KALATA YA KUBALILAPO KU BENA TESALONIKA

1 Nine Paulo, ndi pamo na Silbani*+ e lyo na Timote.+ Nalembela imwe mwe ba mu cilonganino ca mu Tesalonika, mwe ba kwa Lesa Shifwe e lyo na Shikulu Yesu Kristu:

Icikuuku icaibela ica kwa Lesa no mutende fibe na imwe.

2 Lyonse tulatootela Lesa ilyo tulemulumbula imwe bonse mu mapepo yesu,+ 3 pantu lyonse pa ntanshi ya kwa Lesa kabili Shifwe, tulebukisha umulimo mubomba pa mulandu wa kuti mwaliba ne citetekelo, ne fyo mubombesha pa mulandu wa kuti mwaliba no kutemwa, e lyo ne fyo mushipikisha pa mulandu wa kusuubila Shikulwifwe Yesu Kristu.+ 4 Pantu mwe bamunyinefwe abo Lesa atemwa, twalishiba ukuti Lesa alimusala, 5 pantu ilyo twalebila imbila nsuma kuli imwe, tatwalelanda fye amashiwi, lelo twali na maka no mupashi wa mushilo kabili twalishininkishe ukuti imbila nsuma twalebila ya cine, nga filya fine mwaishiba ifyo twaishileba ilyo twali na imwe pa mulandu wenu. 6 Kabili mwatendeke ukutupashanya+ no kupashanya Shikulu,+ pantu mwatetekele icebo ca kwa Lesa ilyo mwali na macushi ayengi,+ lelo umupashi wa mushilo walengele mulesekelela, 7 ica kuti mwaishileba abantu abo abatetekela bonse aba mu Makedonia na ba mu Akaya bengapashanya.

8 Na kuba, te mu Makedonia na mu Akaya mweka umo abantu baumfwa icebo ca kwa Yehova* pa mulandu wenu, lelo na mu ncende shonse abantu balyumfwa ifyo mwaba ne citetekelo muli Lesa,+ ica kuti tatukabila ukulandapo nangu cimo. 9 Pantu abene balashimika pa fyo twaishile kuli imwe pa muku wa kubalilapo ne fyo mwa-alukile kuli Lesa ilyo mwalekele ukupepa utulubi,+ mwatendeka no kubombela Lesa wa mweo kabili uwa cine. 10 E lyo ne fyo mulolela Umwana wakwe ukufuma ku muulu,+ uo abuushishe ku bafwa, e kutila Yesu, uukatupokolola ku bukali ubuleisa.+

2 Bamunyinane, mwe bene mwalishiba bwino ukuti filya twamutandalile tatwaicushishe fye.+ 2 Pantu nangu ca kuti pa kubala twaliculile ilyo twali mu Filipi+ kabili balitusaalwile, nga fintu mwaishiba twalishipile pantu Lesa wesu alitukoseshe pa kuti tumwebeko imbila nsuma ya kwa Lesa+ nangu ca kuti baletucusha.* 3 Pantu ifyo tumukonkomesha tafyalubana kabili tatumukonkomesha pa mulandu wa mapange ayabi nelyo pa mulandu wa bucenjeshi, 4 lelo nga filya fine Lesa atumona ukuti twalilinga ukutuseekesha imbila nsuma, e fyo tulanda, pantu ifyo tulanda te fya kusekesha abantu, lelo fya kusekesha Lesa uuceeceeta ifyaba mu mitima yesu.+

5 Na kuba, mwalishiba ukuti tatwatala atubomfyapo amashiwi ayasuma aya kumutasha bufi bufi, nelyo ukucita ifintu pa mulandu wa bufunushi+ e lyo tulefisama; Lesa e nte! 6 Kabili tatwatala atufwayapo abantu baletulumbanya, nampo nga nimwe nelyo bantu bambi, nangu ca kuti mwali no kulapoosa indalama ishingi pali ifwe apo tuli batumwa ba kwa Kristu.+ 7 Lelo twaishileba abanakilila ilyo twali na imwe, kwati ni filya nyina uonsha asakamana bwino abana bakwe. 8 E ico, apo twalimutemwa sana, tatwalefwaisha fye ukumushimikila imbila nsuma ya kwa Lesa, lelo twalefwaya ukumupeela ne myeo yesu,+ pantu twalishile mutemwa nga nshi.+

