KALATA KU BENA KOLOSE

1 Ine ne Paulo, ne o Lesa asalile ukuba umutumwa wa kwa Kristu Yesu ukulingana ne fyo afwaya, ndi pamo na Timote+ munyinefwe. 2 Twalembela imwe mwe ba mushilo kabili bamunyinefwe ba cishinka muli Kristu mwe ba mu Kolose, tuleti:

Icikuuku icaibela no mutende ukufuma kuli Lesa Shifwe fibe na imwe.

3 Lyonse ilyo tumupepelako, tulatootela Lesa, Wishi wa kwa Shikulwifwe Yesu Kristu, 4 pantu twalyumfwa ifyo mwaba ne citetekelo muli Kristu Yesu na pa fyo mwatemwa aba mushilo bonse 5 pa mulandu wa kusubila ifyo bamusungila mu muulu.+ Kale mwaumfwile pali ili isubilo pa mulandu wa mashiwi ya mbila nsuma 6 iyo babilile kuli imwe. Nga filya fine imbila nsuma iletwala ifisabo kabili ilesalanganina pano calo ponse,+ e fyo itwala ifisabo na muli imwe kabili e fyo isalanganina na muli imwe ukutula fye pa bushiku mwaumfwile no kwishiba bwino bwino ifyo icikuuku icaibela ica kwa Lesa caba. 7 E fyo mwasambilila kuli Epafra+ umusha munensu uwatemwikwa, kabili umubomfi wa cishinka uwa kwa Kristu uutubombelako. 8 E watwebele na pa kutemwa uko umupashi wa kwa Lesa walenga mukwate.

9 E ico pa mulandu ne fi, lyonse fye tulamupepelako+ ukutula pa bushiku twaumfwile ifi pali imwe. Tulomba Lesa ukuti alenge mwishibe bwino bwino ifyo afwaya,+ kabili alenge mukwate amano yonse aya kwiluka ifyo umupashi wakwe ulenga abantu baishiba,+ 10 pa kuti mule-enda ukulingana ne fyo Yehova* afwaya, na pa kuti lyonse mulecita ifya kumusekesha ilyo muletwalilila ukutwala ifisabo mu mulimo onse uusuma, kabili ilyo muleya muleishibilako Lesa bwino bwino.+ 11 Tulamupepelako no kuti amaka ya kwa Lesa ayengi yamukoshe+ pa kuti mukwate amaka ya kushipikisha fyonse ninshi muli abatekanya kabili ninshi mulesekelela, 12 ilyo muletootela Shifwe uwalengele mufikepo ukupyana ifyo abikila aba mushilo+ ababa mu lubuuto.

13 Alitupokolwele ku maka ya mfifi+ no kutuleta mu bufumu bwa Mwana wakwe uo atemwa. 14 Twalilubuka pa mulandu wakwe kabili twalyelelwa imembu shesu,+ pa mulandu wa cilubula. 15 Ena e cipasho ca kwa Lesa uushimoneka,+ e beli pa fibumbwa fyonse;+ 16 pantu ifintu fyonse fyabumbilwe ukupitila muli ena ifya mu muulu na pano isonde, ifimoneka ne fishimoneka,+ ifipuna fya bufumu, bumulopwe, amabuteko nelyo aba maka bonse. Fyonse fyabumbilwe ukupitila muli ena+ kabili e o fyabumbiilwe. 17 Na kabili, ilyo ifintu fyonse fishilabako ena e ko aali,+ kabili ifintu fyonse fyaishilebako ukupitila muli ena, 18 kabili e mutwe wa mubili, e kutila icilonganino.+ Ena e ntendekelo, libeli lya babuushiwa ku bafwa,+ pa kuti abe uwa kubalilapo muli fyonse; 19 pantu Lesa alefwaya ukuti imibele yakwe yonse ibe muli Kristu,+ 20 kabili Lesa afwaile ukuti ukupitila mu Mwana wakwe e mo ifintu fyonse+ ifya pano isonde nelyo ifya mu muulu, fibwelele kuli ena no kuba no mutende na ena ukupitila mu mulopa+ uo Yesu asuumishe pa cimuti ca kucushiwilwapo.*

21 Cine cine, kale mwe bali ukutali na Lesa kabili mwe bali abalwani bakwe pa mulandu wa fyabipa ifyo mwaletontonkanya ne fyo mwalecita, 22 pali ino nshita Lesa alimubwesesha kuli ena, pa mulandu wa mfwa ya Mwana wakwe, pa kuti alenge mube aba mushilo, ababula akalema, kabili ababula umulandu kuli ena+— 23 cikulu fye, mwatwalilila ukuba ne citetekelo,+ abakuulwa pa mufula+ uwakosa,+ abashangila kabili tamulekele ukuba ne subilo ilyo mwakwete pa mulandu wa mbila nsuma iyo mwaumfwile, kabili iyabililwe ku cibumbwa conse ica mwi samba lya muulu.+ Ine ne Paulo, naishileba umubomfi wa iyi ine imbila nsuma.+

