“Kabili Apako Na ku Mulume Wakwe”
BUSHE Adamu e po aali ilyo insoka yalandile kuli Efa no kubeleleka wene mu kupondoka ukulwisha Lesa? Baibolo tailangilila ici. Ukutendeka 3:6 kulondolola ukuti Efa “abuulako ifisabo fya uko, alalya kabili apako na ku mulume wakwe.” Nangu cibe fyo, amabupilibulo yamo aya Baibolo yapeela itontonkanyo lyapusanako. King James Version ipilibula ilembo nge fyakonkapo ukuti: “Abuulile ifisabo fya uko, no kulya, kabili apeele na ku mulume wakwe; na o aliliile.”
Verbu wa ciHebere iyapilibulwo kuti “apako” yaba mu musango wa nsoselo uushapwililika kabili walundanishiwa ku musango waibela uwa kulundinkanya “kabili” [IciHebere, waw], muli fyo ukulangilila umutande wa pa nshita inono nelyo ukukonkana kwabamo amano. E ico, New World Translation ipilibula ukumoneka ukwingi ukwa waw, uko kulundanya umulongo wa fya kuponako mu Ukutendeka 3:6, te mu kuba fye na “kabili” lelo na kabili na mashiwi yambi yakonkana, pamo nga “mu kukonkapo” “e co,” na “pa numa.” New World Translation muli fyo yakwata icishinte cakosa ku kupilibula kuli pa mulu.
Bushe Adamu mu kusuminisha aali no kumona mu kutalalila ukulanshanya pa kati ka mukashi wakwe ne nsoka, ukukutika ku bufi no kulanda kwa lwambo ukwa kwa cipondoka ushimoneka ku numa ya nsoka? Ku ca kusekesha, uwasambilila Baibolo umu Germany J. P. Lange alakaana iyi mfundo no kulandapo ukuti: “Ukubapo kwa muntu mu kati ka ncitilo ya kutunka, nangu fye kuba kwakwe tondolo, te kuti celenganishiwe.” Kabili mu kulondolola insoso “na o,” uwa kulandapo umuYuda B. Jacob alumbulula ukuti “ici [tacipilibula] uwaiminine na wene (mu kati ka ncitilo ya kubangilila nelyo lintu alelya).”
Ukulanshanya kwa kwa Efa ne nsoka kwasokolwele ukuti umulume wakwe alimucinkwileko pa lwe kambisho lya kwa Lesa ilya kukanalya ku cimuti. (Ukutendeka 3:3) E co nga umutwe wa kwa Efa, Adamu alifikilishe ico cishingamo. Ciwa asuulile ukutantika kwa kwa Lesa ukwa bumutwe kabili mu bucenjeshi ashukile icishinka ca kuti Efa ali eka. Pa numa ayaswike ukuti: “Insoka—e yambeleleka na ine nalya.” (Ukutendeka 3:13) Efa alibelelekwe pa kuti asumine ubufi, lelo ici tacalungamike ulubembu lwakwe. Ici ica kumwenako ca kusoka cilangilila ukuti te kuti tubale atukwata ubwelelo ku kucita icintu calubana mu menso ya kwa Yehova.—1 Timote 2:14.