Ubulwele bwa Vitiligo E Cinshi?
Ku ulemba Loleni! mu South Africa
◼ Limo limo Sibongile alalanda mu kuseka pa fyo inkanda yakwe yaba. Alanda kwati ni mu kuseka ati: “Nafyelwe uwafita, e lyo nasanguka uwabuuta, nomba nshaishiba ne fyo naba.” Alwala ubulwele beta ati Vitiligo.
Umo nga takwete insandesande shipanga ilangi lya nkanda kuti alwala ubulwele beta ati Vitiligo. Icikonkapo ca kuti umo alakwata ifibala ifyabuuta pa mubili. Kuli bamo ubu bulwele tabubipa, buba fye pamo pene. Lelo kuli bambi, ubu bulwele bulasalangana mu mubili mu kwangufyanya. E lyo kwaba na ba kuti bakwata umusango wapusana uwa Vitiligo uwa kuti balacula panono panono kabili ubulwele buya bulesalangana umubili onse pa myaka iingi. Ubu bulwele tabukalipa kabili tabwambukila.
Te lingi ubu bulwele bumoneka sana nge fyo caba kuli Sibongile, pantu ku bafiita inkanda e ko bumoneka sana. Awe kwaliba abantu abengi abalwala mu misango yalekanalekana. Abafwailisha ifishinka baasanga ukuti aba ncepela fye e balwala. Ubu bulwele tabusala, bonse abaume na banakashi kuti babulwala. Icilenga ukulwala tacaishibikwa.
Nangu ca kutila ubu bulwele tabwakwata umuti uwaishibikwa bwino bwino, kwaba inshila shingi isha kubunashishamo. Tutile uwalwala ubu bulwele alikashika, bulamoneka sana nga aleyanika pa kasuba pa kutila inkanda yakwe ifiiteko. E ico, ukukanaba sana mu kasuba kuti kwalenga ubulwele ukukanamoneka sana. Ku bafiita, amafuta yamo kuti yacefyako ubupusano pa nkanda iituntulu na ilya iyaba no bulwele. Abalwele bamo bamo balipola bwino pa kubomfya ukuundapa ukubwekeshapo imimonekele ya nkanda. Uku kuundapa kusanshamo ukubomfya imiti pa myeshi iingi e lyo no kubomfya bamashini ba myengelele ya maka. Ukuundapa kwine uku limo limo kwalibwekeshapo imimonekele ya nkanda pa cipande cili no bulwele. Abalwele bamo balasalapo ukubomfya imyundapile ya kucefyanyako insandesande sha mimonekele ya nkanda ishipulilemo. Icikalamba bafwaila ukundapile fi ni pa kuti inkanda ilemoneka fye cimo cine. Balabomfya umuti ku konaula nsandesande ishicili mu nkanda ishiilenga ukwaluka.
Abalwala Vitiligo balabombomana ukucilisha ngo bulwele bwasalanganina na ku menso. Sibongile alondolola ukuti, “Nomba line fye ilyo abaice babili bandoleshe, balibutwike baile balapunda. Bambi na bo balankankamba ukulanda na ine, batontonkanya ukuti nakalimo nalwala ubulwele ubwingabambukila nga ca kuti napalamana na bantu kabili bamona kwati nalitiipwa. Ico ningafwaya bambi ukumfwikisha ca kutila tabalekabila ukutiina abalwala ubu bulwele. Te kuti bambule ubu bulwele mu kukumya fye umulwele nelyo mu mwela.”
Sibongile taleka ubu bwafya akwata ukumufuupula mu mulimo wa kusambilisha Baibolo uo atemwa nga nshi apo ni Nte ya kwa Yehova. Uyu mulimo wa kutandalila abantu mu mayanda yabo no kulanshanya na bo mu kulungatika. Atila “Nalishiba ukuti fino fine e fyo naba. Ndomfwa bwino ukuba fino fine, kabili ndolela fye inshita ilyo inkanda nafyelwe na yo ikabwela bwino bwino mu Paradaise wa pe sonde uo Yehova Lesa alaya.”—Ukusokolola 21:3-5.
[Icikope pe bula 28]
Mu 1967, ninshi nshilalwala