Ukupakasa Kwatwalilila mu Burundi

MU KUBANGILILA mu 1989, ba kateka ba luko lwa cina Africa ulwabela pa kati ulwa Burundi lwafumfumwine ibimbi lya kupakasa pa Nte sha kwa Yehova. Nga fintu cacitilwe lipoti mu lwafumine ulwa Ulupungu lwa kwa Kalinda, ulwa August 15, 1989, abalashi baeseshe ukupatikishe Nte ukuleke citetekelo cabo, ukubomfyo ukululunkanya, ukwikata, ukuuma, ne nshila shimbi isha buluku. Cinshi cabe mibele ukutule lyo?

Lipoti na umbi ukufuma mu Burundi isosa ukuti mu kati ka kutandala kwa kwa kangalila wa citungu ku Kinyinya na Gitega, abalashi baeseshe ukwikata ifilundwa fya cilonganino pa kulongana. Kangalila wa citungu na kangalila wa muputule balitungulwike mu kufyuka, lelo abo abaiketwe pasanshiwe abana be sukulu lya ku sekondari babili no mukashana wa mu sukulu lya ku praimari. Bonse balyuminwe. Ubushiku bwakonkelepo Inte abaiketwe bamonekele pa ntanshi ya kwa kafinala kabili balondolwele umulandu bashingabela ifilundwa fya kabungwe ka bupolitiki. Na kabili balyuminwe. Amalipoti na yambi yaleshimika ulwa fya kucitika fyapalako.

Eluda wa Bwina Kristu uwashingamwa mu Burundi alembo kuti: ‘‘Takuli Inte ya kwa Yehova uwabalaekatwa pa mulandu wa kwiba, ubukomi, nelyo ukupinuna ubuteko. Nga ca kuti abalashi balikwata imilandu ya cine cine ku kukanda Inte, lekeni bacite ico mu cilye ca pa lwalala mu cifulo ca kulungulusha abana calo ba mutende, ukupoka ifikwatwa fyabo, no kulababutausha nge nama sha mpanga. Bamunyina abengi mu kati balikakililwako ku kubutuka pa mayanda yabo no kwikala kwati ni mbutushi. Nkashi umo untu umulume wakwe aba mu cifungo aliya mu kumona abalashi abengi mu kubombesha ukufwaya umulume wakwe ukulekelwako. Alyebwo kubwelelamo mu kuba ne casuko ca kuti: ‘Tatwingabala atulekelako umulume obe ilintu ulepokelela indalama ukufuma ku calo ca ku nse pa kuti ufulunganye icalo cesu.’ We bukwakwa we!”

Kwaliba, nangu cibe fyo, ilyashi lisuma ukufuma ku Burundi. Inte kulya tabacemwa nelyo ukutiinishiwa. Mu kusakamana lelo mu cishinka ukushimikila kwa mbila nsuma kuletanunuka, kabili bamunyina na bankashi baleishiba ukuti mu kucetekela kwakumanina muli Yehova kuti bashipikisha. Amakalata ayengi yalelumbulula ukukalifiwa kale kale yalilembelwa ku Burundi, kabili ukwabulo kutwishika na yambi ayafulilako yakakonkapo lintu icalo caishibo kuti Burundi aletwalilila kampeini ya iko iya kupakasa iyabulwo luse ukulwisha Inte sha kwa Yehova.

[Akabokoshi pe bula 15]

Adresi ya kwa presidenti wa Burundi ni:

His Excellency Major Pierre Buyoya

President of the Republic of Burundi

Bujumbura

REPUBLIC OF BURUNDI