KALATA KU BENA GALATIA

1 Ine ne Paulo, ne mutumwa uushasalilwe na bantu nangu ukusontwa no muntu, lelo ne wasalilwe na Yesu Kristu+ na Lesa Shifwe+ uwabuushishe Yesu ku bafwa, 2 ine pamo na ba bwananyina bonse abo ndi nabo, tulemuposha imwe mwe ba mu filonganino fya mu Galatia, tuleti:

3 Icikuuku icaibela no mutende ukufuma kuli Lesa Shifwe na kuli Shikulu Yesu Kristu fibe na imwe. 4 Aipeele pa mulandu wa membu+ shesu pa kuti atupokolole kuli buno bwikashi+ bwabipa* ukulingana ne fyo Lesa wesu kabili Shifwe+ afwaya, 5 kuli ena kube ubukata umuyayaya. Ameni.

6 Namumpapusha ifi mwangufyenye ukutampa ukufuma ku wamwitile mu cikuuku icaibela ica kwa Kristu, no kutampa ukumfwa imbila nsuma+ ya musango umbi. 7 Te kutila kuli imbila nsuma imbi; lelo kuli bamo abalemufulunganya+ kabili abalefwaya ukwalula imbila nsuma ya kwa Kristu. 8 Nomba nga ca kuti umo pali ifwe nelyo malaika ukufuma ku muulu abila kuli imwe imbila iyo aletila ni mbila nsuma, lelo iyapusana ne mbila nsuma twabilile kuli imwe, uwa musango uyo abe uwatiipwa. 9 Nga fintu tulandile kale, ndebwekeshapo ndeti, Onse uulebila imbila kuli imwe iyo aleti ni mbila nsuma, lelo iyapusana ne yo mwapokelele, abe uwatiipwa.

10 Na kuba, bushe bantu ndefwaya bantemwe nelyo ni Lesa? Nangu bushe ndefwaya ukusekesha abantu? Nga ncili ndesekesha abantu, te kuti mbe umusha wa kwa Kristu. 11 Pantu mwe bamunyinane, ndefwaya mwishibe ukuti imbila nsuma iyo nabilile kuli imwe, tayafuma ku bantunse;+ 12 pantu nshapokelele iyi mbila nsuma ku muntu, kabili takwali uwansambilishe, lelo Yesu Kristu e wansokolwelele.

13 Kwena mwalyumfwile ifyo nali kale ilyo nali mu mipepele ya baYuda,+ ukuti nalecusha nga nshi icilonganino ca kwa Lesa kabili naleconaula sana;+ 14 na kabili nalelunduluka bwangu mu mipepele ya baYuda ukucila abengi aba mushinku wandi aba mu luko lwesu, pantu nali uwacincila sana mu kukonka intambi sha fikolwe fyandi.+ 15 Lelo lintu Lesa uwalengele ukuti mfyalwe kabili uwanjitile pa mulandu ne cikuuku cakwe icaibela+ amwene ukuti cili fye bwino 16 ukusokolola Umwana wakwe ukupitila muli ine, pa kuti ningabila imbila nsuma pali Yesu Kristu ku bena fyalo,+ nshaile ilyo line ku muntu nangu umo* pa kuti njeipusha ifya kucita; 17 kabili nshaile ku Yerusalemu ku babalilepo ukuba abatumwa ilyo ine nshilaba umutumwa, lelo naile ku Arabia, e lyo nabwelela ku Damaseke.+

18 Nomba pa numa ya myaka itatu nalile ku Yerusalemu+ mu kutandalila Kefasi,*+ kabili naikele nankwe pa nshiku 15. 19 Lelo nshamonenepo na batumwa bambi, kano fye Yakobo+ munyina wa kwa Shikulu. 20 Ifi ndemulembela fya cine. Ndelanda icishinka pa menso ya kwa Lesa.

21 Pa numa, naile ku citungu ca Siria ne ca Kilikia.+ 22 Lelo abasambi ba kwa Kristu abali mu filonganino fya ku Yudea tabatalile abamonapo. 23 Baleumfwa fye ukuti: “Uwaletucusha+ nomba alebila imbila nsuma iya mipepele iyo aleonaula+ kale.” 24 E ico batendeke ukucindika Lesa pa mulandu wandi.

