KALATA KU BAHEBERE

1 Kale Lesa alelanda ne fikolwe fyesu pa nshita ishingi kabili mu nshila ishalekanalekana ukupitila muli bakasesema.+ 2 Nomba ku mpela ya shino nshiku alanda na ifwe ukupitila mu Mwana,+ uo asontele ukuba impyani ya fintu fyonse,+ kabili muli uyu wine e mo apangile ifintu ifya pano isonde ne fya mu muulu.*+ 3 Muli ena e mumonekela ubukata bwa kwa Lesa+ kabili e cipasho cine cine ica fyo aba.+ E ulenga no kuti ifintu fyonse fikonkanyepo ukubako ku mashiwi yakwe aya maka; kabili ilyo atusangulwile ku membu shesu,+ aikele apasansuka ku kuboko kwa ku kulyo ukwa kwa Lesa Mukulu.+ 4 E ico nomba alicila pali bamalaika,+ pantu balimupeela ishina ilyacila sana amashina yabo.+

5 Ku ca kumwenako ni malaika nshi atalile aebapo ati: “Uli mwana wandi; buno bushiku nimba wiso”?+ Kabili ni malaika nshi aebelepo ati: “Nkaba wishi, na o akaba umwana wandi”?+ 6 Lelo pa kuleta Ibeli lyakwe+ na kabili ku bantu ba pano isonde, atila: “Na bamalaika bonse aba kwa Lesa bamufukamine.”*

7 Na kabili, pali bamalaika atila: “Alenga bamalaika bakwe baba na maka,* kabili alenga ababomfi bakwe*+ baba ulubingu lwa mulilo.”+ 8 Lelo pa Mwana atila: “Lesa e cipuna cobe ica Bufumu+ umuyayaya, ne nkonto ya Bufumu bobe ni nkonto ya bulungami.* 9 Walitemenwe ubulungami, kabili wapatile bumpulamafunde. E mulandu wine Lesa, Lesa obe, akusubiile+ amafuta no kukulenga ulesekelela sana ukucila abanobe.”+ 10 Kabili atila: “Pa kutendeka mwe Shikulu, mwapangile imifula ye sonde, kabili ne myulu nimwe mwabumba. 11 Ifi fikaloba, lelo imwe mukatwalilila ukubako; nga filya ica kufwala conaika, e fyo nafyo fikonaika, 12 mukafifunga nge ca kufwala, kabili nga filya fine umuntu afuula ica kufwala ca kunse, e fyo na imwe mukafifumyapo. Lelo imwe mwaba fye cimo cine, kabili tamwakwata impela.”+

13 Nomba ni malaika nshi aebapo ati: “Ikala ku kuboko kwandi ukwa ku kulyo, mpaka nkalenge abalwani bobe bakabe nga kapuna ka kunyantapo amakasa yobe”?+ 14 Bushe bonse te mipashi ya kubomba umulimo wa mushilo,*+ iyo batuma mu kubombela abakapusuka?

2 E mulandu wine tufwile ukubikila sana amano ku fyo twaumfwa,+ pa kuti twisensenunwa.*+ 2 Pantu amashiwi ayalandilwe ukupitila muli bamalaika+ nga yali aya cishinka, kabili nga ca kuti bonse abalepula mu mafunde na bonse abashali ne cumfwila balekandwa ukulingana ne fyo balingile ukukandwa,+ 3 ninshi tukapusuka shani nga twalekelesha ipusukilo lyakula ifi?+ Pantu Shikulu+ e wabalilepo ukubila ili ipusukilo, kabili abaumfwile kuli Shikulu balitushimikile ukuti lya cine. 4 Kabili Lesa na o alilangile ukuti ili ipusukilo lya cine ilyo acitile ifishibilo ne fipesha amano+ e lyo ne milimo ya maka iyalekanalekana, kabili ilyo apeele ababomfi bakwe ifya bupe fya mupashi wa mushilo ukulingana ne fyo afwaya.+

5 Pantu te bamalaika apeela amaka ya kulatungulula aba mwi sonde ilikesa+ ilyo tulelandapo. 6 Lelo inte imo yalandile aiti: “Wanshi umuntu uwa kuti mulemutontonkanyapo lyonse, kabili wanshi umwana wa muntu uwa kuti mulemusakamana?+ 7 Mwamulengele acepako panono pali bamalaika; mwamupeele ubukata no mucinshi, kabili mwamusontele ukula-angalila ifyo mwabumba. 8 Ifintu fyonse mwafibikile pe samba lya makasa yakwe.”+ Apo bamulengele ukuti aletungulula ifintu fyonse,+ Lesa tashile nangu cimo ico ashaletungulula.+ Lelo pali ino nshita, tatulati tumumone aletungulula ifintu fyonse.+ 9 Lelo tulamona Yesu, uo bacefesheko panono pali bamalaika,+ nabamufwika ubukata no mucinshi pantu aliculile mpaka afwa,+ pa kuti afwile abantu bonse pa mulandu ne cikuuku icaibela ica kwa Lesa.+

10 Pantu calilingile ukuti uo ifintu fyonse fyabelako, kabili uo fyabelako ukupitila muli ena alenge abana abengi babe no bukata.+ E ico alengele ukuti Intungulushi Iikalamba icule+ pa kuti ifikepo ukubapususha.+ 11 Pantu uulelenga baba aba mushilo e lyo nabo alelenga baba aba mushilo+ bonse batuntuka kuli umo,+ kabili e mulandu wine ashumfwila insoni ukubeta ukuti bamunyinane,+ 12 ilyo atila: “Nkabilisha ishina lyenu kuli bamunyinane; pa bantu abalongene pamo e po nkamulumbanishisha mu nyimbo.”+ 13 Alandile no kuti: “E o nkacetekela.”+ Kabili alandile ati: “Moneni! Ine na bana abanono abo Yehova* ampeela.”+

14 E ico apo “abana abanono” nabo balikwata umulopa no munofu, na o wine aishilekwata umulopa no munofu,+ pa kuti ukupitila mu mfwa yakwe onaule uwakwata amaka yakulenga abantu balefwa,+ e kutila, Satana Kaseebanya,+ 15 na pa kuti engalubula bonse abatekelwe ubusha ubumi bwabo bonse pa mulandu wa kutiina imfwa.+ 16 Pantu kwena te bamalaika aleafwilisha, lelo mwana* wa kwa Abrahamu+ aleafwilisha. 17 E ico ali no kuba fye nga “bamunyina” muli fyonse,+ pa kuti abe shimapepo mukalamba uwa luse kabili uwa cishinka mu mulimo wa kwa Lesa, pa kuti atuule ilambo+ lya kufuta imembu sha bantu.+ 18 Apo umwine aliculile ilyo ale-eshiwa,+ abale-eshiwa kuti abafwa.+

3 E ico mwe bamunyinefwe aba mushilo, mwe baba pa baitwa ku muulu,+ tontonkanyeni pali Yesu, umutumwa kabili shimapepo mukalamba uo twasuminamo.+ 2 Ali uwa cishinka ku Wamusontele+ ukubomba uyu mulimo, nga filya fine na Mose ali uwa cishinka mu ng’anda yonse iya wamusontele.+ 3 Pantu ena* bamumwene ukuti alilinga ukuba no bukata ubukalamba nga nshi+ ukucila Mose, pantu uukuula ing’anda alacindamapo ukucila ing’anda. 4 Ca cine ing’anda yonse muntu akuula, lelo uwabumbile ifintu fyonse ni Lesa. 5 Nomba Mose ali umubomfi wa cishinka mu ng’anda ya Wamusontele yonse. Umulimo wakwe wali bushininkisho* bwa fintu ifyali no kulandwapo ku ntanshi, 6 lelo Kristu ali mwana wa cishinka+ uwaleangalila ing’anda ya kwa Lesa. Ifwe tuli ng’anda ya kwa Lesa+ nga twatwalilila ukulanda ukwabula umwenso, kabili nga twatwalilila ukuitakishisha pe subilo lyesu ukufika na ku mpela.