9 Bamunyinane, nshiletwishika ukuti muleibukisha ifyo twalebombesha. Twalebomba ubushiku na kasuba pa kuti twitwika uli onse pali imwe icisendo ca kutusunga+ ilyo twalebila kuli imwe imbila nsuma ya kwa Lesa. 10 Imwe muli nte, Lesa na o ni nte ku fyo twali aba cishinka, abalungama kabili ababula umulandu kuli imwe mwe batetekela. 11 Mwalishiba bwino ukuti twalemukoselesha, twalemusansamusha kabili twalemusambilisha umo umo+ nga filya fine wishi+ acitila abana bakwe, 12 pa kuti mutwalilile ukwenda ukulingana ne fyo Lesa afwaya,+ uwamwitile ku Bufumu bwakwe+ no bukata bwakwe.+

13 Cine cine, e mulandu wine na ifwe tutashisha Lesa lyonse,+ pantu ilyo mwatetekele icebo ca kwa Lesa ico mwaumfwile kuli ifwe, tamwacitetekele ukuti cebo ca bantu, lelo mwacitetekele ukuti cebo ca kwa Lesa, kabili ca cine cebo ca kwa Lesa, icilebombela na muli imwe mwe batetekela. 14 Pantu mwe bamunyinane, mwalepashanya aba mu filonganino fya kwa Lesa ifya mu Yudea ifya basambi ba kwa Kristu Yesu, pantu na imwe abekala calo banenu balamucusha+ nga filya fine nabo babacusha ku baYuda. 15 AbaYuda balipeye fye na Shikulu Yesu+ e lyo na bakasesema kabili balatucusha.+ Na kabili, tabasekesha Lesa, lelo balalwisha ifyo abantunse bonse bafwaya, 16 ilyo besha ukutulesha ukulanda na bena fyalo amashiwi ayengabapususha.+ Ifi bacita filalenga imembu shabo abene shilefulilako. Lelo ubukali bwakwe nabusuka bwafika pali bena.+

17 Nomba bamunyinane, ilyo batupatikishe ukumusha pa nshita iinono, (nangu ca kuti tatwalemumona, twalemwibukisha), apo twalemufuluka nga nshi, twalyeseshe na maka yonse pa kuti twingesamumona.* 18 Uyu e mulandu twafwaile ukwisa kuli imwe, e kutila, ine wine ne Paulo. Tatwaeseshe fye ukwisa kuli imwe umuku umo, lelo twaeseshe pa miku ibili; nomba Satana aletucilikila. 19 Pa nshita Shikulu Yesu akabwela, bushe ni bani bakalenga tukabe ne subilo, tukalesekelela kabili tukapokelele icilongwe* icikalenga tukabe ne nsansa? Na kuba bushe te imwe bene?+ 20 Nimwe mulenga tuleumfwa icilumba kabili tulesekelela.

3 E ico ilyo twamwene ukuti te kuti tutwalilile ukulolela ukumfwa ilyashi pali imwe, twamwene ukutila kuti cawama twashala fweka ku Atena;+ 2 kabili twatumine Timote,+ munyinefwe kabili umubomfi wa kwa Lesa* uubila imbila nsuma pali Kristu, ukuti ese amukoshe kabili amusansamushe pa mulandu wa citetekelo cenu, 3 pa kuti aya macushi yelenga umuntu nangu umo atelentente. Pantu na imwe bene mwalishiba ukuti tapali nangu cimo ico twingacita pa kuti aya amacushi yetuponena.*+ 4 Pantu ilyo twali na imwe, twalemwebela libela ukuti twali no kucula, kabili ifi fine e fyacitike nga fintu na imwe mwaishiba.+ 5 E mulandu wine, ilyo namwene ukutila te kuti ntwalilile ukulolela, natumine Timote pa kuti ese uko, pa kuti njishibe nga mwalitwalilila ukuba aba cishinka.+ Epali Katunka+ amutunka, no kubombesha kwesu kwaya fye nga mu menshi.

