Ilyo Ukufilwa Panono fye Kuleta Amasanso
PA July 6, 1988, ababomfi ba pa kampani ka Piper Alpha akaba lwa pa kati ka bemba wa North Sea balelungisha cimashini cipompa amafuta lelo tabapwishishe umulimo. Pa mulandu wa kufilwa ukweba ababomfi banabo apo bapeseshe umulimo, abaali mu cipani cakonkelepo bena bafikile fye no kulisha cimashini cipompa amafuta. Umulilo walyambwike. Walibilime sana ukufika na pa muulu wa bemba kabili abantu tabakwete na kwa kubutukila, abantu 167 balifwile.
Pa numa ya myaka 12, pa July 25, 2000, indeke ibutukisha iya mutundu wa Concorde yalibutwike mu musebo wa cibansa ca ndeke ica Charles de Gaulle Airport mu Paris, France. Ilyo yabutwike sana, akacela kanono akali mu musebo kalengele umupeto ukupulika, uku kwine kupulika kwa mupeto kwalepwile itanki lya mafuta. Amafuta yakonkolokele muli injini ya ku kuso kabili amaka ya injini yalipwile no kulenga umulilo uwafikile pali bamita 60 ukwambuka. Pa numa fye ya maminiti nalimo yabili, indeke yailepunka mwi hotela, no kwipaya bonse abalimo e lyo na bali pa nshi.
James Chiles alanda pa masanso ya musango yu mu citabo cakwe ica Inviting Disaster—Lessons From the Edge of Technology, atila: “Mu calo ca ndakai, umwafula fimashini fishibomba bwino limo limo, tufwile ukuba abaibukila pa lwa bonaushi bwabipisha ubo ifilubo finono fingaleta.” Ukulanda pa fyaba mu citabo ca kwa Chiles, ulupapulo lwa Science lutila: “Ukulunduluka kukalamba mu fya sayansi ne fya kupangapanga ukwacitika mu myanda ya myaka iya kupenda kulacincimusha. Kwalenga twalatontonkanya ukuti nalimo twalyumfwikisha fyonse kabili kuti twabomfya fyonse ifya mu calo. [Lelo] tatufwile ukutontonkanya ukuti teti tulufyanye pali lelo nga filya balelufyanya kale.”
Ulupapulo lwa Science ulwalanda pa fya kupangapanga fileta amasanso yabipisha, lutila: “Nangu fye kulufyanya kunono kwalibipisha. Ilyo tulepanga ifintu, tufwile ukukomaila sana pa kupanga ifyapwililika.” Lelo bushe ifyo umuntunse apangapo kale filalanga ukuti ifintu kuti fyapwililika? Napacepa fye! E co amasanso yalekanalekana ayacitika ku mulandu wa kulufyanya yali no kutwalilila icine cine.
Lelo tayakabelelele umuyayaya. Abatiina Lesa kuti balolela inshita kushakabe imfwa pa mulandu wa kufilwa kwa muntunse nelyo ukupelebela. Mulandu nshi? Pantu Lesa, ukupitila mu buteko bwakwe ubwa Bufumu bwa mu muulu, akafumyapo fyonse ifileta imfwa, ubulanda, no kukalipwa.—Mateo 6:9, 10; Ukusokolola 21:3, 4.
[Abatusuminishe Ukubomfya Icikope pe bula 32]
AP Photo/Toshihiko Sato