7 E ico nga filya fine umupashi wa mushilo utila,+ “Nga mwaumfwa ishiwi lyakwe buno bushiku, 8 mwileka imitima yenu ikose, nga filya ifikolwe fyenu fyacitile ilyo fyankalifye, pa bushiku fyanjeseshe mu matololo.+ 9 Pali ubu bushiku ifikolwe fyenu fyalinjeseshe, nangu ca kuti fyalimwene ifyo nacitile pa myaka 40.+ 10 E calengele mfulilwe sana iyi nkulo, kabili nalandile nati: ‘Lyonse bakonkelela fye imitima yabo, kabili tabakonka inshila shandi.’ 11 E ico nalilapile ninshi nimfulwa nati, ‘Nshakabasuminishe ukutuushisha pamo na ine.’”+

12 Cenjeleni mwe bamunyinefwe, epali umo pali imwe aba no mutima uwabipa uwabula icitetekelo pa mulandu wa kufuma kuli Lesa wa mweo;+ 13 lelo mulekoseleshanya cila bushiku, kulila fye twatwalilila ukuba abomi mu bushiku ubuleitwa ukuti “Buno bushiku”+ pa kuti umuntu nangu umo pali imwe ekosa umutima pa mulandu wa kubelelekwa kwa lubembu. 14 Pantu cine cine na ifwe tukacita ifyo Kristu acita, kulila fye twatwalilila ukushininkisha ukufika na ku mpela nga fintu twashininkishe pa kutendeka.+ 15 Nga filya calembwa aciti, “Nga mwaumfwa ishiwi lyakwe buno bushiku, mwileka imitima yenu ikose, nga filya ifikolwe fyenu fyankalifye.”+

16 Pantu ni bani abaumfwile lelo abakalifye Lesa? Bushe te bonse abafumine mu Egupti abo Mose aletungulula?+ 17 Kabili ni bani Lesa afuliilwe pa myaka 40?+ Bushe te balya ababembwike, abo ifitumbi fyabo fyaba mu matololo?+ 18 Na kabili, ni bani abo alapiilepo ukuti tali no kubasuminisha ukutuusha pamo nankwe? Bushe te balya abashakwete icumfwila? 19 E ico twamona ukuti tabasuminishe ukutuushisha pamo nankwe pantu tabakwete icitetekelo.+

4 E ico apo ubulayo bwa kutuushisha pamo na Lesa buciliko, tucenjele* epali umo afilwa ukutuushisha pamo nankwe.+ 2 Pantu imbila nsuma yalibilwa kuli ifwe,+ nga filya fine yabililwe na kuli balya; lelo amashiwi ayo baumfwile tayabafwile, pantu tabakwete icitetekelo cimo cine nge cakwete balya abaumfwile. 3 Pantu ifwe fwe batetekela tulatuushisha pamo na Lesa, nga filya fine alanda ati: “E ico nalilapile ninshi nimfulwa nati, ‘Nshakabasuminishe ukutuushisha pamo na ine,’”+ nangu ca kutila imilimo yakwe yapwile ilyo icalo caishilebako.+ 4 Pantu pe lembo limo alanda pa bushiku bwalenga 7 ati: “Kabili Lesa atuushishe ku milimo yakwe yonse mu bushiku bwalenga 7,”+ 5 na kabili apa atila: “Nshakabasuminishe ukutuushisha pamo na ine.”+

6 E ico apo kucili bamo abo akasuminisha ukutuushisha pamo nankwe, kabili apo abo imbila nsuma yabalilepo ukubilwako tabasuminishe ukutuushisha pamo nankwe pa mulandu wa kuti tabakwete icumfwila,+ 7 alibikako ubushiku bumbi pantu alilandile mu malumbo ya kwa Davidi pa numa ya nshita iitali ati, “Buno bushiku”; nga filya cilembelwe pa muulu ati, “Nga mwaumfwa ishiwi lyakwe buno bushiku, mwileka imitima yenu ikose.”+ 8 Pantu nga ca kuti Yoshua+ alibatungulwile ku cifulo ca kutuushishako, Lesa nga talandile pa bushiku bumbi ilyo papitile inshita. 9 E ico kucili isabata ilyo abantu ba kwa Lesa bakatuushamo.+ 10 Pantu umuntu uo Lesa asuminisha ukutuushisha pamo nankwe, ninshi atuusha na ku milimo yakwe, nga filya fine Lesa atuushishe ku milimo yakwe.+

11 E ico tuibikilisheko pa kuti akatusuminishe ukutuushisha pamo nankwe, pa kuti peba nangu umo uwabula icumfwila nga filya balya bali.+ 12 Pantu icebo ca kwa Lesa ca mweo kabili ca maka+ kabili calitwa ukucila ulupanga lonse ulwatwila konse kubili,+ cilapulinkanya ica kuti cilalekanya ne fyo umuntu* aba ne fyaba mu mutima* wakwe, cilekanya na pasuntikanina amafupa no bufyompo, kabili cileshiba amatontonkanyo na mapange ya mutima. 13 Kabili takwaba icibumbwa icafisama ku cinso cakwe,+ lelo ifintu fyonse fyaba pa bwelu* kabili fyaba pa lwalala ku menso ya uo tufwile ukulubululako.+

14 E ico apo twalikwata shimapepo mukalamba uwacila bashimapepo mukalamba bonse uwaya ku muulu, Yesu Umwana wa kwa Lesa,+ natutwalilile ukubila ukuti twalimutetekela.+ 15 Pantu shimapepo mukalamba twakwata te ulya uushingatulangulukilako pali ifi tushapwililika,+ lelo twakwata shimapepo mukalamba uwaeshiwa muli fyonse nge fi fine na ifwe twaeshiwa, nomba ena takwata ulubembu.+ 16 E ico, natupalame ku cipuna ca bufumu ica cikuuku icaibela ukwabula umwenso,+ pa kuti twingabelelwa uluse, na pa kuti icikuuku icaibela cingatwafwa pa nshita yalinga.

5 Pantu ico basalila shimapepo mukalamba pa bantu no kumusonta ukulabomba umulimo wa kwa Lesa,+ ni pa kuti aletuula ifya bupe na malambo ya pa membu.+ 2 Kuti alangulukilako abashaishiba ifintu na balufyanya, pantu na o alikwata ifyo anakamo, 3 kabili pali uyu mulandu, afwile ukutuula imituulo pa membu shakwe filya fine atuula na pa membu sha bantu bambi.+

4 Umuntu taipeela umwine ici cifulo icacindama, kano fye ilyo Lesa amwita, nga filya fine aitile Aarone.+ 5 Ifi fine e fyo cali na kuli Kristu, taicindamike fye umwine+ no kuipeela icifulo ca bushimapepo mukalamba, lelo uwamucindamike ni Ulya wamwebele ati: “Uli mwana wandi; buno bushiku nimba wiso.”+ 6 Nga filya fine alanda na pambi ati, “Niwe shimapepo umuyayaya nga filya fine Melkisedeke aali.”+

7 Ilyo Kristu ali umuntunse pano isonde,* alipaapeete no kulomba, e lyo no kulilila nga nshi ne filamba+ kuli Uyo uwali na maka ya kumupususha ku mfwa, kabili alimuumfwile pa mulandu wa kuti aletiina Lesa. 8 Nangu ca kuti ali mwana, alisambilile icumfwila ku fintu aculileko.+ 9 Kabili ilyo bamulengele aba uwapwililika,+ bamupeele umulimo wa kulenga bonse abamumfwila bakapusuke umuyayaya,+ 10 pantu e o Lesa asonta ukuba shimapepo mukalamba nga filya Melkisedeke aali.+

11 Natukwata ifintu ifingi ifya kulanda pali ena, nomba nacikosa ukufilondolola, pantu mwalileka ukumfwa bwangu. 12 Pantu nangu ca kuti pali ino nshita* mufwile ukuba bakasambilisha, mucili mulekabila uwa kumusambilisha ukutendekela pa fya kubalilapo ukwishiba+ mu mashiwi ya mushilo aya kwa Lesa, kabili mukabila umukaka, tamukabila ifya kulya ifyakosa. 13 Pantu onse uutwalilila ukunwa umukaka taishiba amashiwi ya bulungami, pantu mwana umunono.+ 14 Lelo ifya kulya ifyakosa fya bakalamba, aba kuti balikwata amano ya kulekanya icalungama ne calubana pa mulandu wa kubelesha.

