cikuuku,+ ilyo umupashi wa mushilo uletutungulula, ilyo tuli no kutemwa ukwabula ubumbimunda,+ 7 ilyo tulanda icishinka, ilyo tubomfya amaka ya kwa Lesa;+ ilyo twikatila ifyanso fya bulungami ku kuboko kwa ku kulyo*+ na ku kwa ku kuso,* 8 ilyo batucindika na lintu batusaalula, ilyo batwamba ne lyo balanda ifisuma pali ifwe. Batumona kwati tuli ncenjeshi lelo tuli ba cishinka, 9 Batumona kwati tatwaishibikwa lelo twalishibikwa, batumona nga bantu abalefwa* nomba moneni tucili abomi,+ batumona ukuti tulingile ukukandwa nangu ca kuti tatufwile ukwipaiwa,+ 10 batumona ukuti twaliba no bulanda, lelo tulasekelela lyonse, batumona ukuti tuli bapiina nomba nifwe tulenga abantu abengi baba abakankaala, kabili batumona kwati tatwakwata nangu cimo, lelo twalikwata fyonse.+

11 Twalimweba fyonse fye mwe bena Korinti, kabili twalikusha ukutemwa kwesu. 12 Ifwe tatwaleka ukumutemwa,+ lelo imwe tamwatutemwa sana. 13 E ico pa kuti na imwe mube nge fyo twaba, ndelanda nge fyo ningeba abana bandi ndeti, na imwe kusheni ukutemwa kwenu.+

14 Mwilaba kwi koli limo line na bashatetekela+ pantu tamwaba cimo cine. Bushe ubulungami na bumpulamafunde kuti fya-ampana shani?+ Nelyo bushe ulubuuto ne mfifi fyalipalana?+ 15 Kabili bushe Kristu kuti aumfwana shani na Beliali?*+ Nangu bushe uwatetekela kuti aumfwana shani no ushatetekela?+ 16 Na kabili, bushe utulubi finshi twingalacita mwi tempele lya kwa Lesa?+ Pantu ifwe tuli itempele lya kwa Lesa wa mweo;+ filya Lesa umwine alandile ati: “Nkalaikala nabo,+ nakulaendauka muli bena, kabili nkaba Lesa wabo, nabo bakaba abantu bandi.”+ 17 “‘E ico fumenimo muli bena, kabili ipaatuleniko,’ e fyo Yehova* alanda, ‘kabili lekeni ukwikata ku cishasanguluka’”;+ “‘na ine nkamupokelela.’”+ 18 “‘Kabili nkaba Shinwe,+ na imwe mukaba abana bandi abaume na bana bandi abanakashi,’+ e fyo Yehova* Uwa Maka Yonse alanda.”

7 E ico apo balitulaya aya malayo+ mwe batemwikwa, tuisangulule kuli fyonse ifikowesha umubili no mupashi,+ kabili tube aba mushilo icine cine mu kutiina Lesa.

2 Tupokeleleni.+ Tatwalufyanyapo umuntu nangu umo, tatwalengapo umuntu nangu umo aba ne mibele iyabipa, tatwaliilapo umuntu nangu umo.+ 3 Ifi ndelanda nshilemupeela imilandu. Pantu ninanda kale ukuti twalimutemwa nga nshi kabili umweo nelyo imfwa te kuti filenge tuleke ukumutemwa. 4 Ndalanda na imwe ukwabula umwenso. Ndomfwa icilumba sana pali imwe. Ndakoseleshiwa, kabili ndasekelela nga nshi mu macushi yesu yonse.+

5 Na kuba ilyo twafikile mu Makedonia,+ tatwakwete na pa kutuushisha, lelo abantu baletucusha sana kabili twalisakamene sana. 6 Lelo Lesa uusansamusha abali no bulanda,+ alitusansamwishe pantu Tito alishile; 7 kabili tatwasekelele fye pa mulandu wa kuti Tito alishile, lelo na pa mulandu wa kuti mwalimusansamwishe, pantu aishiletushimikila ifyo mufwaisha ukulapila, ifyo mumfuluka, ifyo mwali no bulanda sana ne fyo mwambikako sana mano. E ico nalisekelele nga nshi.

