KALATA YA BUBILI KU BENA TESALONIKA

1 Nine Paulo, ndi pamo na Silbani* na Timote.+ Nalembela imwe mwe ba mu cilonganino ca bena Tesalonika, mwe bantu ba kwa Lesa Shifwe e lyo na Shikulu Yesu Kristu, ndeti:

2 Icikuuku icaibela no mutende ukufuma kuli Lesa Shifwe na kuli Shikulu Yesu Kristu fibe na imwe.

3 Lyonse tufwile ukutootela Lesa pali imwe mwe bamunyinefwe. Nacilinga ukucita ifi, pantu icitetekelo cenu cileya cilekulilako nga nshi kabili bonse umo umo muleya muletemwaninako+ fye. 4 E ico tulaitakisha+ mu filonganino fyonse ifya kwa Lesa pa mulandu wenu, pantu mulashipikisha kabili mwalikwata icitetekelo, nangu ca kuti balamucusha kabili mulakwata amafya.*+ 5 Ubu e bushininkisho bwa kuti ifyo Lesa apingula fyalilungama, kabili ifi filalenga mube abalinga ukuba mu Bufumu bwa kwa Lesa, ubo muleculila+ icine cine.

6 Ubu ubupingushi bwa kwa Lesa bwalilungama pantu akakanda abamucusha.+ 7 Lelo imwe mwe balecula, akalenga imwe na ifwe tukaleke ukucula ilyo Shikulu Yesu+ akasokololwa ukufuma ku muulu pamo na bamalaika+ bakwe aba maka 8 mu mulilo uubilima, ilyo akaleta icilandushi pa bashaishiba Lesa, na pa bashinakila imbila nsuma iya kwa Shikulwifwe Yesu.+ 9 Aba bantu akabapingula ukonaulwa+ umuyayaya ica kuti takalebamona, kabili tabakamone ubukata bwa maka yakwe, 10 ilyo akesa mu kucindamikilwa pamo na bantu bakwe aba mushilo. Kabili muli bulya bushiku bonse abamutetekela bakamucindika. Na imwe mukaba pali aba bantu pantu mwalitetekele ifyo twamushimikile.

11 E ico lyonse tulamupepelako, ukuti Lesa wesu alemumona ukuti mwalilinga ukupokelela ubwite+ bwakwe, no kuti alebomfya amaka mu kucita icintu conse icisuma ico alefwaya, kabili alemwafwa pa kuti mulebomba bwino imilimo yenu yonse iyo mubomba pa mulandu wa kuti mwalikwata icitetekelo. 12 Ico tupepela ifi ni pa kuti ishina lya kwa Shikulwifwe Yesu licindikwe ukupitila muli imwe, na imwe mucindikwe ukupitila muli ena, ukulingana ne cikuuku icaibela ica kwa Lesa wesu ne ca kwa Shikulu Yesu Kristu.

2 Nomba mwe bamunyinefwe, ukulosha ku kubapo kwa kwa Shikulwifwe Yesu Kristu+ no kulonganikwa kwesu kuli ena,+ tulemulomba ukuti, 2 mwileka amatontonkanyo yenu yafulungane bwangu kabili mwitunsha imitima pa mashiwi ayafuma ku mupashi,*+ nangu pa mashiwi ayo abantu balanda nelyo pa makalata ayamoneka kwati yafumine kuli ifwe, ayalanda ukuti ubushiku bwa kwa Yehova*+ nabufika.

3 Mwileka umuntu nangu umo amulufye* mu musango uuli onse, pantu ubu bushiku tabwakese kano ubusangu+ bwabalilapo ukwisa no muntu mpulamafunde+ asokololwa, umwana wa bonaushi.+ 4 Alasuusha kabili alaisansabika ukucila onse uwitwa “lesa” nelyo conse ico bapepa, pa kuti ekale mwi tempele lya kwa Lesa, kabili ailange pa cintubwingi ukuti ni lesa. 5 Bushe tamuleibukisha ukuti ilyo nali na imwe nalemweba ifi fintu?

6 Kabili nomba mwalishiba icicincintila uyu mpulamafunde, pa kuti akasokololwe mu nshita yakwe. 7 Pantu amaka ya nkaama aya bumpulamafunde yalitendeka kale ukubomba,+ lelo ikatwalilila fye ukuba inkaama mpaka uucincintila akafumepo. 8 Lyena mpulamafunde akasokololwa, uo Shikulu Yesu akepaya ku mupashi wa mu kanwa+ kakwe no kumonaula ilyo akamoneka+ mu nshita ya kubapo kwakwe. 9 Lelo icilenga mpulamafunde alebako mulandu ne fya maka fyonse ifyo Satana+ acita, ifishibilo fya bufi e lyo ne fipesha amano+ fyakwe, 10 kabili abomfya ifyabipa ifyalekanalekana pa kubepa+ abali no kuloba, abakakandwa pa mulandu wa kuti tabapokelele icine icingalenga bapusuka kabili tabacitemenwe. 11 E mulandu wine Lesa alekeele amashiwi ya bufi yabalufye, pa kuti bengasumina ifya bufi,+ 12 pa kuti bonse bengapingulwa, pantu tabasumiine icine, lelo batemenwe ukucita ifishalungama.

