KALATA KU BENA EFESE

1 Ine ne Paulo, ne o Lesa asalile ukuba umutumwa wa kwa Kristu Yesu ukulingana ne fyo afwaya, nalembela imwe mwe ba mushilo abali mu Efese+ kabili aba cishinka muli Kristu Yesu, ndeti:

2 Icikuuku icaibela no mutende ukufuma kuli Lesa Shifwe na Shikulu Yesu Kristu fibe nenu.

3 Acindikwe Lesa kabili Wishi wa kwa Shikulwifwe Yesu Kristu, pantu alitupeela amapaalo ya mupashi mu muulu pa mulandu wa kuti tulakonka Kristu.+ 4 Lesa alitusalile ukuti tube pamo nankwe* ilyo icalo tacilabako, pa kuti tube aba mushilo kabili ababula akalema+ pa cinso cakwe pa mulandu wa kuti twalimutemwa. 5 Pantu Lesa alitusaliile+ libela pa kuti tube abana bakwe+ ukupitila muli Yesu Kristu. Ico acitile ifi ni co e fyo atemenwe fye kabili e fyo alefwaya,+ 6 pa kuti Lesa alumbanishiwe pa cikuuku cakwe icaibela+ icikalamba ico atulangile ukupitila mu Mwana wakwe uo atemwa.+ 7 Kristu alitulubula ukupitila mu mulopa wakwe,+ kabili umulopa wakwe walenga tubelelwe uluse pa membu shesu,+ ukulingana no bukulu bwa cikuuku ca kwa Lesa icaibela.

8 Alitulangile ici icikuuku icaibela no kutupeela amano yonse kabili alilenga tuleiluka, 9 pantu alefwaya twishibe inkaama+ ya fyo afwaya. Inkaama ya kwa Lesa* yalilingana ne fyo umwine apanga 10 ifya kubikako ubutungulushi* ilyo inshita yalinga yafika, pa kuti engalonganika ifintu fyonse muli Kristu, ifya mu muulu ne fya pano isonde.+ Cine cine, ukufilonganikila muli ena, 11 uo Lesa atusaliilemo pa kuti tube impyani,+ pantu Lesa atusaliile libela pa kuti acite fyonse ifyo alepanga ukucita ukulingana ne fyo afwaya, 12 pa kuti fwe babalilepo ukusuubila muli Kristu, tulecita ifingalenga abantu balalumbanya Lesa kabili balamucindika. 13 Lelo na imwe mwasuubile muli Kristu ilyo mwaumfwile icebo ca cine, e kutila imbila nsuma iya kumupususha. Ilyo mwatetekele Kristu, Lesa alimupeele icishibilo+ ilyo amusubile no mupashi wa mushilo uo alaile, 14 umupashi wa mushilo e cikatilo* icilenga tushininkishe ukuti Lesa akatupeela ico atulaya ukupyana,+ pa kuti akalubule abantu bakwe.+ Ne ci cikalenga bakalemulumbanya+ pa mulandu wa bukata bwakwe.

15 E ico na ine apo nalyumfwa ukuti mwalitetekela Shikulu Yesu kabili mulalanga ukuti mwalitemwa aba mushilo bonse, 16 nshaleka ukutootela Lesa pa mulandu wenu. Nalitwalilila ukumupepelako, 17 ukuti Lesa wa kwa Shikulwifwe Yesu Kristu, Shifwe wa bukata, engalamupeela umupashi pa kuti mulekwata amano kabili muleishiba bwino ifyo asokolola.+ 18 Alilenga amenso yenu* yamona isubilo ilyo amupeela, amapaalo ayengi ayo akapeela aba mushilo,+ 19 na pa kuti mumone ifyo amaka ayabombela muli ifwe fwe batetekela+ yakula. Ifyo amaka yakwe yakula fyalimoneke, 20 ilyo abuushishe Kristu ku bafwa no kumuteka ku kuboko kwakwe ukwa ku kulyo+ ku muulu. 21 Nomba alimucindamika, alimupeela ubufumu ubwacila sana ubuteko bonse no butungulushi bonse na maka yonse na bukateka bonse ne shina lyonse ililumbulwa,+ te muli buno bwikashi* fye, lelo na mu bwikashi ubukesa. 22 Na kabili Lesa alengele ukuti fyonse fibe pe samba lya makasa yakwe,+ kabili alengele aba umutwe wa fintu fyonse mu cilonganino.+ 23 Icilonganino e mubili wa kwa Kristu,+ kabili e ulenga ifintu fyonse mu cilonganino fileba ifyakumanina.