8 Nshumfwa ububi. Nangu ca kuti pa kubala nalyumfwile ububi (kwena nimona ukuti ifyo nalembele muli ilya kalata+ fyalilengele mwaba no bulanda, nangu ca kuti ni pa kashita fye akanono), 9 pali ino inshita ndesekelela, pantu tamwali fye no bulanda, lelo ubulanda mwakwete bwalengele mwalapila. Pantu ubulanda mwaumfwile e bo Lesa afwaya, pa kuti ifintu fimubipila pa mulandu wesu. 10 Pantu ubulanda ubo Lesa afwaya bulenga umuntu alapila, ukulapila ukwingalenga apusuka, kabili takulenga ashala alelanguluka;+ lelo ubulanda bwa ba muli ici calo buleta imfwa. 11 Pantu ubulanda bwine ubu ubo Lesa afwaya, bwalengele muleibikilishako pa kuti mulecita ifyalungama, muleisangulula ku filubo, muleumfwa ububi, muleba na katiina, mulefwaisha ukulapila, muleba abacincila, kabili mulelungika ifilubo!+ Muli fyonse mwalilangile ukuti muli ba kaele pali uyu mulandu. 12 Nangu ca kuti nalimulembeele ilya kalata, nshalembeele uwabifishe,+ nelyo uo babifishe. Lelo ico nalembeele ni pa kuti ifyo mufwaisha ukutumfwila fimoneke pa menso ya kwa Lesa. 13 Ici calitusansamwishe.

Na cimbi icalengele ukuti tusekelele, ni co Tito alisekelele pantu mwalilengele aba ne nsansa. 14 Pantu nga naitakishisha pali imwe pa menso ya kwa Tito, nshumfwa insoni; lelo nga filya fine fyonse ifyo twamwebele fyali ifya cishinka, e fyo ne fyo tuitakisha pali imwe pa menso ya kwa Tito fyaisaba ifya cine. 15 Kabili alimutemwa nga nshi pantu alebukisha icumfwila cenu bonse,+ ne fyo mwamupokelele na katiina. 16 Ndesekelela pantu nimona ukutila kuti namucetekela muli fyonse.

8 Nomba mwe ba bwananyina, tulefwaya mwishibe icikuuku icaibela ico Lesa alanga aba mu filonganino fya mu Makedonia.+ 2 Ilyo bakwete sana amesho kabili ilyo balecula, balesekelela nga nshi kabili bali sana na bukapekape, nangu ca kuti bali bapiina nga nshi. 3 Pantu ndemweba icine cine nati, bapeele ukulingana ne fyo bakwete+ kabili bapeele ukucila fye na pa fyo bakwete,+ 4 pantu aba bamunyinefwe mu kuitemenwa fye baletupaapaata ukuti nabo bapeeleko ubupe pa kuti nabo bengabombelako aba mushilo.+ 5 Kabili bapeele ukucila na pa fyo twale-enekela. Babalilepo ukubombela Shikulu ne myeo yabo yonse na ifwe ukulingana ne fyo Lesa afwaya. 6 E ico twakoseleshe Tito+ ukuti, apo e watendeke uyu mulimo wa kupoka ubupe bwa kwafwilisha kuli imwe, no kupwisha e o akaupwishe. 7 Lelo filya fine mucita bwino sana muli fyonse, e kutila mu citetekelo, mu kwishiba ukulanda, mu kwishiba Lesa, mu kucincila konse na mu kutemwa uko twamutemwa, e fyo mucite na mu kupeela ubu bupe bwa kwafwilisha.+

8 Ifi ndelanda nshilemupatikisha, lelo ndefwaya fye mwishibe ifyo aba bwananyina bambi baibikilishako, na pa kuti njishibe nga ca kuti mwalikwata ukutemwa kwa cine cine. 9 Pantu mwalishiba icikuuku icaibela ica kwa Shikulwifwe Yesu Kristu, ica kutila nangu ca kuti ali uwacindama aisangwile umupiina pa mulandu wenu,+ pa kuti mu bupiina bwakwe e mo imwe mucindamine.