2 Lyena pa numa ya myaka 14, nalile na kabili ku Yerusalemu pamo na Barnaba,+ kabili Tito na o nalimusendele.+ 2 Ico nailile mulandu wa fyo bansokolwelele ukufuma ku muulu. Kabili ku mbali nalondolwelele abo bacindike sana mu cilonganino imbila nsuma iyo mbila ku bena fyalo, pa kuti imilimo iyo nalebomba nelyo iyo nabombele iya fye nga mu menshi. 3 Nomba nangu ca kuti Tito+ uo naile nankwe aali muGriki, tabamupatikishe ukusembululwa.+ 4 Lelo icalengele ukuti uyu mulandu wime, ba bwananyina ba bufi abasokelele+ nge nengu pa kuti balengule ubuntungwa+ ubo twakwata muli Kristu Yesu, pantu balefwaya ukutwalula abasha;+ 5 aba bantu tatwabanakiile+ nangu fye ni pa kashita akanono, pa kuti icine ca mbila nsuma citwalilile ukuba na imwe.

6 Lelo aba bwananyina abo balemona ukuti balicindama+ sana—ifyo bali kale tafyali kantu kuli ine, pantu Lesa takonka ifyo umuntu amoneka kunse—abo bacindike sana takwali nangu cimo icipya ico bansambilishe. 7 Lelo bena ilyo bamwene ukuti nalipeelwe umulimo wa kubila imbila nsuma ku bashasembululwa,+ nga filya fine Petro na o apeelwe umulimo wa kubila ku basembululwa— 8 pantu uwapeele Petro amaka ya kuba umutumwa ku basembululwa na ine wine e wampeela amaka ya kuba umutumwa ku bena fyalo+— 9 kabili ilyo baishibe icikuuku icaibela ico Lesa anangile,+ Yakobo,+ Kefasi* na Yohane, abaishibikwe ukuti bali ni nceshi sha cilonganino, baposeshe ine+ na Barnaba ku kuboko kwa ku kulyo pa kulangilila ukuti bonse twalebomba fye umulimo umo wine,* kabili batwebele ukuti tuye ku bena fyalo, e lyo bena baye ku basembululwa. 10 Cimo fye ico batulombele ca kuti tuleibukisha abapiina, kabili ifi fine e fyo njesha ukucita.+

11 Lelo ilyo Kefasi*+ aishile ku Antioke,+ nalimwebeelepo fye ukwabula ukupita na mu mbali, pantu calimoneke fye apabuuta tuutu ukuti alilufyenye. 12 Pantu ilyo abafumine kuli Yakobo+ tabalafika, aleliila pamo na bena fyalo; lelo ilyo bafikile,+ alilekele ukucita ifi kabili ali-ipaatwileko, pantu aletiina abasembululwa.+ 13 AbaYuda bambi nabo balimukonkelele muli ubu ubumbimunda, ica kuti na Barnaba wine aliwilile muli ubu ubumbimunda. 14 Lelo ilyo namwene ukuti tabalekonka icine ca mbila nsuma,+ naebele Kefasi* pa menso ya bonse nati: “Iwe nangu ca kuti uli muYuda, wikala ifyo abena fyalo bekala, kabili tawikala ifikala abaYuda. Nomba cinshi ico ulefwaila abena fyalo baleikala ifyo abaYuda bekala?”+