2 Na kabili, Lesa alengele mube no mweo nangu ca kuti kale mwali abafwa pa mulandu wa filubo fyenu ne membu,+ 2 ifyo mwalecita kale ilyo mwaleikala ukulingana no bwikashi bwa cino calo,+ kabili ukulingana na kateka wa bufumu bwa mu lwelele,+ e kutila umupashi+ uyo nomba ulebombela mu bana bacintomfwa. 3 Kwena pa nshita imo na ifwe bene e fyo twali lilya twalekonkelela ulunkumbwa lwa mibili yesu,+ ilyo twalecita ifyo imibili yesu na matontonkanyo yesu+ fyalefwaya, kabili mu cifyalilwa fye Lesa ali no kutukanda+ nge fyo ali no kukanda bonse abashala. 4 Lelo apo Lesa alikwatisha uluse,+ kabili pa mulandu wa kuti alitutemwa nga nshi,+ 5 alengele twaba aba mweo pamo na Kristu, na lintu fye twali abafwa pa mulandu wa filubo fyesu+—icikuuku icaibela ica kwa Lesa e calenga mupusuke. 6 Na kabili, alitubuushishe capamo nankwe kabili alitupeele ififulo fya kwikalapo mu muulu pantu alitwikatanya na Kristu Yesu.+ 7 Ico Lesa acitiile ifi, ni pa kuti mu nshita iikesa* akatulange icikuuku cakwe icaibela icikalamba ilyo akatucitila ifisuma pa mulandu wa kuti tuli basambi ba kwa Kristu Yesu.

8 Pantu icikuuku icaibela ica kwa Lesa e calenga mupusuke pa mulandu wa kuti mwalikwata icitetekelo.+ Te pa mulandu wa fyo mucita; lelo ni pa mulandu wa bupe fye bwa kwa Lesa. 9 Kanshi te pa mulandu wa milimo yenu,+ pa kuti umuntu nangu umo e kwata apa kuitakishisha. 10 Lesa e watubumbile+ kabili apo tuli basambi ba kwa Kristu Yesu,+ atubumbile pa kuti tulebomba imilimo iisuma, iyo Lesa apekanishishe libela.

11 E ico muleibukisha ukuti kale mwali abena fyalo, kabili abantu abo beta ukuti “abasembululwa,” balemwita ukuti “abashasembululwa” pa mulandu fye wa kuti bena balibasembulwile ku bantunse. 12 Pali ilya nshita tamwaishibe Kristu, mwalipaatwilweko ku luko lwa bena Israele, tamwalimo mu fipangano umo Lesa alaile abantu bakwe ifyo aali no kubacitila;+ tamwakwete isubilo kabili tamwaishibe Lesa muli ici calo.+ 13 Lelo nomba mwe basambi ba kwa Kristu Yesu, mwe batalwike kuli Lesa pa nshita imo, umulopa wa kwa Kristu walilenga mwapalama kuli ena. 14 Pantu Kristu e walenga tube no mutende,+ e walenga abaYuda na bena fyalo babe pamo,+ kabili e wabongolwele icibumba icali pa kati icabapaatukenye.+ 15 Ilyo atuulile umubili wakwe ilambo afumishepo ubulwani, e kutila Amafunde, umwali ifipope pa kuti bonse abaYuda na bena fyalo abasambi bakwe babe umuntu umo umupya+ kabili babe no mutende, 16 na pa kuti alenge abaYuda na bena fyalo babe umubili umo kabili babwelele kuli Lesa, pa mulandu wa cimuti ca kucushiwilwapo,*+ pantu ilyo afwile alifumishepo ubulwani.+ 17 Kabili alishile no kubila imbila nsuma ya mutende kuli imwe, mwe bali ukutali, na ku bali mupepi, 18 pantu muli Kristu e mo ifwe bonse, abaYuda na bena fyalo tupalaminina kuli Shifwe mu mupashi umo.

