Tapali Uwakene Ukupokako

Pa sukulu limo mu Basel, ku Switzerland, kafundisha aebele abana be sukulu ukuti bafwile ukupekanya ukulanda ilyashi lya maminiti 10 ukufika kuli 15 pa mutwe uo cila musambi atemwa. Rosi uuli ne myaka 15 asalile umutwe waleti “Ubwaice Bobe—Ukukwatilamo Ifyawamisha.”

Abasambi banankwe bamwipwishe ati: “Lyashi lya musango nshi ili line? Bushe walalanda pa miti ikola?”

Abaswike ati: “Pembeleni mwalamona.”

Ilyo apwile ilyashi lyakwe, abasambi banankwe balitootele. Lyene Rosi atile: “Yacepa sana amaminiti 15 ukumulondolwela ifyo mwingamwenamo mu nshita ya bwaice.” E co atile: “Nimukwatila ica bupe.” Apeele umusambi umo umo icitabo ca Ifipusho Abacaice Bepusha—Ifyasuko Fibomba, ifyali fyonse pamo 20. Fyalikupilwe bwino no kulembwapo ishina lya musambi umo umo.

Awe bonse balitashishe pa kupeelwa ici citabo kabili pa numa bamwenwe balebebeta ifyaba muli ici citabo, umwaba ifipandwa pamo nga: “Ni Shani Ningalenga Abafyashi Bandi Ukumpeelo Buntungwa Bwafulilako?,” “Ni Shani Ningapanga Ifibusa fya Cine Cine?,” “Mulimo Nshi uwa Kukanshiwa Ningile Ukusala?,” “Ni Shani pa lwa Kwampana kwa Bwamba pa Ntanshi ya Cupo?,” no wa kuti “Ni Shani Ningeshiba nga ca Kuti Kutemwa kwa Cine Cine?”

Ici citabo cakwata ifipandwa 39. Nga mulefwayako cimo, kuti mwalemba pali aka kapepala kali apa no kukatuma ukubomfya akeyala kali pa kapepala kene aka nelyo akeyala kalinga akali pe bula 5 muli uno magazini.

□ Ntumineniko icitabo ca Ifipusho Abacaice Bepusha—Ifyasuko Fibomba.

□ Mukwai na ine kuti bantandalilako pa kuti nkatendeke ukusambilila Baibolo pa ng’anda ukwabula ukulipila.