KALATA YA KUBALILAPO IYA KWA PETRO

1 Ine ne Petro, umutumwa+ wa kwa Yesu Kristu, nalembela imwe mwe balebeshi abasalanganina mu citungu ca Ponte, ica Galatia, ica Kapadokia,+ ica Asia ne ca Bitunia. Mwe basalwa 2 na Lesa Shifwe ukulingana ne fyo umwine aishibile libela+ kabili mwebo umupashi wa kwa Lesa walenga mwaba aba mushilo+ pa kuti mube ne cumfwila, na pa kuti bamusanse umulopa wa kwa Yesu Kristu+ ndeti:

Icikuuku icaibela no mutende filefulilako pali imwe.

3 Acindikwe Lesa kabili Wishi wa kwa Shikulwifwe Yesu Kristu, pantu ilyo abuushishe Yesu Kristu ku bafwa,+ Lesa atukwatiile uluse ulukalamba no kutufyala cipya cipya.+ Ici calenga ukuti tukwate isubilo ilyafikapo,+ 4 ilya kupyana icishingabola, icishakowela kabili icishingakota.+ Ubu bupyani bwaba mu muulu kabili nimwe basungila.+ 5 Mwebo Lesa acingilila ku maka yakwe, pa mulandu wa kuti mwalikwata icitetekelo pa kuti mukakwate ipusukilo ilikeshibikwa bwino bwino mu nshita ya kulekelesha. 6 Ici calilenga mulesekelela nga nshi, nangu ca kuti ni pa kashita fye akanono. Nacilinga ukuti mube no bulanda pa mulandu wa mesho ayalekanalekana,+ 7 ayalenga caishibikwa ukuti icitetekelo cenu+ icacindama ukucila na golde iyonaika nangu ca kuti balaipisha mu mulilo pa kuti beshibe nga ya cine cine, ca cine cine, pa kuti ilyo Yesu Kristu akasokololwa Lesa akamutashe, akamulumbanye kabili akamucindamike pa mulandu wa citetekelo cenu.+ 8 Nangu ca kuti tamwamumwenepo, mwalimutemwa. Nangu ca kuti tamumumona pali ino nshita, mwalimutetekela, mulasansamuka sana kabili mulasekelela nga nshi, 9 pantu mukapokelela icikafuma mu citetekelo cenu, e kutila ipusukilo lyenu.*+

10 Bakasesema abaseseme pa cikuuku icaibela ico mwali no kupokelela, balifwailishe sana kabili balisokwete nga nshi+ pali ili line ipusukilo. 11 Balitwalilile ukufwaya ukwishiba inshita nelyo ifyo iyo nshita yali no kuba ukulingana ne fyo umupashi uwali muli bena walebeba pali Kristu,+ ilyo wabalangiile libela amacushi ayo Kristu aali no kukwata+ e lyo no bukata ubo aali no kwisapeelwa. 12 Lesa alisokolwelele aba bakasesema ukuti ifyo balesesema tafyabakumine, lelo fyakumine imwe, mwebo abantu abalebila imbila nsuma kuli imwe ukubomfya umupashi wa mushilo uo babatumiine ukufuma ku muulu baebele.+ Ifi fine fintu bamalaika balafwaisha ukufishiba.

13 Kanshi ipekanyeni* ku mulimo;+ muletontonkanya bwino;+ mulesubila icikuuku caibela ico mukapokelela ilyo Yesu Kristu akasokololwa. 14 Apo muli bana ba cumfwila, lekeni ukutungululwa no lunkumbwa ulo mwakwete ilyo mushilaishiba Kristu. 15 Lelo filya fine Lesa uwamwitile aba Uwa Mushilo, e fyo na imwe mube aba mushilo muli fyonse ifyo mucita,+ 16 pantu calembwa aciti: “Muleba aba mushilo, pantu Ine ndi wa mushilo.”+

