Ukusange Nsansa—Lelo Kwi?

YESU asosele ukuti: “Aba nsansa ni abo abaibukila ulwa kukabila kwabo ukwa ku mupashi.” (Mateo 5:3, NW) Umukashana wafumaluka uwacaice mu Middle East aali uwaibukila pa lwa kukabila kwakwe ukwa ku mupashi kabili alefwaya ukusekesha Lesa. Mu kupelako, alisangile insansa—lelo kwi? Twalaleka alondolole.

“Nakushiwe mu lupwa lwa butotelo bwa ciKatolika ubwa cina Maronite. Ifwe fwe bana twakanshiwe ukupepa cila cungulo pa ntanshi ya fipasho, kabili ukufuma ku bwaice nakwete ukufwaisha kwa kubombela Lesa.

“Pa mushinku wa myaka 17, naingile mu convent (iŋanda ya bashimbe banakashi) ku kuba nani, ukutontonkanya ukuti iyi kuti yaba ni nshila ya kwikusha ukufwaisha kwandi. Nangu cibe fyo, namwene ifintu ifingi pa kati ka banani ifyo ifyancushishe. Baambile umo no munankwe. Abasambi tabapeelwe ifya kulya fyakumanina, ilintu banani baipakishe ifya kulya fyawamisha. Kabili kwali imibele ya bucisenene pa kati ka banani na shimapepo. Uwalengwe nsoni icabipisha, nalifumine pa convent pa numa ya myeshi pabula no kubwelela ku mwesu.

“Nali ncili na mepusho ayengi ayabulwo kwasukwa, kabili ilintu nshali na maka ya kusanga ifyasuko fya kwikusha kuli yene, nafikile pa cipimo ca kukanasakamana pa lwa butotelo. Lyene, mu 1982, lintu nali ne myaka 22, ndume yandi uwa ku mubili na nkashi nandi balesambilila Baibolo ne Nte sha kwa Yehova. Abafyashi bandi na ine twalibakeenye. Ndume yandi aculile ukupakaswa ukwingi, ukupumwa, no kubikwa mu cifungo pa mulandu wa citetekelo cakwe icipya. Icanjebekeshe, nangu ni fyo, cali kwaluka kukalamba uko acitile mu bumi bwakwe. Mu kulundapo, apeele ifyasuko fyabamo amano ifya Baibolo ku fipusho ifyo naleipusha pa nshita ntali. E co mu bumfisolo natendeke ukubelenga Baibolo ne mwine ubushiku.

“Kasuba kamo nalikonkele ku kumona ukulongana kwa Nte sha kwa Yehova. Nalyebekeshiwe ku kutemwa kwalangilwe kulya. Takwali bupusano pa kati ka bakankala na bapiina. Inte bekala mu kuumfwana na fintu basambilisha. Nalishininwe ukuti balikwete icine.

“Pa numa fye ya kulongana, naipwishe umo uwa bene ukusambilila na ine. Namwebele ukuti nalefwaya fye ukusambilila, te kusangwa ku kulongana nangu ukuya mu kushimikila. Nangu cibe fyo, namwene mu kwangufyanya ukuti nalesambilile cine. Nalipepele no kupingulapo ukubombela Yehova. Pa October 28, 1983, ndume yandi, nkashi nandi, na ine twalibatishiwe. Nomba nalisangile inshila ya kwikusha ukufwaisha kwandi ukwa kubombela Lesa uko nakwete ukutula ku bwaice.

“Imyeshi ibili pa numa ya lubatisho, natendeke bupainiya bwa kwafwilisha, kabili imyeshi cinekonsekonse pa numa nabele painiya wa nshita yonse. Umwaka umo na citika pa numa, nalilaalikwe ukubombela pe ofesi lya musambo wa Nte sha kwa Yehova, ilyaishibikwa nga Bethel, ico nacitile mu kwafwilisha pa myaka ibili. Nalyebekeshiwe ku kuicefya kwalangilwe na bonse. Bamunyina baba mu fishingamo fikalamba bayakeene mu mulimo wa kusamfya ifipe pa numa ya ca kulya ca cungulo.

“Pa March 14, 1988, nabele icilundwa cibelelela ica lupwa lwa Bethel. We kashita ka nsansa! Ee, nalisangile nsansa. Kwi? Pa kati ka Nte shaipeela isha kwa Yehova! Nomba njumfwa nga kemba wa malumbo uwasosele ukuti: ‘Ubushiku bumo mu mansa shenu bwawama ukucile nshiku ikana limo [kumbi, NW].’”—Ilumbo 84:10.