6 E ico apo nomba twalifuma ku masambililo ya kutendekelako+ pali Kristu, natweshe na maka ukuba abakalamba.+ Twibwelela na kabili ku masambililo ya kutendekelako, e kutila, aya kulapila ku milimo ya fye,* na ya pa citetekelo muli Lesa, 2 pa masambililo ya pa lubatisho, na pa kubika iminwe pa bantu,+ pa kubuushiwa kwa bafwa+ e lyo na pa bupingushi bwa muyayaya. 3 Kabili tukacita ici, nga ca kuti Lesa asuminisha.

4 Pantu abapokelela ulubuuto lwa kwa Lesa,+ kabili abaumfwapo ifyo ica bupe ca mu muulu cawama, abapokelela umupashi wa mushilo, 5 kabili abaumfwapo ifyo icebo ca kwa Lesa cawama, abasondapo ne fya maka ifikaba mu bwikashi ubuleisa,* 6 lelo abafuma ku citetekelo,+ te kuti balengwe ukulapila, pantu abene beka balapoopela Umwana wa kwa Lesa na kabili pa cimuti, kabili balamuseebanya pa lwalala.+ 7 Pantu umushili ulapokelela ipaalo ukufuma kuli Lesa ilyo unwa amenshi ya mfula iilokelapo libili libili. Lyena ulamesha ifimenwa ifyo abaulima babomfya. 8 Lelo nga wamesha imyunga na bacilasa, balauleka kabili ni cikanga no ku-utiipa bautiipe, na mukulekelesha balaoca.

9 Lelo imwe mwe batemwikwa, nangu tulelanda ifi, natushininkisha ukuti mulecita ifintu ifisuma ukucila balya abafuma ku citetekelo, kabili ifyo mucita fikalenga mukapusuke. 10 Pantu Lesa taba uushalungama, takalabe umulimo wenu ne fyo mwalangile ukuti mwalitemwa ishina lyakwe,+ ilyo mwabombeele aba mushilo na pa fyo mutwalilila ukubabombela. 11 Lelo tulefwaisha imwe umo umo mube abacincila mu nshila imo ine pa kuti mube ne subilo ilyakosa nga nshi+ ukufika na ku mpela,+ 12 pa kuti mwiba abanang’ani,+ lelo mulepashanya abapokelele ifyo babalaile pa mulandu wa kuti bali ne citetekelo kabili balitekenye.

13 Pantu ilyo Lesa alaile Abrahamu ubulayo, apo takwaba nangu umo uwamucila uo engalapilamo, ali-ilapile umwine+ 14 ati: “Nangu cibe shani nkakupaala kabili nkakufusha.”+ 15 E ico Abrahamu alipokelele ubu bulayo, pantu alitekenye. 16 Pantu abantu balapila mu wabacila, no mulapo wabo uba e mpela ya kukansana konse, pantu uba e bushininkisho bwabo.+ 17 Ifi fine e fyo cali ilyo Lesa alefwaya ukulanga impyani sha bulayo+ apabuuta tuutu ukuti ifyo apangile* tafyakaaluke, alilapile umulapo, 18 pa kuti muli ifi ifintu fibili ifishaluka umo Lesa ashingabepa,+ e mo ifwe fwe bafulumukila ku cubo ca kwa Lesa tukoseleshiwe nga nshi pa kuti twikatishe kwi subilo ilyo batubikila pa ntanshi. 19 Twalikwata ili isubilo+ ilyaba nge nanga ya mweo, twalishininkisha ukuti lya cine kabili lyalikosa, kabili lilengila mu nsalu ya kucingilako,+ 20 umo Yesu uwatutangilila,+ uwaisaba shimapepo mukalamba umuyayaya nga filya Melkisedeke ali, aingila pa mulandu wesu.+

7 Pantu uyu Melkisedeke imfumu ya ku Salemu, shimapepo wa kwa Lesa Uwapulamo, akumenye Abrahamu ilyo alebwela mu kwipaya ishamfumu kabili alimupaalile,+ 2 kabili Abrahamu amupeele* ica pe kumi pali fyonse ifyo akwete. Ica kubalilapo, ishina lyakwe nga balipilibula lyalola mu kuti “Imfumu ya Bulungami,” kabili ni mfumu ya ku Salemu, e kutila, “Imfumu ya Mutende.” 3 Pa mulandu wa kuti takwata wishi na nyina, kabili takwata ifikolwe, e lyo kabili ubushiku afyelwe nelyo ubo afwile tabwaishibikwa, lelo bamulengele aba ngo Mwana wa kwa Lesa, aba ni shimapepo umuyayaya.+

4 Moneni ifyo uyu muntu acindeme uo Abrahamu umutwe wa lupwa,* apeele ica pe kumi pa fisuma ifyo apokolwele.+ 5 Ca cine, ukulingana na Mafunde abana ba kwa Lebi+ abo bapeele umulimo wa bushimapepo balibeba ukulapoka ica pe kumi ku bantu,+ e kutila kuli bamunyinabo nangu ca kuti aba batuntunka muli* Abrahamu. 6 Lelo uyu muntu uushatuntwike mu lupwa lwa kwa Lebi alipokele ifya pe kumi kuli Abrahamu kabili alipaalile uo balaile amalayo.+ 7 Nomba takuli uwingakaana ukuti umukalamba eupaala umwaice. 8 Abena Lebi balepokelela ifya pe kumi kabili aba bantu balefwa, lelo uyu mwaume uwapokelele ifya pe kumi, amalembo yatila acili uwa mweo.+ 9 Na kabili, kuti twatila fye ukupitila muli Abrahamu, na Lebi wine uupokelela ifya pe kumi alipeela ifya pe kumi, 10 pantu ilyo Melkisedeke akumene na Abrahamu ninshi Lebi acili mu musana wa kwa Abrahamu.*+

11 Nga ca kuti, bushimapepo bwa bena Lebi kuti bwalenga abantu baba abapwililika+ (pantu bwali mu Mafunde ayo bapeele abantu), bushe shimapepo umbi uwaba nga Melkisedeke+ lelo uushaba nga Aarone kuti afwaikwa? 12 Apo bushimapepo bulealulwa, ninshi na Mafunde yene yafwile ukwaluka.+ 13 Pantu umuntu uo balandapo ifi, wa mu mukowa umbi, umushaba nangu umo uwalebombela ku ciipailo.+ 14 Pantu calishibikwa bwino bwino ukuti Shikulwifwe atuntuka muli Yuda,+ lelo Mose talandilepo ukuti bashimapepo bali no kulafuma muli uyu umukowa.

