Bushe Abana Benu Kuti Baishiba Ifingi?

Abakalamba ilingi tabeshiba ukuti abana kuti basambilila ifingi. Lelo abana balasambilila bwangu ululimi lumbi ukucila abafyashi babo. Ilyo balefisha imyaka ine, abana bamo balalanda indimi shibili nelyo ukucilapo. Umwaka wapwile, Rhonda, umwanakashi wa ku Auburn, Washington, ku United States of America uwaletwishika ukuti umwana munono te kuti eshibe ifingi, alembele ati: “Ndemutasha pa kunenga ukusumina ukuti nalilubile icine cine.”

Rhonda alondolwele ati abelengele ica kukumanya mu Ulupungu lwa kwa Kalinda ulwa August 1, 1988, magazini uufuma pamo na Loleni! kabili atile: “Pe buula 13 paba ifyebo fya kwa nacifyashi wa mwana uwa myaka ine na hafu uwatile ilyo alebelenga Icitabo Candi ca Malyashi ya mu Baibolo kabili aisapemwina, umwana wakwe atwalilile ukulanda ili lyashi ku mutwe ukwabula ukushako ishiwi nangu limo. Alundilepo ukuti asungiile ku mutwe amalyashi ya kutendekelako 33 aya muli ici citabo, pamo na mashina yakosa aya ncende shimo na ya bantu. Pali ilya nshita natontonkenye ukuti ica musango yu tacingacitika. Kwena nalilubile. Nomba nalikwata umwana umwanakashi uwa myaka ine kabili na o alisungila ku mutwe amalyashi ayengi aya mu citabo ca Malyashi ya mu Baibolo.”

Cinshi mwacita ku kukoselesha abana benu ukusambilila? Kuti mwapokako Icitabo Candi ca Malyashi ya mu Baibolo, icakwata amabuula 256 na malyashi 116 ayalanda pa bantu ba mu Baibolo ne fyalecitika iyo nshita. Kuti mwaisushisha aka kapepala no kutuma ku keyala kalipo nelyo ku keyala kalinga pe buula 5 ilya uno magazini.

□ Ukwabula ukushingamwa, kuti natemwa mwantuminako Icitabo Candi ca Malyashi ya mu Baibolo.

□ Mukwai kuti mwaisamona ukukuma kwi sambililo lya Baibolo ilya mu ng’anda ilya pa fye.