Amashiwi ya Kutampilapo

Ku Balebelenga Cino Citabo,

‘Iseni mulenkonka.’ (Marko 10:21) Aya mashiwi e yo Yesu Kristu alandile pa kutwita ukuti tumukonke. Bushe mulamukonka? Nga mwamukonka, ala mukamona ifyo mukekala bwino. Mulandu nshi?

Yehova atumine umwana wakwe uwafyalwa eka pa calo pa kuti atuule ubumi bwakwe ku kutulubula. (Yohane 3:16) Umwana wine uyu uwatufwilile alitulangile ne fya kwikala. Mu fintu fye fyonse ifyo alecita, aali uwa cishinka kuli Wishi kabili fyonse ifyo alecita fyalesansamusha Wishi. Yesu na kabili alitulangilile ifyo twingapashanya Wishi. Ifyo alecita ne fyo alelanda fyalelangilila bwino bwino ifyo Wishi aba ne fyo afwaya.—Yohane 14:9.

Baibolo itila Yesu, ‘ca kumwenako cesu ukuti tukonke bwino bwino mu ntampulo shakwe.’ (1 Petro 2:21) Nga tulefwaya ukupalama kuli Yehova, ukwikala bwino pali ino nshita, e lyo no kutwalilila ukwenda mu nshila ya ku mweo wa muyayaya, tufwile ukukonka bwino bwino mu ntampulo sha kwa Kristu.

Pa kutendeka ukukonka Yesu, tufwile ukwishiba ifyo ubumi bwakwe bwali ilyo aali pano calo. E ico tufwile ukubelenga no kutontonkanyapo sana pa fyo Baibolo yalanda pali ena. Tukeshiba bwino ifyo twingakonka Yesu nga tuletontonkanya pa fyo alelanda ne fyo alecita, no kutontonkanya pa fyo twingamupashanya mu nsoselo shesu na mu fyo tucita.

Tulesubila ukuti cino citabo cikamwafwa ukutemwa sana Yesu na Yehova. Kabili ukutemwa kwine uku nakumulenge ukulakonka bwino bwino mu ntampulo sha kwa Yesu, pa kuti mulesekesha umutima wa kwa Yehova pali ino nshita na ku ciyayaya.

Ni fwe bakalemba