10 Ifyo ndetontonkanya pali uyu mulandu ni ifi:+ Kuti cawama nga mwapwisha uyu mulimo uo mwatendeke uyu mwaka wapwile pantu nimwe mwe bene mwautendeke kabili nimwe mwalefwaya ukusangula. 11 E ico pwishishisheni umulimo mwatendeke, pa kuti filya fine mwalefwaisha ukusangula, e fyo mufwaishe no kupwisha ukusangula pa fyo mukwete. 12 Pantu nga cine cine umuntu alefwaya ukusangula, Lesa akapokelela ubupe bwakwe nga apeela ukulingana na po akwatile,+ te kulingana ne fyo ashikwete. 13 Pantu nshilefwaya bambi cibangukile e lyo imwe cimukosele; 14 lelo ndefwaya kube ukulingana. Ifyapula pa fyo mukwete filunde pa finono ifikwete bambi, pa kuti nabo ifikapula pa fyo bakakwata fikalunde pa finono ifyo mukakwata, pa kuti kukabe ukulingana. 15 No kulembwa e fyo calembwa ukuti: “Uwakwete ifingi, ifyo akwete tafyafulishe, no wakwete ifinono, ifyo akwete tafyacepeshe.”+

16 Nomba ndetasha Lesa pa fyo alenga Tito alemubikako amano+ nga filya fine na ifwe tumubikako amano, 17 pantu alyumfwile ifyo twamukoseleshe. Nomba apo alicincila nga nshi, akesa fye umwine kuli imwe pa lwakwe. 18 Lelo twamutuma pamo no wa bwananyina uo ifilonganino fyonse fitasha pa mulandu wa kubila imbila nsuma. 19 Te ici ceka, lelo uyu wine e o ne filonganino fyasalile ukuti tule-enda nankwe muli uyu mulimo wa kwafwilisha aba bwananyina uulenga Shikulu acindikwa, kabili uulanga ifyo tufwaisha ukwafwa abantu. 20 E ico tatulefwaya umuntu nangu umo akwate apa kutupeelela umulandu muli uyu mulimo wa kwafwilisha uo tulebomba.+ 21 Pantu ‘tufwaya ukuba abafumacumi muli fyonse, te mu menso ya kwa Yehova* fye mweka, lelo na mu menso ya bantu.’+

22 Na kabili, twabatuma pamo na munyinefwe uo twaesha pa miku iingi, kabili uo twamona ukuti alabomba bwino mu fintu ifingi, lelo akacilapo no kubomba bwino pa mulandu wa kuti alimucetekela nga nshi. 23 Nga paba abatwishika pali Tito, bafwile ukwishiba ukuti imomba nankwe, kabili tuba nankwe ilyo tulemubombela; e lyo nga kwaba abatwishika pali aba bamunyinefwe bambi, bafwile ukwishiba ukuti aba bamunyinefwe batumwa ba mu filonganino kabili balalenga Kristu acindikwa. 24 E ico mubalange ukuti mwalibatemwa+ kabili mulange na ba mu filonganino ukuti ifyo twaleitakisha pali imwe fya cine.

9 Nomba pa kubomba imilimo ya kwafwilisha aba mushilo,+ nshilekabila no kumulembela, 2 pantu nalishiba ukuti mulafwaisha ukwafwa aba bwananyina kabili ndaitakisha pali imwe ku bena Makedonia. Ndabeba ukuti napapita umwaka umo ukutula apo abena Akaya baiteyanishisha ukwafwa aba bwananyina, kabili ifyo mufwaisha ukwafwa aba bwananyina e filenga abengi pali bena balefwaisha ukwafwa aba bwananyina. 3 Nomba natuma aba bamunyinefwe, pa kuti ukuitakisha uko tuitakisha pali imwe kwiba ukwa bufi, na pa kuti muipekanye nga filya nabebele ukuti mukaipekanya. 4 Pantu nga naisa pamo na bena Makedonia e lyo twasanga ukuti tamwaipekanya, tukomfwa insoni kabili na imwe mukomfwa sana insoni pa fyo twamucetekela. 5 E ico natontonkenye nati mfwile ukukoselesha aba bwananyina ukuti bakantangilile ukwisa kuli imwe pa kuti bakesekolonganika ifya bupe ifyo mwalaile, e pa kuti cikamoneke ukuti mupeela fye mu kuitemenwa te mu kupatikishiwa.

