Ifingalenga Icupo Ukutunguluka

Inyunshipepala ya La Presse yatile: “Ukubepa fye panono e kwingalenga umwaume no mwanakashi abatemwana ukutunguluka.” Iyi nyunshipepala ya ku Canada yalelanda pa masambililo yamo umo baleti ukubepa kwaba fye bwino. Aya masambililo yalembelwe mu lupapulo lwa Journal of Social and Personal Relationships. Tim Cole, uwasoma sana uubombela pa De Paulo University, ku Chicago, mu United States of America, atile: “Nga tulebepa fye panono, kuti twabakilila ubusuma bwaba mu kutemwana ukwabula ukuleta amafya.”

Lelo, bushe cine cine ukufutika e kwingalenga icupo ukutunguluka? Baibolo icincisha Abena Kristu aiti: “Nomba apo mwalipoosa ubufi, lanshanyeni icine umuntu onse no munankwe.” (Abena Efese 4:25) Bushe uku kupanda amano kusuma? Ilyo shimafunde uwimininako abalefwaya ukulekana aipushiwe ilipusho lya kuti, Cinshi icikalamba icilenga abantu ukupaatukana? ayaswike ati: “Ifilenga kukanalanshanya icine, ukukanalanda ifili ku mutima no kufilwa ukumona umwina mwabo ukuti e cibusa wa pa mutima.”

E ico cinshi cingalenga abaupana ukuba aba nsansa? Icipandwa 3 mu citabo citila Icaba Inkaama ku Nsansa sha Lupwa caba no mutwe utila: “Amakii Yabili Ayalenga Icupo Ukubelelela.” Muli ici cipandwa mwalondololwa ifintu fibili ifingalenga abaupana ukwikala pamo ne nsansa, no kubaafwa ukusanga amapaalo ayengi. Kuti mwalomba ici citabo pa kulemba mu mukululo uli pe samba no kutuma ku keyala kali pa mukululo nelyo ku keyala ka mu calo mwikala pe bula 5 muli uno magazini.

□ Ndefwaya icitabo ca Icaba Inkaama ku Nsansa sha Lupwa.

□ Mukwai mukesendandalila pantu ndefwaya ukusambilila ukwabula ukulipila.