15 Ifwe fwe bafyalwa fye abaYuda, kabili fwe bashaba nga babembu aba mu bena fyalo, 16 twalishiba ukuti ukukonka amafunde, te kulenga umuntu aba uwalungama lelo kutetekela+ Yesu Kristu+ e kulenga umuntu aba uwalungama. E ico ifwe twalitetekela Kristu Yesu, pa kuti tube abalungama pa mulandu wa kutetekela Kristu te pa mulandu wa kukonka amafunde iyo, pantu takwaba umuntu uuba uwalungama pa mulandu fye wa kukonka amafunde.+ 17 Nomba ifwe, fwe bafwaya ukuba abalungama pa mulandu wa kwa Kristu, nga batusanga ukuti tuli babembu, bushe ninshi Kristu e ulenga abantu balebembuka? Nakalya! 18 Nga ca kuti nakuula ifyo nabongolwele, ninshi nailanga fye ukuti ndi mpulamafunde. 19 Pantu pa mulandu wa kuti nalekonka amafunde nalifwile ku mafunde,+ pa kuti ningaba uwa mweo pa mulandu wa kwa Lesa. 20 Nalipoopelwa pa cimuti pamo na Kristu.+ Nshikala ukulingana ne fyo mfwaya,+ lelo njikala ukulingana ne fyo Kristu afwaya.* Cine cine icalenga mbe no bumi, ni co nalitetekela umwana wa kwa Lesa,+ uwantemenwe kabili uwaipeele pa mulandu wandi.+ 21 Nshisuula icikuuku icaibela ica kwa Lesa;+ pantu nga ca kuti amafunde e yalenga ukuti umuntu abe uwalungama, ninshi Kristu afwilile fye apa fye.+

3 Mwe bena Galatia impelwa mano! Nani uwamubeleleka,+ mwe bo balondolwelele bwino bwino, ica kuti mwali fye kwati mulemona Yesu Kristu nabamupoopela pa cimuti?+ 2 Kamwipusheko fye icintu cimo:* Bushe mwapokelele umupashi pa mulandu wa kukonka amafunde nelyo ni pa mulandu wa kutetekela ifyo mwaumfwile?+ 3 Bushe kanshi e fyo mwapelwa amano ifi? Mwe batendeke fye bwino ukulacita ifyo Lesa afwaya, bushe nomba mulefwaya ukulacita fye ifyo mufwaya?+ 4 Bushe fyonse ifyo mwaculileko, mwaculile apa fye? Nshilemona ukuti mwaculile fye apa fye. 5 E ico, bushe uumupeela umupashi kabili uucita ifipesha mano+ pali imwe, acita ifi pa mulandu wa kuti mulakonka amafunde nelyo ni co mwalitetekela ifyo mwaumfwile? 6 Tontonkanyeni pali Abrahamu, “atetekele Yehova,* kabili Lesa amumwene ukuti ali uwalungama.”+

7 Ukwabula no kutwishika mwalishiba ukuti abatetekela e bana ba kwa Abrahamu.+ 8 Nomba pa mulandu wa kuti ilembo lyalimwenene kabela ukuti Lesa ali no kulungamika abena fyalo pa mulandu wa citetekelo, lyabilile imbila nsuma kuli Abrahamu aliti: “Muli iwe e mo inko shonse shikapaalilwa.”+ 9 E ico abatetekela balepaalilwa pamo na Abrahamu uwali ne citetekelo.+

10 Abo bonse abashintilila pa Mafunde balitiipwa, pantu calembwa aciti: “Onse uushikonka fyonse ifyalembwa mu cimfungwa ca Mafunde kabili uushificita+ abe uwatiipwa.” 11 Kabili calimoneka fye ukuti takwaba umuntu uo Lesa+ engamona ukuti alilungama pa mulandu fye wa mafunde, pantu “uwalungama akaba no mweo pa mulandu wa kukwata icitetekelo.”+ 12 Nomba Amafunde tayashintilila pa citetekelo. Lelo yatila, “onse uuyakonka+ akaba no mweo.” 13 Kristu alitushitile,+ pa kuti atulubule+ ku citiipu ca Mafunde pa mulandu wa kuti e watiipilwe mu cifulo ca kuti ifwe nifwe tutiipwe, pantu calembwa aciti: “Abe uwatiipwa onse uo bakobeka pa cimuti.”+ 14 Ici cacitike pa kuti ipaalo ilyo Lesa alaile Abrahamu lifike na ku bena fyalo ukupitila muli Kristu Yesu,+ na pa kuti twingapokelela umupashi+ wa kwa Lesa pa mulandu wa citetekelo cesu.

