Isonde Bushe Likatwalilila Ukubako?
Inyunshipepala ya ku Canada iyo batila Globe and Mail yatile: “Nangu ca kutila abantu pa myake iingi balatiina utuyofi beta ati ‘imilimo ya kwa Lesa,’ pamo nge lyeshi ne cilala, pali nomba baleshingwana no tuyofi tulengwa ne ‘milimo ya muntu’ pa fyabumbwa pe sonde.” Akabungwe ka United Nations Enviroment Programme (UNEP) kafumishe lipoti walandile pa fingi, umo kakonkomeshe abantu ukuleka ukucita ifintu ifingonaula isonde ilyo lishilaonaikilila. Klaus Toepfer uwangalila akabungwe ka UNEP atile: “Twalishiba ifingi ifitulanga ifyo ifintu tucita ne fyo tushicita fingakuma isonde na bekashi be sonde pa kufika mu 2032.”
Fimo mu bwikashi fyaliwamako ukutula apo akabungwe ka UNEP kapangilwe mu 1972. Nga fintu inyunshipepala ya Toronto Star yasosele, “umwela, na menshi ya mu mumana fyaliwaminako mu Bulaya, na mu North Amerika. Kabili umutika wa mu muulu uwa ozone uwaonaike, nomba uliko bwino ifi bakaanya ukubomfya ifyonaula uyu mutika. Amaprogramu ya kusakamana imitengo, pamo nga ya mu Canada, mu Finland, mu Norway na mu United States, “yapampamina pa kuti ukutemaula imiti kukacepeko.” Na lyo line, lipoti wasabankanishiwe na kabungwe ka UNEP atile, ubunonshi bwa fyalo nga bwatwalilila fye ukukula kabili imisumba yakulilako, yasenda ne mpanga na imbi pano isonde, inama mpaanga ne fya mweo fimbi pe sonde fikaba mu bwafya. Inyunshipepala ya Globe yatile: “Abantu balikowesha nelyo ukukamya imimana mupepi na hafu pano isonde. Ifyalo 80 umwaba abantu abengi nga nshi pano isonde, e kutila amapesenti 40 aya mpendwa ya bantu bonse pano calo, filabulilwa amenshi.”
Toepfer acetekelo kuti “ukubombesha kuti kwalenga ifintu ukuwama.” Alundapo no kuti: “Ico tulekabila, kupekanya bwino ifya kubomba imilimo . . . imilimo ya mpomfu . . . kabili ne cacindama kwishibisha abantu ico.” Lelo lisubilo nshi twingakwata nga ca kuti intungulushi sha calo tashilefwaya ukubomba imilimo ingawamya isonde?
Ishibeni ukuti, kwaliba umo “uwaishibisha abantu” ico akacita kabili ‘uukawamya ifintu,’ no yo ni Yehova Lesa. Na kuba, alyeba icintubwingi ukwabula ukupita na mu mbali ati akacitapo cimo no “konaula abaleonaula isonde.” (Ukusokolola 11:18) Kabili, Lesa alayo kuti fyonse ifitungilila ubumi pe sonde fikaba nga filya fine fyali pa kubala. Ifiswebebe fikapuuka. (Esaya 35:1) Ifya kulya fikafula. Imimana tayakatale aikoweshiwa. (Amalumbo 72:16; 98:8) Lesa alayo kuti akapaala ica mweo conse icaba pe sonde.—Amalumbo 96:11, 12.
[Abatusuminishe Ukubomfya Icikope pe bula 15]
Icikope ca ba NASA