KULI TITO

1 Ine ne Paulo, ne musha wa kwa Lesa kabili ne mutumwa wa kwa Yesu Kristu ne wakwata icitetekelo nge co abasalwa ba kwa Lesa bakwata, kabili icalingana no kwishiba bwino bwino icine ca bukapepa 2 kabili icashimpwa pe subilo lya mweo wa muyayaya,+ uo Lesa uushingabepa+ alaile kale sana; 3 lelo uwalengele icebo cakwe caishibikwa mu nshita yalinga, ukupitila mu mulimo wa kushimikila uo napeelwe+ ukulingana ne fyo Lesa, Umupusushi wesu anjebele; 4 nalembela iwe Tito ino kalata, we mwana wine wine ukulingana ne citetekelo ico bonse twakwata:

Icikuuku no mutende ukufuma kuli Lesa Shifwe na kuli Kristu Yesu Umupusushi wesu fibe na iwe.

5 Ico nakushiilile mu Krete, ni pa kuti ulungike ifyalubene, kabili usonte baeluda mu misumba yonse, ukulingana ne fyo nakwebele ukuti: 6 uulingile ukuba kangalila afwile ukuba uwabula umulandu, umulume wa mukashi umo, uwaba na bana abasumina abo bashitunga ukuti bali-ilekelesha nelyo ukuti ni bacintomfwa.+ 7 Apo kangalila mubomfi wa kwa Lesa, afwile ukuba uushitungwa akabi, tafwile ukuba munshebwa,+ tafwile ukuba uwa cipyu,+ tafwile ukuba cakolwa, tafwile ukuba uupuma, kabili talingile ukuba no lunkumbwa lwa fyuma, 8 lelo afwile ukulapokelela abeni,+ uwatemwa ubusuma, uwa mano,*+ uwalungama, uwa cishinka,+ uwailama,+ 9 uukonka sana icebo ca kwa Lesa ica cishinka* mu misambilishishe yakwe,+ pa kuti alekoselesha* abantu ukupitila mwi sambililo ilisuma*+ kabili alekalipila+ abapilika ili isambililo.

10 Pantu kuli bacintomfwa abengi, abasabaila fye, abalufya abantu, kabili abengi pali aba bakonka ulutambi lwa kusembulula.+ 11 Tufwile ukwisala utunwa twa aba bantu, pantu aba e bonaula indupwa pa mulandu wa kuti basambilisha ifyo bashifwile ukusambilisha pa kuti banonke ifyuma mu bucenjeshi. 12 Kasesema umwina Krete munabo, atile: “Abena Krete lyonse balabepa, ni nama mbi, kabili banang’ani abafunuka nga nshi.”

13 Ifi alandile fya cine. E mulandu wine ndekwebela nati utwalilile ukubakalipila, pa kuti babe ne citetekelo icakosa,* 14 belabika amano ku milumbe ya baYuda na ku mafunde ya bantu abasuula icine. 15 Ifintu fyonse fyalisanguluka ku bantu abasanguluka;+ lelo ku bakowela kabili abashakwata icitetekelo takwaba nangu cimo icasanguluka, pantu amatontonkanyo yabo na kampingu yabo fyalikowela.+ 16 Basosa abati balishiba Lesa, lelo balamukaana mu fyo bacita,+ pantu ba bunani kabili ni bacintomfwa kabili te kuti babombe umulimo uusuma nangu umo.

2 Lelo iwe ulelanda ifyalingana ne sambililo ilisuma.*+ 2 Abaume abakalamba belacishamo ukucita ifintu, babe abaicindika, aba mano, aba citetekelo cakosa, abatemwa abantu, kabili abashipikisha. 3 Na banakashi abakalamba nabo, babe ne mibele ya mushilo, tabafwile ukuba aba lwambo, tabalingile ukutekwa ubusha ku mwangashi uwingi, balesambilisha ifisuma, 4 pa kuti balesambilisha abakashana ukutemwa abalume babo, ukutemwa abana babo, 5 ukuba na mano, ukuba abasanguluka, abasunga bwino amayanda* yabo, abasuma, abanakila abalume babo,+ pa kuti abantu belalanda ifyabipa pa cebo ca kwa Lesa.

