Ubumi bwa kwa Yesu no Butumikishi

Ukuipakisha Ukwampana Kwabamo Isenge

UKUKONKA pa ca kulya ca cibukisho, Yesu alekoselesha batumwa bakwe mu kulanshanya kwa kufuma pa mutima pa mbali. Kuti pambi nacicila pa kati ka bushiku. E co Yesu acincisha ukuti: “Imeni tufumemo.” Nangu cibe fyo, ilyo tabalaya, Yesu, ukuseshiwa ku kutemwa kwakwe ukwa kuli bene, atwalilila ukulanda, ukupayanya icilangililo ca kukunta.

“Ni ine mwangashi wine wine, kabili Tata e mulimi,” e fyo atendeka. Umulimi Mukalamba, Yehova Lesa, abyele uyu mwangashi wa cimpashanya lintu asubile Yesu no mupashi wa mushilo pa lubatisho lwakwe mu lusuba lwa 29 C.E. Lelo Yesu atwalililo kulangisho kuti umwangashi wimininako ifyafula ukucila fye wene, ukusoso kuti:

“Umusambo onse uwa muli ine uushitwala aufumyamo, no musambo onse uutwala autungwila, ukuti utwalishe. . . . Ifyo umusambo te kuti utwale uwine weka, kano waikala mu mwangashi, ifyo fine nangu ni imwe, kano mwaikala muli ine. Ni ine mwangashi, imwe muli misambo.”

Pa Pentekoste, inshiku 51 pa numa, abatumwa na bambi baba misambo ya mwangashi lintu umupashi wa mushilo wapongolwelwa pali bene. Mu kupelako, abantu 144,000 babe misambo ya mwangashi wa cimpashanya. Pamo ne citimbatimba ca mwangashi, Yesu Kristu, aba bapanga umwangashi wa cimpashanya uutwale fisabo fya Bufumu bwa kwa Lesa.

Yesu alondolola ulufungulo ku kutwale cisabo ukuti: “Uwaikala muli ine, na ine muli wene, wene e utwalisha (ico mbula ine te kuti mucite kantu iyo).” Nga ca kuti, nangu cibe fyo, muntu afilwa ukutwale cisabo, Yesu atila, “apooswa ku nse ngo musambo, no kuuma; kabili bailonganya no kuipoosa mu mulilo, kabili yapya.” Pa lubali lumbi, Yesu alayo kuti: “Nga mwaikala muli ine, ne fyebo fyandi fyaikala muli imwe, lombeni ico mulefwaya, na co cikamucitilwa.”

Yesu atwalilila ukulangisha icicindamika Wishi, ukucilumbula, “nga mwatwalilila ukutwalishe fisabo ifingi no kuishininkisha mwe bene ukuba basambi bandi.” (NW) Icisabo Lesa afwaya ku misambo kulangisha kwabo imibele yapala iya kwa Kristu, ukucilisha ukutemwa. Mu kulundapo, apo Yesu aali kabilisha wa Bufumu bwa kwa Lesa, icisabo cikabilwa na co cisanshamo incitilo ya kupanga nga fintu wene acitile.

“Ikaleni mu kutemwa kwandi,” e fyo nomba Yesu acincisha. Nalyo line, ni shani abatumwa bakwe bengacite ico? “Nga mwabaka amafunde yandi,” e fyo asosa, “mwakulaikala mu kutemwa kwandi.” Mu kutwalilila, Yesu alondolola ukuti: “Ili e funde lyandi, ilya kuti mutemwane, ifyo natemwa imwe. Takuli untu akwato kutemwa ukwacila pali uku, ukwa kuti umuntu apoosele ababiye umweo wakwe.”

Mu maawala yanono, Yesu ali no kulangisha uku kutemwa kwacilapo pa kupeela ubumi bwakwe pa mulandu wa batumwa bakwe, pamo pene na kuli bonse bambi abakabelesha icitetekelo muli wene. Ica kumwenako cakwe cilingile ukusesha abakonshi bakwe ukukwata ukutemwa kwa musango umo wine ukwa kuipeela bulilambo kuli umo no munankwe. Uku kutemwa kukabeshibisha, nga fintu Yesu alondolwele mu kubangilila ukuti: “Muli ici e mo bonse bakeshibilo kuti muli basambi bandi, nga mwaba no kutemwana.”

Ukwishibisha ifibusa fyakwe, Yesu atila: “Ni imwe [fibusa fyandi, NW], nga mwacite fyo imweba. Nshamwite abasha kabili; ico umusha taishiba ifyo shikulu wakwe acita: lelo namwita [ifibusa fyandi, NW]; ico namulenga mwishibe fyonse ifyo naumfwile kuli Tata.”

Mwandi kwampana kwakatama—ukuba ifibusa fye senge ifya kwa Yesu! Lelo pa kutwalilila ukuipakisha uku kwampana, abakonshi bakwe bafwilo “kutwalililo kutwale cisabo.” (NW) Nga batwalilila, Yesu atila: “Tata [akamupeela] conse ico mwingalombela mwi shina lyandi.” Mu kushininkisha, ico cilambu cikalamba pa kutwale cisabo ca Bufumu!

Pa numa ya kucincisha na kabili abatumwa bakwe ukuti “mutemwane,” Yesu alondolola ukuti icalo cikabapata. Nalyo line, abasansamusha ukuti: “Nga aba pano isonde bamupata, mwaishiba ukuti babala bapata ine.” Yesu mu kukonkapo asokolola umulandu icalo capatila bakonshi bakwe, ukusoso kuti: “Ico tamuli ba pano isonde, lelo ine namusalile mu ba pano isonde, e co aba pano isonde bamupatila.”

Ukulondolola mu kulundapo umulandu wa lupato ku calo, Yesu atwalililo ukuti: “Fyonse ifi bakacitila kuli imwe pa mulandu we shina lyandi, ico tabaishiba [Yehova Lesa] uwantumine.” Imilimo ya kwa Yesu iya fipesha mano, mu nshila imo ine, ipeela umulandu abo bamupata, nga fintu asoso kuti: “Mbulacita muli bene imilimo iyo takuli umbi uwacitile, nga tabakwete ulubembu; lelo nomba balimona, na kabili bapata ine na Tata.” Muli fyo, nga fintu Yesu asosa, ilembo lyafikilishiwa ilitila: “Bampatile apa fye.”

Nga fintu acitile mu kubangilila, Yesu na kabili abasansamusha pa kubalaya ukutuma kaafwa, umupashi wa mushilo, uwaba maka yabomba aya kwa Lesa. “Uyo uukashimiko bunte pa lwa ine; na imwe, mu kukonkapo, muli no kushimiko bunte.”—NW. Yohane 14:31–15:27; 13:3, 35; Abena Galatia 6:16; Ilumbo 35:19; 69:4.

▪ Ni lilali lintu Yehova abyele umwangashi wa cimpashanya, kabili ni lilali kabili ni shani bambi babo lubali lwa mwangashi?

▪ Mu kupelako, misambo inga intu umwangashi wa cimpashanya wakwata?

▪ Cisabo nshi Lesa afwaya ukufuma ku misambo?

▪ Ni shani twangaba ifibusa fya kwa Yesu?

▪ Mulandu nshi icalo capatila abakonshi ba kwa Yesu?