19 E ico nomba tamuli beni kabili tamuli balebeshi,+ lelo muli bana calo pamo na ba mushilo+ kabili muli ba mu ng’anda ya kwa Lesa,+ 20 kabili mwakuulwa pa mufula wa batumwa na bakasesema,+ e lyo Kristu Yesu umwine e libwe lya pa koona ilya mufula wa kukuulapo.+ 21 Muli Kristu e mo icikuulwa conse icalundinkana bwino bwino+ cilekuulilwa pa kuti cibe itempele lya mushilo ilya kwa Yehova.*+ 22 Kabili muli Kristu mwine e mo na imwe mwe bena fyalo mulekuulilwa pamo, pa kuti mube ica kwikalamo Lesa ukupitila mu mupashi.+

3 Pali uyu wine mulandu, ine ne Paulo, umufungwa+ wa kwa Kristu Yesu pa mulandu wenu, mwe bena fyalo— 2 nga ca kuti cine cine mwalyumfwa ukuti Lesa alimpeela umulimo wa kumwafwa+ pa kuti mwinganonkelamo mu cikuuku cakwe icaibela, 3 ukuti ukupitila mu fyo bansokolwelele, Lesa alengele naishiba inkaama yakwe, nga filya fine nembeleko panono. 4 E ico nga mwabelenga ifi, kuti mwailuka ifyo naishiba pa nkaama ya kwa Lesa,+ iya pali Kristu. 5 Mu nkulo ishapitapo, Lesa tasokolwelele abana ba bantu iyi nkaama, nge fyo asokolwela abatumwa na bakasesema ba mushilo ukupitila mu mupashi,+ 6 pa kuti ukupitila mu kuba abasambi ba kwa Kristu Yesu na mu mbila nsuma, abena fyalo babe impyani shinensu kabili babe ifilundwa fya mubili umo wine,+ na pa kuti tulelolelela pamo nabo ifyo Lesa atulaya. 7 Naishileba umubomfi wa iyi nkaama ukulingana ne cikuuku caibela ica kwa Lesa ico anangile. Ampeele ubu bupe ubwa cikuuku cakwe icaibela ukupitila mu maka yakwe.+

8 Ine ne muntu uwacepesha pa ba mushilo bonse,+ Lesa anangile icikuuku cakwe icaibela,+ pa kuti ningabila imbila nsuma ku bena fyalo pa mapaalo ya kwa Kristu ayo umuntu nangu umo ashingapenda, 9 na pa kuti nenge abantu bamone ifyo Lesa uwabumbile ifintu fyonse alesokolola inkaama yakwe+ iyo asungile pa myaka iingi. 10 E pa kuti nomba ukupitila mu cilonganino cakwe,+ bakateka na ba maka bonse aba mu muulu beshibe inshila ishalekanalekana isho amano ya kwa Lesa yamonekelamo.+ 11 Ifi fyalilingana ne fyo Lesa afwaya ifibelelela ifyo apangile ukucita ukupitila muli Kristu+ Yesu Shikulwifwe. 12 Uyu wine e walenga tulelanda ukwabula umwenso kabili e walenga tulepalama kuli Lesa+ pantu twalimucetekela. 13 E ico ndemulomba ukuti, mwikanenuka pa mulandu wa macushi ayo nkwata pa mulandu wenu, pantu yakalenga mukabe no bukata.+

14 Ni pali uyu mulandu mfukamina Shifwe, 15 uo ulupwa lonse mu muulu na pano isonde lwainikwako ishina, 16 ndelomba Lesa ukuti apo e wakwata sana ubukata alenge imitima yenu ibe iyashipa+ ukupitila mu mupashi wakwe, 17 no kuti Kristu aleikala mu mitima yenu pa mulandu wa kuti mwalikwata icitetekelo kabili mwalimutemwa.+ Ndepepa no kuti mube abalimbwa+ kabili abakuulwa pa mufula,+ 18 pa kuti imwe pamo na ba mushilo bonse mukwate amaka sana aya kumfwikisha ubwipi, ubutali, ukusansuka no kushika kwa cine, 19 kabili mwishibe ukutemwa kwa kwa Kristu+ ukwacila pa kwishiba, pa kuti mukwate imibele yonse iyo Lesa apeela.

