KALATA KU BENA FILIPI

1 Ine ne Paulo na Timote, fwe basha ba kwa Kristu Yesu, twamulembela mwe ba mushilo bonse muli Kristu Yesu mwe bali mu Filipi,+ pamo pene na bakangalila na babomfi batumikila,+ tuletila:

2 Icikuuku icaibela no mutende ukufuma kuli Lesa Shifwe na Shikulu Yesu Kristu fibe na imwe.

3 Lyonse ilyo namwibukisha ndatootela Lesa wandi 4 mu mapepo ya kupaapaata ilyo imupaapaatilako bonse. Ndasekelela+ lyonse ilyo ndepaapaata, 5 pa mulandu wa fyo mwa-afwilishako mu kusabankanya imbila nsuma* ukutula pa bushiku bwa kubalilapo ukufika pali ino nshita. 6 Pantu nincetekela ukuti Lesa uwatendeke umulimo uusuma pali imwe, akaupwisha+ mpaka ubushiku bwa kwa Kristu Yesu.+ 7 Nacilinga ukuti ndetontonkanya ifi pali imwe bonse. Pantu mwaba mu mutima wandi, imwe bonse mwebo Lesa alanga icikuuku cakwe icaibela pamo na ine, ilyo ndi mu cifungo+ na lintu ndecingilila no kukosha imbila nsuma+ ukulingana ne funde.

8 Pantu Lesa e waishiba ifyo imufuluka bonse pa mulandu wa kuti nalimutemwa sana nge fyo Kristu Yesu na o amutemwa. 9 Kabili ico ntwalilila ukupepelapo ca kuti, ukutemwa kwenu kulekulilako lyonse+ kabili muleishibilako bwino bwino+ no kwiluka+ ifyo Lesa afwaya; 10 ukuti mwishibe bwino bwino ifyacilapo ukucindama,+ pa kuti mube ababula akalema kabili mwilapunwisha bambi+ ukufika pa bushiku bwa kwa Kristu; 11 no kuti mube ne cisabo ca bulungami, iciishila muli Yesu Kristu,+ pa kuti Lesa abe no bukata kabili alumbanishiwe.

12 Nomba ndefwaya imwe bamunyinane mwishibe ukuti, ifyancitikile fyalilenga imbila nsuma yalunduluka, 13 ica kuti icintubwingi nacishiba+ ukuti ndi mu cifungo+ pa mulandu wa kutetekela Kristu. Na bonse Abacingilila Kateka e lyo na bantu bambi abashala nabo nabeshiba. 14 Nomba aba bwananyina abengi ababomba umulimo wa kwa Shikulu, nabaicetekela pa mulandu wa kuti ndi mu cifungo, kabili nabashipa ica kuti balebila icebo ca kwa Lesa ukwabula umwenso.

15 Ca cine, bamo baleshimikila abantu pali Kristu pa mulandu wa kuti balikwata umufimbila kabili bafwaya ukucimfyanya, lelo bambi bena ni pa mulandu wa kuti balitemwa fye imbila nsuma. 16 Aba bena babila pali Kristu pa mulandu wa kuti balikwata ukutemwa, pantu balishiba ukuti Lesa alinsonta pa kuti ndecingilila imbila nsuma;+ 17 lelo balya bambi bena babila pa mulandu wa kuti bafwaya ukucimfyanya, te pa mulandu wa kuti baliba ne cishinka, pantu bena bafwaya ndekwata amafya ilyo ndi mu cifungo. 18 Cinshi cafumamo? Icafumamo ca kuti, nampo nga ni mu kabepekesho nelyo nga ni mu cishinka, mu nshila iili yonse imbila nsuma pali Kristu ilabilwa, kabili ndasekelela pali ici. Na kuba, nkatwalilila ukusekelela, 19 pantu ninjishiba ukuti nkapusuka pa mulandu wa kuti mulampaapaatilako+ na pa mulandu wa kuti umupashi uo Yesu Kristu+ atupeela ulantungilila. 20 Ifi nafilingana ne fyo mfwaisha kabili ifyo nsubila ifya kuti takwakabe nangu cimo icikalenga nkabe ne nsoni. Ninshininkisha ukuti nkatwalilila ukulanda pali Kristu ukwabula umwenso, pa kuti Kristu engacindikwa ukupitila mu mubili wandi, nampo nga ni lintu ndi umumi nelyo nga nimfwa.+

