“Ukukanacetekelana Bwafya Ubuli mu Calo fye Conse”

Mu West Africa, umwaice uwa myaka 12 nabamuteka mu cipatala pa mulandu wa kuti umuti wa malaria uo banyina bamupeele tawali wa cine cine kabili baushitile mwi tuka ilyaishibikwa bwino na ku buteko. “Dokota wa pali ici cipatala atila, pa myaka 15 iyapita tulasanga imiti iishili ya cine iingi iyo bashitisha.a

Mu Asia, abafyashi ba mwana umunono balipapile ukusanga ukuti umukaka balepeela umwana wabo uo balumbilishe ukuti mukaka usuma sana walikwete sumu. Ku ca bulanda umwana alifwile.

Shimakwebo umwina America alibiile abantu abo alecita nabo amakwebo indalama isha madola amabilioni ayengi sana! Abengi basangile ukuti indalama shabo isha penshoni balibebile shonse mu fyo baleita ukuti “ubufumfuntungu ubwakulisha ubushatala abucitikapo mu myaka 100.”

MU CALO ilelo, mupepi fye no uuli onse balimubepapo ku bantu abo acetekele. Nangu fye mikalile mu calo conse na yo nayafya nga nshi ne calenga ni cilya inyunshipepala ya ci French iya Le Monde yaitile ati “Ukukanacetekelana Bwafya Ubuli mu Calo fye Conse.”

Finshi fyalenga ukuti kube “ukukanacetekelana”? Bushe kwaliba abo mwingacetekela?

[Futunoti]