24 Pali ino nshita ndesekelela pa mulandu wa kuculila imwe,+ kabili ndemona ukuti nshilati nculile umubili wakwe nge fyo aculile,+ e kutila ukuculila icilonganino.+ 25 Naishileba umubomfi wa ici cilonganino ukulingana no mulimo+ uo Lesa ampeele pa mulandu wenu pa kuti mbile sana icebo ca kwa Lesa. 26 Iyi mbila nsuma e nkaama ya kwa Lesa+ iyo asungile ukutula fye ku bwikashi bwa ku kale*+ na ku nkulo sha ku kale. Lelo nomba alisokolwela abantu bakwe aba mushilo iyi nkaama,+ 27 abena fyalo, abo Lesa umwine afwaya ukuti beshibe ubucindami bwa bukata ubwa iyi nkaama yakwe,+ e kutila Kristu uwaba muli imwe, uo musuubila ukucindamikilwa pamo nankwe.+ 28 E o tulebilapo, ilyo tulekonkomesha umuntu onse kabili ilyo tulesambilisha umuntu onse amano yonse, pa kuti tulenge umuntu onse abe umusambi wa kwa Kristu uwafikapo.+ 29 E co ndebombesesha kabili e co njibikilishishako ilyo ndebomfya amaka ayo ampeela.+

2 Pantu ndefwaya mwishibe ifyo ncucutika pa mulandu wenu na pa mulandu wa ba mu Laodikea,+ ukubikapo fye na bonse abashatala abamonapo.* 2 Ico ncitila ifi ni pa kuti basansamushiwe,+ na pa kuti bekatane pa mulandu wa kutemwa.+ Nga bacita ifi bakapaalwa* pa mulandu wa kumfwikisha bwino bwino icine, pa kuti beshibe bwino bwino inkaama ya kwa Lesa,* ne yo nkaama ni Kristu.+ 3 Muli ena e mo bafisa ifyuma fyonse ifya mano no kwishiba.+ 4 Ico ndelandila ifi ni pa kuti umuntu nangu umo emubepa ku mashiwi ya kunashanasha. 5 Pantu nangu nshili na imwe, ndamutontonkanyapo, kabili ndasekelela nga namona ifyo mucita bwino bwino ifintu+ ne fyo icitetekelo cenu cakosa muli Kristu.+

6 E ico apo mwalitetekela Kristu Yesu Shikulu, mutwalilile ukucita ifyo afwaya, 7 mube abalimbwa muli ena, abakuulwa muli ena+ kabili aba citetekelo icakosa,+ nga filya fine bamusambilishe, kabili muletasha sana Lesa.+

8 Muleba abacenjela pa kuti umuntu nangu umo emuteka ubusha ku mano ya buntunse na ku bucenjeshi+ ukulingana ne ntambi sha bantu, ukulingana ne fintu fya fye ifya muli ici calo, te kulingana na Kristu; 9 pantu muli Kristu e mumonekela imibele ya kwa Lesa yonse.+ 10 E ico tamwabulisha nangu cimo pa mulandu wa kwa Kristu umutwe wa buteko bonse no butungulushi bonse.+ 11 Apo muli basambi bakwe, mwalisembululwa. Te kusembululwa kwa ku bantu, lelo kwa kufumyapo umubili wa lubembu,+ pantu ifi e fyo ababomfi ba kwa Kristu bafwile ukusembululwa.+ 12 Pantu mwalishiikilwe pamo nankwe ilyo mwabatishiwe nge fyo abatishiwe,+ kabili mwabuushiwe+ pamo nankwe pa mulandu wa kuti mwalitetekela imilimo ya kwa Lesa, uwabuushishe Kristu ku bafwa.+

13 Na kabili nangu ca kuti kale mwali abafwa pa mulandu wa membu shenu na pa mulandu wa kuti mwali abashasembululwa, Lesa alilenga mwaba aba mweo pamo na Kristu.+ Lesa alitwelela imembu shesu shonse+ 14 kabili alifuuta amafunde ayalembelwe ku minwe,+ umwali ifipope+ ifyaletulwisha.+ Aliyafumyapo pantu aliyapoopela pa cimuti ca kucushiwilwapo.*+ 15 Alicimfya+ bakateka ne ntungulushi pa cimuti ca kucushiwilwapo,* no kubafuulila pa cintubwingi pa kuti abantu babamone, e lyo abasenda bunkole.