17 Kabili nga mulilila kuli Shifwe uupingula ukwabula akapaatulula+ ukulingana fye ne fyo umuntu umo umo acita, muleba na katiina kuli ena+ inshita yonse ilyo mucili abalebeshi. 18 Pantu mwalishiba ukuti tabomfeshe ifintu ifyonaika, pamo nga silfere nelyo golde, pa kumulubula+ ku mibele yenu iya fye iyo mwapyene ku fikolwe fyenu.* 19 Lelo amulubwilile ku mulopa wa mutengo,+ nga ulya uwa mwana wa mpaanga uwabula akalema kabili uwabula akabi,+ e kutila umulopa wa kwa Kristu.+ 20 Cine cine aishibikwe ilyo icalo tacilabako,+ lelo amoneke mu nshiku sha kulekelesha pa mulandu wenu.+ 21 Mwalitetekela Lesa ukupitila muli ena,+ Lesa uwabuushishe Kristu ku bafwa+ kabili uwamupeele ubukata,+ pa kuti mutetekele kabili musubile muli Lesa.

22 Apo nomba mwalisanguluka* pa mulandu wa kuti mulakonka ifyo icine cilanda kabili ici calilenga mwatemwa aba bwananyina ukwabula ubumbimunda,+ muletemwana nga nshi ne mitima yenu yonse.+ 23 Pantu ukufyalwa mwafyalwa cipya cipya,+ te pa mulandu wa lubuto* ulubola,+ lelo ni pa mulandu wa lubuto ulushibola, ukupitila mu cebo ca kwa Lesa wa mweo, kabili uwabako umuyayaya.+ 24 Pantu “abantu bonse baba nge cani, no bukata bwabo bonse bwaba nga maluba ya mu mpanga; icani ciloma na maluba yalalukuta, 25 lelo icebo ca kwa Yehova* cikabako umuyayaya.”+ Kabili ici “cebo,” e mbila nsuma iyo babilile kuli imwe.+

2 E ico mwilacita ifyabipa ifya misango yonse.+ Mwilaba no bucenjeshi, ubumbimunda, umufimbila no musango onse uwa lwambo. 2 Mube kwati tunya utwafyalwa nomba line,+ mulefwaisha umukaka uwasanguluka uwaba mu cebo ca kwa Lesa, pa kuti nga mwalanwa uyu mukaka, mulekula kabili mukapusuke,+ 3 kulila fye mwalimona* ukuti Shikulu wa cikuuku.

4 Nga mwaisa kuli ena, e kutila ku libwe lya mweo, ilyo abantu bakeene,+ lelo ilyo Lesa asala kabili ilya mutengo,+ 5 ninshi mwe mabwe ya mweo mulekuulwa ukuba ing’anda ya kwa Lesa+ pa mulandu wa bushimapepo bwa mushilo, pa kuti muletuulila Lesa amalambo ya ku mupashi+ ayapokelelwa ukupitila muli Yesu Kristu.+ 6 Pantu mu Malembo ya Mushilo calembwa aciti: “Moneni! Mu Sione ndebikamo ilibwe ilyasalwa, ilya mutengo kabili ilya pa koona ilya kukuulapo, kabili onse uulitetekela takalengwe insoni.”+

7 E ico ni kuli imwe aba uwa mutengo, pantu mwalitetekela; lelo ku bashatetekela, “ili line ilibwe ilyo bakakuula bakeene,+ lyaisaba ilibwe ilya pa muulu pa koona”*+ 8 kabili lyaisaba “ilibwe lya kuipununako kabili icilibwe ca kupunwisha.”+ Aba balaipununa pantu tabakonka icebo ca kwa Lesa. Ifi fine e fyo Lesa ateyanishishe abantu ba musango uyu. 9 Lelo imwe muli “mushobo uwasalwa, bashimapepo kabili ishamfumu, uluko lwa mushilo,+ abantu bakwe abaibela,+ pa kuti mulebila konse fye ubucindami”*+ bwa kwa Lesa uwamwitile ukufuma mu mfifi pa kuti mwingile mu lubuuto lwakwe ulwapesha amano.+ 10 Pantu kale tamwali abantu ba kwa Lesa,+ lelo nomba muli bantu bakwe; kale Lesa tamubelele uluse, lelo nomba alimubelela uluse.+