6 Na balumendo bene ulebakonkomesha ukuti baleba na mano,+ 7 imilimo yobe yonse ileba iisuma pa kuti bambi balekupashanya. Ulebikako amano ilyo ulesambilisha abantu+ ifya cine,* 8 uleba ne milandile iisuma* iishingakalifya abantu,+ pa kuti abasuusha baleumfwa insoni, kabili belakwata apa kulandila ifyabipa pali ifwe.+ 9 Eba na basha ukuti balenakila bashikulwibo muli fyonse,+ kabili balebasekesha, belabapilika, 10 belabebila,+ lelo baleba aba cishinka sana, pa kuti muli fyonse bayemfye isambililo lya kwa Lesa, Umupusushi wesu.+

11 Pantu Lesa alilanga icikuuku cakwe pa kuti abantu abalekanalekana bakapusuke.+ 12 Ici icikuuku citusambilisha ifya kukaanaba ne mibele iishili ya bwina Lesa no lunkumbwa lwa pano calo,+ kabili citusambilisha ifya kuba na mano, ifya kuba abalungami ne fya kuba na bukapepa muli buno bwikashi,*+ 13 ilyo tulelolela isubilo ilisuma nga nshi+ no kumoneka kwa kwa Lesa mukulu no kwa Mupusushi wesu, Yesu Kristu mu bukata bwabo. 14 Kristu aipeele pali ifwe+ pa kuti atulubule+ ku musango onse uwa bumpulamafunde na pa kuti asangulule abantu bakwe abaibela, kabili abacincila mu kubomba imilimo iisuma.+

15 Twalilila ukubasambilisha ifi fintu, ulebakonkomesha* no kubakalipila pantu walipeelwa amaka.+ Wileka umuntu nangu umo akusuule.

3 Ulebebukishako ukulanakila no kulaumfwila amabuteko na balashi,+ ukuba abaiteyanya ukubomba umulimo onse uusuma, 2 ukukanapontela umuntu nangu umo, ukukanaba no lubuli, ukukanapampamina fye pa cintu cimo,+ ukuba abafuuka ku bantu bonse.+ 3 Pantu na ifwe bene kale twali impelwa mano kabili bacintomfwa. Twalilufiwe, twalitekelwe ubusha ku lunkumbwa lwa misango misango na ku kwangalisha, twalecita ifyabipa kabili twali no mufimbila, twali abaselausha, kabili twalepatana.

4 Lelo ilyo Lesa Umupusushi wesu+ atulangile icikuuku no kutemwa uko atemwa abantu, 5 alitupuswishe, (te pa mulandu wa milimo iisuma iyo twabombele nakalya,+ lelo ni ku luse lwakwe fye.)+ Alitupuswishe lintu atusambile pa kuti tube aba mweo+ na lintu atulengele abapya ku mupashi wa mushilo.+ 6 Atupongolwelele uyu mupashi ukupitila muli Yesu Kristu Umupusushi wesu,+ 7 pa kuti pa numa ya kulungamikwa ukupitila mu cikuuku cakwe,+ tube impyani+ sha mweo wa muyayaya+ ukulingana ne subilo twakwata.

8 Aya mashiwi ya cishinka, kabili ndefwaisha iwe ulekomaila sana pali ifi fintu, pa kuti abasumina muli Lesa balebika amano ku kutwalilila ukubomba imilimo iisuma. Ifi fintu, fisuma kabili filafwa abantu.

9 Lelo wilakansana na bantu pa fya buwelewele na pa ntuntuko sha fikolwe, wilaumana nabo pa Mafunde kabili wilalwilapo, pantu tafyafwa kantu kabili fya fye.+ 10 Umuntu uulesabankanya isambililo lya bufi+ umutaluke+ pa numa ya kumusoka umuku wa ntanshi no wa bubili,+ 11 pantu ninshi umuntu wa musango uyu alifuma mu nshila kabili alebembuka, kabili ifyo acita filamushinina.

12 Ilyo nkatuma Artema nelyo Tukiki+ kuli iwe, wikafilwa ukwisa kuli ine ku Nikopoli, pantu e ko ndefwaya nkekale mu nshita ya mpepo. 13 Upekanishishe bwino bwino Sena, uwaishiba sana Amafunde, na Apolo ifya pa lwendo lwabo pa kuti bekabulwa nangu cimo.+ 14 Lelo abantu besu nabo basambilile ukulabomba imilimo iisuma pa kuti baleafwilisha abalekabila ubwafwilisho mu kampampa,+ pa kuti baletwala ifisabo.*+

15 Bonse abali pamo na ine bakuposha. Posha abatutemwa ababa ne citetekelo.

Icikuuku ca kwa Lesa cibe na imwe bonse.