6 Ifi nalanda nafilingana na mashiwi ya kuti uucefya ilyo aletanda no kuseepa akaseepa ifinono, kabili uufusha ilyo aletanda no kuseepa akaseepa ifingi.+ 7 Onse apeele ukulingana ne fyo apangile mu mutima wakwe, te kupeela na mutimako nangu mu kupatikishiwa,+ pantu Lesa atemwa uupeela ne nsansa.+

8 Nomba Lesa alikwata amaka ya kumulanga sana icikuuku cakwe icaibela, pa kuti lyonse mulekwata fyonse ifyo mukabila na pa kuti mulekwata ifingi ifya kubomfya mu mulimo onse uusuma.+ 9 (Nga filya fine calembwa ati: “Ni kapekape, alipeelako abapiina ifyo akwata. Ubulungami bwakwe bukabako umuyayaya.”+ 10 Nomba uupeela katanda imbuto ishingi no kupeela abantu ifya kulya, akamupeela imbuto sha kutanda kabili akashifusha, akafusha ne fisabo fya bulungami bwenu.) 11 Lesa alamupaala muli fyonse pa kuti na imwe mube bakapekape muli fyonse. Ubu bukapekape bukalenga abantu bakaletootela Lesa pa mulandu wa fyo tukabapeela ifikafuma kuli imwe; 12 pantu uyu mulimo wa kwafwilisha abantu te wa kupeela fye aba mushilo ifyo babulishe,+ lelo ulalenga na bantu abengi baletasha Lesa. 13 Ilyo abantu bamona ifyo mulebomba uyu mulimo wa kwafwilisha abantu, balacindika Lesa pantu ifyo mucita filalingana ne yi mbila nsuma iyo mubila pali Kristu ku cintubwingi, na pa mulandu wa kuti mulabapeelako ifya bupe ifingi kabili mulapeelako na bantu bonse.+ 14 Kabili ilyo balepepa amapepo ya kumupaapaatilako, balanga ukuti balimutemwa pa mulandu wa cikuuku icaibela icikalamba ico Lesa amulanga.

15 Natuletasha Lesa pa bupe bwakwe ubushaikulila.

10 Nomba ine ne Paulo ndemupaapaatila mu kunakilila na mu cikuuku ca kwa Kristu.+ Nangu ca kuti imoneka uwanakilila ilyo ndi na imwe,+ ndaba uwashipa ilyo nshili na imwe.+ 2 Ndesubila ukuti ilyo nkesa nshakakabile ukukalipila sana abaletumona ukuti twalekonka fye ifyalefwaya imitima yesu. 3 Pantu nangu twaba fye ifyaba abantu bonse, tatulwishisha mu buntunse. 4 Pantu ifyanso ifyo tulwilako te fya buntunse,+ lelo fyanso fya maka ifyo Lesa atupeele+ pa kuti tulewishishako fyonse ifyaba nga malinga ayakosa. 5 Pantu tulewisha amatontonkanyo yonse ayalubana na conse ico bapindika icilwisha ukwishiba Lesa;+ kabili tulenasha amatontonkanyo yonse pa kuti yanakile Kristu; 6 kabili natuipekanya ukukanda cintomfwa onse pali bucintomfwa bwakwe.+ Tukacita ifi ilyo mukalanga fye ukuti muli bacumfwila muli fyonse.