11 Mwe batemwikwa, apo muli beni kabili abalebeshi,+ ndemukoselesha ukuti mutwalilile ukukanakonkelela ififwaya imitima yenu,+ ifimulwisha.*+ 12 Muleba ne mibele iisuma mu bena fyalo,+ pa kuti ne lyo balemupontela kwati mulacita ifyabipa, bengamona ifisuma ifyo mucita,+ kabili ici cikalenga bakesecindika Lesa pa bushiku akesa mu kuceeceeta abantu.

13 Pa mulandu wa kwa Shikulu, mulenakila umuntu onse uo abantu bapeela amaka ya kutungulula,+ nampo nga ni mfumu,+ pantu e mukalamba pali bonse 14 nelyo nga balashi, pantu e bo imfumu yapeela amaka ya kukanda abacita ifyabipa na ya kutasha abacita ifisuma.+ 15 Pantu Lesa afwaya ukuti mulecita ifisuma pa kuti mwingatalalika* abawelewele abalanda icilandelande.+ 16 Mube abantungwa,+ nomba mwilabomfya ubuntungwa bwenu nga akabepekesho ka kucitilamo ifyabipa,+ lelo muleba nga basha ba kwa Lesa.+ 17 Mulecindika abantu ba misango yonse,+ muletemwa aba bwananyina bonse,+ muleba na katiina kuli Lesa,+ kabili mulecindika imfumu.+

18 Ababomfi balingile ukulanakila ababengisha incito no kubabela akatiina.+ Tabafwile ukuba fye ifi ku basuma kabili abanakilila, lelo na ku ba-afya bene. 19 Pantu Lesa alatemwa nga ca kuti umuntu ashipikisha amacushi no lufyengo pa mulandu wa kampingu yakwe.+ 20 Pantu fisuma nshi fingafumamo nga ca kuti mwashipikisha ilyo balemuma pa mulandu wa kubembuka?+ Lelo Lesa alatemwa nga ca kuti mwashipikisha amacushi ayo mukwata pa mulandu wa kucita ifisuma.+

21 Na kuba ici cine e co Lesa amwitiile, pantu nimwe Kristu aculiile,+ kabili amushiilile icilangililo pa kuti mulekonka sana mu ntampulo shakwe.+ 22 Kristu tacitilepo ulubembu,+ kabili tatalile alandapo ifya bucenjeshi.+ 23 Ilyo balemusaalula,*+ ena tabasaalwilemo.*+ Ilyo alecula,+ talebatiinya, lelo aleituula fye kuli Lesa uupingula+ mu mulinganya. 24 Ena e wasendele imembu shesu+ mu mubili wakwe pa cimuti ico afwililepo,+ pa kuti tulubuke ku membu kabili tulecita ifyalungama.* Kabili “ifilonda fyakwe e fyalengele ukuti mundapwe.”+ 25 Pantu kale mwali kwati ni mpaanga ishaluba,+ lelo nomba mwalibwelela kuli kacema+ kabili kangalila wa myeo yenu.