16 E ico mwilaleka umuntu nangu umo alemupingula pa fya kulya, na pa fya kunwa+ nelyo pa mutebeto nangu pa kusunga ubushiku bwa mweshi upya,+ nelyo pa kusunga isabata.+ 17 Ifi fintu fyaba fye cinshingwa ca fintu ifikesa,+ lelo ifya cine cine fya kwa Kristu.+ 18 Mwileka umuntu nangu umo uwatemwa ukuicefya kwa bufi no kupepa bamalaika amupusule icilambu,+ uwaba ifi “akonka fye”* ifyo umwine atila e fyo amona. Alaitutumuna apabula nangu cimo pa mulandu fye wa fyo atontonkanya ifya buntunse, 19 kabili alifuma kuli Kristu uwaba e mutwe.+ Kristu e ulenga umubili onse ulekwata amaka, e ulenga imfyufyu ne mishipa filundinkane bwino bwino kabili filebombela pamo, kabili e ulenga umubili onse ulekula ukulingana ne fyo Lesa alefwaya.+

20 Nga ca kuti mwafwilile pamo na Kristu ku fya muli ici calo ifya fye,+ cinshi mwikalila kwati mucili aba muli ici calo no kulakonka ifipope+ ifitila: 21 “Wilaikata kuli ici, nelyo wilasonda cilya, nelyo wilakumya kuli ici”? 22 Ala ifi fintu fyonse filonaika nga bafibomfya. Aya amafunde ne fisambilisho, fya buntunse fye.+ 23 Nangu ca kuti ifi fintu fimoneka kwati fya mano mu mipepele ya kuipangila fye, mu kuicefya kwa bufi na mu kusunga umubili bubi bubi,+ tafyakwata amaka ya kulesha ulunkumbwa lwa mubili.

3 E ico nga mwabuushiwe pamo na Kristu,+ twalilileni ukulafwaya ifya ku muulu, uko Kristu aikala ku kuboko kwa ku kulyo ukwa kwa Lesa.+ 2 Mulebika sana amano ku fya ku muulu,+ te ku fya pano isonde.+ 3 Pantu mwalifwile kabili imyeo yenu yalifiseme pamo na Kristu ukulingana ne fyo Lesa afwaya. 4 Ilyo Kristu uwaba e mweo wesu+ akamoneka, e lyo na imwe mukamonekela pamo nankwe mu bukata.+

5 E ico ipayeni ifilundwa fya mubili wenu+ umumonekela imibele yabipa, e kutila ubulalelale,* ukukowela, insuuna iyacila mu cipimo,+ ulunkumbwa, no bufunushi, pantu nabo bwine kupepa utulubi. 6 Ubukali bwa kwa Lesa bukesa pa bantu abacita ifi. 7 Ifi fine e fyo na imwe bene mwalecita* kale.+ 8 Lelo mulingile ukupoosa imibele yonse iyi: icipyu, ubukali, ifyabipa fyonse,+ ne miponto,+ kabili mwilalanda ne lyashi lya nsoni.+ 9 Mwilabepana.+ Fuuleni ubuntu bwa kale+ kumo ne fyo bulenga mulecita, 10 kabili fwaleni ubuntu bupya,+ ubuleya bulebelako fye ubupya ukulingana ne cipasho ca Walengele bubeko+ ukupitila mu kwishiba bwino bwino icine. 11 Mu buntu bupya tamwaba akapaatulula ka kuti uyu muGriki e lyo uyu muYuda, uyu alisembululwa e lyo uyu tasembululwa, uyu mwina fyalo, uyu muSukuti,* uyu musha, nelyo uyu ena muntungwa. Lelo Kristu aba muli fyonse kabili twaba muli ena.+

12 E ico apo Lesa alimusala+ mwe ba mushilo kabili abatemwikwa, fwaleni umutima wa luse,+ icikuuku, ukuicefya,+ ukufuuka,+ no kutekanya.+ 13 Twalilileni ukushipikishanya no kuitemenwa ukubelelana uluse,+ na lintu umo ali ne ca kuilishanya pa munankwe.+ Nga filya fine Yehova* aitemenwa ukumubelela uluse, e fyo na imwe mulecita.+ 14 Lelo pali ifi fyonse, fwalilenipo no kutemwa,+ pantu ukutemwa kulalenga abantu baba abaikatana bwino.+

15 Na kabili lekeni umutende wa kwa Kristu uletungulula imitima yenu,*+ pantu kuli uyu wine umutende e ko bamwitila pa kuti mube umubili umo. Kabili muletootela. 16 Muleleka amashiwi ya kwa Kristu umwaisula amano yonse yaleikala muli imwe. Mulesambilishanya no kukoseleshanya* ukubomfya amashiwi ya mu malumbo,+ mulelumbanya Lesa, muletasha* ilyo mulemwimbila inyimbo kabili muleimbila Yehova* mu mitima yenu.+ 17 Fyonse ifyo mulecita nelyo ukulanda, muleficitila mwi shina lya kwa Shikulu Yesu, kabili muli ena e mo muletootelela Lesa Shifwe.+