15 Bamunyinane, ndelanda pa fyo fwe bantu tucita: Abantu nga bapangana icipangano nangu fye muntu umo acikosha, takuba uwingonaula ico cipangano nelyo uwingalundako. 16 Nomba abo Lesa alaile amalayo ni Abrahamu no mwana*+ wakwe. Ilembo talitila, “na ku bana* bobe,” kwati bengi. Lelo litila, “na ku mwana* obe,” e kutila umo, no yu umo ni Kristu.+ 17 Kabili ndetila: Amafunde ayaishilebako pa numa ya myaka 430+ ukutula apo Lesa apangile icipangano, tayalenga icipangano ico apangile kale caleka ukubomba pa kuti ifyo alaile fikafikilishiwa. 18 Pantu nga ca kuti ubupyani bwashintilila pa kukonka amafunde, ninshi nomba tabwashintilila pa bulayo; lelo Lesa alipeela Abrahamu ubupyani no mweo onse ukupitila mu bulayo.+

19 Nomba cinshi kwabelele Amafunde? Icalengele yabeko, ni pa kuti bumpulamafunde bumoneke,+ mpaka umwana* uo balaile akese;+ kabili Lesa apeele bamalaika+ Amafunde e lyo bamalaika bapeela abantu aya Amafunde ukupitila muli kawikishanya.+ 20 Nomba nga ca kuti muntu umo fye alelaya, tapakabila ukuba kawikishanya. E ico Lesa ilyo alelaya ali fye eka. 21 Nomba bushe Amafunde yalapusana ne fyo Lesa alaya? Nakalya! Pantu nga ca kuti abantu balipokelele amafunde ayali no kulenga baba no bumi, ninshi amafunde yene aya yali no kulenga abantu baba abalungama. 22 Lelo Amalembo yalangilila ukuti abantu baishileba abasha ba lubembu, pa kuti abakwata icitetekelo bakapokelele ifyo Lesa alaya, ifyo bengapokelela fye nga batetekela Yesu Kristu.

23 Lelo ilyo icitetekelo cali tacilafika, twaletungululwa na mafunde, yatutekele kwati bafungwa ilyo twalelolela icitetekelo icali no kusokololwa.+ 24 E ico Amafunde yaishileba kasambilisha uwa kututungulula kuli Kristu,+ pa kuti twingaba abalungama pa mulandu wa citetekelo.+ 25 Lelo apo icitetekelo caliisa,+ twalileka ukutungululwa na kasambilisha.+

26 Na kuba, imwe bonse muli bana ba kwa Lesa+ pantu mwalikwata icitetekelo muli Kristu Yesu.+ 27 Apo bonse mwalibatishiwa kabili mwalikatana na Kristu,+ mulamupashanya.* 28 Takwaba ati uyu muYuda e lyo uyu muGriki,+ takwaba ati uyu musha e lyo uyu muntungwa,+ takwaba ati uyu mwaume e lyo uyu mwanakashi,+ pantu imwe bonse mwalikatana muli Kristu Yesu.+ 29 Kabili nga ca kuti muli basambi ba kwa Kristu, ninshi cine cine muli bana*+ ba kwa Abrahamu, muli mpyani+ ukulingana no bulayo.+

4 Nomba ndetila, nga ca kuti impyani icili yaice taipusana no musha, nangu ca kuti e iba iyine ya fyonse, 2 lelo itungululwa na bacilolo na babomfi ba mu ng’anda mpaka ubushiku ubo wishi asalila libela bwafika. 3 Ifi fine e fyo cali na kuli ifwe. Ilyo twali abaice, ifya bwaice ifya muli ici calo+ fyalitutekele ubusha. 4 Lelo ilyo inshita yakumene, Lesa atumine Umwana wakwe, uo umwanakashi+ aishilefyala kabili uwafyalilwe mu mafunde,+ 5 pa kuti ashite abatekwa na mafunde+ kabili abalubule, na pa kuti tube abana.+

6 Nomba apo muli bana, Lesa alituma umupashi+ wa Mwana wakwe pa kuti ube mu mitima yesu+ kabili ulabilikisha auti: “Abba,* Tata!”+ 7 E ico nomba, tamuli basha lelo muli bana; e lyo nga muli bana, ninshi na imwe bene Lesa+ alilenga mwaba impyani.