3 Ifi fine e fyo na imwe mwe bakashi mulecita, mulenakila abalume benu,+ pa kuti na balya abakaana ukukonka ifyo icebo ca kwa Lesa cilanda, bengalacikonka apabula ishiwi nangu limo, nga bamona imibele yenu iisuma,+ 2 pantu abene bakulaimwena imibele yenu iisuma+ ne fyo mwabakwatila sana umucinshi. 3 Mwilabika fye amano ku mimonekele yenu iya kunse—ku kuluka umushishi, ku kufwala ifya golde+ nelyo ku kufwala ifya kufwala ifisuma— 4 lelo mulebika amano ku buntu bwa mu kati na ku fya kufwala fya buko ifishingonaika, e kutila umutima uwaba tondolo kabili uwafuuka,+ uo Lesa amona ukuti wa mutengo uukalamba. 5 Pantu ifi e fyo na banakashi ba mushilo abaliko kale abalesubila muli Lesa baleiyemfya, kabili e fyo balenakila abalume babo, 6 nga filya fine Sara alenakila Abrahamu no kumwita ati shikulu.+ Na imwe muli bana ba kwa Sara, cikulu fye mulecita ifisuma, kabili tamuletiina icintu nangu cimo.+

7 Na imwe mwe balume, mutwalilile ukwikala ifi fine na bakashi benu ukulingana ne fyo mwabeshiba.* Mulebacindika+ nge cipe icanaka, pantu banakashi, kabili imwe muli mpyani pamo nabo+ isha mweo uo mukakwata pa mulandu wa cikuuku ca kwa Lesa icaibela, e pa kuti amapepo yenu yelapelela.

8 Ica kulekelesha ndeti, bonse muleba abaikatana mu fyo mutontonkanya,*+ mulelangulukilana, muletemwana apo muli ba bwananyina, muleba no luse,+ kabili muleicefya.+ 9 Mwilabwesesha ububi pa bubi+ nangu umusaalula pa musaalula,+ lelo abamucita ifi fyonse, mulebapaala.+ Pantu e co Lesa amwitiile ukuti mulepaala abantu pa kuti na o akamupaale.

10 Pantu calembwa ukuti, “uwatemwa umweo kabili uufwaya ukumona inshiku ishisuma, elaleka ululimi lwakwe lulelanda ifyabipa,+ kabili elaleka imilomo yakwe ilebepa. 11 Ataluke ku fyabipa+ kabili alecita ifisuma;+ alefwaya umutende no ku-usungilila.+ 12 Pantu amenso ya kwa Yehova* yalamona abalungama, kabili amatwi yakwe yalomfwa ifyo bamupaapaata,+ lelo icinso ca kwa Yehova* cilalwisha abacita ifyabipa.”+

13 Na kuba, nani engamucita icabipa nga mwalicincila mu kucita ifisuma?+ 14 Lelo nangu mwacula pa mulandu wa kucita icalungama, mukaba ne nsansa.+ Nomba mwilatiina ifyo batiina* kabili mwilasakamikwa.+ 15 Mu mitima yenu mulemona Kristu ukuti ni Shikulu kabili wa mushilo. Muleiteyanya ukwasuka umuntu onse uwingamwipusha pe subilo lyenu, lelo ilyo muleasuka muleba abafuuka+ kabili muleba sana no mucinshi.+

16 Twalilileni ukuba na kampingu iisuma,+ pa kuti ilyo bamupontela, abamupontela bomfwe insoni+ ilyo bamona imibele iisuma iyo mwakwata pa mulandu wa kuti muli basambi ba kwa Kristu.+ 17 Pantu cawamapo ukucula pa mulandu wa kucita icisuma,+ nga e fyo Lesa alefwaya, ukucila ukucula pa mulandu wa kucita icabipa.+ 18 Pantu Kristu afwile fye umuku walimo pa mulandu wa membu shesu,+ uwalungama afwiliile abashalungama+ pa kuti amutungulule kuli Lesa.+ Bamwipeye no mubili wa buntunse,+ lelo abuushiwe no mubili wa ku muulu.+ 19 Kabili uyu wine umubili abuukile na o, e o aile na o mu kushimikila imipashi iyaba mu cifungo,+ 20 iishali ne cumfwila mu nshiku sha kwa Noa,+ lilya Lesa alelolela ninshi nateka no mutima ilyo icibwato calepangwa,+ umo abantu abanono fye, e kutila imyeo* 8 bapusukiile ku menshi.+