20 Nomba Lesa ukulingana na maka yakwe ayabombela muli ifwe,+ kuti acita ukucila na pa fyo twingamulomba nelyo pa fyo twingatontonkanyapo.+ 21 E ico nacindikwe ukupitila mu cilonganino na muli Kristu Yesu mu nkulo shonse umuyayaya umuyayaya. Ameni.

4 E ico ine, ne mufungwa+ muli Shikulu, ndemupaapaata ukuti muleikala ukulingana+ no bwite ubo Lesa amwita. 2 Muleicefya nga nshi+ kabili muleba abafuuka, muleba abatekanya+ kabili muleshipikishanya pa mulandu wa kutemwa.+ 3 Muleibikilishako pa kuti mutwalilile ukuba abaikatana nga fintu umupashi walenga mwaba abaikatana mu mutende uwikatanya.+ 4 Kwaba umubili umo,+ no mupashi umo,+ nga filya fine mwasuubile mwi subilo limo+ ilyo bamwitile; 5 Shikulu umo,+ icitetekelo cimo, ulubatisho lumo; 6 Lesa umo kabili Wishi wa bantu bonse, uwaba pa muulu wa bantu bonse, uubombela muli bonse kabili uwaba muli bonse.

7 Nomba ifwe bonse umo umo twapokelele icikuuku icaibela ica kwa Lesa ukulingana ne fyo Kristu atwakenye ici ica bupe.+ 8 Pantu Amalembo yatila: “Ilyo aninine ukuya ku cifulo icasansuka asendele bankole; kabili apeele na bantu ukuba ifya bupe.”+ 9 Nomba ni mwi ishiwi lya kuti “aninine,” lyalola nga te mu kutila abalile aikila panshi, e kutila pano isonde? 10 Uyu wine uwaikile e waninine+ acila ne myulu yonse,+ pa kuti afikilishe ifintu fyonse.

11 Kabili bamo abapeele umulimo wa kuba abatumwa,+ bamo bakasesema,+ bamo bakabila ba mbila nsuma,+ bamo bakacema na bakasambilisha,+ 12 pa kuti balelungika* aba mushilo, balebombela abantu, balekuula umubili wa kwa Kristu,+ 13 mpaka bonse tukekatane mu citetekelo na mu kwishiba bwino bwino Umwana wa kwa Lesa, pa kuti twingaba abakalamba,+ ukufika ku ciimo ca kwa Kristu. 14 E ico tatulingile ukutwalilila ukuba nga bana, kabili tatulingile ukuleka umwela onse uwe sambilisho lya bucenjeshi bwa bantu,+ nelyo umucenjelo wa mapange yalubana fyalatusenda nga filya amabimbi yasenda no kututwala uku no ku. 15 Lelo tulelanda icine, natutwalilile ukukula mu fintu fyonse pa kuti tulepashanya Kristu uwaba umutwe wesu+ pa mulandu wa kuti twalikwata ukutemwa. 16 Muli ena e mo umubili onse+ walundinkanina bwino bwino no kubombela pamo mu mfyufyu shonse, fyonse ifilekabilwa. Nga ca kuti cila cilundwa cilebomba bwino, umubili ulakula kabili ulaikuula pa mulandu wa kutemwa.+

17 E ico ndemweba ifi no kumukonkomesha muli Shikulu ndeti, mwilaenda ifyo abena fyalo benda+ mu buwelewele bwa mano yabo.+ 18 Amatontonkanyo yabo yaba mu mfifi, kabili balitaluka ku mweo uufuma kuli Lesa, pantu tabaishiba nangu kamo, kabili imitima yabo yalitalama. 19 Apo tabakwete imibele iisuma nangu imo, balecita ifya nsoni*+ pa kuti balecita ifyakowela fyonse mu bufunushi.