21 Pantu ine nga ndi no mweo, mba no mweo pa mulandu wa kwa Kristu,+ kabili nga nafwa nine wine nkamwenamo.+ 22 Nomba nga natwalilila ukuba no bumi, ninshi e fisabo fya mulimo wandi; lelo kwena nshishibe ico ningasala. 23 Ifi fintu fibili filancusha, lelo ico mfwaisha kufwa no kuba pamo na Kristu,+ pantu ukwabula no kutwishika ici e cacilapo ukuwama.+ 24 Nomba kuti nafwaya natwalilila ukuba no yu wine mubili pa mulandu wenu. 25 E ico, apo nalishininkisha ifi, nalishiba ukuti nkatwalilila ukuba pamo na imwe bonse pa kuti mukalunduluke na pa kuti mukalesekelela pa mulandu wa citetekelo cenu, 26 pa kuti ilyo nkaba na imwe na kabili, mukasekelele nga nshi apo muli basambi ba kwa Kristu Yesu pa mulandu wandi.

27 Nomba muleikala ukulingana ne mbila nsuma iya kwa Kristu,+ pa kuti nga naisa no kumumona nelyo nga nshishile, nkomfwe ukuti muli abakosa ndi, aba mutima umo+ kabili ababombela pamo pa kuti mutetekele imbila nsuma. 28 Mwilatiina abalwani benu nangu panono. Ici cine e bushininkisho bwa kuti bakonaulwa,+ lelo imwe mukapusuka;+ kabili Lesa alilanga ukuti ifi e fyo cikaba. 29 Pantu imwe balimupeela ishuko, te lya kutetekela fye Kristu, lelo ne shuko lya kumuculila.+ 30 Pantu mulekwata amafya ayo mwalemona nalekwata+ kabili ayo pali ino nshita muleumfwa ukuti ncili ninkwata.

2 E ico nga kuti mwakoseleshanya muli Kristu, nga kuti mwasansamushanya pa mulandu wa kutemwa, nga kuti mwala-ampana na Bena Kristu banenu, nga kuti mwatemwana nga nshi kabili nga kuti mwalalangulukilana, 2 ninshi mulecita ifi fine pa kuti mulelenga ndesekelela nga nshi, muleba na mano yamo yene no kutemwa kumo kwine, muleba abaikatana nga nshi,* kabili muletontonkanya cimo cine.+ 3 Tekwesha ukukansana+ nelyo ukuibililika,+ lelo muleicefya kabili mulemona bambi ukuti balimucila.+ 4 Mwilabika fye amano ku fyo mwe bene mufwaya,+ lelo mulebika amano na ku fyo bambi bafwaya.+

5 Muleba no mutima uyu wine uo na Kristu Yesu+ akweteko, 6 pantu nangu ca kuti aali mu cipasho ca kwa Lesa,+ tatalile atontonkanyapo ukutila kuti alingana na Lesa.+ 7 Lelo alishiile fyonse* kabili aishileba ngo musha,+ aishileba umuntunse.*+ 8 Ne cacila pali ifi, ilyo aishile ngo muntunse,* ali-icefeshe kabili aishileba ne cumfwila ukufika na ku mfwa,+ ukufika fye na ku mfwa pa cimuti ca kucushiwilwapo.*+ 9 E ico Lesa alimusansabike+ kabili amupeele ishina ilyacila amashina yonse,+ 10 pa kuti pa mulandu we shina lya kwa Yesu ikufi lyonse lifukame—ilya ba mu muulu, ilya ba pano isonde ne lya baba panshi ya calo+— 11 na pa kuti ululimi lonse lulelanda apabuuta ukuti Yesu Kristu e Shikulu,+ pa kuti Lesa Shifwe alecindikwa.