6 Lelo Timote e lyo fye eshile ukufuma kuli imwe+ kabili natushimikila ilyashi ilisuma pa fyo mwaba ne cishinka no kutemwa, natushimikila no kuti mwalitwalilila ukutwibukisha ne nsansa, kabili mulafwaisha ukutumona nge fyo na ifwe tufwaisha ukumumona. 7 E mulandu wine bamunyinefwe, lyonse ilyo tuba na mafya na lintu tuponenwa na macushi, tulasansamuka pa mulandu wa fyo mwaba ne cishinka.+ 8 Pantu tulapuupuutulwa* nga namwiminina ndi muli Shikulu. 9 Pantu kuti twalanga shani ukuti tulatasha Lesa pali imwe, pa fyo mulenga tulesekelela nga nshi pa menso ya kwa Lesa? 10 Ubushiku na kasuba tulamupaapaatilako ukufika apapela amaka yesu pa kuti tukamonane,* na pa kuti twingamwafwa mu fyo mulekabila pa kukosha icitetekelo cenu.+

11 Shi Lesa wesu kabili Shifwe umwine, na Shikulwifwe Yesu Kristu bengatusuminisha ukwisa kuli imwe. 12 Na kabili, Shikulu namulenge ukutemwana nga nshi no kutemwa nga nshi abantu bambi,+ nga filya fine na ifwe twamutemwa nga nshi, 13 pa kuti engakosha imitima yenu, no kulenga ibe iya mushilo, kabili iyabula akalema ku cinso ca kwa Lesa wesu+ kabili Shifwe, pa nshita Shikulwifwe Yesu+ akabwela pamo na ba mushilo bonse.

4 Ica kulekelesha mwe bamunyinefwe, twalimwebele ifyo mufwile ukulaenda pa kuti mulesekesha Lesa.+ Na kuba ifi fine e fyo mule-enda, nomba tulemulomba kabili tulemupaapaata ukupitila muli Shikulu Yesu, ukuti mulecilanapo ukucita ifi. 2 Pantu mwalishiba ifyo twamwebele ukupitila muli Shikulu Yesu ifyo mulingile ukulakonka.*

3 Pantu ici e co Lesa afwaya, ukuti mube aba mushilo,+ kabili mutaluke ku bulalelale.*+ 4 Cila muntu pali imwe afwile ukwishiba ifya kusunga bwino umubili* wakwe+ pa kuti utwalilile ukuba uwa mushilo+ kabili uwa mucinshi, 5 na pa kuti elaba ne nsuuna yalubana iya bufunushi+ nga ilya abantu ba mu nko abashaishiba Lesa bakwata.+ 6 Takuli umuntu nangu umo uufwile ukucita icabipa kuli munyina nelyo ukwikala pa nsambu shakwe muli uyu mulandu, pantu Yehova* e ukanda bonse abacita ifi fintu, nga filya twamwebele kale kabili nga filya fine twamusokele. 7 Pantu Lesa tatwitile pa kuti tube abakowela, lelo atwitile pa kuti tube aba mushilo.+ 8 E ico kanshi umuntu uusuula ifi twamusambilisha te muntu asuula, lelo asuula Lesa,+ uupeela imwe umupashi wakwe uwa mushilo.+

9 Nomba pa lwa kutemwa aba bwananyina,+ tamulekabila ukumulembela na fimbi, pantu Lesa alamusambilisha ukutemwana.+ 10 Na kuba, ifi fine e fyo mucita ku ba bwananyina bonse aba mu Makedonia monse. Lelo tulemukoselesha mwe bamunyinefwe ukuti, mutwalilile ukucilanapo ukutemwana. 11 Mule-esha na maka ukwikala tondolo+ kabili mulebika fye amano ku fyenu,+ muleibombela ku minwe yenu,+ nga fintu twamwebele, 12 pa kuti mule-enda bwino ica kuti na bantu ba kunse balemumona+ kabili mwilabulisha nangu cimo.

13 Na kabili, mwe bamunyinefwe, tatulefwaya ukuti imwe mwi-ishiba pa bafwa,*+ pa kuti mwiba no bulanda nga filya bambi abashaba ne subilo baba.+ 14 Pantu nga twalitetekela ukuti Yesu alifwile no kwima ku bafwa,+ ninshi ifyo fine e fyo cikaba na ku bafwila muli ena,*+ Lesa akababuusha no kubaleta pamo nankwe. 15 Pantu ifi e fyo tulemweba ukulingana ne cebo ca kwa Yehova,* ukuti ifwe fwe ba mweo fwe bakabapo pa nshita ya kubapo kwa kwa Shikulu tatwakatangilile abafwa* nakalya; 16 pantu Shikulu umwine akeka ukufuma ku muulu, kabili akabilikisha ishiwi ilikalamba ilya maka, ishiwi lya kwa malaika mukalamba,+ ninshi ali ne penga lya kwa Lesa, na bonse abafwila muli Kristu bakabalilapo ukwima ku bafwa.+ 17 Lyena fwe bali no mweo fwe bakabapo pali ilya nshita, tukasendwa pamo nabo ukuya mu makumbi+ mu kukumanya Shikulu+ mu lwelele, kabili lyonse tukalaba pamo na Shikulu.+ 18 E ico mulesansamushanya ukubomfya aya mashiwi.

