Ndatwishika Lelo Ncili Ndefwailisha

UMWAUME uwatile abatishiwe mu Roma Katolika alembele kalata kwi ofeshi linono ilya Nte sha kwa Yehova mu Slovenia no kulomba ati: “Napaapaata ntumineniko akatabo katila Cinshi Cintu Lesa Afwaya Kuli Ifwe? Ndefwaya munjebe ne fyo ningacita pa kulapokelela magazini wa Loleni! ku mwandi lyonse.”

Uyu mwaume alondolwele ati: “Napaapaata mung’umfwikishe bwino. Ndatwishika sana pa fya mipepele, lelo napene mfulungane ilyo nabelengele Loleni! pantu tayaumina fye pa cintu cimo lelo yalondolwele mu kulungika kabili mu nshila ya kuti umuntu asambilila. Lelo moneni magazini wa cila mulungu uwa baRoma Katolika uwitwa Družina [e kutila Ulupwa], uulenga abantu ukuba bacisuminesumine, ukubeba abo bafwile ukuvotela—ukubeba ati kampanda e muntu wesu, kantwa ena te wesu.”

Uyu mwaume alondolwele umulandu ashatumine fye akapepala kaba ku numa ya Loleni! aka kulombelapo broshuwa wa Cintu Lesa Afwaya lelo apingwilepo ukulemba kalata. Atile: “Nshalefwaya ukulepulako nangu kamo muli Loleni!. Nalefwaya ukuisunga fye filya fine yaishile!”

Broshuwa wa mabula 32 uwa Cinshi Cintu Lesa Afwaya Kuli Ifwe? abamo amasambililo 16. Muli aya masambililo e mwaba ifisambilisho fyayanguka ifya mu Baibolo ne fyebo fya mu Baibolo fyalilandwapo ku kulangilila ifyo tufwile ukucita nga tulefwaya Lesa ukutusenamina. Na imwe nga mulefwaya ukulombako uyu broshuwa, lembeni pa kapepala kali pe samba no kukatuma ku keyala kalipo nelyo ku keyala kalinga ukufuma pe bula 5 ilya uno magazini.

□ Ntumineniko broshuwa wa Cinshi Cintu Lesa Afwaya Kuli Ifwe?

□ Mukwai kuti mwaisantandalila ukukuma kwi sambililo lya Baibolo ilya mu ng’anda ilya pa fye.

[Icikope pe bula 32]

Amakope amamilioni 113 mu ndimi 240