15 Kabili ici calicilanapo ukwishibikwa ili kwaisaba shimapepo umbi+ uwaba nga Melkisedeke.+ 16 Taishileba shimapepo pa mulandu wa kufuma mu mukowa uo amafunde yalandile ukuti e mo bashimapepo bafwile ukufuma, lelo ni pa mulandu wa maka ayalenga akwate ubumi ubushingonaika.+ 17 Pantu ilembo limo lilanda pali ena aliti: “Niwe shimapepo umuyayaya nga filya fine Melkisedeke aali.”+

18 E ico ifunde lya kale balilifumyapo pantu talyakwata amaka kabili talibomba.+ 19 Pantu takuli nangu cimo ico aya Amafunde yalenga caba icapwililika,+ lelo isubilo ilyacilapo ukuwama+ ilyo baleta lyena lyalilenga ifintu fyaba ifyapwililika, kabili ili line isubilo e lilenga tulepalama kuli Lesa.+ 20 Kabili apo ici tacacitilwe ukwabula umulapo, 21 (pantu kwena kwaba abantu ababa bashimapepo apabula umulapo, lelo uyu ena aba shimapepo pa mulandu wa mulapo uo Lesa alapile pali ena ati: “Yehova* nalapa umulapo, kabili takaaluke,* atile, ‘Niwe shimapepo umuyayaya,’”)+ 22 Yesu na o aisaba bushininkisho bwa cipangano icacilapo ukuwama.+ 23 Na kabili, abengi balepyana fye bushimapepo+ pantu imfwa yalelenga betwalilila ukuba bashimapepo, 24 lelo pa mulandu wa kuti ena wa mweo umuyayaya,+ bushimapepo bwakwe tabwakwata impyani. 25 E ico ena alikwata na maka aya kupususha bonse abalepalama kuli Lesa umupwilapo ukupitila muli ena, pantu ifi aba uwa mweo inshita yonse kuti alebapaapaatilako.+

26 Pantu calilinga ukukwata shimapepo mukalamba uwaba ifi, uwa cishinka, uwa kaele, uushakowela,+ uushaba nga babembu kabili uwaba pa muulu wa myulu.+ 27 Ena takabila ukutuula amalambo cila bushiku,+ intanshi pa membu shakwe umwine lyena pa sha bantu bambi,+ nga filya bashimapepo bakalamba bacita pantu ena acitile ifi umuku wa limo ilyo aituulile umwine.+ 28 Pantu Amafunde yasonta abantu abashapwililika ukuba bashimapepo bakalamba,+ lelo amashiwi ayaba mu mulapo uo Lesa alapile+ pa numa ya Mafunde yasonta Umwana, uo alenga aba uwapwililika+ umuyayaya.

8 Nomba icishinka cikalamba pa fyo tulelandapo, ni ci: Twalikwata shimapepo mukalamba uwaba fi,+ uwaikala ku kuboko kwa ku kulyo ukwa cipuna ca Bufumu ica kwa Lesa Mukulu ku muulu,+ 2 uubombela* mu ncende ya mushilo+ kabili mwi tenti lya mushilo ilya cine cine, ilyo Yehova* atanika, te muntu iyo. 3 Pantu shimapepo mukalamba onse ico bamusontela ni pa kuti aletuula ifya bupe na malambo; e ico no yu wine alingile ukukwata cimo ica kutuula.+ 4 Nga ca kuti aali pano isonde, nga taba shimapepo,+ pantu kwaliba kale bashimapepo abatuula ifya bupe ukulingana ne fyo Amafunde yalanda. 5 Aba bantu babomba umulimo wa kwa Lesa uwimininako ificitika ku muulu, kabili uwaba cinshingwa+ ca ficitika ku muulu;+ nga filya fine Lesa apeele Mose ifunde ilyo ali no kupanga itenti. Pantu amwebele ati: “Ufwile ukupanga ifintu fyonse ukulingana ne fyo wamona pa lupili.”+ 6 Lelo nomba Yesu balimupeela umulimo* uwacilapo ukuwama pantu na kabili e kawikishanya+ wa cipangano icacilapo ukuwama+ icaishilebako ukulingana na mafunde kabili icilanda pa malayo ayacilapo ukuwama.+

7 Fyonse afiba bwino mu cipangano ca kubalilapo, icipangano calenga bubili te kuti cifwaikwe.+ 8 Pantu alisanga icilubo mu bantu kabili alanda ati: “Yehova* atila, ‘Moneni! Inshiku shikesa, ilyo nkapangana icipangano icipya na ba mu ng’anda ya kwa Israele na ba mu ng’anda ya kwa Yuda. 9 Ici cipangano tacakabe nga cilya napangene ne fikolwe fyabo pa bushiku nabekete ku kuboko pa kuti mbafumye mu calo ca Egupti,+ pantu tabatwalilile ukusunga icipangano candi, e ico nalilekele ukubasakamana,’ e fyo Yehova* alanda.

10 “Yehova* atila, ‘pantu ici e cipangano ico nkapangana na ba mu ng’anda ya kwa Israele pa numa ya nshiku shilya. Nkabika amafunde yandi mu matontonkanyo yabo, kabili nkayalemba mu mitima yabo.+ Nkaba Lesa wabo, nabo bakaba abantu bandi.+

11 “‘Kabili takwakabe nangu umo uukalasambilisha umwikashi munankwe, kabili takwakabe nangu umo uukalasambilisha munyina ati: “Ishiba Yehova!”* Pantu bonse bakanjishiba, ukutampila fye pa munono ukufika ku mukalamba. 12 Pantu nkababelela uluse pa fishalungama ifyo bacita, kabili nshakatwalilile ukwibukisha imembu shabo.’”+

13 Pa kulanda ati “icipangano cipya,” ninshi nafumyapo ica kubalilapo.+ Nomba icipangano ca kale ico afumishepo cili mupepi no kuloba.+

9 Pantu icipangano ca kubalilapo cena calikwete amafunde ya kukonka pa kubomba umulimo wa kwa Lesa, kabili calikwete icifulo ca mushilo+ pano isonde. 2 Pantu bapangile umuputule wa kubalilapo uwe tenti umwali ica kutekapo inyali,+ itebulo ne mikate ya kutuula;+ kabili uyu muputule witwa ukuti “Umuputule wa Mushilo.”+ 3 Lelo ku numa ya nsalu ya kucingilako iya bubili+ kwali umuputule na umbi uwitwa ukuti “Umuputule wa Mushilo Nga Nshi.”+ 4 Umu e mwali icifutumwino ca golde+ ne cipao ca cipangano+ ico babikileko golde konse konse.+ Mu cipao ca cipangano mwali inongo iya golde umwali mana+ kabili mwali nkonto ya kwa Aarone iyabalwile amaluba,+ na mabwe ayapaapaatala+ aya cipangano; 5 kabili pa muulu wa ciko pali bakerubi ba bukata abakupile pa nkupiko ya cifuta mulandu.*+ Lelo ino te nshita ya kuti nondolole fyonse pali ifi fintu.

6 Pa numa ya kupanga ifi fyonse muli uyu musango, libili libili bashimapepo balengila mu muputule wa kubalilapo uwe tenti mu kubomba imilimo ya kwa Lesa;+ 7 lelo mu muputule walenga bubili e mo shimapepo mukalamba engila eka umuku umo pa mwaka,+ kabili engila no mulopa,+ uo atuula pa membu shakwe umwine+ e lyo na pa membu isho abantu+ bacita mu kukanaishiba. 8 E ico umupashi wa mushilo ulalangilila bwino ukuti inshila ya kuya mu ncende ya mushilo yali tailasokololwa ilyo itenti lya kubalilapo lyaliko.+ 9 Ili itenti lyaleimininako ifyo ifintu fyali no kuba, e kutila pali ino nshita.+ Kabili ukufika na pali lelo balatuula ifya bupe na malambo.+ Lelo, ifi tafilenga uulebomba umulimo wa kwa Lesa aba na kampingu iisuma.+ 10 Fyakumine ifya kulya, ifya kunwa ne fya kukonka pa kusamba no kusamfya ifintu ukwalekanalekana.*+ Aya yali mafunde ayakumine umubili+ kabili balitwalilile ukuyakonka mpaka ne lyo inshita ya kulungika ifintu yafikile.

