ISAMBILILO 6

Bushe Cikaba Shani ku Bantu Abafwa?

1. Ni mbila nsuma nshi Baibolo itweba pa bafwa?

Lasaro nabamukumbatila kuli bankashi yakwe Marita na Maria ilyo abushiwe

Ilyo Yesu afikile mu Betani itauni lyali mupepi na Yerusalemu, ninshi napapita ne nshiku 4 ukutula apo umunankwe Lasaro alifwilile. Yesu aile ku nshiishi ne nkashi sha kwa Lasaro, Marita na Maria. Mu nshita fye iinono, abantu abengi balilongene. Elenganyeni ifyo Marita na Maria batemenwe ilyo Yesu abuushishe ndume yabo Lasaro!—Belengeni Yohane 11:21-24, 38-44.

Pali ilya nshita Marita alishibe kale imbila nsuma ya kuti abafwa bakabuuka. Alishibe ukuti Yehova akabuusha abafwa pa kuti bakaleikala pa calo.—Belengeni Yobo 14:14, 15.

2. Bushe abafwa baba shani?

Adamu abumbwa, kabili pa numa afwa — Lesa aebele Adamu ukuti: “Uli lukungu, kabili ku lukungu e ko ukabwelela.”—UKUTENDEKA 3:19.

Lesa abomfeshe ulukungu pa kupanga abantu. (Ukutendeka 2:7; 3:19) Tatuli mipashi iikala mu mibili. Lesa atupangile no mubili, kanshi takwaba nangu cimo icifuma mu mubili nga twafwa. Nga twafwa, bongobongo na yo ilafwa, na matontonkanyo yalaloba. E mulandu wine Lasaro ashalandile nangu cimo pa fyo aleumfwa ilyo afwile pantu abafwa tabaishiba akantu nangu kamo.—Belengeni Amalumbo 146:4; Lukala Milandu 9:5, 6, 10.

Bushe abantu nga bafwa, Lesa alaya mu kubalungulusha mu mulilo? Baibolo isambilisha ukuti abafwa tabeshiba akantu nangu kamo, kanshi icisambilisho ca kuti kwaliba umulilo wa pe ca bufi kabili cilasaalula Lesa. Na kuba, Lesa alipata ici cimusango ca koca abantu mu mulilo.—Belengeni Yeremia 7:31.

Tambeni vidio ileti: Bushe Abafwa Baba Shani?

3. Bushe abafwa kuti balanda na ifwe?

Abafwa te kuti balande kabili te kuti bomfwe. (Amalumbo 115:17) Nomba kwaliba bamalaika ababipa abaipanga kwati bantu abafwa kabili aba e balanda na bantu. (2 Petro 2:4) Yehova alikaanya ukulanda na bafwa.—Belengeni Amalango 18:10, 11.

4. Ni bani bakabuushiwa?

Umwaume uwabuushiwe asambilila pali Lesa. Kabili na o asambilishako bambi ababuushiwa.

Abantu abengi abafwa bakabuuka. Nangu fye bantu bamo abashaishibe Lesa kabili abalecita ifyabipa bakabuushiwa.—Belengeni Luka 23:43; Imilimo 24:15.

Abakabuushiwa bakasambilila icine pali Lesa, bakatetekela Yesu kabili bakalamumfwila. (Ukusokolola 20:11-13) Abakabuushiwa kabili abakalacita ifisuma bakekala bwino pa calo umuyayaya.—Belengeni Yohane 5:28, 29.

5. Bushe ifi Yehova akabuusha abafwa fitusambilisha finshi pali ena?

Lesa alengele tukwate isubilo lya kuti abafwa bakabuuka lintu atumine Umwana wakwe ukwisatufwila. Kanshi ifi Yehova akabuusha abafwa fitusambilisha ukuti alitutemwa kabili wa cikuuku. Ni bani maka maka mufwaya ukwisamona ilyo abafwa bakabuuka?—Belengeni Yohane 3:16; Abena Roma 6:23.

Nga mulefwaya ukwishibilapo na fimbi, belengeni ifipandwa 6, 7, na 10 mu citabo citila Bushe Cinshi Baibolo Isambilisha?