Ukukoselesha

Ubulondoloshi: Cintu cimo icipeela ukushipa nelyo ukupeela isubilo. Uuli onse alakabila ukukoselesha. Ukukupeela kuti kwafwaya ukucita ukwafwa kwa pa lobe nelyo ukulumbulula ukutesekesha. Ilingi line cibimbamo ukwafwilisha umo ukumona fintu engabomba ne mibele yayafya nelyo ukulanshanya imilandu ku kucetekela mu nshita ya ku ntanshi iyawamapo. Baibolo ipayanya icitendekelo cisuma ica kukoselesha kwa musango yo, na malembo ayambwilwe pe samba kuti yaba aya kwafwa mu kuyapeela ku bantu balolenkana ne mibele yalekanalekana. Pa nshita shimo ubusuma ubwingi bulacitwa pa kulangisha fye imibele ya kulangulukilako.—Rom. 12:15.

Kuli abo abalekumanya amesho pa mulandu wa KULWALA—

Ukus. 21:4, 5: “[Lesa] akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya. Kabili uwaikala pa cipuna ca bufumu atile, Moneni, ifintu fyonse nafilenge fipya. Kabili atile, Lemba: pantu ifyebo ifi fya cishinka kabili fya cine.”

Mat. 9:35: “Yesu aendawike mu mishi yonse iikalamba ne inono, alesambilisha . . . alebila ne mbila nsuma ya bufumu no kuposho bulwele bonse no kunakuka konse.” (Pa kulundanya ukuposha kwa musango yo no kushimikila kwakwe pa lwa Bufumu, Yesu apayenye ukumwena kabela ukwa kupapusha ukwa cintu akacita ku mutundu wa muntu mu kati ka Kuteka kwakwe ukwa Myaka Ikana Limo.)

2 Kor. 4:13, 16: “Na ifwe tuletetekela . . . E ico tatunenuka; lelo nangu ubuntu bwesu bwa ku nse [umubili wesu uumoneka] boonaika, ubwa mu kati bwena bulengwa cipya cipya [nelyo ukupeelwa ubukose bupya] ubushiku no bushiku.” (Kuti twaonaika mu mano ya ku mubili. Lelo lwa ku mupashi tulengwa cipya cipya ilintu tutwalilila ukulya pa malayo yaumo mutengo aya kwa Lesa.)

Moneni na kabili Luka 7:20-23.

Ku bantu abalufya abatemwikwa babo mu MFWA—

Esa. 25:8 9: “Akamine mfwa ukumina kwa pe, Shikulu Yehova akafuuta ne filamba pa finso fyonse. . . . Muli ubo bushiku abantu bakatila, Moneni Lesa wesu uyu, uo twalelolela ukuti aletupususha. Uyu ni Yehova, uo twalelolela. Tuleanga no kusamwa mu kupususha kwakwe.”

Yoh. 5:28, 29: “Mwisunguka pali ici; pantu inshita ileisa, iyo bonse aba mu nshishi bakomfwamo ishiwi lyakwe, no kufumamo; abalecite fisuma bakabuukila ku mweo, na abalebombe fibi bakabuukila ku bupingushi.”

Yoh. 11:25, 26: “Yesu atile kuli wene, ni ine kubuuka kabili umweo: uuntetekala, nangu afwa, akaba no mweo; na onse uuli no mweo kabili antetekela, takafwe umuyayaya. Bushe watetekela ici?”

Ilumbo 146:5, 9: “Alishuka uo . . . icilolelo cakwe cili kuli Yehova Lesa wakwe. . . . Inshiwa na mukamfwilwa alabapuupuutula.” (Nomba line Lesa alikwata ukwangwako kwabamo kutemwa ukwa musango yo ku bafwilwa.)

Moneni na kabili Luka 7:11-16; 8:49-56.

Ku bantu abalolenkana no KUPAKASWA pa mulandu wa kucita ukufwaya kwa kwa Lesa—

Ilumbo 27:10: “Ilyo tata na mayo bandekelesha, e lyo Yehova ambuula.”

1 Pet. 4:16: “Ngo muntu acula pa kubo mwina Kristu, eba ne nsoni, lelo acindikile Lesa muli ici.”

Amapi. 27:11: “We mwana wandi, ube uwa mano, ulenge umutima wandi ukusamwa, ukuti njasuke ku ulenseebanya.” (Pa kuba ne citetekelo tupayanya icasuko ku kulanda kwa bufi ukwa kwa Satana ukwa kuti takuli nangu umo uulecula ubwafya bukalamba akatwalilila ukubombela Lesa.)

Mat. 5:10-12: “[Ba nsansa] abalamatilwa pa mulandu wa bulungami; pantu ubufumu bwa mu mulu bwabo. Muli [aba nsansa] ilyo balemupontela, no kumulamata, no kumwambo bufi icintu conse ica bubifi pa mulandu wa ine; sekeleleni no kwanga pantu icilambu cenu cikalamba mu mulu; pantu e fyo balamete bakasesema ba ntanshi.”