11 Lelo ilyo Kristu aishile pamo nga shimapepo mukalamba uwa fintu ifisuma ifyacitika kale, apitile mwi tenti ilikalamba pali ili kabili ilyapwililika nga nshi, ilishapangwa ne minwe ya bantu, e kutila, ilishili lya pano isonde. 12 Taingile muli iyi ncende ya mushilo no mulopa wa mbushi no wa bana ba ng’ombe abalume, lelo aingile no mulopa wakwe,+ kabili aingililemo fye umuku wa limo, no kutulubula* umuyayaya.+ 13 Pantu nga ca kutila umulopa wa mbushi no wa ng’ombe+ ne mito ya mwana wa ng’ombe ifyo basansa pa bantu abakowela filalenga baba aba mushilo pa kuti Lesa alebamona ukuti balisanguluka,+ 14 ninshi umulopa wa kwa Kristu,+ uwaituulile umwine uwabula akalema kuli Lesa ukupitila mu mupashi wa muyayaya, wena ukacilapo ukusangulula bakampingu besu ku milimo iyafwa+ pa kuti twingalabombela Lesa wa mweo.+

15 E mulandu wine abela kawikishanya wa cipangano cipya,+ pa kuti abaitwa bengapokelela ubulayo bwa bupyani bwa muyayaya,+ pantu alibafwila pa kuti engabalubula+ ku filubo ifyo bacitile ilyo bali mu cipangano ca kale. 16 Pantu nga kuli icipangano, ninshi umuntunse uuli muli ico cipangano afwile ukufwa. 17 Pantu icipangano citampa ukubomba umuntu nga afwa, tacibomba nga ca kuti umuntu uuli muli ico cipangano acili uwa mweo. 18 E ico nangu cipangano ca kale tacatendeke ukubomba ukwabula ukuti umulopa usuume. 19 Pantu ilyo Mose apwishishe ukweba abantu fyonse ifya kukonka ifyali mu Mafunde, abuulile umulopa wa ng’ombe no wa mbushi na menshi kabili asanshile ici icitabo* ca cipangano na bantu bonse ukubomfya amasako ya mpanga ayakashika ce na husope, 20 kabili abebele ati: “Uyu e mulopa wa cipangano ico Lesa amweba ukuti mulesunga.+ 21 Kabili asanshile umulopa kwi tenti na ku fipe fyonse ifya kubomfya pa kubomba umulimo wa mushilo.*+ 22 Cine cine ukulingana na Mafunde, mupepi fye ne fintu fyonse umulopa eufisangulula,+ e ico umulopa nga tausuumine Lesa te kuti abelele abantu uluse pa membu shabo.+

23 E ico calilingile ukuti ifimininako+ ifya ku muulu fisangululwe kuli aya yene malambo,+ lelo ifya mu muulu fyena fifwile ukusangululwa na malambo ayawama ukucila aya. 24 Pantu Kristu taingile mu ncende ya mushilo iyapangwa ne minwe ya bantu,+ iimininako incende ya mushilo iya cine cine.+ Lelo aingile mulya mwine mu muulu,+ pa kuti amonekele ku cinso ca kwa Lesa pa mulandu wesu.+ 25 Lelo tacitile ifi pa kuti aleituula libili libili, nga filya shimapepo mukalamba aleingila mu ncende ya mushilo cila mwaka+ no mulopa uushili wakwe. 26 Aciba ifi, nga ali no kulacula libili libili ukufuma pa kutendeka kwa calo. Lelo nomba alimonekela libela pa kupwa kwa buno bwikashi* pa kuti afumyepo ulubembu ukupitila mwi lambo lyakwe.+ 27 Kabili nga filya fine abantu bafwa fye umuku umo, e lyo pa numa babapingula, 28 e fyo na Kristu aituulile umwine ilambo umuku wa limo pa kuti asende imembu sha bantu abengi;+ kabili ilyo akamoneka pa muku walenga bubili te mu kufumyapo imembu, kabili abamufwaisha pa kuti bapusuke bakamumona.+

10 Apo Amafunde yaba fye cinshingwa+ ca fintu ifisuma ifikesa, lelo tayaba e ifyo fine fintu ifikesa,+ te kuti yalenge* abapalamina kuli Lesa baba abapwililika+ pa mulandu wa aya malambo ayo batuula lyonse cila mwaka. 2 Nga tacali ifi, bushe nga tabalekele ukutuula amalambo? Pantu ababomba umulimo wa kwa Lesa nga basangululwa kuti baleka ukwibukisha ukuti babembu. 3 Lelo aya malambo, cila mwaka yalebukisha abantu ukuti babembu,+ 4 pantu umulopa wa ng’ombe ishilume no wa mbushi te kuti ufumyepo imembu.

5 E ico ilyo aishile pano calo, aebele Lesa ati: “‘Tamwalefwaya ilambo no mutuulo, lelo mwampekanishishe umubili. 6 Tamwatemenwe imituulo ya koca iituntulu ne mituulo ya pa lubembu.’+ 7 Lyena natile: ‘Moneni! Naisa (mu cimfungwa* balilanda pali ine) mu kucita ifyo mufwaya, mwe Lesa.’”+ 8 Pa numa ya kulanda ati: “Tamwalefwaya kabili tamwatemenwe amalambo ne mituulo, ne mituulo ya koca iituntulu ne mituulo ya pa lubembu”—amalambo ayo batuula ukulingana na Mafunde— 9 lyena alandile ati: “Moneni! Naisa mu kucita ifyo mufwaya.”+ Afumyapo ica kubalilapo pa kuti abikepo icalenga bubili. 10 Ifi fine ifyo “mufwaya”+ e fyalengele tube aba mushilo ukupitila mu mubili wa kwa Yesu Kristu uwatuuliilwe umuku wa limo.+

11 Na kabili, cila bushiku shimapepo aleminina pa cifulo cakwe pa kuti abombe umulimo wa mushilo*+ no kutuula amalambo yamo yene libili libili.+ Aya amalambo te kuti yafumyepo imembu umupwilapo.+ 12 Lelo uyu muntu atuuliile umuku wa limo ilambo limo ilya pa membu kabili aikala ku kuboko kwa ku kulyo ukwa kwa Lesa,+ 13 ukufuma ilya nshita alolela fye ukuti Lesa akalenge abalwani bakwe bakabe nga kapuna ka kunyantapo amakasa yakwe.+ 14 Pantu alibomfya umutuulo umo uwe lambo pa kulenga abalesangululwa baba abapwililika+ umuyayaya. 15 Kabili umupashi wa mushilo ulalenga twashininkisha ici, pantu pa numa ya kulanda ati: 16 “‘Ici e cipangano ico nkapangana nabo pa numa ya nshiku shilya,’ e fyo Yehova* alanda. ‘Nkabika amafunde yandi mu mitima yabo, kabili nkayalemba mu matontonkanyo yabo.’”+ 17 Lyena ulanda auti: “Kabili nshakebukishe imembu shabo na kabili ne fyabipa ifyo bacita.”+ 18 Lesa nga abelela abantu uluse, umutuulo wa pa membu taukabilwa.

