Ubufumu Ubukateka Abantu Bonse

Bushe naubwishiba Ubufumu tulelandapo?— Bufumu bwa kwa Lesa, ubukalenga icalo conse ukuba paradaise. Bushe kuti watemwa ukwishibilapo na fimbi pali ubu Ubufumu?—

Mu fyalo fyonse mulaba abateka. Bushe walimwishiba Kateka wa Bufumu bwa kwa Lesa?— Ni Yesu Kristu. Ekala ku muulu. E ukalateka abantu bonse pano calo. Bushe ifintu fikawama ilyo Yesu akalateka icalo conse?—

Fikawama icine cine. Mu Paradaise abantu tabakalelwa nelyo ukuya ku nkondo. Bonse tukatemwana. Takwakabe ukulwala nelyo ukufwa. Impofu shikalamona, bankomamatwi bakalaumfwa kabili abalemana amolu bakalabutuka no kutoloka. Bonse tukalakwata ifya kulya ifingi. Inama shonse shikala-angalila pamo kabili shikalaikala pamo na bantu mu mutende. Abafwa bakabuuka. Abengi abo wasambililapo muli kano katabo pamo nga Rabeka, Rahabu, Davidi na Eliya nabo bakabuuka. Bushe kuti watemwa ukwisabamona ilyo bakabuuka?—

Yehova alikutemwa kabili afwaya ukuti ube ne nsansa. Nga watwalilila ukusambilila pali ena kabili nga ukalamumfwila, ukekala umuyayaya muli paradaise iisuma sana. Bushe ulafwaya ukwikala muli paradaise?—