ICIPUSHO NA. 2
Kuti mwacita shani pa kuti musambilile pali Lesa?
“Ibuuku ili ilya mafunde wileka lifume mu kanwa kobe, kabili ulebelenga ifyalembwa muli ili buuku no kwetetulapo akasuba no bushiku, pa kuti ubike amano ku kulakonka fyonse ifyalembwamo; pantu e lyo ukatunguluka kabili e lyo ukaba uwa mano.”
“Bakonkenyepo ukubelenga mwi buuku ili mwi shiwi ilikalamba, babelengele amafunde ya kwa Lesa wa cine, baleyalondolola, no kubeba umo yalola; kabili balelenga abantu ukumfwikisha ifyalebelengwa.”
“Alipaalwa umuntu uushikonka amano ayapanda ababifi . . . , lelo ena asekelela mu mafunde ya kwa Yehova, kabili abelenga amafunde yakwe no kulayatontonkanyapo akasuba no bushiku. . . . Conse ico acita cikatunguluka.”
“Filipi abutukile ku mbali no kumumfwa alebelenga mwi buuku lya kwa kasesema Esaya, e lyo atile: ‘Bushe cine cine nawishiba ifyo ulebelenga?’ Na o atile: ‘Bushe kuti naishiba shani, apabula uwa kuntungulula?’”
“Imibele yakwe, ukutula fye apo abumbile umuntu, bailukila ku fyo abumba, muli ifi e mo belukila amaka yakwe aya pe pamo na buLesa bwakwe, ica kuti tabakwata umwa kubepesha.”
“Uletontonkanya pali ifi fintu; ulebikako sana amano, pa kuti bonse balemona ukulunduluka kobe.”
“Kabili tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana.”
“Nga ca kutila umo pali imwe abulwa amano, eleka ukulomba kuli Lesa na o akamupeela, pantu Lesa apeela fye kuli bonse ukwabula ukwebaula.”