8 Lelo ilyo mushilaishiba Lesa, mwali abasha ba balesa ba bufi. 9 Lelo apo nomba mwalishiba Lesa, nelyo ntile apo nomba Lesa alimwishiba, mulandu nshi mulebwelela ku fya bwaice ifya fye+ kabili ifishafwa kantu no kufwaya ukulafibombela na kabili?+ 10 Mwabika sana amano ku kusefya inshiku, imyeshi,+ inshita ne myaka. 11 Ninsakamana pa mulandu wenu, pantu nalimo naicushishe fye pa kumubombela.

12 Mwe bamunyinane, ndemupaapaata ndeti, beni ifyo naba, pantu na ine wine nali nga imwe.+ Tapali nangu cimo ico mwandufyenye. 13 Lelo mwalishiba ukuti ubulwele bwandi e bwalengele mbile imbila nsuma kuli imwe pa muku wa kubalilapo. 14 Kabili nangu ca kuti ubulwele bwandi bwali bwesho kuli imwe, tamwansaalwile kabili tabwamuselawishe;* lelo mwampokelele nga malaika wa kwa Lesa, nga Kristu Yesu. 15 Bushe insansa isho mwakwete shili kwi? Pantu ndelanda fye icishinka, acilacitika nga mwalilobwelemo amenso yenu no kumpeela.+ 16 E ico, bushe naba umulwani wenu pa mulandu wa kuti nimweba icishinka? 17 Balimupimpila, te pa mulandu wa kuti balafwaya ukumucitila ifisuma, lelo ni co bafwaya ukumutalusha kuli ine, pa kuti e bo mulefwaisha ukulakonka. 18 Nomba kuti cawama nga ca kuti lyonse abamupimpila, balemupimpilila pa mulandu wa kuti balefwaya ukumucitila ifisuma, lelo te lintu fye ndi na imwe. 19 Mwe twana+ twandi, nimwe ndeculila na kabili filya umwanakashi uulepaapa acula, mpaka icipasho ca kwa Kristu cikamonekele muli imwe. 20 Kuti nafwaya ukuba na imwe ili line, pa kuti naishiba inshila ya kulandilamo na imwe, pantu namumpesha amano.

21 Njebeni, bushe mwe bafwaya ukulatekwa na mafunde tamumfwa ifyo Amafunde yalanda? 22 Ku ca kumwenako calembwa ukuti, Abrahamu akwete abana abaume babili, umo mu mukashana umusha+ e lyo umbi mu mwanakashi+ umuntungwa; 23 lelo uwa mu mukashana umusha afyelwe fye ififyalwa abantu bonse,+ e lyo uwa mu mwanakashi umuntungwa ena afyelwe ukulingana no bulayo.+ 24 Ifi fintu fyaba cilangililo; pantu aba banakashi bemininako ifipangano fibili. Hagari uufyala abana ba mu busha, emininako icipangano ca mu lupili lwa Sinai.+ 25 Uyu wine Hagari, emininako ulupili lwa Sinai+ ulwaba mu Arabia, kabili emininako Yerusalemu iyabako pali ino nshita, pantu ena na bana bakwe baba mu busha. 26 Lelo Yerusalemu uwaba mu muulu ena muntungwa, kabili e nyinefwe.