19 E ico mwe ba bwananyina, apo tuli abashipa pa kupita mu nshila ya kwingilila mu ncende ya mushilo+ pa mulandu wa mulopa wa kwa Yesu, 20 iyo atwiswilile pa kuti ibe inshila iipya kabili iya mweo ukupitila mu nsalu ya kucingilako,+ e kutila mu mubili wakwe, 21 kabili apo twalikwata shimapepo mukalamba uwangalila ing’anda ya kwa Lesa,+ 22 natupalame kuli Lesa ne mitima iya bufumacumi ne citetekelo icakosa nga nshi pantu imitima yesu na kampingu iyali iyabipa fyalisangululwa,*+ ne mibili yesu yalisambwa mu menshi aya ayasuma.+ 23 Natutwalilile ukweba abantu bonse pe subilo lyesu ukwabula ukunenuka,+ pantu uwatulaile wa cishinka. 24 Kabili natuletontonkanya sana* pa banensu pa kuti tulecincishanya* ukuba no kutemwa no kubomba imilimo iisuma,+ 25 twilapuswa mu kulongana+ filya bamo bacita, lelo tulekoseleshanya,+ maka maka apo mulemona ukuti bulya bushiku bulepalama.+

26 Pantu nga tulacita imembu ku mufulo fye pa numa ya kwishiba bwino bwino icine,+ takwaba ilambo limbi ilyashala ilya kufutilako imembu shesu,+ 27 lelo tulolela fye mwenso mwenso ubupingushi, no bukali ubupya ngo mulilo ubukesaonaula abashikonka ifyo Lesa afwaya.+ 28 Umuntu nga takonkele Amafunde ya kwa Mose balamwipaya ukwabula ukumubelela uluse nga pali aba kumushinina babili nelyo batatu.+ 29 Bushe mulemona ukuti akakandwa shani, umuntu uunyantaula Umwana wa kwa Lesa, uumona umulopa wa cipangano+ uwalenga ukuti abe uwa mushilo ukuti tawacindama sana, kabili uukalifya no kusaalula umupashi wa kwa Lesa umo alangila icikuuku cakwe icaibela?+ 30 Pantu twalimwishiba uwalandile ati: “Nine mfwile ukulandula; nine nkabakanda pa fibi ifyo bacita.” Kabili uwatile: “Yehova* akapingula abantu bakwe.”+ 31 Ukukandwa na Lesa wa mweo kulatiinya.

32 Lelo mutwalilile ukwibukisha inshiku sha kale, ifyo mwashipikishe ilyo mwaleshomboka na macushi ayakalamba pa numa ya kupokelela ulubuuto.+ 33 Inshita shimo mwaleseebana no kucula pa menso ya bantu,* kabili inshita shimbi mwaleculila pamo* na balekwata amacushi ya musango uyu. 34 Pantu mwalelangulukilako abaleba mu cifungo kabili mwalesekelela nga bamupoka ifipe,+ pantu mwalishibe ukuti mwalikwata icuma icawamapo kabili icibelelela.+

35 E ico mwileka ukulanda ukwabula umwenso, pantu mukapokelela icilambu icikalamba.+ 36 Pantu mulingile ukulashipikisha,+ pa kuti ilyo mwacita ifyo Lesa afwaya, mukapokelele ifyo bamulaya. 37 Pantu kushele fye “akashita akanono,”+ ninshi “uuleisa afika kabili takokole.”+ 38 “Lelo umuntu wandi uwalungama akaba uwa mweo pa mulandu wa kuti alikwata icitetekelo,”+ kabili, “nga abwelela inuma, takanenge ukusekelela.”*+ 39 Nomba ifwe tatuli bantu ababwelela inuma ica kuti twaonaika no konaika,+ lelo tuli bantu abakwata icitetekelo icikatupususha.*

11 Icitetekelo kulolela ninshi natushininkisha ukuti ifintu ifyo tulesubila fikacitika,+ kabili bushininkisho* bwa kuti ifintu nangu tafimoneka fya cine cine. 2 Pantu citetekelo calengele ukuti aba ku kale* basekeshe Lesa.

3 Citetekelo cilenga tuleiluka ukuti ifintu fya pano calo ne fya mu muulu* fyapekanishiwe ukulingana ne fyo Lesa alandile, pa kuti ifimoneka fifume mu fishimoneka.

4 Citetekelo calengele ukuti Abele atuule ilambo ilyacindama ukucila ilyo Kaini atuulile.+ Ici icitetekelo e calengele ukuti Lesa alemumona ukuti alilungama, kabili Lesa alilangile ici ilyo apokelele ifya bupe fyakwe.+ Na kabili icitetekelo e calenga ukuti alelanda na pali ino nshita+ nangu ca kuti alifwa.

5 Citetekelo calengele ukuti Lesa asende Enoke+ pa kuti emona imfwa, kabili abantu tabamumwene pantu Lesa alimusendele;+ pantu ilyo ashilamusenda aishibikwe ukuti alesekesha sana Lesa. 6 Kabili ukwabula icitetekelo te kuti tusekeshe Lesa, pantu onse uupalamina kuli Lesa afwile ukusumina ukuti e ko aba no kuti alalambula abafwaisha ukumubombela.+

7 Citetekelo calengele ukuti ilyo Lesa asokele Noa+ pa fintu ifyali tafilamoneka,+ alange ukuti aletiina Lesa kabili apangile icibwato+ pa kuti apusushe aba mu ng’anda yakwe. Ukupitila muli ici citetekelo alilangile ukuti aba muli ici calo balingile ukonaulwa,+ kabili ali impyani ya bulungami ubo umuntu akwata pa mulandu wa kuti alikwata icitetekelo.

8 Citetekelo calengele ukuti Abrahamu+ ilyo Lesa amwitile, omfwe no kuya ku cifulo ico ali no kupokelela ngo bupyani; kabili afumine uko aleikala, nangu ca kuti taishibe uko aleya.+ 9 Citetekelo calengele ukuti aleikala ngo mulebeshi mu calo ca bulayo kwati ni mu calo cimbi,+ no kulaikala mu matenti+ pamo na Isaki na Yakobo, impyani shinankwe isha ubu bwine bulayo.+ 10 Pantu alelolela umusumba uwakwata imifula ine ine iya kukuulapo. Uwalengele ifyo uyu musumba ulingile ukuba kabili kakuula wa uko ni Lesa.+

11 Citetekelo calengele Sara na o apokelele amaka ya kwimita, nangu ca kuti alicilile pa mushinku wa kufyala,+ pantu alishibe ukuti uwalaile wa cishinka.* 12 E ico umwaume umo uwali ngo wafwa,+ afyele abana+ abafulile nge ntanda sha mu muulu kabili ngo mucanga wa ku lulamba lwa bemba, uushingapendwa.+

13 Bonse aba bafwile ne citetekelo, nangu ca kuti tabapokelele ifyo babalaile,+ lelo bafimwenene apatali+ kabili balifisekelele. Bale-eba abantu bonse ukuti bali beni kabili abalendo mu calo. 14 Pantu bonse abalanda ifya musango uyu balanga ukuti balafwaisha icifulo icikaba icifulo cabo. 15 Na lyo line, nga baikalile fye ukufuluka icifulo uko bafumine,+ nga balibwelelamo. 16 Lelo balefwaisha icifulo icacilapo ukuwama, e kutila icifulo ca ku muulu. E ico Lesa tomfwa insoni ukuti balemwita ati Lesa wabo,+ pantu alibapekanishisha umusumba.+