7 Mumona ifintu ukulingana fye ne fyo fimoneka. Nga ca kuti umuntu alicetekela ukuti wa kwa Kristu, afwile ukutontonkanya pa cishinka ca kuti: Nga filya fine aba uwa kwa Kristu, e fyo na ifwe bene twaba. 8 Pantu nangu ningacishamo panono ukuitakishisha pa maka ayo Shikulu atupeele aya kumukosha, ayashili ya kumubongolola,+ te kuti ng’umfwe insoni. 9 Pantu nshilefwaya ukumoneka kwati ndemutiinya mu makalata yandi. 10 Pantu bamo batila: “Amakalata yakwe ya maka kabili yalatiinya, nomba umwine nga e po ali amoneka uwanakilila, kabili imilandile yakwe nayo tayawama.” 11 Uulande ifi eshibe ukuti ifyo tumulembela mu makalata ilyo tuli ukutali, tafyakapusane ne fyo tukesacita ilyo tukesa uko.+ 12 Pantu ifwe tatufwaya no kuipalanya nelyo ukuilinganya kuli balya abaitakisha abene.+ Lelo filya baipimina ku fipimo ifyo abene bamona ukuti e fyalinga, filanga fye apabuuta tutu ukuti tabakwata mano.+

13 Pantu ifwe tatuitakishisha pa milimo iishili yesu, lelo tuitakisha ukulingana no mwapelela umupaka uo Lesa atupeela, na imwe bene mwaba muli uyu mupaka.+ 14 Tatwaile ku cifulo cimbi ico bashatupeele. Na kuba nifwe twabalilepo ukuleta imbila nsuma pali Kristu+ kuli imwe, pantu na imwe bene mwaba muli ici cine cifulo ico batupeele. 15 Tatuleitakishisha pa mipaka iishili yesu nangu pa milimo ya muntu umbi, lelo tuli ne subilo lya kuti, ilyo icitetekelo cenu cileya cilekulilako, na ifwe bene tulekwatilako amaka ya kubomba umulimo mu cifulo cesu. Lyena tukalabombesha, 16 pa kuti tukalebila imbila nsuma na mu fyalo fimbi, na pa kuti twikalaitakishisha pa milimo iyo umuntu umbi abomba mu cifulo icishili cesu. 17 “Lelo uuitakisha, aleitakishisha muli Yehova.”*+ 18 Pantu umuntu uo Yehova* umwine atemwa e o atasha,+ te muntu uuitasha umwine.+

11 Kuti cawama nga mulentekanishisha ifi limo imoneka kwati nshakwata mano. Na kuba, mulantekanishisha! 2 Pantu nga filya fine Lesa amumfwila ubufuba e fyo na ine ng’umfwa ubufuba pali imwe, pantu nine wine namulaile ukuti mukoopwa ku mwaume umo, e kutila kuli Kristu, kabili ndefwaya nkamupeele kuli ena nga nacisungu uwasanguluka.+ 3 Lelo ninsakamana, pantu nga filya fine insoka yabepele Efa mu bucenjeshi bwa iko,+ e fyo na matontonkanyo yenu yengonaika ica kuti mwaleka ukuba aba kaele kabili abasanguluka, ukulingana ne fyo Kristu afwaya mwaba.+ 4 Pantu mulomfwila bwangu umuntu uwaisa mu kubila pali Yesu umbi uo tushabililepo, kabili mulapokelela umupashi umbi uo mushapokelele, mulapokelela ne mbila nsuma imbi iyapusana ne yo mwaumfwile.+ 5 Pantu ndemona ukuti abo mwe bene mutila batumwa bene bene tabancila nangu panono.+ 6 Kwena nangu ca kuti nshacenjela mu kulanda,+ ifyo naishiba fyena fingi; cine cine twalimulangile bwino bwino ifintu fyonse, kabili mu nshila ishalekanalekana.

7 Nelyo bushe nalilufyenye filya naicefeshe pa kuti imwe mucindikwe, pa mulandu wa kuti nalibilile imbila nsuma ya kwa Lesa kuli imwe ukwabula ukundipila?+ 8 Nalipuswile ifilonganino fimbi ilyo napokele ifyo bampeele ifyo nalekabila pa kuti imubombele.+ 9 Lelo ilyo nabulishe ifyo nalekabila ilyo nali na imwe, nshali icisendo ku muntu nangu umo, pantu aba bwananyina abafumine ku Makedonia balindeteele ifingi ifyo nalekabila.+ Filya fine nshali icisendo kuli imwe muli fyonse, e fyo nkatwalilila ukukanaba icisendo.+ 10 Apo fye ndi musambi wa kwa Kristu, nshakaleke ukuitakisha pali ici+ mu Akaya monse. 11 Cinshi nshafwaile ukuba icisendo kuli imwe? Bushe ni co nshamutemwa? Lesa alishiba ukuti nalimutemwa.