27 Pantu calembwa ukuti: “Sansamuka we mwanakashi uushikwata abana; punda no kusekelela, we mwanakashi uushaumfwapo ubukali bwa pa kupaapa; pantu abana ba mwanakashi uo balekelesha bengi nga nshi ukucila abana ba mwanakashi uwakwata umulume.”+ 28 Nomba imwe bamunyinane, muli bana ba bulayo nga filya fine na Isaki aali.+ 29 Lelo nga filya fine cali pali ilya nshita, uwafyelwe nge fifyalwa abantu bonse, atendeke ukucusha uwafyelwe ku maka ya mupashi,+ kabili ifi fine e fyo cili na pali ino nshita.+ 30 Nomba bushe ilembo litila shani? Litila, “Tamfya uyu mubomfi umukashana no mwana wakwe umwaume, pantu umwana wa uyu mubomfi takabe impyani pamo no mwana mwaume uwa mwanakashi+ umuntungwa.” 31 E ico bamunyinane, tatuli bana ba mubomfi umukashana, lelo tuli bana ba mwanakashi umuntungwa.

5 Kristu alitulubwile pa kuti tube no bu buntungwa. E ico iminineni ndi,+ kabili mwisumina ukuti bamubike mwi koli lya busha+ na kabili.

2 Moneni! Ine ne Paulo, ndemweba nati nga mwasembululwa, ninshi ico Kristu acita cikaba ca fye kuli imwe.+ 3 Ndebwekeshapo ukweba umuntu onse uulefwaya ukusembululwa ukuti afwile no kulakonka Amafunde+ yonse. 4 Mwalifuma kuli Kristu, mwe bafwaya ukuba abalungama pa mulandu wa mafunde;+ kabili mwali-italusha ku cikuuku cakwe icaibela. 5 Apo tutungululwa no mupashi, tulelolela ifyo tusubila pa mulandu wa kuba abalungama pantu twalikwata icitetekelo. 6 Pantu ku basambi ba kwa Kristu Yesu, ukusembululwa nelyo ukukanasembululwa takwaba kantu,+ kano icitetekelo icilenga umuntu alacita ifilanga ukuti alikwata ukutemwa.

7 Mwalebutuka fye bwino.+ Nani alengele muleke ukulakonka icine? 8 Uwalengele muleke te Lesa uwamwitile. 9 Icitutumushi icinono citutumusha umufuba+ onse. 10 Nincetekela ukuti imwe mwe baba muli Shikulu+ tamwakakonke fimbi; lelo uulemufulunganya+ akapingulwa, nangu abe ni nani. 11 Lelo ine mwe bamunyinane, nga ncili ndebila pa kusembululwa, ninshi cinshi bacili bancushisha? Ifi nga e fyo caba, ninshi icimuti ca kucushiwilwapo*+ icipunwisha abantu balicifumyapo. 12 Kuti cawama nga ca kuti abalefwaya ukumufulunganya baitungula abene.*

13 Mwe bamunyinane, bamwitile pa kuti mube abantungwa; nomba mwileka ubu buntungwa bulenge mulekonkelela fye ifyabipa ifyo mufwaya,+ lelo mulebombela abanenu+ pa mulandu wa kuti mwalibatemwa. 14 Pantu Amafunde yonse yashintilila pe funde limo* ilitila: “Uletemwa umunobe nge fyo waitemwa we mwine.”+ 15 Lelo nga mwatwalilila ukulasumana no kulacenana,+ mucenjele epali mwaipayana.+

16 Lelo ndetila, Muletungululwa no mupashi,+ nga mulecita ifi ninshi tamwakalekonkelela ififwaya imitima yenu nangu panono.+ 17 Pantu ififwaya imitima fyalipusana ne fifwaya umupashi, ififwaya umupashi na fyo fyalipusana ne fifwaya imitima, pantu ifi fibili fyalipusana. E co mushakwatila amaka ya kucita ifyo mufwaya.+ 18 Kabili nga mutungululwa no mupashi, ninshi tamutungululwa na mafunde.