5 Nomba bamunyinefwe, tamulekabila ukumulembelapo nangu cimo, pa nshita no mwaka ilyo ifi fikacitika. 2 Pantu mwe bene mwalishiba bwino ukuti ubushiku bwa kwa Yehova*+ bukesa ngo mupuupu mu nshita ya bushiku.+ 3 Ilyo bakalalanda abati, “Umutende no mutelelwe!” e lyo ubonaushi bukabapumikisha,+ filya ukucula kwa pa kupaapa kupumikisha umwanakashi uuli ne fumo, kabili tabakafulumuke nakalya. 4 Lelo imwe mwe bamunyinefwe, tamwaba mu mfifi, pa kuti ubushiku bulya tabumupumikishe nga filya amacaca yapumikisha abapuupu, 5 pantu bonse muli bana ba lubuuto+ kabili abana ba mu kasuba. Tatuli bantu ba mu bushiku nangu aba mu mfifi.+

6 E ico kanshi, twilaala nga bantu bambi,+ lelo tulelola+ kabili tuletontonkanya bwino.+ 7 Pantu abalaala balaala ubushiku, kabili abakolwa bakolwa ubushiku.+ 8 Lelo ifwe fwe ba mu kasuba, natube abalola kabili tufwale ica kucinga icifuba ica citetekelo no kutemwa, tufwale ne subilo lya kupusuka nge cisote+ 9 pantu Lesa tatusalile pa kuti tukesekandwa ku bukali bwakwe, lelo atusalile pa kuti tukapusuke+ ukupitila muli Shikulwifwe Yesu Kristu. 10 Alitufwilile,+ pa kuti nampo nga tulelola nelyo natulaala,* tukabe no mweo pamo nankwe.+ 11 E ico mulekoseleshanya* kabili mulekuulana,+ nga filya fine mucita.

12 Nomba mwe bamunyinefwe, tulemulomba ukuti mulecindika ababombesha muli imwe kabili abamutungulula muli Shikulu no kumukonkomesha; 13 kabili mulebacindika sana no kubatemwa pa mulandu wa mulimo babomba.+ Muleba no mutende ku banenu.+ 14 Na kabili, tulemukoselesha mwe bamunyinefwe ukuti, mulekalipila abashumfwa,+ mulesansamusha abali no bulanda,* muletungilila abanaka, kabili muletekanishisha abantu bonse.+ 15 Mulemona ukuti takuli umuntu nangu umo uulebwesesha ububi pa bubi,+ lelo lyonse mule-esha na maka ukucita ifisuma ku banenu na ku bantu bonse.+

16 Mulesekelela lyonse.+ 17 Mulepepa ukwabula ukuleka.+ 18 Muletootela muli fyonse.+ Ifi e fyo Lesa afwaya mulecita pantu muli basambi ba kwa Kristu Yesu. 19 Mwilashimya umulilo wa mupashi.+ 20 Mwilasuula amasesemo.+ 21 Muleshininkisha ifintu fyonse ukuti fya cine;+ muleikatisha icisuma. 22 Mwilacita ifyabipa ifya misango yonse.+

23 Shi Lesa wa mutende umwine alenge mube aba mushilo icine cine. Kabili umupashi wenu, umweo* wenu no mubili wenu fibe ifituntulu, fisungililwe bwino bwino, kabili fibe ifya kaele mu nshita ya kubapo kwa kwa Shikulwifwe Yesu Kristu.+ 24 Uulemwita wa cishinka, kabili akacita ifi fintu.

25 Bamunyinefwe, mutwalilile ukutupepelako.+

26 Posheni aba bwananyina bonse kabili mubatomone.*

27 Ndemukonkomesha nga nshi mwi shina lya kwa Shikulu ukuti mukabelengele aba bwananyina bonse iyi kalata.+

28 Icikuuku icaibela ica kwa Shikulwifwe Yesu Kristu cibe na imwe.