20 Lelo imwe te fyo mwasambilile ukuti ifi e fyo Kristu aba, 21 nga cine cine mwalimumfwile kabili e wamusambilishe, ukulingana ne cine ico Yesu umwine asambilishe. 22 Bamusambilishe ukuti mufuule ubuntu bwa kale+ ubwalingana ne mibele yenu iya kale kabili ubuleonaikila pamo no lunkumbwa lwa buko ulwa bucenjeshi.+ 23 Kabili mulingile ukutwalilila ukwaluka mu fyo mutontonkanya,*+ 24 na kabili, mufwile ukufwala ubuntu bupya+ ubo Lesa alengele bwabako ukulingana ne fyo afwaya. Nga mulecita ifi ninshi mulecita ifyalungama kabili ninshi muli ba cishinka.

25 E ico apo nomba mwalipoosa ubufi, mulelanshanya icine na banenu,+ pantu tuli filundwa fya mubili umo.+ 26 Kalipeni, lelo mwibembuka;+ mwileka akasuba kawe mucili fye abakalipa;+ 27 mwilapeela Satana Kaseebanya apa kwikala.+ 28 Uwiba aleke ukwiba; lelo alebombesha, alebomba imilimo iisuma*+ pa kuti engalakwata ifya kupeelako uushikwete.+ 29 Mwilaleka amashiwi ayabola yalefuma mu tunwa twenu,+ kano amashiwi ayasuma aya kukoselesha ukulingana ne fyo abantu balekabila, pa kuti yengalakoselesha abaleumfwa.+ 30 Na kabili mwilakalifya umupashi wa mushilo uwa kwa Lesa.*+ Lesa abomfeshe uyu mupashi pa kumupeela icishibilo+ ica kumupususha mu bushiku bwa kumulubula ukubomfya icilubula.+

31 Tekwesha nangu panono ukuba ne mpatila,+ icipyu, ubukali kabili tekwesha nangu panono ukusasuka, ukuba no musaalula+ kabili mwilacita ifyabipa ifya misango yonse.+ 32 Lelo muleba ne cikuuku ku banenu, mulelangulukilako abanenu,+ muleitemenwa ukubelelana uluse filya na Lesa aitemenwe ukumubelela uluse pa mulandu wa kwa Kristu.+

5 E ico mulepashanya Lesa,+ apo muli bana bakwe abo atemwa, 2 kabili muletemwana,+ nga filya fine na Kristu atutemenwe*+ no kuituula kuli Lesa pa mulandu wesu* ngo mutuulo kabili nge lambo ilya kutwala akacena akasuma kuli Lesa.+

3 Ubulalelale* no kukowela kwa misango yonse nelyo ubufunushi tekwesha no kulafilumbula apo muli,+ filya fine abantu ba mushilo bafwile ukuba;+ 4 tekwesha ukuba ne mibele ya nsoni nangu imilandile ya buwelewele nangu imipuulwe yabipa.+ Ifi fintu tafyawama—lelo muletootela Lesa.+ 5 Pantu mwalishiba bwino bwino ukuti, uucita ubulalelale*+ nangu uwakowela nangu umufunushi+ e kutila uupepa utulubi, takengile mu Bufumu bwa kwa Kristu no bwa kwa Lesa.+

