Calibakuntile Ukwamba Ukushimikila

Umusumba wa Khabarovsk, uwabela ku Kabanga ka Russia uwakwata abekashi 700,000, wakwata ifilonganino ifingi ifya Nte sha kwa Yehova. Abanakashi babili abekala mu mushi wabela mupepi balipokele icitabo ca Kuti Waikala Kuli Pe na pe muli Paradise Pe Sonde. Nangu cibe fyo, Inte mu Khabarovsk, shalifililwe ukubatandalila ku mwabo.

E co aba banakashi batendeke ukwesha apo bengapesha ukusambilila icitabo na Baibolo. Pa numa ya kupwisha, bapingwilepo ukuti cali icakatama icatakama ukwebako bambi pa lwa fyo balesambilila, nge fyacitile Abena Kristu ba mu kubangilila.—Mateo 10:7; Imilimo 20:20.

Pa ng’anda ya kubalilapo, balandile no mwaume no kutendeka isambililo lya Baibolo ilya lyonse. Mu kupita kwa nshita, umukashi no mwana baliilundileko kuli ili sambililo lya Baibolo. Pa numa, ilyo bamonene ne Nte sha kwa Yehova, bonse basano balibatishiwe. Aba banakashi abaitendekeleko ukutandalila bambi pali nomba ni bakashimikila ba nshita yonse.

Na imwe kuti mwakuntwa ukusambilisha bambi ifisambilisho fya mu Baibolo ukupitila mu kubelenga icitabo ca Kuti Waikala Kuli Pe na pe muli Paradise Pe Sonde. Nga mwingatemwa ukukwatako ici citabo nelyo nga mwingatemwa umo ukwisa ku mwenu ku kusambilila Baibolo mu ng’anda apa fye, kuti mwalembela ku Watch Tower, Box 33459, Lusaka 10101, nelyo ku keyala kalinga ukufuma pe bula 5.