12 Lelo ifyo ncita e fyo nkatwalilila ukucita,+ pa kuti abaitunga ukuba abatumwa belakwata apa kuitakishisha kabili belakwata apa kulandila ukuti nabo bene babomba umulimo uo tubomba. 13 Pantu aba musango uyu batumwa ba bufi, ababepa abantu kabili abaifungushanya kwati batumwa ba kwa Kristu.+ 14 Kabili te kuti mpape, pantu na Satana alaifungushanya kwati ni malaika wa lubuuto.+ 15 E ico te kuti mpape nga ca kuti ababomfi bakwe nabo baleifungushanya kwati babomfi abacita ifyalungama. Lelo impela yabo ikaba ukulingana ne milimo yabo.+

16 Ndebwekeshapo ndeti: Takuli uufwile ukulamona kwati nshakwata mano. Lelo nga ca kuti mumona ukuti nshakwata mano, mulemona ifyo fine, pa kuti na ine ningakwata ica kutakishishapo panono. 17 Pali ino nshita ifyo ndelanda te fyo Shikulu engalanda, lelo ndelanda ifingalanda umuntu uushakwata amano, uuitakisha pa mulandu wa kuicetekela. 18 Apo abengi baleitakisha ukulingana no buntunse, na ine wine nalaitakisha. 19 Apo imwe muimona ukuti muli ba mano sana, mulatekela imitima abashakwata amano. 20 Na kuba, imwe mulatekela umutima no muntu uumuteka ubusha, uumuliila ifintu, uumupokolola ifyo mwakwata, uuisansabika pali imwe, kabili uumuma pa menso.

21 Ca nsoni ifi tulanda, pantu kuti camoneka kwati tatubomfya bwino amaka yesu.

Lelo nga ca kuti bamo tabomfwa insoni sha kuitakisha—ninshi na ine nshaumfwe insoni sha kuitakisha—nangu ca kuti bamo kuti bamona kwati nshakwata amano. 22 Bushe baHebere? Na ine wine ndi muHebere.+ Bushe bena Israele? Na ine wine ndi mwina Israele. Bushe batuntuka muli* Abrahamu? Na ine wine natuntuka muli Abrahamu.+ 23 Bushe babomfi ba kwa Kristu? Nala-asuka ngo wapena, ine nalibacila sana: Mu kubombesha nalibacila,+ imiku nakakwa mu fifungo nalibacila,+ impumo napumwa te sha kupenda, pa miku iingi napene mfwe.+ 24 Pa miku 5 abaYuda balingumine ifikoti 39,+ 25 pa miku itatu abantu balimpumine ne nkonto,+ pa muku umo balimpoolele amabwe,+ pa miku itatu ubwato nalimo bwalibundile,+ pa muku umo nali pali bemba akasuba no bushiku; 26 inshita ishingi naleba pa lwendo, nalekwata amasanso pa mimana, ifipondo fyalensansa, abantu bandi balensansa,+ abena fyalo balensansa,+ nalekwata amasanso mu musumba,+ nalesanswa mu matololo, nalesanswa pali bemba, aba bwananyina ba bufi balensansa, 27 nalebombesha kabili nalefunshika, libili libili nalefufiwa utulo,+ naleikala ne nsala ne cilaka,+ pa miku iingi nshalekwata ifya kulya,+ nalecula ku mpepo kabili nalesapula.*

28 Ukulunda pali ifi nalanda, cila bushiku ndasakamana nga nshi pa mulandu wa filonganino fyonse.+ 29 Umwina Kristu umo nga nanaka, na ine ndanaka. Umwina Kristu umo nga napunwishiwa, na ine cilankalipa.

30 Nga ndi no kuitakisha, nalaitakishisha pa filanga ukuti nalinaka. 31 Lesa kabili Wishi wa kwa Shikulu Yesu, uufwile ukulumbanishiwa umuyayaya, naishiba ukuti nshilebepa. 32 Mu musumba wa Damaseke umulashi wa mfumu Areta aalelinda uyu musumba pa kuti anjikate, 33 lelo banjikishishe mu museke, pe windo ilyali mu cibumba ca musumba,+ e fyo namufyukile.