6 Mwilaleka umuntu nangu umo alemubepa ku mashiwi ya fye, pantu ni pa mulandu wa fintu fya musango uyu ubukali bwa kwa Lesa buleishila pa bana bacintomfwa. 7 E ico mwilacitako ifi bacita;* 8 pantu kale mwali imfifi, lelo nomba muli lubuuto+ pa mulandu wa kuti muli ba kwa Shikulu.+ Twalilileni ukwenda nga bana ba lubuuto, 9 pantu ulubuuto lwena luleta ifisuma ifya misango yonse, ubulungami ne cishinka.+ 10 Lyonse muleshininkisha ukuti ifyo mulecita kuti fyasekesha+ Shikulu; 11 kabili lekeni ukucitako ifyo bacita ifya mu mfifi;+ lelo mulesokolola ifyo bacita. 12 Pantu ifyo bacita mu bumfisolo ca nsoni no kufilumbula. 13 Nomba ifintu fyonse ifisokoloka, lubuuto e lufisokolola. Kanshi ifintu fyonse ifyasokoloka fiba lubuuto. 14 E ico Amalembo ya Mushilo yatila: “Shibuka we uleele, kabili ima ku bafwa,+ na Kristu akasanika pali iwe.”+

15 Kanshi muleba abacenjela, mwilaenda kwati bawelewele, lelo mule-enda nga ba mano, 16 mulebomfya bwino inshita yenu,+ pantu ishi ni nshiku ishabipa. 17 E ico lekeni ukuba nga bashakwata amano, lelo muleiluka ico Yehova* afwaya mulecita.+ 18 Na kabili, mwilakolwa umwangashi+ uulenga abantu balaipoosaika, lelo muleba no mupashi.* 19 Ilyo mulelanshanya mulelanda amashiwi ya mu malumbo, mulelumbanya Lesa kabili mulemwimbila inyimbo.+ Muleimbila Yehova*+ kabili mulemulumbanya mu mitima yenu,+ 20 lyonse muletootela+ Lesa wesu kabili Shifwe pali fyonse mwi shina lya kwa Shikulwifwe Yesu Kristu.+

21 Mulenakilana+ pa mulandu wa kuti mwaliba na katiina kuli Kristu. 22 Abakashi balenakila abalume babo+ kwati ni Shikulu balenakila, 23 pantu umulume e mutwe wa mukashi wakwe+ nga filya fine Kristu aba umutwe wa cilonganino,+ pantu e mupusushi wa uyu umubili. 24 Na kuba, filya fine icilonganino cinakila Kristu, e fyo na bakashi balenakila abalume babo muli fyonse. 25 Mwe balume, muletwalilila ukutemwa abakashi benu,+ filya na Kristu atemenwe icilonganino no kufwila pali cena,+ 26 pa kuti alenge cibe ica mushilo, no kucisangulwila ku menshi, e kutila ku cebo ca kwa Lesa,+ 27 pa kuti aituulile umwine icilonganino icisuma, icabulamo ifiko nelyo inkanshi nangu ifyapala ifi,+ lelo ica mushilo kabili icabula akalema.+

28 Ifi fine e fyo na balume bafwile ukulatemwa abakashi babo kwati mibili yabo. Umwaume uwatemwa umukashi wakwe ninshi ali-itemwa umwine, 29 pantu takwatala akuba umwaume uwapata umubili wakwe, lelo umwaume onse alaliisha umubili wakwe kabili alausunga bwino, nga filya fine Kristu na o aliisha no kusunga bwino icilonganino, 30 pantu tuli filundwa fya mubili wa kwa Kristu.+ 31 “E mulandu wine umwaume akashiila wishi na nyina no kulambatila* ku mukashi wakwe, kabili aba babili bakaba umubili umo.”+ 32 Iyi nkaama ya kwa Lesa+ ikalamba. Nomba ndelanda pali Kristu ne cilonganino.+ 33 Lelo imwe umo umo, onse afwile ukutemwa umukashi wakwe+ nge fyo aitemwa umwine; umukashi na o afwile ukuba no mucinshi sana ku mulume wakwe.+

6 Mwe bana, muleumfwila abafyashi benu+ ukulingana ne fyo Shikulu afwaya, pantu ici e calungama. 2 “Mulecindika bashinwe na banyinenwe.”+ Ili e funde lya kubalilapo ilyakwata ubulayo bwa kuti: 3 “Pa kuti ifintu filemuwamina* na pa kuti mukekale inshiku ishingi pano isonde.” 4 Na imwe mwe bashibo, mwilakalifya abana benu,+ lelo pa kubakusha mulebasalapula+ kabili mulebakonkomesha* ukulingana ne fyo Yehova* afwaya.+