21 Icalingana ne ci e cilemupususha pali ino nshita, e kutila ulubatisho ukupitila mu kubuushiwa kwa kwa Yesu Kristu (ulu lubatisho te kusamba ifiko, lelo kulomba Lesa ukuti amupeele kampingu iisuma).+ 22 Yesu aile ku muulu uko aikala ku kuboko kwa ku kulyo ukwa kwa Lesa,+ kabili bamalaika, bamulopwe na ba maka babalengele ukulamunakila.+

4 Apo Kristu aliculile ilyo aali no mubili wa buntunse,+ na imwe bene mufwile ukwenekela ukucula; pantu umuntu nga acula ilyo ali no mubili wa buntunse, ninshi naleka ukubembuka,+ 2 pa kuti inshita iyashala ilyo ali no mubili wa buntunse elacita ifyo abantu bafwaya,+ lelo alecita ifyo Lesa afwaya.+ 3 Pantu inshita mwalecitamo ifyo abantu ba muli ici calo bafwaya, ikalamba sana,+ iyo mwalecita ifya nsoni,* iyo mwali no lunkumbwa, iyo mwalenwesha umwangashi, iyo mwalewowota, iyo mwalekolwakolwa kabili iyo mwalepepamo utulubi nangu ca kuti amafunde yalilesha ukupepa utulubi.+ 4 Abashaishiba Lesa balapapa kabili balamusaalula pa mulandu wa kuti mwalileka ukuba ne mibele yabipa kabili iya kuilekelesha iyo bakwata.+ 5 Lelo aba bantu bakalubulula ku waiteyanya ukupingula aba mweo na bafwa.+ 6 Na kuba, e mulandu wine imbila nsuma yabiliilwe na ku bafwa,+ pa kuti nangu ca kuti abantu balibasuulile ilyo bali abantunse, Lesa engalabamona ukuti ba mweo ukupitila mu mupashi wakwe.

7 Nomba impela ya fintu fyonse naipalama. E ico beni aba mano,+ kabili lyonse muleibukisha* ukupepa.+ 8 Ne cacila pali fyonse ca kuti, muletemwana nga nshi,+ pantu ukutemwa kufimba pa membu ishingi.+ 9 Mulepokelelana ukwabula ukuilishanya.+ 10 Imwe bonse umo umo Lesa alimupeela ubupe. Apo muli babomfi abasuma abo Lesa alanga icikuuku cakwe icaibela mu nshila ishalekanalekana,+ mulebomfya ubupe Lesa amupeela ku kubombela abanenu. 11 Nga ca kuti umo alelanda, alelanda ngo ulelanda amashiwi ya kwa Lesa; nga ca kuti umo alebombela bambi, aleshintilila pa maka ayo Lesa amupeela;+ pa kuti muli fyonse Lesa acindikwe+ ukupitila muli Yesu Kristu. Ubukata na maka fyakwe umuyayaya umuyayaya. Ameni.

12 Mwe batemwikwa, mwipapa pali aya mesho ayo mulekwata+ ayaba ngo mulilo. Mwilayamona kwati cintu icishifwile ukumucitikila. 13 Mulesekelela+ pantu amacushi muleculako e yo na Kristu aculileko,+ ici cikalenga mukasekelele kabili mukabe sana ne nsansa na lintu akasokololwa no bukata bwakwe.+ 14 Abantu nga balemupontela* pa mulandu we shina lya kwa Kristu, ninshi muli ba nsansa,+ pantu ninshi umupashi uwacindama, e kutila umupashi wa kwa Lesa uli na imwe.