19 Nomba imicitile ya muntu umubembu yalishibikwa bwino bwino. Ni yi: Ubulalelale,*+ ukukowela, ifya nsoni,*+ 20 ukupepa utulubi, ukupupa imipashi,*+ ukupatana, ifikansa, akalumwa, icipyu, ulubuli, amalekano, ifyakaniko, 21 umufimbila, bucakolwa,+ iciwowo, ne fyapala ifi.+ Ndemusokela libela pali ifi fintu, filya namusokele kale, ukuti abacita ifya musango uyu tabakengile mu Bufumu bwa kwa Lesa.+

22 Lelo ifisabo fya mupashi ni fi, ukutemwa, ukusekelela, umutende, ukutekanya,* icikuuku, ubusuma,+ icitetekelo, 23 ukufuuka, no kuilama.+ Tapaba ifunde nangu limo ililesha ifya musango uyu. 24 Na kabili, abasambi ba kwa Kristu Yesu balipoopela ififwaya imitima no lunkumbwa+ lwa iko pa cimuti.

25 Nga ca kuti imikalile yesu yalilingana ne fifwaya umupashi, natutwalilile ukukonka ifyo umupashi+ ututungulula. 26 Twilaba na matutumuko,+ twilacita ifingalenga twalacimfyanya,+ twilafimbilana.

6 Mwe bamunyinane, umuntu nga alufyanya mu kukanaishiba, imwe mwe bafikapo ukulingana na maka ayo umupashi upeela,+ mule-esha ukulungika uwa musango uyo.+ Lelo na imwe cila muntu afwile ukuba uwacenjela pantu limbi kuti mwatunkwa.+ 2 Twalilileni ukulasendelana ifisendo.+ Nga mulecita ifi ninshi mulekonka ifunde lya kwa Kristu.+ 3 Pantu nga ca kuti umuntu aleimona ukuti pali ico aba e lyo ninshi tapali ico aba,+ ninshi aleibepa fye. 4 Lelo cila muntu aleiceeceeta pa kuti alemona nga ca kuti ifyo acita+ fyaliba fye bwino, e lyo akasekelela pa fyo acita, te kuilinganya ku muntu umbi.+ 5 Pantu cila muntu akaisendela icipe+ cakwe umwine.*

6 Kabili onse uo basambilisha icebo ca kwa Lesa afwile ukulacitako fyonse ifisuma ifyo uumusambilisha+ acita.

7 Mwilufiwa: Lesa tatumpikwa. Pantu ico umuntu alebyala, e co akasombola;+ 8 pantu uulebyala ukulingana ne fyo umutima wakwe ufwaya, akasombola imfwa, lelo uulebyala ukulingana ne fyo umupashi+ ufwaya, akasombola umweo wa muyayaya. 9 E ico twinenuka ukucita ifisuma, pantu mu nshita yalinga tukasombola ifisuma nga tatutompweke.*+ 10 E ico kanshi lyonse ilyo twakwata inshita, tulecitila bonse ifisuma, lelo maka maka abatetekela banensu.

11 Moneni ifilembo ubukulu ifyo namulembela ku minwe yandi.

12 Bonse abafwaya abantu balebatasha,* e bamupatikisha ukuti mufwile ukusembululwa. Ico bacitila ifi ni co tabafwaya ukucula pa mulandu wa cimuti ca kucushiwilwapo* ica kwa Kristu. 13 Pantu nangu fye bantu abalesembululwa tabakonka Amafunde,+ lelo bafwaya imwe musembululwe pa kuti fye baleitakishisha pali imwe. 14 Lelo ine nshakatale njitakisha, kano fye ukuitakishisha pa cimuti ca kucushiwilwapo* ico Shikulwifwe Yesu Kristu+ afwililepo. Pa mulandu wa kwa Kristu, ine mona ukuti icalo califwa,* kabili icalo na co cimona ukuti nalifwa. 15 Pantu ukusembululwa kwa fye no kukanasembululwa+ nako kwine kwa fye, lelo icacindama kuba umuntu umupya.+ 16 Kabili bonse abakonka ili funde, e kutila bonse abapanga Israele ya kwa Lesa,+ babe no mutende kabili Lesa abomfwile uluse.

17 Nomba ukutula lelo umuntu nangu umo elancusha, pantu nalikwata imikofu iilanga ukuti ndi musha wa kwa Yesu.+

18 Icikuuku icaibela ica kwa Shikulwifwe Yesu Kristu cibe na imwe bamunyinane, pa mulandu wa mibele yenu iisuma. Ameni.