13 Nomba lyonse ifwe tufwile ukulatootela Lesa pali imwe, mwe bamunyinefwe abo Yehova* atemwa, pantu ukufuma fye pa kutendeka Lesa alimusalile+ pa kuti mukapusuke ilyo amulengele ukuba aba mushilo+ ukubomfya umupashi wakwe, na pa mulandu wa kuti mwalitetekela icine. 14 Amwitile kuli ici ukupitila mu mbila nsuma iyo tubila, pa kuti mukwate ubukata bwa kwa Shikulwifwe Yesu Kristu.+ 15 E ico kanshi bamunyinefwe, iminineni ndi+ kabili ikatisheni ifyo mwasambilile,+ nampo nga fintu twamwebele pa kanwa nkati nelyo nga fintu twamulembeele muli kalata iyo twamutumiine. 16 Na kabili, Shikulwifwe Yesu Kristu umwine na Lesa Shifwe, uwatutemenwe+ no kutupeela icisansamushi ca muyayaya ne subilo+ ilisuma ukupitila mu cikuuku icaibela, 17 engasansamusha imitima yenu no kumukosha mu mulimo onse uusuma na mashiwi yonse ayasuma.

3 Ica kulekeleshako bamunyinefwe ca kuti, mutwalilile ukulatupepelako+ pa kuti icebo ca kwa Yehova* citwalilile ukusalangana bwangu bwangu+ kabili abantu balecicindamika, nga filya fine na imwe mucita, 2 na pa kuti Lesa engatupokolola ku bantu+ abengatucita ifyabipa kabili imbifi, pantu te bantu bonse+ abakwata icitetekelo. 3 Lelo Shikulu wa cishinka, kabili akamukosha no kumucingilila ku mubifi. 4 Kabili apo tuli basambi ba kwa Shikulu, twalicetekela ukuti mulacita ifyo tumweba kabili mukatwalilila ukuficita. 5 Shikulu natwalilile ukutungulula imitima yenu bwino bwino ku kutemwa kwa kwa Lesa+ na ku kushipikisha+ uko mukabila, pa kuti mulebombela Kristu.

6 Nomba tulemweba ifyo mufwile ukulakonka mwe ba bwananyina, mwi shina lya kwa Shikulwifwe Yesu Kristu, ukuti muletaluka ku wa bwananyina onse uushumfwa+ kabili uushicita ifyo twamusambilishe.*+ 7 Pantu mwe bene mwalishiba ifyo mufwile ukutupashanya,+ pa mulandu wa kuti ilyo twali na imwe tatwali nga bantu abashumfwa, 8 kabili tatwaliile ifya kulya ku muntu nangu umo apa fye.*+ Lelo twalebombesha, twalebomba ubushiku na kasuba pa kuti twitwika nangu umo pali imwe+ icisendo ca kutusakamana. 9 Te pa mulandu wa kuti tatwakwete insambu,+ lelo ni co twalefwaya ukucita ifyo na imwe mwingatupashanyamo.+ 10 Na kuba ilyo twali na imwe, twalemweba atuti: “Umuntu nga tafwaya ukubomba, no kulya elalya.”+ 11 Pantu tulomfwa ukuti bamo pali imwe+ tabomfwa, pantu tababomba nakalya, lelo baibika mu fishibakumine.+ 12 Abantu ba musango uyo, tulebeba no kubakonkomesesha muli Shikulu Yesu Kristu ukuti balebomba mu mutalalila no kulalya ifya kulya ififuma mu fyo baibombela+ abene.

13 Lelo imwe bamunyinefwe, mwinenuka ukucita ifisuma. 14 Lelo umuntu nga talekonka amashiwi yesu ayali muli ino kalata, mumwishibe bwino, muleke ukwampana nankwe,+ pa kuti ekatwe nsoni. 15 Na lyo line mwilamumona ngo mulwani, lelo muletwalilila ukumukonkomesha+ pantu wa bwananyina.

16 Nomba Shikulu wa mutende umwine natwalilile ukumupeela umutende inshita yonse mu nshila+ yonse. Shikulu abe na imwe bonse.

17 Ine ne Paulo, ne mwine nine nalemba+ aya mashiwi ya kumuposha. Ici e ca kwishibilako amakalata yandi yonse; ifi e fyo nemba.

18 Icikuuku icaibela ica kwa Shikulwifwe Yesu Kristu cibe na imwe bonse.