12 Mfwile ukuitakisha nangu ca kuti tamwaba nangu cimo mu kuitasha. Nomba nalalanda pa fipesha amano+ ifyo Shikulu alengele ukuti imone ne fyo ansokolwelele.+ 2 Nalishibako Umwina Kristu umo uwasendelwe ku muulu walenga itatu, napapita ne myaka 14. Kwena nshishibe nga asendelwe umutuntulu no mubili, nangu nga cali fye cimonwa; ico cena Lesa e waishiba. 3 Cine cine uyu muntu nalimwishiba—nshishibe nga asendelwe umutuntulu no mubili, nangu nga cali fye cimonwa; ico cena Lesa e waishiba. 4 Asendelwe ku paradaise kabili aumfwile amashiwi ayo ashalingile ukulanda kabili ayo bashasuminishe umuntu nangu umo ukulanda. 5 Nalaitakishisha pali uyu muntu, nomba pali ine ne mwine pena nshaitakishe, kano fye pa fyo naba uwanaka. 6 Pantu nangu njitakishe nshabe ngo muntu uushakwata mano, pantu ninshi ndelanda icishinka. Lelo nshaitakishe, pantu nshilefwaya umuntu nangu umo alentasha ukucila pa fintu ifyo ncita ifyo amona nelyo pa fintu ifyo nanda ifyo aumfwa, 7 pa mulandu fye wa fintu ifikalamba sana ifyo Shikulu ansokolwelele.

E ico pa kuti nilaisansabika ukucilamo, nalashilwe umuunga mu mubili,+ uwali kwati ni malaika wa kwa Satana uwalentobaula amapi,* pa kuti nilaisansabika ukucilamo. 8 Pa miku itatu napaapeete Shikulu ukuti amfumye uyu muunga. 9 Lelo Shikulu anjebele ati: “Icikuuku icaibela ico nakulanga kale calikulinga, pantu mu kunaka kobe e mo amaka yandi yamonekela sana.”+ E ico ndeitakisha nga nshi kabili ndesekelela pa fyo naba uwanaka, pa kuti amaka ya kwa Kristu yamfimbe nge tenti. 10 E ico pa mulandu wa kwa Kristu ndasansamuka pa fyo naba uwanaka, pa fyo bampontela, pa fyo mbulisha ifyo nkabila, pa fyo bancusha na pa mafya ayo nkwata. Pantu ilyo ndi uwanaka, e lyo nkwata amaka.+

11 Nimwe mwalenga mbe kwati muntu uushakwata mano, pantu mwalingile ukuntasha. Pantu abo mwe bene mutila batumwa bene bene tabancila nangu panono, nangu ca kutila tapali ico naba.+ 12 Cine cine, mu kushipikisha kwandi konse,+ mu fishibilo, mu fipesha amano na mu fya maka e mo mwamwenene ubushininkisho bwa kuti ndi mutumwa.+ 13 Cimo fye icalengele mulemona ukuti mwalicepako pa filonganino fimbi ca kuti, nshali icisendo kuli imwe nge fyo nali icisendo ku filonganino fimbi.+ Nga ca kuti nalilufyenye pali ifi, mumbeleleko uluse.

14 Moneni! Uno e muku walenga butatu uo ndefwaya ukwisa kuli imwe, kabili nshakabe icisendo. Nimwe mfwaya, te cuma; pantu abana te bafwile ukubikila abafyashi ifyuma,+ lelo abafyashi e bafwile ukubikila abana+ babo ifyuma. 15 Pantu ine nkaitemenwa ukubomfya fyonse ifyo nakwata, nkapeelelapo fye no mweo wandi pa mulandu wenu.*+ Apo nalimutemwa sana, bushe imwe mufwile ukuntemwa fye panono? 16 Lelo ine nshali icisendo kuli imwe.+ Nomba mutila, nali “incenjeshi” kabili namwikatile “mu mucenjelo.” 17 Bushe nalimuliliilepo akantu ukupitila mu bo natumine kuli imwe? 18 Nacincishe Tito ukuti ese kuli imwe, kabili namutumine pamo no wa bwananyina umbi. Bushe Tito alimuliliilepo akantu?+ Bushe ine na Tito tatwali abaikatana? Kabili bushe bonse babili tatwalecita fimo fine?

