Icalo ca Mongolia

GENGHIS KHAN, aali mushilika uushali na mwenso uwaliko mu myaka ya ba 1100 C.E, kabili e watendeke ukupoka incende ishalekanalekana ishaishilepanga ubufumu bwa bena Mongol. Pali ino inshita abena Mongol bashala fye ne ncende inono iitwa nomba ukuti icalo ca Mongolia. Ici calo caba pa kati ka calo ca Russia ne calo ca China kabili tamwaba sana abantu.

Icalo ca Mongolia calikwata impanga iikalamba umushaba imiti lelo umumena fye icani icipi, kabili mwaliba impili ishitali, e lyo ne mimana. Ku kapinda ka ku kulyo aka ici calo kwaliba iciswebebe ico beta ukuti Gobi Desert. Ici ciswebebe calilumbuka pantu mwaliba amafupa ya nama ishikalamba ishaliko kale sana isho beta ukuti ama dinosaur. Ici calo caba apasansama, kabili abekala calo beta ici calo ukuti, “Icalo ca Muulu Walengama.” Ili ishina lyalilinga pantu mu mwaka fye umo akasuba kabalika inshiku 250!

Ku Mongolia, inshita ya lusuba nga yafika kulakaba sana ukufika na ku madigri 40 e lyo mu nshita ya mpepo namo kulatalala sana ica kuti kwaba na menshi makaasa. Mupepi na hafu ya bena Mongolia tabakuula amayanda, lelo bakukakuka fye. Lyonse nga bwaca umulimo babalilapo ukubomba kukama umukaka ku mbushi, ku ng’ombe, ku ngamila nelyo kuli bakabalwe. Abena Mongolia balitemwa ukulya ifya kulya ifyo bapangila ku mukaka e lyo no kulya inama. Inama batemwa sana ukulya ni mpaanga.

Abena Mongolia bekala mu mayanda ayo bapangila na matenti ayo beta ukuti gers kabili pa mulandu wa kuti balikwata sana icileela, tabakoma mu mayanda pa kuti umuntu onse uulepita kuti aingilamo no kulyamo utwa kulya uto bashiila abapita nshila. Ilingi umweni nga afika, balamupekanishisha tii ya mukaka iya cifulefule umo baluunga no tumucele utwalinga.

Abena Mongolia abengi baBudha kabili mwaliba abaShamani, abaShilamu, na Bena Kristu, e lyo bambi bena tabapepa nangu kumo. Mu Mongolia mwaba Inte sha kwa Yehova 350 kabili balasambilisha Baibolo ku bantu ukucila pali 770.