18 Mwe bakashi, mulenakila abalume benu,+ pantu e fyo Shikulu amwenekela ukulacita. 19 Mwe balume, muletemwa abakashi benu+ kabili mwilaba ne cipyu kuli bena.+ 20 Mwe bana, muleumfwila abafyashi benu muli fyonse,+ pantu ukucita ifi e kwawama mu menso ya kwa Shikulu. 21 Mwe bashibo, mwilakalifya abana benu+ imitima, pa kuti belaba no bulanda.* 22 Mwe basha, muleumfwila bashikulwinwe abantunse,+ mwilacita fye ifi ilyo abantu balemumona pa kuti mubasekeshe, lelo mulecita ifi no mutima wa cishinka, kabili muletiina Yehova.* 23 Conse ico mulecita, mulebomba no mweo* onse kwati mulebombela Yehova,*+ tamulebombela abantu, 24 pantu mwalishiba ukuti ni Yehova* e ukamupeela icilambu ca bupyani.+ Mulebombela Shikulu Kristu. 25 Na kuba uulufyanya bakamukanda mu fyo alufyanya,+ pantu Lesa taba na kapaatulula.+

4 Mwe bashikulwibo, mulesunga abasha benu mu nshila iyalungama kabili iya mulinganya. Muleibukisha ukuti na imwe bene mwalikwata Shikulwinwe ku muulu.+

2 Muleba no mute wa kupepa.+ Mwilalaba ukupepa kabili muletootela.+ 3 Pa nshita imo ine, na ifwe muletupepelako+ pa kuti Lesa atwiswileko inshila ya kubililamo icebo, pa kuti tulebila inkaama ya kwa Lesa pali Kristu. Ni pali iyi ine nkaama bampoosela mu cifungo.+ 4 Kabili mulepepa pa kuti ilyo ndebila iyi nkaama, ndelanda bwino bwino ukulingana ne fyo ningile ukulanda.

5 Mule-enda mano mano ilyo muli na ba kunse, kabili mulebomfya bwino inshita yenu yonse.+ 6 Lyonse amashiwi yenu yaleba ayasuma, ayalungwamo umucele,+ pa kuti muleishiba ifya kwasuka bwino umuntu onse.+

7 Tukiki+ munyinane uwatemwikwa, umubomfi wa cishinka kabili umusha munandi uwa kwa Shikulu, akamushimikila fyonse pali ine. 8 Ndemutuma kuli imwe pa kuti ese amwebe ifyo tuli, na pa kuti ese amusansamushe. 9 Akesa na Onesimu,+ munyinane uwa cishinka kabili uwatemwikwa, uo mwaleba nankwe; bakesamweba fyonse ifilecitika kuno.

10 Alistaaki+ umufungwa munandi amuposha, na Marko+ umufyala wa kwa Barnaba (e ulya mwapokelelepo amashiwi ya kuti nga aisa kuli imwe mukamupokelele+ bwino), 11 e lyo na Yesu uwitwa Yusti, aba bantu baba pa basembululwa. Ni aba beka fye e babomba na ine umulimo wa Bufumu bwa kwa Lesa, kabili balansansamusha sana.* 12 Epafra+ uo mwaleba nankwe, umusha wa kwa Kristu Yesu, amuposha, lyonse alamupepelako sana, pa kuti mwingeminina ndi nga bakalamba kabili mucetekele bwino bwino fyonse ifyo Lesa afwaya. 13 Pantu ndemulandilako ukuti alabombesha pa mulandu wenu na pa mulandu wa ba mu Laodikea na ba mu Hiyerapoli.

14 Luka+ kondapa uwatemwikwa amuposha, na Dema+ na o amuposha. 15 Mposesheniko aba bwananyina ku Laodikea na nkashi yesu Numfa e lyo ne cilonganino icilonganina mu ng’anda mu mwakwe.+ 16 Nga mwapwisha ukubelenga ino kalata, mukapeele na ba mu cilonganino ca ku Laodikea pa kuti nabo bakabelengemo,+ e lyo na imwe mukabelengeko kalata ya ku Laodikea. 17 Kabili mwebe Arkipi+ amuti: “Ulebika amano ku mulimo obe uo wapokelele muli Shikulu, pa kuti ukaupwishe bwino bwino.”

18 Ine ne Paulo, namulembela aya mashiwi ya kumuposha ku minwe yandi.+ Muleibukisha ukuti ncili mu cifungo.+ Icikuuku icaibela ica kwa Lesa cibe na imwe.