17 Citetekelo calengele ukuti ilyo Abrahamu aeshiwe,+ kwashele fye panono ukuti atuule Isaki ilambo—umuntu uwapokelele amalayo afwaile ukutuula umwana wakwe uwafyelwe eka ilambo+— 18 nangu ca kuti balimwebele ukuti: “Muli Isaki e mukafuma uuketwa ati umwana obe.”*+ 19 Lelo alishibe ukuti Lesa alikwete amaka ya kumubuusha ku bafwa, kabili ilyo Isaki afumine kulya, Abrahamu alimupokelele. Ici cali cilangililo.+

20 Citetekelo calengele Isaki na o apaale Yakobo+ na Esau+ pa fintu ifyali no kwisa.

21 Citetekelo calengele ukuti ilyo Yakobo ali mupepi no kufwa,+ apaale abana abaume aba kwa Yosefe umo umo+ kabili apepe ninshi nashintilila pa nkonto yakwe.+

22 Citetekelo calengele ukuti ilyo Yosefe ali mupepi no kufwa, alande ukuti abena Israele bali no kufuma mu Egupti, kabili alibebele ifyo bali no kucita* pa mafupa yakwe.*+

23 Citetekelo calengele ukuti ilyo Mose afyelwe, abafyashi bakwe bamufise pa myeshi itatu,+ pantu balimwene ukuti ali uwayemba+ kabili tabatiinine icipope ca mfumu.+ 24 Citetekelo calengele ukuti ilyo Mose akulile,+ akaane ukumwita umwana wa mwana mwanakashi wa kwa Farao.+ 25 Asalilepo ukumucushisha pamo na bantu ba kwa Lesa ukucila ukuipakisha ifisuma fya lubembu ifya pa kashita fye akanono, 26 pantu alishibe ukuti ukuseebana aseebene ico ali Uwasubwa,* kwalicindemepo ukucila ifyuma fya mu Egupti, pantu atontele amenso pa kupoka icilambu. 27 Citetekelo calengele afume ku Egupti,+ lelo tatiinine ubukali bwa mfumu,+ pantu atwalilile ukuba uwashangila kwati alemona Uushimoneka.+ 28 Citetekelo calengele asefye Icakucilila no kusansa umulopa pa minshi pa kuti uwa konaula eikata pa mabeli yabo.+

29 Citetekelo calengele bapite pali Bemba Wakashika kwati ni pa mushili uwauma,+ lelo ilyo abena Egupti baeseshe ukupitapo, balinwenene.+

30 Citetekelo calengele ukuti amalinga ya Yeriko yawe, ilyo abena Israele bayashingulwike pa nshiku 7.+ 31 Citetekelo calengele ukuti Rahabu cilende efwila pamo na bashali ne cumfwila pantu alipokelele inengu mu mutende.+

32 Kabili finshi fimbi ifyo ningalanda? Pantu inshita kuti yancepela nga nati nkonkanyepo ukushimika pali Gideone,+ Baraki,+ Samsone,+ Yefta,+ Davidi,+ ukubikako fye na Samwele+ na bakasesema bambi. 33 Apo balikwete icitetekelo balicimfishe amabufumu,+ balicitile icalungama, balipokelele amalayo,+ balicilike utunwa twa nkalamo,+ 34 bacimfishe amaka ya mulilo,+ bapuswike ku lupanga,+ ilyo bali abanaka baishilekwata amaka,+ baishileba abakosa mu nkondo,+ kabili bacimfishe abashilika ababasanshile.+ 35 Abanakashi bapokelele abantu babo ababuushiwe ku bafwa,+ lelo abantu bambi bena balibacushishe pantu balikeene ukulubulwa, pa kuti bengabuushiwa ukubuushiwa ukwacilapo ukuwama. 36 Cine cine, bambi balyeshiwe ilyo balebapumya no kubafopaula, ne cacilapo ca kuti, balebakaka+ no kubapoosa mu fifungo.+ 37 Babapolele amabwe,+ balibeseshe, babaputwile pa kati kuli basoo, babepeye ku lupanga,+ baendawike ninshi nabafwala impapa sha mpaanga, ninshi nabafwala impapa sha mbushi,+ ilyo bali abapiina, ilyo balecula,+ ilyo balebacusha;+ 38 kabili icalo tacalingile ukukwata abantu ba musango uyu. Baendawike mu matololo, mu mpili, mu mimba na mu ncengo+ sha pano isonde.

39 Na lyo line, bonse aba nangu ca kuti Lesa abamwene ukuti bali abalungama pa mulandu wa kuti balikwete icitetekelo, tabapokelele ifyo babalaile, 40 pantu Lesa amwenene libela icilambu icacilapo ukuwama ico aali no kutupeela,+ pa kuti ebalenga ukuba abapwililika ukwabula ifwe.

12 Kanshi apo ikumbi lya nte ilyakula ifi lyalitushinguluka, tupoose conse icafina no lubembu ulutwikata bwangu,+ kabili tuleshipikisha ilyo tulebutuka ulubilo ulo batubikila pa ntanshi,+ 2 ilyo tuletonta amenso kuli Yesu, Intungulushi Iikalamba kabili uulenga icitetekelo cesu caba icapwililika.+ Pa mulandu wa kuti alishibe ukuti ali no kusekelela nga, nshi alishipikishe ilyo alecula pa cimuti ca kucushiwilwapo,* tasakamene ukuseebana, kabili aikala ku kuboko kwa ku kulyo ukwa cipuna ca Bufumu ica kwa Lesa.+ 3 E ico tontonkanyeni pa washipikishe ilyo ababembu balemweba amashiwi yabipa+ aya kupilika ifyo balekabila, pa kuti mwinaka kabili mwitompoka.*+

4 Mu kulwisha ulu lubembu mucili tamulalulwisha ica kuti mwasuuminapo no mulopa. 5 Kabili mwalilabilila fye ifyo Lesa amukonkomesha imwe mwe bana, ati: “We mwana wandi, wilasuula ifyo Yehova* asalapula, kabili wilatendwa nga akulungika; 6 pantu abo Yehova* atemwa alabasalapula, na kuba alafopaula* umuntu onse uo apokelela ukuba umwana.”+

7 Mulingile ukushipikisha pa kuti Lesa amusalapule.* Ifi e fyo Lesa asunga abana bakwe.+ Pantu mwana mwaume nshi uo wishi ashisalapula?+ 8 Nomba nga ca kuti tabamusalapula nga filya bonse babasalapula, ninshi tamuli bana, lelo muli bana bakupula fye. 9 Na kabili, bashifwe abantunse baletusalapula kabili twalebacindika. Bushe nomba tatufwile ukucilapo ukunakila Shifwe uututungulula no mupashi wakwe uwa mushilo pa kuti tutwalilile ukuba aba mweo?+ 10 Pantu bena baletusalapula pa nshiku ishinono ukulingana ne fyo balemona ukuti fisuma, lelo Lesa alatusalapula pa kuti ifintu filetuwamina, na pa kuti tube aba mushilo nga fintu ena aba uwa mushilo.+ 11 Cine cine ukusalapula konse takulenga uo balesalapula aba ne nsansa ilyo line, lelo kulenga aba no bulanda, nomba pa numa, kulatwala icisabo ca mutende, e kutila ubulungami kuli abo bonse abasambililako.