12 E ico mwe batemwikwa bandi, nga filya fine mwaba ne cumfwila lyonse, te lintu fye ndipo lelo maka maka ilyo nshilipo, twalilileni ukubombela ipusukilo lyenu no mwenso no kututuma. 13 Pantu Lesa e umupeela amaka pa mulandu wa kuti alafwaya mulecita ifyo afwaya, alalenga mulefwaya ukucita ifyo afwaya kabili alamupeela na maka ya kuficita. 14 Twalilileni ukucita ifintu fyonse ukwabula ukuilishanya+ kabili ukwabula ukukansana,+ 15 pa kuti mube ababula umulandu kabili aba kaele, mube abana ba kwa Lesa+ ababula akalema mu nkulo iyapondama+ kabili iyapotama. Muli iyi yine nkulo e mo musanika nge fyengelo muli ici calo,+ 16 kabili ikatisheni icebo ca mweo.+ Lyena nkakwata ica kusekelelapo mu bushiku bwa kwa Kristu, pantu nkeshiba ukuti nshabutukiile fye apa fye kabili ukubombesha kwandi takwali kwa fye. 17 Lelo nangu ca kuti ndeitululwa ngo mutuulo wa mwangashi+ uo baleitulwila pe lambo,+ kabili ndebomba umulimo wa mushilo* pa mulandu wa citetekelo cenu, ndi ne nsansa kabili ndesekelela pamo na imwe bonse. 18 Na imwe bene mube ne nsansa kabili musekelele pamo na ine.

19 Ndesubila ukuti Shikulu Yesu akansuminisha ukuti bwangu bwangu nkatume Timote+ kuli imwe, pa kuti ifyo akesanjeba pali imwe fikankoseleshe. 20 Pantu nshikwete umuntu umbi uwakwata umutima ngo wakwe, kabili uwingabika sana amano ku fyo mulekabila. 21 Pantu bonse abashala babika fye amano ku fyo balefwaya abene, tababika amano ku fyo Yesu Kristu afwaya. 22 Lelo mwalishiba ifyo umwine acitile pa kulanga ifyo aba. Acucutike na ine pa kulundulula imbila nsuma kwati ni filya umwana+ acucutikila pamo na wishi. 23 E ico, uyu e o ndesubila ukutuma nga namona fye ifyo ifintu fikaba. 24 Shikulu nga atemwa, nincetekela ukuti na ine wine nkesa bwangu.+

25 Nomba namona ukuti mfwile ukumutumina Epafroditi munyinane, umubomfi munandi kabili umushilika munandi, uo mwatumine kabili umubomfi wenu uwa kuti alemombela,+ 26 pantu alefwaisha ukumumona* bonse kabili nasakamikwa nga nshi pa mulandu wa kuti mwalyumfwile ukuti alilwele. 27 Ca cine, alilwele ni cikanga fye afwe; lelo Lesa alimumfwilile uluse, na kuba, te eka fye aumfwilile uluse, lelo na ine wine pa kuti niba no bulanda ukucila pa bo nakwata. 28 E ico nala-angufyanya ukumutuma, pa kuti nga mwamumona mukasekelele na kabili, na pa kuti na ine nilaba no bulanda sana. 29 E ico mumupokelele no mweo onse, nga filya fine mupokelela abasambi ba kwa Kristu bonse. Kabili twalilileni ukucindika ababa nga ena,+ 30 pantu kwashele fye panono nga alifwile pa mulandu wa mulimo wa kwa Kristu,* pantu ali-ibikile mu kapoosa mweo, pa kuti abombe imilimo iyo imwe mwali no kulamombela.+

3 Ica kulekeleshako mwe bamunyinane, twalilileni ukusekelela muli Shikulu.+ Ukumulembela ifintu fimo fine takuntendusha, kabili ico mfilembela ni pa kuti mucingililwe.

2 Mulecenjela ne mbwa;* mulecenjela na bacita ifyabipa; mulecenjela na bapatikisha abantu ukusembululwa.*+ 3 Pantu ifwe twasembululwa ukusembululwa kwine kwine,+ fwebo umupashi wa mushilo utungulula pa kubombela Lesa. Tuitakishisha muli Kristu Yesu+ kabili fwe bashi-icetekela pa mulandu wa fintu fya buntunse. 4 Nga kwaliba uwingaicetekela pa mulandu wa fya buntunse, nine.