Imil. 5:41, 42: “E ico, [abatumwa] bafumine pa cinso ca cilye balesekelela, ico balingilwe abawaminwo kucendelwa Ishina; kabili ubushiku no bushiku tabalekele ukusambilisha no kubila mwi tempele na kumyabo kuti Yesu e Kristu.”

Fil. 1:27-29: “Ici fye, ikaleni imiikalile iyawamine mbila nsuma ya kwa Kristu . . . Kabili mwiba abatentuka ku cintu nangu cimo ku fibambe fyenu: ukushipa kwenu kuli bene cishibilo ca kulango boni bwabo, lelo ca kulenge pusukilo lyenu, icafuma kuli Lesa. Pa kuti kuli imwe capeelelwa pa mulandu wa kwa Kristu, te kumutetekela fye, lelo no kumuculila pamo.”

Kuli abo abapomponteka pa mulandu wa LUFYENGO—

Amalu. 37:10, 11: “Pashala panono, e lyo umubifi takabepo; awe ukalolekesha apo ali, no kusanga tabapo: lelo abalanda bakapyaninine calo, no kuilemeno bwingi bwa mutende.”

Esa. 9:6, 7: “Umwana nafyalilwa kuli ifwe, umwana mwaume napeelwa kuli ifwe; bukateka bukaba pa kubeya kwakwe, ne shina lyakwe akenikwa, Kabilo wa cipesha amano, Mulungu impalume; Wishi wa nshita pe, Cilolo wa mutende. Ku kukula kwa bukateka bwakwe, na ku mutende, takwakabe mpela, pa cipuna ca kwa Davidi, na pa bufumu bwakwe, ku kucipampamika no kucitungilila ku bupingushi kabili ku bulungami, ukutula pali nomba ukufika na ku muyayaya. Ukucincila kwa kwa Yehova wa milalo kukacite ici.”

Dan. 2:44: “Mu nshiku sha shamfumu ishi Lesa wa mu mulu akemyo bufumu ubushakonaulwe umuyayaya, no bufumu bwa buko tabwakashiilwe ku bantu bambi; bukashonaula no kupesha aya mabufumu yonse, kabili bukeminina umuyayaya.”

Moneni na kabili Esaya 32:1, 2; 2 Petro 3:13.

Kuli abo abatitikishiwa nga nshi ku MPIKA SHA MU FYA NDALAMA—

Esa. 65:21, 22: “Bakakuula amayanda no kwikalamo, bakalima na amabala ya myangashi no kulye fisabo fya yako; tabakakuule na bambi abekalamo, tabakalime na bambi abalyako. . . . Imilimo ya minwe yabo abasalwa bandi bakasekelamo pa myaka iingi.”

Amalu. 72:8, 16: “Ibe [Imfumu ya buMesia] no bufumu ukutula kuli bemba no kufika kuli bemba, kabili ukutula ku Mumana no kufika ku mpela sha calo. Mube ukupaka kwa ngano mu calo, na pa mulu wa mpili.”

Mat. 6:33: “Mubale mufwaye ubufumu bwa kwa Lesa no bulungami bwakwe, ne fi fyonse [ifikabilwa fya bumi ifya ku mubili] fikalundwako kuli imwe.”

Rom. 8:35, 38, 39: “Ni ani akatupaatulako ku kutemwa kwa kwa Kristu? Bushe bucushi, napamo kushikitika, napamo kupakaswa, napamo cipowe, napamo bwamba, napamo kupooswa ku bulwani, napamo lupanga? Pantu ndesuubila, ndeti, nangu ni mfwa, nangu mweo, nangu ni bamalaika nangu ni bamulopwe, nangu fintu ifyabapo nangu fintu ifikesabako, nangu fya maka, nangu kusansama nangu kushika, nangu cibumbwa cimbi, te kuti cibe na amaka ya kutupaatulako ku kutemwa kwa kwa Lesa ukwa muli Kristu Yesu Shikulwifwe.”

Moneni na kabili AbaHebere 13:5, 6.

Ku bantu umo umo abafuupulwa pa mulandu wa KUPELEBELA kwabo kwine—

Amalu. 34:18: “Yehova aba mupepi na ku baputuke misana, kabili abafunshike mitima alabapususha.”

Amalu. 103:13, 14: “Ifyo shibo acite nkumbu ku bana bakwe, e fyo Yehova acite nkumbu ku bamutiina; pantu wene aliishibe mibumbilwe yesu, aibukisho kuti tuli lukungu.”

Nehe. 9:17: “Imwe muli Lesa wa kubelelo luse ukwingi, mulasenamina kabili muli ba nkumbu, mukokolo kukalipa, kabili mwafulo luse.”

2 Pet. 3:9, 15: “[Yehova] talafyalafya ku kufishe co alaile, filya bamo batungo kulafyalafya; lelo atekanya kuli imwe pa kukanafwayo muntu ukonaika, lelo onse ukulola ku kulapila. Kabili tungeni ukutekanya kwa kwa Shikulwifwe ukuti lipusukilo.”