“Ukutungululwa no Mupashi wa kwa Lesa”

Ukulongana kwa Citungu Ukwa Nte sha kwa Yehova

◼ Tuli no kukwata ukulongana kwa citungu ukwingi nga nshi inshiku shitatu, uku ukulongana kwatendekeele mu United States mu mulungu wa kulekeleshako uwa mweshi wa May 23-25, nomba mu myeshi iyalakonkapo tuli no kukwata uku kulongana mu misumba iingi nga nshi icalo fye conse. Mu 2007 abantu ukucila pali 12 milioni e basangilweko ku mabungano ya citungu ukucila pali 3,200!

Uno mwaka mu ncende ishingi, ukulongana kukalatendeka ne nshita ya 8:20 a.m. e lyo inyimbo e shikalabalilapo. Umutwe wa kulongana uwa pali Cisano, ukafuma pali Yohane 16:13, ukulatila ‘Umupashi Ukamutungulula mu Cine Conse.’ Amalyashi yamo ayakabalilapo ni aya, “Mulandu Nshi uwa Kulekela Umupashi wa kwa Lesa Ukulatutungulula?” na “Umupashi wa Mushilo—Walibomfiwe mu pa Kubumba Ifintu!” Ilyashi lya Kukonkana likalatila “Aba Busumino aba Kale—Baletungululwa no Mupashi wa kwa Lesa” likakwata imbali ishalekanalekana ishikalatiila, “Mu Nshita ya kwa Mose” “Mu Nshiku sha Bapingushi” e lyo na “Mu Nshita ya Bena Kristu ba Kubalilapo.” Ilyashi ilikalamba likalatila, “Ifyo Yehova Abomfya Umupashi wa Mushilo pa Kufikilisha Ubufwayo Bwakwe,” ili e lyashi likalekeleshako ulucelo.

Ilyashi lya kubalilapo pali Cisano akasuba likalatila “Amasuko ku Mepusho Abengi Bepusha pa Mupashi wa Mushilo,” e lyo pakakonke na malyashi pamo nga “Umupashi Ulafwayafwaya mu . . . Fyashika ifya kwa Lesa” e lyo ne lya kuti “Beni Bakomfwa kabili Bakacita ba Cebo ca kwa Lesa.” Ilyashi lya kukonkana likalatila, “Mwe Misepela—Muletungululwa no Mupashi wa kwa Lesa!” uyu mutwe ukakwata amalyashi na yambi ayakalatiila, “Ku Sukulu,” “Ku Ncito,” “Mu Lupwa,” “Mu Cilonganino,” “Ilyo Muleangala,” na “Ilyo Muli Mweka.” Ilyashi ilisuma nga nshi ilya kulekeleshako pa bushiku bwa kubalilapo ubwa kulongana kwa citungu likalatila “Mwe Baice—Cingilileni Bucibusa Bwenu na Yehova!” muli ili ilyashi bakaafwa imisepela ifyo bengabakilila bucibusa na Yehova.

Umutwe wa kulongana pa Cibelushi ukalatila ‘Ukubyala ku Mupashi,’ ukafuma pa Abena Galatia 6:8. Mu kulongana kwa kacelo mukaba ilyashi lya kukonkana ilya mbali shitatu, likalatila: “Ukulatungululwa no Mupashi wa kwa Lesa mu Mulimo wa Kushimikila.” Ilyashi lya kulekeleshako akacelo, lyashi lya lubatisho, ili ilyashi nga lyapwa abo basuminisha ukubatishiwa bakaya mu kubatishiwa.

Ilyashi lya kubalilapo pa Cibelushi akasuba likalatila, “Abalembele Baibolo—‘Baobelwe ku Mupashi wa Mushilo,’” e lyo pakakonke ilyashi lya kukonkana ilya mbali shisano, ili ilyashi likalatila, “Umupashi wa Mushilo E Utupeela Amaka” “Aya Kucimfya Amatunko,” “Aya Kushipikisha Ilyo Twanaka no Kufupuuka,” “Aya Kushipikisha ilyo Baletucusha,” “Aya Kukaana Ukufwaisha Ukukonkelesha Bambi,” e lyo na “Aya Kushipikisha Amacushi.” Ilyashi ilisuma nga nshi ilikalekeleshako pa Cibelushi likalatila “Ibakileni mu Kutemwa kwa kwa Lesa.”

Umutwe wa kulongana pa Mulungu akacelo ukulatila, “Mule-enda mu Mupashi,” ukafuma pa Abena Galatia 5:16. Ilyashi lya kukonkana ilya mbali 9 likalatila “Lundululeni ‘Ifisabo fya Mupashi’” likalalondolola ifisabo fya mupashi cimo cimo ifyalumbulwa pa Abena Galatia 5:22, 23. Ilyashi lya ku cintubwingi likalatila “Sangeni Amapaalo mu Mfumu ya kwa Yehova!” e likalekeleshako akacelo. Ilyashi limo ilyaibela ilikabako akasuba, cilangililo cikalamba icikwete umutwe wa kuti “Mwileka ‘Ukutemwa Kwenu ukwa pa Kutendeka.’” Ici icilangililo cikalatusambilisha ifyo nalimo cifwile cali mu Bena Kristu ku kupwa kwa mwanda wa myaka uwa kubalilapo. Ukulongana kwa citungu kukasondwelela ne lyashi lya kuti “Ukulabomba ne Cishinka mu Kuteyanya kwa kwa Yehova Ukutungululwa no Mupashi.”

Tampeni ukuipekanya pa kuti mukasangweko. Pa kuti mukeshibe ukwa kulonganina mupepi no ko mwikalila, mukepushe pa Ng’anda ya Bufumu iya Nte sha kwa Yehova iyabela uko mwikalila nangu kuti mwalembela fye ku balemba ino magazini.