5 Mwe basha muleumfwila bashikulwinwe abantunse,+ mulebacindika no kuba na katiina kuli bena. Mulecita ifi ne mitima ya cishinka, nga filya mwingacita kuli Kristu, 6 mwilacita fye ifi ilyo abantu balemumona pa kuti fye mubasekeshe,+ lelo mulecita ifi pantu muli basha ba kwa Kristu, abacita ifyo Lesa afwaya no mweo* onse.+ 7 Mulebomba no mutima uusuma, nga balebombela Yehova,*+ te balebombela abantu, 8 pantu mwalishiba ukuti cila muntu, icisuma conse ico acita, Yehova*+ akamulambwilapo, nampo nga uyo muntu musha nelyo muntungwa. 9 Na imwe mwe bashikulwibo, ifi fine e fyo mulebasunga, mwilabatiinya, pantu mwalishiba ukuti imwe e lyo na bena mwakwata fye Shikulwinwe umo uwaba mu muulu,+ kabili ena takwata akapaatulula.

10 Ica kulekeleshako, twalilileni ukukwata amaka+ muli Shikulu pantu alikwata sana amaka. 11 Fwaleni ifya kulwilamo inkondo ifya kwa Lesa fyonse+ pa kuti mwingakwata amaka ya kwiminina ndi no kulwisha imicenjelo* ya kwa Satana Kaseebanya; 12 pantu abo tushomboka*+ nabo te bantu abakwata umulopa no munofu, lelo tushomboka na mabuteko, intungulushi, bakateka ba muli cino calo icaba mu mfifi ne mipashi iyabipa+ iyaba mu muulu. 13 Kanshi ipangasheni ne fya kulwilamo inkondo ifya kwa Lesa fyonse,+ pa kuti mwingakwata amaka ya kulwisha umulwani mu bushiku bwa bubifi, kabili nga mwaipangasha bwino bwino, mwiminine ndi.

14 E ico, iminineni ndi, abaikaka icine mu misana,+ kabili abafwala ubulungami nge ca kucinga icifuba,+ 15 kabili ku makasa mufwaleko insapato sha mbila nsuma iya mutende.+ 16 Ukulunda pali ifi, muipangashe ne nkwela iikalamba iya citetekelo,+ e yo mukalashimishamo imifwi yonse iya mulilo iya mubifi.+ 17 Kabili mufwale icisote ce pusukilo,+ musende no lupanga lwa mupashi, e kutila icebo ca kwa Lesa,+ 18 pa nshita imo ine, mulepepa lyonse kuli Lesa+ mu mupashi.+ Mulepepa amapepo ya misango yonse kabili mulepaapaata mu misango yonse. Lyena muleba abalola kabili inshita yonse mulepaapaatilako aba mushilo bonse. 19 Na ine wine mulempepelako, pa kuti ningakwata ifya kulanda kabili ningalalanda ukwabula umwenso ilyo ndelenga inkaama ya kwa Lesa iya mbila nsuma ishibikwe.+ 20 Pali ino nshita ndi mu cifungo pa mulandu wa kuti ndi nkombe ya mbila nsuma.+ Kanshi mulempepelako pa kuti ningalaba uwashipa ilyo ndelanda pa mbila nsuma nge fyo mfwile ukulanda.

21 Nomba pa kuti mwishibe ifyo ndecita ne fyo ndi, natuma Tukiki,+ munyinefwe uwatemwikwa kabili umubomfi wa cishinka muli Shikulu, akesamweba fyonse.+ 22 Ici cine e co ndemutumina pa kuti ese amwebe ifyo tuli, na pa kuti ese amusansamushe.

23 Lesa Shifwe na Shikulu Yesu Kristu, bengalenga aba bwananyina babe no mutende, babe no kutemwa kabili babe ne citetekelo. 24 Icikuuku icaibela ica kwa Lesa cibe na bonse abatemwa Shikulwifwe Yesu Kristu pa mulandu wa kuti baliba no kutemwa kwa cine.