Nga kwaliba umbi uutontonkanya ukuti ifya buntunse kuti fyalenga aicetekela, ine nalimucila, pantu: 5 nasembulwilwe pa bushiku bwalenga 8,+ ndi mwina Israele, uwa mu mukowa wa kwa Benjamini, umuHebere umwana wa baHebere;+ mu kukonka amafunde, nali umuFarise;+ 6 mu kuba uwacincila, nalecusha icilonganino;+ mu kuba uwalungama pa mulandu wa kukonka amafunde, nali uwabula akalema. 7 Na lyo line, ifintu ifyo nalemona ukuti bunonshi, mfimona ukuti fya fye* pa mulandu wa kwa Kristu.+ 8 Ne cacilapo ca kuti, nali-itemenwa ukusuula fyonse pa mulandu wa cuma capulamo ica kwishiba Kristu Yesu Shikulu. Ni pa mulandu wakwe nashiliile fyonse kabili mfimona ukuti fisooso* fye, pa kuti ninganonka Kristu 9 kabili mbe uwakwe. Icalenga mbe uwalungama te pa mulandu wa kuti nalicita fyonse ukulingana na Mafunde, lelo ni co nalikwata icitetekelo+ muli Kristu.+ Ubu bulungami bufuma kuli Lesa pa mulandu wa citetekelo.+ 10 Ico mfwaya, kumwishiba, ukwishiba amaka ya wa mubuushishe+ no kucula nge fyo aculile,+ kabili nali-itemenwa ukufwa nge fyo afwile,+ 11 pa kuti imone nga kuti naba pa bakabalilapo ukubuushiwa ku bafwa.+

12 Te kutila nalipokelela icilambu kale nelyo ukutila nalipwililika kale, lelo ndeibikilishako+ pa kuti imone nga ca kuti na ine kuti nanonka ico Kristu Yesu ansaliile.+ 13 Bamunyinane, nshi-imona ukuti nalipoka kale icilambu; lelo icintu ico nashininkisha ca kuti: Nalilaba ifya ku numa+ kabili mbika amano ku fya ku ntanshi,+ 14 nde-esha apapela amaka yandi pa kuti ningapoka ico napanga ukupoka,+ e kutila ubwite bwa kwa Lesa ubwa ku muulu+ ukupitila muli Kristu Yesu. 15 E ico fwe bakalamba mu fya kwa Lesa,+ tube no yu mutima, kabili nga ca kuti imitima yenu yalemenena ku fintu fimbi, Lesa akalenga mukeshibe uko imitima yenu ilingile ukulemenena. 16 Fyonse ifyo twalundulukamo, natutwalilile muli ifi fine.

17 Mwe bamunyinane bonse mulempashanya,+ kabili mulelolekesha abenda ukulingana ne fyo na ifwe twenda. 18 Pantu kwaliba abantu abengi—abo nalelumbula ilingi line, lelo nomba mbalumbula ninshi ndelila—abale-enda nga balwani ba cimuti ca kucushiwilwapo* ica kwa Kristu. 19 Mu kulekelesha bakonaulwa, cila muntu ulufumo lwakwe e lesa wakwe, balaitakishisha pa fya nsoni ifyo bacita kabili babika amano ku fya pano isonde.+ 20 Lelo ifwe ku mwesu*+ ni ku muulu,+ kabili tulolela no kufwaisha umupusushi, Shikulu Yesu Kristu+ ukufuma ku muulu, 21 uukalula imibili yesu iishacindama pa kuti ikabe ngo* mubili+ wakwe uwa bukata ku maka yakwe ayakalamba, ayo abomfya ayalenga ifintu fyonse filemunakila.+

4 E ico mwe bamunyinane abo natemwa kabili abo mfuluka, mwe balenga ndesekelela kabili mwe cilongwe*+ candi ica bukata, mwe batemwikwa, iminineni ndi+ muli Shikulu.

