Umulwele Alikwata Insambu sha Kuisalila

UULEMBA LOLENI! MU ITALY

◼ Inte sha kwa Yehova balakaana ukubabikamo umulopa. Ico bakaanina ni pa mulandu wa mafunde ya mu Baibolo, kabili ifunde limo ilya kale sana litila: “Lelo inama umuli umweo, umulopa wa iko, mwilalya.” Abena Kristu ba kubalilapo babebele ukuti: “Muletaluka ku . . . mulopa.”—Ukutendeka 9:4; Imilimo 15:29; Ubwina Lebi 17:14.

Mwi tauni lya Monterenzio, ku Italy, abana ba pe sukulu lya sekondari babebele ukulemba pa mulandu cacindamina ukupeela umulopa uwa kuti bakabike mu bantu bambi. Pali aba bana be sukulu pali na Benedetta, Inte ya kwa Yehova. Ena alembele ifi:

“Abantu abengi balishiba ukuti Inte sha kwa Yehova balakaana ukubabikamo umulopa pa mulandu wa kuti balomfwila ifyo Baibolo ilanda, lelo tacipilibula ukuti balakaana ukundapa konse fye. Na kuba, Inte sha kwa Yehova balitemwa ubumi. Balesha na maka ukusanga abengabondapa bwino pamo na bana babo. Bafwaya ukulaumfwana na badokota abalebondapa, kulila fye abo badokota tabalesuusha ifyo ba Nte basuminamo.”

Benedetta alandile no kuti: “Umulwele onse alikwata insambu sha kuisalila imyundapile iyo alemona ati e ingamuwamina, afwile ukucindikwa, kabili alikwata insambu sha kwishiba ubusanso no busuma ifyaba mu myundapile iyo alefwaya.”

Akabungwe kalolekesha pa bapeela umulopa aka mu Monterenzio kalipeele ifilambu ku bana be sukulu abalembele bwino pali uyu mulandu wa mulopa. Magazini ya Monterenzio Vivace yatile: “Balitashishe na pa fyalembele Benedetta Barbi ifyapuseneko ne fyo abantu abengi bacetekela pa mulopa, kabili ifyapusanako ne milimo aka kabungwe kaimininapo. Lelo uyu mwana we sukulu alilandile ifyo umwine asuminamo ukwabula ukusuusha uuli onse kabili alandile mucinshi mucinshi.”

Nangu ca kuti ifyo Inte sha kwa Yehova basumina pa mulopa fyalipusanako ne fyo “abantu abengi bacetekela,” badokota abengi balimona ubusuma bwaba mu kukaana umulopa. Filya ba Nte bakaana ukubabikamo umulopa, calenga badokota basanga inshila ishingi isha kucefeshamo ukusuuma kwa mulopa ilyo balelepula umulwele. Ici calenga ifintu fiwamine ba Nte bene e lyo na bashili ba Nte. Lelo icikalamba ico Inte sha kwa Yehova bakaanina umulopa ni co bakonka ifyo Baibolo ilanda nga filya tulandilepo pa ntendekelo.

Ilyo Inte sha kwa Yehova bakesa pa mwenu, mukabepushe ifyo Kabumba alanda pa mulopa. Bakalanshanya na imwe mu mucinshi.—1 Petro 3:15.

[Akabokoshi ne Cikope pe bula 30]

IFYEBO NA FIMBI

Muli DVD iitila Transfusion Alternatives, bakalapashi abengi balilondolola ifyo aba fipatala na ba mu filye balanda pa mulopa, na pa fintu fimbi ifyo mwingafwaya ukwishiba pa lwa miti mwingabomfya nangu fimbi ificitwa nga tamulefwaya ukuti bamubikemo umulopa. Kuti mwasanga iyi DVD ku Nte sha kwa Yehova.