Abashilika ba kwa Yehova

Lyonse Ben-hadadi imfumu ya ku Siria alesansa abena Israele. Lelo imfumu ya Israele yalebelama pantu kasesema Elisha aleisoka. E ico Ben-hadadi asalilepo ukuyaikata Elisha. Bamwebele ukuti Elisha ali mu musumba wa Dotani, e ico atumine abashilika abena Siria ukuyamwikata.

Abena Siria baile ku Dotani ubushiku. Ilyo umubomfi wa kwa Elisha afumiine panse ulucelo, amwene ibumba ilikalamba ilya bashilika nalishinguluka umusumba. Alitiinine sana, e lyo aipusha ati: ‘Ba Elisha, twalacita shani?’ Elisha amwebele ati: ‘Abali kuli ifwe bengi ukucila abali kuli bena.’ Palya pene, Yehova alengele umubomfi wa kwa Elisha amona bakabalwe na maceleta ya nkondo aya mulilo yali mu mpili shonse ishashingulwike umusumba.

Ilyo abashilika abena Siria balefwaya ukwikata Elisha, apepele ati: ‘Mwe Yehova lekeni bapofule.’ Apo pene fye abashilika tabaishibe uko baali nangu ca kuti balemona. Elisha aebele abashilika ati: ‘Namuluba, te muli uno musumba ekala. Nkonkeni nalamutwala ku muntu mulefwaya.’ Abashilika batendeke ukukonka Elisha mpaka bayafika na ku Samaria ukwaleikala imfumu ya bena Israele.

Ilyo abena Siria baishibe uko bali, tapaali nangu cimo ico bali no kucita. Imfumu ya bena Israele yaipwishe Elisha ati: ‘Bushe mbepaye?’ Bushe Elisha alisumiine ukuti babepaye pa kuti alandule pa fyo balefwaya ukumwipaya? Awe. Elisha atile: ‘Mwibepaya. Bapeeleni ifya kulya e lyo mubaleke babwelelemo.’ E ico imfumu yalibapangiile umutebeto, pa numa yalibalekele babwelelamo.