2 Nakoselesha Yuodia kabili nakoselesha Suntuki ukuti baleke ukupusana* pantu basambi ba kwa Shikulu.+ 3 Ndelomba na iwe, we mubomfi munandi uwa cishinka,* ukuti utwalilile ukwafwa aba banakashi ababombela pamo na ine* mu mulimo wa kubila imbila nsuma pamo na Klementi na babomfi banandi bambi, abo amashina yabo yaba mwi buuku lya mweo.+

4 Mulesekelela lyonse muli Shikulu. Na kabili ndeti, Mulesekelela!+ 5 Lekeni abantu bonse beshibe ukuti tamupampamina fye pa cintu cimo.+ Shikulu ali mupepi. 6 Mwisakamikwa nangu cimo,+ lelo muli fyonse lekeni Lesa eshibe+ ifyo mulelomba, mu kupepa no kupaapaata pamo no kutootela; 7 kabili umutende+ wa kwa Lesa uwacila pa fyo twaishiba ukalinda imitima yenu+ na matontonkanyo yenu ukupitila muli Kristu Yesu.

8 Ica kulekeleshako mwe bamunyinane ni ci, mutwalilile ukutontonkanya* pali fyonse ifya cine, fyonse ifya mucinshi, fyonse ifyalungama, fyonse ifyasanguluka, fyonse ifyatemwikwa, fyonse ifyo abantu balandapo ifisuma, fyonse ifisuma, na pali fyonse+ ifyo abantu batasha.* 9 Ifintu ifyo mwasambilile, ifyo mwatetekele, ifyo mwaumfwile, ne fyo mwamwene ndecita, ifi fine e fyo na imwe mulecita,+ na Lesa wa mutende akaba na imwe.

10 Apo ndi mubomfi wa kwa Shikulu, ndesekelela nga nshi pantu namumbikako amano na kabili.+ Kwena kale mwalimbikileko amano, nomba tamwakwete fye ishuko lya kucita ifyalelanga ukuti mwalimbikileko amano. 11 Te kutila ico ndelandila ifi ni co nshikwete ifyo ndekabila, pantu nalisambilila ukuteka umutima ku fyo nkwete+ inshita yonse. 12 Nalishiba ifya kwikala ilyo nkwete ifinono,+ kabili nalishiba ifya kwikala ilyo nkwete ifingi. Muli fyonse kabili inshita yonse nalisambilila inkaama ya kwikuta ne ya kuba ne nsala, iya kukwata ifingi ne ya kukanakwata. 13 Muli fyonse ndakwata amaka pantu nalikwata uunkosha.+

14 Lelo mwalicitile bwino pa kungafwa ilyo nakwete amafya. 15 Na kuba, imwe mwe bena Filipi mwalishiba no kuti ilyo mwasambilile imbila nsuma pa muku wa kubalilapo, lintu nafumine ku Makedonia, takwali icilonganino cimbi icabombeele pamo na ine mu mulimo wa kupeela no kupokelela, nimwe fye mweka;+ 16 pantu na lintu nali mu Tesalonika, mwalintumiine ifyo nalekabila pa miku ibili. 17 Te kutila ndefwaya ica bupe, lelo ndefwaya mukapokelele icilambu icifuma mu kupeela. 18 Nomba ninkwata fyonse ifyo ndekabila, ninkwata ukucila fye na pa fyo ndekabila. Ninkwata ifingi, apo nomba Epafroditi+ nandetela ifyo muntumiine ifili nge cena icanunkila,+ ilambo ilyapokelelwa, ilisekesha Lesa. 19 Pa mulandu wa ifi, Lesa wandi uwakwata ifintu ifingi nga nshi akamupeela fyonse ifyo mukabila+ ukupitila muli Kristu Yesu. 20 Nomba Lesa wesu kabili Shifwe abe no bukata umuyayaya umuyayaya. Ameni.

21 Mposesheniko aba mushilo bonse muli Kristu Yesu. Aba bwananyina abo ndi nabo bamuposha. 22 Aba mushilo bonse, lelo maka maka aba mu ng’anda ya kwa Kaisare,+ bamuposha.

23 Icikuuku icaibela ica kwa Shikulu Yesu Kristu cibe na imwe pa mulandu ne mibele iisuma iyo mwakwata.