12 E ico kosheni amaboko ayatompoka na makufi ayanakuka,+ 13 kabili muleolola inshila sha kwendamo amakasa yenu,+ pa kuti icilundwa icalemana cifyutuka, lelo cipole. 14 Lyonse mule-esha na maka yenu yonse ukuba aba mutende ku bantu bonse,+ kabili muleba abasanguluka*+ pantu umuntu nga tasangulwike takamone Shikulu. 15 Mulecenjela pa kuti umuntu nangu umo efilwa ukupokelela icikuuku caibela ica kwa Lesa, pa kuti umushila uwalula* wimena no kuleta amafya e lyo no kukowesha abengi;+ 16 kabili muleba abalola pa kuti pali imwe peba nangu umo uwa bulalelale* nangu uwasuula ifya mushilo, uwaba nga Esau, uwakaabwile ububeli bwakwe ne mbale imo iya fya kulya.+ 17 Pantu mwalishiba ukuti pa numa ilyo afwaile ukuti apyane ipaalo balikeene ukumupaala; pantu nangu ca kuti alyeseshe na maka yakwe yonse ninshi alelila ne filamba pa kuti alenge wishi alule ifyo acitile,+ alifililwe.

18 Pantu tamwapalamina ku lupili ulumoneka,+ apaba umulilo uubilima,+ ikumbi ilyafiita, imfifi iyafiita fititi, icimwela icikalamba,+ 19 ipenga ililelila,+ ne shiwi.+ Ilyo abantu baumfwile ili shiwi, bapaapeete ukuti bebeba amashiwi na yambi.+ 20 Pantu balitiinine ifunde ilitila: “Nangu fye ni nama nga yakumya ku lupili, bafwile ukuipoola amabwe.”+ 21 Na kabili, ico bamwene calibatiinishe nga nshi ica kuti Mose atile: “Ndetutuma pa mulandu no mwenso.”+ 22 Lelo imwe mwalipalamina ku Lupili lwa Sione+ kabili umusumba wa kwa Lesa wa mweo, Yerusalemu ya mu muulu,+ na ku minshipendwa ya ba malaika 23 mu kulongana kwa bonse,+ na ku cilonganino ca mabeli ayalembwa mu muulu, kuli Lesa Kapingula wa bonse,+ ku bumi bwa ku mupashi+ ubwa balungama abo alenga baba abapwililika,+ 24 kuli Yesu kawikishanya+ wa cipangano cipya,+ e lyo na ku mulopa uo asuumishe, uulanda bwino ukucila umulopa wa kwa Abele.+

25 Mulecenjela pa kuti mwilakaana ukumfwa ku ulelanda.* Pantu nga ca kuti abalekaana ukumfwa ku walelanda ifyo Lesa alesoka abantu pano isonde tabapuswike, bushe ifwe nga twakaana ukumfwa ku ulelanda ukufuma ku muulu tukapusuka?+ 26 Pali ilya nshita ishiwi lyakwe lyalitenseshe isonde,+ lelo nomba alaya ati: “Nkalitensha na kabili, lelo uno muku te sonde lyeka nkatensha, nkatensha no muulu wine.”+ 27 Nomba amashiwi ya kuti “nkalitensha na kabili” yalangilila ukuti ifintu ifyapangwa ifiletenshiwa bakafifumyapo, pa kuti ifintu ifishiletenshiwa fingatwalilila ukubako. 28 E ico apo twamona ukuti tukapokelela Ubufumu ubushingatenshiwa, natutwalilile ukupokelela icikuuku icaibela icingalenga twalabomba bwino umulimo wa mushilo uwa kwa Lesa, mu katiina ka kwa Lesa no mucinshi. 29 Pantu Lesa wesu aba ngo mulilo uonaula.+

13 Mutwalilile ukutemwana apo muli ba bwananyina.+ 2 Mwilalaba ukulapokelela abeni,*+ pantu mu kucita ifi e mo bamo bapokelele bamalaika ukwabula no kuti beshibe.+ 3 Muleibukisha abo bakaka mu fifungo,+ kwati na imwe balimukakila pamo nabo.+ Na kabili muleibukisha abo balecusha, apo na imwe bene mwaba mu mubili.* 4 Bonse balecindika icupo, kabili tacifwile ukuba icakowela,+ pantu abacita ubulalelale* na bacita ubucende Lesa akabakanda.+ 5 Mwilatemwa indalama mu mikalile yenu,+ lelo muleteka imitima ku fintu ifyo mukwete.+ Pantu alilanda ati: “Nshakakushe nakalya kabili nshakakulekeleshe nakalya.”+ 6 E mulandu wine twingabela abashipa no kulanda atuti: “Yehova* e kaafwa wandi; nshakatiine. Cinshi umuntu engancita?”+

7 Muleibukisha abalemutungulula,+ abamweba amashiwi ya kwa Lesa, kabili nga mwamona ifisuma ififuma mu fyo bacita, mulepashanya icitetekelo cabo.+

8 Yesu Kristu aba fye cimo cine, ifyo aali mailo e fyo ali na lelo, kabili e fyo akaba umuyayaya.

9 Mwileka ifisambilisho ifyalekanalekana kabili fimbi fimbi filemulufya; pantu cawamapo umutima ukukoshiwa ne cikuuku caibela, ukucila ukukoshiwa ne fya kulya,* ifishafwa abafitemwisha.+

10 Twalikwata iciipailo ico ababomba umulimo wa mushilo pe tenti bashakwata insambu sha kulya ifilipo.+ 11 Pantu ifitumbi fya nama isho shimapepo mukalamba abulako umulopa no kuya na o mu ncende ya mushilo mu kuyatuula umutulo wa pa lubembu, fyena bafyocela kunse ya nkambi.+ 12 E ico na Yesu wine aculiile kunse ya mpongolo ya musumba,+ pa kuti alenge abantu babe aba mushilo pa mulandu wa mulopa wakwe.+ 13 E ico, kanshi tufume mu nkambi tuye kuli ena, kabili tuseebane nga fintu aseebene,+ 14 pantu pano tatwakwata umusumba uukatwalilila ukubako, lelo tulefwaisha uukesa.+ 15 Muli Yesu e mo lyonse tuletuulila ilambo lya kulumbanya Lesa,+ e kutila, icisabo ca milomo yesu+ iilumbula ishina lyakwe pa cintubwingi.+ 16 Na kabili, mwilalaba ukucita ifisuma kabili mulepeelako abanenu ifyo mukwete,+ pantu amalambo ya musango uyu yalalenga Lesa asekelela.+

17 Muleumfwila abalemutungulula+ kabili mulebanakila,+ pantu balamulinda* kabili bakalubulwilapo.+ Nga mulecita ifi bakalabomba umulimo wabo ne nsansa, tabakaleba no bulanda, pantu nga baba no bulanda ifintu kuti fyamubipila.

18 Mutwalilile ukutupepelako, pantu natucetekela ukuti twalikwata kampingu iisuma,* pa mulandu wa kuti tufwaya ukuba aba cishinka muli fyonse.+ 19 Lelo ndemukoselesha nga nshi ukuti mulempepelako, pa kuti nkese bwangu kuli imwe na kabili.

20 Nomba shi Lesa wa mutende, uwabuushishe kacema mukalamba uwa mpaanga ku bafwa,+ Shikulwifwe Yesu uwali no mulopa wa cipangano ica muyayaya, 21 amupeele fyonse ifisuma pa kuti mulecita ifyo afwaya, na pa kuti alebombela muli ifwe fyonse ifyo amona ukuti fisuma, ukupitila muli Yesu Kristu. Kuli ena kube ubukata umuyayaya umuyayaya. Ameni.

22 Nomba ndemukonkomesha mwe bamunyinane, ukuti mubike sana amano kuli aya mashiwi ya kukoselesha, pantu kalata imulembeele iipi. 23 Ndefwaya mwishibe ukuti munyinefwe Timote nabamufumya mu cifungo. Nga aisa bwangu, ninshi nkesa nankwe ilyo nkesa mu kumumona.

24 Mumposesheko bonse abalemutungulula, na ba mushilo bonse. Abali mu Italia+ bamuposha.

25 Icikuuku icaibela cibe na imwe bonse.