19 Bushe ili lyonse mutontonkanya ukuti tuipokolola fye kuli imwe? Ni pa cinso ca kwa Lesa tulelandila fwe basambi ba kwa Kristu. Lelo mwe batemwikwa, fyonse ifyo tucita fya kumukosha. 20 Pantu ninsakamana ukuti ilyo nkesa, nshakamusange nge fyo ndefwaya kabili nalimo na ine wine nshakabe nge fyo mwingafwaya, pantu nalimo nkasanga pali imwe paliba ifikansa, umufimbila, icipyu, ulubuli, ulwambo, umulomo, ukuituumika ne fimfulunganya. 21 Nalimo ilyo nkesa na kabili, Lesa wandi nalimo akalenga nkaseebane pa menso yenu, kabili akalenga nkalooshe pa bengi abashalapila pa membu bacitile pamo nga, ifyakowela ifyo bacitile, ubulalelale* ne fya nsoni.*

13 Uyu e muku walenga butatu ndefwaya ukwisa kuli imwe. “Pa kuti umulandu onse ushininkishiwe pafwile ukuba bakambone babili nelyo batatu.”+ 2 Nangu ca kutila ndi ukutali, ndi kwati ndi na imwe pa muku walenga bubili. Ndesoka ababembwike na bonse abashala ndeti, nga nkesa nshakabaleke, 3 pantu mulefwaya ubushininkisho bwa kuti Kristu uo mwaishiba ukuti taba uwanaka, lelo alikwata amaka, alalandila muli ine. 4 Balimwipaile pa cimuti, pantu takwete amaka lelo wa mweo pa mulandu wa maka ya kwa Lesa.+ Ca cine, na ifwe bene tatwakwata amaka pali ino nshita nga filya fine na o ali. Nomba tuli ba mweo pamo nankwe+ pantu amaka ya kwa Lesa yaba pali imwe.+

5 Muleyesha mwe bene pa kuti mulemona nga muli mu citetekelo, muleilinga mwe bene pa kuti muleishiba ifyo mwaba.+ Bushe tamwailuka ukuti Yesu Kristu aba muli imwe? Kano fye nga ca kuti mwalisuulwa. 6 Ukwabula no kutwishika ndesuubila ukuti mukeluka ukutila ifwe tatwasuulwa.

7 Nomba tulepepa kuli Lesa ukuti imwe mwilacita icabipa nangu cimo. Ico tulepepela ifi te pa kuti abantu baletumona ukuti Lesa tatusuula, lelo ni pa kuti imwe mulecita ifisuma, nangu ca kuti abantu batumona ukuti Lesa alitusuula. 8 Pantu ifwe te kuti tucite nangu cimo ica kucilikila icine, kano ifya kutungilila icine. 9 Ukwabula no kutwishika ifwe nga natunaka lelo imwe muli na maka tulasekelela. Kabili tulapepa ukuti, mulealululwa. 10 E mulandu wine ndelembela ino kalata ilyo ndi ukutali, pa kuti ilyo nkesa kuli imwe, nikabomfya bubi bubi amaka ayo Shikulu ampeele.+ Aya maka ampeela te ya kumubongolwelako iyo, lelo ya kumukuulilako.

11 Ica kulekeleshako mwe bamunyinane, ndemukoselesha ukuti, mulesekelela, mulealululwa, mulesansamuka,+ muletontonkanya cimo cine,+ muleikala umutende;+ lyena Lesa wa kutemwa kabili uwa mutende+ akulaba na imwe. 12 Poshanyeni kabili tomonaneni.* 13 Aba mushilo bonse bamuposha.

14 Icikuuku icaibela ica kwa Shikulu Yesu Kristu, no kutemwa kwa kwa Lesa, no mupashi wa mushilo uo ifwe bonse twakwata, fibe na imwe bonse.