Amashiwi ya Kutampilapo

Kuli Bakabelenga:

Bushe mumfwa ukuti mwalipalama kuli Lesa? Abengi, bamona kwati teti bapalameko nangu panono. Bamo balatiina abati aliifinya; bambi baimona ati tabalinga nangu panono ukupalama kuli wene. Lelo, Baibolo itukoselesha mu mutembo aiti: “Palameni kuli Lesa, na o alapalama kuli imwe.” (Yakobo 4:8) Umwine alaya na bamupepa ati: “Ine, ne Yehova Lesa obe, nkekato kwa kulyo kobe, nkatila kuli iwe, Witiina, ine nakulakwafwa.”—Esaya 41:13.

Kuti twatinamina shani ubu bucibusa busuma na Lesa? Bucibusa bonse twambana, bushintilila pa kwishiba uyo muntu, ukukumbwa no kutemwa imibele yakwe iyaibela. E ico imibele ya kwa Lesa ne micitile yakwe iyasokololwa mu Baibolo, fintu fikalamba twingasambililapo. Ukutontonkanya pa fyo Yehova alangisha imibele yakwe yonse, ukumona ifyo Yesu Kristu alangishe iyo mibele bwino bwino, no kumfwikisha ifyo na ifwe twingaba ne yo mibele kuli no kutupalamika kuli Lesa. Tukamona ukuti Yehova e wakwate nsambu kabili e walinga no kuba Mulopwe wa bubumbo bonse. Na kabili, e Shifwe uo ifwe bonse tukabila. Apo wa maka, wa bupingushi, wa mano, kabili wa kutemwa, talekelesha abana bakwe aba busumino.

Shi ici citabo nacimwafwe ukupalama kuli Yehova Lesa pe, ukwambana bucibusa na wene ubushakapwe pa kuti mukabe no mweo ku kumulumbanya umuyayaya.

Ni fwe Bakalemba