15 Lelo umuntu nangu umo pali imwe eculila pa mulandu wa kwipaya nelyo pa mulandu wa bupuupu nelyo pa mulandu wa kucita ifyabipa nelyo pa mulandu wa kuitumpa mu milandu iishimukumine.+ 16 Nomba nga ca kuti umo acula pa mulandu wa kuba Umwina Kristu, eumfwa nsoni+ lelo atwalilile ukulacindika Lesa pa mulandu wa kuti Mwina Kristu. 17 Pantu ino ni nshita ya kuti ubupingushi butendeke mu ng’anda ya kwa Lesa.+ Nomba nga ca kuti ubupingushi bwatendekela pali ifwe,+ cikaba shani kuli balya abakana ukukonka ifyo imbila nsuma ya kwa Lesa ilanda?+ 18 “Kabili uwalungama nga apusuka kwempe, cikaba shani ku uushipepa na ku mubembu?”+ 19 E ico kanshi abalecula pa mulandu wa kucita ifyo Lesa afwaya, batwalilile ukuituula* kuli Kabumba wa cishinka ilyo balecita ifisuma.+

5 E ico apo na ine nine eluda uwamweneko ifyo Kristu acuulile, kabili uukapokelelako ubukata ubukasokoloka,+ ndepaapaata* baeluda abali pali imwe ndeti: 2 Mulecema umukuni wa kwa Lesa+ uo amupeela ukusakamana. Apo nimwe bakangalila,* mwilapatikishiwa fye ukubomba imilimo yenu, lelo apo muli babomfi ba kwa Lesa, muleitemenwa ukubomba;+ mwilabomba pa kuti fye mumwenemo ubunonshi bwa bufumfuntungu,+ lelo mulebomba pa mulandu wa kuti mulefwaisha ukubomba. 3 Mwilatitikisha abantu ba kwa Lesa,+ lelo muleba abantu abo umukuni wingapashanya.+ 4 Kabili ilyo kacema mukalamba+ akamoneka, mukapokelela icilongwe* ca bukata icishingonaika.+

5 Na imwe mwe balumendo, mulenakila abaume abakalamba.*+ Lelo imwe bonse muleicefya* ku banenu, pantu Lesa alacincintila aba matutumuko, lelo alalanga abaicefya icikuuku cakwe icaibela.+

6 E ico muleicefya mwi samba lya kuboko kwa maka ukwa kwa Lesa, pa kuti akamusansabike ilyo inshita ikafika.+ 7 Kabili mulepoosa amasakamika yenu yonse pali ena,+ pantu alamusakamana.+ 8 Beni abalola,+ cenjeleni! Umulwani wenu Satana Kaseebanya, endauka nge nkalamo iilebuluma, iilefwaya uwa kuti ilye.+ 9 Lelo mukaanyeni,+ mube ne citetekelo icakosa, pantu mwalishiba ukuti bamunyinenwe bonse pano calo balakwata amacushi nga aya yene na imwe mulekwata.+ 10 Lelo ilyo mwacula pa nshita iinono, Lesa umwine wa cikuuku conse icaibela, uwamwitile ku bukata bwakwe ubwa muyayaya+ ukupitila muli Kristu, umwine akapwisha ukumusambilisha, akamwikasha,+ akamukosha+ kabili akalenga mwikatelentenshiwa. 11 Shi engaba na maka umuyayaya. Ameni.

12 Silbani,*+ uo ine mona ukuti ni munyinefwe uwa cishinka, e o nabomfya pa kumulembela aya mashiwi ayanono, pa kuti imukoseleshe no kumweba ukuti, ici e cikuuku icaibela ica kwa Lesa ica cine. E mo mwiminine ndi. 13 Umwanakashi uwaba mu Babiloni uwasalwa nge fi fine na imwe mwasalwa, amuposha, Marko umwana wandi na o amuposha.+ 14 Poshanyeni kabili tomonaneni pa kulanga ukuti mwalitemwana.

Umutende ube na imwe bonse mwe basambi ba kwa Kristu.